Mang e Ke Rin’ Gelngin Jesus Kristus Ngom?

ROGON e n’en ni kad lemniged ko bin som’mon e article, rayog ni nge maruwar u wan’uy ko pi n’en ni i fil Jesus e keb angin ko fayleng ni gaangin fa dawor? Bin nib ga’ fan e deer ni ngad deeriyed gadad riy, e aram e, “Mang e ke rin’ gelngin e pi n’en ni i fil Jesus ngog?”

Pi n’en ni i fil Jesus e boor bogi ban’en ni ba muun ngay. Pi n’en nib ga’ fan ni ngan fil ni be yog e pi n’enem e ra yib angin nga urngin yang ko yafas rom. Ngad guyed e n’en ni fil Jesus u murung’agen e ngan mon’eg e tin nib m’on ko yafas min gelnag e fager u thildad Got.

Ngan Mon’eg e Tin nib M’on ko Yafas

Feni pey nbe thil i yan e fayleng e chiney e be fek e tayim nge gelngidad nib ga’ ni bayi n’en ma ba ga’ ni ke mo’maw’ ni ngan lemnag e tirok Got. Mu lemnag be’ nib moon ni ke pag e 20 e duw rok ni nga dogned ni Jerry. Yugu aram rogon ni baadag Jerry ko ngiyal’, ni bay e tayim rok ni nge motoyil nga murung’agen e tirok Got ban’en ni be lemnag nib ga’ fan, ma pi n’en ni be fil riy e yog ni gaar: “Ri dariy e tayim rog ni nggu fol riy. Gu ma maruwel ni nel’ e rran u reb e wik. Kemus ni Madenom e gub tal. Ma tomuren ni kug rin’ e pi n’en ni thingar gu rin’ ma kug magar.” Faan ga ra pirieg nem ni ku bod rogom e n’en ka nog, ma rayog ni yib angin ngom fare n’en ni fil Jesus ko Machib u daken e Burey.

I yog Jesus ko piin kar muulunggad ni ngar motoyilgad ngak ni gaar: “Dabi magafan’med ko yafas romed ko mang e ngam koyed ara mang e ngam unumed, ara rogon ko mang e nga mon’ed nga dakenmed. Gathi yafas e kab ga’ fan ko ggan ma dowef e kab ga’ fen ko mad? Mu fal’eged i guy e arche’ u lan e lang, ya darur yunged e woldug, ara ra ta’red ara ra kunuyed nga naun; machane Chitamangimed nu tharmiy e be duruiyrad. Gathi kab ga’ famed ngorad? . . . Ere ri dabi magafan’dad nge lungudad, ‘Mang e ngad ked?’ ara ‘Mang e ngad unumed?’ ara ‘Mang e n’en ni nga don’ed nga dakendad?’ Ya urngin e pi n’eney e aray e pi n’en ni kem’ e pi nam ni bochan yad be lek. Chitamangimed nu tharmiy e manang nib t’uf romed urngin e pi n’eney. Ere, um pired, ni som’mon e ngam gayed gil’ilungun Got nge feni mat’aw, ma urngin e pi n’eney ni yira pi’ ngomed. (Matthew 6:25-33, New World Translation) Mang e n’en kad filed ko re n’eney?

Gathi be yog Jesus ni dab kud tayedan’dad i maruweliy e tin ba t’uf ko dowef rodad nge chon e tabinaw rodad. Machane, ke micheg Jesus ni faan gad ra mon’eg e tin nge m’on ma gad tay ni tirok Got e ba m’on, ma ra pi’ Got e tin kub t’uf ni dabisiy ni nge yog ngodad. N’en ni ngan fil u roy e murung’agen rogon ni ngauda mon’eged e tin nib m’on nib ga’ fan. Yira lek e re fonow ney ma yira felfelan’ ya “ba felfelan’ e piin ni yad manang nib t’uf e tirok Got rorad.” Matthew 5:3.

Ngan Gelnag e Fager Ngak Got

Piin ni manang nib t’uf e tirok Got rorad e yad manang feni t’uf ni ngar gelnaged e fel’ ko tha’ u thilrad Got. Uw rogon ni ngad fal’eged e tha’ nib fel’ u thildad be’? Gathi gad ra guy rogon ni ngad nanged faanem nib fel’ rogon? Thingar da pied e tayim rodad ni ngada filed murung’agen e lem rok, nge wok, nge gelngin, nge tin ke rin’, nge tin baadag nge tin dabun. Maku aray e pi n’en ni ngan rin’ u nap’an ni ngan fal’eg e fager ngak Got. Ba t’uf ni ngan nang murung’agen nib puluw. Nap’an ni meybil ku Got u murung’agen pi gachalpen, me gaar Jesus: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Arrogon, ra ngan fager ku Got ma ba t’uf ni ngada nanged. Kemus ni gin ma yib e re tamilangan’ nem riy e thin rok Got ni kan thagthagnag, ni fare Bible. (2 Timothy 3:16) Thingarda tayed e tayim rodad ni ngad filed e thin u Bible.

Machane, goo tamilangan’ e de gaman. Ku lan e re meybil nem e yog Jesus ni gaar: “Kar nanged [pi gachalpen] e thin rom.” (John 17:6) Gathi kemus ni yi goo tamilangan’ u murung’agen Got e ngada nanged ya nga kud ngongolgad nib puluw ko re tamilangan’ nem. Fa ku ba uw rogon me yog ni ngad manged fager ku Got. Gur rayog ni ngad lemnaged e fager rodad be’ ni nga i fel’ i yan, ni faanra gad be rin’ e ngongol ni lem rodad ni ba togopuluw ko pi lem nge pi kenggin e motochiyel rok? Ere lem rok Got nge pi kenggin e motochiyel rok e thingari i pow’iy kanawo’dad u lan e yafas rodad.

Rayog ni Fel’ Rogom ko Urngin e Pi n’en ni Ke Fil Jesus

Pi n’en ni ke fil Jesus ni gad ra lemnag ma bogi ban’en nib gamog, ma ba mom, ma ba gel gelngin. Girdi’ e rayog ni fel’ rogorad ni yad ra nang nib fel’ rogon e pi n’en ni ke fil mar rin’ed.

Pi Mich Rok Jehovah ko gin ga ma par riy e ri yad ra felfelan’ ni ngar ayuweged gur ngam nang rogon ni nge fel’ rogom ko tin th’abi gonop e fonow ni ke pi’ be’ ngom. Ri gamad be yog ngom ni ngam non ngorad.

[Picture on page 5]

“Chitamangimed ni bay u tharmiy e be duruiyrad”