“Kan Chuw’iymed Nib Tolang Puluwmed”
Ke chuw’iymed nib tolang puluwmed ni pi’. Ere mtiyed fan Got nga dowmed.”—1 KORINTH 6:20.
1, 2. (a) Rogon ni yog fare Motochiyel ni kan pi’ u daken Moses, e mang e ngan rin’ ngak e sib ni piyu Israel? (b) Mang e rayog ni nge mel’eg fare sib nib t’uf e masta rok rok?
“NGAN pigpig ni sib rok be’ e ban’en nib fel’ u wan’ oren e girdi’ kakrom, “rogon ni yog fare Holman Illustrated Bible Dictionary. Me ulul ngay ni gaar: “Rarogon yu Egypt, nge Greece, nge Roma ko salpiy e be tor nga daken e maruwel ni ma tay e piin ni sib. Nap’an e bin som’mon e chibog ko Kristiano, u Italy e ra dalip e girdi’ ma taabe’ riy e sib ma yugu boch e nam e ra lal e girdi’ ma taabe’ riy e sib.”
2 Yugu aram rogon ni lan e nam nu Israel kakrom ma ki immoy e girdi’ ni yad be pigpig ni sib rok be’, fare Motochiyel ni kan pi’ u daken Moses e ri ma yororiy e pi sib ni piyu Israel e rayog ni nge pigpig ni sib rok be’ ni dabi pag nel’ e duw. Nap’an ni ra taw ko bin medlip e duw, ma rayog ni nge “yan ni ke puf rogon ma dabi pi’ puluwon.” Machane fapi motochiyel ni be yog ko mang e ngan rin’ ko piin sib e rib thabthabel ma ri bay e runguy riy ma arfan ni fare Motochiyel ni kan pi’ u daken Moses e be yog ni gaar, ‘Rib t’uf e masta rog rog, nge leengig nge pi fakag; dabug ni nggu wan ni ke pufrogog,’ ma aram e masta rok e ra fek nge chuchugurnag ko bin riyul’ e Got ma ra fek nge gir’eg ko mab ara duga’; ma ra kuruf tel, ma ra mang sib rok ni manemus.”—Exodus 21:2-6; Levitikus 25:42, 43; Deuteronomy 15:12-18.
3. (a) Mitin ngan e sib e ke fanay e pi Kristiano ko fa bin som’mon e chibog? (b) Mang e ke k’aringdad ni ngad pigpiggad ku Got?
3 Fare yaram ni be’ e nge pigpig ni sib rok be’ ni lem rok e ke dag yaan e sib ni tin riyul’ e Kristiano e yad bay u tanggin. Reb riy, e piin ni yoloy e Bible ni Paul, nge James, nge Peter, nge Judas e ka rogned ni yad e sib rok Got nge Kristus. (Titus 1:1; James 1:1; 2 Peter 1:1; Jude 1) I puguran Paul ngak e pi Kristiano nu Thessalonika ni kar “pied keru’rad ko liyos [rorad] ni fan ni ngar manged e sib ko bin riyul’ e Got nib fas.” (1 Thessalonika 1:9) Mang e ke k’aring e pi Kristiano nem ni ngar manged sib rok ni lem rorad? Tin riyul’ riy, mang e ke k’aring e pi sib nu Israel ni kar dabuyed ni nga ranod ngar manged e girdi’ ni ke pufrogorad? Gathi bochan e t’ufeg rorad ko masta rorad? Be’ ni ke mang sib rok Got nrogon e Kristiano e bochan e t’ufeg rok ngak. Nap’an ni kad nanged e bin riyul’ e Got nib fas ma ke t’uf rodad, ma kada adaged ni ngada pigpiggad ngak “u polo’ i gum’irchadad ngu polo’ e yafas [rodad].” (Deuteronomy 10:12, 13) Ere, ra ngada manged sib rok Got nge Kristus ma mang e ba muun ngay? Mang e ra rin’ e re n’ey ko yafas rodad u gubin e rran?
“Urngin Ban’en ni Ngam Rin’ed ni Fan e Nga Nog e Sorok Ngak Got
4. Uw rogon ni gad ra mang sib rok Got nge Kristus?
4 Ba sib e kan weliy fan ni aram “be’ ara boch e girdi’ nib mil farad ngak be’ min ta’ ni nga ur folgad rorad u urngin ban’en.” Jehovah e mil fadad ngak u nap’an ni kada ognaged e yafas rodad ngak min taufenagdad. “Ere gathi gimed e mmil famed ngomed. Ya ke chuw’iymed nib tolang puluwmed,” i weliy apostal Paul fan. (1 Korinth 6:19, 20) Riyul’ ni re puluwon nem, e aram e maligach ni pi’ Jesus Kristus, ya bochan e re n’em ma ke yog rodad ni ngad manged e pi tapigpig rok Got, ni demtrug ko gadad e Kristiano ni kan dugliydad ara girdi’ nib chag ngodad ni bay e athap rorad u roy u fayleng. (Efesus 1:7; 2:13; Revelation 5:9) Arfan, ni nap’an ni kan taufenagdad, ma ke “mil fadad ngak Jehovah,.” (Roma 14:8) Bochan ni kan chuw’iydad nib tolang pulwon nga rachaen Jesus Kristus, maku kad manged e sib rok ma ke milfan ngodad ni ngad folgad ko fapi motochiyel rok.—1 Peter 1:18, 19.
5. Gadad e pi sib rok Jehovah, mang maruwel e rib ga’fan ni kari milfan ngodad, ma uwrogon ni ngada lebuguyed?
5 Piin ni sib e thingara folgad ko masta rorad. Pigpig ni gad ma ta’ e lem rodad ma t’ufeg rodad ko masta rodad e ir e be k’aringdad. Be yog e bin 1 John 5:3 ni gaar, “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed; ma tin ni ke yog ni ngada rin’ed e gathi rib mo’maw’. Ere, gadad, e gad ma fol rok Got ya ireray e mich riy ni bay e t’ufeg rodad ngak. Ma m’ug e re n’ey ko urngin ban’en ni gad ma rin’. I yog Paul ni gaar, “Demtrug e n’en ni gimed ra rin’, ndemtrug ko ngam abichgad ara ngam garbodgad, ma urngin ni ngam rin’ed ni fan e nga nog e sorok riy ngak Got.” (1 Korinth 10:31) Yafas u gubin e rran, ni mus nga ban’en nib achichig, ma gad baadag ni ngada daged ni gadad e “sib rok Jehovah.”—Roma 12:11.
6. Bochan ni kada manged sib rok Got ma mang e ra rin’ e re n’ey u nap’an ni gad ra turguy ban’en ko yafas rodad? Mu weliy fan.
6 Reb riy, e nap’an ni gad ra turguy ban’en, ma ri gad baadag ni ngada fal’eged i lemnag nib fel’ rogon e tin nib m’agan’ e Masta rodad u tharmiy ngay, ni Jehovah. (Malaki 1:6) Pi n’en nib mo’maw’ ni ngan turguy e ra skengnagdad ko gad ra fol rok Got fa danga’. Gur gad ra fol ko fonow rok ko bin ni ngada folgad ko tin ni baadag gum’ircha’dad nib “sasalap” mab “kireb”? (Jeremiah 17:9) Melisa, ni reb e Kristiano ni dariy e pumoon rok, e kefin ni un ko taufe meb reb e pagal ni be dag ni baadag. Be m’ug ni fare pagal e ffel’, ma be un ko Pi Mich Rok Jehovah ko fol Bible. Yugu aram rogon, ma reb e piilal e ke non ngak Melisa u murung’agen fare gonop ni ngan fol ko thin ni ke yog Jehovah ni ngan mabgol “ni ke mus nu lan e ulung rok Somol.” (1 Korinth 7:39; 2 Korinth 6:14) Ke yog Melisa ni gaar: Mo’maw’ rog ni nggu fol ko re fonow ney. Machane kug turguy ni nggu rin’ nrogon ya bochan ni kug ognag e yafas rog ngak Got ni fan ni nggu rin’ e tin nib m’agan’ ngay, nggu fol ko thin ni be yog nib tamilang.” Me yib ngan’ e n’en ni ke buch , me yog ni gaar: “Ri gub felfelan’ ni kug fol ko fare fonow. Ke tal fare pagel ko fol Bible. Faanra kug ulul ko re tha’ nem, ma chiney e susun kug mabgolgow reb e pumoon ni de michan’.”
7, 8. (a) Mang fan ni thingar dabi pag rogon ni gad ra lemnag ko uw rogon ni ngada felfelan’naged e girdi’? (b) Mu weliy ko uw rogon ni ngan gel ko marus ko girdi’?
7 Bochan e gadad e pi sib rok Got, ma thingardabda manged e sib rok e girdi’. (1 Korinth 7:23) Riyul’, ni dariy bagadad ni baadag ni nge dabi fel’ u wan’ e girdi’, machane thingarda lemnaged ni piin Kristiano e bay e motochiyel rorad nib thil ko tin ni ma fol e girdi’ nu fayleng riy. I fith Paul ni gaar: “Gur gube guy rogon ni nggu fel’ u wan’ e girdi’?” Tin tomren e thin rok e gaar: “Faan mang e gu be guy rogon ni nggu fel’ u wan’ e girdi’, ma dab gu mang reb e tapigpig rok Kristus.” (Galatia 1:10) Dabiyog ni nga darod nga laniyan’ e girdi’ ni ngan fal’eg laninrad. Ere, mang e rayog ni ngada rin’ed u nap’an ni be towasariydad e girdi’ ni nga darod nga lanin’rad?
8 Mu lemnag e n’en ni buch rok Elena, ni reb e Kristiano nu Spain nib fel’ yangaren. Immoy boch e girdi’ ni yad nga ba thal e skul ni yad ma pi’ e racha’ rorad ngak e girdi’. Kar nanged ni Elena, e reb e Pi Mich Rok Jehovah, ma dabi pi’ e racha’ maku dabi fanay e racha’. Nap’an ni ke mab e kanawo’ ni nge weliy e michan’ rok ngak e piin ni yad nga ba thal e skul ni yad gubin, me yog Elena ni baadag ni nge pi’ e welthin. Ke weliy Elena ni gaar, “Tin riyul’ riy, e kug rus nib gel ni nggu rin’ e re n’ey. Machane kug fal’eg rogog nib fel’ rogon, ma angin nib riy e kan gin ngay. Boor ko girdi’ ni gamad nga skul e kar ted fag, ma fare sensey e ke yog ngog ni baadag e n’en ni kug rin’. Ma tin kabaga’ fan, e ke fel’ u wan’ug ni kug ayuweg fithingan Jehovah ma ke yog ni nggu weliy fan nib tamilang ni thin nu Bible e aram e n’en ni ke mich u wan’ug,” (Genesis 9:3, 4; Acts 15:28, 29) Arrogon, gadad e sib rok Got nge Kristus, gadad e girdi’ nib thil. Machane, rayog ni nge tay e girdi’ fadad ni faanra kad fal’eged rogodad ni ngada ayuweged e michan’ rodad u fithik’ e tayfan.—1 Peter 3:15.
9. Mang e gad ra fil ko fare engel ni i m’ug ngak John ni apostal?
9 Ra dabda paged talin ni gadad e sib rok Got ma ku rayog ni nge ayuwegdad ni nguuda pared nib sobut’an’dad. Ba’ biyay, ni John ni apostal e kari gin ngay u nap’an ni kan piliyeg e changar rok ke guy fare Jerusalem nu tharmiy ma arfan ni ke paraw nga but’ u tooben ay fare engel ni ir e ta yog e thin rok Got. I yog fare engel ngak ni gaar, “Dab mu rin’ e binir! Ya gadow l’agruw ma tapigpig, ma taareb rogog ngak pi walagem ni aram fapi profet, nge urngin e piin ni yad be fol ko thin ni ba’ u lan e re ke babyor ney! Ere mu siro ma ga meybil ngak Got.” (Revelation 22:8, 9) Rib fel’ e n’en ni dag fare engel ni nge fol urngin e sib rok Got riy! Boch e Kristiano e sana bay e maruwel rorad nib thil mab fel’ u lan e ulung. Yugu aram rogon, me yog Jesus ni gaar: “Faanra baadag bigimed ni nge mang ir e ba tolang, ma ir e thingari mang tapigpig romed ni gimed gubin; ma faanra ba adag bigimed ni ir e nge m’on, me ir e thingari mang sib romed.” (Matthew 20:26, 27) Gadad pi gachalpen, ere gadad gubin ma sib.
Kemus ni Maruwel Romad e Kug Rin’ed
10. Mu dag boch e Thin nu Bible ni ra dag ni pi tapigpig rok Got nib yul’yul’ e gathi gubin ngiyal’ nib mom ngorad ni ngara rin’ed e tin nib m’agan’ ngay.
10 Ngan rin’ e tin nib m’agan’ Got ngay e gathi gubin ngiyal’ nib mom ngak e girdi’ ni dawora flontgad. Moses ni profet e ke maruwaran’ ni nge fol u nap’an ni ke yog Jehovah ngak ni nge yan nge chuweg pi fak yu Israel ni dab kura manged sib rok piyu Egypt. (Exodus 3:10, 11; 4:1, 10) Nap’an ni kan pi’ e maruwel ngak Jonah ni nge yan nge wereg e thin ko pufthin ngak e girdi’ nu Nineveh, me “sak’iy me mil rok Jehovah nge yan nga Tarshish.” (Jonah 1:2, 3) Baruch, ni ir e ta yol rok Jeremiah ni profet, e ke gun’gun’ me yog ni ke chachalban. (Jeremiah 45:2, 3) Mang e susun ni ngada rin’ed u nap’an ni tin gad be yim’ ni bochan e ba togopuluw ko ngan rin’ e tin nib m’agan’ Got ngay? Reb e fanathin ni pi’ Jesus e ra pi’ e fulweg.
11, 12. (a) Mu weliy buchuw i fan fare fanathin rok Jesus ni bay ko Luke 17:7-10. (b) Mang e gad ra fil ko fanathin rok Jesus?
11 I weliy Jesus murung’agen reb e sib ni i ayuweg ba ran’ i gamanman rok e masta rok u lan reb e rran ni polo’ u daken e ted. U nap’an ni taw fare sib nga tabinaw, ni ke aw paruwon ya bochan ni ke maruwel nib gel ni sogonapan 12 e awa, ma de pining fare masta ni nge par nga but’ nge kay e ggan nib fel’ lamen. Tin ni rin’ e masta rok e yog ni gaar: “Mu ngongliy rogon e ggan rog ko blayal’, ma ga m’ag madan e taang nga daken e mad rom nguum pi’ ganag nguug abich ma gu be garbod; nge mu’ ma aram e rayog ni ngam koy ban’en ma ggarbod.” Rayog rok fare sib ni nge ngongliy e tin nib t’uf rok u tomren ni ke pigpig ko masta rok. I museg Jesus e fanathin rok u daken e thin rok ni gaar: “Ere ku er rogomed; faanra mmu’gad i rin’ e tin ni ka nog ngomed ni ngam rin’ed ma nge lungumed, Gamad bogi tapigpig; ni kemus ni maruwel romad e kug ngongliyed.”—Luke 17:7-10.
12 Gathi ke weliy Jesus e re fanathin ney ni fan ni nge dag ni dariy fan u wan’ Jehovah e n’en ni kad rin’ed ko pigpig ngak. Be yog e Bible nib tamilang ni gaar: “Got e gathi de mat’aw ni nge pagtalin e tin ni kam rin’ nge t’ufeg ni kam dag u fithingan.” (Hebrews 6:10) N’en ni kad filed ko fanathin rok Jesus e aram ba sib e dabiyog ni nge felfelan’nag ir ara kemus ni nge lemnag ko uwrogon ni nge fel’rogon. Nap’an ni kad ognaged gadad ngak Got ma kad mel’eged ni ngad manged sib rok, ke fel’ u wan’dad ni ngada ted nib m’on e tin nib m’agan’ Got ngay ko tin ni gad baadag.
13, 14. (a) Wuin e thingarda taleged gadad ko tin ni gad baadag? (b) Mang fan ni thingar da ted nib m’on e tin nib m’agan’ Got ngay ko yafas rodad?
13 Ngan fil e Thin rok Got nge boch e babyor rok “fare tapigpig nib yul’yul’ mab gonop” ma sana ba t’uf e athamgil nib gel ni ngad ted. (Matthew 24:45) Sana ireray e magawon ni baga’ ni faanra gathi ri gad ma bieg e babyor ara faanra reb e babyor e be weliy murung’agen e “tin ni i tay nib mith.” (1 Korinth 2:10) Machane, gathi thingarda ted e tayim ni fan ko fol Bible ni goo gadad? Sana bat’uf ni ngada llowan’niged gadad ni fan ni ngada pared nga but’ ma ngada ted e tayim ni ngada filed boch ban’en . Machane, faanra dabda rin’ed ban’en ni aram rogon, ma uw rogon ni ngeb lamen e “ggan nib el ngodad [ni] piilal e ngar ked”?—Hebrews 5:14.
14 Ma uw rogon e pi tayim ni gad ma yib nga tabinaw rodad ni ke aw parowdad u tomren e maruwel rodad nib gel u reb e rran ni polo’? Sana ba t’uf ni ngada towasariyed gadad ni ngada uned ko muulung ko Kristiano. Ara kad dabuyed ni ngad machibnaged e girdi’ ni dad nanged yad. I yog Paul ni bay e tayim ni gad ma wereg e thin nib fel’ nib ‘m’agan’dad ngay.’ (1 Korinth 9:17) Machane, gad ma rin’ e pi n’en ney ya bochan Jehovah ni ir e Masta rodad u tharmiy, nib t’uf rodad ma ke yog ni thingar da rin’ed. Ma gathi ke gaman ban’en u wan’dad me pasigan’dad u tomren ni kad athamgilgad ni ngada filed ban’en, ma kad uned ko muulung, ma kad machibgad?—Psalms 1:1, 2; 122:1; 145:10-13.
Dabmu Changar Nga “Tomur”
15. Uwrogon ni dag Jesus rogon ni ngan yan nga laniyan’ Got?
15 I dag Jesus Kristus ni ma yan nga laniyan’ e Chitamangin u tharmiy nrib gel. I yog ngak pi gachalpen ni gaar, “Ku gub u tharmiy nga but’ ni nggu rin’ e tin be finey e en ke l’ugeg ku gub, ma gathi nggu rin’ e tin ni gu be finey. (John 6:38) Nap’an ni kari kireban’ u milay’ nu Gethsemane, me meybil ni gaar: “Chitamag, faanra yog ma ga fek e re kap ney ngam chuweg rog! Machane gathi tin ni gub adag e ngam rin’ ya tin ga baadag.—Matthew 26:39.
16, 17. (a) Susun uwrogon u wan’dad e tin ni kada paged nga tomur? (b) Mu dag ko uw rogon nib puluw laniyan’ Paul u nap’an ni ta’ ni “goo chubung” e tin nu fayleng nrayog ni nge fanay.
16 Baadag Jesus Kristus ni ngad pared nib yul’yul’ ko n’en ni kad turguyed ni ngad manged sib rok Got. I yog ni gaar: “En nra tabab i gi’ e but’ u milay’ mi i changar nga keru’ e dabi yib fan ko gagiyeg rok Got.” (Luke 9:62) Nguuda lemnaged e pi n’en ni ke thumur e rib mudugil nde mat’aw ni nge rin’ e piin ni sib rok Got. Thingari ga’ fan u wan’dad e tin ni bay rodad nbochan ni kada turguyed ni ngada manged e sib rok Got. I yol Paul ngak piyu Filippi ni gaar: “Ya urngin ban’en ma kug matheeg ngay ni kari yan i aw ni lus ni bochan e bin ni baga’ fan e nggu nang Kristus ma aram fan ni kug n’ag urngin ban’en; ya kug finey ni goo chubung, ni fan e nge yog Kristus ngog.”—Filippi 3:8.
17 Mu lemnag urngin ban’en ni i yog Paul ni goo chubung me pag ni fan ni nge mel’eg e taw’ath nib rok Got ni ke mang sib rok. I pag ni gathi kemus ni fel’ rogon u fayleng ya ku rayog ni nge mang ba tayugang’ ko teliw ni Judaism. Faanra ulul Paul ni be un ko Judaism ma sana yira pi’ ngak e liw ni bod e liw rok Simeon, ni fak Gamaliel ni sensey rok Paul. (Acts 22:3; Galatia 1:14) Simeon e ke mang ani ga’ ko fapi Farise mab tolang e liw rok nyugu aram rogon ni ke maruwaran’ ko togopuluw ni tay piyu Jew ngak piyu Roma ko duw ni 66-70 C.E. Me yim’ u nap’an e re cham nem, ni sana yim’ u pa’ piyu Jew ni tatogopuluw ara pi salthaw nu Roma.
18. Mog reb e ban’en ni ngam dag ni tirok got ban’en ni kan rin’ e ra fek e taw’ath i yib.
18 Boor e Pi Mich Rok Jehovah e kar folgad ko tin ni rin’ Paul. Ke yog Jean ni gaar, “U lan in e duw u tomren ni kug pag e skul, me yog reb e maruwel ngog ni executive secretary rok reb e lawyer nib gilbuguwan u London. Kug felfelan’ ko maruwel rog me yog boor e salpiy ngog riy, machane u lan gum’irchaeg e gu manang ni rayog ni nggu yoornag boch e pigpig rog ngak Jehovah. Tomur riy, mug pi’ e babyor ni gu be yog ni nggu tal ko maruwel ma kug tabab ni nggu un ko pioneer. Kug pining e magar ni kug rin’ e re n’em ni ke chuchugur ko 20 e duw ni ke yan! Pigpig ni polo’ e tayim rog ni kug ta’ e kari suguy e yafas rog ni kab fel’ ko urngin mit e maruwel ko tayol ara secretary. Dariy ban’en ni ra gamaneg lanin’uy ni kab gel ko tin ni baaray ni ga be guy rogon ni be thiliyeg e thin rok Jehovah e yafas ko girdi’. Rib fel’ ni ngan mang bang ko re maruwel nem. N’en ni kad pied ngak Jehovah e dariy ban’en ni rayog ni ngan taareb rogonnag ko pi n’en ni ke pi’ ngodad.
19. Mang e thingarda duguliyed, ma mang fan?
19 Sana ra thil thil rogodad. Machane, rogon ni kad ognaged gadad ngak Got e dabi thil. Ka gad be par ni gadad e sib rok Jehovah, me pagdad ni ngada turguyed rogon ni ngarda fanayed e tayim rodad, nge gelngidad, nge salap rodad, nge yugu boch ban’en. Arfan, ni rogon ni ngada turguyed ban’en e ra dag ga’ngin e t’ufeg rodad ku Got. Maku ra dag ko ri gad baadag ni ngada paged fadad fa danga’. (Matthew 6:33) Yugu demtrug rarogodad, ma gathi thingarda pied ngak Jehovah e tin th’abi fel’ ni bay rodad? I yoloy Paul ni gaar: “Ya faanra ba pasigan’med ngay ni ngam pied ban’en, ma ra fek Got e tin ni kam pied nib tow’ath nrogon e tin nrayog ni ngam pied, ma gathi tin ndariy romed.”—2 Korinth 8:12.
“Gimed e Ba’ Romed Wom’engimed”
20, 21. (a) Mang e woomngin nra yibnag e sib rok Got? (b) Uw rogon ni ma taw’athnag Jehovah e piin ni ka ra pied ngak e tin th’abi fel ni bay rodad?
20 Rogon ni ngan mang e sib rok Got e de tomal. N’en nib thil riy, e be ayuwegdad ni dabkuudad manged sib rok e masta nib kireb ni ma chuweg e felfelan’ rodad. I yoloy Paul ni gaar, “Bochan kan chuwegmed u tan pa’ e denen ya kam manged e sib rok Got, ma ba’ romed woomngimed ya kam manged girdi’ ni thothup, ma tomur riy e yafas ni dariy n’umngin nap’an.” (Roma 6:22) Rogon ni kada ted gadad ni sib rok Got e keb woomngidad ya kan taw’athnagdad ko ngongol nib thothup ara ba biech. Maku, ra pow’iyey ko yafas ni manemus ko gabul nge langlath.
21 Ri ma pi’ Jehovah ban’en ngak e sib rok. Nap’an ni gad ra rin’ e tin th’abi fel’ ko pigpig rodad ngak, ma ma bing “mban e tharmiy” me puog nga dakendad “e flaab nge mada’ ko ngiyal’ ni dakuriy ban’en ndariy rodad.” (Malaki 3:10) Rib gel e felfelan’ ni ra nguuda ululgad ko pigpig ni gadad e pi sib rok Jehovah ni manemus!
Ka Ga manang
• Mang fan ni kad manged sib rok Got?
• Uw rogon ni ngada daged ni gad be fol ko tin m’agan’ Got ngay?
• Mang fan ni thingari m’agan’dad ngay ni ngada ted e tin nib m’agan’ Jehovah ngay nga m’on ko tirodad?
• Mang fan ni thingar dabda sapgad ko pin’en ni bay u keru’dad?
[Picture on page 12, 13]
Fare yaram u Israel ni nge mang sib e girdi’ ni lem rok e be dag yaan e pigpig ni ma ta’ e Kristiano
[Picture on page 13]
Kada manged sib rok Got u nap’an ni kan taufenagdad
[Pictures on page 13]
Ma tay e Kristiano e tin nib magan’ Got ngay nib m’on ko yafas rorad
[Picture on page 14]
I maruwaran’ Moses ni nge rin’ e maruwel rok