Deer ko Piin Ma Bieg

Mang Fan ni Isaiah 30:21 (New World Translation) e be yog ni thin rok Jehovah e be yib u “fiti keruum,” ma fare verse nib m’on riy e be tay Jehovah nga m’on nbochan be yog ni gaar, “Lan owchem e susun ni nge par nib fel’ ni be guy e Sensey rom ni Th’abi Ga’”?

Isaiah 30:20, (NW) 21 e be yog ni gaar: “Sensey rom nib fel’ e dabki mithag ir, ma lan owchem e thingari guy e Sensey rom ni Th’bi Ga’. Ma lan telim e bayi rung’ag bugithin nga fiti keruum ni be gaar: ‘Ireray fare kanawo’. Gimed e girdi’, mmarod riy,’ richey mi gimed yan nga ba’ ni mat’aw ara richey mi gimed yan nga ba’ ni gilay’.”

Ra ngan gonopiy nrogon e thin ni bay riy, ma en be bieg e be guy Jehovah, ni fare Sensey ni Th’abi Ga’, ni bay u p’owchen machane be rung’ag ba Lam u fiti’ keru’. Machane, pi thin nem e be yip’ fan ban’en ma susun ni ngan lemnag fan ni aram rogon.

Thin ni be yip’ fan ban’en ni bay ko verse 20 ni kan ta’ ni ngan susunnag murunng’agen reb e tapigpig ni be pigpig ngak e masta rok, ma kari m’agan’ ngay ni nge fol ko thin ni ra yog e masta rok. Ni bod rogon reb e tapigpig ni be sap nga pa’ e masta rok nib pasig ni fan ni nge nang fan e tin baadag ni nge rin’, ma girdi’ rok Jehovah e ngiyal’ ney e ri yad be tiyan’rad ko thin nib puluw ni ma pi’ Jehovah u daken e ulung rok u fayleng ni buchuw ma buchuw. (Psalm 123:1, 2) Arrogon, yad ma fol ko thin ni ma yog ngorad, ma aram e yad be tiyan’rad ko urngin ban’en ni ra dag Jehovah u daken “fare tapigpig nib yul’yul’ mab gonop.”​—Matthew 24:45-47.

Ere, mang fan fare thin ni ke rung’ag e pi tapigpig rok u fiti keru’rad? Bay fan ni nga nog ni fare lam u fiti keru’rad e aram laman Got kakrom, ni i non u daken e Thin ni kan yoloy ni fare “tapigpig nib yul’yul’” e ke tamilangnag. (Luke 12:42) Pi tapigpig rok Got ko ngiyal’ ney e be rung’ag laman u daken e fol Bible ni yad ba pasig mi yad puluwnag e yafas rorad ko kenggin e motochiyel u daken e ayuw ko pi babyor ni be fal’eg “fare tapigpig nib yul’yul’ mab gonop”. Ra ngan pagan’uy ngay, min par ni yibe tiyan’uy ko thin ni ma pi’ fare Sensey ni Th’abi Ga’ ma ngan fil e Thin rok Got, ni kan yoloy boch e chibog kakrom, ma pi tapigpig rok e bod ni kar guyed ni bay u p’owcherad ma yad be rung’ag laman u fiti keru’rad.​—Roma 15:4.