Ngan Fol Nib Yul’yul’ Nga Mat’awuy Ni Got E Ke Dugliy

“Jehovah e ir e Tapuf Oloboch rodad, nge Jehovah e ir e En ma pi’ e motochiyel ngodad, nge Jehovah e ir e Pilung rodad.”​—ISAIAH 33:22, NW.

1. Mang boch ban’en nib thil piyu Israel ni kakrom riy u fithik’ e nam?

ULAN e duw ni 1513 B.C.E., ke sum fare nam nu Israel. Ngiyal’ nem, ma dariy e mach riy ni ka nog e capital city ngay, dariy e binaw rorad, ma dariy e pilung rorad nrayog ni ngan guy. Girdi’ ni i par riy e yad e girdi’ ni ku ur manged sib. Machane, re nam nem nib biech e ba thil u reb e kanawo’. Jehovah Got e ir e En Tapuf Oloboch riy ni dabni guy, ma ir e En ma pi’ e motochiyel, ma ir fare Pilung. (Exodus 19:5, 6; Isaiah 33:22) Dariy yugu reb e nam nrayog ni nge yog ni aram rogon!

2. Rogon ni kan yarmiy fare nam nu Israel ma mang deer e ra m’ug riy, ma mang fan ni fulweg riy e baga’ fan ngodad?

² Bochan Jehovah e ir fare Got nib yaram, ma ku ir fare Got ko gapas, ma aram e rayog ni ngada lemnaged ni urngin e nam ni ra gagiyegnag e ra aw nrib yaram. (1 Korinth 14:33) Ri aram rogon e n’en ni i buch rok piyu Israel. Machane uw rogon ma Got ni dabni guy e rayog ni nge pow’iy fare ulung nu fayleng ni rayog ni ngan guy? Ffel’ ni ngada weliyed rogon ni ke gagiyegnag Jehovah e re nam nem nib kakrom, ma n’en ngada guyed riy e rogon ni i ayuweg piyu Israel e be gagiyelnag feni ga’ fan ni ngan fol u mat’awuy ni Got ni ke dugliy.

Rogon ni Un Gagiyegnag Piyu Israel Kakrom

3. Mang yaram e ke rin’ Jehovah ni fan ni nge pow’iy e girdi’ rok?

³ Yugu aram rogon ni Jehovah e ir e Pilung nu Israel ni dabni guy, me dugliy boch e piin ni pumoon nib yul’yul’ ni nge mang piin owchen nrayog ni ngan guyrad. Immoy boch e pilung, nge lolugen e tabinaw ko chitamangiy, nge piin piilal ni be ayuweg e girdi’ ni yad e piin tafonow, nge tapuf oloboch. (Exodus 18:25, 26; Deuteronomy 1:15) Machane, thingar dab dogneg ni faanra dariy e ayuw rok Got ngak e pi cha’ nem ni ke milfan ngorad boch ban’en ma rayog rorad ni ngara dugliyed ban’en ndariy e oloboch riy. Yad e girdi’ ni dawori flont, ma dabiyog ni ngara nanged e tin ni bay u lan gum’irchaen e pi walagrad. Yugu aram rogon, ma piin tapuf oloboch ni bay madgun Got u wan’rad e rayog ni ngara pi’ed e fonow nib fel’ ngak e pi walagrad ya bochan kan fek e pi n’en nem ko Motochiyel rok Jehovah.​—Deuteronomy 19:15; Psalm 119:97-100.

4. Mang lem ni piin tapuf oloboch nu Israel nib yul’yul e ba t’uf ni ngar paloggad riy, ma mang fan?

⁴ Machane, rogon ni ngan mang tapuf oloboch e kab boor ban’en nib t’uf ni ngan rin’ riy ma gathi ke mus ni ngan nang fare Motochiyel. Bochan daworni flont, ma piin ni piilal e thingara tiyan’rad ni ngara gagiyegnaged e lem rorad ya rayog ni ngar adaged ni ngar uned ko ngongol nib kireb ni bod e​—chogow, nge laniyan’, nge siin—​nra kirebnag rogon ni ngara turguyed ban’en. I yog Moses ngorad ni gaar: “Dab um laniyan’gad ni ngam turuged ban’en. Thingar mu motoyil gad ngak e piin ni ba achichig ntaab rogon ko piin nib ga’. Thingari dab mu rusgad ko girdi’, ya pufthinnag ban’en e maruwel rok Got.” Arrogon, piin tapuf oloboch u Israel e yad ma pufthinnag ban’en ni fan ku Got. Reb e maruwel eram ni ri yima tay fan ma rib ga’ fan!​—Deuteronomy 1:16, 17.

5. Mang boch ban’en ni ke pi’ Jehovah nge uneg ko fapi tapuf oloboch ni ngar ayuweged e girdi’ rok?

⁵ I fal’eg Jehovah yugu boch e yaram ni fan ni ngan ayuweg e tin nib t’uf ko Girdi’ ko tirok Got. Nap’an ni dawora tawgad ko fare Binaw ni kan Micheg, me tay chilen ngorad ni ngara fal’eged fare tabernacle, ni tagil’ e bin riyul’ e liyor. Maku i yarmiy ni bay e piin prist ni ngara manged sensey ko fare Motochiyel, ma ura pied e gamanman ni maligach, ma ura urfeged e incense ni kakadabul nge nep’. I tay Got Aaron ni walagen Moses, nge mang bin som’mon e prist nu Israel nib tolang me dugliy fak Aaron ni walagen Moses ni biilal ngak, nge mang bin som’mon e prist nu Israel nib tolang me dugliy pi fak Aaron ni ngar ayuweged e chitamangirad ko maruwel rok.​—Exodus 28:1; Numbers 3:10; 2 Chronicles 13:10, 11.

6, 7. (a) Mang tha’ u thilin fapi prist nge piyu Levi ni gathi prist? (b) Mang e gad ra fil ko fare n’en ni piyu Levi e ur rin’ed e maruwel nib thilthil? (Kolose 3:23)

⁶ Ngan ayuweg bokum milyon e girdi’ ko tirok Got ni aram e n’en nib t’uf rorad e ba maruwel nib gel, ma kemus ni buchuw e prist ni ur moyed. Ere kan yarmiy ni boch e girdi’ ni yad bang ko fare ganong rok Levi ni ngara ayuweged. I yog Jehovah ngak Moses ni gaar: “Ngam pi’ piyu Levi ngak Aaron nge pifak. Yad fa piin ni kan pi’rad, ni kan pi’rad ngak ni kar bad rok pi fak yu Israel.”​—Numbers 3:9, 39.

⁷ Piyu Levi e kan yarmiyrad nrib fel’ rogon. Kan yarmiyrad ni dalip e tabinaw​—ni piin Gershonites, nge piin Kohathites, nge piin Mererarites—​ni ra reb ma bay e maruwel ni nge rin’. (Numbers 3:14-17, 23-37) Boch e maruwel e gowa kab ga’fan ko yugu boch e maruwel, machane urngin e maruwel e baga’ fan. Bochan e maruwel rok e piin Kohathite ni piyu Levi e ba t’uf ni nguura pared nib chuchugur ko fare kiwaren e m’ag nib thothup nge boch e talin e maruwel ko fare tabernacle. Machane, piyu Levite, ndemtrug ko ir be’ ni Kohathite fa danga’, e kar felfelan’gad ni ke yog ngorad e maruwel nrib fel’. (Numbers 1:51, 53) Bay e kireban’ riy, ya boch i yad e de fel’ u wan’rad e maruwel ni kan pi’ ngorad. Dar folgad nib yul’yul’ nga mat’awuy ni Got e ke dugliy, mar lemnaged ni de gaman e n’en ni kan pi’ ngorad ma aram mar paged yad ko lem ni ufanthin, tolangan nge awan’. Ma bagayad e Korah ni reb e Levite.

“Maku Ka Gimed Baadag ni Ngam Manged Prist?”

8. (a) Mini’ Korah? (b) Susun mang e ke k’aring Korah ni nge tabab i changar ngak fapi prist nrogon e lem ko girdi’?

⁸ Korah e gathi ir fare lolugen e tabinaw rok Levi, maku gathi ir lolugen e pi tabinaw ko piin ni Kohathites. (Numbers 3:30, 32) Yugu demtrug rogon, me ir be’ nu Israel ni bay e liw rok nib tolang ni ma tay e girdi’ fan. Bochan e maruwel rok Kora baga’ ni ke par nib chuchugur ngak Aaron nge pi fak. (Numbers 4:18, 19) Bochan ni ke guy thibngin e pi cha’ nem, ma sana ke yog Korah ni gaar: ‘Pi prist ney e riyul’ ni dawora flontgad, machane yibe lemnag ni nggu par u tan pa’rad! Dawori n’uw nap’an fram ni ke ngongliy Aaron reb e fak e garbaw ni gol. Bochan e kar liyorgad ko re fak e garbaw nem ma girdi’ rodad e ka ra paged yad ko meybil ko liyos. Chiney e fa cha’ i Aaron, ni walagen Moses, e be pigpig ni ir e prist nib tolang! Uw feni gel e laniyan’ riy! Ma uw rogon fa gali cha’ ni fak Aaron, ni Nadab nge Abihu? Mog, ka ra dagew ni ri ur dariyfannagew e maruwel ni kan pi’ ngorow ma arfan ni thingari li’row Jehovah ngar mow!’a (Exodus 32:1-5; Leviticus 10:1, 2) Yugu demtrug ko mang e i lemnag Korah, ma ba tamilang ni ke tabab ni nge changar ko maruwel ko prist nrogon ni ma changar e girdi’ ngay. Ma aram e n’en ni ke k’aring ni nge togopuluw ngak Moses nge Aaron, ma tomur riy, e Jehovah.​—1 Samuel 15:23; James 1:14, 15.

9, 10. Mang e ke yog Korah nge piin ni ke un ko togopuluw ni tay ngak Moses, ma mang fan ni susun ri yad manang e re n’en nem?

⁹ Bochan Korah e ir be’ ni ma sap e girdi’ ngak, ma de mo’maw’ rok ni nge k’aring yugu boch e girdi’ ni lem rorad e taareb rogon ko lem rok ngar uned ngak. Cha’ nem, e un Dathan nge Abiram ngak, ka ra pirieged 250 e girdi’ ni kar folgad rorad​—ni yad e pi tayugang ko ulung. Yad urngin e ka ra bad ngak Moses nge Aaron ma ra gaargad: “Urngin e girdi’ e yad ba thothup ma ba’ Jehovah u fithik’rad. Ere mang fan ni kam tolangnigew gimew ko ulung rok Jehovah?”​—Numbers 16:1-3, NW.

¹⁰ Bochan e n’en ni ke nang e piin tatogopuluw, ma susun dabra magawonnaged mat’awon Moses. Dawori n’uw nap’an fram, i rin’ Aaron nge Miriam ban’en ni aram rogon. Mog, ku karognew e thin ni taareb rogon ko thin ni ke yog Korah! Rogon e thin ni yog ko Numbers 12:1, 2, e ka ra fithew ni lungrow: “Gur ke mus nu l’ugun Moses e ke non Somol riy? Gathi ku er rogodow ni ke yib i non u l’ugundow?” Be motoyil Jehovah. I tay chilen ngak Moses, nge Aaron, nge Miriam ni ngar muulunggad u langan e mab ko fare tento ni yad ma muulung riy ma aram e rayog ni Nge yog e en ni ke mel’eg ni nge pow’iyrad. Ngemu’, i yog Jehovah e thin nib tamilang ni gaar: “Faanra bay e profet romed ni fan ku Jehovah, mu daken e changar ni pig e nggog ngak riy murung’ageg. U lan e lik’ay e nggu non riy ngak. Gathi aram rogon Moses ni tapigpig rog! Kan pagfan ngak urngin e naun rog ni polo’.” Ma tomur riy, i gechignag Jehovah Miriam meb e m’ar ni daraw ngak nib ngoch nap’an.​—Numbers 12:4-7, 10, NW.

11. Mang e i rin’ Moses ko fare magawon nib l’ag Korah ngay?

¹¹ Korah nge piin ka ra uned ngak e susun yad manang e re n’en ney. Dabiyog ni ngan mat’awonnag e togopuluw ni kar ted. Yugu aram rogon, ma ka be guy Moses rogon ni nge weliy boch e thin ngorad u fithik’ e sobut’an’. I ta’ ir ngorad ni ngar ted fan e maruwel rorad, ni gaar: “Ban’en nib chichig ni ke mel’egmed fare Got nu Israel u fithik’rad me taymed ni gimed ra yan ngam sabliyed?” Danga’, gathi “ban’en nib achichig eram”! Piyu Levi e ka ra fanayed boor ban’en. Mang e n’en ni ka yad baadag ni nge yog ngorad? Ma bin migid e thin ni ke yog Moses’ e be dag e n’en ni bay u lan gum’ircharad ni gaar: “Maku ka gimed be guy rogon ni ngam manged prist?”b (Numbers 12:3; 16:9, 10, NW) Machane, uw rogon u wan’ Jehovah e re togopuluw ney ni kan ta’ ko fare mat’awun’ ni Got e ke dugliy?

Ke Yib e Tapuf Oloboch nu Israel ni Nge Rin’ Ban’en

12. Rogon ni nge par nib fel’ thilin piyu Israel nge Got e be tor nga daken e mang?

¹² Nap’an ni pi’ Jehovah fare Motochiyel ngak piyu Israel, me yog ngak e girdi’ nfaan yad ra fol riy, ma yad ra mang “ba nam nib thothup” ma ra par nib thothup fare nam nfaan yad ra fol ko yaram rok Jehovah. (Exodus 19:5, 6) Chiney, ni be gagiyel i yan e togopuluw, ma aram e ke taw nga nap’an e en Tapuf Oloboch nu Israel ni ir e En ma Pi’ e Motochiyel ni nge rin’ ban’en! I yog Moses ngak Korah ni gaar: “Gur nge urngin e girdi’ rom, e gimed ra yan nga p’eowchen Jehovah, gur nge pi cha’ nem nge Aaron, e gimed ra yan gabul. Ma ra bigimed me fek tafen e nifiy rok, ma gimed ra ta’ fare incense nga daken me bigimed me fek tafen e nifiy rok i yan nga p’eowchen Jehovah, ni l’agruw miriay nge wugem e tafen e nifiy u gubin, me gur nge Aaron e ra bigimew ma birok e tafen e nifiy.”​—Numbers 16:16, 17, NW.

13. (a) Mang fan ni piin tatogopuluw e kar daged ni yad be rin’ ban’en ni dan pi’ mat’awrad u nap’an ni kar pied e incense ni maligach u p’eowchen Jehovah? (b) Mang e i rin’ Jehovah ngak e piin tatogopuluw?

¹³ Rogon ko Motochiyel rok Got, e ke mus ni prist e rayog ni ngara pied fare incense ngak Got ni maligach. Ma tin ni baaray ni piyu Levi ni gathi prist e ra pi’ fare incense ngak Jehovah e susun ni nge fulweg laniyan’ e pi togopuluw nem nga rogon. (Exodus 30:7; Numbers 4:16) Dagathi aram rogon ni rin’ Korah nge pi cha’ nem ni kara uned ngak! Bin migid e rran me “ulunguy urngin e girdi’ ngan togopuluw ngak [Moses nge Aaron] u langan e mab ko fare tento ni yima muulung ngay.” Fare chep e be yog ngodad ni gaar: “Chiney e be non Jehovah ngak Moses nge Aaron, ni gaar: ‘Mu paloggow ko re ulung ko girdi’ ney, ma rayog ni nggu li’rad nib papey.’” Machane Moses nge Aaron e ka ra wenignagew ni dabni thang owchen e pi girdi’ nem. I fol Jehovah ko thin ni karognew ngak. Murung’agen Korah nge fare ulung ko girdi’ ni kar uned ngak, “me yib e nifiy rok Jehovah me yik l’agruw miriay nge wugem e girdi’ ni ka ra pied fare incense ngak Got ni maligach.”​—Numbers 16:19-22, 35, NW.c

14. Mang fan ni rin’ Jehovah ban’en nib pey ni fan ngak e girdi’ nu Israel?

¹⁴ N’en ni yira gin ngay e yugu aram rogon ni ke guy piyu Israel e n’en ni ke rin’ Jehovah ngak e piin ni tatogopuluw maku dar filed ban’en riy. “Bin migid e rran ma fare ulung ko pifak yu Israel e ka ra gun’gun’naged Moses nge Aaron, ni lungrad: ‘Gimew, e kam li’ew e girdi’ rok Jehovah.’” Piyu Israel e ka ra folgad ko girdi’ nib kireb! Ma tomur riy, ma ke m’ay e gum’an’ rok Jehovah. Dariy be’​—ni mus ku Moses fa Aaron—​ni rayog ni nge wenig ngak Got ni fan ko girdi’ e chiney. I gagiyegnag Jehovah ni nge yim’ e girdi’ ni dar folgad, “ma girdi’ ni ke yim’ nbochan fare gechig e ke gaman ragag nge aningeg e biyu’ nge medlip miriay, ma de un ngay e piin ni kar mad nbochan Korah.”​—Numbers 16:41-49, NW.

15. (a) Bochan e mang ma piyu Israel e susun dabi maruwaran’rad ni ngar folgad rok Moses nge Aaron u rogon ni yow be pow’iyrad? (b) Re chep ney e be fil ngom e mang u murung’agen Jehovah?

¹⁵ Susun de t’uf ni nge yim’ e pi cha’ nem. Faan manga ur fanayed gelngin e lem rorad ni fan ko pi n’en nem. Ma rayog ni ngara fithed yad u boch e deer ni: ‘Mini’ e ka ranow ngak Farao ni kar dowgow ko pogofan rorow? Mini’ e ke wenignag ni ngan pag piyu Israel? Mini’ e cha’ nem ni goo ir e kan pining ni nge yan nga daken fare Burey ni Horeb u tomren ni kan ayuweg piyu Israel ni fan ni ngar nonow e engel rok Got ni yow ba sabal?’ Mmutrug ni n’en ni rin’ Moses nge Aaron nib fel’ e be micheg ni yow ba yul’yul’ ngak Jehovah mab t’uf e girdi’ rorow. (Exodus 10:28; 19:24; 24:12-15) De falfalan’ Jehovah ni nge li’ e piin tatogopuluw ngar m’ad. Machane, nap’an ni ke gagiyel ni ra ulul e girdi’ ko togopuluw ni yad be tay, kari turguy ni nge rin’ ban’en. (Ezekiel 33:11) Pi n’en ney ni urngin e rib ga’ fan ngodad e chiney. Mang fan?

Rogon ni Ngan Nang e N’en ni Yibe Fanay e Chiney

16. (a) Mang e mich ni ra ayuweg piyu Jew ko fa bin som’mon e chibog ni ngari pagan’rad ni Jesus e en owchen Jehovah? (b) Mang fan ni ke chuweg Jehovah e piin prist ni piyu Levi, ma mang e ke tay nga lon?

¹⁶ Chiney, bay e bin nib biech e “nam” ni Jehovah e ir e Tapuf Oloboch rorad ni dabni guy, ma ir e ma Pi’ e Motochiyel, ma ir e Pilung rorad. (Matthew 21:43) Kan sunmiy e re “nam” nem ko fa bin som’mon e chibog C.E. Ngiyal’ i nem, ma fare tabernacle ni yima fanay u nap’an Moses’ e kan thiliyeg ma fare tempel nu Jerusalem nib fel’ yaan e kan ta’ nga lon. (Luke 1:5, 8, 9) Machane, u lan e duw ni 29 C.E., me sum yugu reb e temple ni aram fare tempel nib spiritual, ma bay e Prist riy nib Tolang ni Jesus Kristus. (Hebrews 9:9, 11) Fare magawon u murung’agen mat’awuy ni Got e ke pi’ e ke sum biyay. Ra fanay Jehovah mini’ ni nge pow’iy e re “nam” ney nib biech? I dag Jesus nrib yul’yul’ ku Got. I dag nib t’uf e girdi’ rok. Maku i fal’eg boor e pow ni yira ngat ngay. Machane, taarebrogorad ko fapi llabthir rorad kakrom nib gel lanin’rad, ma boor ko piyu Levi e kar dabuyed Jesus. (Matthew 26:63-68; Acts 4:5, 6, 18; 5:17) Tomur riy, me chuweg Jehovah fapi prist ni piyu Levi me tay reb nga luwan nrib thil​—ni reb e pilung maku reb e prist. Ma gali maruwel nem ni pilung nge prist e be ulul iyan nge mada’ ko chiney.

17. (a) Mang e ulung ni ke mang gathon e pilung ni prist e chiney? (b) Uw rogon ni be fanay Jehovah e piin ni pilung ni prist?

¹⁷ Mini’ e pi cha’ ni yad be un ko re maruwel ni pilung nge prist nem ko ngiyal’ ney? Peter ni apostal e ke pi’ e fulweg ko re deer nem u lan e bin som’mon e babyor rok ni kan thagthagnag. I yol Peter ngak e piin ni kan dugliyrad ni yad bang ko fare dowef rok Kristus ni gaar: “Machane gimed girdien fare nam ni ke mel’egmed Got, ni gimed e pi prist rok e en ni Pilung, ma gimed fare nam ni gimed ba thothup, ni gimed girdien Got, ni mel’egmed Got ni ngam wereged murung’agen e n’en nrib fel’ ni ke ngongliy Got, ni ir e piningmed u fithik’ e lumor ngam bad nga fithik’ e tamilang rok nrib fel’.” (1 Peter 2:9) Pi thin ney e be tamilangnag ni pi gachalpen Jesus, ni reb e ulung, ni kan dugliyrad ma yad be lek luwan ay, ni yad e pi cha’ ni kar manged “fapi prist ni pilung,” ni Peter e ku ke pining “fare nam nib thothup” ngorad. Yad e piin ni be fanayrad Jehovah ni nge pi’ ngak e girdi’ rok boch e thin ma ma pow’iyrad ko tirok Got ban’en.​—Matthew 24:45-47.

18. Mang e peth u thilin e piin piilal ni kan dugliyrad nge piin pilung ni prist?

¹⁸ Piin ni piilal ni bay e maruwel ni kan pi’ ngorad u lan e ulung ko girdi’ rok Jehovah u ga’ngin yang e fayleng e yad be ayuweg e piin ni yad e pi prist ni pilung. Pi cha’ nem e bay rogon ni ngad tayed farad ma ngad ayuweged yad u polo’ i gum’irchadad, ndemtrug ko yad e piin ni kan dugliyrad ni nga ranod nga tharmiy fa danga’. Mang fan? Ya bochan, ni ke dugliy Jehovah u daken e kan ni thothup rok boch e piilal ni ngar rin’ed e maruwel rorad. (Hebrews 13:7, 17) Uw rogon?

19. Uwrogon ma piin piilal e kan duguliyrad ko kan ni thothup?

¹⁹ Pi cha’ nem e ka ra folgad ko n’en ni susun ni ngan rin’ nrogon ni yog ko Thin rok Got, ni kan yoloy u daken e kan ni thothup rok. (1 Timothy 3:1-7; Titus 1:5-9) Arfan, ni rayog ni nga nog ni kan ni thothup rok Got e ke dugliyrad. (Acts 20:28) Piin ni piilal, e susun ri yad manang e Thin Rok Got. Taareb rogon ko En Tapuf Oloboch ni Th’abi Tolang ni ir e ke dugliyrad, ma piin ni piilal e ku thingara fanenikayed urngin ban’en ni be m’ug nib taareb rogon ko laniyan’ ko ngiyal’ ni yad be pufthin.​—Deuteronomy 10:17, 18.

20. Mang e n’en ni ri ga be tayfan u murung’agen e piin piilal ni ma maruwel nib gel?

²⁰ Dabda magawonnaged mat’awrad, ya rriyul’ ni nge ga’fan u wan’dad e piin piilal rodad ni yad be maruwel nib gel! Pigpig ni kar ted, ni baga’ ni ke yan boor e duw, e ra gelnag e pagan’ rodad ngorad. Yad ma fal’eg rogon e pi muulung mi yad be pow’iy e ulung u fithik’ e yul’yul’, ma yad ma un ngodad i machibnag fare “thin nib fel’ u murung’agen fare Gil’ilungun,” ma yad ma pi’ e fonow ngodad ni kan fek u Bible ko ngiyal’ ni ke t’uf. (Matthew 24:14; Hebrews 10:23, 25; 1 Peter 5:2) Ma yad ma yib ni ngara guyed gadad u nap’an ni keb e m’ar ngodad ma yad ma fal’eg lanin’dad u nap’an ni ke kireban’dad. Ma yad ma rin’ e maruwel ni fan ko Gil’ilungun u fithik’ e yul’yul’ ma dariy e lem rorad nib siin. Kan ni thothup rok Jehovah e bay u dakenrad; ma yad ba fel’ u wan’.​—Galatia 5:22, 23.

21. Mang e susun ni ngari lemnag e piin piilal, ma mang fan?

²¹ Riyul’, ni piin piilal e dawora flontgad. Bochan ni yad manang e tin ni dabiyog rorad, ma arfan ni dara guyed rogon ni ngar suweyed fare ulung, ni “ban’en rok Got.” Dar yodoromgad, ya yad be sap ngorad ni yad e piin ‘tamaruwel nib chag ngak e pi walag ni fan ko falfalan’ rorad.’ (1 Peter 5:3; 2 Korinth 1:24) Piin piilal nib sobut’an’rad e yad ma maruwel nib gel mab t’uf Jehovah rorad, ma yad manang ni faan yad ra folwok rok nib fel’ rogon ma kab boor e tin nrayog ni ngara rin’ed ni ra fel’ rogon e ulung riy. Bochan e yad ma lem ni aram rogon, ma yad ma athamgil ni ngar daged e pi felngin ney ni bod e t’ufeg, nge runguy, nge gum’man’.

22. Uw rogon ma gad ra sul nga daken fare chep u murung’agen Korah ma ra gelnag e pagan’ rodad ko ulung rok Jehovah nrayog ni ngan guy?

²² Uw feni gel e falfalan’ riy ni bay Jehovah ni ir e Pilung rodad ni dabiyog ni ngan guy, me Jesus Kristus ni ir e Prist rodad ni th’abi tolang, nge piin ni yad bang ko fapi prist ni pilung ni kan dugliyrad ma yad e pi sensey rodad, nge piin piilal nib yul’yul’ ni yad ma pi’ e fonow ngodad! Yugu aram rogon ndariy e ulung nra flont ni girdi’ e be gagiyegnag, ma gad ba falfalan’ nrayog ni ngad pigpiggad ngak Got u taabang nib chag ko pi walag nib yul’yul’, ma riyul’ ni ma fol ko liw ni Got e ke dugliy u fithik’ e felfelan’!

[Footnotes]

Mang e Kam Fil?

• Mang e ke pi’ Jehovah u fithik’ e t’ufeg ni fan e nge ayuweg piyu Israel?

• Mang fan ni dabiyog ni ngan mat’awnag e togopuluw ni tay Korah ngak Moses nge Aaron?

• Mang e gad ra fil u rogon ni ke rin’ Jehovah ban’en ni fan ngak e piin tatogopuluw?

• Uw rogon ni ngad daged ni gad be pining e magar ko yaram rok Jehovah e chiney?

[Picture on page 19]

Urngin e maruwel ko pigpig ku Jehovah e ga be sap ngay ni n’en nib ga’fan ma ga be ta’fan?

[Picture on page 20]

“Ere, mang fan, ni ngam tolangnigew gimew ko ulung rok Jehovah?”

[Picture on page 23]

Piin piilal ni kan dugliyrad e yad e piin owchen e pi pilung ni prist