Mu Par Ni Gab Mudugil Ni Gowa Ga Be Guy E Ani Dabiyog Ni Ngan Guy!

“I par Moses nib mudugil ni gowa be guy fare Got ndab ni guy nga owchey.”​—Hebrews 11:27.

1. Mang thin u morngaagen Got ni weliy Jesus ko machib ni tay u daken fare burey?

DABIYOG ni ngan guy Jehovah nga owchey. Nap’an ni yog Moses ni ba adag ni nge guy Got, I fulweg Jehovah ni gaar: “Dabiyog ni ngam guy owcheg, ya dariy be’ nrayog ni nge guyeg nge mu’ me par nib kab fos.” (Exodus 33:20) Me yog apostal John ni gaar: “Dariy be’ ni kaa guy owchen Got.” (John 1:18) Mus rok Jesus Kristus ni de yog rok ni nge guy Got u nap’an ni immoy nib girdi’ u fayleng. Machane nap’an ni I machib Jesus u daken fare burey I yog ni gaar: “Nge falan’ e piin ni ke machalbog lanin’rad, ya yad ra guy Got!” (Matthew 5:8) Mang fan e thin rok Jesus?

2. Mang fan ni dabiyog ni ngada guyed Got nga owchedad?

² I yog e Babyor nib Thothup ni Jehovah e ir ba kan ni dabiyog ni ngan guy nga owchey. (John 4:24; Kolose 1:15; 1 Timothy 1:17) Ere gathi be yip’ Jesus fan ni rayog ni nge guy e girdi’ Jehovah nga owcherad. Riyul’ ni pi Kristiano ni kan duguliyrad ko kan ni thothup e yad ra guy Jehovah Got u tharmiy u tomren ni kan fasegrad ko yam’ ni yad ba kan. Machane pi girdi’ nib “machalbog lanin’rad” ni yad be athapeg ni ngar pared ni manemus u fayleng e ku rayog rorad ni ngar “guyed” Got. Uw rogon nrayog rorad?

3. Uw rogon nrayog ni nge nang e girdi’ boch rarogon Got?

³ Rayog ni ngada filed ban’en u morngaagen Jehovah ni faan gad ra fl’eg I yaliy e pi n’en ni ke sunmiy. Gad ra fl’eg I yaliy ma gad ra nang gelngin Got ma gad ra nang ni ir Got ni Ani Tasunmiy. (Hebrews 11:3; Revelation 4:11) Aram fan ni yol Paul ni gaar: “Ka nap’an ni sunumiy Got e fayleng, ma fel’ngin ndabiyog ni ngan guy, ni aram gelngin ndabi m’ay biid nge rarogon ni ir Got, e kan guy nrib tamilang. Girdi’ e rayog ni nge nang fan e pi n’en u fithik’ e pi n’en ni ke m’ay I sunumeg rok Got.” (Roma 1:20) Ere thin rok Jesus u morngaagen ni ngan guy Got e be yip’ fan ni ngan fan ara gonopiy boch pi felngin Jehovah. Yira guy ara nang fan ni bochan e tamilangan’ ma gowa yira guy “nga lan mit e gumercha’rad.” (Efesus 1:18) Thin rok Jesus nge pi n’en ni ke rin’ e ma tamilangnag boor ban’en u morngaagen Got. Aram fan ni yog Jesus ni gaar: “Cha’ ni ke guyeg e ke guy e en ni Chitamangiy.” (John 14:9) Kari dag Jesus rarogon Got. Ere faanra tamilang e ngongol nge machib rok Jesus u wan’dad ma ra ayuwegdad ni ngada guyed ara gonopiy boch pi felngin Got.

Baga’ Fan Ni Nge Sor Lanin’dad Ko Tirok Got Ban’en

4. Uw rogon ni be m’ug ni de sor laniyan’ boor e girdi’ ko tirok Got ban’en e ngiyal’ ney?

⁴ Ngiyal’ ney e ri buchuw e girdi’ ni bay e michan’ rorad ara ma sor lanin’rad ko tirok Got ban’en. I gaar Paul: “Gathi urngin e girdi’ ma ma mich u wun’rad.” (2 Thessalonika 3:2) Boor e girdi’ ni kari l’agan’rad ko tirorad ban’en ma de mich Got u wan’rad. Dabiyog ni ngar gonopiyed ni bay Got ni bochan e pi denen rorad ma de sor lanin’rad ko tirok Got ban’en. I gaar apostal John: “En ni ma rin’ e kireb e dawori guy Got.” (3 John 11) Bochan ni dabi guy e pi girdi’ ney Got nga owcherad e yad ma lemnag ni dabi guy Got e pi n’en ni yad ma fl’eg. (Ezekiel 9:9) Dariy fan u wan’rad e tirok Got ban’en, ere dabiyog ni nge yog ngorad e “tamilangan’ u morngaagen Got.” (Proverbs 2:5) Rib puluw e thin rok Paul ni gaar: “Machane cha’ ndariy fare kan ni thothup rok e dabiyog ni nge yog ngak e pi taw’ath ni ma yib rok e kan ni thothup rok Got. Ya ri der nang fan, ma thin ko balyang u wan’, ya fan e yira nang ni ke mus ni kan ni thothup e ra dag.”​—1 Korinth 2:14.

5. Mang e manang e piin ni ma sor lanin’rad ko tirok Got ban’en?

⁵ Machane faanra sor lanin’dad ko tirok Got ban’en ma gubin ngiyal’ ma gad ra nang ni yugu aram rogon ni gathi ma gay Jehovah thibngidad machane ra nang ni faan gad ra rin’ e tin nib kireb ni bay u lanin’dad. Riyul’ ni “ngongol rok e girdi’ e bay u p’eowchen Jehovah, ma ma lemnag urngin e kanawo’ rok.” (Proverbs 5:21) Ma faan manga kada awgad ko denen, ma ra kalgadngan’dad ma gad ra wenignag ni nge n’ag fan e denen rodad ya rib t’uf Jehovah rodad ma dubdad ni ngada kirebnaged laniyan’.​—Psalm 78:41; 130:3.

Mang E Ma Ayuwegdad Ni Ngada Pared ni Gad Mudugil?

6. Mang fan fare thin ni ngan par nib mudugil?

⁶ Dabiyog ni ngada guyed Jehovah nga owchedad, machane dab da paged talin ni rayog ni nge guydad. Faanra tamilang u wan’dad ni bay Got mab mich u wan’dad ni ba chugur Got ngak urngin e piin ni ma pining e ayuw rok e ra ayuwegdad ni ngada pared ni gad mudugil​−ma dabi maruwar e michan’ rodad. (Psalm 145:18) Rayog ni ngada boded Moses, ma ke yol Paul morngaagen ni gaar: “Michan’ rok Moses ngak Got e ir e pow’iy Moses nge yan nge chuw u Egypt nde tamdag ngak e pilung nu Egypt ni ke damumuw; ma de sul nga Egypt, ni bochan e gowa ke guy fare Got ndab ni guy nga owchey.”​—Hebrews 11:27.

7, 8. Mang fan ni ke yog rok ni nge dabi rus u p’eowchen Farao?

⁷ I rin’ Moses e maruwel ni pi’ Got ngak ni nge rin’ me pow’iy piyu Israel ngar chuwgad u Egypt, ma boor yay ni m’ug nga p’eowchen Farao u fithik’ e girdi’ rok ni pi tayugang’ ko teliw rok nge pi salthaw rok. Ma sana boor e liyos u lan tafen fare pilung. Dabiyog ni ngan guy Jehovah machane ba riyul’ Jehovah u wan’ Moses, ma gathi bod fapi liyos ni yaan e pi got nu Egypt ni dariy e yafas rorad. Aram fan ni de tamdag Moses ngak Farao!

⁸ Mang e ke gelnag laniyan’ Moses ma de rus ni nge m’ug u p’eowchen Farao ni boor yay? I yog e babyor nib thothup ni “Moses e be’ nrib sobut’an’, ni ir e th’abi sobut’an’ u fithik’ e girdi’ nu fayleng.” (Numbers 12:3) Rib tamilang ke yog e gel ngak Moses ni ir “owchen fare Got ni dabiyog ni ngan guy” ni nge m’ug nga p’eowchen fare pilung nu Egypt ni bochan e ma sor laniyan’ ko tirok Got ban’en mab rib mich Got u wan’ Moses. Mang boch e kanawo’ nrayog ni nge dag e piin ni ma “guy” Got ni ngar tamilangnaged ni bay e michan’ rorad e ngiyal’ ney?

9. Mang reb e kanawo’ nrayog ni nguuda pared ni gad mudugil?

⁹ Reb e kanawo’ nrayog ni nge dag be’ e michan’ rok ma nge par nib mudugil ni gowa be guy e Ani dabiyog ni ngan guy nga owchey e nge machibnag e thin rok ni de tamdag riy ni yugu aram rogon ni bay e togopuluw. I ginang Jesus pi gachalpen ni gaar: “Ma gubin e girdi’ ni bay ra fanenikayed gimed ni bochag.” (Luke 21:17) Ki gaar ngorad: “Dariy reb e sib ni ba ga’ ngak e masta rok, Faanra kar gafgownaged a, ma bay kur gafgownaged gimed.” (John 15:20) Riyul’ e thin rok Jesus ya de n’uw nap’an u tomren ni yim’ min gafgownag pi gachalpen ni kan nog e kireb ngorad, min kolrad, min toyrad. (Acts 4:1-3, 18-21; 5:17, 18, 40) Ki machibnag e pi apostal nge pi gachalpen Jesus fare thin nib fel’ ni dariy e marus rorad ni yugu aram rogon ni kan togopuluw ngorad.​—Acts 4:29-31.

10. Uw rogon e ayuw ni ke yog ngodad ni bochan e ke pagan’dad ngay ni ra ayuwegdad Jehovah?

¹⁰ Tin somm’on I gachalpen Jesus e yad bod Moses ni dar tamdaggad ni bochan e rayog ni ngan guy e pi toogor rorad ni yad boor. Kari mich Got u wan’ pi gachalpen Jesus ma aram fan nrayog rorad ni ngar k’adedan’rad u fithik’ e togopuluw nrib gel. Arrogon, kar pared ni yad mudugil ni gowa yad be guy Faanem ni dabiyog ni ngan guy nga owchey. Ngiyal’ ney e rayog ni nge gel lanin’dad ni faanra gubin ngiyal’ ma gad manang ni be ayuwegdad Jehovah ma ra ayuwegdad ni nge dab da rus ni gad be machibnag Gil’ilungun Got. Be yog e Thin Rok Got ni “ani ra tamdag ngak e girdi’ e ra aw ko wup, machane ra ayuweg Jehovah e ani ma pagan’ ngak.” (Proverbs 29:25) Aram fan ni dab da rusgad ni bochan e togopuluw; maku dab da tamra’gad ni bochan e machib rodad. Michan’ rodad e ma k’aringdad ni ngada weliyed e machib ngak e girdi’ u lan binaw, ara piin ni gad ma maruwel u taabang, ara piin ni gad nga skul nge yugu boch e girdi’.​—Roma 1:14-16.

Ani Dabiyog Ni Ngan Guy Nga Owchey E Ma Gagiyegnag E Girdi’ Rok

11. Rogon e thin rok Peter nge Jude, uw rogon ni ke m’ug ni de sor laniyan’ boch e girdi’ u lan e ulung ni Kristiano ko tirok Got ban’en?

¹¹ Michan’ rodad e ma ayuwegdad ni ngada guyed ni Jehovah e ir e ani be gagiyegnag e ulung rok u fayleng. Ere dab da gathibthibnag e piin ni yad be tay morngaagen e ulung. I weliy apostal Peter nge Jude ni walagen Jesus u morngaagen e piin ni dariy tirok Got ban’en rorad ma yad ma yog e thin nib kireb u morngaagen e piin ni yad be tay morngaagen e ulung ni Kristiano. (2 Peter 2:9-12; Jude 8) Faan manga rayog ni ngan guy Jehovah nga owchey ma ra non e pi girdi’ nem ni yad be gathibthibnagey, fa? Ri danga’! Machane bochan ni dabiyog ni ngan guy Got ngay owchey ma pi girdi’ nem e yad ma lemnag ni dariy rogon e ngongol rorad u owchen Got.

12. Uw rogon e piin ni yad ma tay morngaagen e ulung u wan’dad?

¹² Riyul’ ni ba tadenen girdien e ulung ni Kristiano. Ma piin ni piilal e ma oloboch yu ngiyal’ ma ma yib wenegan ngodad. Arrogon, machane ka ma fanay Jehovah e pi girdi’ nem ni ngar gagiyegnaged fare ulung I saf rok. (1 Peter 5:1, 2) Girdi’ ni pumoon nge ppin nib sor laniyan’ ko tirok Got ban’en e yad manang ni aram fare kanawo’ ni be fanay Jehovah ni nge gagiyegnag e girdi’ rok. Ere gad e Kristiano e dab da gathibthibnaged ara gun’gun’gad machane gad ra tay fan e kanawoen e gagiyeg rok Got. Gad ra dag ni gowa gad be guy e ani dabiyog ni ngan guy nga owchey ni faan gad ra fol rok e piin ni be gagiyegnagdad.​—Hebrews 13:17.

Gad Be Guy Got Ni Ir E Be Skulnagdad

13, 14. Mang fan fare thin ni Jehovah e ir fare Sensey ni Th’abi Tolang u wan’um?

¹³ Ku bay yugu reb e kanawo’ ni ba t’uf ni ngada gonopiyed e tirok Got ban’en. I gaar Isaiah ni profet: “Lan owchemed e thingari mang lan owchey ni ma guy e Sensey romed ni Th’abi Ga’.” (Isaiah 30:20) Ba t’uf e michan’ ni ngan gonopiy ni Jehovah e ir e ani be skulnagdad u daken e ulung rok u fayleng. (Matthew 24:45-47) Ngan guy Got ni ir e Sensey rodad ni Th’abi Ga’ e gathi ke mus ni ngada filed e Bible ma ngada uned ko pi muulung ko Kristiano. Ya ku be yip’ fan ni gad be fanay urngin e ayuw ni ma yib rok Got. Thingar da tedan’dad ko gagiyeg ni ma pi’ Jehovah u daken Jesus ni fan ni dab da sorgad nga bang.​—Hebrews 2:1.

¹⁴ Yu ngiyal’ ma thingar da athamgilgad ni fan ni nge yog angin urngin e machib ngodad. Susun, sana gad ra bieg nib papey e pi thin nu Bible ni mo’maw I nang fan. Ma nap’an ni gad ra bieg e Watchtower ara Awake! gad ra pag boch e thin riy ya gad be lemnag ni dariy fan ngodad. Ara gad ra pag ni nge sor lanin’dad nga bang u nap’an e muulung ko Kristiano. Machane rayog ni ngada tedan’dad ni faan gad ra fl’eg I lemnag e pi n’en ni yibe fil. Gad ra tay fan e machib ni yibe fil ngodad e ra dag ni gad manang ni Jehovah e ir e Sensey rodad ni Th’abi Ga’.

Thingar Ni Pufthinnagdad

15. Uw rogon ni ma ngongol boch e girdi’ ni gowa dabi guyrad Jehovah?

¹⁵ Ba t’uf ni nge mich u wan’dad e Ani dabiyog ni ngan guy ya ri boor e kireb ko ngiyal’ ney ni “ngiyal’ ko tomur.” (Daniel 12:4) Boor e sasalap nge ngongol ko darngal. Ba fel’ ni dab da paged talin ni ma guy Jehovah e ngongol rodad ni mus ko ngiyal’ ni dabiyog ni nge guydad e girdi’. Boch e girdi’ e kar paged talin ni aram rogon. Ya nap’an ni dabi guyrad e girdi’ ma yad ma un ko ngongol nib togopuluw ko babyor nib thothup. Susun, boch e girdi’ e kan wawliyrad ni ngar yaliyed e tin nib kireb ara tin nib puwlag ko television ara Internet ara yugu boch. Yima rin’ e pi n’en ney u lan taferad ni dabi guyrad e girdi’, ere boch e girdi’ e ma ngongol ni gowa dabi guyrad Jehovah.

16. Mang e ra ayuwegdad ni ngada folgad ko pi motochiyel rok Jehovah nib tolang?

¹⁶ Ffel’ ni nge dab da paged talin e thin rok apostal Paul ni gaar: “Ma gadad gubin ni aram e ra bagadad ma nge weliy ngak Got e n’en ni I rin’.” (Roma 14:12) Thingar da nanged ni gubin ngiyal’ ni gad ra denen ma gad be denen nib togopuluw ngak Jehovah. Gad ra nang ni aram rogon ni ra ayuwegdad ni ngada folgad ko pi motochiyel rok nib tolang ma ngada paloggad ko ngongol nib kireb. Be gaar e Bible: “Dariy ban’en nrayog ni ngan mithag rok Got Ya urngin ban‘en ni ke m’ay I sunumeg rok e be par u p’eowchen ndariy e upong u daken; mi ir e ri gadad ra weliy e pi n’en ni ud rin’ed ngak.” (Hebrews 4:13) Riyul’ ni thingar da weliyed ngak Got e pi n’en ni kada rin’ed, machane gad ma rin’ e tin nib m’agan’ Got ngay ni ngada rin’ed ma gad ma fol ko pi motochiyel rok ni bochan e rib t’uf Jehovah rodad. Ere ngada ayuwgad u rogon e fafel ni gad ma tay nge rogon e ngongol rodad ngak e piin ni pumoon ara ppin.

17. Uw rogon u wan’ Jehovah ni be yaliydad?

¹⁷ Ri ma lemnagdad Jehovah, machane gathi be yip’ fan ni be sonnag ni ngada olobochgad ni fan ni nge gechignagdad. Danga’, ya be yaliydad u fithik’ e t’ufeg, ni bod rogon ba matam ni ba adag ni nge taw’athnag pi fak ni yad be fol rok. Rib fel’ lanin’dad ni bochan e gad manang ni Chitamangidad nu tharmiy e ma falfalan’ ni bochan e michan’ rodad ma “ra taw’athnag e piin ni yad be gayiy Got”! (Hebrews 11:6) Ere ngari mich Jehovah u wan’dad ma ngada “pigpiggad ngak u polo’ I gumercha’dad.”​—1 Chronicles 28:9.

18. Mang e ke micheg e Babyor nib Thothup ni bochan e ma yaliydad Jehovah me guy ni gad ba yul’yul’?

¹⁸ Be gaar Proverbs 15:3: “I Somol e be guy urngin banen ni yibe rin’ u gubin yang, ndemtrug ko tin nib fel’ ara tin nib kireb e gadad be rin’ machane be par ni ke yip’ owchen ngodad.” Arrogon ma yaliy Got e piin nib kireb me rin’ ngorad nrogon e ngongol rorad. Machane, faan gad bay u fithik’ e “piin nib fel’ ” ma rayog ni nge mich u wan’dad ni ma tayan’ Jehovah ko ngongol rodad ni gad be rin’ ni bochan e michan’ rodad. Ma gel e michan’ rodad ni bochan ni gad manang ni “pigpig ni gad be tay ngak Somol e gathi ra yan I aw nib m’ay fan” ma faanem ni dabiyog ni ngan guy nga owchey e “gathi bayi pag talin e maruwel ni kada ngongliyed ara rogon nib t’uf rodad”!​—1 Korinth 15:58; Hebrews 6:10.

Gad Be Pining Jehovah Ni Nge Fl’eg I Yaliydad

19. Mang boch e taw’ath ni ke yog ngodad ni bochan e ba gel e michan’ rodad ngak Jehovah?

¹⁹ Gadad e pi tapigpig rok Jehovah ni gad ba yul’yul’ e gad ba t’uf rok Got. (Matthew 10:29-31) Yugu aram rogon ni dabiyog ni ngada guyed nga owchedad machane ba riyul’ Got u wan’dad ma rib t’uf rodad fare thin nib fel’ u thildad Got. Faanra aram rogon lanin’dad ngak e Chitamangidad nu tharmiy ma ra yoor e taw’ath nrayog ngodad riy. Michan’ rodad nib gel’ e ra ayuwegdad ni nge biech lan gumercha’dad, ma nge biech e nangan’ rodad u p’eowchen Jehovah. Michan’ rodad ni gathi gad be dake gad ba mat’aw e ra ayuwegdad ni nge dabi ruw raba’ e ngongol rodad. (1 Timothy 1:5, 18, 19) Michan’ rodad ngak Got ni dariy e maruwar riy e ra dag e kanawo’ ngak yugu boch e girdi’ ma ra fel’ rogorad riy. (1 Timothy 4:12) Ma michan’ ni aram rogon e ra ayuwegdad ni nge fel’ e ngongol rodad ma nge falan’ Jehovah ngodad.​—Proverbs 27:11.

20, 21. (a) Mang fan nib fel’ ni ma yaliydad Jehovah? (b) Uw rogon nrayog ni ngada fanayed fare thin u Psalm 139:23, 24 ngodad?

²⁰ Faanra ri gad ba gonop ma gad ra adag ni nge matanagiydad Jehovah. Gathi ke mus ni nge yaliydad Jehovah ya gad ba adag ni ngari fl’eg I yaliy lanin’dad nge ngongol rodad. Nap’an ni gad ra meybil ma gad ra pining Jehovah ni nge yaliy fithik’dad nge guy ko bay ban’en riy nib kireb. Rayog ni nge ayuwegdad ko pi magawon rodad ma nge yal’uweg e pi n’en ni gad ba kireb riy. Ere bpuluw e thin rok David ni ke tangnag ni gaar: “Got mu guy lanin’ug ngam nang; mu sikengnigeg ngam nang e lem rog. Ma gguy ko bay e sabanban riy fa dariy, ma ga powiyeg u daken fa bin dabi m’ay e kanawo’.”​—Psalm 139:23, 24.

²¹ I wenig David ngak Jehovah ni nge yaliy fithik’ I laniyan’ nge guy ko bay ban’en riy nib kireb fa. Gad bod e ani yoloy e psalm ni ri gad ba adag ni nge yaliydad Got nge guy ko bay ban’en nib kireb u fithik’ I lanin’dad, fa? Ngada pininged Jehovah ni nge yaliy fithik’dad. Machane ra uw rogon ni faan manga ke magafan’dad ni bochan e kada olobochgad ara bay e lem nib kireb u lanin’dad? Faanra aram rogon ma nguuda meybilgad ngak Jehovah ni Got rodad ni ma t’ufegdad ma ngada folad ko fare kan ni thothup ni be pow’iydad ma ngada fogad ko Thin Rok Got. Rayog ni nge pagan’dad ngay ni ra ayuwegdad Got nge ayuwegdad u fare kanawo’ nra yan ko yafas ni manemus.​—Psalm 40:11-13.

22. Mang e kada turguyed u lanin’dad ni ngada rin’ed ni ba sor fan ngak e Ani dabiyog ni ngan guy nga owchey?

²² Arrogon, ra taw’athnagdad Jehovah ko yafas ni manemus ni faan gad ra fol ko pi motochiyel rok. Ma thingar da ted fan gelngin nge thin rok ni bod rogon ni rin’ apostal Paul ni faani gaar: “Fare Pilung ni bay I par ndariy n’umngin nap’an, ma dabi yim’ biid ma dab ni guy nga owchey, ma ke mus ni ir e taare Got ni ba’ e ir e ngi I tay e girdi’ fan me ir e nga nog e sorok ngak ndariy n’umngin nap’an. Amen.” (1 Timothy 1:17) Susun aram rogon e tay fan nge liyor rodad ni ngada ted ngak Jehovah. Ma yugu demutrug e n’en nra buch ma dabi maruwaran’dad ni ngada pared ni gad mudugil ni gowa gad be guy e Ani dabiyog ni ngan guy nga owchey.

Uw Rogon Ni Ga Ra Fulweg?

• Uw rogon ni rayog ni nge guy e girdi’ Got?

• Faanra ba riyul’ Jehovah u wan’dad, ma uw rogon e ngongol rodad u nap’an ni yibe togopuluw ngodad?

• Mang fan fare thin ni ngan Jehovah ni ire e Sensey Rodad ni Th’abi Tolang?

• Mang fan ni ngada adaged ni nge yaliydad Jehovah?

[Picture on page 27]

De rus Moses ngak Farao me ngongol ni gowa rayog ni nge guy Jehovah, ni ir fare Got ni dabiyog ni ngan guy nga owchey

[Picture on page 29]

Dab da ngongolgad ni gowa dabi guy Jehovah e pi n’en ni gad be fl’eg

[Picture on page 31]

Ri gad be gay e tamilangan’ u morngaagen Got ni bochan e gad be guy ni ir e Sensey rodad ni Th’abi Tolang