Bin Riyul’ E Falfalan’​—Uw Rogon Nrayog?

SUSUN ni nge par e girdi’ nib falfalan’. Mang fan nrayog ni nge mich u wan’dad ko re n’em? Ya amu lemnag e gal ni som’on e girdi’.

Sunmiy Jehovah Got e bin som’on e pumoon nge ppin ni rayog ni ngar parew nib falfalan’. Kan tay Adam nge Efa nga lan e paradis, ni aram e milay’ nib falfalan’ ni ka nog Eden ngay. Ke pi’ e Ani sunumiyrow urngin ban’en nib t’uf ko par rorow. U lan e re milay’ nem ma bay “urngin mit e gek’iy nib fel’ yaan ma be k’uf nib fel’ wom’engin.” (Genesis 2:9) Ke fel’ fithik’ i dow Adam nge Efa, ma ba gel gelngirow, ma yow ba gamog​—yow ba flont ma rriyul’ ni yow ba falfalan’.

Machane ri mang fan ni kar parew nib falfalan’? Bochan ni yow be par u paradis ara yow ba flont? Pi taw’ath ney ni pi’ Got ngorow e riyul’ ni ke n’igin ni ngar falfalan’gow. Machane falfalan’ rorow e de taga’ nga daken e pi n’en nem. Fare milay’ nu Eden e gathi ke mus ni aram bang ni rib fel’ yaan. Ya aram bang ni ngan liyor ku Got riy. Thingara parew nib fel’ thilrad e An Tasunumiyrow ni nge yog ni ngar parew nib falfalan’ ndariy n’umngin nap’an. Ere som’on ma thingara parew ni yow e girdi’ nib gel ko tirok Got ban’en ma aram e rayog e falfalan’ ngorow.​—Mu taarebnag ko Matthew 5:3.

Rayog e Falfalan’ nfaanra ran Par nib Gel ko Tirok Got Ban’en

U tabolngin ma Adam nge Got e ba fel’ thilrow. Ya bod be’ ni chitamangin nge fak ni bay e t’ufeg nge runguy u thilrow. (Luke 3:38) U lan fare milay’ nu Eden, ma bay urngin ban’en nib t’uf ku Adam nge Efa ni nge yog ni ngar adagew ni ngar liyorgow ku Got. Faanra ke m’agan’row ngay ni ngar folgow ku Jehovah u fithik’ e t’ufeg ma aram e yow ra pining e sorok ku Got mar n’ufew ni kab fel’ ko rogon ni ma pining e pi gamanman e sorok ku Got ya ke sunumegrad. Ya yow ba llowan’ ma rayog ni ngar n’ufew Got ko pi felngin ma rayog ni ngar tew tanggin mat’awun ni nge gagiyeg. Maku rayog ni ngar parew ni be ayuwegrow Jehovah u fithik’ e t’ufeg nge runguy.

Re tha’ ney u thilin Got nge girdi’ nge fol ko pi motochiyel rok e ir e yibnag e falfalan’ ko gal nsom’on e girdi’ rodad. (Luke 11:28) De t’uf ni nge par Adam nge Efa u lan boor e duw ni yow be fl’eg boch ban’en ma yow be oloboch riy fin ra piriegew e bin riyul’ e falfalan’. Ya kar parew nib falfalan’ e chi ngiyal’ nem ni kan sunumiyrow. Kar falfalan’gow ya ke gapas thilrad Got mar folgow ko pi motochiyel rok.

Machane dakura parew nib falfalan’ u nap’an ni dar folgow ku Got. Ke th’ab Adam nge Efa e tha’ u thilrad Jehovah u nap’an ni ur togopuluwgow ngak. Dakura parew ni yow e fager ku Got. (Genesis 3:17-19) Be m’ug riy ni nap’an ni kan tulufrow u lan fare milay’, me tal Jehovah ndaki yog e thin ngorow. Ke mul u pa’row e par nib flont ndariy n’umngin nap’an u paradis. (Genesis 3:23) Machane n’en th’abi ga’ fan e ke mul u pa’row e tha’ u thilrad Got, ni aram e n’en ni ma yibnag e falfalan’.

Rayog Rodad ni Ngad Mel’eged Ban’en

U m’on ni kar m’ow me afuweg Adam nge Efa ngak pi fak e pi n’en nib l’ag ko girdi’, nge nangan’, nge rogon nrayog ni ngan tay fan e tirok Got ban’en. Dan sobut’nag e girdi’ ni bod e gamanman. Ya rayog ni nge fel’ thildad e An Tasunmiydad. (2 Korinth 5:18) Bay e gonop ko girdi’ ni rayog ni ngar turguyed ko yad ra fol rok Got fa danga’. Kan tamilangnag e re n’em bokum e chibog nga tomren u nap’an fini sum fare nam nu Israel me yog Jehovah ni ngar turguyed ko yafas ara yam’ e ra yog ngorad. U daken Moses e yog Got ni gaar: “Daba’ e kug taymed ni ngam turguyed ko fel’ rogon nge yafas e nge yib ngomed ara gafgow nge yam’.”​—Deuteronomy 30:15-18.

Mus ko chiney ni bokum biyu’ e duw u tomren ni ke thumur e paradis ma ka rayog rodad ni ngad turguyed ban’en nib mat’aw. Bay e nangan’ rodad ma rayog ni ngad folgad ko pi motochiyel rok Got. Weliy e Bible u morngaagen “lanin’dad.” (2 Korinth 4:16; Roma 7:22) Re n’ey e ma tamilangnag ni rayog ni nge m’ug pangin Got rodad, ma rayog ni ngad lemnaged ban’en ni bod rogon Got, ma rayog ni ngad ted fan e tirok Got ban’en.

I yoloy apostal Paul u morngaagen e gafarig rodad nge nangan’ rodad ni gaar: “Piin ni gathi yad piyu Israel e dariy e re Motochiyel nem rorad; machane ngiyal’ ni yad ra ngongliy e tin ni be yog e re Motochiyel nem ni yad e sum u lanin’rad ni ngar ngongliyed, e aram e kar manged ba motochiyel ngorad, ni yugu aram rogon ndariy fare Motochiyel rok Moses rorad. Ya ngongol rorad e be m’ug riy ni tin ni be yog fare Motochiyel ni ngan rin’ e yad manang u lanin’rad. Ya ku er rogon lanin’rad ni be dag ni re n’ey e ba riyul’, ni bochan e yu ngiyal’ e ma yog e lem rorad ngorad nib tagan e tin ni kar ngongliyed, ma yu ngiyal’ e ma yog ngorad nib mat’aw e tin ni kar ngongliyed.”​—Roma 2:14, 15.

Gonop Rok Got nge Fol​—Aram fare Kiy

Sana ra fith be’ ni gaar, ‘Faanra gad gubin ma bay rodad ni ngad adaged ni ngad liyorgad ku Got, ma nge yib e falfalan’ ngodad, me ere mang fan ni kari wer iyan e par ndariy e falfalan’ riy?’ Faanra gadad ra mon’og iyan ko tirok Got ban’en ma aram e rayog e falfalan’ ngodad. Kan sunumeg e girdi’ ni bod yaan Got, machane be par e girdi’ nib orel rok e An Tasunmiyrad. (Efesus 4:17, 18) Ere, gadad e thingarda rin’ed e n’en nib t’uf ni nge fel’ thildad Got ma ngii par ni aram rogon. Dabi yigi sum e tha’ ni aram rogon.

I tamilangnag Jesus l’agruw ban’en ni ra mon’ognag e tirok Got ban’en. Reb e ngan fil e thin riyul’ u morngaagen Got ma reb e ngan fol ko tin ni ba m’agan’ ngay. (John 17:3) I weliy Jesus e thin ko Bible faani gaar: “Fare babyor nib thothup e be gaar, ‘Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.’” (Matthew 4:4) Ku biyay me yog Jesus ni gaar: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu muruwliy.” (John 4:34) De t’uf ni ngad pared in e duw ni gad be fl’eg ban’en ma gad be oloboch ni nge yog e falfalan’ ngodad. Ya experience e gathi aram e n’en nra yibnag e falfalan’. Ya kari mus ni gonop rok Got nge fol ko An Tasunumiydad e ra yibnag e bin riyul’ e falfalan’ ko yafas.​—Psalm 19:7, 8; Eklesiastes 12:13.

Ba tamilang ni gathi dabiyog ni ngad thapgad ko falfalan’ ni ma yib u nap’an ni ngan maruweliy e gonop rok Got nge nap’an ni ke fel’ thildad Got. (Acts 17:26, 27) Rayog ko urngin e girdi’ ni nge yog ngorad e tamilangan’ u morngaagen Jehovah nge tin nib m’agan’ ngay. Fare Bible e ba ke babyor ni th’abi yoor ni yibe wereg u ga’ngin e fayleng, ma kan fl’eg bokum bilyon ken u boor mit e thin. Rayog ni nge ayuwegem e Bible ni ngam fagergow Got ma nge yog e bin riyul’ e falfalan’ ngom, ya be yog e Bible ni “ba falfalan’ e piin ni Jehovah e Got rorad!”​—Psalm 144:15.

[Kahol ko page 6]

Pi N’en ni Ma Tor ko Falfalan’

1. Ngam tay fan e tirok Got ban’en mag maruweliy. Yog Jesus ni gaar: “Ri kab felan’ e piin ni kar rung’aged e thin rok Got ma kar pired ni yad be fol riy!”​—Luke 11:28.

2. Mu nang u wan’um ni nge felan’ Got ngom e kab baga’ fan ko salpiy ara par nib fel’ rogon. I yoloy Paul ni gaar: “Liyor ni yima tay ngak Got e ri ra fel’ rogon be’ riy ni faanra ke fel’ u wan’ e tin ni ba’ rok. . . . Ere faanra bay e ggan rodad nge mad ni nga don’ed, ma susun e ke gaman e tin ni nge yog ngodad.”​—1 Timothy 6:6-8.

3. Ngam athamgil ni nge yog e nangan’ ko Bible ngom ma ga fol riy.​—Roma 2:14, 15.

4. Mu dugliy ni ngam fol rok Jehovah Got, ma aram e ra bung rogom ni ngam mang reb e girdi’ rok. Yoloy David nkakrom ni gaar: “Nge falan’ e piin ni Jehovah e Got rorad!”​—Psalm 144:15.

[Sasing ko page 7]

“Nge falan’ e piin ni manang u wan’rad nib t’uf rorad e tirok Got ban’en.”​—Matthew 5:3