Dabin Sagaal i Ayuwegrad Ngar Sulod!

“Somol, i mini’ e gamad ra yan ngak? Yi gur e bay fapi thin rom ni ir e ma pi’ e yafos ndariy n’umngin nap’an ngak e girdi’.”​—JOHN 6:68.

1. Mange n’en ni yog Peter u nap’an ni boor pi gachalpen Jesus ni kar digeyed?

BOOR pi gachalpen Jesus Kristus nra paged ba ngiyal’ ni bochan reb e machib rok. I fith ngak fa ragag nge l’agruw i gachalpen ni gaar, “Ma gimed - gimed ba adag ni ngkum paged gag ngam marod?” Me fulweg Simon Peter ni gaar: “Somol, i mini’ e gamad ra yan ngak? Yi gur e bay fapi thin rom ni ir e ma pi’ e yafos ndariy n’umngin nap’an ngak e girdi’.” (John 6:51-69) Dariy bayang ni yad ra yan ngay. Pi teliw rok piyu Jew e dariy e machib ko “yafas ndariy n’umngin nap’an” rorad e ngiyal’ nem ma re machib ney e dabiyog ni ngan pirieg ko Babylon nib Gilbuguwan, ni aram e teliw ni googsur e ngiyal’ ney. En ni ke malog ko ulung rok Got ma baadag ni nge sul ngak Jehovah e aray e “ngiyal’ ni nge tiyan’” nge sul ko ulung.​—Rom. 13:11, King James Version.

2. Mange thingar ni lemnag u murung’agen e tin nib mith ara magawon?

² I dag Jehovah e runguy ngak piyu Israel ni kar maloggad. (Mu beeg e Ezekiel 34:15, 16.) Maku aram rogon e piin piilal ni Kristiano ni yad baadag ni ngar ayuweged e piin ni ke malog ko ulung. Faan yira yog ngak be’ u lan e ulung ni nge ayuweg be’ ni ke malog ko tirok Got ma ke adag ni ngan ayuweg, ma mang e ngan rin’ nfaanra faanem ni nge ayuweg facha’ e ke nang ni bay ba denen nib ubchiya’ ni ke rin’ faanem? Dabi pi’ faanem e fonow u murung’agen e tin nib mith ara magawon ni ke rin’ faen ni ke malog, ya nge yog ngak faanem ni ir e nge yan i yog ko piin piilal. Ma faanra de yan faanem, me mang ir e yan i yog.​—Lev. 5:1; Gal. 6:1.

3. Mange rin’ fare moon u nap’an ni pirieg fare saf nke malog?

³ Fa bin som’on e article e ni weliy riy e fanathin rok Jesus ni murung’agen be’ nib moon ni bay 100 e saf rok. Nap’an ni yan reb e saf nga bang, me pag fa 99 i saf, mi i gay fa bin ni ke malog. Uw feni gel e felfelan’ ko re moon nem u nap’an ni pirieg fare saf! (Luke 15:4-7) Taareb rogon ko felfelan’ rodad u nap’an nra sul reb e tapigpig rok Got ni ke malog. Bochan e t’ufeg ma sana piin piilal ara boch e girdi’ u lan e ulung e ranod ra guyed facha’ ni ke malog. Yad baadag ni ngar guyed ni nge sul e piin ni ke malog nga lan e ulung ngar pirieged e felfelan’ nge ayuw nge tow’ath ni ke yib rok Jehovah. (Deut. 33:27; Ps. 91:14; Prov. 10:22) Faanra ke mab e kanawo’ ngorad ni ngar pied e ayuw, ma mange rayog ni ngar rin’ed?

4. Mange rayog ni nge tamilangan’uy riy u Galatia 6:2, 5?

⁴ Sana rayog ni ngar pied e athamgil nga laniyan’ be’ ni nge sul ko ulung ni ngar daged ngak nib t’uf rok Jehovah e saf Rok ma der ma ning e tin dabiyog rodad. Re n’ey e ba muun ngay e beeg Bible nge ngan un ko muulung ko Kristiano nge machib ni murung’agen Gil’ilungun Got. Mab fel’ nra beeg e Galatia 6:2, 5 ma nga nog ngak ni pi Kristiano e rayog ni ngar ayuweged i fek gilban boch e girdi’, machane “ra be’ ma ba’ gilban ni be fek” u p’eowchen Jehovah. Dariy be’ nra par nib yul’yul’ ngak Got ni fan ngodad.

Ke Sagaalnagrad e “Magafan’,” Fa?

5, 6. (a) Mang nib ga’ fan ni ngan fal’eg e motoyil ko n’en ni be yog e piin kar maloggad? (b) Uw rogon ni ga ra ayuweg e piin ni kar maloggad ngar nanged ni bochan ndarur chaggad ko girdi’ rok Got ma arfan ni keb angin ngorad nib kireb?

⁵ Ra ngan nang rogon i ayuweg e piin kar maloggad ma piin piilal nge boch e girdi’ u lan e ulung ni ke n’uw nap’rad e ba t’uf ni ngar motoyilgad nib fel’ rogon ngak e piin ke malog ni yad be weliy lanin’rad. Susun ni gur reb e piilal ni kam man mu guy ba wu’ e mabgol ni kar pagew e muulung ni ke n’uw nap’an ni bochan e “magafan’” ma kar sagaalgow ko pigpig. (Luke 21:34) Magawon ko salpiy ara tin nib milfan ko tabinaw e sana ke k’aringrow kar talgow ko machib. Kar lemnagew nib t’uf ni ngar toffangow buchuuw ko machib, machane nga mog ngorow ni faanra ngar paloggow ko ulung ma dabi ayuwegrow. (Mu beeg e Proverbs 18:1.) Rayog ni ngam fithrow u fithik’ e gonop ni nge lungum: “Nap’an ni kam talgow ko muulung ma gimew be felfelan’, fa? Ke fel’ boch e par romew ko kafram, fa? Ka rogon e felfelan’ romew ngak Jehovah, fa?”​—Neh. 8:10.

⁶ Yira fal’eg i lemnag e pi deer ney ma ra ayuweg e piin ni kar maloggad ngar nanged ni bochan ni ndakrur chaggad ko ulung ma felfelan’ rorad nge tirok Got ban’en rorad e ke war. (Matt. 5:3; Heb. 10:24, 25) Sana rayog ni ngan ayuwegrad ngar nanged ni bochan dakur felfelan’gad e bochan ni kar talgad i machibnag fare thin nib fel’. (Matt. 28:19, 20) Ere mange ba fel’ nsusun nge rin’ e piin kar maloggad?

7. Mange rayog ni ngada rin’ed nge athamgil laniyan’ e piin kar maloggad ko ulung rok Got?

⁷ I gaar Jesus: “Mu ayuwgad, ma dab mpaged gimed nguum pired ni ba ga’ ni mur ni ke pag rogon nge muun rrum e gimed be maruweliy, nge pi n’en ni ma magafan’uy ngay ko biney e tamilang . . . Um pired ni kam fal’eged rogomed ma gimed be meybil ni gubin ngiyal’ nge yib gelngimed nge yog ni mmarod u fithik’ urngin e pi n’ey ni bayi m’ug.” (Luke 21:34-36) Piin kar maloggad ko ulung rok Got, machane yad baadag fare felfelan’ ni ur ted kafram e ku rayog ni ngan pi e athamgil nga lanin’rad ngar ninged e ayuw ko fare kan ni thothup nge ayuwegrad Got ngar ngongolgad nib puluw ko meybil rorad.​—Luke 11:13.

Gur Ke Magawonnag Be’ Lanin’rad?

8, 9. Uw rogon nra non reb e piilal ngak be’ ni ke magawon laniyan’?

⁸ Bochan nde flont e girdi’, ma yu ngiyal’ e der ma taareban’rad, re n’ey e ra magawonnag be’. Ke magawon laniyan’ boch e girdi’ u nap’an be’ ni yima ta’ fan u lan e ulung e ngongol nib togopuluw ko pi kenggin e motochiyel ni bay u Bible. Faanra malog be’ nbochan e re n’em, ma fare piilal ni ke yan ni nge guy e rayog ni nge yog ngak ni Jehovah e der ma k’aring ni nge mulan’ be’. Ere mang fan ni nge kireb e tha’ u thilin be’ nge Got nge girdi’ Rok Got? Ya susun e nge ulul i pigpig ku Got nib pagan’ ngay ni en “Tapufthin ko fayleng ni polo’” e manang e n’en ke buch ma ra pithig e magawon nib fel’ rogon. (Gen. 18:25; Kol. 3:23-25) Faanra ke magawon be’ ke dol’ ma dabi par u but’ ya ra guy rogon nge sak’iy.

⁹ Rogon ni ngan ayuweg ko tirok Got ban’en e reb e piilal e rayog ni nge yog ngak ni boch e girdi’ e kar pirieged nra n’uw nap’an boch ma fare n’en ni magawonnagrad e daki ga’ fan. Rogon riy e sana fare n’en ni magawonnagrad e ke m’ay. Faanra ke magawon laniyan’ be’ ni bochan e fonow ni kan tay ngak, ma ra tiyan’ ko meybil ma rayog ni nang ni bay e kireb ni ke rin’, ma dabi pag fare fonow nge magawonnag laniyan’.​—Ps. 119:165; Heb. 12:5-13.

Gur, Re Magawon Nem e Ban’en ko Machib?

10, 11. Mang e bfel’ ni ngan weliy nra yib angin u nap’an ni yibe ayuweg be’ nib thil rogon ni ke nang fan reb e machib?

¹⁰ Boch e girdi’ e rayog ni nge pag e ulung rok Got ni bochan boch e Machib nde m’agan’ ngay. Piyu Israel ni kan chuwegrad ko sib u Egypt e ra ‘paged talin e tin ke rin’ [Got]’ ni fan ngorad ma “dakur sonnaged e fonow rok.” (Ps. 106:13) Bfel’ ni ngan puguran ngak e piin ke malog ni “fare tapigpig nib yul’yul’ ma ba gonop” e rib manigil e ggan ni machib ni yad be pi’. (Matt. 24:45) Aram rogon ni fil e cha’nem e tin riyul’. Ere mang fan ndabi turguy ni ngki sul ko tin riyul’ bayay?​—2 John 4.

¹¹ Nap’an ni be athamgil ni nge ayuweg e piin ni ke malog ko ulung rok Got, ma re piilal ney e rayog ni nge weliy murung’agen pi gachalpen Jesus nra paged ni bochan reb e machib rok. (John 6:53, 66) Bochan nra paged nda kur chaggad ngak Kristus nge pi gachalpen nib yul’yul’, me mul u pa’rad e tirok Got nge felfelan’ ni ur tayed. Piin ndakrur chaggad ko ulung ko Kristiano e gur, kar pirieged e ggan ni machib u bang? Danga’, ya dariy u bang!

Ke Un Reb e Denen nib Ubchiya’ Ngay, Fa?

12, 13. Faanra ke malog be’ ko ulung rok Got ma ke yog e denen ni ke rin’, ma uw rogon ni ngan ayuweg?

¹² Boch e girdi’ e yad ma tal ndab kur uned ko machib nge muulung ni bochan e kar rin’ed reb e denen nib ubchiya’. Yad ma lemnag ni yad ra yog ngak e piin piilal, ma yira tharbograd ko ulung. Machane dab ni tharbograd ko ulung ni faanra kar talgad i rin’ e re kireb nem ma kar kalgadngan’rad. (2 Kor. 7:10, 11) Yira felfelan’ ni yad ra sul ko ulung ma piin piilal e ra ayuwegrad ko tirok Got ban’en nib t’uf rorad.

¹³ Faanra gur be’ ni kam ilal ko tirok Got ban’en ma ka nog ngom ni ngam ayuweg be’ ni ke malog, ma mang e ga ra rin’ nfaanra yog facha’ ni ke rin’ reb e denen nib ubchiya’? Kan weliy faram ndab mu unegnem ko magawon rok, mog ngak nge yog ko piin piilal. Faanra dabun ni nge rin’ ni aram rogon ma ngam dag e tayfan rom nga fithingan Jehovah nge rarogon e ulung ko tirok Got ban’en ni aram e ngam ngongol nib puluw ko fonow rok Got u rogon ni ngan rin’ e re n’em. (Mu beeg e Levitikus 5:1.) Piin piilal e yad ra nang rogon ni ngar ayuweged be’ ni baadag ni nge sul nge par ni be fol ko tin nib m’agan’ Got ngay. Sana ra t’uf ni ngan pi’ e fonow u fithik’ e t’ufeg. (Heb. 12:7-11) Faanra yog faanem nriyul’ ni ke denen nib togopluw ku Got ma ke tal ko kireb ni ke rin’ ma ke kalngan’, ma ra ayuweg e piin piilal nge n’ag Jehovah fan e kireb rok.​—Isa. 1:18; 55:7; Jas. 5:13-16.

Fak Be’ ni Ke Sul ko Ulung e Ma Yibnag e Felfelan’

14. Mu weliy ko thin rom fare fanathin rok Jesus ni murung’agen fare pagel ni adbey e salpiy rok.

¹⁴ Nap’an ni yibe guy rogon ni ngan ayuweg be’ ni ke malog ni nge sul ko ulung, ma faen nge ayuweg e bfel’ nra yog fare fanathin rok Jesus ni bay ko Luke 15:11-24. Re fanathin nem e ba pagal ni adbey e salpiy rok ko ngongol nib kireb. Me munmun me fanenikay e ngongol ni be rin’ nib kireb. I yim’ ko bilig nge tawreng, me dugliy u wan’ ni nge sul nga tafen! Nap’an ni kab orel me changar e chitamangin me guy me mil i yan nge ni gumuchmuch ngak me faray owchen ni kari felfelan’. Yira lemnag e re ney ma ra ayuweg be’ ni ke malog nge sul ko ulung. Re m’ag ney e ke chugur ni ngan thang, ere dab ni sagaal ni ngan sul ko ulung rok Jehovah.

15. Mang fan ni ke digey boch e girdi’ e ulung?

¹⁵ Oren e girdi’ ni ke malog ko ulung e gathi ri bod fare pagel ni adbey e salpiy rok. Boch e girdi’ e ma malog i yan nib sasagaal ni bod e bowoch nib sagaal ni ma man’ nge palog ko binaw. Ma boch e ke gel e magafan’ rorad mar paged Jehovah. Ma boch e kar paged ke magawonnag be’ ko ulung lanin’rad, ara kar digeyed e ulung ni bochan e de m’agan’rad nga reb e machib nu Bible. Mab lich e tin ni be un ko ngongol nde puluw ko Bible. Machane, fonow nib puluw ko pi magawon ney e rayog ni nge ayuwegem ngam ayuweg e piin kar maloggad ni bochan e pi n’ey ara ku yugu boch ban’en ngar sulod u m’on ni nge sagaal.

“Fakag, Bfel’ ni Kam Sul nga Tabinaw!”

16-18. (a) Uw rogon ni ayuweg reb e piilal be’ nge sul ko ulung? (b) Mang fan ni malog e re walag ney, ma uw rogon nni ayuweg, ma uw rogon laniyan’ e girdi’ ko ulung ngak u nap’an ni sul?

¹⁶ Ke gaar reb e piilal ni Kristiano: “Piin piilal romad e ri yad baadag ni nga ranod ra guyed e piin ke malog. Ug lemnag reb e walag ni ug filew e Bible ke tamilangan’ ko tin riyul’ ma ke malog ni gonap’an 25 e duw ma kari mo’maw’ rogon e par rok, ere ku gog ngak nra fol ko kenggin e motochiyel nu Bible ma ra ayuweg. Tomren me tabab ko wub nga Kingdom Hall me adag ni ngi i fil e Bible ni ir rok nge ayuweg nge pi’ gelngin nge sul ko ulung.”

¹⁷ Mang fan ni malog e re walag nem? I gaar: “Gu tabab i lemnag e tin nu fayleng ban’en nge m’on ko tirok Got. Gu taleg e fol Bible nge machib nge muulung. N’en migid ni buch rog e da kug mang reb e Kristiano. Machane me ayuwegeg e t’ufeg ni dag reb e piilal ngog.” Me lich boch e magawon ko re walag nem u nap’an ni un ko fol Bible bayay. Me gaar, “Kug nang ni n’en ni chuw ko yafas rog e t’ufeg nge fonow rok Jehovah nge ulung rok.”

¹⁸ Uw rogon laniyan’ e girdi’ ko ulung ngak u nap’an ni sul? I gaar: “Gu lem ni bod fare pagel ni adbey e salpiy ni yog Jesus Kristus murung’agen. Ya bay reb e walag nib piin ni ke pilibthir ni ka immoy u rom ni ka nap’an 30 e duw ni ke yan ma ka bay e chiney ni ka be pigpig ngak Jehovah ni gaar ngog, ‘Fakag, bfel’ ni kam sul nga tabinaw!’ Ri bit’ e re n’em nga gum’irchaeg. Aray e gin nib milfag ngay. Gu baadag ni nggu pining e magar ni fan ko t’ufeg nge gum’an’ ni ke dag e re piilal nem ngog nge fare ulung ni ga’ngin. T’ufeg rorad ngak Jehovah nge piin ni migid ngorad e ayuwegeg nggu sul ko ulung.”

Ngan Gur Ngorad Ngar Sulod ni Papey!

19, 20. Uw rogon ni ngam pi’ e athamgil nga laniyan’ e piin ni ke malog ngar sulod ko ulung, ma uw rogon ni ngam dag ngorad ni Got e der ma lemnag ni ngad rin’ed e tin dabiyog rodad?

¹⁹ Gad be par ko tin tomren e rran ma tungun e re m’ag ney e ba machreg ni be yib. Arfan ni ngan pi’ e athamgil nga laniyan’ e piin kar maloggad ni ngaur uned ko muulung ko Kristiano. Ngan gur ngorad ngar tababgad ni papey. Mu weliy ni Satan e be gay rogon ni nge kirebnag e tha’ u thilrad Got ma be guy rogon ni ngar lemnaged nra chuw e mochuch rorad nfaan yad ra pag e bin riyul’ e liyor. Rayog ni nga mog ngorad ni ke mus ni faan yad ra mang pi gachalpen Jesus mar pirieged e bin riyul’ e toffan.​—Mu beeg e Matthew 11:28-30.

²⁰ Mu puguran ngak e piin kar maloggad ni be lemnag Got ni ngad rin’ed e tin rayog rodad. Nap’an nni thibthibnag Maria ni walagen Lazarus ni bochan ni ke puog e florida nga daken lolugen Jesus u m’on ni ngan li’ ngem’, me gaar Jesus: “Mu digeyed e cha’nir. . . . Ya ke rin’ e tin ni rayog rok.” (Mark 14:6-8) Yog Jesus nrib fel’ e n’en ni rin’ be ni ppin ni ke yim’ figirngin u nap’an ni pi’ e chuuw i salpiy ni ba’ rok u tempel. Ke rin’ nrogon nrayog rok. (Luke 21:1-4) Boor i gadad e rayog ni nge un ko muulung nge machib. U daken e ayuw rok Jehovah ma boor e piin ni ke malog nrayog ni ngkur rin’ed ni aram rogon.

21, 22. Mange rayog ni ngam micheg ko piin ni kar sulod ngak Jehovah?

²¹ Faanra baadag be’ ni nge sul ko ulung machane be mo’maw’ rok mag puguran ngak gelngin e felfelan’ u nap’an ni sul fare pagel ni adbey e salpiy rok nga tabinaw. Piin ni yad ma sul ko ulung e ri ma felfelan’ e ulung ngorad. Mu pi’ e athamgil nga lanin’rad ni ngar togopuluwgad ku moonyan’ e chiney mar chugurgad ngak Got.​—Jas. 4:7, 8.

²² Rib gel e felfelan’ nra yib ko ulung ni fan ngak e piin ni be sul ngak Jehovah. (Lam. 3:40) Dabisiy ni pigpig ni ur ted kakrom ko maruwel rok Jehovah e yibnag e felfelan’ ngorad. Boor e tow’ath ni fan ko piin nra sul ko ulung ni papey!

Uw Rogon ni Ga Ra Fulweg?

• Uw rogon ni ngam ayuweg reb e walag ni Kristiano ni ke magawon laniyan’ ke malog?

• Mang e rayog ni ngan ayuweg be riy ni ke chuw ko ulung ni bochan nde puluw u wan’ reb e machib nu Bible?

• Uw rogon ni ngan ayuweg be’ ni be mo’maw’ rogon ni nge sul ko ulung?

[Picture on page 19]

Mmotoyil nib fel’ rogon u nap’an ni be weliy reb e walag ni ke malog laniyan’

[Picture on page 21]

Yira fal’eg i lemnag fare fanathin rok Jesus u murung’agen fare pagel ni adbey e salpiy rok ma rayog ni ayuweg boch e girdi’ ngar sulod ko ulung