Gagiyeg Nib Fel’ U Uw e Gadad Ra Pirieg Riy?

“URNGIN e naun ma mudugil ni ba’ be’ ni ir e toy,” “mi Got e ir e ke sunmeg urngin ban’en,” ara’ rogon ni yog e Bible. (Hebrews 3:4; Revelation 4:11) Bochan ni bin riyul’ e Got, Jehovah, e ir e sunmiydad, me ir e “rimnang rogon nni sunmiydad.” (Psalm 103:14) Rimnang nib musmus rogon e gin ni ngad musgad riy nge tin nib t’uf rodad. Ma bochan ni ir ba Got ni ma t’ufegey, e re baadag ni nge yognag e pi n’en nib t’uf nem. (Psalm 145:16; 1 John 4:8) Ma rogon nib t’uf rodad e gagiyeg nib fel’ e kub muun ngay.

U daken fare profet ni Isaiah, me tamilangnag Jehovah ni gaar: “Mu sap! Kug pi’ ba pilung ni nge mang ba mich ngak e pi nam, ni ir e nge gagiyeg me yog e thin ko pi nam.” (Isaiah 55:4, NW) Rogon e n’en ni ngan rin’ ko gagiyeg e chiney e ba muun ngay ni ngan nang e cha’—​ni nge gagiyeg ni ke dugliy e en th’abi gel gelngin​—ma ba m’agan’ e gagiyeg rok. Ere mini’ e cha’ ney ni ke may i yog ni nge gagiyeg me yog e thin? Mang e pi n’en ni felngin ni nge mang ba tayugang? U uw e ra pow’iydad i yan ngay? Mang e n’en ni thingarda rin’ed ni ngeb angin e gagiyeg rok ngodad?

Fare Pilung ni Kan Micheg e Ke Taw

Gonapan 2,500 e duw ni ke yan, ma fare engel ni Gabriel e m’ug ngak fare profet ni Daniel me gaar ngak: “Thingar mu nang mang e tamilangan’um ni nap’an ni bay nog e thin ni nga kun fulweg nga rogon ma nga kun toy bay yu Jerusalem nge yan ni mada’ko ngiyal’ ko fare Messiah ni fare Pilung, e aram e medlip e wik, nge ku nel’ i ragag nge l’agruw e wik. Bayki sul nga kun toy bayay, ni bay tagil’ e girdi’ ni yoor riy nge yiy nib ga’ ni nge liyeg e re mach nem, machane ko ngiyal’ ni yugu be yib e wagagey nge gafgow.”​—Daniel 9:25, NW.

Ba tamilang, ni fare engel e i yog ngak Daniel e ngiyal’ nib mudugil ni ngeb e eni ke mel’eg Jehovah ni nge mang Pilung. “Messiah ni fare Pilung” e bay yib i m’ug u tomuren 69 wik, fa 483 e duw, ni kan thi’eg ko duw ni 455 B.C.E., u nap’an nni wereg e thin ni nga kun toy bayay yu Jerusalem.a (Nehemiah 2:1-8) Mang e buch u tomuren e re ngiyal’ i n’enem? Facha’ ni yoloy e Gospel ni Luke e weliy ni gaar: “U lan e bin ragag nge lal e duw ko gagiyeg rok Tiberius Caesar, ko ngiyal’ ni Pontius Pilate e governor u Judea, me Herod e ir e be yog e thin u Galilee [29 C.E.], . . . Me yib e thin rok ngak John ni fak Zekariah u daken e ted. Ma aram me yib nga urngin e binaw u tooben e Jordan, nga i machib ma be taufe ni fan e ngan pi’ keru’uy ko kireb min nag fan e denen.” Re ngiyal’ i n’enem, e ke par “e girdi’ ni yad be sonnag ni nge taw” fare Messiah ni Pilung. (Luke 3:1-3, 15) Yugu aram rogon ni yib fapi girdi’ ku John, ma gathi ir e re Pilung nem.

Ma aram sagonap’an e October ko duw ni 29 C.E., me yib Jesus nu Nazareth ku John ni nge taufenag. Ma aram me mang John mich riy, ni gaar: “Gguy fare kan ni thothup ni be yib nga but’ u tharmiy ni bod ba bulogol, me bi par nga daken. Aram rogon ni dagunang ko ir mini’, machane eni l’ogeg ni nga gu taufe ko ran e gaar ngog, ‘Yugu en kam guy ni fare kan ni thothup ni keb nga but’ ke bi par ngak, aray e eni ni bay i taufe ko kan ni thothup.’ Ma ka gguy, ni ka gu mang mich riy ni cha’ ney e faen fak Got.” (John 1:32-34) Nap’an e re taufe ney, me mang Jesus fare Pilung ni​—fare Messiah, ara Kristus.

Arrogon, fare “pilung ma nga i yog e thin ko nam ni kan micheg” e ke mich ni Jesus Kristus. Ma nap’an ni gadra fal’eg i guy e pi n’en felngin ni ba pilung, ma gadad ra nang ni gagiyeg rok e ba thu’m nga wuru’ ko pi felngin nib t’uf ku be’ e ngiyal’ ney ni nge gagiyeg nib fel’ rogon.

Fare Messiah​—Ba Pilung nib Fel’

Ba pilung nib fel’ e ba tamilang rogon ni ma pow’iyey me ayuweg e girdi’ ni yad bay u tan pa’ ni nge bagayad meb gelngin nge n’en ni ra ayuwegrad nge yog ngorad ni bochan ni nge yog ni ura pithiged e pi magawon nib fel’ rogon. ‘Ireray e n’en nib t’uf ni nge fel’ rogon e gagiyeg ko bin 21 e chibog,’ aray rogon ni yog fare ke babyor ni 21st Century Leadership: Dialogues With 100 Top Leaders. Uw feni fel’ rogon ni fal’eg Jesus rogon e piin ni ur motoyilgad ni nge yog ni uri faruwiliyed e pi n’en ni bay u reb e rran nge reb! Ayugu mu lemnag e welthin rok​—ni fare machib u daken e burey. Rib fel’ ma boor e fonow nib puluw ko thin riy ni kan yoloy u lan e Matthew ko guruy ni 5 nge mada’ ko guruy ni 7.

Amu lemnag, ni bod, e fonow rok Jesus u rogon i fal’eg thilin e girdi’. I gaar: “Ere faanra mman ni ngan pi’ e n’en ni ngam pi’ ngak Got u altar me yib ngan’um ni bay ban’en nib togopuluw u wan’ walagem ngom, ma ga pag e n’en ni ngam pi’ ngak Got u mit e altar ma ga yan ni ka chingiyal’ nem ngam fal’eg thilmew walagem; ma aram e fin mu sul ngam pi’ e n’en ni ngam pi ngak Got.” (Matthew 5:23, 24) Faanra ngad fal’eged thildad boch e girdi’ ma ngada rin’ed ni som’mon​—ni ku ra mon ko maruwel ni ga ma rin’ ni fan ku Got, ni bod rogon ni yima pi’ e maligach u altar ko tempel u Jerusalem ni bod ni be yog ko fare Motochiyel ni kan pi’ ngak Moses. Ya ra danga’, ma fare maligach e dabi fel’ u wan’ Got. Fonow rok Jesus e ri kab puluw e chiney ni bod rogon kakrom.

Ki ayuweg Jesus e ppin ur motoyilgad ngak ni ngar pilo’gad ko wup ko ngongol ni kireb. I fonownagrad ni be pow’iyrad ni gaar: “Kam rung’aged ni ke lunguy, ‘Dab mpirew be’ ni gathi mabgol rom.’ Machane nggog ngomed e chiney, ni en nra sap ngak be’ ni ppin me finey ni manga yugu ra pirew, e ke kireb e rok, ni fan e kar irew u fithik’ i laniyan’.” (Matthew 5:27, 28) Ere uw feni puluw e biney e ning chilen! Ere mang ni ngad tababgad nga ud pired e eni gathi mabgol rorad u fithik’ i lanin’dad? Ma sum ko gum’ircha’ e ngongol ni darngal ni par ko girdi’ ni gathi mabgol rom nga be’ nib mabgol, aray rogon ni yog Jesus. (Matthew 15:18, 19) Gadad ba llowan’ ni faan gadra ayuweg gum’irchadad.​—Proverbs 4:23.

Fare machib u daken e burey e ku bay e fonow riy ni th’abi fel’ ni ngan t’ufeg e eni toogor rom, ma nga un i gol ngak e girdi’ ma nga udi changargad nib fel’ rogon ko tin u fayleng ban’en nge tirok Got ban’en nge ku boch ban’en. (Matthew 5:43-47; 6:1-4, 19-21, 24-34) Ma ki dag Jesus ngak e piin ni yad bay rok u rom u rogon ni ngan gaweg e ayuw rok Got ni fil ngorad rogon ni nga uni meybil. (Matthew 6:9-13) Messiah ni fare Pilung e ma gelnag ma ma fal’eg rogon e piin ni yad ma fol rok ni nge bung rogorad ni nga u ranod u fithik’ e pi magawon nib ga’ ni ma yib ko girdi’.

Nel’ yay u nap’an fare machib u daken e burey, ni ra tabab Jesus ni nge weliy ban’en me tabab ko re bugithin ni baaray ni gaar “kam rung’aged ni ka nog ni ke lunguy” fa “maku e rogon ni ka nog ni ke lunguy,” miki yog reb e, ni gaar “machane, nggog ngomed.” (Matthew 5:21, 22, 27, 28, 31-34, 38, 39, 43, 44) Re n’enem e be dag ni piin yad be motoyil ngak e ke mecham ngorad reb e kanawo’ ni yad ma rin’, ni bod yalen e pi Farise ni luguney e be yog. Me Jesus e chiney e be dag ngorad reb e kanawo’ nib thil​—ni reb ni be tamilangnag e bin riyul’ i fan fare motochiyel ni kan pi’ ngak Moses. Jesus e er fan ni dag ban’en nib thil, ni rin’ e re n’eney u reb e kanawo’ ni ke momnag ngak e piin yad be motoyil ni nge m’aguwan’rad. Arrogon, Jesus e k’aring e girdi’ ngar thiliyeged boch ban’en ko yafas rorad, ko tirok Got ban’en nge pangirad. Re n’eney e pow ko pilung nib riyul’.

Baken e babyor ko rogon e gagiyeg e gagiyelnag feni mo’maw’ ni nge yog ni ngan thiliyeg ban’en ni aram rogon. I gaar: “Cha’ ni thiliyeg [Pilung] e ba t’uf rok ni nge yog rok ni nge papey ni nga i thamiy e naab ko pi n’en be buch ma bod be’ ni maruwel rok e rarogon e girdi’, ma llowan’ rok e bod be’ ni ba psychologist, ni ke skulnag rogon e lem ko girdi’, ma bod gelngin laniyan’ ba girdien e marathon, ma ba meeriyog ni bod bulldog, ma be’ ni ir e ma taga’ ngak ni bod be’ ni goo ir ni ma par u bang, ma ba gum’an ni bod e saint. Maku urngin e pi gelngin nem ni ramoy rok, maku dabiyog ni ngar micheg ni rayog rok.”

“Piin tayugang yad be gagiyeg e thingar u ra yaluweged yad ni bod rogon ni yad baadag e piin ni yad be gagiyegnagrad ni nga u ra yaluweged yad,” aray rogon nni yoloy reb e murungaag ni kenggin e “Gagiyeg: Bay fan e lem nib fel’?” Ri arrogon, be’ nib fel’ rogon ni ma gigiyeg e ma rin’ e tin be machibnag. Uw feni riyul’ ere n’enem rok Jesus Kristus! Arrogon, i fil ngak e piin ur chaggad ni nga ura sumunguygad, miki pi’ ban’en nib skul ni ferad ni aram e lukuy e rifrif u ayrad. (John 13:5-15) Gathi yigi pi’ pi gachalpen nga ranod ngar machibnaged fare thin nib fel’ ko Gil’ilungun Got, ya ku arrogon ir ni kub elmirin ni uni maruweliy ere maruwel nem. (Matthew 4:18-25; Luke 8:1-3; 9:1-6; 10:1-24; John 10:40-42) Ere rogon e fulweg ko rogon e gagiyeg, e ke dag Jesus kanawoen. “Fak Got e dariy ban’en ni be rin’ ni ir e tafinay rok,” aray e n’en ni yog u murung’agen, “kemus ni tin be guy ni be rin’ e Chitamangin e ir e be rin’.”​—John 5:19.

Yira lemnag e tin baaram ni ke yog Jesus nge tin ke rin’ ma ba tamilang ni be dag ni ir th’abi fel’ ni nge gagiyeg. Ya riyul’, ni ke th’um nga wuru’ ko rogon e girdi’ ko gagiyeg. Jesus e ba flont. Ke yog ngak e yafas ni manemus u tomuren e yam ni tay min faseg ko yam, bay par ni manemus. (1 Peter 3:18; Revelation 1:13-18) Mang gagiyeg ko girdi’ e ra taareb rogon ngay?

Mang e Thingarda Rin’ed?

Nap’an e ngiyal’ nib Pilung ko Gil’ilungun Got, “Messiah ni fare Pilung” e ra luknag e girdi’ ni ma fol ko tawaath. Re n’ey e micheg e Bible ni gaar: “Fayleng e rib mudugil ni ra sug ko tamilangan’ rok Jehovah ni bod e ran ni ke upunguy e day.” (Isaiah 11:9, NW) “Machane piin ni yad mmunguy e bay ra pired u daken e nam u fithik’ e gapas mu ur pired u fithik’ e gapas ni yad ba falfalan’.” (Psalm 37:11) “Gubin e girdi’ ni bayi be’ me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak.” (Mikah 4:4) “Chiney e keb i par tafen Got nga fithik’ e girdi’! Bayi par rorad, ma bayra manged girdien. Mi Got e bayi par rorad, mi ir e bay mang Got rorad. Ma bayi n’ag urngin e lu’ owcherad. Ma aram e dabku unim’, ma dab ki i kireban’uy, ma dabku un yor, ma dab ku un amith. Ya tin kakrom ban’en e ke chuw.”​—Revelation 21:3, 4.

Fayleng e chiney e ke pirieg e magawon ko gagiyeg. Machane, Jesus Kristus, e be pow’iy e piin nib sobutan’rad i yan nga lan ba fayleng nib biech ma rib gapas, ni gin ni girdi’ nib tafol e bay ra taarebgad nga ur liyorgad ngak Jehovah Got ma bayra m’onog gad i yan ngar flontgad. Uw feni ga’ fan ni ngad feked e tayim rodad ni nge yog e tamilangan’ ko bin riyul’ e Got nge eni ke dugliy ni nge gagiyeg rok ni nga i ngongol nib puluw ko re tamilangan’ nem!​—John 17:3.

Reb e tin th’abi fel’ ni rayog ni nga dogned u murung’agen be’ e ngada folwokgad rok. Ere gathi ngarda guyed rogon ni ngad folwokgad rok ere Pilung nib th’abi fel’ ni bay u numgin nap’an chepin e girdi’​—Jesus Kristus? Uw rogon ni rayog ni ngad rin’ed ni aram rogon? Mang e n’en ra rin’ ko yafas rodad ni faan gad ra fol ko gagiyeg rok? Pi deer ney nge ku boch e yira weliy ko gal ni baaray e thin nga tomuren biney.

[Footnote]

[Picture on page 4]

Daniel e ke may i yog rok e wub rok e en Pilung ni ke turguy Got

[Pictures on page 7]

Pi n’en ni i fil Jesus e be fal’eg rogon e girdi’ ni nge bung rogorad u fithik’ e pi magawon u nap’an e yafas rorad

[Picture on page 7]

Jesus e bayi pow’iy e girdi’ nib tafol nga lan reb e fayleng nib biech ma rib gapas