Mange Ga Ra Pi’ Nge Yog e Yafas ni Manemus Ngom?
‘Mange rayog ni nge pi’ be’ ngki sul e yafas rok ngak?’—MATT. 16:26.
1. Mang fan nde fol Jesus ko n’en ni yog Peter?
RI GIN apostal Peter ko n’en ni rung’ag ni En Ga’ rok ni Jesus Kristus nib t’uf rok e yog “nrib tamilang” ndabki n’uw nap’an me gafgow nge yim’! N’en ni rin’ Peter—nib mutrug ni kari pagan’ nib puluw e n’en ni be lemnag—e puwan’ ngak Jesus ni gaar: “Somol, mange yigi siy i pag Got nge dor! Ya thingari dabi yib e pi n’ir ngom!” Me pi’ Jesus keru’ ngak Peter me sap ngak yugu boch i gachalpen. Sana ku kar rogned e thin ni yog Peter ngak Jesus. Me gaar ngak Peter: “Satan, mu chuw rog! Ya kam dibchay u kanawo’ rog, ya lem ni ga be tay e lem rok e girdi’, ma gathi lem rok Got.”—Mark 8:32, 33; Matt. 16:21-23.
2. Uw rogon ni weliy Jesus e pi n’en nib t’uf ni nge rin’ pi gachalpen nib yul’yul’?
2 Bin migid ni yog Jesus e sana ayuweg Peter ni nge guy fan ni ke togopuluw Jesus ko n’en ni ke yog ngak. Me “pining Jesus fapi girdi’ ni aram urngirad nge pi gachalpen ngar bad ngak” me gaar ngorad: ‘Faanra baadag be’ ni nge un ngog, ma thingari pag talin ir, nge fek e gek’iy rok, nge lekeg. Ya en nra finey ni nge ayuweg e pogofan rok e ra thay rok; ma en nra thay e pogofan rok ni bochag nge bochan e thin nib fel’ ni yib rok Got e ra fos.’ (Mark 8:34, 35) Ba tamilang ni gathi kemus ni goo ir e nge yim’ ya ku manang ni piin yad be lek luwan ay e ngar fal’eged rogorad ni nge gafgow e yafas rorad ni bochan e pigpig ngak Got. Yad ra rin’ ni aram rogon mab ga’ e tow’ath ni yira pi’ ngorad.—Mu beeg e Matthew 16:27.
3. (a) Mang boch e deer ni ke fith Jesus ngak e piin ni be motoyil ngak? (b) Bin l’agruw e deer rok Jesus e mange be puguran ngak e piin ni ur motoyilgad ngak?
3 Fith Jesus l’agruw e deer ko re ngiyal’ i nem ni gaar: “Be mang e ra fel’ rogon be’ riy ni faanra yog ngak e re fayleng ney ni polo’, machane me thay e bin riyul’ e yafos u pa’?” nge ‘Mange rayog ni nge pi’ be’ ngki sul e yafas rok ngak?’ (Mark 8:36, 37) Ba mom ni nge nang e girdi’ fan e bin som’on e deer. Dariy fan ni faanra yog ngak be’ e re fayleng ney ni polo’ machane me thay e yafas u pa’. Ba’ fan e chugum ni kemus nfaanra kab fas be’ ya rayog ni nge felfelan’ ngay. Bin l’agruw e deer rok Jesus e gaar: ‘Mange rayog ni nge pi’ be’ ngki sul e yafas rok ngak?’ Sana ra puguran ngak e piin ni be motoyil e n’en ni yog Satan u nap’an Job ni gaar: “Be’ nib girdi’ e ra pag urngin ban’en ni fan e nge ayuweg e pogofan rok.” (Job 2:4) Re thin rok Satan ney e sana ba riyul’ ngak e piin ni gathi tapigpig rok Jehovah. Boor e girdi’ ndemtrug ban’en ni ma rin’, me pag e wok nib fel’ ni bochan e nge par nib fas. Machane gathi er rogon ni ma lemnag e Kristiano.
4. Mang nib ga’ fan e deer rok Jesus ngak e Kristiano?
4 Gad manang ni gathi yib Jesus nga fayleng ni fan e nge ayuwegdad nge fel’ fithik’ i dowdad ara nge yoor e chugum rodad ara nge n’uw e yafas rodad ko re fayleng ney. I yib ni nge bing kanawoen e yafas ni manemus ngodad u lan e bin nib beech e fayleng, ma athap rodad ko re yafas nem e ba th’abi ga’ fan u wan’dad. (John 3:16) Be’ nib Kristiano e ra nang ni fan e bin som’on e deer rok Jesus e, ‘Be mang e ra fel’ rogon be’ riy ni faanra yog ngak e re fayleng ney ni polo’ me pag e athap rok ko yafas ni manemus?’ Fulweg riy e, dariy. (1 John 2:15-17) N’en nrayog ni nge ayuwegdad ngad fulweged e bin l’agruw e deer rok Jesus e ngad fithed gadad ni nge lungudad, ‘Mange n’en ni gu baadag ni nggu gafgow riy e chiney ni bochan e nge riyul’ nrayog e athap ngog ko yafas ko nib beech e fayleng?’ Fulweg rodad ko re deer nem ni nge m’ug ko ngongol rodad, e ra dag feni gel e re athap nem u lanin’dad.—Mu taareb rogonnag ko John 12:25.
5. Uw rogon ni nge yog ngodad fare tow’ath ni yafas ni manemus?
5 De yog Jesus ni gad ra maruweliy e yafas me yog ngodad. Ki mada’ ko yafas rodad ko re fayleng ney mab tow’ath. Dabiyog ni ngad chuw’iyed e yafas ara da rin’ed ban’en nge yog ngodad. Kemus ni kanawoen me yog e yafas ni manemus ngodad e nge “mich Kristus Jesus u wun’dad” nge Jehovah ni, “ra tow’athnag e piin ni yad be gayiy Got.” (Gal. 2:16; Heb. 11:6) Machane michan’ e thingari m’ug ko ngongol, ya ‘michan’ ngak Got nra de chag e ngongol ngay e ba yam’.’ (Jas. 2:26) Ere, faanra ngada fal’eged i lemnag nib fel’ rogon e bin l’agruw e deer rok Jesus ma thingarda lemnaged ko uw urngin ko pi n’en ni bay ko re fayleng ney e ngad paged ma uw urngin e ngad rin’ed ko pigpig ku Jehovah nge yog ni ngad daged nriyul’ nib fas e michan’ rodad.
“Kristus e De Yan nga Laniyan’”
6. Mange n’en nrib ga’ fan u wan’ Jesus?
6 Da i lemnag Jesus e pi n’en ni immoy u fayleng e ngiyal’ nem, ya i tiyan’ ko tin nib ga’ fan ma de fanay e tin ni yibe dag ngak nra fel’ rogon e yafas rok riy. Yafas rok e pag fan nge gafgow me fol rok Got. De rin’ e tin nib m’agan’ ngay, ya gaar: “Gubin ngiyal’ ma gu be rin’ e tin nib m’agan’ [Got] ngay.” (John 8:29) Uw feni gel e maruwel ni tay Jesus ni nge felfelan’nag Got?
7, 8. (a) Uw rogon ni ke pag Jesus fan, ma uw rogon ni kan tow’athnag? (b) Mang deer e thingarda fithed gadad riy?
7 Ba’ bayay ni gaar Jesus ngak pi gachalpen: ‘En ni Fak e Girdi’ e de yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.’ (Matt. 20:28) Buchuuw nga m’on riy u nap’an ni yog Jesus ngak pi gachalpen ndabki n’uw nap’an me ‘yim’,’ me yog Peter ni manga yigi siy i yodor. Machane i par Jesus ni ke mudugil laniyan’. Ba m’agan’ ngay ni nge pi’ e yafas rok nib flont ni fan ko girdi’. Bochan e ngongol rok Jesus nib manigil me fel’ e yafas rok nga m’on. Ni faseg ko yam’ me “yan i par nga ba’ ni mat’aw rok Got.” (Acts 2:32, 33) Ere ke dag ngodad e ngongol nrib fel’ ni ngad folgad riy.
8 I fonownag apostal Paul e Kristiano u Roma ni ‘gathi yad e nga ranod nga lanin’rad’ me puguran ngorad ni “Kristus e de yan nga laniyan’.” (Rom. 15:1-3) Ere uw rogon ni ngarda folgad ko re fonow nem ma gad pag fadad ni bod Kristus?
Baadag Jehovah ni Ngad Rin’ed e Tin Th’abi Fel’ ni Rayog Rodad
9. Mange ri be rin’ reb e Kristiano u nap’an nra ognag ir ngak Got?
9 Motochiyel rok piyu Israel kakrom e ke yog ni pi sib ni Hebrew e ngan pagrad ko bin medlip e duw ko pigpig rorad. Ma ku bay reb e ban’en nrayog ni ngar rin’ed. Faanra ke adag fare sib e en masta rok ma rayog ni nge yog ni nge par ni sib rok e re masta nem u nap’an e yafas rok. (Mu beeg e Deuteronomy 15:12, 16, 17.) Aram rogon ni gad ma rin’ u nap’an ni gad ra ognag e yafas rodad ngak Got. Kad ognaged gadad ni ngad rin’ed e tin nib m’agan’ Got ngay ma gathi tin ni gad be yim’ ni bochan. Gad ra rin’ ni aram rogon ma gad be dag nrib t’uf Jehovah rodad ma gad baadag ni ngad pigpiggad ngak ndariy n’umngin nap’an.
10. Mang kanawo’ e ke mil fadad riy ngak Got, ma mange nge rin’ e re n’ey ko lem nge ngongol rodad?
10 Faanra gimed be fil e Pi Mich Rok Jehovah e Bible e chiney, ma ga be un i machibnag fare thin nib fel’, ma ga be un ko muulung ko Kristiano, ma rib fel’ e n’en ni ga be rin’. Gamad be athapeg ni dabki n’uw nap’an mag adag ni ngam ognagem ngak Jehovah ngam bod fare moon nu Ethiopia ni fith Filip ni gaar: “Baaray e ran. Mang ndab ntaufenigeg?” (Acts 8:35, 36) Tha’ u thilmew Got e ra bod rogon fapi Kristiano ni yol Paul ngorad ni gaar: “Gathi gimed e mmil famed ngomed, yi Got e mmil famed ngak; ke chuw’iymed nib tolang puluwmed ni pi’.” (1 Kor. 6:19, 20) Demtrug ko athap rodad e nga darod nga tharmiy fa ngad pired u roy u fayleng, ma faanra kad ognaged gadad ngak Jehovah ma Ir e ke mil fadad ngak. Ere rib ga’ fan ni ngad chuweged e lem ni fel’ ngak rodad ma dab kud manged “sib rok e girdi’”! (1 Kor. 7:23) Ri gad ba tow’ath ni kad manged tapigpig rok Jehovah nib yul’yul’ ni nga i fanaydad nrogon nib m’ag u wan’!
11. Mang maligach e yibe yog ko Kristiano ni ngar ognaged, ma mange ri be yip’ fan ni bod ni ka nog ko fapi maligach u tan e Motochiyel ni kakrom?
11 I fonownag Paul e Kristiano nib gel ni gaar: “Ngam pied gimed ngak Got, ngam manged maligach nib fos ngak, ni kam pied gimed ko maruwel rok ma gimed ba fel’ u wan’.” (Rom. 12:1) Pi thin nem e sana ke puguran ngak piyu Jew ni Kristiano fapi maligach ni immoy ni bang ko liyor rorad u nap’an ndawora manged pi gachalpen Jesus. Susuna ngar nanged ni fare Motochiyel ni kan pi’ ngorad e be yog ni bin th’abi fel’ e gamanman ni bay rorad e ngar pied ni maligach u daken e altar rok Jehovah. Urngin ban’en ni bay thibngin e dabiyog ni ngan pi’. (Mal. 1:8, 13) Maku aram rogon u nap’an ni gad ra ognaged gadad ngad manged ‘ba maligach nib fas.’ Ngaud pied ngak Jehovah e tin th’abi fel’ rodad ma gathi tin ni ke magey ndubdad. Nap’an ni gad ra ognagdad ngak Got, ma kad pied e “yafas” rodad ni polo’ nib muun ngay gelngidad nge chugum rodad nge salap rodad. (Kol. 3:23) Uw rogon ni ngad fanayed e re n’ey ko yafas rodad?
Mu Fanay e Tayim Rom nib Fel’ Rogon
12, 13. Mang reb e kanawo’ nrayog ni ngad pied e tin th’abi fel’ rodad ngak Jehovah?
12 Reb i kanawoen ni ngad pied ngak Jehovah e tin th’abi fel’ rodad e ngad fanayed e tayim rodad nib fel’ rogon. (Mu beeg e Efesus 5:15, 16.) Ba t’uf ni ngad t’ared lanin’dad. Gelngin ngongolen e fayleng nge lem rodad ndawori flont e ma k’aringdad ngad fanayed e tayim rodad ni kemus ni fan ko nge yog boch ban’en ngodad. Riyul’ ni “urngin ban’en e ma buch u ngal’an,” nib muun ngay e toffan nge maruwel ni gad ma un ngay ni nge ayuwegdad ngad lebuguyed e maruwel rodad ko tirok Got. (Ekl. 3:1) Machane, ba t’uf ni nge par e Kristiano nib thabthabel me fanay e tayim rok nib fel’ rogon.
13 Nap’an ni yan Paul nga Athens, me guy ni “urngin e girdi’ nu Athens nge girdi’ nu bang ni ma par u rom e yad ba adag ni ngar paged urngin ban’en nguur weliyed ma yad be rung’ag murung’agen e tin nib beech ban’en.” (Acts 17:21) Ngiyal’ ney e ku boor e girdi’ ni yad ma adbey e tayim rorad. Pi n’en ni yima adbey e tayim ngay e ngiyal’ ney e ba muun ngay e mayal T.V. ma yibe fafel ko gosgos ko video nge ngan yaliy boch ban’en ko Internet. Ka boor ban’en nrayog ni nge magawonnag e tayim rodad. Faan gad ra un ko pi n’em ma rayog ni ngad paged e tin nra ayuweg e michan’ rodad. Maku rayog ni ngad lemnaged ni kaygi gel e maruwel rodad ndakuriy e tayim ngad rin’ed e “tin ni ir e ba th’abi fel’” ni bay rogon ko pigpig ku Jehovah.—Fil. 1:9, 10.
14. Mang boch e deer e thingarda lemnaged nib fel’ rogon?
14 Ere bochan ni gur reb e tapigpig rok Jehovah ni kam ognagem ngak ma ngam fithem ni nge lungum, ‘Pi n’en ni kug ta’ ni nggu rin’ ni gubin e rran e ba muun ngay e fol Bible min fal’eg i lemnag fan nge meybil?’ (Ps. 77:12; 119:97; 1 Thess. 5:17) ‘Gu ma tay e tayim ni nggu fal’eg rogog ko pi muulung ko Kristiano? Gu ma pi’ e fulweg u nap’an e muulung ni fan e nggu pi’ e athamgil nga laniyan’ e girdi’, fa?’ (Ps. 122:1; Heb. 2:12) Thin rok Got e be yog ni Paul nge Barnabas e kar “weliyew murung’agen Somol nda ur rusgow” ni Jehovah e ke pi’ mat’awrad. (Acts 14:3) Gur rayog nim thilyeg boch ban’en ni ga ma rin’ nge yog ni “n’uw nap’an” e tayim rom ko machib me yog nim un ko pioneer?—Mu beeg e Hebrews 13:15.
15. Uw rogon ni ma fanay e piin piilal e tayim rorad nib fel’ rogon?
15 Nap’an ni yan apostal Paul nge Barnabas ngar guyew fare ulung nu Antiok, mi yow “par u rom rok e piin ni ke mich Jesus u wun’rad nib n’uw nap’an” ni fan e ngar piew e athamgil nga lanin’rad. (Acts 14:28) Piin piilal e ngiyal’ ney e ku boor e tayim rorad ni yad ma fanay ngar pied e athamgil nga laniyan’ e girdi’. Gathi kemus ni yad ma un ko machib ya ku yad ma yan ngar guyed boch e walag nga tabinaw rorad ma yad ma gay girdien e ulung ni kar wargad ko tirok Got, ma yad ma ayuweg e pi walag ni ke m’ar, maku boor ban’en ni yad ma rin’ u lan e ulung. Faanra gur reb e walag ni pumoon ni kan taufenagem, ma rayog rom nim nameg ngam un ko pi maruwel ney, fa?
16. Mang boch e kanawo’ nrayog ni ngad ngongliyed e “ngongol nib fel’ ngak . . . e piin ni kar manged girdien e tabinaw rok Got’ u fithik’ e mich u wun’uy ngak Kristus”?
16 Boor e girdi’ ni kar felfelan’gad ya kar pied e ayuw ko piin ni kar gafgowgad ya dakuriy ban’en rorad nbochan e gafgow ni girdi’ e ma yibnag nge tin ni ka ma yib e gafgow ni bod e yoko’ nge ku boch ban’en. Ni bod reb e walag ni ppin ni ke pag 60 e duw rok ni ma maruwel u Bethel ni ke yoor yay ni ma milekag nib n’uw yang ni bochan e ke ognag ir ni nge pi’ e ayuw ngak e piin ni kar gafgowgad. Mang fan ni ke fanay e tayim ko vacation rok ko re maruwel ney? Yog ni gaar: “Yugu aram rogon ndariy ba maruwel nri gub salap riy mab tow’ath e re nem ni nggu rin’ e tin nib t’uf. Ke pi’ e athamgil nga lanin’ug ni gu be guy e michan’ nib gel rok e pi walageg ni pumoon nge ppin ni boor ban’en ni ke thay u pa’rad.” Maku, bokum biyu’ e walag u fayleng ni ga’ngin e yad ma un ko maruwel ni ngan toy e pi Kingdom Hall nge Assembly Hall. Gad ra un ko pi maruwel ney, ma gad be ngongliy e “ngongol nib fel’ ngak . . . e piin ni kad manged girdien e tabinaw rok Got u fithik’ e mich u wun’uy ngak Kristus.”—Gal. 6:10.
“Gubin Ngiyal’ Ma Gu Ba’ Romed”
17. Mange ga ra pi’ nge yog ngom e athap ko yafas ni manemus?
17 Par ko girdi’ ndarur pigpiggad ngak Got e dab ki n’uw nap’an me m’ay. Daworda nanged ko ri wuin e ra buch e re n’ey. Machane, gad manang ni “daki yoor e tayim ni ke magey” ya ‘re fayleng ney e be thil i yan.’ (Mu beeg e 1 Korinth 7:29-31.) Re thin n’ey e be ga’nag fan fare deer rok Jesus ni gaar: ‘Ri mang e n’en nrayog ni nge pi’ e girdi’ nge ayuweg e yafas rok?’ Thingar da rin’ed urngin ni be yog Jehovah ni ngad rin’ed ni fan e nge yog ngodad e “bin riyul’ e yafas.” (1 Tim. 6:19) Rib ga’ fan ni ngan fol ko thin ni yog Jesus ni ngad ‘folgad rok ni gubin ngiyal’’ ma ngad ‘m’oneged fare Gil’ilungun ko yafas rodad.’—Matt. 6:31-33; 24:13.
18. Mange rayog ni nge l’agan’dad ngay, ma mang fan?
18 Riyul’ nde mom ni ngan fol rok Jesus, ma riyul’ e n’en ni yog, ke yim’ boch e girdi’ ni bochan e re n’ey. Machane gadad e ngad boded Jesus ni manga ‘yigi siy da yodoromgad.’ Ke mich u wan’dad e n’en ni ke micheg ngak pi gachalpen ni gaar: “Ma dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng.” (Matt. 28:20) Ere ngad fanayed e tayim nge salap rodad ko pigpig ku Got nge musmus rogodad riy. Gad ra rin’ ni aram rogon ma gad be dag ni ke pagan’dad nra ayuwegdad Jehovah u nap’an fare gafgow nib ga’ ara fasegdad ko bin nib beech e fayleng. (Heb. 6:10) Bochan e re n’ey ma gad be dag nib ga’ fan u wan’dad fare tow’ath ko yafas.
Mang e Fulweg Rom?
• Uw rogon ni dag Jesus nri baadag ni nge pigpig ku Got nge girdi’?
• Mang fan ni nge pag be’ fan, ma uw rogon ni nge rin’?
• U Israel kakrom e kemus ni miti ni ngan e maligach e ba fel’ u wan’ Jehovah, ma uw rogon nra pow’iydad e re n’em e ngiyal’ ney?
• Mang boch e kanawo’ nrayog ni ngad fanayed e tayim rodad riy nib fel’ rogon?
[Pictures on page 26]
Gubin ngiyal’ ni rin’ Jesus e pi n’en ni ma felfelan’nag Got
[Picture on page 28]
Piyu Israel nib fel’ gum’ircharad e kar rin’ed e tin th’abi fel’ rorad ngar ayuweged e bin riyul’ e liyor
[Pictures on page 29]
Gad ra fanay e tayim rodad nib fel’ rogon ma gad ra felfelan’nag Got