Nge Yog Reb E Gum’ircha’ Nib M’agan’ Jehovah Ngay

“A Got, mu sunmiy reb e gum’ircha’ nib machalbog u fithik’ag, mag ta’ reb e lem nib biech ngay, ni reb nib mudugil.”​—PSALM 51:10, New World Translation.

1, 2. Mang fan ni susun ngad lemnaged gum’irchadad?

IR be’ nib n’uw ma ba pichoay. Nap’an ni ke guy Samuel ni profet fak Jesse ni bin nganni ma kari gin’ ngak ma ke yog ni ir e ke mel’eg Got ni nge mang pilung u tomuren Saul. Machane ke yog Jehovah ni gaar: “Dabmu yaliy feni pichoay [ere fak ni pumoon nem] nge n’umngin. Ya kug n’ag. . . . Girdi’ e yad ma guy be’ u wuru’ i downgin, mi gag e gu ma guy gum’irchaen e girdi’.” Me aw ni ke mel’eg Jehovah David ni ir e bin wen i fak Jesse​—“ni ir reb e pumoon nib fel’ u wan’.”​—1 Samuel 13:14; 16:7.

² Rayog rok Got ni nge nang e tafinay ko girdi’, me taaboch me tamilangnag ni gaar: “I gag Jehovah, e gu ma fal’eg i yaliy e gum’ercha’, ma gu ma fal’eg i yaliy e kidney, ma gu ma pi’ ban’en ngak be’ ni be yan u rogon kanawoen, nge rogon wom’ngin e n’en ni ke rin’.” (Jeremiah 17:10, NW) Arrogon, “Jehovah e ir e ma yaliy e gum’ircha’.” (Proverbs 17:3) Machane mang gum’ircha’ e ri ma fal’eg Jehovah i yaliy? Ma uw rogon ni nge yog ngodad e gum’ircha’ nib m’ag u wan’ Got?

“Pangiy nib Mith ni Bay u Gum’irchaey”

3, 4. Baga’ ni ma fanay e Bible fare bugithin ni “gum’ercha’” ni be yip’ fan e mang? Mu weliy boch murung’agen.

³ Fare bugithin ni “gum’ircha’” e kan yoloy ni gonapan ba biyu’ yay ko fare Babyor nib Thothup. Ma baga’ ni kan fanay e re n’ey ni be yip’ fan ban’en. Ni bod ni, i yog Jehovah ngak Moses ni profet ni gaar: “Mog ngak pi fak yu Israel, ni ngar pied boch e ayuw ni fan ngog: Nge yib rok urngin e pumoon ni gum’ircharad e ke k’aringrad ni ngar pied e ayuw ni fan ngog.” Ma piin ni kar pied a ayuw e “kar bad, ni yad urngin e piin gum’ircharad e ke k’aring.” (Exodus 25:2; 35:21) Ba tamilang ni, bang ko fare gum’ercha’ ni be yip’ fan ban’en e aram e n’en ni ma k’aringey ni ngan rin’ ban’en​—ni aram ba gelngin ni bay u fithik’ey ni ma l’ogdad ni ngada rin’ed ban’en. Gum’irchadad ni be yip’ fan ban’en e ku ra m’ug ko lem rodad nge rogon ni gad be thamiy ban’en, nge tin ni gad ma ararnag nge t’ufeg rodad. Fare gum’ircha’ e rayog ni nge sug ko damumuw ara marus, maku ra gafgow nbochan e kireban’ ara kari sug ko falfalan’. (Psalm 27:3; 39:3; John 16:22; Roma 9:2) Ku rayog ni nge ufanthin ara nge sobut’an’, nge runguy ara nge fanenikay.​—Proverbs 16:5; Matthew 11:29; 1 Peter 1:22.

⁴ Ma rogon riy, e “gum’ircha’” e baga’ ni yima taarebnag ko k’aringan’, nge lem nib elmirin, ma “tafinay” e aram e tamilangan’. Aray rogon min nangfan e yu bugithin ney nfaan yad ra m’ug u taabang u lan e Bible. (Matthew 22:37; Filippi 4:7) Machane fare gum’ircha’ nge tafinay e gathi l’agruw i thin nib thil. Ni bod ni, i fonownag Moses piyu Israel ni gaar: “Thingar mu lemnaged ban’en u gum’irchamed [ara, “thingari yib ngan’umed,” footnote] ni Jehovah e ir e Got nib riyul’.” (Deuteronomy 4:39) Ma piin scribes ni yad be makathnag Jesus, e i yog ngorad ni gaar: “Mang fan ni gimed be lemnag e tin nib kireb u lan gum’erchamed?” (Matthew 9:4, NW) “Ngan nang ban’en” nge “tamilangan’” nge “ngan weliy ban’en” e ku rayog ni ngan puthuy ko fare gum’ercha’. (1 Kings 3:12; Proverbs 15:14; Mark 2:6) Arfan ni fare gum’ercha’ ni be yip’ fan ban’en, e ku ba l’ag ngay e tamilangan’ rodad​—lem rodad ara llowan’ rodad.

5. Mang fan fare gum’ircha’ ni be yip’ fan ban’en?

⁵ Rogon ni yog reb e babyor, e fare gum’ircha’ ni be yip’ fan ban’en e “fithik’ey ni gaangin yang, ni fithik’ i laniyan’ e girdi’ ni be gagiyelnag faanem ko urngin e pi n’en ma rin’, ni aram e pi n’en ni be yim’ ni bochan, nge runguy rok, nge lem nib gel ni ma gafgow laniyan’ riy ara falfalan’ rok, nge pi n’en ni be nameg, nge pi n’en ni be lemnag, nge tin ba’ ko nangan’ rok, nge pi n’en ni yugu be lemnag, nge gonop rok, nge llowan’ rok, nge salap rok, nge michan’ rok nge fan ni ma rin’ ban’en, nge laniyan’ nge pi n’en ni manang.” Aram e n’en ni be dagdad ko gad ba miti mang u fithik’dad, “ni aram pangidad nib mith u fithik’ fare gum’ircha.” (1 Peter 3:4, NW) Aram e pi n’en ma guy Jehovah ma ma skengnag. Arfan, ni David e rayog ni meybil ni gaar: “A Got, mu sunmiy u fithik’ag ba gum’ircha’ nib machalbog, ma ga tay nga fithik’ag reb e lem nib biech ma ba mudugil.” (Psalm 51:10) Uw rogon me yog ngodad ba gum’ircha nib machalbog?

“Nge Fol Gum’irchaem” ko Thin Rok Got

6. Mang fonow ni ke pi’ Moses ngak piyu Israel u nap’an ni ur pared ko Tagpas u Moab?

⁶ Nap’an ni be fonownag Moses pi fak yu Israel ni yad be muulung ko fapi Tagpas nu Moab u m’on ni nga ranod ko fare Binaw ni kan Micheg, i yog ngorad ni gaar: “Nge fol gum’irchamed ko thin ni gu be yog ni gu be ginangmed e daba’, ni aram e ngam ted chilen ngak pi fakmed ni ngar tiyan’rad ngar ayuweged urngin e thin ni bay ko re motochiyel ney.” (Deuteronomy 32:46) Kan nog ngak piyu Israel ni “nguur tedan’rad.” (Knox) Kemus ni ngari t’uf ni ngari tamilang e pi motochiyel rok Got u wan’rad ma aram e rayog rorad ni ngara filed e pi n’ey ngak pi fakrad.​—Deuteronomy 6:6-8.

7. Mang e ba l’ag ngay ni ‘ngada puluwnaged gum’irchadad ko Thin rok Got?

⁷ Tin nrib t’uf ni ngan rin’ ma aram rayog ni nge yog e gum’ircha’ nib machalbog e ngan maruweliy ni nge tamilang u wan’uy e tin nib m’agan’ Got ngay nge tin ni be finey ni nge rin’. Kemus ni taareb tabolngin ere tamilangan’ nem, ni aram e Thin rok Got ni kan thagthagnag. (2 Timothy 3:16, 17) Yugu aram rogon, ma tamilang e dabiyog ni go’ ir e ra ayuwegdad ni nge yog ngodad e gum’ircha’ ni ra falfalan’ag Jehovah. Rayog ni nge ayuwegdad e tamilangan’ rodad ni nge m’ug pangidad ni rogon ni bay e fithik’dad, ya thingarda ‘puluwnaged gum’irchadad’ ara “ngada ted nga gum’irchadad,” e tin kada filed. (Deuteronomy 32:46, An American Translation) Uw rogon ni ngan rin’ e re n’ey? David ni psalmist e be weliy ni gaar: “Ke yib ngan’ug e pi rran ni ke yan kakrom; kug fal’eg i lemnag urngin e maruwel ni kam ta’; rib m’agan’ug ngay ni nggu tiyan’ug ko tin ni kam fal’eg nga paam.”​—Psalm 143:5.

8. Mang boch e deer nrayog ni ngada fal’eged i lemnag u nap’an ni gad be fil ban’en?

⁸ Maku thingarda fal’eged i lemnag e tin ni ke rin’ Jehovah u fithik’ e falfalan’. Nap’an ni gad ra beeg e Bible ara fapi babyor ni kan fek u Bible, ma ba t’uf ni ngada fal’eged i lemnag fapi deer riy ni: ‘Mang e be fil ngog e re n’ey u murung’agen Jehovah? Mang felngin Jehovah ni kan dag u roy ku guy? Mang e be fil ngog e pi thin ney u murung’agen ban’en ni baadag Jehovah nge ban’en ni dabun? Mang angin nra yib ni ngan fol ko kanawo’ ni baadag Jehovah ni ngan taarebnag ko ngan fol ko kanawo’ ni be fanenikan? Uw rogon nib m’ag e pi n’ey ko tin ni kug nang?’

9. Uw feni ga’fan e fol babyor ni goo gadad nge ngan fal’eg i lemnag?

⁹ Lisaa ni guyey nge l’agruw e duw yangaren e ke weliy rogon ni kari falfalan’ nga angin e fol babyor ni ma fal’eg i lemnag fan u fithik’ e yul’yul’ ni gaar: “Tomren ni kan taufenageg ko duw ni 1994, ma kug par ni gub pasig ko tin riyul’ ni sogonapan l’agr’uw e duw. Gu ma un ko urngin e muulung ko Kristiano, ma gu ma thognag 30 nge mada’ ko 40 e awa ko machib, ma gu ma chag ngak e pi Kristiano u lan e ulung. Munmun mug tabab ni nggu m’an i yan nga orel. Ke gel e magawon rog ma aram kug th’ab e motochiyel rok Got. Machane kug od ma kug dugliy ni nggu beechnag e yafas rog. Ma kari falan’ug ya ke nang Jehovah gelngin e kalngan ni kug ta’ ma ke fel’ u wan’ ni nggu sul ngak biyay! Ma baga’ ni gu ma fal’eg i lemnag ma nggog ni gaar: ‘Mang fan ni kug chel nga bang?’ Fare fulweg ni ma yib ngan’ug e bochan ni kug pag e fol babyor nge nggu fal’eg i lemnag u fithik’ e yul’yul’. De taw fare thin u Bible nga gum’irchaeg. Ka chiney i yan nga m’on, ma fol babyor nge ngan fal’eg i lemnag e aram e tin baga’ fan ko yafas rog ni gubin ngiyal’.” Nap’an ni ra mon’og e tamilangan’ rodad u murung’agen Jehovah, nge Fak, nge Thin rok, ma ri baga’ fan ni ngad ted e tayim ni ngan fal’eg i lemnag ban’en u fithik’ e yul’yul’!

10. Mang fan ni ngan gurgurnag ni ngada ted e tayim ni fan ko fol babyor ni goo gadad nge ngan fal’eg i lemnag?

¹⁰ U lan e re fayleng ney ni boor pa’ riy, e ke mo’maw’ ni ngan gay e tayim ni fan ko fol babyor nge fal’eg i lemnag. Machane, piin Kristiano e chiney e yad ba sak’iy nga langan e garog ko fare Binaw ni kan Micheg ni yira ngat ngay​—ni aram fa bin nib biech e fayleng nib mat’aw. (2 Peter 3:13) Pi n’en nra buch ni ma gin e girdi’ ngay, ni bod ngal’an ni ngan thang fare “Babylon nib Gilbuguwan” ma fare cham nra tay “Gog ko fare binaw nu Magog” ngak e girdi’ rok Jehovah, e kari chuchugur. (Revelation 17:1, 2, 5, 15-17; Ezekiel 38:1-4, 14-16; 39:2) Ma n’en nra buch boch nga m’on e sana ir e ra skengnag e t’ufeg rodad ku Jehovah. Ngada gurgurgad ni ngada fanayed e tayim ni fan ko tin nib fel’ ma ngada puluwnaged gum’irchadad ko Thin rok Got!​—Efesus 5:15, 16.

‘Mu Fal’eg Rogon Gum’irchaem ni Ngam Yaliy e Thin Rok Got’

11. Uw rogon ni kan taarebnag gum’irchadad ko but’?

¹¹ Fare gum’ercha’ ni be yip’ fan ban’en e rayog ni ngan taarebnag ko but’ ni fare awochngin e thin riyul’ e rayog ni ngan yung ngay. (Matthew 13:18-23) But’ nib riyul’ e baga’ ni yima munguynag nsom’mon ni nge mudugil ni nge dammal e woldug ni ngan yung ngay. Taareb rogon ko fare gum’ercha’, ni thingarni fal’eg rogon fa nge fel’ rogon ya nge gel boch ni nge adag e Thin rok Got. Ma Ezra ni fare prist e ke “fal’eg rogon gum’irchaen ni nge yaliy fare motochiyel rok Jehovah me fol riy.” (Ezra 7:10) Uw rogon ni ngada fal’ged rogon gum’irchadad?

12. Mang e ra ayuwegey ni ngan fal’eg rogon fare gum’ircha’ ni fan ko fol babyor?

¹² Rogon ni ngan fal’eg rogon gum’irchaey e nap’an ni gad ra fil e Thin rok Got ma ngada meybilgad u fithik’ e yul’yul’. Fapi muulung ko Kristiano nib riyul’ e yima tababnag ko meybil ma yima museg ko meybil. Rib puluw ni nap’an ni gad ra fil e Bible ni goo gadad ma ngada meybilgad u fithik’ e yul’yul’ ma ngada ululgad i ning e ayuw ngak Got u nap’an ni gad be fil ban’en!

13. Mang e gad ra rin’ ma aram e rayog ni nge yog ngodad fare gum’ercha’ ni baadag Jehovah?

¹³ Fare gum’ircha’ ni be yip’ fan ban’en e thingar ni fal’eg rogon ma aram rayog ni ngan n’ag e lem ni ba’ ni ke mit nga lanin’uy. Pi tayugang ko pi yuraba i teliw u nap’an Jesus e dubrad ni ngara rin’ed e tin ni aray rogon. (Matthew 13:15) N’en nib thil riy, e Maria ni chitingin Jesus, e ke dugliy ban’en “u lan gum’irchaen” nrogon nib puluw ko thin riyul’ ni ke rin’. (Luke 2:19, 51) Ke mang reb e gachalpen Jesus nib yul’yul’. I Lydia ni ma par u Thyatira e ke motoyil ngak Paul, “ma kari bing Jehovah gum’irchaen be motoyil.” Maku ke mich Got u wan’. (Acts 16:14, 15) Manga yigi ri dabda pagedan’dad ko lem ku be’ fa da adaged yugu boch e machib ni yima tay. Ya tin ni gadra rin’, e susun ni nge m’agan’dad ngay ni nge “m’ug ni Got e ba yul’yul’, nyugu aram rogon ni urngin e girdi’ e ra par ni yad be lifith l’ugun’rad.”​—Roma 3:4, NW.

14. Uw rogon ni gadra fal’eg rogon gum’irchadad ni nge motoyil u nap’an e muulung ko Kristiano?

¹⁴ Ngan fal’eg rogon e gum’ircha’ ni ngan motoyil u nap’an fapi muulung ko Kristiano e ri baga’ fan. Tin ni ma magawonnag lanin’dad e ra n’igin ni nge dabkuuda tiyan’dad ko thin ni yima yog. Thin ni kan weliy e dabi mit ngodad nfaanra ri gad be lemnag e tin ni ke buch ko re rran nem ara gad be lemnag e n’en nra buch ngodad gabul. Ba t’uf ni ngari mudugil lanin’dad ni ngada motoyilgad nge mit boch ban’en ngodad ma aram e rayog ni nge fel’ rogodad ko tin ni kan weliy. Ri boor ban’en ni rayog ngodad nfaan manga kari mudugil lanin’dad ni ngada filed e Thin nu Bible me tamilang u wan’dad e thin ni yibe weliy nge fan!​—Nehemiah 8:5-8, 12.

15. Uw rogon ni ra ayuwegdad e sobutan’ ngada adaged ni ngan fil ban’en ngodad?

¹⁵ Taab rogon ko but’ nib t’uf ni ngan tay boch ban’en ngay ni nge fel’ ko woldug, maku e ri tay ni ngani maruweliy nge gel fare ngongol ni sobut’an’, nga unim’ ko bilig ni bochan e tirok Got, nge pagan’, ngeb madgun Got u wan’uy, nge t’ufeg ku Got e rayog ni ayuweg e gum’ircha’ ni be yip’ fan ban’en. Fare ngongol ni sobut’an’ e ra munguynag fare gum’ercha’ ni be yip’ fan ban’en, ma ra ayuwegdad ni ngad manged girdi’ nib mom ni ngan fil ban’en ngodad. I non Jehovah ngak Josiah ni Pilung nu Juda ni gaar: “Bochan ke munguy gum’irchaem ma kam sobutnag lanin’um ni fan ku Jehovah ya kam rung’ag e n’en ni kug gog . . . ma kam yor u p’eocheg, ma gag e kug rung’ag.” (2 Kings 22:19) Gum’irchaen Josiah e ba sobut’ ma mom ni ma fol. Sobut’an’ e ke ayuweg pi gachalpen Jesus “ndariy e skul rorad” ni ngar nanged fan e thin riyul’ mi yad fol riy ma “piin ni yad ba llowan’ nge piin ni yad ba skul” e dar nanged fan”. (Acts 4:13; Luke 10:21) Yibe athapeg ni ngad “sobutniged gadad u p’eowchen Got” ya gad be guy rogon ni nge yog ngodad e gum’ircha’ ni baadag Jehovah.​—Ezra 8:21.

16. Mang fan ni ba t’uf ni ngan maruweliy ni nguu nim’ ko bilig ko tirok got ban’en?

¹⁶ I yog Jesus ni gaar: “Nge falan’ e piin ni ri yad ma lemnag e tirok Got ban’en ni nge yog ngorad.” (Matthew 5:3) Yugu aram rogon ni bay rogodad ni nge yog ngodad e tirok Got, ma pi magawon ni ma yib ko re fayleng ney nib kireb ara malmal e rayog ni nge taathathnag lanin’dad ma dabkuuda guyed e tin nib t’uf rodad. (Matthew 4:4) Thingarda maruweliyed ni ngeb lamen e ggan nib spiritual ngodad. Yugu aram rogon ni sana dabi yib e falfalan’ ngodad ko beeg Bible nge fol babyor ni goo gadad ko som’mon, ma faan manga gadra ulul i yan ni nga uda rin’ed e re n’ey ma gad pirieg ni ra ‘falan’dad ko tamilangan’,’ ma ri gad ma sonnag ni nge taw ngal’an e fol babyor rodad.​—Proverbs 2:10, 11.

17. (a) Mang fan ni bay fan ni ngada pagedan’dad ku Jehovah nib polo’? (b) Uw rogon ni ngada maruweliyed e pagan’ rodad ku Got?

¹⁷ “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang,” ereram e fonow ni ke pi’ Solomon ni pilung. (Proverbs 3:5) Fare gum’ircha’ ni be pagan’ ku Jehovah e manang ni urngin ban’en ni Nge ning chilen ara nge pow’iyey u daken e Thin rok e ba mat’aw ni gubin ngiyal’. (Isaiah 48:17) Bay rogon Jehovah ni ngada pagan’dad ngak u polo’ e yafas rodad. Rayog rok ni nge lebuguy urngin e tin nib m’agan’ ngay. (Isaiah 40:26, 29) Ma, fithingan e ra yib fan ni “Ma N’igin ni Nge Buch Ban’en,” ni be gelnag e pagan’ ko salap rok nge rogon ni ma lebuguy e pi n’en ni ke micheg! I ir e “ba mat’aw ko urngin e kanawo’ rok mab yul’yul’ ko urngin e maruwel rok.” (Psalm 145:17) Riyul’, ni bay rogon ni ngada gelnaged e pagan’ rodad ngak, mab t’uf ni ngada “ried lamen ma gadra guy ni Jehovah e ba fel’” ni aram e ngada folgad ko tin ni kada filed u Bible ko yafas rodad ngu daken e tin ba fel’ ni be yib riy.​—Psalm 34:8.

18. Uw rogon ma madgun Got e ra ayuwegdad nge fel’ e fonow rok Got u wan’dad?

¹⁸ I weliy Solomon murung’agen yugu reb e felngin nra ayuweg gum’erchadad ni nge fol ko fonow ni yib rok Got, me yog ni gaar: “Nge yib madgun Jehovah u wan’uy ma ngam palog ko tin kireb.” (Proverbs 3:7) I weliy Jehovah murung’agen piyu Israel ni gaar: “Faan manga ra ayuweged gum’ircharad ni ngeb madgug u wan’rad ma ngar folgad ko motochiyel rog ni gubin ngiyal’, ma aram e rayog ni ngeb angin ngorad nge pi fakrad ndariy n’umngin nap’an!” (Deuteronomy 5:29) Arrogon, piin ni bay madgun Got u wan’rad e yad ma fol rok. Bay rogon Jehovah ni “nge dag gelngin ngak e piin ni kara pied gum’ircharad ni polo’ ni fan ngak” ma ra gechignag e piin ni dabi fol rok. (2 Chronicles 16:9) Yibe athapeg ni marus ni dabi kirebannag Got e ra gagiyegnag urngin e ngongol rodad, nge lem rodad, nge thamtham rodad, nge lem rodad nib elmirin.

‘Ngam T’ufeg Jehovah u Polo’ i Gum’irchaem’

19. Mang e n’en ma rin’ e t’ufeg me yog u gum’ircha’dad ni adag e tin baadag Jehovah ni nge rin’?

¹⁹ T’ufeg e ir reb felngin ni kab th’abi fel’ ko urngin e pi felngin ya riyul’ nra ayuweg e gum’ircha’ ni nge fol ko thin rok Jehovah. Gum’ircha’ ni ke sug ko t’ufeg ku Got e ra ayuweg be’ ni nge adag ni nge fil e n’en nra kireban’nag Got nge n’en nra falfalan’nag. (1 John 5:3) I yog Jesus ni gaar: “Thingari t’uf rom Jehovah ni ir e Got rom u polo’ i gum’irchaem, ngu polo’ i yafas rom, ngu polo’ i lem rom.” (Matthew 22:37) Yibe athapeg ni ma ngada gelniged e t’ufeg rodad ku Got ni aram e ngad machamniged gadad ni uda tedan’dad nga felngin ni aram e nga udi nonad ngak ni gubin ngiyal’ ni bod ni gadad be non ngak ba fager rodad ma gad weliy murung’agen ngak boch e girdi’ u fithik’ e pasig.

20. Uw rogon ni nge yog ngodad fare gum’ircha’ ni baadag Jehovah?

²⁰ Ngan sul nga daken: Rogon ni yog e gum’ercha’ ni baadag Jehovah e ba l’ag ngay ni ngan pag e Thin Rok Got ni nge gagiyegnag e tin bay fithik’dad, ni aram pangidad nib mith ni be par u fithik’dad. Fol Bible ni goo gadad nge ngan fal’eg i lemnag ni yibe falfalan’ thingarni rin’. Rayog ni ngan rin’ e re n’ey nib fel’ rogon nfaan ra bay e gum’ercha’ ni kan fal’eg rogon​—ni aram e gum’ercha’ ni dariy e lem ko girdi’ riy, ma ke sug ko pi felngin nra ayuwegdad ni ngada adaged ni ngan fil ban’en ngodad! Arrogon, u daken e ayuw rok Jehovah, rayog ni nge yog ngak e girdi’ reb e gum’ircha’ nib fel’. Machane, mang boch ban’en ni ngad rin’ed ma rayog ni ngada ayuweged gum’irchadad?

[Footnote]

Uwrogon ni Ngam Pi’ e Fulweg?

• Mang gum’ircha’ ni be yip’ fan ban’en ni ma yaliy Jehovah?

• Uw rogon ni ngada ‘puluwnaged gum’irchadad ko Thin rok Got?

• Uw rogon ni ngad fal’eged rogon e gum’irchadad ni nge fol ko Thin rok Got?

• Tomuren ni kan fal’eg i lemnag e pi ney, ma mang e kam lemnag ni ngam rin’?

[Picture on page 11]

I fal’eg i lemnag David e tirok Got u fithik’ e falfalan’. Ga ma rin’ ni aram rogon fa?

[Pictures on page 12]

Mu fal’eg rogon gum’irchaem u m’on ni ngam fil e Thin rok Got