Gafgow ni Yima Ta’ ni Bochan e Teliw​—Mang Fan?

BA MICH u wan’um ni susun ngan gafgownag e girdi’ nbochan e teliw rorad? Sana danga’​—nfaanra dabra rin’ed ban’en nra magawonnag mat’awun yugu boch e girdi’. Yugu aram rogon, ma yima gafgownag e girdi’ nbochan e teliw e ban’en ni ma buch ni kari kakrom ma ka ba’ ke mada’ ko chiney. Ni bod ni, boor e Pi Mich rok Jehovah u Europe nge yu yang u fayleng ni yima magawonnag mat’awrad ni gubin ngiyal’ ma kan gafgownagrad nib gel u lan fa bin reliw e chibog.

Ngiyal’ nem, ma Pi Mich rok Jehovah e yad ma gafgow nrib gel, ma rib yaram, me par nib n’uw nap’an u tan e am nu Europe ni ka nog totalitarian ngay. Mang e be fil ngodad u murung’agen e tini buch rorad ni kan gafgownagrad nbochan e teliw rorad? Ma mang e gad ra fil ko kanawo’ ni kar daged nbochan e gafgow ni keb ngorad?

“Gathi Bang ko Fayleng”

Pi Mich rok Jehovah e yad ma athamgil ni ngar folgad ko motochiyel ko am, ma yad ma mon’eg e gapas, ma yad e girdi’ nib fel’ e gafarig rorad. Dar ma togopuluwgad ko am ara ngara chamgad ngorad, maku dar ma k’aringed e damumuw ni fan ni ngan togopuluw ngorad ya bochan yad baadag ni ngan gafgownagrad. Pi Kristiano ney e dar ma un ko politics. Ba puluw e re n’ey ko thin rok Jesus ni gaar: “[Pi gachalpeg] e gathi yad bang ko fayleng, ni bod ni gag e gathi bang ko fayleng.” (John 17:16) Fapi am e baga’ ni yad ma ta’fan e tin ni ke dugliy e Pi Mich ni yad be par u mathilin. Ma fapi am ni ka nog e totalitarian rulers ngorad e dar ma ta’fan e motochiyel u Bible ni piin Kristiano e susun nguur pared ni gathi yad bang ko fayleng.

Fan e re n’en ney e kan weliy u nap’an reb e muulung nni kan tay nga University of Heidelberg, u Germany, ko November 2000. Re muulung nem e immoy e kenggin ni “Ngan Gafgownagey nge Ngan Ayuweg mat’awuy: Pi Mich rok Jehovah u Tan e National Socialist and Communist Dictatorships.” Dr. Clemens Vollnhals ko fare Hannah-Arendt-Institute for Research Into Totalitarianism e ke yog ni gaar: “Fapi am ni ka nog e totalitarian ngay e bay mataw’rad ni gathi ke mus ni fan ko tin ma rin’ ko politics. Be motochiyelnag nra be’ e nge fol rorad ko urngin ban’en.”

Tin riyul’ e Kristiano e dabiyog ni ngar pied e “yafas rorad ni polo’” ko am ko girdi’, ya bochan nkara micheged ni goo Jehovah Got e nguur pared ni yad ba yul’yul’ ngak ni polo’ e yafas rorad. Ke pirieg e Pi Mich ni yad be par u tan e pi am ni totalitarian dictatorship ni yu ngiyal’ ma tin ni baadag e Am ni ngar rin’ed e ba togopuluw ko michan’ rorad. Mang e ka ra rined u nap’an ni keb e magawon ngorad ni aram rogon? U lan boor e tayim ni ke yan, ma Pi Mich rok Jehovah e ka ra folgad ko kenggin e motochiyel ni ke yog fapi gachalpen Jesus Kristus ni lungurad: “Thingar gu folgad rok Got ko bin ni nggu folgad rok e girdi’.”​—Acts 5:29.

Bokum biyu’ e Pi Mich e kar pared nib yul’yul’ ko michan’ rorad ma dar uned ko tin yima rin’ ko politics ni yugu aram rogon ni kan gafgownagrad nrib gel. Uw rogon me yog rorad ni ngar kadedan’rad? Kar folgad ko fonow u Bible ni be gaar: “Dab mu digey e kireb nge gel ngom; machane ngam ngongliy e ngongol nib fel’ ngam gel ngak e kireb.” (Roma 12:21) Arrogon, tin nib fel’ e ra gel ko kireb.

[Blurb on page 4]

Pi Mich rok Jehovah u Chiyamen e kar gafgowgad ko togopuluw nib n’uw nap’an u tan e am ni totalitarian ko fa bin 20 e chibog

[Blurb on page 4]

“Am ni totalitarian e bay mat’awrad ni gathi ke mus ni fan ko tin yima rin’ ko politics. Yad be motochiyelnag ni ngari fol be’ rorad ko urngin ban’en ko yafas rok.”​—Dr. Clemens Vollnhals

[Picture on page 4]

Fare tabinaw ni Kusserow e kan magawonnag mat’awrad ya bochan dabra paged e michan’ rorad

[Picture on page 4]

Johannes Harms e kan li kem’ u lan e kalbus u Chiyamen nbochan e michan’ rok