Nguuda Pared Ni Dabkuud Ngongolgad Ni Gad Be Yan Nga Tabon Lanin’dad
”I yim’ [Kristus] ni fan ngak e girdi’ ni urngin ni bochan e piin ni yad ba fos e nge dab ku ur ngongolgad ni yad be yan nga tabon lanin’dad.—2 KORINTH 5:15.
1, 2. Mang motochiyel u Bible e ke k’aring pi gachalpen Jesus ko fa bin som’mon e chibog ni dab kuura siingad?
BIN TOMUR e nep’ rok Jesus u fayleng. Ra yan in e awa, ma ra pi’ e yafas rok ngak urngin e girdi’ ni ke mich u wan’rad. Re nep’ nem, i weliy Jesus boor ban’en nib ga’ fan ngak e pi apostal rok nib yul’yul’. Mab muun ngay fare motochiyel ni murung’agen ba felngin ni ir e ra mang pow ko pi gachalpen min nangrad. Me yog ni gaar, “Nggu pi’ reb e motochiyel nib biech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad nang ni gimed pi gachalpeg.”—John 13:34, 35.
2 Tin riyul’ e Kristiano e susun ni ngara daged e t’ufeg ni yima pagfay ni fan ngorad ma ra ted e tin nib t’uf rok e pi walagrad nib m’on ko tirorad. Thingar dabi maruwaran’rad ni ngar ‘pied e pogofan rorad ni fan ko pi fager rorad.’ (John 15:13) Uw rogon fare motochiyel nib biech u wan’ e pi Kristiano kakrom? Reb e babyor rok Tertullian nrib gilbuguwan ni Apology, ko fa bin l’agruw e chibog e ke fanay e thin rok yugu boch e girdi’ ni ka rogned murung’agen e Kristiano ni gaar: ‘Am sap nga feni gel e t’ufeg rorad ngorad; ma kari m’agan’rad ngay ni ngar m’ad ni fan ngak boch i yad.
3, 4. (a) Mang fan ni ngada togopuluwgad ko lem ni fel’ ngak? (b) Mang e gad ra weliy ko re article ney?
3 Gadad e ku thingarda uned i fek gilban bochi gadad, ma aram gad be lebuguy fare motochiyel ni ke pi’ Kristus.” (Galatia 6:2) Machane, chogow ireray e magawon ni bin th’abi ga’ ni be taleg e girdi’ ni dabra folgad ko fare motochiyel ni ke pi’ Kristus nge rogon ni ngada ‘t’ufeged Jehovah ni Got rorad u polo’ i gum’irchadad, nge yafas rodad, nge lanin’dad ma ngada t’ufeged e piin buguli yoror rodad ni bod gadad.’ (Matthew 22:37-39) Bochan ndaworda flontgad, mab mom ni nge aw ni goo gadad e gad be lemnagdad. Maku bay e mochuch ni ma yib ko yafas u gubin e rran, ngu lan e skul nge tabon e maruwel ni girdi’ riy e goo be lemnag rogon ni nge tolang ngak yugu boch e girdi’, ma yad ma athamgil ni nge yog e tin nib t’uf ko yafas rodad, ma lem ni aram rogon e ra gel i yan. Lem ni aram rogon e dawori war. I ginangey Paul ni apostal ni gaar: “U nap’an e tin tomren e rran . . . girdi’ e kari mus ni yad e ri yad be lemnagrad.”—2 Timothy 3:1, 2, Phillips.
4 Bang ko tomur ko machib ni tay Jesus u fayleng, me pi’ dalip ban’en ngak pi gachalpen ni rayog ni nge ayuwegrad ngar gelgad ko lem ni fel’ ngak. Mang e re n’em, ma uw rogon ni nge fel’ rogodad ko thin ni yog?
Ban’en nib Togopuluw nib Manging’!
5. Nap’an ni yibe machib u lel’uch u Galilee, mang e ke yog Jesus ngak pi gachalpen, ma mang fan ni kar gingad ngay?
5 I machib Jesus ko gin nib chuchugur nga Ceasaria Filippi u lel’uch u Galilee. Re binaw ney nib gapas mab fel’ yaan, e gowa ba puluw ni ngan fafel riy ko bin ni ngan pag fay. Machane, nap’an ni immoy Jesus u rom, i tabab ni nge dag ngak pi gachalpen ni “thingari yan nga Jerusalem nge gafgow rok e piin ni piilal nge pi tolang ko prist nge scribe, min li’ ngem’, ma chirofen nra man e dalip e rran ngay e bay ni faseg ko yam’.” (Matthew 16:21) Baga’ ni kari kireban’ e pi gachalpen Jesus ni bochan e n’en ni ke yog, ya bochan ke mada’ ko ngiyal’ nem ma ka yad be lemnag ni Ani Ga’ rorad e nge tababnag i sunmiy Gil’ilungun u fayleng!—Luke 19:11; Acts 1:6.
6. Mang fan ni ke puwan’ ngak Peter nrib gel?
6 Chingiyal’ nem “me fek Peter [Jesus] nga orel rorad ngi i puwan’ ngak, ni be gaar: ‘Somol, mu runguyem; nge dabi buch rom ban’en ni aram rogon.’ ” Mang e ke rin’ Jesus? “Me chel Jesus u luwan’ nge yog ngak Peter ni gaar: ‘Satan mu chuw rog! Ya kam dibchay u kanawo’ rog, ya lem ni ga be tay e lem rok e girdi’, ma gathi lem rok Got.’ ” Rib gel e thil u thilin e lem rorow! Ke m’agan’ Jesus ngay ni nge pagfan nge gafgow nge rin’ e n’en ni ke pi’ Got ngak ni nge rin’ ni ra tomur riy ma ra yim’ min tining nga baley e gek’iy ni yima gafgownigey riy ni ra buch ni daki yoor e pul nga m’on. Ma Peter e ke yog reb e kanawo’ nib mom. “Mu runguyem,” i yog ni aram rogon. Dariy e maruwar riy nib fel’ e n’en ni be lemnag Peter. Yugu aram rogon, me puwan’ Jesus ngak ya bochan ngiyal’ nem e ke pag Peter Satan ni nge gagiyegnag laniyan’. Ya lem ni be tay Peter e “lem rok e girdi’, ma gathi Got.”—Matthew 16:22, 23.
7. Rogon e thin ni bay ko Matthew 16:24, mang kanawo’ e ke yog Jesus ni nge lek pi gachalpen?
7 Lingan e thin rok Peter e rayog ni ngan rung’ag e ngiyal’ ney. Girdi’ nu fayleng e ma yog ko girdi’ ni ‘ngam gol ngom’ ara ‘ngam lek e kanawo’ nib mom.’ N’en nib thil riy, e i yog Jesus e lem nib fel’ ni ngan fanay nrib thil. I yog ngak pi gachalpen ni gaar: “Faanra baadag be’ ni nge un ngog, ma thingari pagtalin ir, nge fek baley e gek’iy rok ko gafgow me lekeg ni gubin ngiyal’.” (Matthew 16:22, 23, NW) “Pi thin ney e gathi be pining e girdi’ ni dawora manged gachalpen,” be gaar fare The New Interpreter’s Bible, “ya be pining e piin ni ka ra folgad ko thin rok Kristus ni ka ra fal’eged i lemnag fan ni kar manged pi gachalpen.” Fa dalip i n’en ni weliy Jesus, rogon ni bay ko pi thin nem, e thingari fol e piin ni ke michan’rad ngay. Gad ra weliy urngin e pi n’em ni reb nge reb.
8. Mu weliy fan e ngam pag fam.
8 Som’mon, e thingarda paged fadad. Thin ni Greek ni fan ko “ngan pag fay” e be yip’ fan ni ba m’agan’uy ngay ni nga nog e danga’ ko lem ni fel’ ngak ara lem ni nge fel’ rogoy. Rogon ni ngada paged fadad e gathi be yip’ fan ni kemus ngada siyeged boch e fafel; maku gathi be yip’ fan ni ri dabda rin’ed urngin ban’en ni gad baadag ara ngada kirebnaged gadad. Gathi gadad e ‘mmil fadad ngodad’ ya bochan kada pied e lem rodad nge yafas rodad ni polo’ nge urngin ban’en ni bay riy ngak Jehovah. (1 Korinth 6:19, 20) Yafas rodad e ngada fanayed ni fan ni uda pigpigad ku Got ko bin ni goo gadad e gad be lemnagdad. Rogon ni ngada paged fadad e be yip’ fan ni ke mudugilanin’dad ni ngad rin’ed e tin nib m’agan’ Got ngay, ni yugu aram rogon ni ireray e n’en nib togopuluw ko tin baadag dowdad ni dawori flont. Kad daged ni kad pied gadad ku Got u nap’an ni kad ognaged gadad ngak Got min taufenagdad. Ngemu’ ma ngada athamgilgad ni ngada lebuguyed ni polo’ e yafas rodad ko tin ni kad micheged u nap’an ni kad ognaged gadad.
9. (a) Nap’an ni immoy Jesus u fayleng, mang e be yip’ fan fare ley e gek’iy ko gafgow? (b) Uw rogon ni ngada feked e gek’iy rodad ni yima gafgownagey riy?
9 Bin l’agruw e aram e thingarda feked e baley e gek’iy rodad ko gafgow. Nap’an e bin som’mon e chibog, ma baley e gek’iy ko gafgow e be yip’ fan e gafgow, nge tamra’, nge yam’. Tin yima rin’, e kemus ni piin kar rin’ed e tin ni rib kireb e ngan li’rad ngar m’ad u daken baley e gek’iy ara ngan tiningrad nga lang nga baley e gek’iy ni yima gafgownigey riy. U daken e re thin ney, i dag Jesus ni reb e Kristiano e thingari fal’eg rogon nge m’agan’ ngay ni ra yib e togopuluw nge gafgow ngak, nge thin ni kireb, nge mada’ ko yam’, ni bochan ni ir e gathi bang ko fayleng. (John 15:18-20) Motochiyel ko Kristiano e ir e be daregdad ko girdi’ nu fayleng, aram fan ni ‘yad ma yog e thin nib kireb ngodad.’ (1 Peter 4:4) N’en ni aram rogon e rayog ni nge buch u skul, ngu tabon e maruwel rodad, ara u lan e tabinaw. (Luke 9:23) Yugu aram rogon, ma ke m’agan’dad ngay ni ngad kadedan’dad u nap’an ni girdi’ nu fayleng e yad ra yog e thin nib kireb u murung’agdad ya bochan gadad e dab kuuda pared ni gad be yan nga tabon lanin’dad. I yog Jesus ni gaar: “Ngam felan’gad ko ngiyal’ nra yog e girdi’ e thin nib tagan’ ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopuluw ngomed ni bochan e gimed girdieg. Ngari felan’med, ya bay labgen ni baga’ ni fan ngomed ni kan tay u tharmiy.” (Matthew 5:11, 12) Tin riyul’ riy, rogon ni nge fel’ be’ u wan’ Got e aram e n’en nrib ga’ fan.
10. Mang e ba muun ngay ni nguun lek Jesus ni gubin ngiyal’?
10 Bin dalip, e ke yog Jesus Kristus ni thingarda leked ni gubin ngiyal’. Rogon ni yog fare An Expository Dictionary of New Testament Words, rok W. E. Vine, ni ngan lek e be yip’ fan ni be’ ni be un ngak be’—“ma yow be yan u taareb e kanawo’.” Bin som’mon e John 2:6 e be yog ni gaar: “Ma en nra gaar e be par u fithik’ [Got] e susun e ngi i par e wok rok ni bod rogon ni i rin’ [Jesus Kristus].” Uw rogon ni i yan Jesus? Bochan e t’ufeg rok Jesus ni fan ngak e Chitamangin u tharmiy nge pi gachalpen me aw ni dakuriy tagil’ e fel’ ngak u laniyan’. “Yi Kristus e de yan nga laniyan’,” rogon ni yoloy Paul. (Roma 15:3) Mus u nap’an ni ke magar ara ke yib e bilig ngak, miki tay Jesus e tin nib t’uf rok yugu boch e girdi’ ni kab ga’ fan u wan’ ko tin nib t’uf rok. (Mark 6:31-34) Maku ke athamgil Jesus ni nge machibnag e thin ko Gil’ilungun ma ma fil ban’en ngak e girdi’. Thingarda folwokgad rok ma ngada lebuguyed e maruwel rodad ni ‘ngada pingeged e girdi’ ngar manged pi gachalpen, mi gad fil ngorad rogon ni nguur folgad u gubin e tin ni ke yog ni ngada rin’ed’? (Matthew 28:19, 20) Bochan e ngongol ni urngin, e aram ke dag Kristus e pi n’en nib fel’ ni gad ra fol riy, ma thingarda “leked luwan ay.”—1 Peter 2:21.
11. Mang fan nib ga’ fan ni ngada paged fadad, ma ngada feked fare ley i gek’iy rodad ni yima gafgownigey riy, ma nguuda leked Jesus Kristus?
11 Baga’ fan ni ngada paged fadad, ma ngada feked fare ley i gek’iy rodad ni yima gafgownigey riy, ma nguuda leked e en ni ir e gad be folwok Rok. Gad ra rin’ ban’en ni aram rogon me mang ban’en ni ra togopuluw ko lem ni fel’ ngak ni aram e n’en nra talegey ni dabkun dag e t’ufeg ni yima pagfay. Maku, i yog Jesus ni gaar: “Ya en nra finey ni nge ayuweg e pogofan rok e ra thay rok; ma en nra thay e pogofan rok nbochag e ra pirieg? Be mang e ra fel’rogon be’ riy nfaanra yog ngak e re fayleng ney ni polo’, machane me thay e bin riyul’ e yafas u pa’. Mmudugil ndariy! Dariy ban’en nrayog ni nge pi’ be’ ngki sul e yafas rok ngak?”—Matthew 16:25, 26.
Dabiyog ni Ngada Pigpiggad Nga L’agruw e Masta
12, 13. (a) Mang e n’en ni baadag fare moon ni tagagiyeg ni nge nang me ning e fonow rok Jesus”? (b) Mang fonow ni ke pi’ Jesus ngak, ma mang fan?
12 In e pul nga tomren ni ke weliy Jesus ni pi gachalpen e ba t’uf ni ngara paged farad, me yib reb e pumoon nib tagagiyeg mab fel’rogon ngak me yog ni gaar: “Tamachib, mang e re n’en nib fel’ nthingar gu rin’ me yog e yafas ndariy n’umngin nap’an ngog?” I yog Jesus ngak ni nge “fol ko fapi motochiyel” ni gubin ngiyal’ me weliy boch riy. Me yog fare moon ngak ni gaar: “Yigoo gu be fol ko pi motochiyel nir ni urngin.” Fare moon e baga’ nib yul’yul’ ko n’en ni yog ma riyul’ ni ke athamgil ni nge fol u boch e thin ni bang ko fare Motochiyel ni tin rayog rok. Ere ke fith ni gaar: “Ere mang e n’en ni ka ba’ nthingar gu rin’?” Ma rogon ni fulweg Jesus, e pining fare moon nga ban’en nib thil, ni be gaar: “Faanra gab adag ni ngam yal’uw, me ere mman ngam pi’ ni chuway’ urngin ban’en ni bay rom ma ga fek’ e salpiy riy ngam pi’ ngak e piin ni yad ba gafgow, ma aram e ke yog e flaab ngom u tharmiy; ma ga yib ngam un ngog.”—Matthew 19:16-21.
13 Ke guy Jesus ni rogon ni nge yog rok fare moon ni nge pigpig ku Jehovah ni polo’ e yafas rok, mab t’uf ni nge chuweg e n’en ni ri be magawonnag e yafas rok ni aram e chugum rok. Pi gachalpen Kristus nib riyul’ e dabiyog ni ngar pigpiggad nga l’agruw e masta. Dabiyog ni nge “pigpig ngak Got miki pigpig ngak e Salpiy.” (Matthew 6:24) Ba t’uf ‘lan owchey’ ni fel’’ ni ngan yiluy ko tirok Got ban’en. (Matthew 6:22) Ra chuweg be’ e chugum rok nge pi’ ngak e piin nib gafgow me ireray e ngongol ko be pag fan. N’en ni ngan ta’ nga lon e pi chugum nem, e ognag Jesus ngak fare moon ni piliung e taw’ath nrib ga’ fan nrayog ni nge kunuy e flaab u tharmiy ni aram e flaab ni yafas rok ni manemus ma tomur riy e rayog ni nge un ngak Kristus ko gagiyeg u tharmiy. Fare moon e dawori fal’eg rogon ni nge pagtalin ir. “Me yan ni ke kireban’, ya rib pire’ ban’en rok.” (Matthew 19:22) Machane, boch i gachalpen Jesus, e bathil e n’en kar rin’ed.
14. Mang e ke rin’ fa aningeg i pumoon ni tafita’ ko n’en ni yog Jesus ngorad ni ngar leked?
14 Sogonapan l’agruw e duw u m’on riy, me yog Jesus e thin ni aram rogon ngak fa aningeg i pumoon ni tafita’ ni fithingrad e Peter, nge Andrew nge James, nge John. L’agruw i yad e yad be fita’ ko ngiyal’ nem, ma l’agruw i yad e yow be fal’eg e nug rorad. Me yog Jesus ngorad ni gaar: “Mu unew ngog, mu gu fil ngomew rogon i yognag e girdi’”. Yad aningeg e kar digeyed e maruwel rorad ni tafita’ mi yad un ngak Jesus ni polo’ e yafas rorad.—Matthew 4:18-22.
15. Uw rogon ni ke pagfan reb e Mich Rok Jehovah ir e ngiyal’ ney ni fan ni nge lek Jesus?
15 Boor e Kristiano e ngiyal’ ney e kar folwokgad rok fa aningeg e tafita’ ko bin ni ngar folwok gad rok fare moon ni kab pagel mab fel’ rogon. Kar n’aged e chugum nge boch e flaab ko re fayleng ney ni fan ni ngar pigpiggad ku Jehovah. “Nap’an ni ke 22 e duw rog, ma thingar gu dugliy ban’en nrib ga’ fan,” rogon ni yog Deborah. I weliy ni gaar: “Kug fil e Bible ni sogonapan nel’ e pul, ma kug adag ni nggu ognag e yafas rog ngak Jehovah, machane rib gel e togopuluw ni ma tay chon e tabinaw rog ngog. Bokum milyon e salpiy ni bay rorad, ma kar lemnaged ni ra gu mang Mich Rok Jehovah ma ra k’aring e tamra’ ngorad. Kar pied ngog 24 e awa ni nggu dugliy lanin’ug ko mang e nggu mel’eg reb e yafas ni rib fel’ rogon fa tin riyul’. Faanra dab gu tal i guy e Pi Mich Rok Jehovah ma dariy ban’en ni nge pi’ e tabinaw rog ngog. Ke ayuweg Jehovah ni nggu dugliy ban’en nib mat’aw me pi’ gelngig ni nggu lebuguy e re n’em. Kug un ko pigpig ku Got ni polo’ e tayim rog u lan 42 e duw, ma ri da gu kalngan’ug. Bochan ni kug digey rarogon e yafas nib siin, ma ri baadag e fafel, ma kug digey e yafas ni dariyfan ma ke sug ko kireban’ ni ireray e n’en ni gu ma guy rok chon e tabinaw rog. Gamow e pumoon rog, e kug ayuwegew ba pag raay e girdi’ ni kar nanged e tin riyul’. Pi cha’ nem ni kug ayuwegew ko tirok Got ban’en e kab ga’ fan ngog ko urngin mit e chugum.” Bokum milyon e Pi Mich Rok Jehovah ni ku be lem ni aram rogon. Ma uw rogom?
16. Uw rogon ni ngada daged ni dakuuda ngongolgad ni gad be yan nga tabon lanin’dad?
16 Rogon ni yad baadag ni dabkuur ngongolgad ni yad be yan nga tabon lanin’rad e ke k’aring bokum biyu’ e Pi Mich Rok Jehovah ni ngar uned ko maruwel ni pioneer, ara tamachib ko Gil’ilungun ni polo’ e tayim rorad. Boch i yad, ni rarogon e par rorad e dabiyog ni ngar uned ko machib ni polo’ e tayim rorad, e kar feked e lem ko pioneer yad ma machibnag e thin ko Gil’ilungun nrogon nib th’abi fel’ ni rayog rorad. Piin gallabthir e ku be dag e ngongol ni aram rogon u nap’an ni yad be fanay boor e tayim rorad ma yad be pag e tin ni baadag dowrad ni fan ni ngar skulniged e pi bitir rorad ko tirok got ban’en. U reb e kanawo’ ngo reb, e gadad gubin ni rayog ni ngada daged ni tin ni bay rogon ko Gil’ilungun e ireray e pi n’en nib m’on ko yafas rodad.—Matthew 6:33.
T’ufeg Rok Mini’ e Be Gagiyegnagdad?
17. Mang e ma k’aringdad ni ngada paged fadad?
17 Ngan dag e t’ufeg ni ngan pag fay e gathi ba kanawo’ ni rib mom ni ngan lek. Machane mu lemnag ko mang e be k’aringdad ni ngad yodoromgad. I yoloy Paul ni gaar: “Gelngin fanmad t’uf rok Kristus e ir e be gagiyegnagmad, ya kug nanged ni taareb e girdi’ e yim’ ni fan ngak urngin e girdi’ . . . I yim’ ni fan ngak e girdi’ ni urngin ni bochan e piin ni yad ba fos e nge dab ku ur ngongolgad ni yad be yan nga tabon lanin’rad machane ngar ngongolgad ni yad be yan ngan’ faanem ni ir e ke yim’ ni fan ngorad ma kan faseg ko yam’ ni fan ngorad.” (2 Korinth 5:14, 15) T’ufeg rok Kristus e be gagiyegnagdad ni dabkuuda ngongolgad ni gad be yan nga tabon lanin’dad. Ban’en e ram ni ma k’aringey nib gel gelngin! Bochan e ke yim’ Kristus ni fan ngodad, darud lemnaged ni kari milfan ngodad ni ngada ngongolgad ni gad be yan ngan’? Tin riyul’ riy, e felfelan’ ni bochan e t’ufeg nib gel ni dag Got nge Kristus ngodad e ke gagiyegnagdad ni ngada ognaged e yafas rodad ngak Got ma kad manged pi gachalpen Kristus.—John 3:16; 1 John 4:10, 11.
18. Mang fan ni ngan pag fay e ri ba’ fan?
18 Gur rogon ni gad be par ni dab kuuda ngongolgad ni gad be yan nga tabon lanin’dad e ba’ fan? Tomren ni de fol fare moon ni pilung mab fel’ rogon ko thin rok Kristus ni be pining me yan, me yog Peter ngak Jesus ni gaar: “A mu guy, kug paged gubin ban’en kug uned ngom. Ere mang e bay yog ngomad?” (Matthew 19:27) Peter nge yugu boch e apostal e riyul’ ni kar paged farad. Mang e taw’ath ni ra yib ngorad riy? Som’mon me weliy Jesus fare taw’ath ni bay ra uned ngak ngar gagiyeggad u tharmiy. (Matthew 19:28) Re ngiyal’ nem, miki weliy Jesus murung’agen e pi flaab ni ra fanay pi gachalpen ni yad gubin. I yog ni gaar: “En nra pag e tabinaw rok’ ara pi walagen ni pumoon, ara chitamangin, ara pi fak, ara yungi binaw ntafen ni bochag nge bochan e Thin Nib Fel’ ni yib rok Got, e ka boor e tin nrayog ngak ko biney e tamilang . . . ma bin ni bay yib e tamilang e bay yog e yafos riy ngak ndariy n’umngin nap’an.” (Mark 10:29, 30) Kab boor e n’en ni ke yog ngodad ko n’en ni kad paged. Gur gathi riyul’ ni pi walagdad u lan e ulung ni yad e chitamangidad, nge chitiningidad, nge pi walagdad ni pumoon nge ppin, nge piin ni kad ayuweged ko tirok ban’en e kab ga’ fan ko urngin ban’en ni kad paged nbochan fare Gil’ilungun? Mini’ e bay e yafas rok nib fel’—Peter fa fare moon nib pilung mab fel’ rogon?
19. (a) Bin riyul’ e felfelan’ e be tor nga daken e mang? (b) Mang e gad ra weliy ko bin migid e article?
19 Thin rok Jesus nge ngongol rok, e ke dag ni bay e felfelan’ ko pi’ ban’en nge ngan pigpig ku be’, ma dariy e felfelan’ ni ngan siin. (Matthew 20:28; Acts 20:35) Nap’an ni dab kuuda ngongolgad ni be yan nga tabon lanin’dad ya be lek Kristus ni gubin ngiyal’, ma gad ra pirieg ni ke gaman u wan’dad e yafas rodad e chiney ma bay e athap rodad ko yafas ni manemus ko gabul nge langlath. Riyul’ ni, nap’an ni dab kuudad ngongolgad ni gad be yan nga tabon lanindad, ma aram e Jehovah e ke mang masta rodad. Arfan ni kad manged sib rok Got. Mang fan ni mit i sib ney e ba flab? Mang e ma rin’ e re n’ey ko tin gad ma duguliy ko yafas rodad? Bin migid e article e ra weliy murung’agen e pi deer ney.
Ka Ga Manang
• Mang fan ni thingarda togopuluwgad ko lem ni fel’ ngak?
• Mang e be yip’ fan ni ngada paged fadad, ngada feked fare ley e gek’iy rodad ni yima gafgownigey riy, ma ngad leked Jesus ni gubin ngiyal’?
• Mang e ma gagiyegnagdad ni dab kuudad ngongolgad ni gad be yan nga tabon lanin’dad?
• Mang fan ni yafas ni ngan pagfay e ri ba’ fan?
[Picture on page 7]
“Somol, mu runguyem”
[Picture on page 9]
Mang e ke taleg fare moon ni tagagiyeg ni kab pagel ni nge lek Jesus?
[Pictures on page 11]
T’ufeg e be gagiyegnag e Pi Mich Rok Jehovah ni ngar manged e pi tamachib ko Gil’ilungun nib pasig