Mu Pagan’um Ngak Jehovah U Polo’ I Gumerchaem
“Piin ni manang fithngam e ra pagan’rad ngom.”—PSALM 9:10.
1, 2. Mang boch ban’en ni dariy e ayuw riy ni ma pagan’ boch e girdi’ ngay?
NGIYAL’ e bay boor ban’en ni be magawonnag e yafas rodad, ere bpuluw ni ngan gay be’ ara ban’en ni ra matanagiydad. Boch e girdi’ e ma lemnag ni faanra yoor e salpiy rorad ma rayog ni ngar pagedan’rad ko n’en ni bay ko gabul nge langleth, machane bin riyul’ riy e ba yoyowol e salpiy. Be gaar e Bible: “Ra mul nga but’ e ani ke pagan’ ko salpiy rok.” (Proverbs 11:28) Yugu boch e girdi’ e ma pagan’rad ngak e pi girdi’ ni tolang rorad, machane mus ko tin th’abi fel’ ko pi tolang nem e ku yad ma oloboch. Ma munmun ma yad ra yim’. Ere bay e llowan’ ko n’en ni yog e Bible ni gaar: “Dab mu pagan’um ngak e pi pilung ara pi fak e girdi’ nu fayleng ya dariy e ayuw riy.” (Psalm 146:3) Ku be yip’ fan e re thin nem ni dab da pagedan’dad ngodad ni dariy e ayuw rok Got riy. Ya ku arrogodad ni gad “pi fak e girdi’ nu fayleng.”
2 I weliy Isaiah ni profet thibngin e pi pilung nu Israel ko ngiyal’ nem ni bochan e kar pagedan’rad ko “malulfith ni manab rorad.” (Isaiah 28:15-17) Ke guy rogon e pi pilung nem ni ngar pared u fithik’ e pagan’ me ere kar ngongliyed e gapas u thilrad e pi nam ni bay u charrad. Machane dabiyog ni ngan pagan’ ko tha’ ni aram rogon—ere bogi malulfith. Ku arrogon e chiney ni boor pi yurba’ I teliw ni be fl’eg e thin u thilrad e pi pilung. Ra yan I aw ni pi tha’ nem e bogi “malulfith.” (Revelation 17:16, 17) Dabiyog ni ngan pagan’ ko pi tha’ nem.
Kanawo’ Nib Fel’ Ni Ke Pi’ Joshua nge Caleb
3, 4. Uw rogon nib thil e thin rok Joshua nge Caleb nge fa ragag I damit?
3 Ere, uw e gad ra sap ngay ni fan e nge pagan’dad? Ngada sapgad ko gini sap Joshua nge Caleb u nap’an Moses. De n’uw nap’an u tomoren ni chuw piyu Israel u Egypt, be n’en ni nge yan fare nam nga lan e binaw nu Canaan, ni bbinaw ni kan micheg ngorad. Ka nol’og ragag nge l’agruw e damit ni ngar lekaged e binaw, ma tomren 40 e rran mar sulod mar weliyed e pi n’en ni kar guyed. Ke mus ni l’agruw I yad ni yow Joshua nge Caleb nib fel’ e thin rorow u morngaagen ni ra fel’ e par rok piyu Israel u Canaan. Tin ni ka bay e damit e urogned nib fel’ fare binaw machane ke lungurad: “Machane gidi’ riy e yad ba gel, ma pi binaw rorad e ri ba ga’ ma ba fel’ rogon ni ka ni yororiy ni fan ko mahl . . . Dabiyog ni ngad m’aged e mahl ngord ya gadad mmeewar; ya ba gel e mal’af riy ni yad ba gel ngodad.”—Numbers 13:27, 28, 31.
4 I fol piyu Israel ngak fa ragag I damit mar tamdaggad mi yad nonnon nib togopuluw ngak Moses. Tomur riy me non Joshua nge Caleb ni lungurow: “Fare nam ni gu waraod gu lekgeg e ba nam nrib fel’. Ra gaad ba fel’ u wan’ Somol, ma ra fekdad ngay me pi’ ngodad e re nam nem ni pire’ ban’en riy ma ba yong’ol e but’ riy. Dab mu togopluw gadad ngak Somsol, ma dab mu rusgad ngak e girdi’ ni be par u rom.” (Numbers 14:6-9) Machane de fol piyu Israel me ere dan pagrad ni ngar uned nga lan fare binaw ni kan micheg ngorad ko ngiyal’ nem.
5. Mang fan nib fel’ e thin rok Joshua nge Caleb?
5 Mang fan nib fel’ e thin rok Joshua nge Caleb, ma fa ragag I damit e de fel’ e thin rorad? Yad gubin ni ni kar guyed taa ban’en ni ba gel e pi mach riy mab gel e pi nam. Mab puluw e thin rok fa ragag I damit ni dariy gelngin piyu Israel ni ngar mahlgad ngar gelgad ko pi nam nem. Maku manang Joshua nge Caleb ni aram rogon. Machane I sap ra ragag I damit u rogon ni ma changar e girdi’. Machane I pagan’ Joshua nge Caleb ngak Jehovah. Kar guyew gelngin Jehovah u Egypt ngu Red Sea, ngu Burey nu Sinai. Bokum e duw nga tomren me rung’ag Rahab nu Jericho morngaagen e pi n’en ni rin’ Jehovah me ayuweg e girdi’ rok Jehovah ni yugu aram rogon nrayog ni nge mul e yafas rok riy! (Joshua 2:1-24; 6:22-25) I guy Joshua nge Caleb nga owcherow e pi n’en ni rin’ Jehovah, ere kari pagan’row ni ku ra mahl ni fan ko girdi’ rok. Aningeg I ragag e duw nga tomren ma ke riyul’ e n’en ni kar pagewan’row ngay, ya ke un piyu Israel nga lan e binaw nu Canaan u tan pa’ Joshua mar mahlgad ngay kar gel.
Fan Ni Ngada Pagedan’ Ngak Jehovah Ni De Maruwaran’dad Ngay
6. Mang fan ni boor e magawon rok e pi Kristiano e ngiyal’ ney, ma uw e susun ngar pagedan’rad ngay?
6 Gad ma par ko “ngiyal’ nib mo’maw e par riy” ma gadad bod piyu Israel ni bay e pi toogor rodad ni kab gel ngodad. (2 Timothy 3:1) Yibe togpuluw ko yalen rodad, nge machib rodad ma yu ngiyal’ e yima cham ko dowef rodad. Dabiyog ni ngada gelgad ko pi togopuluw ney u gelngidad, ya ke sum rok be’ ni kab gel ko girdi’ ni ir Satan ni Moonyan’. (Efesus 6:12; 1 John 5:19) Ere uw e gin ni gad ra sap ngay? I meybil be’ nib yul’yul’ kakrom ngak Jehovah ni gaar: “Piin ni manang fithngam e ra pagedan’rad ngom.” (Psalm 9:10) Faan gad manang Jehovah nge fan e ngochol rok, ma rayog ni ngada pagedan’dad ngak ni bod ni rin’ Joshua nge Caleb.—John 17:3.
7, 8. (a) Uw rogon ni ma pi’ e tin ni sunmiy Got fan ni ngada pagedan’dad ngak Jehovah? (b) Mang boch I fan ni bay u Bible ni ngada pagedan’dad ngak Jehovah?
7 Mang fan ni ngada pagedan’dad ngak Jehovah? I pagan’ Joshua nge Caleb ni bochan e kar guyew gelngin. Maku arrogodad. Amu lemnag e pi n’en ni sunmiy Jehovah, nib muun ngay urngin ban’en u lan e lang ni bokum billion yu ulung I t’uf riy. Fapi gelngin ni bay u pa’ Jehovah e ma micheg ni riyul’ ni ir e Ani Ga’. Gad ra lemnag e pi n’en ni sunmiy Jehovah ma ra taareban’dad Job ni gaar: “Mini’ e rayog ni nge gel’ ngak? Mini’ e ra gaar ngak, ‘Mang e ga be rin’?’” (Job 9:12) Bin riyul’ riy e bay Jehovah u ba’ rodad, ere dariy be’ ni gad ra tamdag ngak.—Roma 8:31.
8 Ku mu lemnag e Thin Rok Jehovah ni Bible. Rib gel gelngin e re Thin nem ni bay e llowan’ rok Got riy ni nge ayuwegdad ni ngada paged e ngongol nib kireb ma ke ayuwegdad ni nge puluw e yafas rodad ko tin nib m’agan’ Jehovah ngay. (Hebrews 4:12) Bible e ke ayuwegdad ni ngada nanged e ngochol rok Jehovah nge fan e ngochol rok. (Exodus 3:14) Kada filed ni rayog rok Jehovah ni nge mang e n’en ni ba adag ni nge mang—ni reb e Matam ni ma t’ufegey, ara ba Tapuftin nib mat’aw, ara ba Salthaw nib gel—ni fan e nge lebug e tin nib m’agan’ ngay. Ma kada guyed ni ke riyul’ e tin ni ke micheg. Ma nap’an ni gad ra fil e Thin Rok Got, gad ra yog e n’en ni yog e ani yoloy e psalm ni gaar: “Kug pagan’ug ko thin rom.”—Psalm 119:42; Isaiah 40:8.
9. Uw rogon ni ra gel e pagan’ rodad ngak Jehovah ni bochan e biyul nge fas ko yam’ ni tay Jesus?
9 Fare biyul e ku reb I fan ni ngan pagan’uy ngak Jehovah. (Matthew 20:28) Ri gad ba taw’ath ni bochan e ke l’og Got Fak ni nge yim’ ni fan ngodad! Ma ri baga’ angin fare biyul. Ya rayog ni nge n’ag fan e denen rok urngin e girdi’ ni ra kalgadngan’rad mi yad chel ngak Jehovah ni ba yul’yul’ gumercha’rad. (John 3:16; Hebrews 6:10; 1 John 4:16, 19) I fas Jesus ko yam’ ya nge pi’ puluwon fare biyul’ ngak Got. I guy bokum miriay e girdi’ Jesus nga owcherad ni ke fas ko yam’, maku aram reb I fan ni ngan pagan’uy ngak Jehovah. Aram e mich riy ni ri ra lebug e pi n’en ni gad be athapeg ma dabi mulan’dad.—Acts 17:31; Roma 5:5; 1 Korinth 15:3-8.
10. Mang boch ban’en ni ke buch rodad ni aram fan ni kada pagedan’dad ngak Jehovah?
10 Ereray boch ban’en ni fan ni rayog ni ngada pagedan’dad ngak Jehovah ma susun ngada pagedan’dad ngak. Maku bay yugu boch I fan ni ngada pagedan’dad ngak Got, ma boch e ke buch ngodad. Susun, yu ngiyal’ e ra yib e magawon ngodad. Gad ra yibilay Jehovah ni nge ayuwegdad ni ngada pitheged e pi magawon nem, ma gad guy ni ri m’ag e ayuw ni ke pi’. (James 1:5-8) Aram e ra gel e pagan’ rodad ngak Jehovah ma gad ra guy angin e pagan’ ni gad be tay, me gel boch e pagan’ rodad ngak.
I Pagan’ David Ngak Jehovah
11. Uw rarogon David me pagan’ ngak Jehovah?
11 David ni be’ nu Israel kakrom e I pagan’ ngak Jehovah. Ke magawon David ni bochan Saul ni Pilung ya ba adag Saul ni nge thang e fan rok David, maku be togopuluw piyu Filistia ngak ni yad be guy rogon ni ngar gelgad ngak piyu Israel ko mahl. Machane ki par David nib fas me gel ko mahl. Mang fan? I weliy David fan ni gaar: “I Somol e tamilang rog me ir e ba’ rog ni be ayuwegeg iyan, dab gu tamdag ngak be’.” (Psalm 27:1) Ku arrogodad ni rayog ni nge m’ag e tirodad ban’en ni faan gad ra pagan’dad ngak Jehovah.
12, 13. Uw rogon ni dag David ni ngada pagedan’dad ngak Jehovah ni mus ko ngiyal’ ni ra fanay e pi toogor rodad bolowthorad ni gowa talin e cham nib togopuluw ngodad?
12 Bay biyay ni I meybil David ni gaar: “O Got, mmotoyil ko thin rog ni ke magafan’ug. Amu ayuweg e yafas rog rok e toogor rog ni yima tamdag ngak. Amu mithageg rok e piin nib kireb ni yad be ngongliy e makath, ni piin ni tawagey ni yad be ngongliy e kireb, ni kar uthumed bolowthrad ni bod ni yima uthum e sayden, ni kar paged ggan e gating rorad ara thin rorad nib kireb ni yad be mith ya ngar paged ggan e gating ngak be’ ni de kireb e rok.” (Psalm 64:1-4) Dada nang ko mang fan ni yoloy David e re thin nem. Machane gad manang ni bay e pi tatogopuluw e ngiyal’ ney ni kar “uthumed bolowthrad” ma thin rorad e bod talin e cham rorad. Yad ma “pag gan e gating” ngak e pi Kristiano ni de kireb e rorad, ma yad ma yog ara yoloy boch e thin ni yad ba sasalap. Faan gad ra pagan’dad ngak Jehovah ma mang wenegan?
13 Ki ulul David ngay ni gaar: “Ra pag Got gan e gating ngorad nib tomgin. Yad ra maadad ngay, ma yad ra dol. Machane bolowthrad e ra kirebnagrad. . . . Ani mmat’aw e ra falfalan’ ni bochan Jehovah yad yad ra nab ngak.” (Psalm 64:7-10) Arrogon, pi toogor rodad e ra uthum bolowthrad ni ngar kirebnaged gadad, machane ra yan I aw ni bolowthrad e ra kirebnagrad. Ra thilyeg Jehovah e kireb rorad nge fel’ ngak e piin ni kar pagedan’rad ngak ya ngar falfalan’gad ngak.
Ke Yan I Aw Ni Bay Fan e Pagan’ Ni Tay Hezekiah
14. (a) Mang riya’ ni ke yib ngak Hezekiah me pagan’ ngak Jehovah? (b) Uw rogon ni dag Hezekiah ni de mich e sasalap rok yu Assyria u wan’?
14 Hezekiah ni pilung e ku ir be’ ni bay angin e pagan’ ni tay ngak Jehovah. Nap’an e gagiyeg rok Hezekiah, I mahl e pi salthaw nu Assyria ngak yu Jerusalem. Boor e nam ni ke gel e pi salthaw nem ngorad. Miki gel ngak boch e mach nu Judah ma ke mus ni goo Jerusalem e dawori war, ma Sennacherib ni ir e ga’ ko salthaw nu Assyria e ke uf ngay ni ra gel nga Jerusalem. Rabshakeh, ni ir owchen Sennacherib e yog ni dariy fan ni ngan yan nga Egypt ni ngan ning e ayuw rorad—mab puluw e thin rok. Machane ki gaar Rabshakeh: “Dab mu pag ni nge bannagmed e Got romed ni kam pagan’med ngak ni gaar: “Dabi aw Jerusalem nga pa’ e pilung nu Assyria.”” (Isaiah 37:10) Machane manang Hezekiah ni der ma ban Jehovah. Ere I meybil ni gaar: “O Jehovah ni Got romad, mu ayuwegmad u pa’ piyu Assyria ni fan ni nge nang urngin e nam nu fayleng, o Jehovah, ni ke mus ni goo gur e Got.” (Isaiah 37:20) I motoyil Jehovah ko meybil rok Hezekiah. U lan reb e nep’ e li’ reb e engel 185,000 e salthaw nu Assyria. Kan ayuweg yu Jerusalem me chuw Sennacherib u Judah. Piin ni kar rung’aged morngaagen e kar nanged ni rib sorok Jehovah.
15. Mang e ra ayuwegdad ni ngada fl’eged rogodad ni fan ko magawon nrayog ni nge yib ngodad ko re fayleng ney nib yoyowol?
15 Ngiyal’ ney e gad be mahl ni bod Hezekiah. Machane gad be mahl ni fan ko tirok Got ban’en. Gad e pi salthaw rok Got e thingar da nanged rogon ni nguuda pared ni gad ba fas. Thingar da nanged rogon ni yima mahl ngodad, ma ngada fl’eged rogodad ni fan e nguuda gelgad ko mahl. (Efesus 6:11, 12, 17) Gad ma par u reb e fayleng nib yoyowol, ma rayog ni nge thil rarogon e fayleng nib tomgin. Rayog ni nge wagey e nam nib tomgin. Pi nam nib puf rogon e pi yurba’ I teliw riy e rayog ni ngar taleged e pi yurba’ I teliw. Faan gad ra bod Hezekiah ma ngada fl’eged rogodad ni nge yog ngodad e pagan’ ngak Jehovah ni dariy e maruwar riy ma rayog ni nguuda pared ni yugu demutrug e n’en ni ra buch.
Mang Fan Fare Thin Ni Ngada Pagedan’dad Ngak Jehovah?
16, 17. Uw rogon ni gad ra dag ni kada pagedan’dad ngak Jehovah?
16 Pagan’ ngak Jehovah e gathi ke mus ni welthin. Ya bay rogon gumercha’dad ngay ma ra m’ug ko ngongol rodad. Faanra pagan’dad ngak Jehovah maku ra pagan’dad ko Thin Rok ni Bible. Gad ra bieg e Bible ni gubin e rran, ma gad ra fl’eg I lemnag e thin riy, ma gad ra fol ko thin riy. (Psalm 119:105) Pagan’ ngak Jehovah e ku be yip’ fan ni ra pagan’dad ko fare kan ni thothup. Ra ayuwegdad e kan ni thothup ni nge yog ngodad pil felngin e kan ni thothup ni ma falan’ Jehovah ngay ma ra ayuwegdad ni ngada paged e ngongol nib kireb. (1 Korinth 6:11; Galatia 5:22-24) Ke ayuweg e kan ni thothup boor e girdi’ ni ngar paged e tamagow, ara drugs. Yugu boch e girdi’ e kar paged e ngongol ndarngal. Arrogon, faanra pagan’dad ngak Jehovah ma rayog ni ngada ngongol u gelngin Jehovah ma gathi gelngidad.—Efesus 3:14-18.
17 Ma faanra pagan’dad ngak Jehovah ma gad ra pagan’ ngak e piin ni ke pagan’ Jehovah ngorad. Susun, ke tay Jehovah fare “tapigpig nib yul’yul’ mab gonop” ni nge ayuweg tirok Gil’ilungun u fayleng. (Matthew 24:45-47) Gathi ke mus ni gad rodad, ma gathi gad ra dariy fannag e n’en ni ke tay Jehovah, ya gad ra pagan’ ko n’en ni ke yarmiy Jehovah. Maku bay e piin ni piilal u lan e ulung ni Kristiano ma rogon ni yog apostal Paul e kan ni thothup e ke duguliy e pi girdi’ nem. (Acts 20:28) Gad ra maruwel u taabang ko piin ni piilal u lan e ulung ma gad ra dag ni gad ma pagan’ ngak Jehovah.—Hebrews 13:17.
Ngada Folwok Rok Paul
18. Uw rogon ni ma fol e pi Kristiano e ngiyal’ ney ko kanawo’ rok Paul, machane dabi pagan’rad ko mang?
18 Boor e magawpm rok apostal Paul u nap’an ni I machib, ni bod rogon e pi magawon rodad. Ngiyal’ nem e un gathibthibnag e pi Kristiano, ma yu ngiyal’ e I guy Paul rogon ni nge yal’uweg boch e pi sasalap nem, ara nge yan ko court ya nge yog ni ngan machib nrogon e motochiyel. (Acts 28:19-22; Filippi 1:7) Ngilyal’ ney e ma fol e pi Kristiano ko kanawo’ rok Paul. Faan rayog ma gad ra ayuweg yugu boch e girdi’ ni nge tamilang u wan’rad ko mang e maruwel rodad, ma gad ra fanay e pi n’en ni bay ni fan ni ngan tamilangnag. Ma gad ra ayuweg e machib rodad u court. Machane gathi gad ra pagan’ ko court, ni gowa ke m’ag e machib rodad ni bochan e kada gelgad u court ara kada wargad. Danga’, ya kada pagedan’dad ngak Jehovah. Dab mu pag talin e thin rok Got ngak piyu Israel kakrom ni gaar: “Gelngimed e bay ko gapas lanin’med nge pagan’ romed.”—Isaiah 30:15.
19. Yugu aram rogon ni yibe gafgownag e pi walagdad, mang angin e pagan’ rorad ngak Jehovah?
19 Yu ngiyal’ ma kan taleg e machib rodad u Eastern ara Western Europe, nge yu yang u Asia ngu Africa, nge boch e nam u South nge North America. Ere be yip’ fan ni mm’ay fan e pagan’ rodad ngak Jehovah, fa? Danga’. Yu ngiyal’ e ma pag Jehovah ni ngan gafgownagdad nrogon nib m’agan’ ngay, machane ku ma gelnagdad Jehovah e piin ni kan gafgownagrad. Boor e Kristiano nib fel’ morngaagrad ni bochan e michan’ rorad nge pagan’ rorad ngak Got ni yugu aram rogon ni kan gafgownagrad.
20. Ke fel’ rogodad ni bochan e motochiyel ko nam, machane uw rogon ni nge dab da wargad?
20 U boor e binaw e rayog ni ngada machibgad nrogon e motochiyel ko pi nam nem, ma yu ngiyal’ e ba fel’ morngaagdad u lan e shimbung. Gad ma falfalan’ ngay ma gad manang ni aram e n’en nib m’agan’ Jehovah ngay. Ke puf rogodad ni gathi fan ni nge fel’ rogon e par rodad, ya nge yog ni ngada pigpiggad ngak Jehovah ni ke puf rogodad, ma ra flaabnagdad Jehovah ni ngada pigpiggad. Gad ra par u mathilin e pi am, ma dabi war e machib ni gad be tay, ara dabi war e pigpig ni gad ma tay ngak Jehovah ni fan e ngada fel’gad u wan’ e am. Gad girdien Gil’ilungun e Messiah ma gad bay ko ba’ rok Jehovah. Gathi re m’ag ney ni gad be nameg ya gad be nameg fare m’ag nib biech ni ke mus ni Gil’ilungun e Messiah e ra gagiyegnag e fayleng. Dabiyog rok e pi donmach ara missile, nrayog ni nge kirebnag e re am nem ara mahl ngak u tharmiy. Dabiyog ni nge war ma ra rin’ e tin nib m’agan’ Jehovah ngay.—Daniel 2:44; Hebrews 12:28; Revelation 6:2.
21. Mang kanawo’ ni ke mudugil u wan’dad ni gad ra yan ngay?
21 Be gaar Paul: “Gathi gadad e piin ni kar pied keru’rad ngak Got kar maloggad; ya gadad e ke michan’dad ngak Kristus kad thapgad ngak Got.” (Hebrews 10:39) Ere gad gubin e ngada pigpiggad ngak Jehovah nge mada’ ko tomur. Bay boor I fan ni ngada pagedan’dad ngak Jehovah e chiney iyan ni manemus.—Psalm 37:3; 125:1.
Mang e Kam Fil?
• Mang fan nib fel’ e thin rok Joshua nge Caleb?
• Mang boch I fan ni gad ma pagan’ ngak Jehovah ni dariy e maruwar riy?
• Mang fan fare thin ni ngan pagan’ ngak Jehovah?
• Mudugil u wan’dad ni ngada rin’ed e mang ni bochan e kada pagedan’dad ngak Jehovah?
[Picture on page 28]
Mang fan nib fel’ e thin rok Joshua nge Caleb?
[Pictures on page 30]
Piin nra pagan’rad ngak Jehovah e ku ra pagan’rad ngak e piin ni ke pagan’ Jehovah ngorad