Ba Riyul’ U Wan’um E Gagiyeg Rok Kristus?

“Ara ni pining e ‘ta yog e thin’, ya taabe’ e Ta yog e thin romed, ni aram fare Kristus.”​—MATTHEW 23:10, NW.

1. Kemus ni mini’ e en Tagagiyeg ko tin riyul’ e Kristiano?

L’AGRUW fen e maruwel aram, ko Nisan 11. Dalip e rran nga tomren, ma yira li’ Jesus Kristus ngem’. Ireray e yay ntomur ni yan nga tempel. Re rran ney, me fil Jesus ban’en ni baga’ fan ngak e girdi’ ni yad be muulung u rom nge ngak pi gachalpen. Me yog ni gaar: “Thingari dabni pining Rabbi ngomed, ya gimed gubin nra bigimed, ma walagen bigimed ma taareb e Tamachib romed ni ba’. Ma thingari dab mpininged be’ u roy u but’ ni chitamangiy ya taareb e Chitamangimed ni bay u tharmiy. Ara ni pining e ta yog e thin ngomed, ya taabe’ e ba’ ni ir e be yog e thin romed, ni aram fare Kristus.” (Matthew 23:8-10) Ba tamilang, ni Jesus Kristus e ir e Tagagiyeg ko fa tin riyul’ e Kristiano.

2, 3. Mang e ra buch ko yafas rodad ni faan gadra motoyil ku Jehovah ma nguud folgad ko en Tagagiyeg ni ke dugliy?

² Rogon ni ma gagigegnag Jesus e ri ba’ angin ngodad ni faan gad ra fol riy! I yog Jehovah Got u daken Isaiah ni fare profet murung’agen e cha’ ney ni ir e en be pow’iyey ni gaar: “Gimed gubin e piin ni ke yib e belel ngomed! Ngam bad ko gin ni bay e ran riy. Nge piin ni dariy e salpiy rorad! Mired, ngam chuwaygad ngam ked. Arrogon, mired, ngam chuwiyed e wain nge milik ni yugu ra dariy e salpiy ya dariy e puluwon. . . . Mmotoyilgad ngog nib fel’ rogon, mi gimed kay e tin nib fel’, mpaged ni nge felan’med ko ggan nib fel’ lamen. . . . Mu sapgad! Gu pi’ e cha’ ney ngak e pi nam nge mang mich rorad, ni ir e en ni nge pow’iy e pi nam nge en ta yog e thin.”​—Isaiah 55:1-4, NW.

³ I fanay Isaiah e n’en ni yimanang ni bod e​—ran, nge milik, nge wain—​ni nge yip’ fan ban’en ni nge dag ko mang e ra buch ko yafas rodad ni faan gad ra motoyil ku Jehovah muuda folgad rok e En be Gagiyeg ma Be Yog e Thin ni kan pi’ ngodad. Angin e ra baud lanin’dad. Ni bod ni kan unum ba kap i ran u reb e rran nib gel e gawel. Ma belel ni keb ngodad ko thin riyul’ nge tin nib mat’aw ban’en e ra m’ay. Ni bod rogon e milik ni ma gelnag e bitir ma ma ayuwegrad mi yad ilal i yan, ma ‘fare thin ni bod e milik e ra gelnagdad ma ra ayuwegdad ni ngada ilalgad ko tirok Got ma ra fel’ thildad Got. (1 Peter 2:1-3) Ma mini’ e ra yog ni nde riyul’ ni wain e ra ayuweg e falfalan’ ko girdi’ u nap’an ni yibe un ko mur? Ku taab rogon ko, ngan pigpig ko bin riyul’ e Got min lek luwan ay e en ke dugliy ni nge mang En Tagiyeg e ra ayuweg e yafas ni “ngari falfalan’.” (Deuteronomy 16:15) Ere baga’ fan, ni gadad gubin​—ni piin bitir nge piin ni kar ilalgad, nge pumoon nge ppin—​e ngada daged nrogon ni be pow’iydad Kristus e ba riyul’ u wan’dad. Ere uw rogon, me yog ni ngada daged ko yafas rodad u gubin e rran ni riyul’ ni fare Messiah e ir e Tagagiyegnagdad?

Piin Pagal​—Mu “Mon’oggad ko Gonop”

4. (a) Mang e ke buch u nap’an ni ke yan Jesus nga Jerusalem ko ngiyal’ ni ke gaman 12 e duw rok u nap’an e Paluk’af? (b) Uw feni yoor ban’en ni manang Jesus murung’agen ko ngiyal’ ni kemus ni 12 e duw rok?

⁴ Mu lemnag e tin ni i rin’ e en Tagagiyegnagdad ni fan ko piin pagal. Yugu aram rogon ni bochuw e thin ni yimanang u murung’agen Jesus nnap’an ni kab bitir, ma immoy ban’en ni ke buch ni ri be tamilangnag ban’en. Nap’an ni ke gaman 12 e duw rok Jesus, me fek e gallabthir rok nga ranod nga Jerusalem ni fan ko madenom ni Paluk’af, ni aram e n’en ni yad ma rin’ u gubin e duw. Nap’an e re madenom ney ma kari tiyan’ nga murung’agen e Thin rok Got ni yibe weliy, me chuw girdien e tabinaw rok u rom nde un ngorad ya kar paged talin. Dalip e rran nga tomren ma gallabthir rok ni Joseph nge Maria e kari magafan’row, ma kara piriegew u lan fare tempel, “kar pired e pi tamachib nu Israel nga but’, be motoyil ngorad ma be fithrad.” Maku, “urngin e girdi’ ni ur motoyilgad ngak e ra gingad nga feni llowan’ ko thin ni ur fithed ngak ngi i fulweg.” Mu susunnag, nap’an ni kemus ni 12 e duw rok Jesus, ma gathi kemus nrayog rok ni nge fith boch e deer nra pug e tafinay rok e girdi’, ni aram e deer nib l’ag ko tirok Got ya ku rayog ni nge pi’ e fulweg u fithik’ e gonop! Dariy e maruwar riy, ni gallabthir rok e kar ayuwegew e cha’ nem.​—Luke 2:41-50.

5. Uw rogon ni nge thabthabelnag e piin pagal e fol Bible u tabinaw?

⁵ Sana gur e ka gab pagal. Faan manga gallabthir rom e yow e tapigpig rok Got ni yow ba yul’yul’, ma baga’ ni gimed ma fil e Bible u tabinaw romed ni gubin ngiyal’. Uw rogon e fol Bible u tabinaw u wan’um? Mang fan ni dabmu fal’eg i lemang e pi deer ni baaray: ‘Ri gu be ayuweg e yaram ko fol Bible u lan e tabinaw rog? Gu be fol ko tayim ni kan dugliy ma dagur rin’ boch ban’en ni ra magawonnag?’ (Filippi 3:16) ‘Gu ma un ko n’en ni yima rin’ u nap’an e fol Bible? Ngiyal’ nib t’uf, ma gu ma fith boch e deer u murung’agen e tin ni yibe fil ma gu ma pi’ boch e fulweg nib m’ag ngay? Rogon ni gu be mon’og ko tirok Got, ma gu be maruweliy ni ngeb lamen e “ggan nib el ngog ni fan ko piin ni kar ilalgad ko tirok Got”?’​—Hebrews 5:13, 14.

6, 7. Uw feni ga’ fan e yaram ni ngan bieg e Bible u gubin e rran ni fan ko piin pagal?

⁶ Maku baga’ fan fare yaram ni ngan bieg e Bible u gubin e rran. I yon’ fare psalmist e tang ni gaar: “Ba falfalan’ e en ni der fol ko fonow ni ma pi’ e piin nib kireb, . . . machane be par nib falfalan’ ko motochiyel rok Jehovah, ma ma bieg e motochiyel rok nib achichig laman ni rran nge nep’.” (Psalm 1:1, 2) Joshua ni ir e ra yan nga luwan Moses, e ma ‘bieg fare motochiyel nib achichig laman ni rran nge nep’.’ Bochan e re n’ey ma ke yog rok ni nge rin’ ban’en u fithik’ e gonop ma ke fel’ rogon ni nge dugliy ni nge mu’nag e maruwel ni ke pi’ Got ngak. (Joshua 1:8) En ma Pow’iydad, i Jesus Kristus, e i yog ni gaar: “Fare babyor nib thothup e be gaar, ‘Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.’” (Matthew 4:4) Faanra ba t’uf rodad e ggan nib riyul’ u gubin e rran, ma aram e kub t’uf rodad e ggan nib spiritual ni gubin ngiyal’!

⁷ Nicole ni 13 e duw rok e ke guy nib t’uf rok e tirok Got ma ke tabab ni nge bieg e Bible ni gubin e rran.a Ma chiney, nap’an ni ke gaman 16 e duw rok, ma ke mu’nag fare Bible ni polo’ taab yay maku ke bieg biyay ni ke taw nga lukngun e chiney. Rogon ni ma rin’ e re n’ey e ba mom. Ke gaar, “Kug dugliy ni nggu bieg ni ra ba lich ma taareb e guruy reb e rran.” Uw rogon ni ke ayuweg e bieg Bible u gubin e rran? Me fulweg ni gaar: “Boor ban’en nib kireb ni ma suruy lanin’uy e chiney. Gubin e rran ni gu ma mada’nag e towasar u skul nge yu yang ni ma tomalnag lanin’ug ni ma magawonnag e michan’ rog. Fare bieg Bible ni gu ma rin’ u gubin e rran e ke ayuwegeg ni ngeb ngan’ug nib papey e motochiyel u lan e Bible nge kenggin e motochiyel ni be pi’ e athamgil nga lanin’ug ni nggu siyeg e pi n’en ni be magawonnageg. Ma angin ni yib, e kug thamiy ni ri gub chuchugur ku Jehovah nge Jesus.”

8. Mang e ma rin’ Jesus u tafen e muulung, ma uw rogon ni nge folwok e piin pagal rok?

⁸ Nen ni kama rin’ Jesus e ma motoyil ma ma un i bieg e Thin rok Got u lan tafen e muulung. (Luke 4:16; Acts 15:21) Uw feni fel’ ni piin ni pagal e ngar folgad ko tin ni i rin’ ma ngara uned ko muulung ni ma ta’ e piin Kristiano, ni aram e gin ni yima fil i bieg e Bible riy! En kari falfalan’ ko pi muulung nem, e aram fa cha’ i Richard ni 14 e duw yangaren e i yog ni gaar: “Baga’ fan e pi muulung nem ngog. Yima puguran ngog u rom ko mang e tin nib fel’ nge tin nib kireb, nge mang e ngongol nib fel’ nge ngognol nib kireb, nge mang e ngongol ni bod rogon Kristus nge tin danga’. De t’uf ni nggu un ko gafgow ma fin gu nang.” Arrogon, “fare puguran ni ma pi’ Jehovah e yima pagan’ ngay, ma ma pi’ e gonop ko piin dariy rorad.” (Psalm 19:7, NW) Nicole e ku ma athamgil ni nge un ko lal e muulung u gubin e wik. Maku ma fanay l’agruw nge mada’ ko dalip e awa ni nge fal’eg rogon.​—Efesus 5:15, 16.

9. Uw rogon ni ra “mon’og e llowan’ rok” e piin ni pagal?

⁹ Nap’an ni ka yab pagal ma aram e ngiyal’ ni rib fel’ ni ngan ‘nang murung’en Got ni kari mus ni ir e bin riyul’ e Got, nge fa cha’ ni ke l’og ke yib, ni Jesus Kristus.’ (John 17:3) Sana ga manang boch e piin pagal ni ma fanay boor e tayim rorad nguur bieged e babyor ni comic, ma ma yaliy e television, ma ma fafel ko video games, ara ma yaliy e Internet. Mang fan ni ngam folwokgad rorad ya rayog romed ni ngam folgad ko tin ni rib fel’ ni i rin’ e en be Pow’iydad? Nap’an ni kab pagal, ma ke falfalan’ ni nge fil murung’agen Jehovah. Ma mang angin ni ke yib ngak? Bochan ni baga’ fan u wan’ Jesus e tirok Got ban’en, “me ga’ e gonop rok.” (Luke 2:52) Ere ku rayog rom ni ngam yodor.

“Nge Bigimed Mi i Yan Nga Laniyan’ Bigimed”

10. Mang e ra ayuweg e tabinaw ma ra mang gin’en ni ma yib e gapas nge falfalan’ riy?

¹⁰ Tabinaw e rayog ni nge mang gin ngan naf ngay nib gapas ndariy e riya’ ma ba falfalan’ ara ra mang gin ni yima cham riy nge tugthin. (Proverbs 21:19; 26:21) Rogon ni gad ma fol rok Kristus ni ir e ma pow’iydad e ra ayuweg ni nge yoor e gapas nge falfalan’ u lan e tabinaw. Riyul’ ni tin ni dag Jesus e ffel’ ni ngan fol riy ni fan ni nge fel’ e tha’ u thilin e tabinaw. Thin rok Got e be yog ni gaar: “Nge bigimed mi i yan nga laniyan’ bigimed, ni bochan e gimed be liyor ngak Kristus. Piin ni ppin, um marod nga laniyan’ pi figirmed, ni Somol e gimed be yan nga laniyan’. Ya en ni pumoon e ngi i gagiyegnag e ppin rok ni bod rogon Kristus ni ir e be gagiyegnag e galesiya, ni aram downgin nge thapegrad ngak Got. . . . Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad.” (Efesus 5:21-25) Paul ni apostal e i yoloy ngak fare ulung u Kolose ni gaar: “Piin ni bitir, thingar um folgad ko thin rok e gallabthir romed ni gubin ngiyal’ nrogon girdien Kristus, ya ereray e n’en ni baadag Got.”​—Kolose 3:18-20.

11. Uw rogon ni nge dag be’ ni figirngiy nib riyul’ e gagiyeg rok Kristus u wan’?

¹¹ Ran fol ko re fonow ney ma be yip’ fan ni en figirngiy e be pow’iy e tabinaw rok, ma leengin e be ayuweg u fithik’ e yul’yul’, ma piin bitir e ngara folgad ko gallabthir rorad. Machane ani lolugen e tabinaw e rayog ni nge yibnag e falfalan’ ngorad ni ke mus nfaan ra rin’ re maruwel’ ney nrogon. Fare pumoon nib llowan’ e thingari folwok rok Kristus Jesus ni ir Lolugen nge en ma Pow’iy ma rayog ni nge fil rogon ni nge rin’ e maruwel rok. (1 Korinth 11:3) Yugu aram rogon ni munmun me mang Jesus “lolugen urngin ban’en nib muun ngay fare ulung,” ma de yib nga fayleng, “ni ngan pigpig ngak, machane yib ni nge pigpig.” (Efesus 1:22; Matthew 20:28) Ku taab rogon ko en figirngiy ni Kristiano ni ma rin’ e maruwel rok ni ir lolugen e tabinaw, ni de siin, ya fan e ri baadag ni nge ayuweg leengin nge pi bitir rok​—arrogon, nge tabinaw rok ni polo’. (1 Korinth 13:4, 5) Ke athamgil ni nge fol ko pi felngin Got ni bay rok Jesus ni ir lolugen. Bod rogon Jesus, nib sumunguy mab sobut’an’. (Matthew 11:28-30) Fare bugithin ni “Wenig ngom” ara “sorom” e aram e thin ni de mo’maw’ ni nge yog u nap’an ni ke oloboch. Bochan ni ma dag rogon e tin nib fel’ ma arfan ni ra mom rok be’ ni leengiy ni nge mang “taayuw” nge “tagamaneg,” nge “en mangew” fare pumoon, nge fil ban’en rok mu ur maruwelgow u taabang.​—Genesis 2:20; Malaki 2:14.

12. Mang e ra ayuweg be’ ni leengiy ni nge fol ko fare yaram ni bay be’ ni ir lolugen?

¹² Fa en leengiy, e thingari yan nga laniyan’ e pumoon rok. Machane, faanra ke af ngak fare nifengin e fayleng, ma ra tabab ni nge kirebnag e lem rok u murung’agen kenggin e motochiyel nib l’ag ko tin ni baaray ni be’ e masuwey, ma dabun ni nge yan nga laniyan’ figirngin. Thin nu Bible e de yog ni figirngiy e ra dag e ngongol ni bod e pilung ni be gafgownag e girdi’ rok, machane be tay chilen ngak pi leengiy ni nga u ranod nga laniyan’ pi figirngiyrad. (Efesus 5:24) Maku fare Bible e be dag ni figirngiy ara chitamangiy e ke mil fan ngak e tabinaw rok, ma faan yira fol ko re fonow ney, ma ra par ni bay e gapas mab yaram fare tabinaw.​—Filippi 2:5.

13. Mang e n’en ni ke rin’ Jesus ni ffel’ ni nge fol e piin bitir riy ngar pared u tan pa’ be’?

¹³ Kan tay chilen ngak e piin bitir ni ngar folgad ko gallabthir rorad. U roy e i dag Jesus ban’en nrib fel’ ni ngan fol riy. Tomren e n’en ni buch u tempel u nap’an ni ke gaman 12 e duw rok Jesus min pag u rom ni dalip e rran, e “aram fini un ngak e [gallabthir rok] ngar sulod nga Nazareth, mi i par ni be fol rorow.” (Luke 2:51) Ra nge fol e piin bitir ko gallabthir rorad ma ra gel e gapas nge taareban’ u lan e tabinaw. Ra nge fol urngin e girdi’ u lan e tabinaw uw rogon ni ma pow’iy Kristus, ma angin riy e aram reb e tabinaw nib falfalan’.

14, 15. Mang e ra ayuwegdad u nap’an ni keb reb e magawon ngodad u tabinaw nib mo’maw’? Mu dag rogon.

¹⁴ Faan manga ra sum boch e magawon nib mo’maw’ u lan e tabinaw, min folwok rok Jesus nge rogon ni be pow’iyey e aram e kanawo’ ni ra fel’ rogon. Ni bod Jerry ni 35 e duw rok leengiy Lana, ni chitingin reb e pin nib fel’ yangaren, ni ke fek i yib reb e magawon nga tabinaw ni dar lemnagew. Ke weliy Jerry ni gaar: “Gu manang ni rogon ni nggu mang lolugen e tabinaw nib fel’, mab t’uf ni nggu fol ko fare kenggin e motochiyel u Bible ni ke ayuweg yugu boch e tabinaw. Machane tomur riy mug pirieg ni thingar gu fol riy u fithik’ e gonop nge tamilang.” Re ppin nem ni fak leengin nge yugu be’ e be lemnag ni ir be’ ni ke yib i aw nga thilrow e chitiningin ma arfan ni kari damumuw ngak. Me Jerry e ba t’uf ni nge tamilangan’ ko n’en ni be guy nge nang fan ni ma non fare rugod ma ma rin’ ban’en ni aram rogon. Uw rogon ni ke pithig fare magawon? Ke fulweg Jerry ni gaar: “Lana nge gag e ke taareban’mow ngay ni, Lana ir e ra llowan’nag e cha’ nem me gag e nguug maruweliy ni nge fel’ thilmow e bitir ko ppin rog. Ma munmun, ma re ney e keb angin.”

¹⁵ Nap’an ni gadra mada’nag e magawon u tabinaw nib mo’maw’, mab t’uf ni nge tamilangan’dad ko mang fan ngada gonopiyed ban’en ma aram rayog ni ngada nanged ko mang fan ni chon e tabinaw rodad e ma non ara ma rin’ ban’en ni aram rogon. Makub t’uf ni nge tamilang fan ma rayog ni ngada folgad ko kenggin e motochiyel nrogon. Bod rogon Jesus, kari nang ko mang fan ni fare pin nib m’ar ni molul e ke math ngak, ma ke rin’ ban’en ngak u fithik’ e tamilangan’ nge runguy. (Leviticus 15:25-27; Mark 5:30-34) Llowan’ nge gonop e aram e ngongol ni ma dag e en Tagagiyegnagdad. (Proverbs 8:12) Ra falfalan’dad nfaan gad ra ngongol ni bod ir.

‘Nge M’on e Gagiyeg Rok Got u Wan’uy’

16. Mang e ba t’uf ni ngad ted nib m’on ko yafas rodad, ma uw rogon ni dag Jesus e re n’eney ko tin ni ke rin’?

¹⁶ I tamilangnag Jesus ko mang e susun na nge m’on ko yafas rok e piin nib fel’ u wan’rad e gagiyeg rok. I yog ni gaar: “Ere ngam m’oneged u wan’med e gagiyeg rok [Got] nge tin nib m’agan ngay ni ngam rin’ed.” (Matthew 6:33) Mu daken e tin ni ke rin’, e be dag ngodad rogon ni ngada rin’ed e re n’ey. Nap’an ni ke m’ay fa aningeg i ragag e rran ni ke pag e abich, ma be fal’eg i lemnag, ma be meybil u tomren ni kan taufenag, me mada’nag Jesus e n’en ni ma wawliy laniyan’. Satan ni fare Moonyan’ e ke ognag ngak ni nge mang pilung ko “urngin e am nu fayleng.” Mu susunnag uw rarogon e yafas rok Jesus nfaanra ke fanay e tin ni ke ognag fare Moonyan’ ngak! Machane i rin’ Kristus e tin nib m’agan’ e Chitamangin ngay. Maku manang ni yafas u lan e fayleng rok Satan e ba ngoch nap’an. Chingiyal’ nem me n’ag e tin ni ke ognag fare Moonyan’ ngak, me yog ni gaar: “Ya babyor nib thothup e be gaar, ‘Mu ta’ fan Somol ni Got rom ma yigoo ir e ngam pigpig ngak.’” De n’uw nap’an nga tomren, me “tabab Jesus i wereg e machib ni gaar: ‘Mpied keru’med ko denen ni gimed be rin’! Ya gagiyeg nu tharmiy e ke chugur.’” (Matthew 4:2, 8-10, 17) Tin ni ka ba’ ko yafas rok Kristus, e ke fanay ni nge machibnag e thin ko Gil’ilungun ni polo’ e tayim rok.

17. Uw rogon ni ngada daged ni bay tagil’ Gil’ilungun ni ir e som’mon ko yafas rodad?

¹⁷ Ffel’ ni ngada folgad rok e en be Pow’iydad ma dabda paged ni fayleng rok Satan e ra wawliy lanin’dad ni fare maruwel ni boor e salpiy ni ma yib riy e nge mang tin som’mon ko yafas rodad. (Mark 1:17-21) Uw feni gel e oloboch riy nfaan gad ra tiyan’dad ko tin ni be athamgiliy e fayleng ni nge yog ngorad me tomur Gil’ilungun u wan’rad! Ke pag Jesus fan ngodad ni ngada wereged fare thin u Gil’ilungun ma ngada pingeged e girdi’ ngar manged pi gachalpen. (Matthew 24:14; 28:19, 20) Arrogon, sana bay e tabinaw rodad nge yugu boch e maruwel ni gad ma ayuweg, machane gathi gad ba falfalan’ ni ngada fanayed boch e balayal nge boch e rran u tomren e wik ni ngada rin’ed e maruwel rodad ni ngan wereg e machib ma ngan fil ban’en ngak be’? Ma uw feni fel’ ma yib e athamgil nga laniyan’dad ni kan nang ni nap’an e duw ni 2001 ma 780,000 e girdi’ ni kara pigpiggad ni polo’ e tayim rorad, ara pioneer!

18. Mang e ra ayuwegdad ni ngada pirieged e falfalan’ ko maruwel ni ngan wereg e machib?

¹⁸ Thin ko fare Gospel e be dag ni Jesus e ir e en tamaruwel ma be’ ni ba sumunguy. Nap’an ni guy e piin ni immoy u charen nib t’uf e tirok Got rorad, me taganan’ ngorad ma baadag ni nge ognag e ayuw ngorad. (Mark 6:31-34) Gadra falfalan’ ko pigpig ni gad ma ta’ nfaan gad ra wereg e re n’ey nbochan e t’ufeg rodad ngak yugu boch e girdi’ ma ri gad baadag ni ngada ayuweged yad. Machane uw rogon ni nge yog ngodad e lem ni aram rogon? I yog Jayson ni gaar, “Nap’an ni ku gub pagal, ma gathi ri gu baadag ni nggu un ko machib.” Mang e ke ayuweg fa cha’ ni nge adag e re maruwel n’ey? Ke fulweg Jayson ni gaar: “U tabinaw rog, e gamad ma un ko machib ni urngin e Sabado ni kakadabul. Ffel’ e re n’ey ngog ya faanra nggu fanay e tayim rog ko machib, ma baga’ angin ni rayog ni gu guy e tin ba fel’ riy ma gu ra felan’ ngay.” Ku arrogon gadad ni thingarda uned ko machib u gubin ngiyal’ ni gad ba pasig.

19. Mang e susun ngada dugliyed nib l’ag rogon ku Kristus ni ir e ma gagiyeg?

¹⁹ Ran fol ni rogon ni be pow’iyey Kristus ma riyul’ ni ra baud lanin’uy ma baga’ angin. Faanra ngada yodoromgad, ma nap’an ni ka gad ba pagal e aram e tayim ni ngada mon’oggad ko tamilangan’ nge llowan’. Yafas u tabinaw e ra mang kenggin e gapas nge falfalan’, ma ran wereg e machib ma ra mang maruwel ni ra yibnag e falfalan’ me fel’ lanin’uy. Ere, ngada maruweliyed ni ngada daged ko yafas rodad u gubin ngiyal’ e pi n’en ni gad ra dugliy nrogon ni be pow’iydad Kristus e ba riyul’ u wan’dad. (Kolose 3:23, 24) Machane, ku be pow’iydad Jesus Kristus u yugu reb e kanawo’​—ni aram e ulung ko Kristiano. Bin migid e article e ra weliy uw rogon ni ngeb angin ngodad e re yaram ney.

[Footnotes]

Ka Ga Manang?

• Uw rogon ni nge fel’ rogodad ni faan gad ra fol ko en Tagagiyegnagdad ni Got e ke dugliy?

• Uw rogon ni nge dag e piin pagal nriyul’ ni yad be fol uw rogon ni be gagiyegnagrad Jesus?

• Mang e ra buch ko yafas u tabinaw ni yibe fol uw rogon ni be gagiyeg Kristus?

• Uw rogon ma machib ni gad ma ta’ e ra dag ni rogon ni be gagiyeg Kristus e ba riyul’ u wan’dad?

[Pictures on page 9]

Nap’an ni ka yib pagal ma aram e tayim nib fel’ ni ngan fil e tamilangan’ rok Got nge murung’agen e en ni Ta Yog e thin ni ir e ke dugliy

[Picture on page 10]

Ngan par u tan pa’ gagiyeg rok Kristus e ra mon’ognag e falfalan’ u tabinaw

[Pictures on page 12]

I m’oneg Jesus u wan’ fare Gil’ilungun. Aram e n’en ni ga be rin’ fa?