“Nge Par Nib T’uf Bigimed Rok Bigimed”

“Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”​—JOHN 13:35.

1. Mang felngin ni i tamilangnag Jesus ko re nep’ nem u m’on ni ke yim’?

“PI FAKAG.” (John 13:33) Aram rogon ni pining Jesus pi apostal rok ko fare nep’ u m’on ni yim’. Dakuriy bang u lan e Gospel ni ke fanay Jesus e re thin nem ni bay e runguy riy u nap’an ni non ngak e pi apostal rok. Machane re nep’ nem e ke fanay e re thin nem ya nge nang pi gachalpen ni ri yad ba t’uf rok. Ma gonapan 30 yay ni weliy Jesus morngaagen e t’ufeg ko re nep’ nem. Mang fan ni ke tay ni baga’ fan e t’ufeg?

2. Mang fan ni ri baga’ fan ni nge dag e pi Kristiano e t’ufeg?

² I weliy Jesus ko mang fan ni baga’ fan e t’ufeg. Be gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35; 15:12, 17) Be’ ni gachalpen Kristus e ra t’ufeg pi walagen. Yira poy e tin riyul’ e Kristiano ni gathi bochan e mad rorad, ara yalen rorad ni yugu ba thil, ya yira poyrad ni bochan e t’ufeg ni ra dag bagayad ngak bagayad. Re t’ufeg ney ni rib lingagil e aram e bin l’agruw e n’en nib t’uf rok e gachalpen Kristus ni kada weliyed morngaagen ko fa binem e thin. Mang e ra ayuwegdad ni nguuda daged e t’ufeg?

“Ngkum Athamgilgad Boch”

3. Mang fonow u morngaagen e t’ufeg ni pi’ apostal Paul?

³ Kari lingagil pi gachalpen Kristus ko bin somm’on e chibog ni bochan e t’ufeg u fithik’rad, ere ku arrogon e ngiyal’ ney ni yira guy e t’ufeg u fithik’ e tin riyul’ i gachalpen Kristus. I yoloy apostal Paul ngak e tin somm’on e Kristiano ni gaar: “Dakuriy fan ni nggu yoloy nggu pi’ ngomed rogon ni nge bigimed mi i par nib t’uf rok e piin ni ke mich Jesus u wun’rad ni bod gimed. Ya ke fil Got rogon ngomed ni nguum pired nib t’uf bigimed rok bigimed. Ma erera’ rogon e ngongol ni kam rin’ed ngak urngin e piin ni girdien Kristus ni walagmed.” Arrogon, machane i ulul Paul ngay ni gaar: “Ngkum athamgilgad boch.” (1 Thessalonika 3:12; 4:9, 10) Ku arrogodad ni thingar da ted fan e fonow rok Paul u gumercha’dad ma ngada “athamgilgad boch” ni ngada t’ufeged gadad.

4. Rogon e thin rok Paul nge Jesus, chon mini’ e thingar da ayuweged?

⁴ U lan e re babyor nem ni yoloy Paul me yog ngak e piin nib mich u wan’rad ni ngar “pied e athamgil ngak e piin ni yad be rus, ma ngar ayuweged e piin ni yad mmeewar.” (1 Thessalonika 5:14) Ma yugu biyay me puguran ngak e pi Kristiano ni “piin nib gel e michan’ rorad ngak Somol e susun e ngar ayuweged e piin ni yad mmeewar ngar uned i fek gilbarad.” (Roma 15:1) Ki pi’ Jesus e fonow u rogon ni ngan ayuweg e piin ni yad mmeewar. Tomren ni yog ngak Peter ni ra pi’ Peter keru’ ngak ko re nep’ nem ni yira kol Jesus, me yog Jesus ngak ni gaar: “Ma faan ga ra sul ngog, ma thingar mpi’ e gel nga laniyan’ pi walagem.” Mang fan? Ya ku arrogorad ni kar pied keru’rad ngak Jesus ma kub t’uf e ayuw rorad. (Luke 22:32; John 21:15-17) Ere Thin Rok Got e ke tay chilen ngodad ni ngada ayuweged e piin nib meewar e michan’ rorad ma sana dakur uned ko ulung ni Kristiano. (Hebrews 12:12) Mang fan ni ngada ayuweged yad? Bay e fulweg riy ko l’agruw e fanathin rok Jesus.

Ba Saf ni Ke Malog Ma Ba Salpiy ni Ke Mul

5, 6. (a) Mang l’agruw e fanathin ni weliy Jesus? (b) Mang e ke tamilangnag fagali fanathin ney u morngaagen Jehovah?

⁵ I weliy Jesus l’agruw e fanathin nib ngoch ni nge tamilangnag ngak e piin ni yad be motoyil ngak rogon e piin ni kar thaygad u wan’ Jehovah. Reb fa gali fanathin e morngaagen ba tachugol saf. I gaar Jesus: “Susun e aray rogon ma ba’ bigimed ni bay raay i saf ni fak me yan reb nga bang​—ere mang e ra rin’? Ra pag fa mereb i ragag nge mereb nem ko gin’en ni yad be kay e pan riy me yan ni be changarnag fare saf ni ke yan nga bang nge mada’ ko ngiyal’ ni fin ra pirieg riy. Ma nap’an nra pirieg, me ri felfelan’, me yin’ nga pon, me fek i yib nga tabinaw rok, me kunuy e pi tafager rok nge piin ni yad bbugul i yoror ngar muulunggad ngak me gaar ngorad, “Mu uned ngog ko felfelan’, ya kug pirieg fare saf rog ni yan nga bang!” Ere nggog ngomed ni ku erera’ rogon ni ba ga’ e felfelan’ ni yira tay u tharmiy ni bochan taareb e tadenen ni ke pi’ keru’ ko kireb ni be ngongliy, ko felfelan’ ni yira tay ni bochan mereb i ragag nge mereb e girdi’ ni yad ba yal’uw ni dariy rogon ni ngar pied keru’rad ko denen.”​—Luke 15:4-7.

⁶ Fa bin l’agruw e fanathin e morngaagen be’ ni ppin. I gaar Jesus: “Susun e aray rogon ma ba’ ragag i salpiy ni wasey rok be’ ni ppin me yan reb nga bang​—ere gur mang e ra rin’? Ra tay e nifiy ko magal, me wologuy lan e naun rok, me fal’eg i chachangarnag u gubin yang nge mada’ ko ngiyal’ ni fin nra pirieg riy. Ma faanra pirieg, me kunuy e tafager rok nge piin ni yad bbugul i yoror me gaar ngorad, Mu uned ngog ko felfelan’, ya kug pirieg fare salpiy rog ni wasey ni yan nga bang! Ere nggog ngomed ni ku erera’ rogon e pi engel rok Got ni yad ra felfelan’, ni bochan taareb e tadenen ni pi’ keru’ ko kireb ni be ngongliy.”​—Luke 15:8-10.

7. Mang l’agruw ban’en ni gad ra fil ko fare fanathin u morngaagen fare saf ni ke malog nge fare salpiy ni ke mul?

⁷ Mang e rayog ni ngada filed ko gali fanathin ney nib ngoch? Ma tamilangnag ngodad (1) rogon lanin’dad ngak e piin ni kar meewargad, nge (2) n’en ni ngada rin’ed ni ngada ayuweged yad. Ngada weliyed e gali thin ney.

Ke Malog Machane Ka Baga’ Fan

8. (a) Uw rogon laniyan’ fare tachugol saf nge fare ppin ni bochan e ke yan ban’en rorow nga bang? (b) Uw rogon lanin’row ni ke tamilang ko n’en ni kar rin’ew?

⁸ U lan fa gali fanathin e ke malog ban’en, machane mu tay fanam iyan riy ko uw rogon laniyan’ e piin ni ke malog e tirorad ban’en. De lemnag fare tachugol saf ni gaar: “Nge diin reb e saf, ya ka bay 99 e saf rog? Dab gu gafgow ni bochan e ke yan nga bang.” Maku de lemnag fare ppin ni gaar: “Mang ni nge magafan’ug ni bochan taareb e salpiy? Kab fel’ u wan’ug fa nel’ i salpiy ni ka bay rog.” Danga’, ya ke gaweg fare tachugol saf e saf rok ni gowa ke mus ni taareb ni fak. Maku arrogon fare ppin ni ke tay ni gowa dakuriy reb e salpiy rok. Yow l’agruw ni kab ga’ fan e n’en ni ke yan nga bang u wan’row. Mang e be yip’ fan?

9. Rogon laninyan’ fare tachugol saf nge fare ppin e be yip’ e mang?

⁹ Mu tay fanam iyan riy ko n’en ni yog Jesus u tomren fa gali fanathin: “Ku erera’ rogon ni ba ga’ e felfelan’ ni yira tay u tharmiy ni bochan taareb e tadenen ni ke pi’ keru’ ko kireb ni be ngongliy.” Miki gaar: “Ku era’ rogon e pi engel rok Got ni yad ra felfelan’ ni bochan taareb e tadenen ni pi’ keru’ ko kireb ni be ngongliy.” Rogon laniyan’ fare tachugol saf nge fare ppin e ma tamilangnag boch rogon laniyan’ Jehovah nge piyu tharmiy. Bod rogon ni kab t’uf e n’en ni ke malog u wan’ fare tachugol saf nge fare ppin, maku arrogon e piin ni kar maloggad ma dakur uned ko pi girdi’ rok Got ni ku yad ba t’uf u mit Jehovah. (Jeremiah 31:3) Pi girdi’ nem e ke meewar e michan’ rorad machane dar togopuluwgad. Yugu aram rogon ni yad mmeewar machane ka yad be fol ko pi motochiyel rok Jehovah. (Psalm 119:176; Acts 15:29) Ere ma k’adan’ Jehovah ni bod ni k’adan’ kakrom ma de “chuwegrad u p’eowchen.”​—2 Kings 13:23.

10, 11. (a) Uw rogon e piin ni dakur uned ko ulung u wan’dad? (b) Rogon e thin ko fa gali fanathin rok Jesus, uw rogon nrayog ni ngada ayuweged e pi cha’ nem?

¹⁰ Ri gad ma lemnag e piin ni yad mmeewar ma dakur uned ko ulung ni Kristiano ni bod rogon ni ma lemnagrad Jehovah nge Jesus. (Ezekiel 34:16; Luke 19:10) U wan’dad e piin ni yad meewar e yad bod e saf ni ke malog​—ma gathi m’ay farad. Gathi gad ma lemnag: “Mang fan ni nge magafan’dad ni bochan be’ ni ke meewar? Kab fel’ rogon fare ulung ni daki un ngay.” Danga’, ya gad ma lem ni bod rogon Jehovah ni kab t’uf e piin ni kar maloggad machane yad ba adag ni ngar sulod ko ulung.

¹¹ Uw rogon nrayog ni nge tamilang ni aram rogon lanin’dad? Fagali fanathin rok Jesus e ma tamilangnag e pi n’en ni rayog ni ngada rin’ed (1) ni gad somm’on ni ngada rin’ed ban’en, (2) ngada munguygad, (3) ngada tedan’dad ngay. Ngada weliyed e pi n’en ney.

Gad Somm’on Ni Ngada Rin’ed Ban’en

12. Fare thin ni “ra yan ni be changarnag fare saf ni ke yan nga bang” e ma tamilangnag e mang u morngaagen laniyan fare tachugol saf?

¹² U lan e bin somm’on ko fa gali fanathin rok Jesus me yog Jesus ni fare tachugol saf e “ra yan ni be changarnag fare saf ni ke yan nga bang.” Fare tachugol saf e ir e somm’on ni nge rin’ ban’en me maruweliy ni nge gaweg fare saf ni ke malog. Mo’maw’ e maruwel riy, ma bay e riya’ riy ma sana ba n’uw yang ni nge gaweg fare saf machane dariy fan e pi magawon ney u wan’ fare tachugol saf. Danga’, ya me athamgil “nge mada’ ko ngiyal’ ni fin ra pirieg riy.”​—Luke 15:4.

13. Uw rogon ni i ayuweg e piin nib yul’yul’ kakrom e piin ni yad mmeewar, ma uw rogon nrayog ni ngada folwokgad rororad?

¹³ Ku arrogon e ayuw ni yira pi’ ngak be’ ni ke meewar ni ba t’uf ni faanem ni kab gel boch e ir e somm’on ni nge rin’ ban’en. Manang e piin nib yul’yul’ kakrom ni aram rogon. Susun, nap’an ni ke tamilang u wan’ Jonathan ni fak Saul ni Pilung ni ba t’uf ni ngan pi’ e athamgil nga laniyan’ e fager rok ni David, me “suwon Jonathan me yan ngak David u Horesh ni fan ni nge pi’ e gel nga laniyan’ nge gel e michan’ rok ngak Got.” (1 Samuel 23:15, 16) In miriay e duw nga tomren, u nap’an ni guy Nehemiah ni ir e Governor ni ke meewar pi walagen ni piyu Jew, “me suwon ko chi ngiyal’ nem” me yan nge pi’ e athamgil nga lanin’rad ni nge “par Jehovah u lanin’rad.” (Nehemiah 4:14) Maku arrogodad e ngiyal’ ney ni gad ba adag ni “ngada suwongad”​—ara gad e somm’on ni ngada rin’ed ban’en—​ni ngada pied e gel nga laniyan’ e piin ni kar meewargad. Machane chon mini’ u lan e ulung ni ngar rin’ed?

14. Chon mini’ u lan e ulung ni Kristiano ni ngar ayuweged e piin nib meewar?

¹⁴ Baga’ ni ke mil fan ngak e piin ni piilal ni Kristiano ni ngar “pied gelngin e pi paef ndakuriy gelngin mi yad gelnag e pi bug ni be da’da’ ni ke meewar. Nge lungurad ngak urngin e piin ni ke mulan’rad, “Mu gelniged gimed ma dab mu rusgad!”” (Isaiah 35:3, 4; 1 Peter 5:1, 2) Machane mu tay fanam iyan riy ni fonow rok Paul ni ngan “pi’ e athamgil ngak e piin ni yad be rus, min ayuweg e piin ni yad mmeewar” e gathi goo piin ni piilal e be fonownagrad Paul. Ya be non Paul ngak urngin “girdien fare ulung nu Thessalonika.” (1 Thessalonika 1:1; 5:14) Ere maruwel rok urngin e Kristiano ni ngan ayuweg e piin nib meewar. Bod fare tachugol saf ko fare fanathin ma urngin e Kristiano e nge “yan nge chachangarnag faanem ni ke yan nga bang.” Ma bay angin e re maruwel ney ni faan yira maruwel u taabang rok e piin ni piilal. Bay boch ban’en nrayog ni ngam rin’ ni ngam ayuweg be’ ko ulung rom, fa?

Ngam Munguy

15. Mang fan ni i ayuweg fare tachugol saf ni ke yan nga bang?

¹⁵ Mang e ra rin’ fare tachugol saf u nap’an ni ke pirieg fare saf ni ke malog? “Me yin’ nga daken pon.” (Luke 15:5) Rib gel e runguy ko re thin nem ma boor ban’en ni be tamilangnag! Sana ke sor fare saf ni bokum e rran nge nep’ u boch e binaw ni de nang, ma sana ke sor u fithik’ e riya’ ni ke yib e layon ngak. (Job 38:39, 40) Dabi siy ni ke meewar fare saf ni bochan e dakuriy e ggan rok. Rib gel e meewar rok ma dabiyog ni nge sul nga tafen e saf u gelngin. Ere ke lumel fare tachugol saf me chibiy fare saf u fithik’ e sumunguy me fek iyan nge sulweg ngak fare ulung i saf. Uw rogon nrayog ni ngada pied e ayuw ni bod ni rin’ fare tachugol saf?

16. Mang fan ni ngada munguygad u rogon ni i munguy fare tachugol saf ngak fare saf ni ke malog?

¹⁶ Be’ ni daki un ko ulung e kari aw paruwan e michan’ rok. Ir bod ba saf ni ke thay ma be sor u fithik’ e re fayleng ney ni be togopuluw ngak. Dariy e ayuw ni be yib ko ulung ni Kristiano ere rayog ni nge cham Moonyan’ ngak ma ir “bod ba layon ni be tolul ni be gayiy be’ ni nge longuy.” (1 Peter 5:8) Ma kub meewar ni bochan e dariy e ggan rok ni tirok Got ban’en. Ere dariy gelngin ni nge liyeg fapi magawon ni be magawonnag e kanawo’ rok ni be sul ko ulung. Ere thingar da lumelgad ni gowa gad be chibiy faanem ni ke meewar u fithik’ e sumunguy ngada sulweged iyan ko ulung. (Galatia 6:2) Uw rogon ni gad ra rin’?

17. Uw rogon nrayog ni ngada folwokgad rok apostal Paul u nap’an ni gad ra yan nga tafen be’ ni ke meewar?

¹⁷ Be gaar apostal Paul: “Faanra meewar be’, me un lanin’ug ngak ni susun e gag e kug meewar.” (2 Korinth 11:29, The New English Bible; 1 Korinth 9:22) Manang Paul laniyan’ e girdi’ ni kub muun e piin nib meewar ngay. Ku arrogodad ni thingar da runguyed e piin nib meewar. Nap’an ni gad ra yan nga tafen be’ ni Kristiano ni ke meewar, ma thingar da weliyed ngak ni kab t’uf rok Jehovah ma piin ni Mich Rok Jehovah e yad be tawrengnag. (1 Thessalonika 2:17) Ma ga weliy ngak ni ba adag pi walagen ni ngar ayuweged ya “yad pi walagen ni fan ko ngiyal’ ni bay e magawon.” (Proverbs 17:17; Psalm 34:18) Thin rodad ni yib u gumercha’dad e ra chibiy faanem nga lang me yib e gel ngak ni nge sul ko fare ulung i saf. Ma aram e mang e gad ra rin’? Fare fanathin u morngaagen fare ppin ni ke mul fare salpiy rok e ra ayuwegdad.

Ngada Tedan’dad Ngay

18. (a) Mang fan ni de mulan’ fare ppin ko fare fanathin? (b) Uw rogon ni kari athamgil fare ppin, ma mang wenegan?

¹⁸ Fare ppin ni ke mul e salpiy rok e manang nib mo’maw’ ni nge pirieg machane bay kanawoen. Faan manga ke mul fare salpiy u fithik’ e pan, ara u lan e lipath nib toar ma sana ra lemnag fare ppin ni dariy kanawoen ni ngan pirieg. Machane manang ni bay fare salpiy u bang u naun rok u bang nib chugur, me tabab ni nge gay ni be tayan’ ngay. (Luke 15:8) Somm’on me k’eg e magal rok ya nge tamilang lan e naun rok. Me fek e wolguw rok me wologuy lan e naun rok ni be tayan’ ko lingan fare salpiy ni be chub. Me fl’eg i gay u gubin yang nge mada’ ko ngiyal’ ni ke gal e magal rok ko fare salpiy. Ke taw’ath fare ppin ni bochan e ke tayan’ ngay!

19. Mang e rayog ni gad ra fil ko fare ppin ko fare fanathin u rogon ni ngada ayuweged e piin nib meewar?

¹⁹ Re fanathin ney e ma puguran ngodad ni rayog rodad e re maruwel ney ni ke pi’ fare Thin Nib Thothup ngodad ni ngada ayuweged e piin ni Kristiano ni kar meewargad. Machane gad manang ni bay e maruwel riy. Ma aram e n’en ni yog apostal Paul ngak e piin ni piilal nu Efesus ni gaar: “Kug dag ngomed u fithik’ urngin ban’en nra un maruwel nib gel ni ara’ rogon ma thingar da ayuweged e piin ni yad ba war.” (Acts 20:35a) Mu tay fanam iyan riy ni gathi yugu be chachangar fare ppin u lan e naun rok ni yu ngiyal’ nge yugu bang nge bang u lan e naun rok. Danga’, ya ba yaram kanawoen ni be gay fare salpiy me tayan’ ngay “nge mada’ ko ngiyal’ ni ke pirieg.” Ku arrogodad ni thingar da tedan’dad ngay ma nge yaram kanawoen ni gad be guy rogon ni ngada ayuweged be’ ni ke meewar. Mang e rayog ni ngada rin’ed?

20. Mang e rayog ni ngan rin’ ni ngan ayuweg e piin nib meewar?

²⁰ Uw rogon ni gad ra ayuweg be’ nib meewar ni nge gel e michan’ rok? Rayog ni ngada filed e Bible ngak u lan reb e pi babyor rodad ni ra m’ag ngak. Gad ra fil e Bible study ngak ma ra yaram kanawoen ni gad ra ayuweg faanem. Fare service overseer e ra duguliy e ani ra pi’ e ayuw ngak faanem. Ma sana ra yog ko mang thin e rayog ni ngan fil ngak ara mang babyor e ra ayuweg faanem nib meewar. Ke fanay fare ppin ko fare fanathin boch talin e maruwel ni nge ayuweg ko maruwel rok, ere ku arrogodad e ngiyal’ ney ni bay e pi talin e maruwel rodad ni ra ayuwegdad ni ngada rin’ed fare maruwel ni ke pi’ Got ngodad ni ngada ayuweged e piin nib meewar. Bay l’agruw e talin e maruwel nib beech rodad, ara l’agruw e babyor ni ra ayuwegdad. Aram fa gali babyor ni Worship the Only True God nge Draw Close to Jehovah.a

21. Mang flaab nra yib ni bochan e ayuw ni ngan pi’ ngak e piin nib meewar?

²¹ Bay e flaab riy ni fan ko urngin e girdi’ ko re maruwel ney ni ngan ayuweg e piin nib meewar. Faanem ni yibe ayuweg e ra falfalan’ ni ke sul ngak e piin ni ri yad e pi tafager rok. Ma gad ra nang fare falfalan’ ni yib ngak e piin ni yad ma pi’ e ayuw. (Luke 15:6, 9; Acts 20:35b) Maku ra gel e t’ufeg u lan ga’ngin fare ulung ya ra bagadad e ke t’ufeg bagadad. Ma bin ni baga’ fan e yira yog e sorok ngak Jehovah nge Jesus ni yow e tachugol saf rodad ya yow ba adag ni ngar piew e ayuw ngak e piin nib meewar ma aram e ayuw ni be pi’ e pi tapigpig rorow u fayleng. (Psalm 72:12-14; Matthew 11:28-30; 1 Korinth 11:1; Efesus 5:1) Ere bay fan ni “nge bagadad e nge t’ufeg bagadad”!

[Footnote]

Rayog Ni Ngam Weliy?

• Mang fan ni thingar da daged e t’ufeg ni gadad gubin?

• Mang fan ni ngada t’ufeged e piin ni yad meewar?

• Mang e gad ra fil ko fagali fanathin u morngaagen fare saf ni ke malog nge fare salpiy ni ke mul?

• Mang boch ban’en nrayog ni ngada rin’ed ni ngada ayuweged e piin nib meewar?

[Pictures on page 14, 15]

Nap’an ni gad ra ayuweg e piin nib meewar, gad e somm’on ni gad ra rin’ ban’en, ma gad ra munguy, ma gad ra tayan’ ngay

[Picture on page 14, 15]

Rayog e flaab ngak urngin e girdi’ u nap’an ni yira ayuweg e piin nib meewar