Deer ko Piin Ma Bieg

Ba kireb e gambling ni yugura buchuw e salpiy ni ngan fanay?

Thin rok Got e der weliy murung’agen e gambling nib tamilang, machane chu uw ni ke yog e ba gaman ni urngin e gambling e dabiyog ni chag nga kenggin e motochiyel u Bible.a Ya bod rogon, ni goo yimnang i yan ni gambling e ma k’aring e chogow. Ya goo binem e mich ma baga’ fan ni nge fal’eg e Kristiano i lemnag, ni bochan ni fare Bible e be yog ni “girdi’ nib chogow” e dabiyog ni ngar manged girdien e gin Suwon Got ma taareb rogon e chogow ko liyor ko liyos.​—1 Korinth 6:9, 10; Kolose 3:5.

Gambling e ku arrogon ni ma k’aring e lem ni ufanthin nge lem ni kireb ni ngaun i tagengingnag ban’en, nge arar ni rib gel ni ngar ni win. Apostal Paul e ri i ta’ chilen ni dab ni rin’ e pi n’enem mi yoloy ni gaar: “Ma thingar dab da ufanthingad, ara i k’aring bagadad e damumuw ngak bagadad, ara i awan’ bagadad ngak bagadad.” (Galatia 5:26) Maku arrogon, ni gambling e ma gelnag boch e pagan’ nge taga’ nga daken e superstition ni nge fel’ waathey. Piin ni yad ma gamble e yad ma sunmiy urngin mit e superstition, ni yad be athapeg ni ngar suruyed e tow’ath i yan nga rogon ni yad baadag. Yad be puguran ngodad fa piin nu Israel ni dar yul’yul’gad “ni faanra fal’eged rogon ba tebel ni fan ngak fare got ko Fal’eg Waathey nge tin baaram ni ura suguyed ko wayin ni kan athukuy ni fan ko fare got ko Wol.”​—Isaiah 65:11, NW.

Boch e girdi’ e sana ra yog ni yibe ta’ puluwon e pi n’enem ni salpiy ni de tolang puluwon ni bod ni yibe rin’ ba gosgos ko kat ara board game ni chon e tabinaw ara fager rom e be gosgos ndariy ban’en nib kireb riy. Riyul’, ya be’ ni ke ta’ puluwon ban’en nib achig e dabi lemnag ni ba chogow, fa ba ufanthin, fa ma tagenging, ara ma mich u wan’ e superstition. Machane, uw rogon angin e gambling ni ra yib ngak e ani yow be gosgos? Boor e girdi’ ni dakir yog ni pag e gambling ni i tabab ko puluwon nib achig ‘ni kemus ni yibe gosgos.’ (Luke 16:10) Ban’en nib dake ba manigil ma ra pig me bi m’ug ni ban’en ni rib gel e kireb riy.

Re n’em e rib ga’ ni ma riyul’ u puluwon e piin ni bitir. Boor e bitir e yad ma falfalan’ ni yad ma win nag e salpiy nib achig u ban’en ni ke cheg riy ma aram e ra k’aringan’ ni ngaki un nga reb ni ke ga’ bochuw e salpiy riy. (1 Timothy 6:10) Bay reb e study ni kan tay u Meriken ni ba n’uw nap’an ni i tay fare ulung ni Arizona Council u murung’agen rogon ni ma mecham e Gambling me micheg ni boor e girdi’ ni ma mecham ko gambling ni ma tabab u nap’an ni dawori ilal “ni aram e yima tay puluwon nochi gosgos ni ba achig ara fafel ko kat ni yad ma tay e pi fager ara girdi’ nu tabinaw.” Maku reb e report e yog ni “bitir e ma tabab ko gambling u tabinaw, nib ga’ ni ma tabab ko gosgos ko kat ni yad ma ta’ e girdi’ u tabinaw nge fager rorad.” Miki yog reb e re report ni “guyey e pasent ko bitir ni yad ma gambling e ma tabab u m’on ni dawori gaman ragag nge taareb e duw rorad.”

Ngiyal’ ni gadad be par u lan ba fayleng ni ke pag oren e wup riy nge pi n’en ni ma waliydad ko kireb, me ere mang fan ni de ga’ fan manga kud daged gadad nga reb? (Proverbs 27:12) Gambling​—ni bay e bitir fa demoy, ni ba achig ara baga’ e salpiy riy—​ma ra magawonnag e tirok Got ban’en ere thingarda pilo’gad riy. Kristiano ni yad baadag e gosgos ara gosgos ko kat ni yad ma ta’ e ba fel’ ni nga nog ngorad ni kemus ni nga uni yoloy e teng ara ngaur i gosgos gad ni kemus ni fan ko falfalan’ ma dab uni yoloy e teng riy. Pi Kristiano ni yad ba gonop e yad ma ayuweged yad ko tirok Got ban’en nge pi fager rorad nge chon e tabinaw rorad ni ngar pilo’gad ko gambling​—ni kuyu gu ra bochuw e salpiy ni kan ta’ ni puluwon.

[Footnote]