Report Ko Piin Ma Wereg E Machib Ko Gil’ilungun Got

“Gu Baadag Nggu Pigpig Ku Got”

“MIRED pi girdieg, ngam chuwgad rok.” Aram e thin ni ke yog fare engel ni ke rungaag John ni apostal u nap’an e bin som’mon e chibog C.E. Ngiyal’ ney ma bokum milyon e girdi’ nib e kara folgad riy ma kar chuwgad ko fare “Babylon nib Gilbuguwan,” ni aram e pi yuraba’ i teliw ni googsur u ga’ngin yang u fayleng. (Revelation 18:1-4) Bagayad e Wilner ni be’ nu Haiti, ni ir e ke weliy murung’agen e n’en ni ke buch rok.

“Kan gargelnageg ko duw ni 1956 ko reb e tabinaw ni ba yul’yul’ ko fare teliw nib Catholic u reb e mach ni ba achichig u St. Marc, Haiti. Amu lemnag fini falfalan’ girdien e tabinaw rog u nap’an ni gag nge l’agruw ni’ ko mach romad, e kan mel’egmad ni nggu uned ko reb e skul ko padre u St. Michel de l’Atalaye, Haiti. Me ere, u lan e duw ni 1980, min l’ogmad nga Stavelot, Belgium, ni fan ni ngan skulnagmad boch u rom. Mu rom e ku kug uned riy ko skul ko fare Catholic university.

“Som’mon ma ri gub pasig ni nggu mang reb e padre. Reb e rran u nap’an ni gamad bay u lan e singgil ni fan ko abich, ma fare padre ni ir e be guymad e ke yog ngog ni nggu par u lan in e minit ya bay ban’en ni baadag ni nge yog ngog. Kug gin ngay nib gel u nap’an ni ke yog ngog nib tamilang ni baadag ni nggu parew! Kug dabuy fare n’en ni ke rin ngog ma kug thamiy ni kan bannageg. Kug pi’ e babyor ngak girdien e tabinaw rog ni be weliy murung’agen fare n’en ni buch rog ma kug chuw ko re skul nem, nyugu aram rogon ni kar damumuwgad. Kug pirieg e gin’en ni nggu par riy u reb e binaw ma kug un ko skul nib thil e n’en ni yibe fil riy.

“U nap’an ni kug sul nga St. Marc, ma dakuriy e pagan’ rog ko fare Teliw ni Catholic. Yugu aram rogon, ma kagu baadag ni nggu pigpig ngak Got, machane dagunang ko mang e nggu rin’. Kugu wan nga galesiya ko Adventist, nge fare galesiya ko Ebenezer, nge fare galesiya ko Mormon. Dariy ban’en ni be pow’iyeg ko tirok Got.

“Ke yib ngan’ug ni u nap’an ni gu be un ko skul ko padre u Belgium, ma gu ma bieg fare Bible ni Crampon. U lan e re Bible nem e kug nang ni bay fithingan Got. Ere kug meybil ku Got u fithik’ e yul’yul’ ni gu be pining fithingan ni nge ayuwegeg ni nggu pirieg e bin riyul’ e teliw.

“De n’uw nap’an, nga tomuren, me yib i par l’agruw e Mich rok Jehovah ko binaw romad. Gali cha’ nem e yow ba gapas, ma yow ma tayfan e girdi’, mab fel’ e ngongol rorow. Gu baadag rogon ni yow ma rin’ ban’en ni fan ko par rorow. Reb e rran, ma bagayow ko gali Mich nem e ke piningeg ni nggu un ko puguran ko yam’ ni i tay Jesus ni yima rin’ ni gubin e duw. Ri gu baadag e re muulung nem ma kug adag ni Pi Mich rok Jehovah e ra fil e Bible ngog ni gubin ngiyal’. U lan nel’ e pul, ma kugu nang ni kug pirieg e bin mat’aw e kanawo’ ko pigpig ku Got. Kug ognag e yafas rog ngak Jehovah ma kan taufenageg ko pul ni November 20, duw ni 1988.”

De n’uw nap’an, ma ke un Wilner ko pioneer. Chiney, ir reb e piilal ko reb e ulung ko Pi Mich rok Jehovah. Ir nge ppin rok, nge l’agruw e bitir rorow, e yad ba falfalan’ ni yad be pigpig ku Jehovah u lan e re ulung nem.

[Picture on page 19]

Ke pirieg Wilner ni Jehovah fithingan Got, bochan e ma bieg e Bible