Nguud Daged E Ta’ Fan Ko Pi Muulung Rodad Nib Thothup
“Gu ra fekrad i yib nga daken e burey rog nib thothup, ma gu ra felan’nagrad u lan tafen e meybil rog.”—ISAIAH 56:7, NW.
1. Mang thin ko Bible e ma tamilangnag fan ni gad ma tay fan e pi muulung rodad?
BE KUNUY Jehovah e girdi’ rok, ni yad e pi Kristiano ni kan dugliyrad nge piin nib chag ngorad ni ngar liyorgad ngak u “daken e burey rok nib thothup.” Me tayrad ngar felfelan’gad u lan “tafen e meybil,” ni aram e tempel rok nib fanathin ni ir “tafen e meybil rok e girdi’ ko gubin e nam.” (Isaiah 56:7, NW; Mark 11:17) Re n’en ney e ma tamilangnag ni ba thothup, ara machalbog, ara ba tolang fare liyor ngak Jehovah. Nap’an ni gad ra tay fan e pi muulung rodad ni gad ma un ngay ni fan ni ngan fil e Bible ara ngan meybil ngak Got ma gad be dag ni rogon e tin nib thothup u wan’ Jehovah e ku arrogon e tin nib thothup u wan’dad.
2. Mang e ma tamilangnag ni ke tay Jehovah ni ba thothup e gin ni ke mel’eg ni ngan liyor ngak riy, ma uw rogon ni dag Jesus ni ku be tay fan e gi n’em?
2 U Israel kakrom e ba thothup e gin ni ke mel’eg Jehovah ni ngan liyor ngak riy. Thingar ni dugliy min thothupnag fare tabernacle nge chugum riy nge talin e maruwel riy ‘ya nge par e pi n’em nib th’abi thothup.’ (Exodus 30:26-29) Reb fagali singgil u lan fare tabernacle e ka nog e “Gin ni Thothup” ngay ma reb e ka nog e “Gin ni Th’abi Thothup” ngay. (Hebrews 9:2, 3) Boch nga tomren ma fare tempel u Jerusalem e ke yan nga luwan fare tabernacle. Bochan ni aram tagil’ e liyor ngak Jehovah ma ka nog yu Jerusalem ni fare “mach nib thothup.” (Nehemiah 11:1, NW; Matthew 27:53) Nap’an ni i machib Jesus u fayleng ma i tay fan e tempel. I damumuw ngak e pi girdi’ ni kar dariy fannaged e tempel ya ur fol chuway’gad riy ma ke chugur rok e piin ni be fek e chugum u bang fare mach nga bang.—Mark 11:15, 16.
3. Mang e thin ko Bible e ma tamilangnag ni ba thothup e pi muulung rok piyu Israel?
3 Ma muulung piyu Israel ni gubin ngiyal’ ni fan ni ngar liyorgad ngak Jehovah ma ngar motoyilgad ko Motochiyel ni yima beeg. Boch e rran ko pi madnom rorad nem e yima yog e muulung nib thothup ngay, ara assembly ni ba ga’ fan, ni be yip’ fan feni thothup e pi muulung ney. (Levitikus 23:2, 3, 36, 37) U nap’an Ezra nge Nehemiah ma i muulung e girdi’ ma pi Levite e “ra weliyed fan e motochiyel ngak e girdi’.” “Faani rung’ag e girdi’ e tin ni be yog fapi motochiyel rok Somol ngorad ni ngar rin’ed, mi yad tabab ko meyor,” me ‘yog piyu Levi ngak e girdi’ ni nge dab kur yorgad’ ni lungurad: “Bin daba’ e rran e ba thothup ni fan ngak Somol ni Got romed. Ere dabi kireban’med ma dab mu yorgad.” Ma aram me madnomnag piyu Israel fa medlip i rran ni Madenom ko Nochi Naun ni ‘ri yad be felfelan’ nib gel.’ Maku, “ka rofen ni som’on ko re madnom nem nge yan i mada’ ko rofen ni tomur ni ra reb e rran mi yad beeg bang ko fapi motochiyel rok Got. Medlip e rran nra madnomgad, me rofen ni gaman e meruk ngay mu ku yad tay reb e muulung ni kar ninged ko muulung rorad, ni bod rogon ni ke yog e motochiyel.” (Nehemiah 8:7-11, 17, 18) Ba thothup e pi madnom nem ma urngin e girdi’ ni ra un ngay e thingar ra tedan’rad ko machib ni yibe weliy riy.
Ba Thothup e Pi Muulung Rodad
4, 5. Mang boch ban’en ko pi muulung rodad ni be micheg ni bogi muulung ni ba thothup?
4 Riyul’ ni dariy reb e mach rok Jehovah ni ba thothup u fayleng e ngiyal’ ney maku dariy e tempel riy ni fan ko liyor ngak Jehovah. Machane dab da paged talin ni ba thothup e pi muulung ni fan ko liyor ngak Jehovah. Dalip yay ko yu wik e gad ma muulung ni fan ni ngada beeged ma ngada filed e Bible. Yima “weliy fan” e Thin Rok Jehovah ni bod ni “un weliy” u nap’an Nehemiah. (Nehemiah 8:8) Yima meybil u tabolngin nge tungun e muulung, ma ku gad ma tang ni gad be pining e sorok ngak Jehovah. (Psalms 26:12) Fapi muulung rodad e bang ko liyor rodad ngak Got, ere thingar da uned ngay ma nguud tayedan’dad ko machib riy.
5 Ma flaabnag Jehovah e girdi’ rok u nap’an ni yad ra muulung nga taabang ni ngar liyorgad ngak, ma ngar filed e Thin Rok, ma ngar felan’gad ni yad be mada’ u taabang. Nap’an ni gad ra un ko muulung ma rayog ni ngada pagedan’dad ngay ni ‘aram e gin ni ke tay Jehovah chilen ni bay e tow’ath riy.’ (Psalms 133:1, 3, NW) Gad ra un ko re flaab nem ni faan gad ra un ko muulung ma ud tayan’dad ko machib riy. Ma ki gaar Jesus: “Ya gin nra gak l’agruw fa dalip ni’ ngay u fithingag, e aram e gu ba’ rorad ko gin’em.” Ga ra beeg e thin u m’on nge tomren e re thin ko Bible nem, ma ra m’ug riy ni be weliy murung’agen e muulung rok e piin ni piilal ni yad be pithig e magawon rok girdien e ulung, machane ku rayog ni ngan fanay e re thin nem ko pi muulung rodad. (Matthew 18:20) Bay Kristus u fithik’ e pi Kristiano ni yad be muulung u fithingan, ya bay e kan ni thothup u fithik’rad, ere gathi ngan lemnag e pi muulung nem nib thothup?
6. Uw rarogon tagil’ e pi muulung rodad, ni tin ni ba achig nge ba ga’?
6 Riyul’ ni der ma par Jehovah u lan e tempel ni ma fal’eg e girdi’. Arrogon, machane gad ma liyor ku Got u lan e pi Kingdom Hall rodad. (Acts 7:48; 17:24) Gad ma muulung u lan e Kingdom Hall ni ngada filed e Thin Rok Jehovah, ma ngada meybilgad ngak, ma ngada tanggad ni gad be pining e sorok ngak. Ku gad ma rin’ e pi n’en ney u lan e Assembly Hall rodad. Gad ma pi’ puluwon e pi naun ni ba ga’ ni fan ko convention rodad—ni tafen e muulung ni fan ko girdi’ ni yoor, ara tagil’ e gosgos—ma gad ma liyor ku Got u lan e pi naun nem u nap’an ni gad ma muulung riy. Nap’an e pi muulung rodad, ni tin ni ba achig nge ba ga’, ma thingar da ted fan, ni nge m’ug u rogon lanin’dad nge ngongol rodad.
Pi Kanawo’ ni Ngada Daged e Tay Fan Riy ko Pi Muulung Rodad
7. Mang reb e kanawo’ nrayog ni ngada ted fan e muulung riy?
7 Ba’ boch e kanawo’ nrayog ni ngada daged ni gad be tay fan e pi muulung rodad. Reb e kanawo’ e nga ud moyed ko muulung u nap’an ni yibe tang. Boor e pi tang rodad e gowa ba meybil ni gad be pi’ ngak Got, ere thingar da tangniged u fithik’ e tay fan. I beeg apostal Paul fare thin u Psalm 22 faani weliy murung’agen Jesus ni gaar: “Got, bay gu weliy murung’agem ngak pi walageg, bay gu tangnigem ni gu be ta’ fam u lan e muulung rorad.” (Hebrews 2:12) Ere ngada athamgilgad ni ngad pared nga tagil’dad u m’on ni yira tang, ma nap’an ni gad be tang ma ngada tedan’dad ko thin ko tang. Ma rogon ni gad ra tang e bod rogon e en ni yoloy e psalm ni gaar: “Gu ra pining e sorok ngak Jehovah u polo’ i gum’irchaeg ko muulung rok e piin nib mat’aw.” (Psalms 111:1, NW) Arrogon, ngada bad ko muulung u m’on ni ra tabab ya ngada tanggad ni gad be pining e sorok ngak Jehovah, ma ku da uned ko tang u tungun e muulung.
8. Mang e n’en ni bay u Bible ni be dag ni thingar da ted fan e meybil u nap’an e muulung?
8 Maku ban’en ni ba ga’ fan u nap’an e muulung e aram e meybil, ra fek be’ e meybil ni fan ko urngin e girdi’ ni kar muulunggad. Bay bayay ni i muulung e tin som’on e Kristiano u Jerusalem ma “yad gubin nra meybilgad ngak Got.” Bochan e re meybil nem me yog rorad ni nguur machibgad—ni yugu aram rogon ni yibe gafgownagrad—“mi yad tabab i weliy e thin rok Got ngak e girdi’ ndaki yib e marus ngorad.” (Acts 4:24-31) Gur, ga be lemnag ni i yan yan laniyan’ be’ u nap’an e re meybil nem, fa? Danga’, ya ur meybilgad nib “taareb lanin’rad.” Pi meybil ni yira fek u nap’an e muulung rodad e ma m’ug riy laniyan’ urngin e girdi’ ni kar muulunggad. Ere thingar da tedan’dad ko pi meybil ni yira fek.
9. Uw rogon nrayog ni ngada ted fan e muulung rodad ko mun mad rodad nge ngongol rodad?
9 Maku rayog ni ngada daged ni gad be tay fan e muulung rodad nib thothup u rogon e mun mad rodad. Rogon e mad rodad nge rogon piyan lolugdad e ra ayuweg e muulung rodad nge par ni ba yalen. Be gaar apostal Paul: “Er rogon e piin ni ppin ni gub adag ni ngar gonopiyed rogon e mad rorad nge yan i par nib fel’ rogon, mi yad yin’ e mad nrogon yalen e munmad ko ppin; ma gathi ngar ngongliyed piyan lolugrad ni nge thum’ nga wuru’, ara tiyed e nunuw ni gol ara nunuw nni ngongliy ko churuwo’ nu l’ugun e yar ara mad nib tolang puluwon, machane ngar ngongliyed e ngongol nib fel’ nib m’ag ngak e ppin ni yad be dag ni yad girdien Got.” (1 Timothy 2:8-10) Nap’an ni yira un ko assembly u tagil’ e gosgos u wen, ma rayog ni ngan m’ag e mun mad nga rogon e yafang, machane mus ko ngiyal’ ni ba gel e gowel riy ma ngan mun mad nib yalen. Maku dab da abichgad ara ni yengyeng e chewing gum u nap’an ni yibe machib u nap’an e assembly. Yira pining e sorok ngak Jehovah ni faan gad ra mun mad nrogon yalen ma ba fel’ e ngongol rodad u nap’an e muulung, maku yira pining e sorok ko machib rodad nge girdi’ rodad.
Ngongol nib M’ag Ngak Girdien e Tabinaw rok Got
10. Mang e i yog apostal Paul ni be tamilangnag ni thingari fel’ e ngongol u nap’an e muulung rodad?
10 Bay e fonow ko bin 1 Korinth guruy ni 14 u rarogon e muulung rok e pi Kristiano. U tungun e re guruy nem e be gaar: “Urngin ban’en ma thingar nrin’ nib fel’ rogon ma ba yaram.” (1 Korinth 14:40) Pi muulung rodad e bang ni ba ga’ fan ko maruwel rok e ulung ni Kristiano, ere ngongol riy e thingari puluw ko ngongol rok girdien e tabinaw rok Jehovah.
11, 12. (a) Mang e thingari tamilang u wan’ e pi bitir ni ma un ko muulung rodad? (b) Uw rogon nrayog ni nge dag e piin ni bitir e michan’ rorad u nap’an e pi muulung?
11 Thingar ni fil ngak e piin ni bitir rogon ni nge fel’ e ngongol rorad u nap’an e muulung. Thingari weliy e gallabthir ni Kristiano ngak e bitir rorad ni nge dab ra fafelgad fa ra gosgosgad u lan e Kingdom Hall ara gini yima ta’ e Fol Babyor riy. Ya aram e gin ni gad ma liyor ngak Jehovah riy ma gad ma fil e Thin Rok riy. Be gaar Solomon ni pilung: “Mu ayuw u nap’an ni ga ra yan nga naun rok Got; ma ga yan ngay ni ngam motoyil.” (Eklesiastes 5:1, NW) I fil Moses ngak piyu Israel ni nge muulung e piin ni yad ba ilal nge piin ni “bitir.” I gaar: “Mu ulunguy urngin e girdi’ . . . ya nge gubin e girdi’ me rung’ag ngar filed rogon ni nguur pired ma bay madgun Somol ni Got romed u wun’rad ma yad be fol ko tin ni ke yog u fithik’ e yul’yul’. Piin ni owchemed ndawor rrung’aged fapi motochiyel rok Somol ni Got romed e ara’ kanawoen mi yad rung’ag. Mi yad fil rogon ni nguur pired ni ba’ madgun Somol u wun’rad.”—Deuteronomy 31:12, 13.
12 Ku arrogon e ngiyal’ ney ni ma un e piin nib fel’ yangaren ngak e gallabthir rorad ko muulung ni fan e ngar motoyilgad ma ngar filed ban’en. Ma nap’an ni rayog rok e piin ni bitir ni ngar filed ban’en ko muulung ma nge tamilang u wun’rad e tin ni kenggin e machib nu Bible, ma rayog ni ngar uned i “yog nga dap’i l’ugunrad” e pi n’en nib mich u wun’rad ni yad be fulweg boch fapi deer ko muulung. (Roma 10:10) Sana ra tabab e bitir ni nge weliy in bugithin ni be fulweg e deer ni manang fan. Sana ra beeg e fulweg rok ko som’on, machane munmun ma ra guy rogon ni nge weliy e fulweg ko thin rok. Re n’en ney e ra ayuweg fare tir, maku ra felfelan’ ngay, maku ra felfelan’ e piin ni yad ba ilal ni ngar rung’aged e thin rok e bitir ni be weliy e n’en nib mich u wan’. Maku ra dag e gallabthir e kanawo’ ni yad be un i fulweg boch fapi deer ko muulung. Faan rayog, mab fel’ ni nge yog ba ken e Bible, nge babyoren e tang, nge fare ke babyor ni yibe fil ko muulung, ni nge fanay fare tir. Thingari fil e pi bitir rogon ni ngar ted fan e pi babyor rorad. Urngin e pi n’en ney ma ra ayuweg e piin ni bitir ngar nanged ni ba thothup e pi muulung rodad.
13. Mang e gad be athapeg ni fan ngak e piin ni fin ra uned ko muulung rodad?
13 Dubdad ni nge taareb rogon e muulung rodad ko misa ni yima tay u lan e pi galesiya rok e Kristendom. Ya boch e misa rorad e dariy e t’ufeg riy, ara yima dake yad ba mat’aw. Ma yugu boch e muulung ko Kristendom e ba wagey ni bay e musik riy ni ke pag rogon. Gad ba adag ni nge fel’ thilin e girdi’ ni ma un ko muulung rodad u Kingdom Hall machane dabi bod e piin ni kar muulunggad ni ngar sabethingad ara fafelgad. Ya gad ma muulung ni fan ni ngada liyorgad ngak Jehovah, ere gubin ngiyal’ ma nge yalen e pi muulung rodad. Gad ba adag ni piin ni fin ra uned ko muulung rodad e ngar rung’aged e machib riy, ma ngar yaliyed e ngongol rodad nge ngongol rok pi fakdad ma nge lungurad: “Riyul’ ni ba’ Got romed u roy!”—1 Korinth 14:25.
Bang ko Liyor Rodad ku Got ni Dabi Thil
14, 15. (a) Uw rogon ni nge ‘dab da paged e naun rok e Got rodad’? (b) Uw rogon ni ke lebug e thin u Isaiah 66:23?
14 Kada weliyed ko biney e thin ni be kunuy Jehovah e girdi’ rok me felan’nagrad u lan “tafen e meybil rok” ni aram e tempel rok nib fanathin. (Isaiah 56:7) Nehemiah e ir be’ nib yul’yul’ me puguran ngak piyu Jew ni ngar ayuweged e tempel ko salpiy rorad ma aram rogon ni ngar ted fan fare tempel. I gaar: “Thingar dab da paged e naun rok e Got rodad.” (Nehemiah 10:39) Maku dab da dariy fannaged e pong rok Jehovah ni be piningdad ni ngada liyorgad ngak u lan “tafen e meybil rok.”
15 I tamilangnag Isaiah fene ga’ fan ni ngada uned nga urngin e muulung ni ngada liyorgad ku Got ni gaar: “‘Ma thingari aw ni reb e m’ug e pul nge mada’ ko bin migid e m’ug e pul, nge reb e sabbath nge mada’ ko bin migid e sabbath ma urngin e girdi’ e ngar bad ngar siro’gad ngog,’ rogon ni ke yog Jehovah.” (Isaiah 66:23, NW) Aram e n’en ni yibe rin’ e ngiyal’ ney. Gubin e wik u gubin e pul e be muulung e pi Kristiano ni fan ni ngar liyorgad ngak Jehovah. Yad ma liyor ngak u nap’an ni yad ma muulung, nge nap’an ni yad ma machibnag e girdi’. Gur, ga bay u fithik’ e piin ni yad ma ‘siro’ ngak Jehovah’ u gubin ngiyal’, fa?
16. Mang fan ni nga nib ko urngin e muulung e nge mang bang nib ga’ fan ko yafas rodad e chiney?
16 Ri ra lebug fare thin u Isaiah 66:23 u lan fare m’ag nib beech rok Jehovah. Ngiyal’ nem e ‘urngin e girdi’’ e riyul’ ni bay ‘ur siro’gad’ ngak Jehovah ni gubin e wik nge gubin e pul i yan ni manemus. U lan fare m’ag nib beech e gad ra muulung ni fan ni ngada liyorgad ngak Jehovah, ni aram ban’en ni dabi thil, ere gathi aram ban’en nsusun e nguuda uned ngay e chiney ya ba thothup e pi muulung nem?
17. Mang fan nib t’uf e pi muulung rodad e chiney ni “[gad] be guy ni Chirofen ni bay yib Somol riy e be chugur”?
17 Thingar da athamgilgad ni nguuda uned ko pi muulung rok e Kristiano ni fan ni ngada liyorgad ngak Got, ya be chugur i yib e tomur. Bochan e gad be tay fan e tin nib thothup ban’en, nib muun e muulung rodad ngay, ma dab da paged e maruwel rodad, ara skul, ara ngada uned ko skul nnep’, ni nge magawonnag e yan rodad ko muulung. Ba t’uf rodad ni nguuda chaggad ngak e girdi’ rodad ya ma yib e gel nga lanin’dad ni bochan. Rayog ni nge fel’ e thin rodad e girdi’ rodad u nap’an e muulung rodad, ma rayog ni nge bagadad me pi’ e athamgil nga laniyan’ bagadad, ma nge bagadad me pi’ e pasig nga laniyan’ bagadad ni ngauni “t’ufegey ma ngada rin’ed e tin nib fel’.” Thingar da rin’ed ni “ngari gel ni fan e [gad] be guy ni Chirofen ni bay yib Somol riy e be chugur.” (Hebrews 10:24, 25) Ere gubin ngiyal’ ni nguud ted fan e muulung rodad nib thothup ni aram e gad be un nga gubin e muulung, mab yalen e mad rodad, mab fel’ e ngongol rodad. Gad ra rin’ ma gad be dag ni rogon e tin nib thothup ban’en u wan’ Jehovah e ku arrogon e tin nib thothup ban’en u wun’dad.
Ngada Sulod Nga Daken
• Mang boch ban’en ni ma tamilangnag ni thingar ni tay ni ba thothup e pi muulung rok e girdi’ rok Jehovah?
• Mang boch ban’en ni yima rin’ u nap’an e muulung rodad ni ma micheg ni ba thothup e muulung?
• Uw rogon nrayog ni nge dag e piin nib fel’ yangaren e tay fan ko muulung rodad nib thothup?
• Mang fan ni ngada uned ko gubin e muulung?
[Pictures on page 10]
Pi muulung ni gad be liyor ku Jehovah riy e ba thothup ni yugu demtrug e gini gad be muulung riy
[Picture on page 13]
Pi fakdad e ma un ko muulung ni fan ni ngar motoyilgad ma ngar filed e machib