Uw e Rayog ni Ngan Pirieg e Bin Riyul’ e Falfalan’ Riy?

BOOR e girdi’ ni ma lemnag ni rayog e falfalan’ ko chugum ni boor. Uw rogon u wan’um? Riyul’ ni rayog e falfalan’ ngodad ko chugum, machane gathi rib mudugil; ma chugum ni ma ayuweg e par e dabi ubing e michan’uy ma dabi ayuwegey ko tirok Got ban’en.

Nap’an ni Welthin Jesus Kristus u daken e Burey me gaar: “Nge felan’ e piin ni yad manang ni ba t’uf rorad e tirok Got ban’en, ya gagiyeg nu tharmiy e ke thap ngorad.” (Matthew 5:3) Miki gaar Jesus: “Mu ayuwgad mi gimed guy rogomed rok urngin mit e chogow; ya bin riyul’ e yafos ku be’ e gathi ni ngongliy ko pi n’en ni ir e mmil suwon ngak faanem, ndemtrug rogon fene yoor ban’en rok.”​—Luke 12:15.

Boor e girdi’ e ma gayiy e falfalan’ mar uned ko ngongol ndarngal nge yugu boch ban’en nib “kireb ni yima ar’arnag.” (Galatia 5:19-21) Machane, ngan un ko ngongol nde yalen e dabi yibnag e bin riyul’ e falfalan’. Ma bin riyul’ riy e piin ni ma un ko pi n’en nem e dabiyog ni ngar uned ko Gil’ilungun Got.​—1 Korinth 6:9, 10.

Ma yugu boch e girdi’ e yad ma gayiy e bin riyul’ e falfalan’ u fithik’rad mi yad gayiy rogon ni ra felan’rad ngorad. Pi library nge kantin ni bay e babyor riy e ba sug ko pi babyor ni ka nog e self-help ni be weliy ko uw rogon nra ayuweg be’ ir, machane pi babyor nem e de yibnag e falfalan’ ko girdi’. Ere uw e rayog ni ngan pirieg e bin riyul’ e falfalan’ riy?

Ra nge yog e bin riyul’ e falfalan’ ngodad ma thingarda nanged nib t’uf rodad e tirok Got ban’en. Gaar Jesus: “Nge felan’ e piin ni yad manang nib t’uf rorad e tirok Got ban’en.” Machane dabi ayuwegdad nfaanra ke mus ni gad manang e re n’ey nib t’uf rodad machane dabda rin’ed ban’en nge yog ngodad. Susun: Ra diin nfaanra ke un be’ ko sagreng ma tomur riy ma de ayuweg e dowef rok ko ran? Gathi ra dehydrate me yib e m’ar ngak fa? Ku arrogon gadad nfaanra dabda ayuweged gadad ko tirok Got ban’en, ma gad ra war. Ma ra chuw rodad e falfalan’ rodad.

Kari nang Jesus nib t’uf e tirok Got ban’en rok, ma gubin ngiyal me fil e Thin Rok Got me fl’eg i lemnag. Ku rayog ni nge pateg e pi thin ko babyor nib thothup mab mom rok, me fil ngak e girdi’ ni ngar yodoromgad. (Luke 4:16-21; mu taarebnag ko Efesus 4:20, 21.) Ke yog Jesus ni ngan rin’ e tin nib m’agan’ e Chitamangin nu tharmiy ngay e bod rogon e ggan. Ngan rin’ e tin nib m’agan’ Got ngay ma ra fek i yib e falfalan’.​—John 4:34.

Arrogon, dabiyog e bin riyul’ e falfalan’ ko chugum; ma dabi yib e falfalan’ nfaanra ngan rin’ e tin ni yima ar’arnag. Bin riyul’ e falfalan’ e bay rogon nga gumerchaey, ma bay ko bin riyul’ e michan’ nge rogon thilin Jehovah Got nge be’. Ere rib puluw e n’en ni tangnag David ni gaar: “Ba felan’ e piin ni Jehovah e ir e Got rorad.”​—Psalm 144:15b.

[Sasing ko page 31]

Michan’ nge fel’ thilmew Got e ra yibnag e bin riyul’ e falfalan’ ngom