“Mu Sulod Ngog”

1. Nap’an nra sul reb e tapigpig rok Jehovah ngki pigpig ngak bayay, ma uw rogon e re n’ey u wan’?

KAD weliyed ko fa binem e article ni ke taarebrogonnag Jehovah ir ngak be’ nib fel’ rogon ni ma gafaliy e saf nri ma lemnag e saf rok nreb nge reb, maku ma gay e tin ke malog u fithik’rad. I yog Jehovah ngak e girdi’ nu Israel ni kar maloggad rok ni gaar: “Mu sulod ngog, mu gu sul ngomed.” Gad manang ni ku aray rogon ni ma lemnag Jehovah e piin kar maloggad e ngiyal’ ney ni bochan e ke yog ni gaar: “Ri dab gu thil.” (Mal. 3:6, 7) I yog Jesus nri ma felfelan’ Jehovah nge pi engel u nap’an nra sul taareb e tapigpig rok Got ngak ni ke malog.​—Luke 15:10, 32.

2. Mang e gad ra weliy ko re article ney?

² Ngad weliyed dalip e fanathin ni yog Jesus ni be fil ngodad boch ban’en nib ga’ fan u rogon ni ngan ayuweg e piin kar maloggad rok Jehovah. Gad ra weliy boch e fel’ngin nib t’uf ni nge yag ngodad ya nge yag nda ayuweged e piin ke malog rok Jehovah ni ngar sulod ngak. Ku gad ra fil nib gel e felfelan’ ni gad ra tay ni faan gad ra athamgil ni ngad ayuweged e piin kar talgad ko muulung nge machib ya nge yag nra sulod bayay ko ulung rok Got.

MU GAY FARE SALPIY NI WASEY NI KE YAN NGA BANG

3-4. Mang fan nri fal’eg fare pin ni kan weliy murung’agen ko Luke 15:8-10 i gay fare salpiy ni wasey ni ke yan nga bang?

³ Ba t’uf ni ngad athamgilgad ngad gayed e piin yad baadag ni ngar sulod ngak Jehovah. I weliy Jesus u lan ba fanathin rok ni bay ko Gospel rok Luke rogon ni gay be’ nib pin ba salpiy ni wasey ni fen ni ke yan nga bang nrib ga’ fan u wan’. Re salpiy ni wasey nem e ka nog e drachma ngay. Gin nib ga’ fan ko re fanathin ney e be weliy rogon e maruwel nib gel ni tay e re ppin nem u nap’an ni be gay e re salpiy nem ni ke yan nga bang.​—Mu beeg e Luke 15:8-10.

⁴ I weliy Jesus rogon laniyan’ e re ppin nem u nap’an ni pirieg fare salpiy ni wasey ni fen nrib ga’ fan u wan’. Ngiyal’ ni immoy Jesus riy e nap’an nra mabgol reb e ppin u Israel ma yu ngiyal’ e ma pi’ e chitiningin ragag e salpiy ni wasey ngak. Rayog nre salpiy ni wasey ney ni ke yan nga bang e rib ga’ fan u wan’ e re ppin ney ni bochan e aram reb ko fa ragag i salpiy ni pi’ e chitiningin ngak. Be lemnag e re ppin ney ni ke mul e re salpiy ney u bang u lan e naun rok. Ere k’eg e magal nga i yaliy u lan e naun rok, machane de pirieg. Rayog nde ga’ ramaen e re magal rok nem nrayog ni nge pirieg e gin bay fare salpiy ni wasey riy. Ere tomur riy, ma aram me wolguy lan e naun rok nib fel’ rogon. Ma aram me yag ni nge guy fare salpiy ni be gal ramaen u fithik’ e fiyath ni ke wolguy u lan e naun rok. Rib gel e felfelan’ ni tay u nap’an ni pirieg fare salpiy ni wasey! Ere pining e pi fager nge piin buguli yoror rok nge yog ngorad ni ke pirieg fare salpiy ni wasey ni fen.

5. Mang fan nrayog ni nge mo’maw’ ni ngad pirieged e piin kar talgad ko muulung nge machib?

⁵ Ere ba tamilang ko fare fanathin rok Jesus nnap’an nra yan ban’en ni fedad nga bang ma thingar da maruwelgad nib gel ya nge yag nda pirieged fare n’em. Ku arrogon nrayog nib t’uf ni ngad maruwelgad nib gel ya nge yag nda pirieged e piin kar talgad ko muulung nge machib. Rayog ni boor e duw ni ke yan ndakurur chaggad ngodad. Rayog ni kar chuwgad ka ranod ra pared nga yugu reb e binaw nde nangrad e pi walag riy. Machane rayog ni nge pagan’dad ni chiney e bay boch ko pi cha’ney ni yad baadag ni ngar sulod ngak Jehovah bayay. Yad baadag ni ngar pigpiggad pi walagrad u taabang bayay, machane dabiyog ni ngar rin’ed e re n’ey ni faanra dab da ayuweged yad.

6. Uw rogon nrayog ni nge un urngin e walag u lan e ulung i gay e piin kar talgad ko muulung nge machib?

⁶ Mini’ e rayog ni nge pi’ e ayuw ni ngan gay e piin kar talgad ko muulung nge machib? Urngin e walag u lan e ulung nrayog ni ngar pied e ayuw nib muun ngay e piin piilal, nge pi pioneer, nge girdien e tabinaw rok e pi walag ney. Bay reb e fager rom, ara girdi’ rom ni ke tal ko muulung nge machib, fa? Mang e susun ngam rin’ ni faanra kam mada’nag bagayad e pi girdi’ ney u nap’an ni yibe machib u mit e tabinaw ara yungi n’en ma muulung e girdi’ ni yoor ngay? Mog ngak ni faanra baadag ni nga nib ni guy, ma rayog ni nga mog ko piin piilal ko ulung rom e gin ma par riy ara namba ko telefon rok.

7. Mang e ga be fil ko n’en ni yog reb e piilal ni ka nog Thomas ngak?

⁷ Ba milfan ngak e piin piilal ni ngar gayed e piin kar talgad ko muulung nge machib ni yad baadag ni ngar sulod ngak Jehovah. Uw rogon nrayog ni ngar rin’ed e re n’ey? Am lemnag e n’en ni yog reb e piilal ni ka nog Thomasb ngak ni ma par u Spain. Ke pag 40 e Pi Mich ni ke ayuwegrad kar sulod ko ulung rok Got. I yog ni gaar: “Som’on e gu ma fith boch e walag ko yad manang e gin ma par boch e girdi’ riy ni kar talgad ko muulung nge machib fa danga’. Fa reb e gu fith reb e walag ko bay be’ ni manang ndakir ma un ko muulung fa dariy. Yooren e walag u lan e ulung e yad baadag ni ngar pied e ayuw ni bochan e yad baadag ni ngar uned i gay e piin kar talgad ko muulung nge machib. Ma tomuren ni gamad ra mada’ e pi walag ney, ma gu ma fith salpen pi fakrad, nge girdi’ rorad. Bay boch i yad ni i un pi fakrad ko muulung kafram, maku bay boch ko pi bitir nem ni ur uned ko machib ba ngiyal’. Ku rayog ni ngan ayuweg e pi cha’ney ni ngar sulod ngak Jehovah.”

MU AYUWEG PI FAK JEHOVAH NI KAR MALOGGAD NGAR SULOD NGAK

8. Uw rogon e ngongol rok fare matam ngak fare pagel ni fak ni ke kalngan’ ko fare fanathin ni murung’agen fare pagel ni malog ni bay ko Luke 15:17-24?

⁸ Mang boch e fel’ngin nib t’uf ni nge yag ngodad ya nge yag nda ayuweged e piin yad baadag ni ngar sulod ngak Jehovah? Am tay fanam i yan ko n’en nrayog ni ngad filed ko fare fanathin rok Jesus ni murung’agen fare pagel ni chuw u tafen nge yan nga bang. (Mu beeg e Luke 15:17-24.) I yog Jesus ni boch nga tomuren me tamilangan’ fare pagel ko kireb ni ke rin’, ma aram me dugliy ni nge sul nga tabinaw. Nap’an ni sul me mil e chitamangin nge yib i gumuchmuch ngak. Re n’ey e micheg ngak fare pagel ni kab t’uf rok e chitamangin. Kari magawon e nangan’ rok e re pagel ney ko n’en ke rin’, ma be lemnag ndakuriy rogon ni ngkun tay ni ir reb e bitir ni fak fare tabinaw. Nap’an ni weliy laniyan’ ngak e chitamangin, ma aram me nang fare matam rogon laniyan’. I rin’ fare matam boch ban’en ni nge micheg ngak fare pagel ni fak ni ke felfelan’ ni ke sul nga tabinaw ma dabi tay ni ir reb e tapigpig ko fare tabinaw, ya ka ra tay ni ir fak. Ere ngongliy fare matam ba madnom ni fan ko fare pagel ni fak ni ke kalngan’, me pi’ e bin th’abi fel’ e mad ni nge chuw e re pagel nem ngay.

9. Mang boch e fel’ngin nthingari yag ngodad ni faanra ngad ayuweged e piin kar talgad ko muulung nge machib ni ngar sulod ngak Jehovah? (Mu guy fare kahol ni kenggin e “Rogon ni Ngan Ayuweg e Piin Yad Baadag ni Ngar Sulod ngak Jehovah.”)

⁹ Jehovah e bod fare matam u lan fare fanathin. Ba t’uf rok e piin kar talgad ko muulung nge machib, ma baadag ni ngar sulod ngak. Gad ra folwok rok Jehovah ma rayog ni ngad ayuweged e pi girdi’ ney ni ngar sulod ngak. Ra ngad rin’ed e re n’ey mab t’uf ni ngad gum’an’naged gadad, ma gad nang rogon lanin’rad, ma gad dag e runguy, nge t’ufeg ngorad. Mang fan ni ngad daged e pi fel’ngin ney, ma uw rogon ni ngad rin’ed e re n’ey?

10. Mang fan nib t’uf ni ngad gum’an’naged gadad u nap’an ni gad be ayuweg be’ ni nge sul ngak Jehovah bayay?

¹⁰ Ba t’uf ni ngad gum’an’naged gadad ni bochan e ba n’uw nap’an mfini yag ni nge sul be’ ngak Jehovah. Boor e piin kar talgad ko muulung nge machib ni ka rogned ni boor yay ni i sul e piin piilal nge boch e walag ngorad mfini yag ni ngkur pigpiggad ngak Jehovah bayay. Bay reb e walag ni ka nog Nancy ngak ni ma par u Southeast Asia ni yoloy ni gaar: “Bay reb e fager rog u lan e ulung nrib ga’ e ayuw ni pi’ ngog. Ri gub t’uf rok ni gu bod reb e ppin ni walagen nib ilal ngak. Ma weliy ngog boch ban’en ni ug rin’ew u taabang kafram ni ug felfelan’gow ngay. I gum’an’nag ir nge motoyil ngog u nap’an nug be weliy lanin’ug ngak, ma der ma tuntun ni nge pi’ boch e fonow ngog. Ir e bin riyul’ e fager rog ni ke fal’eg rogon ni nge ayuwegeg ko ngiyal’ ni ke t’uf rog.”

11. Mang fan nib t’uf ni ngad nanged rogon laniyan’ be’ ni ke dabuy ban’en ni kan rin’ ngak ya nge yag nda ayuweged?

¹¹ Ra dabuy be’ ban’en ni kan rin’ ngak, ma rayog ni nge amith laniyan’ ni bod bangi maad’ad nib gel e amith riy. Machane gad ra nang rogon laniyan’ facha’ ma bod ni kad pied ba falay ngak nib manging’ nrayog ni nge fal’eg laniyan’. Bay boch e walag ni kar talgad ko muulung nge machib ni bochan ban’en ni ke yog ara ke rin’ reb e walag ngorad boch e duw kafram, ma dawori chuw e re n’em u lanin’rad ma ka yad be par ni yad ba damumuw. Bochan e re n’ey, ma aram fan ndubrad ni ngar sulod ngak Jehovah. Rayog ni bay boch i yad ni be lemnag nde puluw rogon e ngongol ni kan rin’ ngak. Ere rayog nib t’uf be’ ni nge motoyil ngorad, me nang rogon lanin’rad. (Jas. 1:19) María nreb e walag ni tal ba ngiyal’ ko muulung nge machib e yog ni gaar, “Ba t’uf be’ ni nge motoyil ngog, me fal’eg lanin’ug, me pi’ e fonow ngog nib manigil miki ayuwegeg.”

12. Uw rogon nrayog ni ngan taarebrogonnag e t’ufeg rok Jehovah nga ba yil’ i gaf?

¹² Be yog e Bible ni t’ufeg rok Jehovah ko girdi’ rok e bod rogon ba yil’ i gaf. Ni uw rogon? Am lemnag e re n’ey: Mu susunnag ni kam mul nga maday mab gel e n’ew ma kub garbeb e day, ma be yan ni ngam limoch. Machane bay be’ u lan reb e bowoch u charem ni yon’ ban’en ngom nrayog ni ngam kol ya nge dab mu nguchur nga ar. Ba mudugil ni ga ra pining e magar ngak u lanin’um. Machane kab t’uf e ayuw rom ni faanra ngam par ni gab fos. Ba t’uf ni ngam chuw u fithik’ e day. Ere thingari yon’ e girdi’ u lan fare bowoch ba yil’ i gaf ngom ya nge yag nim kol min girngiyem nga lan fare bowoch. I weliy Jehovah murung’agen piyu Israel ni kar maloggad rok ni gaar: “Gu gagiyegnagrad u fithik’ e runguy nge t’ufeg ngar bad ngog.” (Hos. 11:4) Ku aray rogon ni ma lemnag Got e piin kar talgad ko pigpig ngak e ngiyal’ ney ni ke aw parowrad u fithik’ e magawon nge magafan’ rorad. Baadag ni ngar nanged ni ka yad ba t’uf rok, ma baadag ni nge ayuwegrad ni ngar sulod ngak. Ere rayog ni nge fanayem Jehovah ni ngam ayuweg e pi cha’ney ni ngar nanged ni ka yad ba t’uf rok.

13. Uw rogon ni be m’ug ko n’en ni buch rok Pablo ni t’ufeg rodad e rayog ni nge ayuweg boch e girdi’ ni ngar sulod ngak Jehovah?

¹³ Ba ga’ fan ni nga u dogned ko piin kar talgad ko muulung nge machib ni ka yad ba t’uf rok Jehovah mad daged ngorad ni ka yad ba t’uf rodad. Pablo ni kan weliy murung’agen ko fa binem e article e ba pag 30 e duw ni tal ko muulung nge machib. I gaar: “Bay reb e kakadbul ni be n’en ni nggu chuw u tabinaw rog, mug mada’gow reb e walag nib pin ni ke pilibthir ni ke yib ni nge guyeg. I non ngog u fithik’ e gol nge t’ufeg, ma aram mug tabab ko meyor ni bod reb e bitir. Gog ngak ni gowa Jehovah e ke l’og ni nge yib i non ngog. Aram e ngiyal’ nug dugliy ni nggu sul ngak Jehovah.”

MU AYUWEG E PIIN NIB MEEWAR U FITHIK’ E T’UFEG

14. Mang e rin’ fare moon ni ma gafaliy e saf u nap’an ni pirieg fare saf rok ni ke malog nrogon ni bay ko fare fanathin ko Luke 15:4, 5?

¹⁴ Nap’an ni gad ra pirieg e piin kar talgad ko muulung nge machib, mab t’uf ni ngad ayuweged yad ma gad be pi’ e athamgil nga lanin’rad. Rayog nrib gel e amith ni ke tay lanin’rad nib n’uw nap’an mfini yag ni ngki sul nga rogon bayay ni bod fare pagel ni malog u lan fare fanathin ni weliy Jesus. Ma bochan ka ur moyed ko fayleng rok Satan, ma rayog ni ke palog e tha’ u thilrad Jehovah. Ba t’uf ni ngad ayuweged yad ni ngar gelnaged e michan’ rorad ngak Jehovah. U lan fare fanathin rok Jesus ni murung’agen fare saf ni malog e weliy riy rogon ni tay faen ma gafaliy e saf fare saf rok nga daken pon me fek i yib ko gin bay e tin baaram e saf riy. Facha’ ni ma gafaliy e saf e ba n’uw nap’an ni ke gay e re saf rok nem, maku be athamgil u rogon nrayog rok ni nge pirieg e gin bay riy. Machane manang nib t’uf e ayuw ko re saf nem ya dakuriy gelngin ni nge sul ko gin bay e tin baaram e saf riy. Ere aram fan ni chibiy nge tay nga pon me sulweg ko gin bay e tin baaram e saf riy.​—Mu beeg e Luke 15:4, 5.

15. Uw rogon ni ngad ayuweged e piin kar meewargad ni yad baadag ni ngar sulod bayay ngak Jehovah? (Mu guy fare kahol ni kenggin e “Ba Ke Babyor nib Ga’ Fan.”)

¹⁵ Rayog nib t’uf ni ngad ted e tayim ma gad athamgil nib gel ya nge yag nda ayuweged e piin kar talgad ko muulung nge machib ni ngar gelgad ko pi meewar rorad. Machane rayog ni ngad ayuweged yad ni nge chugur e tha’ u thilrad Jehovah bayay u daken gelngin nib thothup, nge Thin rok, nge boch e babyor ni ma ngongliy e ulung rodad. (Rom. 15:1) Uw rogon nrayog ni ngad rin’ed e re n’ey? Bay reb e walag ni ke n’uw nap’an ni ke mang reb e piilal ni gaar, “Yooren e piin kar talgad ko muulung nge machib e ba t’uf ni ngan fil e Bible ngorad bayay u tomuren ni kar dugliyed ni ngar sulod ngak Jehovah.”c Ere faanra ka nog ngom ni ngam filew bagayad e pi cha’ney e Bible, ma susun e nge m’agan’um ngay ni ngam rin’ ni faanra rayog rom. Ki yog e re piilal ney ni gaar, “Fare walag ni nge fil e Bible ngak facha’ e ba t’uf ni nge mang reb e fager nib manigil nrayog ni nge pagan’ facha’ ngak me weliy laniyan’ ngak.”

FELFELAN’ NI YIRA TAY U THARMIY NGU FAYLENG

16. Uw rogon ni kad nanged nra ayuwegdad e pi engel?

¹⁶ Boor ban’en ni ke buch rok boch e girdi’ ni be m’ug riy ni be ayuwegdad e pi engel ni ngad pirieged e piin kar talgad ko muulung nge machib ni yad baadag ni ngar sulod ngak Jehovah. (Rev. 14:6) Bod ni bay reb e walag u Ecuador ni ka nog Silvio ngak ni ke tal ko muulung nge machib ni wenig ngak Jehovah ni nge pi’ be’ nge yib i ayuweg ni nge sul ko ulung. Nap’an ni ka be meybil me rung’ag lingan e bell ko mab rok, ma nap’an ni yan i bing e mab ma bay l’agruw e piilal u rom ni kar bow ni ngar guyew. Nap’an ni mada’ e gal piilal ney nge re walag ney, mar felfelan’gow ni bochan e yag ni ngar tababgow i ayuweg ko tin nib t’uf ni ngan ayuweg riy.

17. Mang tow’ath e ma yag ngodad u nap’an ni gad ra ayuweg e piin kar meewargad ko tirok Got ban’en?

¹⁷ Ba gel e felfelan’ ni gad ra tay ni faan gad ra ayuweg e piin kar meewargad ko tirok Got ban’en ni ngar sulod ngak Jehovah. Am lemnag e n’en ni yog reb e pioneer ni ka nog Salvador ngak nri ma athamgil ni nge ayuweg e piin kar talgad ko muulung nge machib. I gaar: “Bay yu ngiyal’ nug ra lemnag e piin kar talgad ba ngiyal’ ko muulung nge machib ni kar sulod ko ulung bayay, ma ri ma sugsug e lu’ nga owcheg nga gelngin e felfelan’. Gu ma felfelan’ ni ke yag ni nggu maruwelgow Jehovah u taabang ni nggu ayuwegew reb e tapigpig rok ni nge chuw ko fayleng rok Satan ngki sul ko ulung bayay.”​—Acts 20:35.

18. Faanra gur be’ ni kam tal ko muulung nge machib, ma mang e rayog ni nge pagan’um ngay?

¹⁸ Faanra gur be’ ni kam tal ko muulung nge machib, ma rayog ni nge pagan’um ni ka gab t’uf rok Jehovah. Baadag ni ngam sul ngak. Machane bay boch ban’en nthingar mu athamgil ngam rin’ ya nge yag nim sul ngak. Yugu aram rogon ma be sonnagem Jehovah ni ngam sul ko ulung rok, ma faan ga ra sul ma rib gel e felfelan’ nra tay ni bod fare matam u lan fare fanathin rok Jesus.