Ngan Ayuweg e Piin ni Ke Malog ko Ulung rok Got
“Mu uned ngog ko felfelan’, ya kug pirieg fare saf rog ni yan nga bang!”—LUKE 15:6.
1. Uw rogon ni ke micheg Jesus ni ir ba tachugol saf ni ma t’ufegey?
JESUS KRISTUS ni bin nganni i fak Jehovah, e “ir e en ni Ga’ ni ma gafaliy e saf.” (Heb. 13:20) Ke yiiynag e Bible e wub rok, ma ke dag ni ir e En Tachugol Saf nib thil ni ma gay e saf nu Israel ni ke “yan nga bang.” (Matt. 2:1-6; 15:24) Bod ba tachugol saf nsana ra pi’ e yafas rok ni nge ayuweg e saf rok, i yim’ Jesus nib maligach ni fan ko piin ni yad bod e saf nra mich u wan’rad e re maligach rok nem.—John 10:11, 15; 1 John 2:1, 2.
2. Mang fan ni ke meewar boch e Kristiano?
2 Machane, boch e girdi’ e ra daged nib fel’ e maligach rok Jesus u wan’rad mar ognaged e yafas rorad ngak Got ma kar maloggad. Mulan’ nge m’ar ara boch e magawon e ke malognagrad. Machane, rayog ni ngar pared u fithik’ e gapas nge felfelan’ ni bod e n’en ni yog David ko bin 23 e Psalm nfaanra yad bang ko ulung rok Got. Ni bod ni tang David ni gaar: “I Somol e be gafaliyeg ni bod be’ ni be gafaliy ba ran’ i saf; dakuriy ban’en nga bayang ni nge yog ngog.” (Ps. 23:1) Piin ni yad be chag ko ulung rok Got e urngin ban’en nib t’uf rorad ko tirok Got ma ba’, machane gathi aram rogon e piin ni kar maloggad. Mini’ e rayog ni nge ayuwegrad? Uw rogon ni ngan ayuwegrad? Mang e rayog ni ngan rin’ min ayuwegrad ngar sulod ko ulung rok Got?
Mini’ e Ra Pi’ e Ayuw?
3. Uw rogon ni dag Jesus e n’en nib t’uf ni nge yog ni ngan ayuweg e saf ni ke malog?
3 Yira maruweliy nib gel me yog ni ngan ayuweg e saf ni ke malog. (Ps. 100:3) I dag Jesus rogon e re n’ey ni gaar: “Gonap’an e mang e ra rin’ be’ ni faanra ba’ raay i saf ni fak me yan reb nga bang? Ra digey fa mereb i ragag nge mereb nem ni yad be kay e pan u sigreen e burey me yan nge gay fa binem ni ke yan nga bang. Nggog ngomed nra pirieg ma ba gel e felfelan’ nra tay ni bochan e taab binem, ko felfelan’ ni be tay ni bochan fa mereb i ragag nge mereb nde yan nga bang. Ere ku er rogon e Chitamangimed nu tharmiy nde adag bagayad e nochi bitir ney ni nge malog.” (Matt. 18:12-14) Mini’ e ra ayuweg e girdi’ ni kar maloggad?
4, 5. Susun uw rogon ni nge ngongol e piin piilal ngak e ulung rok Got?
4 Piin piilal ni Kristiano ni yad baadag ni ngar ayuweged e saf ni ke malog e thingar dab ra paged talin ni ulung rok Got e yad e girdi’ ni kar ognaged yad ngak Jehovah ni aram e ‘ba ulung rok Got’ nib tolang pulwon. (Ps. 79:13) Pi saf nem e ba t’uf ni ngan ayuwegrad u fithik’ e sumunguy, ma re n’ey e be yip’ fan ni piin tachugol saf ni ma t’ufegey e thingar ra adaged ni ngar ayuweged e pi girdi’ nem. Ngan yan ni guyrad nga tabinaw rorad e rib ga’ angin. Athamgil nra pi’ e piin piilal ngorad u fithik’ e t’ufeg e ra ayuwegrad ngar gelgad ko tirok Got ban’en mar adaged ni ngar sulod ko ulung rok Got.—1 Kor. 8:1.
5 Piin ma gafaliy e ulung rok Got e ke milfan ngorad ni ngar gayed e saf ni ke malog ngar ayuweged yad. I puguran apostal Paul ngak e piin piilal nu Efesus kakrom murung’agen e maruwel rorad ni gaar: “Mu ayuweged gimed nge fare ulung i saf ni fare Kan ni Thothup e ke taymed ni nguum ayuweged. Gimed e ngam pired ko galesiya rok Got ni bod e piin ni ma ayuweg e saf, ya girdien e galesiya rok Got e ra manged girdien Got u daken e yam’ ni tay Fak.” (Acts 20:28) Maki fonownag apostal Peter e piin piilal ni kan dugliyrad ni gaar: ‘Nguum gafaliyed e pi saf rok Got ni gimed be ayuweg, ni gathi bochan e towasar, ya bochan nib m’agan’med ngay, maku gathi bochan ni gimed baadag ni nge yog ngomed ban’en u fithik’ e sasalap, ya bochan ni ri gimed baadag. Dab mu guyed rogon ni ngam suweyed e piin ni kan pi’rad ngomed ni ngam gafaliyed yad, machane ngam pired nib fel’ pangimed ya nguur folwokgad romed.’—1 Pet. 5:1-3.
6. Mang fan ni kari t’uf e ayuw ni nge pi’ e piin piilal ko girdi’ rok Got e ngiyal’ ney?
6 Piin ni piilal e ba t’uf ni ngar folwokgad rok Jesus nib ‘tachugol saf’ nrib fel’. (John 10:11) Ri ma lemnag rarogon e pi saf rok Got me weliy feni ga’ fan ni ngan ayuwegrad u nap’an ni yog ngak Simon Peter ni nge ‘gafaliy e tin ni kab bitir e saf rok.’ (Mu beeg e John 21:15-17.) Rib t’uf ni ngan ayuweg e saf e ngiyal’ ney, ya bochan ni fare Moonyan’ e be maruweliy nib elmerin ni nge dab ki yul’yul’ e piin ni kar ognaged e yafas rorad ngak Got. Ma fanay Satan e meewar rok e girdi’ ma ma fanay e fayleng nge k’aring e saf rok Jehovah ni ngar rin’ed e tin nib kireb e ngongol. (1 John 2:15-17; 5:19) Piin ni kar maloggad e ba mom ni nge gel Satan ngorad ere ba t’uf ni ngan ayuwegrad ngar folgad ko fare fonow ni ngan pag ‘fare kan ni thothup nge gagiyegnigey.’ (Gal. 5:16-21, 25) Ra ngan ayuweg e saf ni aram rogon mab t’uf ni ngan ning e ayuw rok Jehovah nge ayuw ko kan ni thothup rok, min fanay e Thin rok nib fel’ rogon.—Prov. 3:5, 6; Luke 11:13; Heb. 4:12.
7. Uw feni ga’ fan ni nge ayuweg e piin piilal e saf nib milfan ngorad?
7 Tachugol saf nu Israel kakrom e yad ma fanay baley i n’en ni bod e sog mab bugbug tabonggin ngaur pow’iyed e saf rorad ngay. Nap’an ni nge yan e pi saf nga lan e sum rorad ara ra chuwgad riy, ma yad ma ‘yan u tan fare sog’ ma aram e rayog ni nge theegrad faen ma gafaliyrad. (Lev. 27:32; Mic. 2:12; 7:14) Maku arrogon ba piilal ni kub t’uf ni nge nang rarogon e ulung rok Got nge rogon e n’en ni be rin’ be’ nge be’. (Mu taareb rogonnag ko Proverbs 27:23.) Ere, rogon ni ngan ayuweg e ulung e reb e ban’en nib ga’ fan ni ma weliy fare ulung ko piin piilal. Re n’ey e ba muun ngay e yaram u rogon ni ngan ayuweg e piin ni kar maloggad. I yog Jehovah ni nge gay e saf rok nge pi’ ngorad e ayuw nib t’uf rorad. (Ezek. 34:11) Ere ra felfelan’ Got u nap’an nra athamgil e piin piilal ngar ayuweged e saf ni ke malog nge sul ko ulung.
8. Mang boch e kanawo’ nrayog ni nge ayuweg e piin piilal e girdi’ rok Got riy?
8 Nap’an nra m’ar reb e walag, ma ra yan reb e piilal ko ulung rok Got i guy ma ra felfelan’ nib gel ma ra pi’ e athamgil nga laniyan’. Maku arrogon reb e walag ni ke m’ar ko tirok Got ni yira ayuweg. Rayog ni nge beeg e piin piilal boch e thin nu Bible ngorad ara ra sulod u daken reb e article ara boch ban’en ni kan weliy u nap’an e muulung mar meybilgad faen ke malog u taabang. Rayog ni nga rogned ngak nra felfelan’ e girdi’ u lan e ulung ni yad ra guy ni ki un bayay ko muulung. (2 Kor. 1:3-7; Jas. 5:13-15) Ngan yan ni guy be’ ni ke malog fa ni telefonnag ara ni pi’ e babyor ngak e rra ayuweg nib gel! Maku ngan ayuweg e saf ni ke malog e ra gelnag e felfelan’ ko piin piilal nib tarunguyey.
Ngan Maruwel u Taabang
9, 10. Mang fan ni gathi kemus ni piin piilal e rayog ni ngar ayuweged e Kristiano ni ke malog?
9 Gad bay u ba ngiyal’ ni ke gel e mo’maw’ ko par ma ke yoor ban’en ni gad be rin’, ere rayog ni nge dabda nanged ni be palog reb i walagdad nga orel ko ulung. (Heb. 2:1) Machane, rib ga’ fan u wan’ Jehovah e saf rok. Ra bagayad mab ga’ fan, ni bod ni urngin yang u dowey e ba ga’ fan. Arfan, ni gadad gubin ma gad be lemnag rarogon pi walagdad. (1 Kor. 12:25) Bay e lem rom ni aram rogon fa dariy?
10 Yugu aram rogon ni piin piilal e ba milfan ngorad ni ngaur gayed e Kristiano ni ke malog ngar ayuweged yad, machane gathi kemus ni yad e ngar lemnaged e Kristiano ni ke malog. Girdi’ u lan e ulung e ku rayog ni ngar pied e ayuw. Ku rayog rodad ma thingar da pied e athamgil nga laniyan’ pi walagdad nib t’uf rorad e ayuw nge yog ni ngar sulod ko ulung rodad. Uw rogon ni ngan pi’ ngorad e pi ayuw ney?
11, 12. Mang e rayog ni ngam rin’ ngak e be’ ni ke t’uf e ayuw rok ko tirok Got ban’en?
11 Yu ngiyal’ ma rayog ni nge yarmiy e piin piilal boch e walag ni ke n’uw nap’rad ni ngar filed e Bible ngak e piin ni ke malog ma ka rogned nib t’uf rorad e ayuw. Yima rin’ ni aram rogon ni fan e ngan gelnag fare ‘t’ufeg nra daged ko som’on.’ (Rev. 2:1, 4) Rayog ni ngan ayuweg e pi walag ney min gelnagrad ko tirok Got ban’en ni yira weliy ngorad e pi n’en ndar rung’aged u nap’an nda ur uned ko muulung.
12 Faanra yog e piin piilal ngom ni ngam fil e Bible ngak reb e walag ni ke t’uf e ayuw rok, ma ngam meybil ngak Jehovah nge pow’iyem me tow’athnag e maruwel rom. “Ngam tay nga pa’ Somol nge fal’eg waathan urngin e tin ka mu finey ni ngam rin’, mra yal’uw rogon ni ngam muruwliy.” (Prov. 16:3) Mu fal’eg i lemnag e Thin nu Bible nge pi n’en nra gelnag e michan’ nrayog ni ngam fanay ngam fil e Bible ngak e piin ni ke t’uf e ayuw rorad ko tirok Got ban’en. Mu fal’eg i lemnag fare n’en ni dag Paul nib fel’ ni ngan fol riy. (Mu Beeg e Roma 1:11, 12.) I lemnag Paul ni nge yan nge guy e Kristiano u Roma ni nge pi’ e tow’ath ngorad ko tirok Got ban’en nge gel e michan’ rorad. Miki athapeg nra bagayad ma nge pi’ e athamgil nga laniyan’ bagayad. Gathi ba t’uf ni ngad boded Paul u nap’an ni gad be athamgil ngad ayuweged e Kristiano ni ke malog?
13. Mang e rayog ni ngam weliy ngak be’ ni ke malog?
13 Nap’an ni gimew be fil e Bible, ma rayog ni ngam fith ngak ko “Uw rogon ma ke nang e tin riyul’?” Mu ayuweg ngeb ngan’ e felfelan’ ni i tay ko som’on, mpi’ e athamgil nga laniyan’ e en ke malog ni nge weliy murung’agen e pi n’en ni i rin’ ni i felfelan’ ngay u nap’an e muulung nge nap’an e machib nge convention. Mu weliy murung’agen e felfelan’ ni keb ngomew ko pigpig ku Jehovah. Mu weliy rogon e felfelan’ rom ni gab chuchugur ngak Jehovah. (Jas. 4:8) Mog ngak ni ga be pining e magar ngak Got u rogon ni be ayuwegdad ni gadad e girdi’ rok nrib ga’ ni fan e ke pi’ ngodad e pagan’ nge athap u nap’an e gafgow nib gel ni be yib ngodad.—Rom. 15:4; 2 Kor. 1:3, 4.
14, 15. Mang e pi tow’ath ni i felfelan’ e piin ni kar maloggad ngay ni yira puguran ngorad me ayuwegrad?
14 Kub ga’ nib fel’ ni ngan puguran ngak e en ni ke malog boch e flaab ni ki i yib ngak ni bochan ni i chag ko ulung kafram u fithik’ e pasig. Bod ni yog ngak e tamilangan’ ko Thin rok Got nge tin nib m’agan’ ngay. (Prov. 4:18) Nap’an ni i ‘gagiyegnag fare kan ni thothup’ mab mom ngak ni nge togopuluw ko tin ma k’aringey ngan denen. (Gal. 5:22-26) Ma nangan’ rok nib fel’ e ke ayuweg ni nge chugur ngak Jehovah u daken e meybil ma ‘gapas rok Got ndabi chuchugur ni nge nang e girdi’ fan e ra yororiy gum’irchaen nge tafinay rok.’ (Fil. 4:6, 7) Dab mu pagtalin e pi n’em, ngam pi’ e athamgil nga laniyan’ walagem ni nge sul ko ulung nrogon nrayog rom.—Mu Beeg e Filippi 2:4.
15 Susuna gur reb e piilal ni kam man ni ngam ayuweg boch e girdi’ u lan e ulung. Sana ga ra pi’ e athamgil nga laniyan’ ba wu’ i yabgol ni kar maloggow ni ngar lemnagew e som’on nra filew e tin riyul’ u Bible. Rayog ni ngeb ngan’row ni tin riyul’ e rib fel’ ma ra fel’ rogoy riy ma ra ayuwegey ko tirok Got ban’en nge feni gel e felfelan’ rorow ko tin nra filew u murung’agen Jehovah nge t’ufeg rok nge tin nib m’agan’ ngay! (John 8:32; mu taarebrogonnag ko Luke 24:32.) Mu puguran ngorow e felfelan’ ko chugur nge meybil ni ma tay e Kristiano ngak Jehovah. Mu pi’ e athamgil nga laniyan’ e piin ni ke malog ni ngar folgad bayay ko fare ‘thin nib fel’ ni yib rok fare Got nib felfelan’,’ ni Jehovah.—1 Tim. 1:11.
Nguum Dag e T’ufeg Ngorad
16. Mog reb e n’en ni be dag nra ngan athamgil ngan pi’ e ayuw ku be’ ni ke malog e rib ga’ angin.
16 Ra ayuwegey e pi n’en baaray ni kan weliy fa danga’? Ra ayuwegey. Bod reb e fel’ yangaren ni tabab i un ko machib u nap’an ni ke 12 e duw rok me 15 e duw rok me malog. Machane munmun me sul ko ulung me pigpig ni polo’ e tayim rok nib pag 30 e duw. N’en ni ke ayuweg nge gel bayay e michan’ rok e bochan e ayuw ni pi’ reb e piilal ko ulung ngak. Ri pining e magar ni bochan e ayuw ni pi’ e re piilal nem ngak!
17, 18. Mang e pi fel’ngin nra ayuwegem ngam ayuweg be’ ni ke malog?
17 T’ufeg e ma k’aring e Kristiano ni ngar ayuweged e piin ni ke malog ngar sulod ko ulung bayay. Yog Jesus murung’agen pi gachalpen ni gaar: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) Arrogon, t’ufeg e ir e pow ko tin riyul’ e Kristiano. Gur gathi rayog ni ngan dag e re t’ufeg ney ngak e Kristiano ni ke malog? Rib mudugil nrayog! Machane ra ke t’uf ni ngan ayuweg reb e Kristiano ni ke malog ma ngaun dag boch i fel’ngin e Kristiano.
18 Faanra ngam ayuweg reb e Kristiano ni ke malog, ma mang e pi fel’ngin nib t’uf ni ngam dag? Gathi kemus ni ngam dag e t’ufeg, ya kub t’uf ni ngam dag e runguy, gol, sumunguy, nge t’ar laniyan’. Maku ra t’uf ni ngam n’ag fan u wan’um e oloboch rok be’. Yoloy Paul ni gaar: “Gimed girdien Got; ya gimed ba t’uf rok ma ke dugliymed ni ngam manged girdien. Aram fan ni runguy, nge gol, nge sobut’an’, nge sumunguy, nge gum’an’ e thingar mon’ed nga dakenmed nge mang mad romed. Nge bigimed mi i ayuweg bigimed ko meewar rok u fithik’ e runguy, mu um n’iged fan u wan’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um n’iged fan u wan’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak. Nge rogon nib t’uf Got nge girdi’ romed e ngam puthuyed nga urngin e pi n’ey, ni ir e ma chugumiy urngin ban’en nga taabang nge par ni ke fel’ rogon.”—Kol. 3:12-14.
19. Mang nib ga’ fan ni ngan ayuweg e girdi’ ni bod e saf ngar sulod ko ulung ko Kristiano?
19 Bin migid e thin ni gad ra fil ko re ke babyor ney e ra weliy fan ni ke malog boch e girdi’ ko ulung rok Got. Maku ra dag rogon i ayuwegrad ngar sulod ko ulung. Nap’an ni ga be fil e pi thin nem ma ga be lemnag rogon e tin ni kad filed ko biney e thin, ma rayog ni nge mudugilan’um ni urngin e maruwel ni ga be tay ni ngam ayuweg be’ ni nge sul ko ulung ko Kristiano e ba ga’ fan. Lan e re m’ag ney e boor e girdi’ ni yad be fanay e yafas rorad ni polo’ ni ngar yognaged e chugum ni boor, machane yafas ku be’ e kab ga’ fan nga urngin e salpiy nu fayleng. I weliy Jesus murung’agen e re n’ey ko fare fanathin ko fare saf ni malog. (Matt. 18:12-14) Manga yugu um lemnag e re n’em ni gubin ngiyal’ ni ga be athamgil ni ngam ayuweg e girdi’ rok Jehovah ni ke malog.
Uw Rogon ni Ga Ra Fulweg?
• Mang e maruwel rok e piin piilal ngak e Kristiano ni ke malog?
• Uw rogon ni ngam ayuweg e piin ni yad bang ko ulung ni kar maloggad?
• Mang e pi fel’ngin nra ayuwegem ngam ayuweg e piin ni ke malog?
[Picture on page 16]
Piin piilal e yad be athamgil ni ngar ayuweged e piin ni ke malog