‘Gimed Fil Ngorad Rogon Ni Nguur Folgad U Gubin E Tin Ni Ku Gog Ngomed Ni Nguum Rin’ed’

“Mmarod ngak girdien e pi nam u gubin yang ngam pingeged yad ngar manged pi gachalpeg . . . mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.”​—MATTHEW 28:19, 20.

1. Mang e thin rok Philip nge fare moon nu Ethiopia?

FARE moon nu Ethiopia e ke milekag ni ba n’uw yang nga Jerusalem. Me meybil ngak Got u rom ya rib t’uf Jehovah rok. Dabi siy ni ku ba t’uf e Thin Rok Got rok. Ya nap’an ni be sul ko nam rok ni be yan u karro ni be girngiy e os ma be bieg e babyor rok Isaiah ni profet, me yib Philip ni reb e gachalpen Kristus ngak. I fith Philip ngak facha’ nu Ethiopia ni gaar: “Mog, ga be nang fan e pi n’ir ni ga be beeg?” Me fulweg fare moon: “Uw rogon mu gu nang fan ni faanra dabi weliy be’ fan ngog?” Me ayuweg Philip e cha’ ney nib yul’yul’ ni ma fil e Thin nib Thothup ni nge mang reb e gachalpen Kristus.​—Acts 8:26-39.

2. (a) Mang fan ni baga’ fan e fulweg rok faanem nu Ethiopia? (b) Mang boch e deer u morngaagen e motochiyel rok Kristus ni gad ra weliy?

² Ba ga’ fan e n’en ni yog facha’ nu Ethiopia. Ya ke gaar faram: “Uw rogon mu gu nang fan ni faanra dabi weliy be’ fan ngog?” Arrogon, ba t’uf rok be’ ni nge ayuweg, ara nge fil e kanawo’ ngak. Thin rok facha’ e ke tamilangnag e n’en ni yog Jesus faani tay chilen ni ngan ayuweg e girdi’ ni ngar manged pi gachalpen. Mang e ke tay chilen? Ngada weliyed e thin rok Jesus u Matthew guruy ni 28 ya ngada nanged e fulweg ko re deer ney. Fa binem e thin ni kada weliyed ko fa binem e wik e ke weliy e fulweg ko fagali deer ni mang fan? nge u uw? Chiney e gad ra weliy yugu l’agruw e deer ni ke l’ag ko motochiyel rok Kristus ni ngan ayuweg e girdi’ ni ngar manged pi gachalpen Jesus​—ni aram e mang? nge wuin?

“Gimed Fil Ngorad Rogon Ni Nguur Folgad U Gubin E Tin Ni Ku Gog”

3. (a) Uw rogon nra mang be’ reb i gachalpen Jesus Kristus? (b) Mang e gad ra fil ngak e piin ni gad be ayuweg ni ngar manged pi gachalpen Jesus?

³ Mang e thingar da filed ngak e girdi’ ya ngar manged pi gachalpen Kristus? I tay Jesus chilen ngak pi gachalpen ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare kan ni thothup mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Ere thingar da filed ngorad fapi n’en ni ke tay Kristus chilen.a Mang e ra ayuweg be’ ni ke fil e pi motochiyel rok Jesus ni nge mang reb e gachalpen ma ngii par ni ir reb e gachalpen? Ban’en ni ba ga’ fan e ke m’ug ko thin rok Jesus. Gathi ke mus ni ke yog: “Gimed fil ngorad gubin e tin ni ku gog ngomed ni nguum rin’ed.” Ya ke gaar: “Gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 19:17) Mang fan e thin rok?

4. (a) Mang e ra rin’ be’ ni be fol nga reb e motochiyel? (b) Mu weliy rogon ni gad ra fil ngak be’ rogon ni nge fol ko pi motochiyel rok Kristus.

⁴ Ngam fol ko reb e motochiyel e be yip’ fan ni nge “puluw e maruwel rom” ko fare motochiyel. Uw rogon ni gad ra fil ngak be’ ni nge fol ko pi n’en ni ke tay Kristus chilen? Amu lemnag rogon ni yima fil e yan u karro ngak be’. Rayog ni ngan fil e motochiyel ko yan u kanawo’ ngak be’ u lan reb e skul. Machane nap’an ni ra fil rogon ni nge fol ko pi motochiyel nem ma yira ayuweg faanem ni nge yan u karro ma nge athamgil ni nge rin’ e pi n’en ni ke fil. Maku arrogon e n’en ni gad ra rin’ u nap’an ni gad ra fil e machib nu Bible ngak e girdi’ ni gad ra fil e pi motochiyel rok Kristus ngorad. Machane ku gad ra ayuwegrad ni ngar folgad ko thin rok Kristus ko pi n’en ni yad ra rin’ ko yu rran ma ngar folgad ngay u nap’an ni yad ra wereg e machib. (John 14:15; 1 John 2:3) Ere nap’an ni gad ra fol ko motochiyel rok Kristus ni ngada ayuweged e girdi’ ni ngar manged pi gachalpen Jesus ma gad ra skulnagrad ma gad ra pow’iyrad. Arrogon ni gad ra folwok rok Jesus nge Jehovah.​—Psalm 48:14; Revelation 7:17.

5. Sana mang fan nra magawon be’ ni nge fol ko motochiyel rok Kristus ni ngan ayuweg yugu boch e girdi’ ni ngar manged pi gachalpen?

⁵ Faan gad ra ayuweg e girdi’ ni ngar folgad ko pi motochiyel rok Jesus ma gad ra ayuwegrad ni ngar folgad ko fare motochiyel ni ngar ayuweged yugu boch e girdi’ ni ngar manged pi gachalpen Jesus. Ra mo’maw’ rok boch e girdi’ ni gad ma fil e Bible ngorad ni ngar uned ko re maruwel nem. Mus ni faanra kar uned ko barba’ i teliw nu Kristendom ka faram ma dabi siy ni dan fil ngorad ni ngar machibnaged e girdi’ ya ngar manged pi gachalpen Jesus. Ma yog e pi tayugang’ ko pi yurba’ i teliw nu Kristendom ni ri dar filed ngak girdien raba’ i teliw rorad ni ngar wereged fare thin nib fel’. Be’ ni John R. Stott fithngan e ke weliy morngaagen e motochiyel rok Jesus ni ngan ayuweg urngin miti girdi’ ni ngar manged pi gachalpen me gaar: “Ke gel e oloboch romad e pi Kristiano ni bochan e dagur folgad ko fare motochiyel ni ngan wereg fare thin nib fel’.” Miki gaar: “Gamad ma wereg e machib romad ni gamad ba palog rok e girdi’. Gamad bod be’ ni be par u dap’e l’ay ni be tolul ni be weliy ngak be’ ni be n’en ni nge limach e n’en ni nge rin’ ya nge dabi limach. Dagur oggad nga maday ni ngan ayuweg. Ya gamad ba tamdag ngay ni nggu munurgad.”

6. (a) Uw rogon nrayog ni ngada folwokgad rok Philip u nap’an ni gad be ayuweg be’ ni be fil e Bible? (b) Uw rogon ni gad ra ayuweg be’ ni be fil e Bible ni ka fini tabab i machib u mit e tabinaw?

⁶ Faanra gad be fil e machib ngak be’ ni ke un nga barba’ I teliw ka faram ma girdien raba’ i teliw nem e yad “ma tamdag ngay ni ngar munurgad” ma sana ra mo’maw’ rok ni nge dabi tamdag ma nge fol ko motochiyel rok Kristus ni nge ayuweg yugu boch e girdi’ ni ngar manged pi gachalpen Kristus. Thingar ni ayuweg. Ere thingar da gum’an’gad ma gad ra fil e machib ngak ni ra gelnag e michan’ rok ma re ayuw ney e ra n’igin ni nge un ko maruwel, ni bod rogon ni machib rok Philip e ke ayuweg faanem nu Ethiopia ni nge un ko taufe. (John 16:13; Acts 8:35-38) Ma bochan e gad ba adag ni ngada filed e machib ngak e pi Bible study rodad e gad ra un ngorad i wereg e machib u nap’an ni yad ra yan ko machib u mit e tabinaw ko yay nsomm’on ya gad ra pow’iyrad.​—Ecclesiastes 4:9, 10; Luke 6:40.

“Gubin E Tin Ni Ku Gog Ngomed”

7. Mang boch e motochiyel nib muun nga “urngin ban’en” ni gad ra fil ngak yugu boch e girdi’?

⁷ Gathi ke mus ni ngada ayuweged pi gachalpen Jesus ni ngar ayuweged yugu boch e girdi’ ni ngar manged pi gachalpen. Ya i tay Jesus chilen ngodad ni ngada filed ngak yugu boch e girdi’ “rogon ni ngar folgad u gubin e tin” ni ke yog Jesus ni nguun rin’. Ma ke un ngay fagali motochiyel ni th’abi ga’ fan​—ni aram e nge t’uf Got rodad ma nge t’uf e girdi’ rodad. (Matthew 22:37-39) Uw rogon ni gad ra ayuweg e piin ni ka fin ra uned ko machib ni ngar folgad ko gali motochiyel ney?

8. Mu weliy rogon nrayog ni ngan ayuweg be’ ni ka fini tabab ko machib ni nge dag e t’ufeg?

⁸ Amu tafinaynag rogon ni yima fil e yan u karro ngak be’. Ani be fil e yan u karro e ra yan u kanawo’ ni bay e sensey rok u tooben, ma gathi ke mus ni be motoyil ko thin rok e sensey rok ya ku be yaliy yugu boch e girdi’ ni yad be yan u karro. Susun, be yog e sensey rok ni nge yaliy be’ ni ba gol ya ke pag yugu reb e karro ni nge m’on, ara ke n’igin e magal u karro rok ya nge dabi magawonnag yugu boch e girdi’, ara be’ ni ke taleg e karro rok ya nge ayuweg yugu reb e karro ni ke magawon. Ke yaliy faanem ni be fil e yan u karro e pi girdi’ ney ma boor ban’en nrayog ni nge fil rorad. Maku arrogon be’ ni ka fini mang reb e gachalpen Jesus ni ra fil e machib ko sensey rok maku ra yaliy girdien e ulung nge kanawo’ rorad nib fel’.​—Matthew 7:13, 14.

9. Uw rogon nra fil be’ ni ka fini un ko machib rogon ni nge dag e t’ufeg?

⁹ Susun, ani be fil e Bible e ra yaliy reb e llabthir ni be athamgil ni nge un ko muulung ni be un pi fak ngak. Ma sana ra guy be’ ni ke kireban’ machane ka be un ko muulung ni yugu aram rogon ni be magawon laniyan’, ara sana ra guy reb e ppin ni ke pilibthir ni ke yim’ e pumoon rok machane ma ayuweg yugu boch e girdi’ ni ngar uned ko karro rok nga ranod ko muulung, ara sana ra yaliy be’ nib fel’ yangaren ni be un i klinnag e Kingdom Hall. Sana ra yaliy faanem ni be fil e Bible reb e piilal ko ulung ni be un ko machib u mit e tabinaw ni yugu aram rogon ni boor e maruwel rok u lan e ulung. Ma sana ra mada’ reb e Mich Rok Jehovah nib m’ar ma thingari par u tabinaw machane ma pi’ e athamgil nga laniyan’ e piin ni yad ma yan nga tafen. Ara sana ra yaliy faanem ni be fil e Bible l’agruw e mabgol ni kar thilyegew rarogon e yafas rorow ya ngar ayuwegew e gallabthir rorow ni kar pilibthirgad. Be yaliy e pi Kristiano ney ni yad ba gol ma yad ma pi’ e ayuw ma rayog ni ngan pagan’uy ngorad, ma faanem ni ka fini mang reb e gachalpen Jesus e ke fil ko kanawo’ rorad rogon ni ngan fol ko motochiyel rok Kristus ni nge t’uf Got nge girdi’ rodad, ni baga’ ni girdi’ rodad ni ke mich u wan’rad. (Proverbs 24:32; John 13:35; Galatia 6:10; 1 Timothy 5:4, 8; 1 Peter 5:2, 3) Arrogon ni rayog rok gubin girdien e ulung ni Kristiano ni ngar manged sensey​—ma susun ni ngar manged sensey nge ta ayuw.​—Matthew 5:16.

“Nge Yan I mada’ Nga Tomren E Fayleng”

10. (a) Uw n’umngin nap’an ni gad ra ayuweg yugu boch e girdi’ ni ngar manged pi gachalpen Jesus? (b) Mang kanawo’ ni ke dag Jesus ngodad u rogon ni ngada rin’ed e maruwel rodad?

¹⁰ Thingar da ayuweged e girdi’ ni ngar manged pi gachalpen Jesus nge mada’ ko mang ngiyal’? Ngan rin’ u n’umngin nap’an e ngiyal’ ko tomur.(Matthew 28:20) Rayog rodad ni ngada rin’ed fare maruwel ni ke tay Jesus chilen ngodad, fa? Ke mudugil u wan’dad ni ngada rin’ed ni gadad reb e ulung u fayleng iyan. U lan fapi duw ni ke yan e kada pied e tayim rodad nge gelngidad, nge tirodad ban’en ni fan e ngan gay e piin ni “yad ba adag e yafas ni dariy n’umngin nap’an.” (Acts 13:48) Chiney e ma machib e Pi Mich Rok Jehovah ma yad ma ayuweg e girdi’ ni ngar manged pi gachalpen Jesus ni ke pag dalip million e awa u gubin e rran ko yu duw u fayleng iyan. Gad ma rin’ ni bochan e gad ma folwok rok Jesus. Be gaar: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog n nggu muruweliy.” (John 4:34) Aram e n’en ni gad ba adag ni ngada rin’ed. (John 20:21) Gathi ke mus ni ngada uned ko fare maruwel ni ke pi’ ngodad ni ngada rin’ed; ya gad ba adag ni ngada mu’naged.​—Matthew 24:13; John 17:4.

11. Mang e ke buch rok boch e pi walagdad ni Kristiano, ma mang deer e ngada fithed gadad?

¹¹ Machane ke kireban’dad ni bochan e gad be guy boch e girdi’ rodad ni ke mich u wan’rad ni ke meewar e michan’ rorad ma kar sagaalgad ara kar talgad i fol ko motochiyel rok Kristus ni ngan ayuweg e girdi’ ni ngar manged pi gachalpen. Bay ban’en ni rayog ni ngada rin’ed ni ngada ayuweged e pi girdi’ ney ni ngar sulod ko ulung ma ngar ayuweged yugu boch e girdi’ e ngar manged pi gachalpen Jesus, fa? (Roma 15:1; Hebrews 12:12) Rogon ni ayuweg Jesus e pi apostal rok u nap’an ni kar meewargad e ke tamilangnag e n’en ni rayog ni ngada rin’ed e ngiyal’ ney.

Ngada Runguyed Yad

12. (a) Mang e rin’ e pi apostal u m’on ni yim’ Jesus? (b) Uw rogon e ngongol rok Jesus ngak e pi apostal ni yugu aram rogon ni kar meewargad?

¹² Nap’an ni ke chugur ni nge m’ay e maruwel rok Jesus u fayleng ma ke chugur ko ngiyal’ ni nge yim’, ma pi apostal rok e “kar paged kar milgad.” Aram e n’en ni yog Jesus u m’on riy ni yad ra rin’ ya “kar wergad nra bagayad me yan nga tafen.” (Mark 14:50; John 16:32) Uw rogon e ngongol rok Jesus ngak e pi tafager rok ni ke meewar e michan’ rorad? De n’uw nap’an u tomren ni ke fas ko yam’ me yog ngak boch i gachalpen ni gaar: “Dab mu tamdaggow, marow nga mognew ngak pi walageg nga ranod nga Galile, ya bay ra guyed gag u rom.” (Matthew 28:10) Yugu aram rogon ni ke meewar e pi apostal, ka be pining Jesus “pi walageg” ngorad. (Matthew 12:49) De n’agrad Jesus. Ba gol Jesus ma ke n’ag fan e kireb rorad, ni bod rogon nib gol Jehovah ma ma n’ag fan e denen rodad. (2 Kings 13:23) Uw rogon ni gad ra folwok rok Jesus?

13. Susun uw rogon e piin ni kar meewargad u wan’dad?

¹³ Thingar da ayuweged e piin ni kar talgad ko machib ara ke lich e machib ni kar ted. Dawor da paged talin e maruwel rorad ni kar rin’ed u fithik’ e t’ufeg kakrom​—ma sana bokum e duw ni kar machibgad. (Hebrews 6:10) Ma gad ma tawrengnagrad. (Luke 15:4-7; 1 Thessalonika 2:17) Machane uw rogon ni gad ra dag ni ka gad ma t’ufegrad?

14. Uw rogon ni ngada folwokgad rok Jesus u rogon ni i ayuweg e piin ni kar meewargad?

¹⁴ I yog Jesus ngak e pi apostal rok ni ke kireban’rad ni nga ranod ngak Galilee mi yad mada’ u rom. I piningrad Jesus nga reb e muulung ni baga’ fan. (Matthew 28:10) Ku arrogon e ngiyal’ ney ni gad ma pi e athamgil nga laniyan’ e piin ni ke meewar e michan’ rorad ni gad ma piningrad ni ngar uned ko muulung u lan e ulung ni Kristiano, ma gathi ke mus ni taa biyay ni gad ra piningrad ko muulung. Ma bay angin e thin rok Jesus ni i pining e pi apostal rok ni ngar uned ko muulung ya “ke yan fa ragag nge taareb i gachalpen Jesus ko fare burey ni bay u lan yu Galile ni ir e ke yog Jesus ngorad ni nga ranod ngay.” (Matthew 28:16) Gad ma falfalan’ u nap’an ni gad ra pining e piin ni ke meewar e michan’ rorad mi yad un ko muulung ko Kristiano!​—Luke 15:6.

15. Uw rogon ni ngada folwokgad rok Jesus u rogon ni gad ra pining e magar ngak e piin ni kar meewargad ni kar bad ko tafen e muulung rodad?

¹⁵ Mang e gad ra rin’ u nap’an ni ra un be’ nib meewar ko Kingdom Hall? Mang e rin’ Jesus u nap’an ni ke guy e pi apostal rok ko gini ngan muulung ngay u tomren ni ke meewar e michan’ rorad? “Me chugur Jesus ngorad me non ngorad.” (Matthew 28:18) De par u orel ni yugu be sap ngorad, danga’ ya i chugur ngorad. Amu lemnag fene baud e tafinay rok e pi apostal u nap’an ni yib Jesus ngorad! Ere ku arrogon ni ngada nonad ngak e piin ni ke meewar e michan’ rorad ni kar athamgilgad ni ngar sulod ko ulung ni Kristiano.

16. (a) Mang e rayog ni ngada filed ko ngongol rok Jesus ngak pi gachalpen? (b) Uw rogon ni ngada folwokgad rok Jesus u rogon e piin nib meewar u wan’dad? (Amu guy e footnote.)

¹⁶ Ku mang e rin’ Jesus? Somm’on e gaar: “Kan pag fan urngin ban’en ngog.” Bin l’agruw e pi’ reb e maruwel ngorad: “Marod ngak girdien e pi nam ngam pingeged yad ngar manged pi gachalpeg.” Bin dalip e ke micheg ban’en ngorad: “Gu ba’ romed.” Machane kam tay fanam iyan riy ni bay ban’en ni de rin’ Jesus, fa? De puwan’ ngak pi gachalpen ni bochan e kar meewargad. (Matthew 28:17) Bay angin e n’en ni rin’ Jesus, fa? Bay. Ya de n’uw nap’an ma ka be machib e pi apostal “nguur filed ngak e girdi’ ma yad be machibnag ngak e girdi’ fare thin nib fel’.” (Acts 5:42) Gad ra folwok rok Jesus u rogon e piin nib meewar u wan’ nge rogon ni i ayuwegrad, ma gad ra guy angin u lan e ulung rodad.b​—Acts 20:35.

“Urngin Ngiyal’ Ma Gu Bay Romed Nge Yan I Mada’ Nga Tomur”

17, 18. Uw rogon ni gad ra gel ko n’en ni bay ko thin rok Jesus ni gaar, “Urngin ngiyal’ ma gu bay romed”?

¹⁷ “Urngin ngiyal’ ma gu bay romed nge yan i mada’ nga tomur” e aram e tin tomur e thin ko motochiyel rok Kristus ma re thin ney e ma gelnag laniyan’ urngin e piin ni yad be guy rogon ni ngar folgad ko motochiyel rok Kristus ni ngan ayuweg e girdi’ ni ngar manged pi gachalpen. Yugu demutrug e togopuluw ara sasalap nra yib rok e pi toogor rodad ni yad be guy rogon ni ngar togopuluwgad ko machib rodad ni gad be wereg fare thin nib fel’ u morngaagen Gil’ilungun Got ma dariy rogon ni ngada tamdaggad ngay. Mang fan? Ya “kan pag fan urngin ban’en u tharmiy ngu but’” ngak Jesus ni Pilung rodad ma bay rodad ma ra ayuwegdad!

¹⁸ Ma n’en ni ke micheg Jesus ni “urngin ngiyal’ ma gu bay romed” e ma pi’ e gel nga lanin’dad. Ma yib e falfalan’ maku ma yib e kireban’ u nap’an ni gad be athamgil ni ngada folgad ko motochiyel rok Kristus ni ngada ayuweged e girdi’ ni ngar manged pi gachalpen. (2 Chronicles 6:29) Boch i gadad e ba gel e kireban’ rodad u nap’an nra yim’ be’ rodad nib t’uf rodad. (Genesis 23:2; John 11:33-36) Yugu boch i gad e boor e magawon rodad ni bochan e gad ba pilibthir ara ke yib e m’ar ngodad ara ke meewar fithik’ I dowef rodad. (Ecclesiastes 12:1-6) Ma yugu boch i gadad e yugu ma tomal lanin’dad yu ngiyal’. (1 Thessalonika 5:14) Ma ke yoor i gadad ni kada gafgowgad ko tin nib t’uf rodad. Machane yugu aram rogon e magawon rodad machane ra yib angin e machib rodad ni bochan e “urngin ngiyal’ ma bay Jesus rodad” ni mus ko ngiyal’ ni rib gel e magawon rodad.​—Matthew 11:28-30.

19. (a) Mang e pi n’en ni ke tay Jesus chilen ngodad u nap’an ni yog ni ngan ayuweg e girdi’ ni ngar manged pi gachalpen? (b) Mang e ra ayuwegdad ni ngada folgad ko motochiyel rok Kristus?

¹⁹ Kada filed ko fa binem e thin ko re babyor ney ni bay urngin ban’en ko motochiyel rok Jesus ni ngada ayuweged e girdi’ ni ngar manged pi gachalpen. I yog Jesus ngodad fan ni ngada machibgad nge gini gad ra machib riy. Ki yog ngodad e n’en ni ngada machibnaged nge ngiyal’ ni nge mus e machib rodad. Riyul’ nib mo’maw’ ni ngan wereg e machib. Machane rayog ni ngada rin’ed ni bochan e kan pag fan urngin ban’en ngak Kristus ma bay rodad! Arrogon!

[Footnotes]

Uw Rogon Ni Ga Ra Fulweg?

• Uw rogon ni gad ma fil ngak yugu boch e girdi’ rogon ni ngar folgad ko pi motochiyel rok Jesus?

• Mang boch ban’en nrayog ni nge fil be’ ni ka fini mang reb e gachalpen Jesus ko kanawo’ ni ke dag yugu boch e girdi’ u lan e ulung?

• Mang e rayog ni ngada rin’ed ni ngada ayuweged e piin ni ke meewar e michan’ rorad?

• Uw rogon ni ra gelnagdad e thin rok Jesus ni ke micheg ni gaar, “Urngin ngiyal’ ma gu bay romed”?

[Pictures on page 26]

Thingar da wereged e machib ma ngada filed e machib ngak e girdi’

[Pictures on page 28]

Be’ ni ka fini mang reb e gachalpen Jesus e ra fil boor ban’en ni baga’ fan ko kanawo’ ni ke dag yugu boch e girdi’