Mi Gimed Puthuy Ko Tamilangan’ Romed E T’ar Laniyan’

“Mi gimed puthuy . . . ko tamilangan’ romed e t’ar laniyan’.”​—2 PETER 1:5-8.

1. Boor e magawon ni keb ngak e girdi’ ni bochan e mang e de yog ni ngan rin’?

NGIYAL’ ni kan were nib elmerin e thin nib togopuluw ko girdi’ ni ma fanay e drug, mini fonownag e piin fel’ yangaren u Meriken ni gaar: “Kemus ni nga nog e danga’.” Rib fel’ nfaanra urngin e girdi’ e nge yog e danga’ ni gathi kemus ni ngan fanay e drug nib pag rogon ya ku arrogon ni ngan unum e wain nib pag rogon, nge par nariy e gonop ara par ni ma un ko ngongol ni darngal, nge fol chuway ni bay e sasalap u fithik’, nge “tin nib kireb ni be ararnag dowey”! (Roma 13:14) Machane, mini’ e ra yog ni nge yog ni nga nog e danga’ e ba mom ni gubin ngiyal’?

2. (a) Mang e bay u Bible ni be dag ni fare magawon ni mo’maw’ ni nga nog e danga’ e gathi ban’en nib biech? (b) Pi n’eney e be pi’ e athamgil nga lanin’dad ngad rin’ed e mang?

² Bochan urngin e girdi’ ni de flont e mo’maw’ ngorad ni ngar t’ared lanin’rad, ma thingarda adaged ni ngad filed rogon ni ngad gelgad ko ngongol nib kireb ni be magawonnagdad. Bible e be weliy ngodad u murung’agen e girdi’ kakrom ni kara athamgilgad ni ngar pigpiggad ku Got machane yu ngiyal’ e mo’maw’ ngorad ni nga rogned e danga’. Mu lemnag David nge denen rok ni darngal ni kara rin’ew Bath-sheba. Bochan e re n’em me yim’ e bitir rorow nbochan e kireb ka ra rin’ew maku ke yim’ e pumoon rok Bath-sheba, ni yow l’agruw e dar buchegew ban’en. (2 Samuel 11:1-27; 12:15-18) Ara mu lemnag Paul ni apostal, ni de maruwaran’ ni nge yog ni gaar: “Dagur rin’ e tin nib fel’ ni ir e gub adag ni nggu rin’, machane gu be rin’ e tin nib kireb ni ir e dabug ni nggu rin’.” (Roma 7:19) Gur yu ngiyal’ e ga ma thamiy ni aram rogom fa? Me ulul Paul ngay ni gaar: “Lanin’ug e ri baadag fare motochiyel rok Got. Machane reb e motochiyel nib thil ko biney e gu be guy ni maruwel u fithik’ag reb e motochiyel ni be togopuluw ko bin baaram e motochiyel ni baadag lanin’ug. Ir e ke tiyeg ni gag e kalbus ko tin ni baadag e denen ni ir e be maruwel u fithik’ag. Ere kar gu gafgow! I mini’ e ra chuwegeg u pa’ e re dowef ney ni ir e be fekeg i yan ko yam’?” (Roma 7:22-24) Tin ni dag e Bible e susun ra gelnag e tin ni ke dugliy lanin’dad ni dabda talgad ngad athamgilgad ni ngeb gelngidad ma rayog ni ngarda t’ared lanin’dad.

T’ar Laniyan’, Ban’en ni Susun Ngan Fil Rogon

3. Mu weliy ko mang fan ni mo’maw’ ni ngad t’ared lanin’dad?

³ T’ar laniyan’, nib muun ngay gelngin ni nga nog e danga’, e kan yoloy ko 2 Peter 1:5-7 ni kan uneg ko michan’, nge ngongol nib fel’, nge tamialngan’, nge kadan’, nge ngan yul’yul’ ku Got, nge runguy ko walag, nge t’ufeg. Dariy reb ko fapi felngin ney ni yug ma sum rok u nap’an ni kan gargelnag be’. Thingarni maruweliy ma fini yog. Rogon ni ngan dag e re n’eney nib tamilang e ba t’uf e lem nib mudugil nge maruwel. Ere gur ba puluw ni ngad lemnaged nib mom ni ngan t’ar lanin’uy fa?

4. Mang fan ni boor e girdi’ e yad be lemnag ni dariy e magawon rorad ko t’ar laniyan’, machane ireray e pow ko mang?

⁴ Riyul’, ni sana bokum million e girdi’ ni be lamnag ni dariy e magawon rorad ko t’ar laniyan’. Par rorad e yugu yad be rin’ e tin yad baadag, ndemtrug ko yad manang ara dar nanged ni yad be fol ko tin baadag dowrad ni de flont ma dar fal’eged i lemnag angin ni ra yib​—ngorad riy ara ngak yugu boch e girdi’. (Jude 10) Fare magawon ndariy gelngin gelngin e girdi’ ni nge yog e danga’ e ke gagiyel e chiney ko kakrom. Biney e be dag ni riyul’ ni gad be par ko “tin tomuren e rran” ni i weliy Paul murung’agen u nap’an ni yog ni gaar: “Bay yib e rran ni ri bayi mo’maw’ e par ko girdi’. Ya girdi’ e goo yad e yad be lemnagrad, ma kari t’uf e salpiy, ma kan ufanthin, ma kan tolngan’, ma yibe t’ar e thin nga daken be’, . . . ma dariy e t’ar laniyan’.”​—2 Timothy 3:1-3.

5. Mang fan ni Pi Mich Rok Jehovah e kara adaged e kenggin murung’agen e t’ar laniyan’, ma mang e fonow ni ku ra fel’?

⁵ Pi Mich Rok Jehovah e ri yad manang e magawon ni aram rogon ma ba t’uf ni ngan t’ar lanin’uy. Bod rogon Paul, ma yad manang e cham u thilin e lem ni yi baadag ni ngan falfalan’nag Got ngar folgad ko tin ni baadag nge fare kanawo’ ni dowrad ni de flont e baadag ni nga ranod riy. Bochan e re n’ey e ke n’uw nap’an ni yad baadag ni ngar nanged ko uw rogon ni ngar gelgad ko re cham ney. Ra ngan sul ko duw ni 1916, ma reb e issue ko fare babyor ni ga be bieg e chiney e ke weliy murung’agen “fare kanawo’ nib fel’ ni nga darod riy ni fan ni rayog ni ngad gagiyegniged gadad, nge lanin’dad, nge thin rodad nge ngongol rodad.” Kan weliy ko re ke babyor nem ni dabni pagtalin e thin ni bay ko Filippi 4:8. Fare fonow ko re verse ney ni yib rok Got e ka be par ni kab fel’ rogon nge mada’ko chiney, nyugu aram rogon ni kan pi’ ni sogonapan 2,000 e duw kakrom ma ri mo’maw ni ngan fol riy e chiney ni ra ngan taarebnag ko ngiyal’ i nem ara duw ni 1916. Yugu aram rogon, ma piin Kristiano e kar athamgilgad ni nga rogned e danga’ ko tin ni be yim’ e girdi’ nu fayleng nbochan, ma yad manang ni faanra ngar yodoromgad, ma gowa yad be yog e arrogon ngak e en Ta Sunmiy.

6. Mang fan ni dariy tapgin ni nge m’ay e athap rodad u nap’an ni gad be maruweliy ni ngada t’ared lanin’dad?

⁶ T’ar laniyan’ e kan weliy murung’agen ko Galatia 5:22, 23 ni bang ko “woom’engin fare kan ni [thothup].” Faan gad ra dag e re felngin ney nib muun ngay e “t’ufeg, nge falfalan’, nge gapas, nge gum’an’, nge gol, nge fel’ ngak e girdi’, nge michan’, [nge] sumunguy,” ma rra fel’ rogodad riy. Ra ngan yodorom ma ra ayuwegdad, nrogon ni weliy Peter, ni dab kuuda “talgad ara dabki yib woom’ngidad” ko pigpig ku Got. (2 Peter 1:8) Machane thingari dabi mulan’dad ara ngad turguyed e kireb nga dakendad nfaanra de yog rodad ni ngad daged e pi felngin ney nib papey nge polo’ nrogon ni gad baadag. Sana kam guy u skul reb e bitir nib papey ni nge mit ban’en ngak ma reb e danga’. Ara u tabon e maruwel ma be’ e ba papey ni nge fil rogon reb e maruwel nib biech ko yugu boch e girdi’. Maku, boch e girdi’ e ba papey ni ni ngar filed rogon ni ngar daged e pi felngin e Kristiano ney ngak yugu boch e girdi’. Tin baga’ fan e nguuda gayed rogon ni ngad maruweliyed e pi felngin Got ney nrogon nrayog rodad. Rayog ni ngada rin’ed ban’en ni aram rogon nfaan gad ra fanay ni nge mus rogodad riy e ayuw rok Jehovah u daken e Thin rok nge ulung rok. Rogon ni feni pey ni ngad mu’naged e tin ni gad be nameg e gathi rib ga’fan ni ra ngan taarebnag ko athamgil ni nguuda mon’oggad i yan.

7. Mang e be dag ni baga’ fan e t’ar laniyan’?

⁷ Yugu aram rogon ni t’ar laniyan’ e bin tomur ni kan yoloy ko boch e felngin ni ke yibnag fare kan ni thothup, ma gathi ban’en de ga’ fan ni ra ngan taarebnag nga boch e pi felngin. Rib ga’ fan e re n’ey. Dabda paged talin ni urngin “tin nib kireb ni yima ar’arnag” e rayog ni da paloggad riy nfaanra bay gelngidad ni ngad t’ared lanin’dad. Yugu aram rogon, ma girdi’ ndawori flont e papey ni ngar uned nga boch ban’en “ni yima ar’arnag ni . . . , ngongol ni darngal, nge ngongol ni golong, nge ngongol ni puwlag, nge ta’fan nge meybil ngak e liyos ni ma meybil boch e girdi’, nge cham ni yad be tay, nge awan’, nge damumuw, nge athmgiliy ban’en ni fan e gur faanem e nga nog e sorok ngom. Ma yad be wer ngar yuraba’gad ara ra yuulunggad.” (Galatia 5:19, 20) Ere thingar dabda talgad nguuda chamgad ngay, ya kada dugliyed lanin’dad ni ngad chuweged e tin kireb u lan gum’irchadad nge lanin’dad.

Boch e Kaygi Mo’maw’ Ngorad ni Ngar T’ared Lanin’rad

8. Bochan e mang ni rib mo’maw’ ko yugu boch e girdi’ ni ngar t’ared lanin’rad?

⁸ Boch e Kristiano e rib mo’maw’ ngorad ni ngar t’ared lanin’rad ni ra ngan taarebnag ngak yugu boch e girdi’. Mang fan? Rayog ni bochan e tin ke buch ko yafas rorad kafram. Faanra be m’ug ni dariy e magawon rodad ko ngan maruweliy min dag e ngongol ni ngan t’ar lanin’uy, ireray reb i fan ni ngad falfalan’gad. Machane thingarda daged e runguy ngak e piin ni rib mo’maw ngorad ni ngar daged e re ngongol ney, nyugu aram rogon ni kad magawongad nbochan dar t’ared lanin’rad. Bochan gadad e daworda flontgad, ma mini’ arodad e bay tapgin ni nge mat’awonnag ir?​—Roma 3:23; Efesus 4:2.

9. Mang e ba meewar rok boch e girdi’, ma wuin e yira gel ko pi meewar ney?

⁹ Ngan fanathinnag: Sana gad manang ni boch e walag ni Kristiano ni kar talgad ko tamagow ara drugs ni ma “thiliyeg lanin’uy” e rayog ni yu ngiyal’ e ku ma yib ngorad e lem ni ri yad baadag ni ngar sulod ngay biyay. Ara mo’maw’ ku boch e girdi’ ni ngar lichnaged e ggan ni ngar ked nge alkul ni nga ra unumed. Ma boch e girdi’ e mo’maw’ ngorad ni ngara gagiyegnaged blowthrad, arfan ni yad ma oloboch ko thin rorad. Rogon ni ngan gel ko pi magawon ni aram rogon e ba t’uf ni ngan maruweliy u fithik’ e pasig nge gel e t’ar laniyan’. Mang fan? Ya James 3:2 e yog e tin riyul’ ni gaar: “Gadad gubin ni baga’ ni gadad ma oloboch. Cha’ nder ma oloboch ko tin ma yog e be’ nrib yal’uw, ni ku rayog rok ni nge gagiyegnag ir.” Boch e girdi’ e ka bay e lem rorad nib gel ni ngar uned ko gosgos ni ma fek e salpiy ara gamble. Ara mo’maw’ ngorad ni ngar gagiyegnaged e damumuw rorad. Rayog ni ra n’uw nap’an ni ngan fil rogon mfini rayog ni ngan gel ko angin e magawon ni aram rogon ara boch nib chuchugur ni nge taareb rogon ngay. Yugu aram rogon ni rayog ni ngada mon’oggad e chiney, ma ar’ar nib kireb e ra chuw ni manemus ni kemus ni nap’an ni kada flontgad. Chiney, gad ra maruweliy e t’ar laniyan’ ma ra ayuwegdad ni dab kuda sulod ko yafas nib sug ko denen. Chiney ni ka be ulul e cham i yan, e ngadad ayuweged boch i gadad ni nge dabra talgad.​—Acts 14:21, 22.

10. (a) Mang fan ni rib momaw’ ko yugu boch e girdi’ ni ngar t’ared lanin’rad ko par ko pumoon nge ppin? (b) Mang e thil nib ga’ ni ke tay reb e walagdad ni pumoon? (Mu guy e kahol ni bay ko page 22.)

¹⁰ Maku reb nib mo’maw’ rok yugu boch e girdi’ ni ngar t’ared lanin’rad riy e par ko pumoon nge ppin. Par ko pumoon nge ppin e ir bang uw rogon ni ke sunmidad Jehovah Got. Yugu aram rogon, ma boch e kub mo’maw’ ngorad ni ngara uned ngay nrogon nib puluw ko tin baadag Got. Ma rayog ni ra gel e magawon rorad riy ya bochan rib gel e ar’ar ko par ko pumoon nge ppin. Gad be par u ba fayleng ni ar’ar ko par ko pumoon nge ppin e rib gel ma yibe k’aring e ar’ar nib kireb u boor e kanawo’. Ireray e n’an ni ma pi’ e magawon ngak e piin Kristiano ni yad baadag ni ngar pared nib muchugbil​—u lan e tayim ni ba’ n’umngin nap’an—​ni fan ni ngar pigpiggad ku Got ndariy e magawon riy ko mabgol. (1 Korinth 7:32, 33, 37, 38) Machane rogon nib puluw ko motochiyel u Bible ni faanra “dabkiyog ni ngam k’adendan’med, me ere mu uned ko mabgol,” sana yad ra dugliy ni ngar mabgolgad, ni ku aray e n’en nib fel’. Maku, ke mudugil lanin’rad ni ngar mabgolgad ni “kemus nu lan e ulung rok Somol,” ni rogon ni be fonownag e Bible. (1 Korinth 7:9, 39, NW) Ke mudugil lanin’dad ni ra falfalan’ Jehovah ko lem rorad ni ngar tolangniged kenggin e motochiyel rok nib mat’aw. Ma ra falfalan’ e pi walagrad u lan e ulung ni ngar chaggad ngak e pi tapigpig nib riyul’ ni aram rogon e ngongol rorad nge yul’yul’ rorad.

11. Uw rogon ni rayog ni ngad ayuweged reb e walag ni pumoon ara ppin ni baadag ni nge un ko mabgol machane dawori yog?

¹¹ Uw rogon ni faanra dabi pirieg be’ e en ni nge mabgol rok nib fel’? Mu susunnag uw feni gel e kankanan’ ni ngeb ngak be’ ni baadag ni nge un ko mabgol machane de yog rok ni nge yodor! Sana ke guy e pi fager rok ni kar mabgolgad me yog ngorad e falfalan’ riy, ma ir e ka be gay be’ ni nge mang ani mabgol rok nib fel’. Ma boch e girdi’ ni bay e magawon rorad ni aram rogon, e ka be par ni yad ma un ko masturbation ni aram e ngongol nib alit. Yugu demtrug e magawon, ma dariy reb e Kristiano ni baadag ni nge kireban’nag e piin ni be athamgil ni nge par nib machalbog. Rayog ni ngada mulan’naged be’ ni dada lemnaged nfaan gad ra yog ni, “Wuin e ngam un ko mabgol?” Sana ka nog ngathi bochan ni ngan kirebnag be’, machane kab fel’ ni ngada daged ni gad be t’ar lanin’dad u kanawo’ ni gad be gagiyegnag blowthdad! (Psalm 39:1) Piin ni ba’ u fithik’dad ni yad be par nib machalbog ndawora uned ko mabgol e bay rogorad ni nga dogned e thin nib fel’ ni fan ngorad u fithik’ e yul’yul’. Dab dogned e thin ni ra mulan’nigey, ma ngada athamgilgad ni ngada rin’ed ban’en ni ra pi’ e athamgil nga lanin’uy. Ni bod ni, rayog ni ngada athamgilgad ni ngada uneged e piin ni dawora mabgolgad u nap’an ni reb e ulung ko piin ni kar ilalgad e ngar fal’eged e abich ara ngan chag u taabang.

T’ar Laniyan’ u Lan e Mabgol

12. Mang fan ni piin kar uned ko mabgol e kub t’uf rorad ni ngar t’ared lanin’rad?

¹² Ngan un ko mabgol e gathi be yip’ fan ni daki t’uf e t’ar laniyan’ ni fan ko par ko pumoon nge ppin. Ni bod ni, sana rib thil rogon nib t’uuf rok e en figirngiy nge en leengiy e par ko pumoon nge ppin. Ara yu ngiyal’ ma bochan e magawon ko m’ar rok e ani mabgol ma sana mo’maw’ ara dabiyog e par ko pumoon nge ppin. Sana bochan e n’en ni buch kafram, ma mo’maw’ ko ani mabgol ni nge fol ko motochiyel ni gaar: “En ni pumoon e nge pi’ ir ngak e ppin rok nrogon figirngiy, ma en ni ppin e nge pi’ ir ngak e pumoon rok nrogon leengiy.” Magawon ni aram rogon, ma ba t’uf rok e ani mabgol rok ni nge t’ar laniyan’ nib gel boch. Machane yow l’agruw ma rayog ni ngar tew nga lanin’row e fonow ni pi’ Paul u fithik’ e t’ufeg ngak e Kristiano ni kar mabgolgad ni gaar: “Ra ba wu’ e mabgol ma dabi tel bagayow, kemus ni faanra ke taareban’row ngay ni ngar talgow u rogon n’umngin nap’an ni yow baadag, ni fan e nge yog nra tewan’row ko meybil; me mu’ mi yow sul ngkur rin’ew e n’en ni ma rin’ e mabgol, ya ri fek Satan ban’en i yib ngak bagayow, ni ban’en nrayog ni nge pingeg faanem nge denen, ni bochan e dabkiyog rok faanem ni nge k’adan’.”​—1 Korinth 7:3, 5.

13. Mang e rayog ni ngad rin’ed ni fan ko piin ni yad be athamgil ni ngar t’ared lanin’rad?

¹³ Rib falafalan’ e wu’ i mabgol ni faanra yow l’agruw e kar filew rogon ni ngar t’arew lanin’row ko rogon e par ko pumoon nge ppin nib fel’. Maku thingara daged e runguy rorad ngak e pi walagrad ni ka yad be athamgil ni ngar daged e re n’eney. Thingar dabda paged talin ni ngad yibiliyed ni nge pi’ Jehovah gelngin i nang fan ban’en ngak pi walagdad u lan e ulung, ma dabra rusgad, ma nge mudugil lanin’rad ni nguur ululgad ko cham ngar daged e t’ar laniyan’ ma ra rin’ed ban’en ni fan ni ngar gelgad ko ar’ar nib kireb.​—Filippi 4:6, 7.

Nguum Ayuweged Gimed

14. Mang fan nib t’uf ni ngad daged e runguy nge gonop ngak e pi walagdad ni Kristiano?

¹⁴ Yu ngiyal’, e sana mo’maw’ rodad ni ngad nanged fan e pi walagdad ni Kristiano ni yad be athamgil ni ngar t’ared lanin’rad ko n’en ni dariy e magawon rorad riy. Machane girdi’ e ba thilthil pangirad. Boch e girdi’ e mmom i gagiyegnag e lem rorad; ma boch e danga’. Boch e girdi’ e mom ngorad ni ngar gagiyegnaged e lem rorad, ma aram e dariy e magawon rorad ko t’ar laniyan’. Ma boch e rib mo’maw’ ngorad. Machane dab mu pagtalin ni be’ ni be athamgil e de kireb. Pi walagdad ni Kristiano e ba t’uf ni ngan dag e runguy ngorad. Falfalan’ rodad e ba muun ngay nfaan gad ra ulul i dag e runguy ngak e piin ni ka yad be athamgil ni ngar gelnaged boch rogon ni yad ma t’ar lanin’rad. Rayog ni ngada guyed e re n’em ko thin rok Jesus ni bay ko Matthew 5:7.

15. Mang fan ni thin ni bay ko Psalm 130:3 e be fal’eg lanin’uy ko magawon ko ngan t’ar lanin’uy?

¹⁵ Dabda oloboch gad ngad turguyed e kireb nga daken reb e walag ni Kristiano ni yu ngiyal’ e de yog rok ni nge dag pangin e Kristiano. Ri be pi’ e athamgil nga lanin’da ni ngada nanged ni gathi kemus ni ba’ biyay ni ke guydad Jehovah ni de yog rodad ni ngada t’ared lanin’dad, ya ke guydad ni dad t’ared lanin’dad ni boor yay nyugu aram rogon ni de nang e pi walagdad e pi n’em. Ri ma fal’eg lanin’uy ni ngan lemnag e thin ni bay ko Psalm 130:3: “Faan mang e mu tay ngan’um e kireb ni gamad be rin’, me mini’ e rayog rok ni nge thay ndab gechignag?”

16, 17. (a) Uw rogon ni ngad folgad ko Galatia 6:2, 5 ni ngan ta’ fan e t’ar laniyan’? (b) Mang e migid ni ngad lemnaged u murung’agen e t’ar laniyan’?

¹⁶ Gadad ni be’ nge be’ e thingarda maruweliyed nge yog ni ngada t’ared lanin’dad ma rayog ni ngad falfalan’naged Jehovah, machane ba mudugil ni pi walagdad ni Kristiano e ra ayuwegdad. Yug aram rogon ni rabagadad ma susun nge rin’ e maruwel rok nib mil fan ngak, kan fonownagdad ni ngada ayuweged bochi gadad ni fan ni ngad gelgad ko tin ni gad ba meewar riy. (Galatia 6:2, 5) Ngada ted fan e gallabthir rodad, nge ani mabgol rodad, ara fager rodad ni ke talegdad ni dab darod ko gin’en ni thingar dab darod ngay, ngad guyed e tin ni thingar dabda guyed. Be ayuwegdad ni ngada daged t’ar laniyan’, fare gelngin ni nga nog e danga’ ma ngam yul’yul’ ngay.

¹⁷ Sana boor e Kristiano nib puluw u wan’rad e tin kad weliyed e chiney u murung’agen e t’ar laniyan, machane sana yad be lemnag ni ka bay boor ban’en ni thingara maruweliyed ngar mon’oggad boch riy. Yad baadag ni ngar t’ared lanin’rad u polo’ i gelngirad nrogon ni nge taw nga rogon ni yad be lemnag ni rayog rok be’ ni de flont fa? Ere, mang e rayog ni ngam rin’ ni fan ni ngam maruweliy ngam gel boch ko re woom’engin e kan ni thothup ney? Ga ra rin’ e re n’ey ma uw rogon ni nge ayuwegem ngam lebuguy e n’en ni ga be nameg ni gur reb e Kristiano? Ngada guyed ko bin migid e article.

Ka Gamanang?

Mang fan ni t’ar laniyan’ . . .

• e baga’ fan ko Kristiano ni nguur maruweliyed?

• ba mo’maw’ ngak boch e girdi’?

• e ba t’uf ko mabgol?

• reb i felngin nrayog ni ngada ayuweged bochi gadad nge maruweliy?

[Box/Picture on page 22]

Ke Fil Rogon ni Nge Yog e Danga’

Reb e Pi Mich rok Jehovah ni ma par u Chiyamen e ke un ko maruwel n reb e technical communications clerk. Maruwel rok e ba muun ngay ni nge matanagiy 30 e program ko television nib thil thil. Nap’an ni yib e magawon, ma thingari yaliy fare program nib fel’ rogon ma rayog ni nge pirieg e magawon. I yog ni gaar: “Baga’ ni ma yib e magawon ko ngal’an ni de puluw, nap’an ni yibe pag e kachido murung’agen e ngongol ni dariy e runguy ara murung’agen e par ko pumoon nge ppin. Fare kachido nib kireb e gowa ke par u lulgeg u lan boor e rran fa in e wik, ni bod ni ke mit ko man’ey rog.” Ke yog ni re n’ey e ke kirebnageg ko tirok Got me yog ni gaar: “Gu ma par ni gub damumuw, re kachido nem ni murung’agen e ngongol ni dariy e runguy riy e ke mo’maw’nag ni nggu t’ar lanin’ug. Ma kachido ni murung’agen e par ko pumoon nge ppin e ke k’aring e magawon u thilmow e ppin rog. Re n’em e gubin e rran ni be gu be chamnag. Ma rogon ni nggu gel mug dugliy ni nggu gay reb e maruwel nib biech nyugu ra ba sobut’ puluwon. Dawori n’uw nap’an fram ma kug pirieg yugu reb e maruwel. Ke riyul’ e n’en ni kug athapeg ni nge yib.”

[Pictures on page 21]

Tamilangan’ ni ma yog ngodad ko fol Bible e ma ayuwegdad nge yog rodad e t’ar laniyan’