Mu Pigpig ngak Jehovah u Polo’ i Gum’irchaem

“Fakag, gu be yog ngom ni ngam nang e Got rok e chitamam mag pigpig ngak u polo’ i gum’irchaem.”​—1 KRON. 28:9.

MU GAY E FULWEG KO PI DEER NI BAARAY:

Mang e be yip’ fan fare bugithin ni gum’ircha’?

Mang boch e kanawo’ ni ngad fal’eged i yaliy rarogodad riy?

Uw rogon nrayog ni ngad pigpiggad ngak Jehovah u polo’ i gum’ircha’dad?

1, 2. (a) Gin ngan u dowey e ba ga’ ni ma weliy e Bible nib fanathin? (b) Mang nib ga’ fan ni ngad nanged e n’en ni be yip’ fan gum’irchaey?

BA GA’ ni ma yog e Bible fithingan yu yang u dowey ni nge yip’ fan ban’en. Bod e n’en ni yog Job ni gaar: “Dawor gu gad paag ngak be’ ni nge buch e rog riy.” Me Jeremiah ni profet e yog ni gaar: “Bay owchemed machane damur guyed ban’en, ma bay telmed machane dabiyog ni ngam rung’aged ban’en.” Ki yog Jehovah ngak Ezekiel ni gaar: “Ngam tay e pow nga peri’ gubin e girdi’ ni ke kireban’rad ma ke gafgow lanin’rad.” Miki yog James ni gaar: “Bolowthey e bod ba nifiy.”​—Job 16:17; Jer. 5:21; Ezek. 9:4; Jas. 3:6.

² Machane bay bang u dowey ni boor yay ni kan weliy murung’agen u Bible ni nge yip’ fan ban’en. Re n’em e aram e gum’ircha’.a Ireray e n’en ni weliy Hannah murung’agen ko meybil rok ni gaar: “I Somol e ke suguy ngorongoreg ko felfelan’.” (1 Sam. 2:1) Bin riyul’ riy e ke chugur ni nge gaman biyu’ yay ni i fanay e piin ni ur yoloyed e pi babyor ko Bible e re bugithin ney, ma ba ga’ ni yad ra fanay ma yad be yip’ fan ban’en. Rib ga’ fan ni ngad nanged e n’en ni be yip’ fan fare bugithin ni gum’ircha’ ya be yog e Bible nib t’uf ni ngad ayuweged.​—Mu beeg e Proverbs 4:23.

MANG E BE YIP’ FAN FARE BUGITHIN NI GUM’IRCHA’?

3. Uw rogon ni ngad nanged fan fare bugithin ni “gum’ircha’” nrogon ni kan fanay u Bible?

³ Rayog ni ngad nanged fan fare bugithin ni “gum’ircha’” ni yugu aram rogon ndariy bang u Bible nri be yog fan e re bugithin nem. Ni uw rogon? Faan gad ra fal’eg i yaliy rogon ni kan fanay fare bugithin ni “gum’ircha’” u lan e Bible, ma gad ra nang ko mang e be yip’ fan. Mang e re n’em?

4. (a) Mang e be yip’ fan fare bugithin ni “gum’ircha’” nrogon ni yima fanay u Bible? (b) Mang e be yip’ fan fapi thin ni yog Jesus ko Matthew 22:37?

⁴ Ma fanay e piin nu ur yoloyed e Bible fare bugithin ni “gum’ircha’” ni nge yip’ fan e bin riyul’ i rarogon be’. Re n’ey e kub muun ngay e pi n’en ni gad ma ar’arnag, nge pi n’en ni gad ma lemnag, nge pi n’en nrayog rodad, nge fan ni gad ma rin’ ban’en, nge pi n’en ni gad ma nameg. (Mu beeg e Deuteronomy 15:7; Proverbs 16:9; Acts 2:26.) Machane, bay yu ngiyal’ ni yima fanay fare bugithin ni “gum’ircha’” ni nge yip’ fan yugu reb e ban’en. Bod ni yog Jesus ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.” (Matt. 22:37) Fare bugithin ni “gum’irchaem” ni kan fanay u roy e be yip’ fan rogon laniyan’ be’ u ban’en, nge pi n’en ni be ar’arnag. I kieg Jesus fare bugithin ni gum’irchaem, nge lanin’um, nge lem rom ni bochan e nge tamilangnag nthingari m’ug nib t’uf Got rodad u daken e pi n’en ni gad ma lemnag nge rogon e par rodad. (John 17:3; Efe. 6:6) Machane, nap’an ni yira fanay fare bugithin ni “gum’ircha’” ni goo ir ma aram e be yip’ fan e bin riyul’ i rarogodad.

FAN NIB T’UF NI NGAD KOL AYUWGAD KO N’EN NI GAD BE SUGUY NGA GUM’IRCHA’DAD

5. Mang fan ni gad baadag ni ngad athamgilgad ngad pigpiggad ngak Jehovah u polo’ i gum’ircha’dad?

⁵ I puguran David ni Pilung ngak Solomon ni gaar: “Fakag, gu be yog ngom ni ngam nang e Got rok e chitamam mag pigpig ngak u polo’ i gum’irchaem ngu lanin’um, ni bod ni ug rin’. Manang gubin e tafinay rom nge tin ga be ar’arnag, ma faan ga ra sul ngak ma ra rung’ag e meybil rom. Machane faanra mu fek yathin, ma ra n’agem ni manemus.” (1 Kron. 28:9, BT) Jehovah e ir e ma skengnag gubin e gum’ircha’ ma ba muun gum’ircha’dad ngay. (Prov. 17:3; 21:2) Rayog ni nge fel’ e tha’ u thildad Jehovah me yog e felfelan’ ngodad boch nga m’on ni faanra ba fel’ e n’en ni bay u gum’ircha’dad. Ere, ba fel’ ni ngad folgad ko n’en ni yog David ni aram e ngad athamgilgad ngad pigpiggad ngak Jehovah u polo’ i gum’ircha’dad.

6. Mang e susun ni ngad nanged u murung’agen e pigpig ni gad be tay ngak Jehovah?

⁶ Pi n’en ni gad ma rin’ u fithik’ e pasig ni gadad e Pi Mich Rok Jehovah e be m’ug riy ni gad baadag ni ngad pigpiggad ngak Got u polo’ i gum’ircha’dad. Machane, gad manang nrayog ni nge magawon e pigpig ni gad be tay ngak Jehovah ni bochan e re fayleng rok Satan ney nib kireb nge rarogodad ndawor da flontgad. (Jer. 17:9; Efe. 2:2) Ere, rib ga’ fan ni ngaud fal’eged i yaliy rarogodad ya nge dabi buch e re n’ey. Uw rogon ni ngad rin’ed e re n’ey?

7. Mang e ma m’ug e bin riyul’ i rarogodad riy?

⁷ Dariy be’ ni manang e bin riyul’ i rarogon be’ ni bod rogon e gek’iy ndariy be’ nrayog ni nge guy e n’en ni bay u fithik’. Machane, rogon ni yog Jesus ko fare Welthin rok u Daken e Burey, e bin riyul’ i rarogodad e ma m’ug ko ngongol rodad, ni bod rogon ni wom’engin ba ken e gek’iy e ir e ra m’ug riy ko ba fel’ rogon fare ke gek’iy fa danga’. (Matt. 7:17-20) Ngad weliyed reb ko pi n’ey.

REB E KANAWO’ NI NGAD FAL’EGED I YALIY RAROGODAD RIY

8. Mang rogon e thin ni yog Jesus ko Matthew 6:33 ko n’en ni bay u gum’ircha’dad?

⁸ Nap’an ni be pi’ Jesus fare Welthin rok u Daken e Burey miki yog ngak pi gachalpen rogon ni nge m’ug ko ngongol rorad ni yad baadag ni ngar pigpiggad ngak Jehovah u polo’ i gum’ircha’rad. I gaar: “Ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed.” (Matt. 6:33) Pi n’en ni gad ma m’oneg u wan’dad e ir e ra m’ug riy e n’en ni gad baadag nge n’en ni gad be lemnag. Ere reb e kanawo’ ni gad ra nang riy ko gad be pigpig ngak Jehovah u polo’ i gum’ircha’dad e aram e ngad fal’eged i lemnag e pi n’en nib m’on u wan’dad.

9. (a) Mang e yog Jesus ngak boch e girdi’ ni ngar rin’ed? Mang e ke m’ug ko n’en ni ka rogned?

⁹ De n’uw nap’an nga tomuren ni yog Jesus ngak pi gachalpen ni ngar ‘m’oneged u wan’rad e gagiyeg rok Got,’ me buch ban’en ni ke m’ug riy ni bin riyul’ i rarogon be’ e ma m’ug ko n’en nib m’on u wan’. Be yog Luke ni ‘turguy Jesus u wan’ ni nge yan nga Jerusalem’ ni yugu aram rogon ni manang e n’en nra buch rok. Nap’an ni “yad be yan” e pi apostal rok i yan nga Jerusalem, me mada’nag boch e pumoon, ma aram me yog ngorad ni ngar uned ngak. Baadag e pi pumoon nem ni ngar uned ngak Jesus, machane bay boch ban’en ni yad baadag ni ngar rin’ed ko som’on. Bagayad e pi pumoon nem e gaar: “Mu son, ngaag wan gu k’eyag e chitamag.” Ma bagayad e gaar: “Somol, gu ra un ngom; machane mu son nggu wan gu fingichiy girdien e tabinaw rog.” (Luke 9:51, 57-61) Ere, rib gagiyel e n’en nib thil u thilin Jesus nge pi pumoon nem, ya bochan ni kar m’oneged e tirorad ban’en ma ke m’ug riy ndarur pigpiggad ngak Got u polo’ i gum’ircha’rad.

10. (a) Mang e kad rin’ed u nap’an ni piningdad Jesus ni ngad manged pi gachalpen? (b) Mang fanathin e pi’ Jesus?

¹⁰ Ba thil e n’en ni kad rin’ed ko n’en ni rin’ fapi pumoon, ya ke m’agan’dad ngay ni ngad manged boch i gachalpen Jesus. Ma chiney e gad be pigpig ngak Jehovah ni gubin e rran. Aray rogon ni kad daged ni gad ma lemnag Jehovah. Machane, yugu aram rogon ni gad ba pasig ko pigpig ni gad be tay ngak, mab t’uf ndab da paged talin ni ku bay ban’en nrayog ni nge magawonnagdad. Mang e re n’em? I tamilangnag Jesus u nap’an ni be non ngak fapi pumoon ni gaar: “En nra tabab i gi’ e but’ u milay’ mi i changar nga keru’ e dabi yib fan ko gagiyeg rok Got.” (Luke 9:62) Mang e gad ra fil ko re fanathin ney?

GAD MA ‘CHICHIIY PA’DAD KO TIN NIB FEL’,’ FA?

11. Mang e ke buch rok facha’ ni be maruwel u milay’ ni faani weliy Jesus murung’agen ko fanathin rok, ma mang fan?

¹¹ Ngkud weliyed boch ban’en ko fare fanathin rok Jesus ya nge yog ni tamilang u wan’dad e n’en ni gad ra fil riy. Be’ nib moon e be gi’ e but’ u milay’. Ma nap’an ni be maruwel, ma yugu be lemnag e tabinaw rok ni aram e gin ni bay chon e tabinaw rok riy, nge pi tafager rok, nge ggan, nge musik, nge felfelan’, nge gin nrayog ni nge toffan riy nde gowel. Kari yim’ ni bochan e pi n’ey. Faani n’uw boch nap’an ni ke maruwel, ma dakiyog ni nge tal i lemnag e pi n’em, ma aram me tal nge “changar nga keru’.” Yugu aram rogon ni ka bay e maruwel ni nge rin’, machane ke mitan’ nga boch ban’en ma aram me tal ko maruwel. Ere, kari damumuw e masta rok ya de athamgil ni nge mu’nag e maruwel rok.

12. Uw rogon nrayog ni ngan taareb rogonnag e n’en ni buch rok fare moon ni be maruwel u milay’ ni faani weliy Jesus murung’agen nge n’en nrayog ni nge buch rok reb e Kristiano e ngiyal’ ney?

¹² Mu lemnag ban’en nrayog ni nge buch e ngiyal’ ney ni taareb rogon ko re n’ey. Fare moon ni be maruwel e rayog ni ngan taareb rogonnag ngak reb e Kristiano ni gowa be pigpig ngak Jehovah nib fel’ rogon, machane bin riyul’ riy e bay e magawon rok ko tirok Got ban’en. Bod ni susun e bay reb e walag nib pasig ko machib nge muulung. Yugu aram rogon ma der tal i lemnag boch ban’en u fayleng nri baadag. Tomuren in e duw ni ke pigpig ngak Got me pag fapi n’em nu fayleng ni yugu ma lemnag ni nge k’aring ni nge “changar nga keru’.” Yugu aram rogon ni ka boor e maruwel nib t’uf ni ngan rin’ ni fan ko machib, machane ke pag boch ban’en ni nge magawonnag ndabkiyog ni nge ulul ko pigpig ngak Got ni bod ni i rin’ kafram. (Fil. 2:16) Ri ma kireban’ Jehovah ni “En ni Ir e Suwon e woldug” u nap’an nra tal reb i girdien e maruwel rok ko re maruwel ney.​—Luke 10:2.

13. Mang e ba muun ngay ni ngan pigpig ngak Jehovah u polo’ i gum’irchaey?

¹³ Rib tamilang e n’en ni gad ra fil ko re n’ey. Ra ngad pigpiggad ngak Jehovah u polo’ i gum’ircha’dad ma gathi kemus ni ngaud uned ko muulung nge machib ni gubin ngiyal’. (2 Kron. 25:1, 2, 27) Faanra dabi tal reb e Kristiano i lemnag e pi n’en ni bay nga “keru’” ni be yip’ fan e pi n’en ni bay u fayleng, ma aram e rayog ni nge kireb e tha’ u thilrow Got. (Luke 17:32) Kemus ni faan gad ra ‘fanenikay e tin nib kireb, ma gad chichiiy pa’dad ko tin nib fel’’ ma aram e rayog ni nge ‘yib fadad ko gagiyeg rok Got.’ (Rom. 12:9; Luke 9:62) Ere, gad gubin nib t’uf ni ngad guyed rogon ndabi talegdad boch ban’en ko re fayleng rok Satan ney ndab kud pigpiggad ngak Got u polo’ i gum’ircha’dad ndemtrug feni fel’.​—2 Kor. 11:14; mu beeg e Filippi 3:13, 14.

NGAN TIYAN’UY!

14, 15. (a) Uw rogon ni be guy Satan rogon ni nge malmalnagdad ko pigpig ni gad be tay ngak Jehovah? (b) Mu susunnag rogon ni ma bannagdad Satan.

¹⁴ Bochan nib t’uf Jehovah rodad ma aram fan ni kad ognaged e yafas rodad ngak. Ka aram nap’an i yib ni boor i gadad ni be pigpig ngak Jehovah u polo’ i gum’irchaen. Machane, ka be guy Satan rogon ni nge magawonnag lanin’dad. (Efe. 6:12) Manang ni yugu dab da talgad ko pigpig ngak Jehovah nib tomgin. Ere, aram fan ni ma fanay e pi n’en ni bay ko “biney e tamilang” ni nge meewarnagdad ni buchuuw ma buchuuw. (Mu beeg e Mark 4:18, 19.) Mang fan nrib ga’ angin e re ban ney?

¹⁵ Baaray rogon. Susun e ga be beeg e babyor u tan reb e magal nrib ga’ raen me math’ e bulb riy. Ka ngiyal’ nem mag nang e n’en ni ke buch ya dab kum guy ban’en. Ere, n’en ni kam rin’ e kam thilyeg fare bulb ni ke kireb nga reb nib beech. Faani bin migid e nep’, mu kum man mu par nga tan fare magal bayay ni ngkum beeg e babyor. Machane, bay be’ ni ke yib i thilyeg fare bulb nga reb nib achig boch raen. Sana dab mu nang ni ke achig raen fare magal. Ma uw rogon ni faanra ki bin migid e rran miki yib be’ i thilyeg fare bulb nga reb ni ke achig boch raen ko fa bin ni immoy riy. Sana ku dab mu nang ni ke achig raen. Mang fan? Bochan ni fare magal e be achig raen ni buchuuw ma buchuuw nib mo’maw’ ni ngan nang. Ku er rogon e pi n’en ni bay ko re fayleng rok Satan ney ni ma meewarnagdad ko pigpig ni gad be tay ngak Jehovah ni buchuuw ma buchuuw. Faanra dabi tiyan’ reb e Kristiano ma rayog ni nge gel Satan ngak ndabi nang.​—Matt. 24:42; 1 Pet. 5:8.

THINGAR UD MEYBILGAD

16. Uw rogon ni ngad ayuweged gadad ko pi ban rok Satan?

¹⁶ Uw rogon ni ngad ayuweged gadad ko pi ban rok Satan ma gad pigpig ngak Jehovah u polo’ i gum’ircha’dad? (2 Kor. 2:11) Thingar ud meybilgad. I pi’ Paul e athamgil nga laniyan’ e piin taareb e michan’ rorad ngak ni ngar, “togopluwgad ko pi ban rok moonyan’.” Ngemu’ me gaar ngorad: “Mu rin’ed urngin e pi n’ey u fithik’ e meybil, nguum weniggad ngak Got nge ayuwegmed.”​—Efe. 6:11, 18; 1 Pet. 4:7.

17. Mang e gad ra fil ko meybil ni tay Jesus?

¹⁷ Ra ngad gelgad ngak Satan mab t’uf ni ngad folwokgad rok Jesus ni i tiyan’ ko meybil ma baadag ni nge pigpig ngak Jehovah u polo’ i gum’irchaen. Mu tay fanam i yan u rogon ni weliy Luke rogon e meybil ni tay Jesus ko fare nep’ u m’on ni nge yim’ ni gaar: “U fithik’ e re thamtham nem ni tay ni gowa kan chuchuy nga but’ e ri tay ir riy ko meybil; ma athuw u downgin e bod yu mey i racha’ ni be map’ nga but’.” (Luke 22:44) Boor yay ni ma meybil Jesus nib gel, machane ngiyal’ nem e “ri tay ir riy ko meybil” ni bochan e ke yib e bin th’abi mo’maw’ e skeng ngak, ma aram min fulweg taban. N’en ni rin’ Jesus e be dag nib thilthil rogon e meybil ni yima tay. Ra ba gel e skeng ni be yib ngodad ma aram feni mom ni nge gel Satan ngodad. Ere, aram e ngiyal’ nib t’uf ni ngad ‘ted gadad’ ko meybil ni ngad ninged e ayuw rok Jehovah.

18. (a) Mang deer e susun ni ngad fithed gadad riy u murung’agen e meybil ni gad ma tay, ma mang fan? (b) Mang dalip ban’en ni bay rogon nga rogon ni ma maruwel gum’ircha’dad, ma uw rogon? (Mu guy e kahol ni bay ko page  22.)

¹⁸ Mang angin e meybil ni aray rogon? I yog Paul ni gaar: “Faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” (Fil. 4:6, 7) Arrogon, faanra gad baadag ni ngad pigpiggad ngak Jehovah u polo’ i gum’ircha’dad, ma thingar ud ted gadad ko meybil. (Luke 6:12) Ere ngam fithem ni nge lungum, ‘Uw feni gel e meybil ni gu ma tay? Gu ma meybil ni gubin ngiyal’, fa?’ (Matt. 7:7; Rom. 12:12) Fulweg rom ko gal deer ney e ra m’ug riy ko u rogon u wan’um e pigpig ni ga be tay ngak Got.

19. Mang e ga ra rin’ ya nge yog ni um pigpig ngak Jehovah u polo’ i gum’irchaem?

¹⁹ Rogon ni kad filed e, pi n’en ni gad be m’oneg u wan’dad e ir e be tamilangnag rarogon gum’ircha’dad. Thingar da guyed rogon ndabda paged e pi n’en ni kad digeyed ara pi ban rok Satan ni nge magawonnag e pigpig ni gad be tay ngak Jehovah u polo’ i gum’cha’dad. (Mu beeg e Luke 21:19, 34-36.) Gad bod David ni gad ma wenig ngak Jehovah ni ma lungudad: “Mu fil ngog rogon ni nggu pigpig ngom u polo’ i lanin’ug.”​—Ps. 86:11.

[Footnote]

[Box on page 22]

DALIP BAN’EN NI BAY ROGON NGA ROGON NI MA MARUWEL GUM’IRCHAEY

Faanra nge maruwel e gum’ircha’ nib fel’ rogon, ma bay boch ban’en nib t’uf ni ngan rin’. Ku er rogon fare gum’ircha’ ni be yip’ fan ban’en ara bin riyul’ i rarogon be’ ni faanra nge par nib fel’ u mit Got ma bay boch ban’en nib t’uf ni ngan rin’. Ngad weliyed dalip ko pi n’em:

1 Ngan Ayuweg: Ba t’uf ni ngad ked e ggan nib fel’ nga fithik’ i dowdad ya nge yog ni maruwel gum’ircha’dad nib fel’ rogon. Ku er rogon nib t’uf ni ngad rin’ed boch ban’en ni fan ko tirok Got ban’en u daken e fol Bible ni gad ma tay ni gubin e rran, nge pi n’en ni kad filed ni gad ma fal’eg i lemnag, nge muulung ni gad ma un ngay.​—Ps. 1:1, 2; Prov. 15:28; Heb. 10:24, 25.

2 Ngan Maruwel Ngay: Ra ngad pared nib fel’ fithik’ i dowdad ma bay yu ngiyal’ nib t’uf ni nge mithmith gum’ircha’dad nib gel. Ere ku er rogon ni faan gad ra pasig ko machib, ni bod ni ngad athamgilgad ni nge yoor boch ban’en ni gad be rin’, ma aram e rayog ni nge maruwel gum’ircha’dad ni be yip’ fan ban’en nib fel’ rogon.​—Luke 13:24; Fil. 3:12.

3 Ngan Chag ko Girdi’ nib Fel’: Rarogon e gin ni gad ma maruwel riy nge gin ni gad ma par riy e rayog ni nge magawonnag gum’ircha’dad nge lanin’dad. Machane, rayog ni nge war e mochuch rodad ni faanra ud chaggad ko piin taareb e michan’ rodad, ni yad ma lemnagdad ma yad ma pigpig ngak Got u polo’ i gum’ircha’rad.​—Ps. 119:63; Prov. 13:20.