Be Dag Jehovah Ngodad Ko Uwrogon Ni Ngada Theeged E Rran Rodad
“Mu dag ngomad rogon ni nggu theeged e rran romad ni nge yog ba gum’ircha’ nib gonop ngomad.”—PSALM 90:12, New World Translation.
1. Mang fan nib puluw ni ngada ninged ngak Jehovah ni nge dag ngodad rogon ni ngada “theeged e rran rodad”?
JEHOVAH GOT e ir e ke Sunmiydad me ir e ma Pi’ e Yafas. (Psalm 36:9; Revelation 4:11) Ere dariy be’ ni kab fel’ boch ngak nga rogon ni ma dag ngodad kanawoen ni ngada fanayed e pi duw ni bay ko yafas rodad u fithik’ e gonop. Ere ba puluw ni fare psalmist e ke wenig ngak Got ni gaar: “Mu dag ngomad ko uw rogon ni nggu theeged e rran romad nrogon ni nge yog ba gum’ircha’ nib gonop ngomad.” (Psalm 90:12, NW) Fare Psalm 90, e aram e gin rayog ni ngada pirieged riy e re thin nem ni be wenignag, ni ri bay fan ni ngada fal’eged i lemnag nib fel’ rogon. Machane som’mon, ma ngaa yugu darod bochuw u daken e pi tang ney ni Got e ke thagthagnag.
2. (a) Mini’ e ka nog ni ir e ke yoloy fare Psalm 90, ma wuin e ke yoloy e re n’en ney? (b) Uw rogon angin fare thin ko Psalm 90 nga rogon ni gad be sap ko yafas?
2 Thin ni kan yoloy u daken e Psalm 90 e be yog ni reb e “meybil rok Moses, ni girdi’ rok e bin riyul e Got.” Bochan re psalm ney e baga’ ni weliy murung’agen e yafas ko girdi’ nib papey ni be yan, ma aram e ba dake ni yoloy e re n’enney u tomren ni kan pag piyu Israel ni dabkura pired ni sib rok piyu Egypt nge nap’an ni yad be yan u daken e ted u lan 40 e duw, ni ngiyal’ ma bokum biyu’ e girdi’ mi i yim’ me thang fare mfen nde michan’rad. (Numbers 32:9-13) Demtrug rogon, ma fare Psalm 90 e be dag ni yafas ko girdi’ ni de flont e ba ngoch. Ere ba tamilang, ni thingarda fanayed e pi rran rodad nib tolang puluwon u fithik’ e gonop.
3. Mang e tin ni baga’ fan ni bay ko Psalm 90?
3 U Psalm 90, ma verse 1 nge mada’ ko 6 e be weliy murung’agen Jehovah ni ir e tagil’ rodad ndariy n’umngin nap’an. Ma verse 7 nge mada’ ko 12 e be dag e n’en nib t’uf rodad ni fan ni ngada fanayed e pi duw ko yafas rodad ni be yan nib gurgur u reb e kanawo’ nib fel’ u wan’. Ma rogon ni kan weliy ko verse 13 nge mada’ ko 17, e ngar da lemnaged ni nge yog ngodad e t’ufeg rok Jehovah nge flaab rok. Riyul’, ni thin ko re psalm ney e gathi ra puluw ni urngin ko tin ra i buch rodad ni gadad e pi tapigpig ku Jehovah. Yugu aram rogon, ma thingarda folgad ko ngongol ni be weliy e re psalm ney murung’agen u fithik’ e meybil. Ere ngada yaliyed nib fel’ rogon fare Psalm 90 u rogon ni guy e piin ni kara ognaged yad ku Got.
Jehovah—Bin “Riyul’ e Tagil’ Rodad”
4-6. Uw rogon ni Jehovah e ir “bin riyul’ e tabinaw rodad”?
4 Ke tabab fare psalmist ko fare thin ni gaar: “O Jehovah, gur e kam micheg ni gur e bin riyul’ e tagil’ romad u nap’an ni be yan reb e mfen nge reb. U m’on ni kan sunmiy e pi burey, ara kam sunmiy e fayleng ni bod rogon e amith ko gargel ma ba yong’ol ma boor ban’en riy, ni musko ngiyal’ ni de mudugil nge mada’ ko ngiyal’ ni de mudugil me gur e Got [ara, En nib Tothup].”—Psalm 90:1, 2, footnote ko thin nu Meriken.
5 Gadad manang ni Jehovah e ir e “Got ndariy n’umngin nap’an,” me ir e “bin riyul’ e tagil’”—nge manaf ko tin nib spiritual. (Roma 16:26, NW) Gad ba pagan’ ni gad bay ko gin ndariy e riya’ riy, ya bochan ni bay u toobdad u gubin ngiyal’ ni ri bay rogon ni nge ayuwegdad ya ir e “En ni Ma Motoyil ko meybil.” (Psalm 65:2, NW) Bochan ni kada paged fan e magafan rodad ngak e Chitamangidad nu tharmiy u daken Fak nib t’uf rok, ‘ma gapas rok Got ndabi chuchugur ni nge nang e girdi’ fan e ra yororiy gum’irchadad nge tafinay rodad.’—Filippi 4:6, 7; Matthew 6:9; John 14:6, 14.
6 Kari pagan’dad ko tin nib spiritual ya bochan, e thin ni be yip’ fan ban’en ni Jehovah e ke mang “bin riyul’ e tagil’” rodad. Maku ke pi’ “boch e singgil”—ni baga’ ni ba l’ag e re n’enney ko pi ulung ko girdi’ rok—ni aram e manaf nib spiritual, ni bay e pi ta chugul saf riy ni ri ma ayuwegdad ni ngari pagan’dad. (Isaiah 26:20; 32:1, 2; Acts 20:28, 29) Maku, boch i gadad e kar bad ko tabinaw ni kar pigpiggad ku Got ni boor e duw ma kar pirieged ni ir e ‘bin riyul’ e tagil u reb e mfen nge reb.’
7. Mang e be yip’ fan ni fapi burey e kan “gargelnagrad” ma fayleng e kan sunmiy “u fithik’ e amith”?
7 Immoy Jehovah u m’on ni dawori “sum” fapi burey ara bod ni kan “gargelnag e fayleng u fithik’ e amith.” Rogon ni ma changar e girdi’ ngay, e kan sunmiy e re fayleng ney nib muun ngay urngin ban’en riy, nge chemistry, nge rogon ni yima rin’ ban’en nib mo’maw’ ma ba t’uf e maruwel nib gel riy. Ma fare bugithin ni fapi burey ni kan “sunmiy” ma kan sunmiy e fayleng “u fithik’ e amith,” ere pi thin ney ko fare psalmist e be dag ni ri be tayfan e maruwel nib gel u nap’an ni be sunmiy Jehovah e pi n’eney. Gathi ku gad ma tayfan ma ke falan’dad ko tin ke rin’ e En Tasunmiy?
Ba M’agan’ Jehovah ni Nge Ayuwegdad ni Gubin Ngiyal’
8. Mang e be yip’ fan fare bugithin ni Jehovah e ir e Got ni immoy ko “ngiyal’ ni dawori mudugil nge mada’ ko ngiyal’ ni dawori mudugil”?
8 “Mus nga nap’an ni dawori mudugil nge mada’ ko ngiyal’ ni dawori mudugil ma ga bay ni gur e Got,” rogon e tang ni i yon’ fare psalmist. “Ngiyal’ ni de mudugil” e rayog ni be yip’ fan e tin ni ka bay nga tungun machane dawori yog ko wuin e ra mus. (Exodus 31:16, 17, NW; Hebrews 9:15) Machane u Psalm 90:2 nge yu yang u lan fare Hebrew Scriptures, ma fare bugithin ni “ngiyal’ ni de mudugil” e be yip’ fan ni “dariy n’umngin nap’an.” (Eklesiastes 1:4, NW) Rogon ni gad ma lemnag e mo’maw’ ni ngad nanged fan rogon ni bay Got ni gubin ngiyal’. Yugu aram rogon, me Jehovah e dariy tabolngin ma dariy tungun. (Habakkuk 1:12) Ma ma par nib fas mab m’agan ngay ni nge ayuwegdad.
9. Mang e n’en ni ke taareb rogonnag fare psalmist nga ba biyu’ i duw ni ma par e girdi’?
9 Kan thagthagnag ngak fare psalmist ni nge taarebrogonnag reb e biyu’ e duw ni ma par e girdi’ u fayleng ko tayim rok e Ani Tasunmiy ndariy n’umngin nap’an. Be non fare psalmist ngak Got, me yoloy ni gaar: “Kam tay chilen ngak e girdi’ ni ngar sulod ko pi n’en ni kan bilbilig, ma ka mog ni mu gaar: ‘Pi fak e girdi’, mu sulod.’ Ya bochan fare bbiyu’ e duw u owchem e bod e fowap ni ke yan, ma bod rogon ba matanagiy ni nep’.”—Psalm 90:3, 4, NW.
10. Uw rogon ni nge sulweg Got e girdi’ ko “pi n’en ni kan bilbilig”?
10 Ra yim’ e girdi’, me yog Got ngak ni “nge sul ko pi n’en ni kan bilbilig.” Fan e re n’ey, e nge sul e girdi’ “ko fiyath,” ni kan bilbilig, ara but’ ni ke mang fiyath. Bin riyul’ riy, e yog Jehovah ni gaar: ‘Ngam sul ko but’ ni ir e kan ngongliyem ngay.’ (Genesis 2:7; 3:19) Ba puluw e re n’ey ko urngin e girdi’ ndemtrug—ko ba gel ara ba meewar, ba fel’ rogon ara ba gafgow—ya dariy e girdi’ nib flont nrayog ni nge ‘biyuli ni mus ko walag, ara ngan pi’ e biyul ngak Got ni fan ngak, ni fan ni nge yog ni nge par ndariy n’umngin nap’an.’ (Psalm 49:6-9) Machane u feni gel e fal’falan’ rodad ni ‘Got e ke pi’ Fak ni kari maagirag rok, ma urngin e girdi’ ni be maruweliy e michan’ rorad ngak e rayog ngorad e yafas ndariy n’umngin nap’an’!—John 3:16; Roma 6:23.
11. Mang fan ni rayog ni nga dogned ni ngiyal’ nib n’uw nap’an u wan’dad e rib ngoch nap’an rok Got?
11 Rogon e changar rok Jehovah, mus ku Methuselah ni ke gaman 969 e duw yangaren maku dawori gaman reb e rran rok. (Genesis 5:27) Bbiyu’ e duw u puluwon Got e taareb rogon ko fowap—ni 24 e awa n’umngin nap’an. Maku ke weliy fare psalmist ni rogon ni ma changar Got ko bbiyu’ e duw e bod aningeg e awa ni be matanagiy be’ e camp ni nep’. (Judges 7:19) Ere ba tamilang, ni tayim nib n’uw nap’an rodad e rib ngoch u owchen Jehovah ni Got ni ma par ndariy n’umngin nap’an.
12. Uw rogon ni ke gagiyeg Got ni bod ni ‘keb e ran i fek e girdi’ nga bayang’?
12 N’en ni rib thil ko yafas rok Got ndariy n’umngin nap’an, e yafas ko girdi’ e chiney e riyul’ ni ba ngoch nap’an. Ke yog fare psalmist ni gaar: “Kam chuwegrad taab yay; ni bod ni kan mol taareb e nep’; ma nap’an nra kakadbul ma yad bod e pan nib galunglung ni ke thil. Ma kakadbuI me puf e floras riy nib mudugil nra thil; me balayal’ me mororoy ni ke milik.” (Psalm 90:5, 6, NW) I guy Moses bokum biyu’ e girdi’ ni ra m’ad ni piyu Israel u daken e ted, ni Got e ke gagiyegnag ni bod ni ‘keb e ran ke tharey e binaw me fekrad nga bayang. Re bugithin ney ni bang ko psalm e kan piliyeg ni: “Kam gagiyegnag ni ngar m’ad ni bod ni keb e ran me fekrad nga bayang.” (New International Version) N’en nib thil riy, e n’umngin e yafas ko girdi’ ni de flont e “goo taab yay e mol” nib ngoch nap’an—ni taab rogon ko ngan mol ni nep’ ni polo’.
13. Uw rogon ni gadad e “taareb rogon ko pan nib galunglung,” ma mang e ra rin’ e re n’ey ko tafinay rodad?
13 Gadad e ‘gad e taareb rogon ko pan ni ma puf e floras riy ni kakadbul’ machane ra ni balayal’ me mororoynag gawelngin e yal. Arrogon, yafas rodad e bod rogon e pan ni dabi par nib n’uw nap’an ma ra mororoy u lan taareb e rran. Ere dabda adbeyed e re n’eney nrib ga’ fan. Tin ni ngada rin’ed, e thingarda gayed Got nge pow’iydad u rogon ni ngada fanayed e duw ni ka ba’ ko yafas rodad u lan e re m’ag ney.
Ra Ayuwegdad Jehovah “ni Ngada Theeged e Rran Rodad”
14, 15. Uw rogon ni ke lebug fare Psalm 90:7-9 u puluwon piyu Israel?
14 Be non fare psalmist ngak Got me uneg boch e thin ngay ni gaar: “Ke ful’mad e damumuw rom; kug rusgad ko damumuw rom nib gel. Kam tay e denen romad nga p’eowchem, pi n’en romad nib mith e ke par ni ga be guy. Damumuw rom e ke ngochnag n’umngin nap’an ni nggu pired u fayleng; napmad ko biney e tamilang e bayi mus ni bod ba kathkath.”—Psalm 90:7-9.
15 Piyu Israel nde michan’rad e ‘kar m’ad ya bochan e damumuw rok Got.’ Kar ‘wergad nbochan e damumuw rok,’ ara kar ‘rusgad nbochan e damumuw rok.’ (New International Version) Boch i yad e “kar thiggad nga but’ u daken e ted” nbochan e gechig ni yib rok Got. (1 Korinth 10:5, NW) I tay Jehovah ‘e denen rorad nga p’eowchen.’ I tayrad ni ngar pied puluwon e kireb ni kar rin’ed u fithik’ e yoor, ni musko “tin ni kar mithged,” ara denen nib mith, ma immoy u ‘p’eowchen nib galgal ramaen.’ (Proverbs 15:3) Bochan e damumuw rok Got ni ke aw ngorad, ma piyu Israel ndar kalgadngan’rad e kar ‘museged e pi duw rorad ni bod ba kathkath.’ Bochan e re n’eney—ma yafas rodad nib ngoch nap’an e bod e pogofan rodad nra yan u daken dap’ i lugun’dad ni bod ba kathkath.
16. Faanra boch e girdi’ e ma rin’ e tin nib kireb nib mith, ma mang e susun ni ngara rin’ed?
16 Faanra bay be’ u fithik’dad ni ka be par ni be rin’ e tin kireb nib mith, ma sana rayog ni ngada mitheged e re ngongol ney ni nge dabi guy yugu boch e girdi’ ba ngiyal’. Machane tin nib kireb ni gad ma rin’ nib mith e bay u p’eowchen Jehovah ni be galgal ramaen,’ ya rogon ni gad ma rin’ ban’en e ra kirebnag thildad Got. Rogon ni ngki mang Jehovah fager rodad biyay, e ba t’uf ni ngada meybilgad ni nge n’agfan e kireb rodad, ma ngada pied keru’dad ko denen rodad, ma ngada falfalan’gad ngad folgad ko ayuw nib spiritual ni ra pi’ e piin ni piilal ni kristiano. (Proverbs 28:13; James 5:14, 15) Rib fel’ ni ngad yodoromgad ko bin ni ‘ngada museged e pi duw rodad ni bod ba kathkath,’ ni athap rodad ko yafas ndariy n’umngin nap’an e be yan u thatharen e riya’!
17. Baga’ ni uw n’umngin nap’an e yafas ko girdi’ ni yoor, ma pi duw rodad e ra sug ko mang?
17 Murung’agen n’umngin nap’an e yafas ko girdi’ ni de flont, me yog fare psalmist ni gaar: “Ya ke mus ni medlip i ragag e duw n’umngin nap’an, ma be mada’ ko meruk i ragag ni faanra ba gel fithik’ i downgin bagamad; machane ke mus ni n’en ni be fek e pi duw nem i yib ngomad e magafan’ nge gafgow; der ma n’uw nap’an me chuw e biney e tamilang u owchemad, ni aram e da kug moyed.” (Psalm 90:10) Baga’ ni girdi’ e ma taw e duw rorad ko 70, machane Caleb e ke 85 e duw yangaren ma kab gelgelngin. Boch i yad e gathi aram rogon, ni bod Aaron (123), nge Moses (120), nge Joshua (110). (Numbers 33:39; Deuteronomy 34:7; Joshua 14:6, 10, 11; 24:29) Machane fare mfen ni kar chuwgad u Egypt ndariy e michan’ rorad, ma rogon ni kan ta’ nga babyor e yad e girdi’ ni tabab ko 20 e duw yangarrad nga lang e kar m’ad u lan 40 e duw. (Numbers 14:29-34) Chiney, ma baga’ ni n’umngin e yafas ko girdi’ ni bay u lan e pi nam ni boor e ba taareb rogon ko thin ni ke yog fare psalmist. Ma fapi duw ko yafas rodad e ri “ba sug ko kireb ma boor bogi ban’en riy nra gafgownagey.” Yafas e ra chuw nib papay, “ma aram dakug moyed.”—Job 14:1, 2.
18, 19. (a) Mang e be yip’ fan ni “ngada theeged e rran rodad nrogon ni nge yog e gum’ircha’ nib gonop ngodad”? (b) Gadra maruweliy e gonop rodad ma ra k’aringdad ni ngada rin’ed e mang?
18 Bin migid me yon’ fare psalmist reb e tang ni gaar: “Mini’ e manang gelngin e damumuw rom nge nap’an ni kari yib e damumuw ngom nib muun ngay madgum? Mu dag ngomad ko uw rogon ni nggu theeg e rran romad nrogon ni nge yog ba gum’ircha’ nib gonop ngomad.” (Psalm 90:11, 12, NW) Dariy bagadad ni ri manang gelngin e damumuw rok Got ara gin nge mus e damumuw rok riy, ma susun ngari gel e marus nge tayfan rodad ngak Jehovah. Riyul’ nra k’aringdad e re n’ey ni ngada fithed ngak ko “uw rogon ma [rayog rodad] ni ngada theeged e pi rran rodad nrogon ni ra yog ngodad e gum’ircha’ nib gonop.”
19 Thin rok fare psalmist e ba meybil ni nge fil Jehovah ngak e girdi’ rok rogon ni ngar gonopgad ni ngar ted fan ma ngar fanayed e pi rran rorad ni ka ba’ u kanawoen ni baadag Got. N’umngin nap’an e yafas ni 70 e duw e bay e athap rodad riy ni gad ra par ni sogonapan 25,500 e rran. Machane demtrug rogon n’umngin nap’an e yafas rodad, ‘ma dada nanged ko uw rogon e yafas rodad gabul, ya gadad bod bochi yang i ath ni sum ko garbeb, ni yib i m’ug ma de n’uw nap’an me m’ay nga bayang.’ (James 4:13-15) Bochan ni ‘ngal’an nge boch ban’en ni daworda nanged e n’en ra buch rodad ni gadad gubin,’ ma dabiyog ni nga dogned n’umngin nap’an ni gad ra par. Ere ngad yibilayed ni nge yog ngodad e gonop ko ngiyal’ ni keb e skeng ngodad, nge u rogon ni ngada rin’ed ban’en ni fan ngak yugu boch e girdi’, nge rogon ni ngada daged e bin th’abi fel’ ko pigpig rodad ku Jehovah e chingiyal’ ney—ni ka daba’! (Eklesiastes 9:11; James 1:5-8) Ma pow’iydad Jehovah u daken e Thin rok, nge kan ni thothup, nge ulung rok. (Matthew 24:45-47; 1 Korinth 2:10; 2 Timothy 3:16, 17) Rogon ni ngan dag e gonop e ra k’aringdad ni ngad ‘m’oneged e Gil’ilungun Got ko yafas rodad’ ma gad ra fanay e rran rodad u reb e kanawo’ nra pining e sorok ngak Jehovah ma ra falfalan’ag gum’irchaen. (Matthew 6:25-33; Proverbs 27:11) Riyul’, ni ran pigpig ngak u polo’ i gum’irchadad ma dabi chuweg e magawon rodad, ni urngin machane mmtrug ni ra yib e falfalan’ riy ngodad nib gel.
Flaab Rok Jehovah e Ra Falfalan’nagdad
20. (a) Uw rogon ni ke “kireban’ ” Got? (b) Uw rogon ni nge ayuwegdad Jehovah nfaanra kad denengad nib ubchiya machane kada daged ni riyul’ ni kad kalgad ngan’dad?
20 Uw feni fel’ nfaanra rayog ni nge falan’dad u polo’ e yafas rodad! Bochan e re n’enney me wenignag Moses ni gaar: “Ngam sul, O Jehovah! Uw n’umngin nap’an ni ngam par ni aram rogon? Ma fin ra kireban’um ko pi tapigpig rom. Mu falfalan’nagmad ni yu kadbul ko t’ufeg nib gol rom [ara, “t’ufeg nib yul’yul’”], ma rayog ni gamad ra tolul u fithik’ e falfalan’ u nap’an urngin e rran romad.” (Psalm 90:13, 14; footnote) Got e der ma oloboch. Yugu aram rogon, ma “ra kireban’” ma ra ‘taleg’ e damumuw rok ma dabki pi’ e gechig nfaan ra thiliyeg be’ e lem nge ngongol rok e girdi’ ni kar kalgadngan’rad ya bochan ke ginangrad. (Deuteronomy 13:17) Ere mus ni faanra kada rin’ed e denen nrib gel machane riyul’ ni kad kalgadngan’dad, ma ‘ngari dag Jehovah e t’ufeg rok ngodad,’ ma ra bay tapgin ni ngad “tolulgad u fithik’ e falfalan’.” (Psalm 32:1-5) Ma ra ngada leked e kanawo’ nib mat’aw, ma gad ra thamiy e t’ufeg rok Got nib yul’yul’ ni fan ngodad ma rayog ni ngad “falfalan’gad u nap’an e pi rran rodad ni urngin.
21. Rogon e thin ni bay ko Psalm 90:15, 16, ma mang e ke ning Moses?
21 I meybil fare psalmist u fithik’ e yul’yul’ ni gaar: “Mu pi’ ngomad e falfalan’ ni bod gelngin e kireban’ nim pi’ ngomad, u lan urngin e pi duw ni kug gafgow riy. Yibe athapeg ni pi tapigpig rom e yad ra guy e tin ni ga be rin’ nge pi bitir rorad e yad ra nang feni sorom.” (Psalm 90:15, 16, NW) Baga’ ni i ning Moses ngak Got ni nge pi’ e falfalan’ ngak piyu Israel nra par ni bod n’umngin nap’an fa ngiyal’ ni kar gafgowgad nge fapi duw ni ke buch waathrad. I ning ni nge guy e pi tapigpig rok Got ko “tin ni ke rin” nrogon ni ke flaabnag piyu Israel ma aram e rayog rok pi fakrad ara piin ni owcherad ni ngar guyed feni sorok. Ba puluw ni ngada yibilayed ni ngani puog e flaab nga daken e piin ni ma fol u lan fa bin nib biech e fayleng ni Got e ke micheg.—2 Peter 3:13.
22. Rogon ni yog ko Psalm 90:17, ma mang e ba puluw ni ngada yibilayed?
22 Bin tomur e thin ko Psalm 90 e be wenignag ni gaar: “Mpag nge aw e falfalan’ rok Jehovah ni Got romad nga dakenmad, ma ngam gelnagmad ko tin ni gamad be rin’. Arrogon, mu gagiyegnag e tin ni gamad be rin’ nge par ni ke mudugil.” (Psalm 90:17, NW) Pi thin ney e be dag nib puluw ni ngada yibilayed ngak Got ni nge fal’eg waathan e maruwel ni gad be ta’ ko pigpig ngak. Piin Kristiano ni kan dugliyrad nge piin ni ba chag ngorad, ni piin “yugu boch e saf,” e gad ba falfalan’ ni “fare falfalan’ rok Jehovah” e ra par u dakendad. (John 10:16) Ri gad ba falfalan’ ni Got e ke ‘gelnag e maruwel rodad’ ni gadad e pi tamachib ko Gil’ilungun u yugu boch e kanawo’!
Ngada Ululgad i Theeg e Rran Rodad
23, 24. Uw rogon me yog ni fel’ rogodad ni faan gadra fal’eg i lemnag fare Psalm 90?
23 Rogon ni ngan fal’eg i lemnag fare Psalm 90 e susun ni nge gelnag e pagan’ rodad ku Jehovah, ni “bin riyul’ e tabinaw rodad”. Rogon ni nga un fal’eg i lemnag e thin riy u murung’agen feni ngoch e yafas, ma susun kari tamilang u wan’dad ni rib t’uf rodad e ayuw rok Got ni nge pow’iydad u rogon ni ngada theeged e rran rodad. Ma faan gad ra athamgil ni ngada gayed ma ngada folgad ko gonop rok Got, ma ba mudugil ni nge yog ngodad e t’ufeg nib gol rok Jehovah nge flaab rok.
24 Ma ulul Jehovah i dag ngodad rogon ni ngad theeged e rran rodad. Ma faan gad ra fol ko thin ni be yog ni ngada rin’ed, ma rayog rodad ni ngada ululgad i theeg e rran rodad ndariy n’umngin nap’an. (John 17:3) Machane faanra gad baadag e yafas ni dariy n’umngin nap’an, ma susun ngari mang Jehovah e manaf rodad. (Jude 20, 21) Rogon ni gad ra guy ko bin migid e article, ma kari tamilangnag e re n’ey ko thin ni bay ko Psalm 91 ni ri ma pi’ e athamgil nga lanin’uy.
Uwrogon ni Ngam Pi’ e Fulweg?
• Uw rogon ni Jehovah e ir e “bin riyul’ e tabinaw rodad”?
• Mang fan nrayog ni nga dogned ni Jehovah e ba’ m’agan’ ngay ni nge ayuwegdad ni gubin ngiyal’?
• Uw rogon ni ma ayuwegdad Jehovah ni ngada “theeged e rran rodad”?
• Mang e ke yognag e “falfalan’ ngodad u nap’an urngin e rran rodad”?
[Picture on page 8]
Immoy Jehovah ni Got “u m’on ni kan gargelnag e pi burey”
[Picture on page 10]
Rogon e changar rok Jehovah, ngak Methuselah ni ke taw ko 969 e duw rok e dawori gaman taareb e rran
[Pictures on page 12]
Jehovah e ke ‘dugliy e maruwel u pa’dad’