Fapi Motochiyel Rok Got E Ra Fel’ Rogodad Riy

“Rib t’uf rog e motochiyel rom!”​—PSALM 119:97.

1. Baga’ ni mang e ma lemnag e girdi’ u rogon ni ngan fol ko motochiyel rok Got?

NGAN fol ko motochiyel rok Got e aram ban’en ni daki gilbuguwan ko ngiyal’ ney. Boor e girdi’ e be lemnag ndariy fan ni ngan par u tan reb gagiyeg nib th’abi tolang ma dabni gu’. Gadad be par ko tayim ni lem ko girdi’ u murung’agen e gafarig e be thil i yan, ma ke mo’maw’ ni ngan nang e n’en nib thil u thilin e tin nib mat’aw nge tin nib kireb, ma ri boor ban’en ni mo’maw’ ni ngan nog ko ba mat’aw fa danga’. (Proverbs 17:15; Isaiah 5:20) Nap’an ni kan fith boch e girdi’, me m’ug riy e tin ri be lemnag e yu ulung i girdi ni de l’ag ko teliw, ya kan nang ni “boor e girdi’ nu Meriken e yad baadag ni yad e ngara dugliyed ban’en ko mang e tin nib mat’aw, nge tin nib fel’ mab ga’fan.” Yad baadag e “Got ni de gel e thin rok. Ma yad baadag e par ndariy e motochiyel riy nib gel. Dariy e masta rorad nib gel mab ga’ nge yalen nge yugu boch ban’en.” Reb e social analyst e ke yog ni ngiyal’ ney e “yibe lemnag ni girdi’ e ngara dugliyed ko uw rogon ni ngara maruweliyed e yafas rorad ni nge mat’aw mab fel’ e gafarig riy.” Me ulul ngay ni gaar: “Urngin mit e gagiyeg e susun ni ngara puluwnaged e motochiyel rorad ko tin nib t’uf ko girdi’.”

2. Uw rogon e yay ni som’mon ni kan weliy u lan e Bible murung’agen e motochiyel e rib l’ag ko flaab ni yib rok Got ma yira fel’ u wan’?

² Bochan nboor e girdi’ e be sananag ko riyul’ nib ga’ fan e pi motochiyel rok Jehovah, ma aram ba t’uf ni ngada gelnaged e pagan’ rodad ko motochiyel rok Got ma ra fel’ rogodad riy. Bay e falfalan’ riy ni ngan weliy fare thin nu Bible ni ir e gin som’mon ni kan weliy murung’agen e motochiyel riy. U Genesis 26:5, rayog ni ngada bieged e thin rok Got ni gaar: “Ka be par Abraham . . . ni be rin’ e tin ni thingari rin’ ni fan ngog, nge tin ni kug tay chilen ngak, nge motochiyel rog.” Kan nog e pi thin nem u m’on ni dawori pi’ Jehovah e motochiyel ngak pi fak Abraham. Uw rogon ni ke taw’athnag Got Abraham nbochan e ir be’ ni ma fol, nib muun ngay e pi motochiyel rok? Me micheg Jehovah Got ngak ni gaar: “U daken be’ ni owchem e ba mudugil ni yira fal’eg waathan urngin e nam nu fayleng.” (Genesis 22:18, NW) Arfan ni yira fol ko motochiyel rok Got e ba l’ag ko flaab ma yira fel’ u wan’ Got.

3. (a) Mang lem u murung’agen e motochiyel rok Jehovah e ke weliy fare psalmist? (b) Mang deer e ba fel’ ni thingarda tedan’dad ngay?

³ Bagayad fapi psalmist​—rib dake ni ir fak e pilung nu Judah maku bayi mang pilung—​e ke weliy e lem rok ni ri de m’ag ko motochiyel. Me non ngak Got nib ga’ laman ni gaar: “Rib t’uf rog e motochiyel rom!” (Psalm 119:97) Gathi kemus nbochan e lem rok nib gel ni yog ni aram rogon. I dag nrib t’uf rok e tin nib m’agan’ Got ngay nrogon ni bay ko motochiyel rok. Jesus Kristus, ni ir Fak Got nib flont, e ku i thamiy ni aram rogon. Kan weliy murung’agen Jesus u fithik’ e yiiy ni gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug.” (Psalm 40:8; Hebrews 10:9) Ma uw rogodad? Gad ba falfalan’ ni gad be rin’ e tin nib m’agan’ Got ngay? Ba mich u wan’dad ni baga’ fan ma ba’ angin e motochiyel rok Jehovah ngodad? Uw feni ga’fan ni ngada folgad ko motochiyel rok Got ko liyor ni gad ma ta’, ko yafas rodad ni gubin e rran, nge nap’an ni ngada turguyed ban’en, nge rogon e tha’ u thildad yugu boch e girdi’? Ra nge t’uf e motochiyel rok Got rodad, mab fel’ ni ngada nanged fan ko mang fan ni bay mat’awun ni nge fal’eg e motochiyel me yog ni nguun fol riy.

Jehovah​—Bay Mat’awon ni Nge Pi’ e Motochiyel

4. Mang fan ni Jehovah ni ir e en th’abi tolang, e bay mat’awon ni nge mang En ma Pi’ e Motochiyel?

⁴ Bochan Jehovah e ir e en Tasunmiy, ma ir e th’abi tolang, ma ba’ mat’awun ni nge mang en ma pi’ e motochiyel u lan fare palpalthib. (Revelation 4:11) Isaiah ni profet e i yog ni gaar: “Jehovah ir e en Ma Pi’ e Motochiyel rodad.” (Isaiah 33:22) I pi’ e motochiyel ni ka nog e physical laws ngay ni be pow’iy e tin ke sunmiy ni bay e yafas rorad nge tin dariy. (Job 38:4-38; 39:1-12; Psalm 104:5-19) Bochan ni Got e ke sunmiy e girdi’, ma aram fan ni be par u tan e motochiyel rok Jehovah ni kan nog e physical laws ngay. Ma yugu aram rogon ni girdi’ e kan sunmiy ni bay mat’awun ni nge mel’eg ban’en, ni bay rogon ni nge thabthabelnag ban’en, ma ra falfalan’ ni kemus nfaanra fol ko motochiyel nib l’ag ko pigpig ku Got.​—Roma 12:1; 1 Korinth 2:14-16.

5. Uw rogon ma fare kenggin e motochiyel ni bay ko Galatia 6:7 e ke m’ug nib puluw ko motochiyel rok Got?

⁵ Rogon e tin kada nanged faram, ma motochiyel rok Jehovah ni ka nog e physical laws ngay e dabiyog ni ngan dariyfannag. (Jeremiah 33:20, 21) Faanra togopuluw be’ nga boch e motochiyel ni physical laws, ni bod e motochiyel ko gravity, ma ra yib wenegan ngak. Ere ku arrogon ni motochiyel rok Got ko rogon e ngongol e dabiyog ni ngan thiliyeg ma dabiyog ni ngan siyeg ara ngan togopuluw ngay ni dabni gechignagey. Ba t’uf ni ngan fol riy ni bod rogon fare motochiyel rok ni ka nog e natural laws ngay, ni yugu aram rogon ni angin e dabi yib nib papey. “Ya dariy be’ nrayog ni nge bannag Got. Ra be’ ma mit i n’en ni yung e ir e ra t’ar wom’engin.”​—Galatia 6:7; 1 Timothy 5:24.

Motochiyel Rok Jehovah ni Ga’ngin

6. Mang e tin ni be par u tan e pi motochiyel rok Got?

⁶ Gin ni kari dag e motochiyel rok Got riy e aram Motochiyel ni kan pi’ ngak Moses. (Roma 7:12) Munmun, me thiliyeg Jehovah Got fare Motochiyel ni kan pi’ ngak Moses me tay “fare motochiyel rok Kristus”a nga luwan. (Galatia 6:2; 1 Korinth 9:21) Bochan piin Kristiano e yad be par u tan “fare motochiyel nrib yal’uw ni ir e ma pithig e girdi’ ko kireb,” gad manang ni de pi’ Got e motochiyel rok ni ke mus ni fan nga boch i yang ko yafas rodad, ni bod rogon e machib ni ka nog e doctrinal ngay ara n’en ni yima rin’ ni ka nog e ceremonial rites ngay. Motochiyel rok e ba m’ag ko urngin yang ko yafas, nib muun ngay e yaram u lan e tabinaw, nge tin nib peth ko siyobay, nge ngongol ni nge dag e pumoon ngak e ppin ma ppin ngak e pumoon, nge ngongol ni nge dag e Kristiano ngak e pi walagen, nge u rogon ni ngan un ko pigpig nib riyul’.​—James 1:25, 27.

7. Mu weliy boch murung’agen e motochiyel rok Got ni baga’ fan.

⁷ Ni bod ni, Bible e be weliy ni gaar: “Ri gimed manang ni piin nib kireb e dabiyog ni ngar manged girdien e gin nsuwon Got. Dab mu banniged gimed: ya girdi’ ni ma ngongliy e ngongol ko darngal, ara yad ma ta’ fan ma yad ma meybil ko liyos ni ma meybil boch e girdi’ ngay, ara yad ma par e piin ni gathi mabgol rorad, ara yad e pumoon ni ma darngalnag e pumoon, ara piin ni yad ma iring ban’en u fithik’ e yargel, ara yad ba chogow, ara yad ma balyang ko rrum, ara yad ma t’ar e thin nga daken boch e girdi’, ara yad ma th’ab e motochiyel - dariy bagayad e mit i girdi’ ney nrayog ngorad e gin nsuwon Got.” (1 Korinth 6:9, 10) Arrogon, ngongol ni darngal e gathi kemus ni “par ko pumoon nge ppin.” Fare ngongol ni l’agruw e pumoon ni ngar parew e gathi aram e mit i par ni rayog “ni nge mel’eg be’” nfaanra baadag. Aram e ngongol nib togopuluw ko motochiyel rok Jehovah. Ni bod e tin ni baaray ni ngan iring ban’en, nge nga nog e thin nde riyul’, nge ngan t’ar e thin nga daken be’ e ku ba togopuluw ko motochiyel rok Jehovah. (Psalm 101:5; Kolose 3:9; 1 Peter 4:15) I yog James nib kireb ni ngan uf, ma Paul e ke fonownagdad ni dab dogned e thin ko balyang nge thin ni puwlag. (Efesus 5:4; James 4:16) Piin Kristiano, urngin e pi motochiyel ney e bang ko motochiyel rok Got ndariy thibngin.​—Psalm 19:7.

8. (a) Uwrarogon e motochiyel rok Jehovah? (b) Mang kenggin i fan fare thin ni Hebrew ni fan ko “motochiyel”?

⁸ Fapi kenggin e motochiyel ni Thin rok Jehovah e be dag ni aram e motochiyel rok ni kab fel’ ko tin ni baaray ni goo yol ni ri dariy e runguy riy, nge motochiyel nrib gel. Ir e ke mang def ko yafas nib thabthabel, nge yafas ni be mon’og iyan, me fel’ urngin e ngongol. Motochiyel rok Got e be gelnagey, ma be pow’iyey u rogon ni ngan dag e ngongol nib fel’, ma ma fil ban’en. (Psalm 119:72) Fare bugithin ni “motochiyel” nrogon ni i fanay fare psalmist e kan thiliyeg ko thin ni Hebrew ni toh·rahʹ. Reb e Bible scholar e be yog ni gaar: “Re bugithin ney e ke sum ko fare thin ara verb ni be yip’ fan ni ngan pow’iy, min puluweg, nga non’ nge yan nga m’on. Ere . . . re n’en ney e rayog ni nge yip’ fan ba motochiyel ni be yog rogon ni ngan dag e ngongol.” Rogon ni be lemnag fare psalmist ni motochiyel e ir e taw’ath ni yib rok Got. Gathi susun nguuda ted fan e re n’en ney, ngad paged nge mang ir e gagiyegnag kanawoen e yafas rodad?

9, 10. (a) Mang fan nib t’uf rodad e thin ni ma pow’iyey ni yima pagan’uy ngay? (b) Kemus ni uw rogon ma rayog ni nge yog ngodad e yafas nib falfalan’ ma ba’ angin?

⁹ Urngin e tin ni ke sunmiy e ba t’uf rorad e n’en nra pow’iyrad ni yima pagan’uy ngay. Ma Jesus nge yugu boch e engel ni kab tolang ko girdi’ e kub t’uf rorad e re n’en ney. (Psalm 8:5; John 5:30; 6:38; Hebrews 2:7; Revelation 22:8, 9) Faanra pi cha’ nem ni yad ba flont e ra fel’ rogorad u rogon ni ma pow’iyrad Got, me ere girdi’ ndawora flontgad! Chepin e girdi’ nge tin ni ke buch rodad e be micheg ni riyul’ e thin ni yog Jeremiah ni profet ni gaar: “Ri gu manang, O Jehovah, ni girdi’ nu fayleng ni kanawo’ rok e de mil fan ngak. Girdi’ ni be yan e de mil fan ngak ni nge pow’iy rogon ni nge wuf ay.”​—Jeremiah 10:23, NW.

¹⁰ Faanra gad baadag ni nge yog ngodad e yafas ni ba falfalan’ ma ba’ angin, ma thingarda sapgad ngak Got ni nge pow’iydad. Ke guy Solomon ni Pilung ni bay e riya’ riy ni ngada pared ni gad be fol ko tin ni gad be lemnag, nib dar ko motochiyel rok Got me yog ni gaar: “Bay e kanawo’ ni girdi’ e be lemnag nib mat’aw, machane yam’ e bay ko tomur riy.”​—Proverbs 14:12.

Fan ni Ngan T’ufeg e Motochiyel Rok Jehovah

11. Mang fan ni thingarda adaged ni ngada nanged fan e motochiyel rok Got?

¹¹ Ffel’ ni ngada maruweliyed ni ngari da adaged ni ngada nanged fan e motochiyel rok Jehovah. I dag fare psalmist e lem rok ni aram rogon ko ngiyal’ ni gaar: “Mu pithig owcheg, ma aram e rayog ni nggu guy e tin ni yira ngat ngay ko motochiyel rom.” (Psalm 119:18, NW) Nap’an ni ra gel e tamilang u wan’dad u murung’agen Got nge kanawoen ni kad nanged, miki gel e tamilang u wan’dad nib riyul’ e thin ni ke yog Isaiah ni gaar: “I gag, Jehovah, ni Got rom, ma gag e En ni gu be fil ban’en ngom ni fan ni ngeb angin ngom, ma gag e En ni kug gog ngom e kanawo’ ni thingar mman riy. O faanra ngam tiyan’um ko motochiyel rog!” (Isaiah 48:17, 18) Ri baadag Jehovah ni nge siyeg e girdi’ rok ko gafgow me yog ngorad e yafas nib falfalan’ ma aram ngar tiyan’rad ko motochiyel rok. Ngada yaliyed boch ban’en ni aram fan ni ra dag ko mang fan ni baga’ fan ni ngada t’ufeged e motochiyel rok Got.

12. Uw rogon ma bochan ni manangdad Jehovah ma aram e ir e en th’abi fel ni nge mang en ni ma Pi’ e Motochiyel?

¹² Motochiyel e ke yib rok e En ni ri manangdad. Bochan ni Jehovah e en Tasunmiydad, ma arfan ni bay rogon ni ngari nang e girdi’. (Psalm 139:1, 2; Acts 17:24-28) Piin fager rodad, nge girdi’ rodad, mus ko galabthir rodad e dar nanged rarogodad ni bod rogon Jehovah. Mog, mang manang Got rarogodad ni kab fel’ nga rogon ni gad manangdad! En ke Sunmiydad e ri manang e tin nib t’uf rodad ko tin fan ku Got ban’en, nge lem nib gel, nge tafinay, nge dowef rodad. Ngiyal’ ni ra tiyan’ ngodad, ma ra dag ni kari tamilang u wan’ rarogodad, nge tin ni gad baadag ni nge yog ngodad, nge tin gad be yim’ ni bochan. Manang Jehovah e tin ni dabiyog rodad, machane ku manang e tin nib fel’ nrayog ni ngada rin’ed. Ke yog fare psalmist ni gaar: “Manang e n’en nni ngongliydad ngay ma manang ni gadad e fiyath.” (Psalm 103:14) Arfan ni, nap’an ni gad ra gay rogon ni nga u darod u lan e motochiyel rok ma gad ra thamiy ni kari pagan’dad ko tirok Got, ma ke magan’dad ngay ni ngada folgad u rogon ni be pow’iydad.​—Proverbs 3:19-26.

13. Mang fan ni rayog ni nge pagan’dad ni Jehovah e ri ma tiyan’ ko tin fel’ ni fan ngodad?

¹³ Motochiyel rok Got e ke yib rok e En ni gadad ba tu’f rok. Ri ma lemnag Got rogon me fel’ e par rodad ndariy n’umngin nap’an. Gathi ke pi’ Fak nrib t’uf rok nge mang “maligach ni fan ko girdi’ ni yoor”? (Matthew 20:28) Gathi ke micheg Jehovah ‘ndabiyog ni nge pagdad nge yib ngodad e pi n’en ni ma wawliy e girdi’ nge denen nge pag rogon ni dabkiyog rodad ni ngad taleged gadad riy’? (1 Korinth 10:13) Gathi ke micheg fare Bible ngodad ni ‘be runguydad’? (1 Peter 5:7) Dariy reb ni kab fel’ ni bod Jehovah nga rogon ni be dag nib m’agan’ ngay ni nge pow’iy e girdi’ u fithik’ e t’ufeg. Manang e tin nib fel’ ni fan ngodad nge thilin e pi n’en ni ra falfalan’dad ngay nge pi n’en ni ra kireban’dad ngay. Yugu aram rogon ndaworda flontgad ma gad ma oloboch, faanra ngada ululgad ko kanawo’ nib mat’aw ma ra yog ngodad e yafas nge pi flaab rok.​—Ezekiel 33:11.

14. Mang e kanawo’ nib ga’ fan ni motochiyel rok Got e bathil ko lem ko girdi’?

¹⁴ Ri dabi thil e motochiyel rok Got. Ngiyal’ ney ni gad ba’ riy e rib wagey, ma Jehovah ir e bod ba malang ni dabiyog ni ngan mithmitheg mab mudugil, ni ba’ ni ka nap’an ndariy n’umngin nap’an nge mada’ ko ngiyal’ ni dariy n’umngin nap’an. (Psalm 90:2) Ke yog murung’agen ni gaar: “I gag Jehovah; ma ri dab gu thil.” (Malaki 3:6, NW) Motochiyel rok Got, ni bay u lan fare Bible, e ri yima pagan’uy ngay ni polo’​—ma de taab rogon ko lem ko girdi’ ni ba gur ni yugu ma thil i yan. (James 1:17) Ni bod ni, ke yoor e duw ma piin psychologist e yad be m’oneg fare lem’ ni ngan ayuweg e bitir u reb e kanawo’ ni kemus ni ngan pagrad ko tin ni yad baadag, machane munmun me thil e lem rorad ma ka rogneg ni de puluw fare fonow ni kar pied. Lem ko girdi’ nu fayleng u murung’agen e re n’en ney e bod ban’en ni be mithmitheg e nifeng. Machane, Thin rok Jehovah e ba mudugil. Fare Bible e be pi’ e fonow u lan boor e chibog uw rogon ni ayuweg e bitir u fithik’ e t’ufeg. I yol Paul ni apostal ni gaar: “Pi matam, dabmu rin’ ban’en nra k’ring e damumuw ngak pi fakmed, machane ngam pared ni gimed be yal’uwegrad nrogon e lem rok Jehovah.” (Efesus 6:4, NW) Ri ma baudnag lanin’dad ni gad ra nang ni rayog ni ngada pagedan’dad ko fapi motochiyel rok Jehovah; ya dabiyog ni ra thil!

Fapi Flaab ni Ra Yog Ngak e Piin ni Ke Fol ko Motochiyel Rok Got

15, 16. (a) Mang angin ni ra yib nfaan gad ra fol ko motochiyel rok Jehovah? (b) Uw rogon ni motochiyel rok Got e ba fel’ rogon ni ma pow’iy e mabgol

¹⁵ U daken Isaiah ni profet rok Got i yog ni gaar: “Thin ni ma yib u l’ugun’nag . . . e ba mudugil ni ra lebug.” (Isaiah 55:11) Ba riyul’, ni faan gad ra athamgil ni ngada folgad ko motochiyel ni bay ko Thin rok, ma ra yib angin ngodad, ma rayog ni ngada rin’ed e tin nib ga’ fan, ma ra falan’dad ngay.

¹⁶ Mu lemnag ko uw rogon ma motochiyel rok Got e ba fel’ ni nge pow’iy e mabgol me yib angin. I yoloy Paul ni gaar, “Mabgol e urngin e girdi’ ni nge ta’ fan, ma pumoon nge ppin ni kar uned ko mabgol e thingari bagayad mi i par nib yul’yul’ ngak bagayad. Ya ra gechignag Got e pi arorad ni be ngongliy e ngongol ko darngal nge piin ni yad be par e girdi’ ni gathi mabgol rorad.” (Hebrews 13:4) Susun piin ni kar mabgolgad e ngara daged e tayfan nge t’ufeg ngak e ani mabgol rok: “Urngin e pumoon e thingari t’uf rok leengin ni gowa ir, ma urngin e ppin ni thingari ta’ fan figirngin.” (Efesus 5:33) Mit i t’ufeg nem e kan weliy ko 1 Korinth 13:4-8 ni gaar: “En ni bay e t’ufeg rok e ba gum’an’ ma ba gol; ma der ma awan’, ma de uf, ma de tolangan’; en ni bay t’ufeg rok e de kireb daken, ara ke mus ni ir e ma lemnag ir, ara ba papey e damumuw ngak; ma der ma aw nga laniyan’ e n’en nib kireb ni kan rin’ ngak; ma der ma falfalan’ ko tin de mat’aw, machane ba falfalan’ ko tin nib riyul’. Ma ma dag e gum’an’ ko urngin ban’en, mab mich urngin ban’en ngak, ma ma athapeg nga urngin ban’en, ma ma k’adan’ nga urngin ban’en. Ma t’ufeg e ri dabi war.” Fare mabgol ni ni bay e def riy ni t’ufeg ni aray rogon e dabi war.

17. Mang angin nra yib ni faan yira fanay e motochiyel rok Jehovah u rogon ni ngan unum e alkul?

¹⁷ Maku reb ni be micheg ni motochiyel rok Got e ba’ angin, e fare n’en ni be pufthinnag e piin ta chingaw. Maku ke dabuy e en ‘ma balyang ko rrum.’ (1 Timothy 3:3, 8; Roma 13:13) Boor e girdi’ ni kar dariyfannaged e motochiyel rok Got u murung’agen e re n’en ney e keb e m’ar ngorad ma sana ke gel e m’ar nbochan ke unum e wain ni boor. Bochan ni kar dariyfannaged e fonow u lan e Bible nrogon ni ngan rin’ ban’en ni de pag rogon, ma boch e girdi’ e ka ra mechamgad ni ngar unumed boor e wain ni fan ni nge “baud lanin’rad.” Boor e magawon ni ma yib nbochan e ngan unum e wain nib pag rogon, mab muun ngay ni ke war e tayfan, nge tabinaw ni ke war e tha’ u thilin e girdi’ riy ara ke wagey, nge tabinaw ni ma adbey e salpiy rorad, min chuweg ko maruwel. (Proverbs 23:19-21, 29-35) Gathi fapi motochiyel rok Jehovah ni be dag u rogon ni ngan fanay e wain e aram e n’en ni ma ayuwegey?

18. Baga’ fan e motochiyel nib l’ag ko salpiy fa? Mu weliy fan.

¹⁸ Maku baga’ fan e motochiyel rok Got u murung’agen e salpiy. Fare Bible e be pi’ e athamgil nga laniyan’ e piin Kristiano ni ngar yul’yul’gad ma ngar uned ko maruwel nib gel. (Luke 16:10; Efesus 4:28; Kolose 3:23) Bochan piin Kristiano e kara folgad ko re fonow ney, ma aram boor i yad e kan pi’ e liw nib tolang ngorad ko maruwel rorad ara ka be par ni bay e maruwel rorad nyugu aram rogon ni boch i yad e kan chuwegrad ko maruwel. Ra siyeg be’ e ngongol nib kireb ni bod e fafel ni ma yib e salpiy riy, nge ngan thoy e tamagow, nge ngan fanay e drug nib pag rogon ma rayog ni nge ayuweg e salpiy rok ma dabi mecham ngay. Dariy e maruwar riy nrayog ni ngeb ngan’um boch ban’en ni be dag ni baga’ fan e motochiyel rok Got ni fan ni ngan ayuweg e salpiy.

19, 20. Mang fan nib gonop e tin ni baaray ni ngan fanay min fol ko motochiyel rok Got?

¹⁹ Girdi’ ndawora flontgad e ba mom ngorad ni ngar sorgad nga bang ma dabkuura folgad ko motochiyel rok Got. Mu lemnag piyu Israel u daken fare Burey ni Sinai. I yog Got ngorad ni gaar: “Faan gimed ra fol rog ngam ayuweged e m’ag rog, ma gimed ra par ni kam manged e girdi’ rog. Fayleng ni polo’ e ban’en rog, machane bay mpired ni gimed e girdi’ ni kug mel’egmed ni ngam manged girdieg.” Kar fulweged ni lungurad: “Bay gu rin’ed urngin e tin ni ke yog Somol.” Machane, rib thil e kanawo’ ni kara mel’eged mi yad fol riy! (Exodus 19:5, 8; Psalm 106:12-43) Machane gadad, e ngada fanayed ma ngada folgad ko motochiyel rok Got.

²⁰ Reb e kanawo’ nib gonop ma ra Fal’an’dad ngay nfaan gad ra par nib yul’yul’ ko motochiyel rok ndariy ban’en ntaabrogon ngay ni ke pi’ Jehovah ni ra pow’iy e yafas rodad. (Psalm 19:7-11) Rogon ni rayog ni ngada rin’ed e re n’en ney nib fel’ rogon e kub t’uf ni ngada nanged fan ma ngada nanged feni ga’fan e kenggin e kenggin e motochiyel. Ireray kenggin e bin migid e article.

[Footnotes]

Ka Ga Manang?

• Mang fan nrayog ni ngada pagan’dad ni motochiyel rok Got e kan ta’ ni fan ni nge fel’ rogodad riy?

• Mang fan ni thingarda chaariyed e motochiyel rok Jehovah?

• Mang boch e kanawo’ nib ga’ angin e motochiyel rok Got riy?

[Picture on page 21]

Kan taw’athnag Abraham nib gel nbochan ni ke fol ko motochiyel rok Jehovah

[Picture on page 23]

Magafan’ ko yafas e ngiyal’ ney ni boor e maruwel e be magawonnag boor e girdi’ ma ke mo’maw’ ni ngar folgad ko motochiyel rok Got

[Picture on page 25]

Bod ba magal u daken ba war ni baga’, ma motochiyel rok Got e ri ba mudugil ma dabi thil