Fare Magow Felfelan’

IN E duw ni ke yan, ma girdi’ nu France, nge Chiyamen, nge Great Britain, nge yu Meriken e ni fithrad ko, “Mang e ngan rin’ min falfalan’?” Piin ni fithrad e, 89 pasent e rogned ni nge fel’ fithik’ i dowey nge lanin’uy; ma 79 pasent e rogned ni mabgol nib manigil ara be’ ni gimew nga bang nib fel’ thilmew; ma 62 pasent e rogned ni taw’ath ko ngan fakay e bitir; ma 51 pasent e lem rorad e maruwel nib fel’ rogon e ba t’uf ni fan ko falfalan’. Yugu aram rogon ni oren e girdi’ e ba mecham ni yad ma lemnag ni salpiy e der micheg e falfalan’, ma 47 e pasent ko pi cha’ nem nni deeriyrad e ba mich u wan’rad ni rayog. Mang e be dag e tin riyul’?

Som’mon, e ngam sap ko fare n’en ni susun peth u thilin e salpiy nge falfalan’. Reb e survey ni kan ta’ ngak fa raay i girdi’ ni yad e tha’bi fel’ rogorad u Meriken e m’ug riy ni gathi ba gel boch e falfalan’ rorad ngak e yu girdi’. Maku reb, e yugu aram rogon ni boor e girdi’ u Meriken e ke chugur i l’agruw yay ni ke yoor e chugum rorad ko fa guyey ni baaray e duw ni ke yan, ma der gel boch e felfelan’ rorad ko kafram, aray rogon ni yog e piin yad ba salap ko rarogon e lem. Riyul’ riy, e yog reb report ni gaar: “U nap’an taa ba ngiyal’, ma oren e mochuch e yan nga lang. Fel’ yangaren ni i li’ ir e ke mun dalip yay ngay. Mabgol ni be wer e ke mun l’agruw yay ngay.” U lan gonapan 50 e nam nib thilthil, e piin ma gay murung’agen ban’en ni u ra fal’eged i lemnag e n’en nib peth u thilin e salpiy nge falfalan’ me tomur riy mar pirieged ni salpiy e dabiyog ni nge chuw’iy e falfalan’.

Bin migid, uw feni ga’ fan ko falfalan’ e pi n’en ni baaram ni bod e fel’ fithik’ i dowey, mabgol nib fel’, nge maruwel nib fel’ rogon? Riyul’ riy, e faanra pi n’eney e rib mutrug nib t’uf ni nge yog min falfalan’, me ere uw rogon fa bokum i milyon e girdi’ ni dar pirieged e falfalan’ ko fel’ fithik’ i dowey nge urngin e piin ni de fel’ rogon e mabgol rorad? Ma uw rogon e yu wu’ i mabgol ni dariy e bitir rorad nge urngin e pumoon nge piin ni dariy e maruwel ni yad be un ngay nib fel’ rogon? Urngin e pi girdi’ nem e ngar pared u ba yafas nib kireban’? Ma gur fare falfalan’ ni yibe lemnag ko piin ni chiney mab fel’ fithik’ i dowrad ma ba fel’ rogon e mabgol rorad gur dabi m’ay ni faanra thil rarogorad?

Gur Gad be Gay e Falfalan’ ko Gin nib Puluw ni Rab Riy?

Urngin e girdi’ ma baadag ni nge falfalan’. Dab ni gin ko re n’ey ni bochan ni Ani Sunmiy e girdi’ e yima yog ni “fare Got nib falfalan’,” ma girdi’ e ni ngongliy ni bod yaan Got. (1 Timothy 1:11, New World Translation; Genesis 1:26, 27) Arfan, ni ri kab merag ko girdi’ ni nguur gayed e falfalan’. Machane, ke yoor e ke pirieg ni ngan chichiiy paay ko falfalan’ e bod ni ka mu chichiiy paam ko yan’​—l’agruw nib mom ni ra luur nge yan nga bang.

Machane, gur rayog, ni boch e girdi’ e kaygi gel rogon i gay rorad ni ngar pirieged e falfalan’? Social philosopher ni Eric Hoffer nu Meriken e ke lemnag ni arrogon. Ke yog ni gaar: “Fare n’en ni yibe gay e falfalan’ e aram reb i kenggin kanawoen e kireban’.” Re n’em e rib riyul’ ni faanra ga be gay e falfalan’ u bang ni de puluw. Ra aram rogon, ma rib mich u wan’dad ni ngad mada’niged e kireban’ nge ngochngochan’. Gay rogon ni nge yoor ban’en royiy; nge ngan gilbuguwan fa ngan nangem; nge athamgiliy e tin yibe nameg ko am, par nge chugum, ggan; ara par ni goo gur e ga be lemnagem ma nge yog ngom e tin ni ga be finey ni papey, urngin e pi n’ey ni de yog ni nge pi’ e falfalan’. Aram fan ni boch e girdi’ e ke adag e n’en nib thil ni yog reb e tayol babyor ni gaar: “Faan manga yugu da talgad i gay rogon ni ngan falfalan’ ma ra yog ni ngad falfalan’gad”!

Fan, fare survey ni kan weliy ko som’mon ko re article ney e ku be dag ni 4 u 10 i girdi’ e be lemnag ni falfalan’ e angin ni yibe rin’ ban’en nib fel’ ma yibe ayuweg boch e girdi’. Ma 1 u 4 e girdi’ e rogned ni michan’ nge teliw e kub ga’ ban’en ni ma rin’ ko ngan falfalan’. Rib tamilang, nib t’uf rodad ni ngad fal’eged i guy e n’en ni yira rin’ min falfalan’ ni riyul’. Bin migid e article e ra ayuwegdad ngad rin’ed.

[Pictures on page 3]

Boor e girdi’ e ma lemnag ni salpiy, par ko tabinaw nib fel’ rogon, ara ba maruwel nib fel’ e ir e kiy ko falfalan’. Arrogon u wan’um fa?