Mu Kol Ayuw U “Laman E Piin Ni Dan Nangrad”

“Ri daur leked e en dar nanged ya bay ra milgad rok, ya bochan dar poyed laman e piin ni dan nangrad.”​—JOHN 10:5, NW.

1, 2. (a) Mang e ke rin’ Maria u nap’an ni ke pining Jesus fithingan, ma ma mang e ke yog Jesus u m’on riy ni re n’en ney ni buch e be dag yaan? (b) Mang e be ayuwegdad ni nguuda pired ni ga ba chuchugur ngak Jesus?

JESUS ni kafin ni faseg ko yam’ e ke guy reb e ppin ni be sak’iy nib chuchugur ko fare low rok ndakuriy be’ riy. Ri manang Jesus fare pin. Maria Magdalene fithingan e cha’ nem. Ke chuchugur ko l’agruw e duw u m’on riy, ni chuweg e moonyan’ rok. Ma ka aram nap’an me un ngak nge pi apostal rok, ni be ayuwegrad ko tin nib t’uf rorad u gubin e rran. (Luke 8:1-3) Machane, chiney, be yor Maria, kari kireban’ ya bochan ke guy Jesus ni ke yim’, maku chiney e dakuriy downgin u lan fare low! Ere ke fith Jesus ngak ni gaar: “Ppin, mang ni ga be yor? I mini’ e ga be changarnag?” Be lemnag ni ir fa en tamilay’, me fulweg ni gaar: “Faanra gur e kam fek nga bayang, me ere mog ngog e gin ni kam man mu tay ngay nggu wan gu fek.” Me yog Jesus ni gaar: “Maria!” ma chingiyal’ nem, me poy u rogon ni ma non ngak. Me non u fithik’ e felfelan’ ni gaar, “Sensey!”. Me gumuchmuch ngak.​—John 20:11-18.

² Re chep ney e be dag ni be pug e tafinay rok e girdi’ ko n’en ni yog Jesus u m’on riy. Be taareb rogonnag ir ngak be’ ni tachugol saf ma pi gachalpen e yad fapi saf rok, me yog ni fare tachugol saf e ma pining fithingan e pi saf rok ma yad ra poy laman. (John 10:3, 4, 14, 27, 28) Riyul’ ni, ba saf e ma poy e en ma gafaliy, ere ku arrogon Maria ni ki poy e en Ma Gafaliy, ni Kristus. Maku aram rogon e pi gachalpen Jesus e ngiyal’ ney. (John 10:16) Ni bod tel e saf nib papey ni nge poy laman be’ e ra ayuweg ni nge par nib chuchugur ko en be gafaliy, maku arrogon gelngidad i nang fan ban’en ni bay rogon ko tirok Got e ra ayuwegdad ni nguu darod nib chuchugur ngak ni gad be lek luwan ay e Tachugol saf rodad nib fel’, i Jesus Kristus.​—John 13:15; 1 John 2:6; 5:20.

3. Mang boch e deer nra yib ngan’uy nib l’ag ko fanathin rok Jesus ko fare tafen e saf?

³ Machane, rogon ni dag e re fanathin nem, gelngin e saf ni nge poy laman be’ e ra ayuweg ni nge poy ni gathi kemus e en fager rok ya ku ra poy e en toogor rok. Rib ga’fan e re n’en nem ya bay e piin ma togopuluw ngodad ni yad ba sasalap. Mini’ e pi cha’nem? Mang e yad ma rin’? Uw rogon ni ngada ayuweged gadad? Rogon ni ngad nanged e fulweg riy, e ngad guyed ko mang e n’en ni ki yog Jesus ko fanathin rok ko fare tafen e saf.

‘En ni Der Yan u Langan e Mab’

4. Rogon e fanathin ko faen tachugol saf, ma ma lek fapi saf rok mini’, ma mini’ e dara leked?

⁴ I weliy Jesus ni gaar: “En ni ma yan u langan e mab e ir e ma gafaliy fapi saf. Ma en ni ma matanagiy langan e garog e bing e garog ngak faanem, ma fapi saf e rrung’ag laman ni be pining fithingan e saf rok ntataareb, me fekrad nga wuru’ e yoror. Ma nap’an ni fekrad nga wuru’ e yoror me m’on rorad, mi i lay fapi saf u keru’, ya yad manang laman. Ma ri daur leked e en dar nanged ya bay ra milgad rok, ya bochan dar poyed laman.” (John 10:2-5, NW) Mu lemnag, ni be fanay Jesus fare bugithin ni “laman” ni dalip yay. L’agruw yay ni ke yog murung’agen laman fare tachugol saf, machane bin dalip yay, e be weliy murung’agen “laman” e piin dan nangrad. Mini’ e piin ni dan nangrad ni be weliy Jesus u roy?

5. Mang fan ni dabda ayuweged e piin ni dan nangrad rogon ni weliy ko John guruy ni 10?

⁵ De weliy Jesus murung’agen e girdi’ ni dan nang ni gad baadag ni ngada ayuweged​—ni fare bugithin ni bay ko tin som’mon e thin ni kan fanay ko Bible ni be yip’ fan e “t’ufeg ni fan ko piin dan nangrad.” (Hebrews 13:2, NW) U lan e fanathin rok Jesus, ma faen dan nang e be’ ni dan pining. Der “yan u langan e mab ko fare tafen e saf, machane ma yan u yugu bayang nga daken p’ebugul e yoror. Ir be’ “nib moro’ro’ fa be’ ni ma moro’ro’ u fithik’ e yargel.” (John 10:1) Mini’ e bin som’mon rogon ni yog e Thin rok Got ni ke mang be’ nib moro’ro’ ma ma fek ban’en rok be’ u fithik’ e yargel? Satan ni fare Moonyan’. Gad ra guy e mich riy u lan fare babyor ni Genesis.

Ngiyal’ ni Kan Rung’ag fare Laman e En Dan Nang ko Yay ni Som’mon

6, 7. Mang fan nrayog ni ngan pining e en dan nang nge en moro’ro’ ngak Satan?

⁶ Genesis 3:1-5 e be dag ko uw rogon ni kan rung’ag u fayleng laman e en dan nang ko yay ni som’mon. Fare chep e be yog ni ke yan Satan ngak e bin som’mon e ppin, i Efa, u daken e porchoyog me non ngak u fithik’ e sasalap. Riyul’ ni, lan e re chep nem ma dan pining e “en dan nang” ngak Satan.” Yugu aram rogon, tin ni rin’ e be dag ni boor ban’en riy nib taareb rogon ko tin ma rin’ e en dan nang ni ke weliy Jesus murung’agen u lan e fanathin rok ni bay ko John guruy ni 10. Mu guy boch ban’en riy ni ba chuchugur rogon.

⁷ Be weliy Jesus ni faen dan nang e ma yan ngak fapi saf u taferad nib mith. Maku, arrogon ni ma yib Satan ngak be’ nib mith, ni fanay ba porchoyog. Re kanawo’ ney nib sasalap e be dag nib tamilang e ngongol rok Satan​—ni be’ nib sasalap ni ma yib nib mith. Maku, aram e n’en ni be nameg ni nge rin’ faen ni dan nang u lan tafen e saf ni nge iring e saf rok e en mmil fan ngak. Riyul’ ni, kab kireb e cha’ nem ngak be’ nib moro’ro, ya bochan n’en ni ku be nameg e nge “li’ e saf ngem’ me kirebnag.” (John 10:10) Maku arrogon Satan ni ir be’ nib moro’ro’. Be sasaliyebnag Efa, ma aram ke iring e yul’yul’ rok ku Got. N’en ni kub chagil ngay, niki fek Satan e yam’ i yib ngak e girdi’. Arfan, ni ir be’ ni ta thang e fan.

8. Uw rogon ni ke thiliyeg Satan e thin rok Jehovah nge lem rok ko thin ni yog?

⁸ Ngongol rok Satan nib sasalap e ke gagiyel u rogon ni ke thiliyeg e thin rok Jehovah nge lem rok ko thin ni yog. I fith ngak Efa ni gaar, “Rriyul ni yog Got ngomew ni dab mu koyew wom’engin urngin e gek’iy ni ba’ ko gi woldug ney?” Satan e be dag ni gowa ke gin ngay, ni gowa ke gaar: ‘Mang fan ni ma ngongol Got nrib pag rogon?’ Miki gaar: “Manang Got ni gimew ra kay ma re rran nem me tamilangan’mew.” Mu lemnag e thin ni yog ni gaar: “Manang Got.” Gowa be gaar Satan: ‘Gu manang e tin manang Got. Gu manang e lem rok, mab kireb.’ (Genesis 2:16, 17; 3:1, 5) Bay e kireban’ riy, de siyeg Efa nge Adam ngar paloggow nga orel u laman e cha’ nem ni dan nang. Tin kar rin’ew, e kar folgow riy me fek e gafgow i yib ngorow nge ngak e piin ni owcherow.​—Roma 5:12, 14.

9. Mang fan nib puluw ni ngad lemnaged nrayog ni ngan rung’ag laman e piin ni dan nangrad e ngiyal’ ney?

⁹ Ma fanay boch e kanawo’ nib chuchugur rogon ko binem ni nge sasaliyebnag e girdi’ rok Got e ngiyal’ ney. (Revelation 12:9) I ir “e chitamangin urngin e malulfith,” ma piin ni kar boded, ni yad be guy rogon ni ngar sasaliyebnaged e pi tapigpig rok Got e pi fak. (John 8:44) Gad ra guy boch e kanawo’ rogon ni kan rung’ag laman e piin dan nang e ngiyal’ ney.

U Rogon ni Kan Rung’ag Laman e Piin ni Dan Nangrad e Ngiyal’ Ney

10. Mang reb e kanawo’ ni yima rung’ag laman e piin ni dan nangrad riy?

¹⁰ Ma weliy fan ban’en u fithik’ e sasalap. Be yog Paul ni apostal ni gaar: “Dab mpaged e pi machib nib thil ko biney nge fekmed nga wuru’ e wo’.” (Hebrews 13:9) Miti mang machib? Bochan ireray e pi n’en nrayog ni nge ‘fekdad nga wuru’ e wo’,’ mab tamilang ni be weliy Paul murung’agen e machib nra warnagdad ko tirok Got. Mini’ e be yog e pi machib ni aram rogon nem? I yog Paul ngak e piin ni piilal ni Kristiano ni gaar: “Ma bayi taw nga ba ngiyal’ me ban boch e girdi’ ko biromed e ulung nga rogned e tin nde riyul’ ngar pow’iyed e piin ni ke mich Jesus u wan’rad nga bang ngar uned ngorad.” (Acts 20:30) Riyul’, ni chiney e bod nap’an Paul, ni boch e girdi’ ni yad bang ko ulung ko Kristiano e be guy rogon e chiney ni ngar pow’iyed fapi saf nga bang u daken e thin ni “yad be pingeg nga bang”​—ni aram e ri yad be lifith lugunrad. Rogon ni yog Peter ni apostal, e yad ma fanay e “thin ni googsur”​—ni aram e thin ni bod yaan e thin riyul’ machane tin riyul’ riy ireray e thin ndariy fan ni bod fare salpiy ni googsur.​—2 Peter 2:3.

11. Uw rogon ma thin ni bay ko 2 Peter 2:1, 3 e be dag kanawoen nge tin be nameg e piin apostate?

¹¹ Miki tamilangnag Peter e kanawo’ ni ma fanay e piin ni apostates ni be yog ni “bay ra feked i yib ngomed e machib nra kirebnigey.” (2 Peter 2:1, 3) Ni bod faen moro’ro’ ko fanathin rok Jesus ko tafen e saf ni der ma yan “u langan e mab ya ma yan u yugu ba yang,” ere piin ni apostates e ku ma yib ngodad u kanawo’ nib mith. (Galatia 2:4; Jude 4) Mang e yad be nameg? Me ulul Peter ngay ni gaar: “Bay ra feked ban’en romed.” Tin riyul’ riy, yugu demtrug rogon ni piin ni apostates e yad ma guy rogon ni ngar mat’awnaged yad, ma riyul’ ni yad be nameg ni ngara “iringed ban’en ma ngar li’ed be’ ngem’ ma ngar kirebniged ban’en.” (John 10:10) Mu kol ayuw rok e piin ni dan nangrad ni aram rogon!

12. (a) Uw rogon ma chag ko girdi’ ni gad ra ta’ e ra chuchugurnagdad nga laman e piin ni dan nangrad? (b) Mang e n’en ni ba taareb rogon u thilin kanawoen Satan nge kanawoen e piin ni dan nangrad e ngiyal’ ney?

¹² Girdi’ nib kireb ni ngan chag ngorad. Laman e piin ni dan nangrad e rayog ni ngan rung’ag u daken e piin ni gad be chag ngorad. Ngan chag ngak e girdi’ nib kireb e ri ma ta’ e piin nib fel’ yangaren nga thatharen e riya’. (1 Korinth 15:33) Dabmu pagtalin, ni Satan e ke yib ngak Efa​—ni ir bagayow fa bin som’mon fa wu’ i mabgol ni en th’abi bitir ni dawori yoor e tin manang. Ke weliy ngak ni ke magawonnag Jehovah mat’awon nib pag rogon ma dabkiyog ni nge mel’eg e tin baadag, ma bin riyul’ riy e danga’. Girdi’ ni ke sumiyrad Jehovah e yad ba t’uf rok ma baadag ni nge fel’ rogorad. (Isaiah 48:17) Maku arrogon e ngiyal’ ney, ni piin ni dan nangrad e yad be tay nga lanin’med ni gimed e piin fel’ yangaren ni pi gallabthir romed e yad be magawonnag mat’awmed ma dabiyog ni ngam rin’ed e tin gimed baadag. Mang e rayog ni nge buch romed nbochan e piin ni dan nangrad? Reb e ppin ni Kristiano e ke yog ni gaar: “Ke war e michan’ rog nib ngoch nap’an nbochan e piin ni classmate rog. Yad ma yog ngog ni teliw rog e kaygi yoor e motochiyel riy ma de fel’.” Yugu aram rogon, ma tin riyul’ riy e pi gallabthir romed e ri gimed ba t’uf rorad. Ere nap’an ni ra guy e piin ni gimed nga skul rogon ni ngar k’aringed gimed ni dabkum pagan’med ko gallabthir romed, ma dabmu paged ni ngan bannagmed ni bod e n’en ni buch rok Efa.

13. Mang kanawo’ nib gonop ni ke lek David, ma mang reb e kanawo’ nrayog ni ngada folwokgad riy?

¹³ Murung’agen e chag ko girdi’ nib kireb, me David ni fare psalmist e be yog ni gaar: “Dagur ma par u fithik’ e girdi’ ni ma lifith ligin; ma dagur ma un ngak e piin ni ma mithag ko yad miti mang girdi’.” (Psalm 26:4, NW) Biyay, kam guy fare ngongol ko piin ni dan nangrad? Yad ma mithag ko yad mini’​—ni bod Satan ni ke fanay e porchoyog ni fan ni nge mithag ko ir mini’. Chiney, ma boch e girdi’ ni ma un ko ngongol ni darngal e ma mithag ko yad mini’ nge n’en ni ri yad be nameg u daken e Internet. U chat rooms, ma piin ni yad ba ilal e ma yog ni ka yad ba pagel ni fan ni ngam aw ko wup. Piin ni fel’ yangaren, aygum kol ayuwgad nib fel’ rogon ya richey min kirebnag e michan’ romed.​—Psalm 119:101; Proverbs 22:3.

14. Yu ngiyal’, ma uw rogon ni ma wereg girdien e news e thin ni laman e piin ni dan nangrad?

¹⁴ Thin ni kan t’ar nga dakeney. Yugu aram rogon ni boch e thin ni kan wereg u murung’agen e Pi Mich Rok Jehovah e ba fel’ rogon, ma yu ngiyal’ e giridien e news e kan fanayrad ni ngar wereged e lungun e piin ni dan nangrad ni ba laniyan’. Ni bod rogon, ni news u reb e nam e ban nge yog ni ke ayuweg e Pi Mich e am rok Hitler u nap’an e Bin II e Mahl ko Fayleng. Ma yugu reb e, ka nog ni Pi Mich e kar kirebnag e pi naun ni ma muulung girdien e pi yuraba’ i teliw ngay. Ma u lan boch e nam ma girdien e news e kar rogned ni Pi Mich e dar ma pi’ e falay ngak e bitir rorad nib m’ar maku yad ma fek owcherad ko denen ni ma rin’ e pi walagrad nib ubchiya. (Matthew 10:22) Yugu aram rogon, ma girdi’ nib yul’yul’ ni ri yad manangdad e yad manang ni pi thin nem e de riyul’.

15. Mang fan ni de fel’ ni nge pagan’uy ko urngin e thin ni ma wereg girdien e news?

¹⁵ Mang e thingarda rin’ed nfaanra kan wereg e thin nib togopuluw ngodad ni fare laman e piin ni dan nangrad e be wereg? Ba t’uf ni ngad folgad ko fonow ni bay ko Proverbs 14:15 ni gaar: “Girdi ni dar nanged ban’en e ma pagan’ nga urngin bug e thin, machane en nib llowan’ e ma fal’eg i lemnag e n’en ni ma rin’.” De gonop ni nge pagan’uy ko urngin e thin ni ke wereg girdien e news. Yugu aram rogon ni da dogned ni dariy e pagan’ rodad ko urngin e thin ni yima wereg, ma gad manang ni “fayleng ni polo’ e be par u tan gelngin faanem nib kireb.”​—1 John 5:19, NW.

“Mu Skengnag e Thin ni Kan Thagthagnag”

16. (a) Uw rogon ma tin ma rin’ fapi saf nib riyul’ e be dag nib riyul’ e thin rok Jesus ni bay ko John 10:4? (b) Mang athamgil e be pi’ fare Bible ngodad ni ngada rin’ed?

¹⁶ Machane, uw rogon ni ngari mudugil lanin’dad ko en fager ara toogor rodad? Be yog Jesus ni ma fol fapi saf ko en ma gafaliyrad “ya yad manang laman.” (John 10:4) Gathi bochan yaan e en tachugol saf e ma k’aring fapi saf ngar folgad rok; ya bochan laman. Reb e babyor u murung’agen e pi binaw u Bible e be weliy ni reb e girdi’ ni keb nga ram e ke yog ni fapi saf e ma poy e en ma gafaliyrad ni bochan e mad rok, gathi bochan laman. Ma ke yog fa en tachugol saf ngak ni yad ma poy lamay. Rogon ni nge dag nib riyul’ ni aram rogon, e kar thiliyegew e mad rorow. Ke chuw facha’ ko mad rok e en tachugol saf, me pining fapi saf, machane dar chuchugurgad ngak. Dar nanged laman. Yugu aram rogon, ma nap’an ni ke piningrad e en ma gafaliyrad, yugu aram rogon ni ke chuw ko mad nib thil, me yib fapi saf ngak nib papey. Ere, sana bay be’ ni bod yaan e tachugol saf, machane n’en ni be lemnag fapi saf, e gathi ireray e mich riy ni riyul’ ni ir e en ma gafaliyrad. Riyul’ ni fapi saf e ma skengnag laman be’ ni be piningrad, ni yad be taareb rogonnag nga laman e en ma gafaliyrad. Maku Thin rok Got e be yog ngodad ni ngad rin’ed ni aram rogon ni ngan​—“skengnag e thin ni kan thagthagnag ni ngan nang ko riyul’ ni i yib rok Got fa dangay.” (1 John 4:1; 2 Timothy 1:13) Uw rogon ma rayog ni ngada rin’ed ni aram rogon?

17. (a) Uw rogon ma rayog ni ngada poyed laman Jehovah? (b) Tamilangan’ u murung’agen Jehovah e ra ayuwegdad ni ngad rin’ed e mang?

¹⁷ Yira nang fan ni, faanra ri gad manang laman Jehovah, ara thin rok, ma mmom ni ngad poyed laman e en dan nang. Be weliy e Bible ko uw rogon ni nge yoor e tamilangan’ rodad ni aram rogon. Be yog ni gaar: “Telmed e ra rung’ag e thin u keru’med ni be gaar: ‘Ireray e kanawo’. Mmarod riy.’” (Isaiah 30:21, NW) Fare “thin” ni keru’dad e ba’ ko Thin rok Got. Urngin yay ni gad ma bieg e Thin rok Got, e bod ni kad rung’aged laman Jehovah ni Tachugol saf rodad nib Ga’. (Psalm 23:1) Ere, faanra gad ma fil Bible ni gubin ngiyal’, ma ri bayda nanged laman Got. Re tamilangan’ nem ni aram rogon ni ke yoor ma ra ayuwegdad ni ngad poyed laman e piin ni dan nangrad nib papey.​—Galatia 1:8.

18. (a) Yira nang laman Jehovah e kub muun ngay e mang? (b) Rogon ni yog ko Matthew 17:5, ma mang fan ni ngad folgad u laman Jesus?

¹⁸ Yira nang laman Jehovah ma ku ba muun ngay e mang? Gathi kemus ni ngan rung’ag, ya kub muun ngay ni ngan fol riy. Mu lemnag bayay e n’en ni yog Isaiah 30:21. Be yog e Thin rok Got ni gaar: “Ireray e kanawo’.” Arrogon, u daken e fol Bible, ma gad ma rung’ag e tin ma yog Jehovah ni ngan rin’. Bin migid, ma be yog ni gaar: “Mmarod riy.” Baadag Jehovah ni ngad folgad ko tin kad rung’aged. Ere, gad ra fol ko n’en kad rung’aged, ma gad be dag ni gathi kemus ni kad rung’aged laman Jehovah ya ku kad folgad riy. (Deuteronomy 28:1) Yira fol u laman Jehovah e ku be yip’ fan ni yira fol u laman Jesus, ya bochan ni Jehovah e ke yog ngodad ni ngad rin’ed ni aram rogon. (Matthew 17:5) Mang e be yog Jesus, ni fare Tachugol saf nib Fel’, ni ngada rin’ed? Be fil ngodad ni ngad pingeged e girdi’ ngar manged pi gachalpen ma ngad pagedan’dad ngak fare “tapigpig nib yul’yul’ mab gonop.” (Matthew 24:45; 28:18-20) Yira fol u laman ma be yip’ fan e yafas rodad ni manemus.​—Acts 3:23.

‘Yad Ra Mil Rorad’

19. Mang e thingarda rin’ed u nap’an ni kad rung’aged laman e piin ni dan nangrad?

¹⁹ Ere, mang e thingarda rin’ed u nap’an ni gad ra rung’ag laman e piin dan nangrad? Rogon e n’en ni ma rin’ fapi saf. Be yog Jesus ni gaar: “Ri daur leked e en ni dar nanged ya bay ra milgad rok.” (John 10:5, NW) L’agruw ban’en ni gad ma rin’ riy. Som’mon, “dabda folgad” rok e en dan nang. Arrogon, ri ngada dabuyed e en dan nang. Riyul’ ni, thin ni Greek u Bible, e fare bugithin ni “ri daur” e be dag ni kan dabuy ban’en nrib gel. (Matthew 24:35; Hebrews 13:5) Bin l’aruw, e ngada “milgad rok,” ara ngad tiyed gadad u orel rok. Kemus ni ireray e kanawo’ nib mat’aw ni ngad rin’ed ngak e piin machib rorad e de puluw nga laman e en Tachugol saf nib Fel’.

20. Mang e gad ra rin’ u nap’an ni keb ngodad e magawon nib l’ag ko (a) piin ni apostate nib sasalap, (b) chag ko girdi’ nib kireb, (c) thin ni ke wereg girdien e news ni yad ba laniyan’?

²⁰ Ere, u nap’an ni gad ra mada’nag e piin ni ma yog e thin nib puluw ko lem rok e piin ni apostate, ma gad baadag ni ngad rin’ed e n’en ni be yog e Thin rok Got ni be gaar: “Ngam ayuweged gimed rok e piin ni yad ma wereg e girdi’ ma yad ma kirebnag e michan’ rok e girdi’, ma yad ma togopuluw ko machib ni ke yog ngomed; ere mu tiyed gimed u urel rorad.” (Roma 16:17; Titus 3:10) Maku, piin nib fel’ yangaren ni Kristiano ni kar magawongad ya bochan e chag ngak e girdi’ nib kireb e ba fel’ ni ngar folgad ko fonow rok Paul ngak Timothy ni gaar: “Mu tiyem u urel ko tin ni ma ar’arnag e piin ni pagel.” Ma nap’an ni ra wereg girdien e news e thin nib togopuluw ngodad, ma ngad lemnaged e fonow ni ki pi’ Paul ngak Timothy ni gaar: “Bayra [piin ni ma rung’ag laman e piin ni dan nangrad] pied keru’rad ko tin nib riyul’ ndab kur rung’aged me mang yat e ra tiyan’rad ngay. Machane thingar mu par ni ga be filmunguyan’um u fithik’ urngin ban’en.” (2 Timothy 2:22; 4:3-5) Yugu aram rogon ni ra m’ug ni rib fel’ laman e piin ni dan nangrad, ma ngad milgad ko urngin ban’en ni ra kirebnag e michan’ rodad.​—Psalm 26:5; Proverbs 7:5, 21; Revelation 18:2, 4.

21. Mang puluwon ni be sonnag e piin ni ma siyeg laman e piin ni dan nangrad?

²¹ Pi Kristiano ni kan dugliyrad ko kan ni thothup e kar siyeged laman e piin ni dan nangrad, yad be fol ko thin rok e en Tachugol saf nib Fel’ ni bay ko Luke 12:32. Be yog Jesus ngorad riy ni gaar: “Gimed e chi ulung ney e dab mu tamdaggad! Ya Chitamangimed e ba adag ni nge pi’ e gin nsuwon ngomed.” Maku, fare “yugu boch e saf” e ri yad be son u fithik’ e felfelan’ ni ngar rung’aged e thin rok Jesus ni be gaar: “Gimed e piin ni ke fal’eg e Chitamag waathmed: mired! Mired ngan pi’ e gin nsuwon Got ngomed, ni kan ngongliy rogon ni kan tay ni fan ngomed ni ka nap’an e ngiyal’ nsunmiy e fayleng riy.” (John 10:16; Matthew 25:34) Puluwon ni ri ma k’aring e felfelan’ ngodad e be sonnagdad nfaanra ngada siyeged “laman e piin ni dan nangrad”!

Ka Ga Manang?

• Uw rogon nib m’ag ngak Satan fare thin ni yog Jesus ko fanathin rok u murung’agen tafen e saf?

• Uw rogon ni yima rung’ag laman e piin ni dan nangrad e ngiyal’ ney?

• Uw rogon ni ngada poyed laman e piin ni dan nangrad?

• Mang e gad ra rin’ u nap’an ni kad rung’aged laman e piin ni dan nangrad?

[Picture on page 27]

I poy Maria Kristus

[Picture on page 28]

En ni dan nang e ma yib ngak fapi saf nib mith

[Picture on page 30]

Mang e gadra rin’ u nap’an ni kad rung’aged laman e piin dan nangrad?