Jehovah E Ba Got Ni Ma Pining E Magar

“Got e gathi ba laniyan’. Gathi bayi pag talin e maruwel ni kam ngongliyed, ara rogon nib t’uf romed.”​—HEBREWS 6:10.

1. Uw rogon ni dag Jehovah nib felan’ ngak Ruth nu Moab?

JEHOVAH e ri ma pining e magar ngak e piin ni yad ma gay rogon ni ngar rin’ed e tin nib m’agan’ ngay, ma ma flaabnagrad. (Hebrews 11:6) Fare moon ni ba yul’yul’ ni Boas fithingan e manang rarogon Got, arfan ni yog ku Ruth ni be’ u Moab ni ma ayuweg e chitiningin figirngin ni rib fel’ rogon ni gaar: “I Somol e bayi pi’ puluwom ko tin ni kam rin’; i Somol ni ir e Got nu Israel, ni ir e ka mub ni ngam naf nga tan pa’ e bayi pi’ puluwom ni polo’!” (Ruth 2:12) Kan flaabnag Ruth fa? Arrogon! Riyul’, ni bay chepin u lan e Bible ni kan yoloy! Munmun, me leay Boas me mang reb e ga’ rok David ni Pilung nge Jesus Kristus. (Ruth 4:13, 17; Matthew 1:5, 6, 16) Re chep ney ni be m’ug u Bible e reb fapi tapigpig ni ma felan’ Jehovah ngorad.

2, 3. (a) Mang fan nrib fel’ rogon ni ma pining Jehovah e magar ngak e girdi’? (b) Mang fan ni ma yog rok Jehovah ni nge pining e magar? Ngan dag rogon.

² Jehovah e ma lemnag nde mat’aw ni faanra dag ni nder pining e magar. Be gaar e Hebrews 6:10: “Yi Got e gathi ba laniyan’. Gathi bayi pag talin e maruwel ni kam ngongliyed, ara rogon nib t’uf romed ni kam daged ni bochan e ayuw ni kam pied ma ki gimed be pi’ ngak e piin ni gimed ni girdien Kristus.” Re thin ney e be dag ni ba ga’ fan u wan’ Got ni nge pining e magar ko girdi’ ni yugu aram rogon ni yad e tadenen ni ke mul e flaab rok Got u pa’rad.​—Roma 3:23.

³ Bochan ni dawor da flontgad, ma aram fan ni gad ma lemnag ndariy rogon ni nge flaabnagdad Got. Me, Jehovah e ri manang rarogodad, ma riyul’ ni ba ga’ fan u wan’ e pigpig ni gad ma tay u polo’ i gelngidad. (Matthew 22:37) Baaray rogon: Bod ba matin ni ke pirieg ba tow’ath​—u daken e tebel rok—​ni ba kiy i churuwo’ ni de tolang puluwon. Rayog ni nge guy e chi tow’ath ney nib achig ma de ga’ fan u wan’ me tay nga bayang. Machane, bay e babyor nib chagil ko fare tow’ath ni be yog ni ke pi’ bochi buliyel ni fak, ni ke pi’ urngin e salpiy ni i chaariy ngay nbochan e nge chuw’iy e re tow’ath ney. Ma aram me thil rogon i lemnag ko fare matin fare tow’ath. Ma sana ke yib e lu’ u owchen, me yan i gumuchmuch ngak fachi buliyel ni fak ni be weliy e felfelan’ rok ma be pining e magar.

4, 5. Uw rogon ni folwok Jesus rok Jehovah u rogon ni ma pining e magar?

⁴ Manang Jehovah rogodad nge gin gad ma mus riy, ma ma felan’ ko ngiyal’ ni gad ma pi’ ngak e tin ba th’abi fel’ ni bay rodad ni yugu demtrug ko ba achig fa ba ga’. Ra aray rogon, ma Jesus e rib fel’ rogon ni be dag rarogon Chitamangin. Amu lemnag rogon ni yog e Bible murung’agen fare pin ni ke yim’ figirngin. “Me chachangar [Jesus] me guy e girdi’ ni pire’ ban’en rorad ni yad be yin’ e salpiy nga lan tafen e salpiy u tempel, mi ki guy be’ ni ppin nrib gafgow ya ke yim’ figirngin ni ke yin’ l’agruw chi kobre’ nrow nib achig nga lan fare tafen e salpiy. Me gaar, ‘Nggog ngomed nre pin ney nib gafgow ya ke yim’ figirngin, e ir e boor e salpiy ni ke yin’ ko tin ni ke yin’ urngin e girdi’. Ya yad e kar pied e salpiy ni kar feked ko salpiy ni ba’ rorad ni pire’; machane ir e aram feni gafgow ma ke pi’ urngin e chi salpiy ni ba’ rok ni ir e nge abich riy.’”​—Luke 21:1-4.

⁵ Arrogon, manang rarogon fare pin​—ni ir be’ nib gafgow ni ke yim’ figirngin—​manang Jesus e bin riyul’ i fan fare tow’ath ni ke pi’ me k’aring ni nge pining e magar. Aram rogon Jehovah. (John 14:9) Gathi ra athamgil lanin’um ni ga ra nang ni demtrug rarogom, ma rayog ni ngam fel’ u owchen e Got rodad nge Fak ni yow ma pining e magar?

Tow’athnag Jehovah Be’ nu Ethiopia ni Bay Madgun Got u Wan’

6, 7. Mang fan ma uw rogon ni dag Jehovah ni be pining e magar ngak Ebedmelek?

⁶ U lan e Bible e boor yay ni dag Jehovah ni ma pining e magar ko piin ni ma rin’ e tin nib m’agan’ ngay. Mu lemnag rogon ni ayuweg be’ nu Ethiopia ni bay madgun Got u wan’ ni Ebedmelek fithingan, u nap’an Jeremiah ma ma pigpig u tafen fare Pilung ni Zedekiah nu Judah ni de yul’yul’. Ke nang Ebedmelek ni fapi fak e pilung nu Judah e kar t’ared e thin nga daken fare profet ni Jeremiah ma ka nin’ nga lan e luwed, ni nge yim’ u rom ko uyungol. (Jeremiah 38:1-7) Ke nang ni kan fanenikay Jeremiah nbochan e thin ni be machibnag, me dow Ebedmelek ko pogofan rok nge yan ngak fare pilung. De rus ni nge non, me gaar: “Pilung, n’en ni ke rin’ e pi girdi’ ney e ba kireb. Kar nguchuruyed Jeremiah nga lan fare luwed, ni ke mudugil ni nge yim’ ko uyongol.” Me yog fare pilung ngak Ebedmelek ni nge fek 30 e pumoon ngar ayuweged fare profet rok Got.​—Jeremiah 38:8-13.

⁷ Ke guy Jehovah Ebedmelek ni ke rin’ e re n’em u fithik’ e michan’, ke ayuweg ni nge gel ni dab ki i rus. Arfan ni dag Jehovah ni be pining e magar ngak Ebedmelek u daken Jeremiah ni gaar: “Bay gu rin’ e n’en ni ku gog ko re mach ney ni fan ko gafgow ma gathi tin nib fel’ . . . Bay gu ayuwegem e rorran nem, . . . ma dab ni piem nga pa’ e girdi’ ni ga ma rus ngorad. Nggu ayuweg e yafas rom . . . ; nge par ni bod e chugum ni kan fek u bang, ya bochan ni kam pagan’um ngog.” (Jeremiah 39:16-18, NW) Arrogon, i ayuweg Jehovah Ebedmelek, nge Jeremiah u pa’ pi fak e pilung nu Judah ni yad ba kireb ma tomur riy me ayuwegrow u pa’ piyu Babylon nra gotheyed yu Jerusalem. “[Jehovah] e ma matanagiy e girdi’ rok nib yul’yul’; me chuwegrad u pa’ e girdi’ ni kireb,” rogon ni yog e Psalm 97:10, NW.

“Chitamam ni Be Guy e N’en ni Kam Rin’ ni De Nang e Girdi’ e Bay Pi’ Puluwon Ngom”

8, 9. Rogon ni ke dag Jesus, e mang re miti meybil ni ma felan’ Jehovah ngay?

⁸ Reb e mich riy ni ma pining Jehovah e magar ma ba ga’ fan u wan’ e pigpig rodad e rayog ni ngan guy ko n’en ni yog e Bible u murung’agen e meybil. “Girdi’ nib fel’ e yad ra meybil ma rib fel’ u wan’ [Somol],” rogon ni yog fare moon nib gonop. (Proverbs 15:8) U nap’an Jesus ma boor e pi tayugang’ ko teliw ni yad ma meybil u fithik’ e yoor, ni gathi fithik’ e yul’yul’, ya bochan ni nge guyrad e girdi’. Gaar Jesus, “Ke m’ay i pi’ puluwon ngorad ni polo’! Machane faan ga ra meybil, ma ga yan nga singgil rom ngam ning e mab, ma ga meybil ko chitamam ni be’ ndanir guy. Ma Chitamam ni be guy e n’en ni kam rin’ nde nang e girdi’ e bay pi’ puluwon ngom,” aray rogon ni fonownag pi gachalpen.​—Matthew 6:5, 6.

⁹ Riyul’, de yog Jesus nib kireb ni ngan meybil u fithik’ e yoor, ya ir rok ma ki meybil ba ngiyal’ ni boor e girdi’. (Luke 9:16) Jehovah e ri ma felan’ ni faanra ngad meybilgad ngak u fithik’ e yul’yul’, ni gathi fan ni gad be lemnag ni nge yog e girdi’ e sorok ngodad. Meybil rodad ni danir guy e riyul’ ni ma dag gelngin e t’ufeg rodad nge pagan’ rodad ngak Got. Maku, dab ni gin ngay ya ku ma gay Jesus bang ni nge meybil riy ni go’ ir. Bayay, e rin’ ni aray rogon ko “tanirran ni kab nep’.” Ma bayay, “me yan nga daken bburey ni goo ir ni nge meybil.” Ma u m’on ni nge mel’eg fa 12 i apostal rok, ma ki par reb e nep’ ni polo’ ni goo ir nga i meybil.​—Mark 1:35; Matthew 14:23; Luke 6:12, 13.

10. Nap’an ni ra m’ug ko meybil e yul’yul’ ni aram rogon nge gelngin ni gad be yim’ nbochan, ma mang e ra mudugilan’dad ngay?

¹⁰ Mu lemnag feni ri ma motoyil Jehovah ngak Fak u nap’an ni be weliy laniyan’! Riyul’, ni yu ngiyal’ e meybil Jesus “ni wenig ngak Got ni ba ga’ laman u fithik’ e lu’, ma aram fan ni fulweg Got taban e meybil rok.” (Hebrews 5:7; Luke 22:41-44) U nap’an nra m’ug ko meybil rodad e yul’yul’ ni aram rogon, nge gelngin e lem rodad ma rayog ni nge mich u wan’dad nra motoyil e Chitamangidad nu tharmiy ngay nib fel’ u wan’. Arrogon, “Jehovah e ba chugur ngak urngin . . . e piin ma pining u fithik’ e yul’yul’.”​—Psalm 145:18, NW.

11. Uw rogon ni ma lemnag Jehovah e pi n’en ni gad ma rin’ ni danir guy?

¹¹ Faanra ma pining Jehovah e magar u nap’an ni gad ra meybil ngak nib mith, ma uw feni ra pining e magar ko ngiyal’ ni gad be fol rok nib mith! Arrogon, manang Jehovah e n’en ni gadad ma rin’ ni danir guy. (1 Peter 3:12) Riyul’, ni yul’yul’ nge fol ni gad ma tay ko ngiyal’ ni goo gadad e reb e pow nib fel’ ni be dag nib “polo’ gum’irchadad” ngak Jehovah, nib machalbog mab mudugil ko tin ni mmat’aw. (1 Kronicles 28:9) Ri ma felan’ gum’irchaen Jehovah ko re ngongol ney!​—Proverbs 27:11; 1 John 3:22.

12, 13. Uw rogon ni ngad ayuweged lanin’dad nge gum’irchadad ngad boded Nathanael ni reb i gachalpen Jesus nib yul’yul’?

¹² Aram fan, ni pi Kristiano nib yul’yul’ e ngar ayuwgad ko denen nib mith nra kirebnag lanin’uy nge gum’ircha’, ni bod ni ngan yaliy yaan e puwlag nge cham. Yugu aram rogon ni bay boch e denen nrayog ni ngan mithag rok e girdi’, ma riyul’ ni gad manang ni “urngin ban’en ni ke m’ay i sunumeg rok e be par u p’eowchen ndariy e upong u daken; mi ir e ri gadad ra weliy e pi n’en ni ud rin’ed ngak.” (Hebrews 4:13; Luke 8:17) Ngan athamgil ngan palog ko pi n’en ni dabun Jehovah, ma nge par e nangan’ rodad nib beech ma gad ra felfelan’ ya gad manang ni kad fel’gad u wan’ Got. Arrogon, dariy e maruwar riy ni riyul’ ni ma pining Jehovah e magar ko “cha’ ni ma fol rok Got u fithik’ urngin ban’en, ma gubin ngiyal’ ni ma rin’ e tin nib mat’aw, ma ba riyul’ e thin ni ma yog ma ba yul’yul’.”​—Psalm 15:1, 2.

¹³ Ma u rogon ni ngada ayuweged lanin’dad nge gum’irchadad u lan ba fayleng ni ke sug ko tin ni kireb? (Proverbs 4:23; Efesus 2:2) Maku reb ngada feked urngin e tin ke pi’ Jehovah ngodad nra gelnag e michan’ rodad, ma ngad athamgilgad ngad siyeged e tin ba kireb ma gad rin’ e tin nib fel’, ngan rin’ e re n’ey nib papey nge dabi gel e ar’ar nge gargeleg e denen. (James 1:14, 15) Mu lemnag feni ga ra felfelan’ nfaanra non Jesus ngom ntaareb rogon ko n’en ni yog ngak Nathanael ni gaar: “Cha’ney e riyul’ ni ir be’ u Israel, ni be’ nrib yul’yul’!” (John 1:47) Nathanael e ku yima pining Bartholomew ngak, ni munmun me mang reb fa 12 i apostal rok Jesus.​—Mark 3:16-19.

‘Ba Prist nib Tolang nib Yul’yul’ mab Tarunguyey’

14. Mang e rin’ Jesus ko n’en ni ke rin’ Maria ni ran taarebnag ngak boch e girdi’?

¹⁴ Bochan ni bod “yaan Got ndanir guy,” ni Jehovah, ma gubin ngiyal’ ni ma folwok Jesus rok e Chitamangin u rogon ni pining e magar ngak e piin ma pigpig ku Got nib machalbog gum’ircharad. (Kolose 1:15) Bod rogon, ni nap’an lal e rran u m’on ni nge yim’, min pining Jesus nge boch pi gachalpen nga lan e tabinaw rok Simon u Bethany. Faani blayal’, me Maria ni walagen Lazarus nge Martha, e “fek ba florida nrib tolang puluwon nreb e pint urngin, nni ngongliy ko nard” (ni nap’an puluwon be’ u reb e duw), me puog nga daken e rifrif u ay Jesus nruw raba’, me faley nga piyan’ lolugen. (John 12:3) Me gaar boch i yad, “Mang fan ni ngan adbey?” Yugu aram rogon, ma yugub thil rogon ni sap Jesus ko fare n’en ni ke rin’ Maria. I sap ngay ni ban’en ni ngongolen e gol nge feni toar fan e n’en ni ke rin’ ni fan ko yam’ nge gum’eyag. Ere, de thibthibnag Jesus Maria, ya ke tay fan. Ya gaar, “Demtrug e gin’en ni yira machibnag e re thin rok Got ney riy u gubin yang u roy u fayleng, ma yira weliy murung’agen e tin ni ke rin’ e re pin ney, ni fan e nge puguran e re pin ney ngan’uy.”​—Matthew 26:6-13.

15, 16. Uw rogon nra fel’ rogodad nbochan ni immoy Jesus nib girdi’ ni i pigpig ngak Got?

¹⁵ Gad ba tow’ath ni bay Jesus rodad ni be’ ni ma pining e magar ma be Pow’iydad! Riyul’, ni yafas rok Jesus nib girdi’ e ke fanay ni nge fal’eg rogon fare maruwel rok Jehovah ni i tay ni fan ngak​—ni nge pigpig ni Prist nib Tolang nge Pilung, ma bin som’on ko fare ulung ko fa piin ni kan dugliyrad nge fare fayleng.​—Kolose 1:13; Hebrews 7:26; Revelation 11:15.

¹⁶ U m’on ni yib Jesus nga fayleng, ma bay e felfelan’ rok ni fan ko fayleng ma rib fel’ u wan’ e girdi’ riy. (Proverbs 8:31) I par nib girdi’, ma ke nang fan rogon e gafgow ni ma yib ngodad ni gadad e ta pigpig ku Got. I yoloy Paul ni apostal ni gaar, “[Jesus] fan e re bugithin ney e nge yib i ngal’ ni bod pi ‘walagen’ u urngin rarogorad, ni fan e nge yog ni mang prist rorad nib th’abi tolang ni ma runguyrad ma ba yul’yul’ . . . Ere chiney e rayog ni nge ayuweg e piin ni ke yib ngorad e n’en ni ma waliy e girdi’ nge denen, yi ir ma ki yib ngak e n’en ni ma waliy e girdi’ nge denen, ma ki un ko gafgow.” Jesus e rayog ni “kireban’ ngodad nga fadad meewar” ya “yib ngak urngin kanawoen e pi n’en ni ma waliy e girdi’ nge denen ni bod gadad, machane de denen.”​—Hebrews 2:17, 18; 4:15, 16.

17, 18. (a) Mang e be dag fapi babyor ni ke yan ko fa medlip i ulung nu Asia Minor u murung’agen gelngin e felfelan’ rok Jesus? (b) Fapi Kristiano ni kan dugliyrad e kar fal’eged rogorad ni fan ko mang?

¹⁷ Felfelan’ rok Jesus ngak pi gachalpen nib gel e bochan ni kar gelgad ko skeng ma ke gagiyel u tomuren ni ke fas ko yam’. Mu lemnag e babyor rok ni yan ko fa medlip i ulung nu Asia Minor ni yoloy apostal John. Gaar Jesus, ngak fare ulung nu Smyrna: “Gu manang e pi n’en ni ga be gafgow riy.” Yog Jesus u roy, ni gaar, ‘Ri gu manang e pi magawon rom; Gu manang ko mang e n’en ni bayi buch rom.’ Maku, runguy rok nge gelngin ni athamgiliy e gafgow nge mada’ ko yam’, miki yog Jesus ni gaar: “Ngam yul’yul’ ngog ni mus ni faanra ngan thang e fan rom, ma aram mu gu pi’ e teeliyaw ko yafos ngom.”​—Revelation 2:8-10.

¹⁸ Pi babyor nem ni yan ko fa medlip i ulung e ke sug ko thin ni ke dag Jesus rogon ni ma guy e magawon ni ma yib ngak pi gachalpen nge felfelan’ rok nga ferad yul’yul’. (Revelation 2:1–3:22) Mu tay fanam i yan riy ni pi cha’ nem ni be yol Jesus ngorad e fapi Kristiano ni kan dugliyrad ni bay e athap rorad ni ngar uned ngak ko gagiyeg u tharmiy. Taareb rogon ko Somol rorad, ni kar fal’eged rogorad ko maruwel ni ngar ayuweged nge fel’ rogon e girdi’ ko maligach rok Kristus ma ngar rin’ed e re n’ey u fithik’ e runguy.​—Revelation 5:9, 10; 22:1-5.

19, 20. Uw rogon ni dag fare “ulung ni ba ga’” ni kar pininged e magar ngak Jehovah nge Fak?

¹⁹ Riyul’, ni t’ufeg rok Jesus ngak e piin ni kan dugliyrad e kan uneg “yugu boch e saf” rok ngay nib yul’yul’, ma bokum milyon e chiney e ke mang fare “ulung ni ba ga’ . . . nra bad u gubin e nam,” ni yad ra magey nib fos u nap’an nra yib fare “gafgow nib ga’.” (John 10:16; Revelation 7:9, 14) Pi cha’ ney e yibe kunuyrad nga charen Jesus u fithik’ e felfelan’ ni yad be pining e magar ko maligach nge fare athap rorad ko yafas ni manemus u fayleng. U rogon ni kar daged ni yad be pining e magar? Yad be “pigpig ngak [Got] ni rran nge nep’,” aray rogon ni yad be rin’.​—Revelation 7:15-17.

²⁰ Pi n’en ni kan rin’ u ga’ngin yang e fayleng ko duw ni 2006, ni bay ko page 23 nge mada’ ko 26, e be tamilangnag e mich riy ni pi cha’ ney ni yad ba yul’yul’ e riyul’ ni yad be pigpig ku Jehovah ni “rran nge nep’.” Riyul’, nap’an e re duw nem, ma tin ni ka bay ko fachi ulung ni kan dugliyrad e kar thognaged 1,333,966,199 e awa ni kar machibgad​—ni ra ni taareb rogon ko ke pag 150,000 e duw!

Mu Ul’ul i Pining e Magar!

21, 22. (a) Rogon ni ngan dag ni yibe pining e magar, ma mang fan ni thingari kol ayuw e pi Kristiano e ngiyal’ ney? (b) Ma mang e ngan lemnag ko bin migid e article?

²¹ Rogon e ngongol ngak e girdi’ ni dawori flont e i dag Jehovah nge Fak e felfelan’ rorow ngorad nib gel. Bay e kireban’ riy, ya ba yoor e girdi’ ni gathi ri yad ma lemnag Got, ya tirorad e yad be lemnag. Rarogon e par ko girdi’ ko “tin tomren e rran,” e yoloy Paul ni gaar: “Bayi par e girdi’ ni ke mus ni yad e yad be lemnagrad, ma kari gel e chogow rorad . . . Ma bay dab kur pininged e magar ngak be’ u lanin’rad.” (2 Timothy 3:1-5) Ba gel e thil ko pi cha’ nem ko tin riyul’ e Kristiano, ni yad ma meybil u polo’ i gum’ircharad nib m’agan’rad ngay ni nguur folgad ya kar felfelan’ gad nga urngin ban’en ni ke rin’ Got ni fan ngorad!​—Psalm 62:8; Mark 12:30; 1 John 5:3.

²² Bin migid e article, e gad ra sul nga daken boch e tirok Got ban’en ni ke pi’ Jehovah ngodad u fithik’ e t’ufeg. Nap’an ni gad ra fal’eg i lemnag e pi ‘tow’ath nrib manigil’ ney, ma rayog ni gel e felfelan’ rodad.​—James 1:17.

Uw Rogon ni Ga Ra Fulweg?

• Uw rogon ni ke dag Jehovah ni ir ba Got ni ma pining e magar?

• Uw rogon ni ngada felfelan’naged Jehovah ko ngiyal’ ndanir guydad?

• Mang e pi kanawo’ ni dag Jesus riy ni be pining e magar?

• Bochan ni ngal’ Jesus nib girdi’ ma uw rogon ni ayuweg nge mang ba pilung nib ta runguyey ma ma pining e magar?

[Picture on page 15]

Jehovah e ra felfelan’ ni ngada pied e tin nrayog rodad ngak, ni bod ba gallabthir nib t’uf rok e n’en nib mom ni ma yog fak