Ga Baadag ni Ngam Par ni Manemus?

“DAGUR tamdag ni nga gum’,” “Machane ri be kireban’ug ni ngar gu digey e pi floras ney.” Aray rogon ni yog be’ ni ppin nu Sapan. Reb e Kristiano nib tamachib ni keb i guy e re pin ney nga tabinaw rok e nang fan ni ke lem ni aram rogon, ya fare pin e bay bangi milay’ rok nib fel’ yaan. Boor e girdi’ ni ma yog ni da ra marusgad ni yad ra yim’ e rriyul’ ni yad ma felfelan’ ko pi n’en ni yira ngat ngay ni kan sunmiy ma rayog ni ri yad be yim’ ni bochan ni ngar pared ni manemus.

Par ni manemus? Boor e girdi’ e dabi mich u wan’rad e binem e lem. Boch e girdi’ e ku rayog ni nga rogned ni da ra lemniged ni ngar pared ni manemus. Mang fan ni ra lemnag be’ ni aram rogon?

Yafas ni Manemus​—Ba Chalban Fa?

Boch e girdi’ e ma lemnag ni yira chachalban ni ngan par ni manemus. Sana rayog ni nga rogned rogon e yafas ko girdi’ ni ke tal ko maruwel ni kaygi taareb rogon gathir ka bay ban’en ni yibe rin’ kemus ni goo miyal t.v. . Faanra aram rogon ni ga be lemnag, ma ga lemnag e n’en ni yog astronomer Robert Jastrow u nap’an nni fith ko yafas ni manemus e ba taw’ath ara ba buch waathan. I fulweg Jastrow ni gaar: “Ra mang ba taw’ath ngak e piin ni ri yad baadag ni ngar nanged ban’en ma der tal i lemnag rorad ni nguur filed ban’en. Fare lem ni manemus ni nguur feked e llowan’ e rib fel’ u wan’rad. Machane boch e girdi’ e dabuyrad ni ngar filed boch ban’en nib biech me ke man lanin’rad, e ban’en ni yira tamdag ngay. Dara nanged ko uw rogon ni ngar fanayed e tayim rorad.”

Rogon ni ga ra pirieg e yafas ni manemus ko ba chalban fa dangay e ri ra yan u rogon ni ga ma lem. Faanra ga baadag ni nga kum ‘nang boch ban’en ma ga be yim’ ni bochan ni nguum fil ban’en,’ ma amu lemnag urngin e n’en ni rayog ni ngam rin’ ko pi n’en ni yima fil, ni musik, nge fal’eg e jumeng ko naun, nge milay’, ara demtrug e re miti n’en nib ga’ fan ni yima lek ni ga baadag. Yafas ni manemus u fayleng e ra pi’ e kanawo’ nrib fel’ ni nguum maruweliy ni nga rim salap u rogon ni ngam rin’ boch ban’en nib thilthil.

Ra nge yog ni ngan dag min guy e t’ufeg ni manemus ma aram e ra fal’eg e yafas ni manemus nge gaman e gubin. Ni sunmiydad ni rayog ni ngada daged e t’ufeg, ma gad ma falan’ u nap’an ni kan t’ufegdad. Ra ud felfelan’gad u taabang ko bin riyul’ e t’ufeg ma ra yibnag e fel’ laniyan’ nib gel ni ra i n’uw nap’an ma dabi m’ay. Par ni manemus e ra pi’ e tayim ni dariy n’umngin nap’an ni ngan gelnag e t’ufeg ni gathi kemus ni ngak e girdi’ ya rib ga’ ni fan ngak Got. I gaar apostal Paul, “Machane en nib t’uf Got rok,” “e manang Got faanem.” (1 Korinth 8:3) Uw feni fel’ e athap​—ni ngam nang me nangem e ani Tha’bi Tolang u palpalthib! Maku reb, e dariy e gin nge tal i fil ban’en riy ni murung’agen e Ani Sunmiydad ni ma t’ufegey. Ere, uw rogon, ma yafas ni manemus e ra chalban ma dariy felngin ni yira lemnag fan e pi n’en kafini m’ay i yog?

Yafas ni Manemus​—Ba Athap nib Felfelan’

Faanra ga be pirieg e felfelan’ ma ga be gaman e chiney ni dariy fan ni aray urngin e pi magawon nu fayleng ney, ma rib riyul’ ni ga ra felfelan’ ko yafas ni manemus u ba paradis u fayleng. Nap’an ni reb e Pi Mich rok Jehovah e weliy rogon e pi felngin ni ra yibnag e yafas ni manemus, ma yugu aram rogon, ma reb e ppin e gaar: “Da gu adag ni nga gu par ni manemus. Biney e yafas ni 70 ara 80 e duw e ba gaman u puluwog.” Ma reb e piilal ko Kristiano e buch ni bay u rom me fith ngak fare pin ni gaar: “Kaa yugu mu lemnag ko uw rogon ni ra thamiy pi fakam ni faan ga ra yim’?” Me map’ e lu’ u owchen fare pin u nap’an ni lemnag rogon e kireban’ ni ra tay pi fak ni ra yim’ e chitiningrad. Me yog fare pin nriyul’ ni gaar, “Fin aray som’mon, ni kugu nang gelngin e fel’ ngak ni ku u gu tay,” ma ke yog, “ni gguy ni yafas ni manemus e gathi ba athap ni fel’ ngak ya ba muun ngay e tha’ u thildad boch e girdi’.”

Boch e girdi’ e ma lemnag ni dariy be’ ni bay rogorad u wan’ ko yad ra fas ara yad ra yim’. Machane, ba’ rogon u wan’ e Ani Ma Pi’ e yafas ngodad, i yog ni gaar: “Rogon ni gub fas, . . . e dagu adag, ni nge yim’ be’ nib kireb, machane cha’nem nib kireb e nge pi’ keru’ ko kanawo’ rok mi i par nib fas.” (Ezekiel 33:11, NW) Bochan ni Got e aram feni ri ma lemnag rogon e yafas ko piin kireb, me ere rriyul’ ni ri ma lemnag nib gel e piin nib t’uf rorad. Bochan e t’ufeg nge lem rok Jehovah, ma ke ognag ngodad e yafas ni manemus nge fager ni dabi m’ay biid. (James 2:23) Ere gathi thingarda felfelan’gad ngad adaged e pi taw’ath ney nib pag feni fel’?