Dab Mu Talgad I Pining E Magar

“Got, rib mo’maw’ ni nggu nang fan e lem rom; ya pire’ ni ba’!”​—PSALM 139:17.

1, 2. Mang fan ni ngari fel’ u wan’dad e Thin rok Got, ma uw rogon ni weliy fare psalmist rogon feni fel’ u wan’?

KAN pirieg ban’en nrib ga’ fan. Nap’an ni yibe ngongliy bayay fare tempel rok Jehovah u Jerusalem, me pirieg Hilkiah ni ir e tolang ko prist “fare babyor ko motochiyel rok Jehovah ni pi’ ngak Moses” ma dariy e maruwar riy ni ken ni som’on e babyor ni kan yoloy ni 800 e duw ni ke yan! Rayog ni ngam lemnag feni gel madgun Got ni m’ug ku Josiah ni Pilung u nap’an nni pi’ e re babyor nem ngak? Tin nriyul’ riy e gelngin feni rib t’uf rok ma aram me gurgur nge pi’ ku Shaphan, ni fa en nta yol, nge beeg nib ga’ laman ngan rung’ag.​—2 Kronicles 34:14-18.

² Ngiyal’ ney e rayog ni nge beeg bokum bilyon e girdi’ e Thin rok Got ni polo’ ara bayang riy. Machane re n’em e ke achignag fel’ngin nge feni ga’ fan e pi thin nu Bible? Ri danga’! Tin nriyul’ riy, e thin ni bay u lan Bible e gubin ni lem ko fa En ni Gubin ma Rayog Rok, ma kan yoloy ni fan ngodad. (2 Timothy 3:16) I weliy fare psalmist rogon e lem rok u murung’agen e Thin Rok Got ni gaar: “Got, rib mo’maw’ ni nggu nang fan e lem rom; ya pire’ ni ba’!”​—Psalm 139:17.

3. Mang e be dag ni David e ir be’ nrib toar e tamilangan’ rok?

³ Tay fan rok David ku Jehovah, nge Thin rok, nge yaram rok ko bin nriyul’ e liyor e de war. Boor ko pi tang ni yoloy David e be dag e n’en ni be lemnag. Ni bod ni, i yoloy u Psalm 27:4 ni gaar: “Kug wenignag taa ban’en ngak Somol; taa ban’en e gub adag, ni aram e nggu par u lan e naun rok Somol u n’umngin nap’an e yafos rog, me felan’ug nga feni fel’ Somol, mu gu wenig ngak u rom ni ngi i pow’iyeg.” Fa bin nri thin ni Hebrew, ni “felan’ug” e be yip’ fan ni ngan par ngan lemnag nib n’uw nap’an, ma ngan fal’eg i lemnag rarogon, min yaliy ni yibe felfelan’ ngay. Rib tamilang ni David e be’ nrib toar e tamilangan’ rok ko tha’ u thilrow Jehovah ma ma pining e magar u gubin ban’en ni ke pi’ Jehovah ngak ni nge gelnag e michan’ rok. Bay rogon ni ngan folwok ko tay fan ni i dag.​—Psalm 19:7-11.

Nge Fel’ u Wan’uy fare Tow’ath ni Kan Nang e Thin Riyul’ u Bible

4. Mang e k’aring ni nge “suguy e Kan ni Thothup Jesus ko felfelan’”?

⁴ Nge yog e tamilangan’ ko Thin rok Got e der tor nga daken e skul ko fayleng, ni ba ga’ ni be mon’ognag e lem nib tolang. Ya be tor nga daken e gol rok Jehovah, ni be dag ngak e piin ni yad ba sobut’an’, nge piin nib yul’yul’ gum’ircharad ni kar nanged nib t’uf e tirok Got ban’en rorad. (Matthew 5:3; 1 John 5:20) Nap’an ni i fal’eg Jesus i lemnag fare n’en nriyul’ ni boch e girdi’ ndawori flont e kan yoloy fithingrad nga but’ u tharmiy, me “suguy e Kan ni Thothup Jesus ko felfelan’ me gaar: ‘Chitamag ni gur e Somol u tharmiy ngu but’! Kari mmagar ya kam dag ngak e piin ndar skulgad e n’en ni kam mithag rok e piin ni yad ba llowan’ nge piin ni yad ba skul.’”​—Luke 10:17-21.

5. Mang fan nde darifannag pi gachalpen Jesus fare thin nriyul’ ni murung’agen fare Gil’ilungun?

⁵ Nap’an ni mu’ Jesus ko meybil me gaar ngak pi gachalpen: “Kari mfelan’gad ni kam guyed e pi n’en ni kam guyed! Ya nggog ngomed ni boor e profet nge pilung ni ur m’ad ni bochan ni ngar guyed e n’en ni gimed be guy, machane de yog, ma ku ur m’ad ni bochan ni ngar rung’aged e n’en ni gimed be rung’ag, machane dar rung’aged.” Arrogon, i pi’ Jesus e athamgil nga laniyan’ pi gachalpen ni dab ra darifannaged fare tamilangan’ ko Gil’ilungun Got. Pi n’ey e dan dag ko bin nib m’on e mfen ko pi tapigpig rok Got, ma dan dag ko “piin ni yad ba llowan’ nge piin ni yad ba skul” ko pi rran u nap’an Jesus!​—Luke 10:23, 24.

6, 7. (a) Mang e pi n’en ni fan ni ngad pininged e magar ko tin riyul’ ni yib rok Got? (b) Mang e n’en ni be rin’ boor e girdi’ nib yul’yul’ gum’ircharad?

⁶ Ngiyal’ ney, e ke yoor fan ni ngad ga’naged fan u wan’dad e tin riyul’ ni yib rok Got, ya daken “fare tapigpig nib yul’yul’ mab gonop,” e ke pi’ Jehovah riy ngak e girdi’ rok e tamilangan’ ko Thin rok ni be toar i yan. (Matthew 24:45; Daniel 12:10) I yoloy fare profet i Daniel murung’agen e ngiyal’ ko tomur ni gaar: “Boor e girdi’ ni bay ur guyed rogon ni ngar nanged fan e tin ni be yib i m’ug. Ma bay i ga’ e llowan’ i yan.” (Daniel 12:4) Gathi riyul’ ni chiney e ke ‘yoor i yan’ fare tamilangan’ rok Got ma pi tapigpig rok Got e yibe duruw’iyrad nib fel’ rogon ko thin rok Got?

⁷ Rib thil rogon tamilangan’ u murung’agen Got ni bay ko girdi’ rok nge yurba’ i teliw ko fare Babylon nib Gilbuguwan ni ke balyangan’rad! Angin ni ke m’ug, e ke yoor i yad e ke nang ni de fel’ ara ke mulan’ ko teliw ni googsur ma ke chel ko bin riyul’ e liyor. Yad e piin ni yad bod e saf ni ‘darur uned ko denen ni be ngongliy e [Babylon nib Gilbuguwan]’ ara ‘ra uned ko gechig ni bay nta’ ngak.’ Jehovah nge pi tapigpig rok e yad be pining urngin e piin ni yad bod e pi cha’ ney ni ngar bad nga lan fare ulung ko Kristiano.​—Revelation 18:2-4; 22:17.

Piin ni Yad Be Pining e Magar e Yad Be Muulung ku Got

8, 9. Uw rogon ni ke lebug fare thin ni bay ko Haggai 2:7 e ngiyal’ ney?

⁸ Nap’an ni be weliy Jesus murung’agen fare tempel rok ni be yip’ fan ban’en, me yog ni gaar: “Gu ra rurug e pi nam, ma pi n’en ni yi baadag u lan e pi nam e ra yib; ma ra sug lan e naun rog ma ra gal ramaen.” (Haggai 2:7) Re yiiy ney e lebug u nap’an Haggai ni faani toy e girdi’ rok Got bayay fare tempel u Jerusalem. Ngiyal’ ney, e ku be lebug fare yiiy rok Haggai u daken fare tempel rok Jehovah nib ga’ ni be yip’ fan ban’en.

⁹ Bokum milyon e girdi’ ni kar muulunggad ko fare tempel ni ngar liyorgad ku Got “u daken e ayuw ko Kan ni Thothup ngu fithik’ e yul’yul’,” gubin e duw ma bokum biyu’ e girdi’ ni yad e “pi n’en ni yi baadag u lan urngin e nam” ni yad be yib ko re tempel nem. (John 4:23, 24) Ni bod e report u rogon e maruwel ni kan tay ko duw ni 2006 ni be dag ni 248,327 e kan taufenagrad ni aram e kar ognaged yad ku Jehovah. Ni aram e be dag ni gonap’an 680 e piin nib beech ni gubin e rran! T’ufeg rorad ko tin nriyul’ nge bochan ni yad baadag ni ngar pigpiggad ku Jehovah ni yad boch e tamachib ko Gil’ilungun e be dag e mich riy ni riyul’ ni Got e ke girngiyrad ngak.​—John 6:44, 65.

10, 11. Mu weliy reb e n’en ni ke buch ni be dag rogon ni ke adag boch e girdi’ e thin nriyul’ u lan e Bible.

¹⁰ Boor ko pi girdi’ ney nib yul’yul’ gum’ircharad e yad baadag e tin nriyul’ ni bochan e kar guyed e ‘n’en nib thil u thilin e piin ni yad mmat’aw nge piin ni yad be ngongliy e kireb, ngu thilin e en ni be pigpig ngak Got nge piin ndarir pigpiggad ngak.’ (Malaki 3:18) Am lemnag e n’en ni ke buch ku Wayne nge Virginia, nib wu’ i mabgol ni yow ma un ko galesiya ko Protestant machane boor e deer rorow ni danir pi’ e fulweg riy. Yow be fanenikay e mahl ma ke balyangan’row u nap’an nra guyew e tayugang’ ko teliw rorow ni be yibilay e salthaw nge pi talin e cham rorad. Nap’an ni pilibthir boch fa gal yibgol, ma kar guyew ni boor e girdi’ ni ma fek yathinrow u lan e galesiya, ni yugu aram rogon ni ke sensey Virginia ko skul ni yima tay ni fan ko madenom ni ke yan bokum e duw. Ra gaargow: “Dariy be’ ni ma yib i guymow ara dag nib felfelan’ ko n’en ni gamow ma rin’ u lan e galesiya. Kemus ni n’en ni baadag e galesiya e salpiy romow. Kari balyangan’mow.” Ki gel boch e balyangan’ rorow u nap’an ni pag e pi tayugang’ ko teliw ni nge par e pumoon nge pumoon.

¹¹ Nap’an e ngiyal’ nem, ma tungin Wayne nge Virginia ni ppin nge mu’ ma fakrow ni ppin e ra mangew e Pi Mich rok Jehovah. Yugu aram rogon ni damumuw Wayne nge Virginia ko re n’ey ko som’on, me tomur riy mi yow thilyeg e lem rorow ngar unew ko fol Bible. I yog Wayne ni gaar, “Boor ban’en ni gu nangew u murung’agen e Bible u lan dalip e pul ko tin ni gu filew u lan 70 e duw ni ke yan! Da gu nangew ni Jehovah fithingan Got, maku dariy ban’en u murung’agen fare Gil’ilungun nge Paradis u fayleng ni gamow manang.” De n’uw nap’an riy me tabab e gal yabgol ney i un ko muulung ko Kristiano nge machib. “Gamow baadag ni ngognew ngak gubin e girdi’ murung’agen e tin nriyul’,” arrogon ni yog Virginia. Ni taufenagrow ko 2005 ni yow l’agruw ni ke gaman 80 e duw rorow. Rognew nra gaargow, “kug piriegew reb e tabinaw ko Kristiano nib riyul’.”

Mu Pining e Magar ni ‘Ke Bung Rogom ni Ngam Rin’ Urngin Mit e Ngongol nib Fel’’

12. Mang e n’en ni ma pi’ Jehovah ngak e pi tapigpig rok ni gubin ngiyal’, ma mang e thingar da rin’ed ni nge yib angin ngodad?

¹² Gubin ngiyal’ ni ma ayuweg Jehovah e pi tapigpig rok ni ngar rin’ed e tin nib m’agan’ ngay. Bod rogon Noah, ni pi’ ngak nib tamilang rogon ni nge toy fare arke​—ni ba maruwel ni thingar ni ngongliy nib fel’ rogon nge yan i m’ay! Ma aram rogon ni yan i aw. Mang fan? Bochan e “rin’ Noah urngin e tin ni yog Got ngak ni nge rin’.” (Genesis 6:14-22) Ku arrogon e ngiyal’ ney ni ma fal’eg Jehovah rogon e pi tapigpig rok ni ngar rin’ed e tin nib m’agan’ ngay. Arrogon, bin nth’abi ga’ fan e maruwel rodad e aram e ngad machibniged fare thin nib fel’ ko Gil’ilungun Got mad ayuweged e piin ni bay rogorad ni ngar manged boch i gachalpen Jesus Kristus. Taareb rogon ko n’en ni buch rok Noah, rogon e mon’og ni gad be tay e be yan u rogon e yul’yul’ rodad. Thingar da folgad u fithik’ e yul’yul’ ko pi n’en ni be yog Jehovah ngodad ni ngad rin’ed u daken e Thin rok nge ulung rok.​—Matthew 24:14; 28:19, 20.

13. Mang boch ban’en ni ma skulnagdad Jehovah u daken?

¹³ Rogon me yog nda rin’ed e re maruwel nem, e thingar da ‘machibniged nib fel’ rogon’​—e Thin Rok Got—​ya ma “fil e tin nib riyul’ e thin ngodad, me ir e be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got, ya en ni be pigpig ngak Got e nge par ni ke bung rogon nrayog ni nge rin’ urngin mit e ngongol nib fel’.” (2 Timothy 2:15; 3:16, 17) Be skulnagdad Jehovah nib fel’ rogon u daken fare ulung ko Kristiano, ni bod rogon e bin nsom’on e chibog. Ngiyal’ ney, mu lan e pi ulung u ga’ngin yang e fayleng ni 99,770 u gubin, ma yima tay fare Theocratic Ministry School nge Service Meeting u gubin e wik ni fan e nge ayuwegdad ko machib. Ga ma dag ni ga be pining e magar ni bochan e gali muulung ney nrib ga’ fan ma ku ga ma un ngay ni gubin ngiyal’ ma ga be fol ko pi n’en ni ga ma fil riy?​—Hebrews 10:24, 25.

14. Uw rogon ni ma dag e pi tapigpig rok Jehovah nib fel’ u wan’rad fare tow’ath ni ngan pigpig ku Got? (Mu uneg ngay e pi thin ni bay ko chart ko pages 23 nge mada’ ko 26.)

¹⁴ Bokum milyon e girdi’ rok Got u ga’ngin yang e fayleng e yad be dag nib fel’ u wan’rad e skul ni yad ma un ngay ni bochan e yad ma fanay e pi n’en ni yad be fil riy u nap’an e machib. Ni bod ni, nap’an fa bin 2006 e service year, ma 6,741,444 e pi tamachib ko Gil’ilungun ni kar thognaged 1,333,966,199 e awa u gubin yang ko fare maruwel, nib muun ngay 6,286,618 e Bible studies ni kan tay u tabinaw. Ireray boch ban’en ni ma pi’ e athamgil nga lanin’uy ni kan tay nga lan fare report u ga’ngin yang e fayleng. Gamad be piningem ni ngam sap ko re report ney nib fel’ rogon ma ga guy boch ban’en riy nra pi’ e athamgil nga lanin’um, ni bod rogon e pi walagdad ko bin nsom’on e chibog ni dariy e maruwar riy ni yib e athamgil nga lanin’rad u nap’an nra nanged ga’ngin yang e gin ni ke taw e machib ngay e ngiyal’ nem.​—Acts 1:15; 2:5-11, 41, 47; 4:4; 6:7.

15. Mang fan nsusun ndariy be’ ni nge war laniyan’ ni bochan e pigpig ku Jehovah u polo’ e yafas?

¹⁵ Sorok ni yima pining ku Got u gubin e duw e be dag rogon feni fel’ u wan’ e pi tapigpig rok Jehovah fare tow’ath ni kar nanged Jehovah mar manged mich rok. (Isaiah 43:10) Riyul’, fare maligach ko pining e magar ni be tay boch e piin ni kar pilibthirgad, ara kar m’argad e rayog ni ngan taareb rogonnag ko n’en ni ke rin’ fare pin ni ke yim’ figirngin. Machane dab da paged talin nriyul’ nib fel’ u wan’ Jehovah nge Fak gubin e piin ni yad ma pigpig ku Jehovah u polo’ e yafas rorad, u nap’an ni yad be rin’ urngin e tin nrayog rorad.​—Luke 21:1-4; Gal. 6:4.

16. Mang boch e talin e maruwel ni fan ko ngan fil ban’en ni ke pi’ Got e ngiyal’ ney?

¹⁶ Gathi kemus ni ma skulnagdad Jehovah ni ngad salapgad ko machib, ya ku ma fal’eg rogodad u daken e ulung rok. U lan e pi duw ni ke yan ni dawori n’uw nap’an, ma pi n’ey e ba muun ngay fapi babyor ni Thin Riyul’ ni Ma Pow’iy i Yan ko Yafas ni Manemus, Rayog ni Ngam Par ni Gab Fas ni Manemus u Paradis u Fayleng, Knowledge That Leads to Everlasting Life (Tamilangan’ ni Ma Pow’iyey i Yan ko Yafas ni Manemus) ma, chiney e yibe fanay fare babyor ni, What Does the Bible Really Teach? (Mang e Ri Be Fil e Bible?) Piin nri yad be pining e magar ni bochan e pi n’en ney e yad ma fanay nib fel’ rogon u nap’an e machib.

Mu Fanay fare Babyor ni Bible Teach nib Fel’ Rogon

17, 18. (a) Gin ngan ko fare babyor ni Bible Teach (Mang e Ri Be Fil e Bible) e ga ba adag ni ga ma fanay ko machib? (b) Mang e n’en ni ke nang reb e walag ni ma lekag e ulung ko fare babyor ni Bible Teach?

¹⁷ Pi guruy riy ni 19 u gubin, nge appendix riy ni be weliy fan ban’en nrib tamilang, nge thin riy nib mom, ma fare babyor ni What Does the Bible Really Teach? (Mang e Ri Be Fil e Bible?) e be micheg nib tow’ath ni fan ko machib. Ni bod ni, guruy ni 12 e be weliy fare thin ni “Ngan Par u Reb e Kanawo’ Nib Fel’ u Wan’ Got.” Re guruy ney e be weliy ngak fa en ni be fil e Bible rogon nrayog ni nge mang fager rok Got, ma ireram ban’en ni ma lemnag boor e girdi’ ni dabiyog. (James 2:23) Mang boch ban’en ni ke yog e girdi’ ko re babyor ney ni yima fanay ko fol Bible?

¹⁸ Be’ ni ma lekag e ulung u Australia e yog ni fare babyor ni Bible Teach e “bay ban’en riy ni ma k’aring e girdi’ ni ngar uned ko numon.” Ki uneg ngay ni rib mom i fanay ma ke “gelnag e pagan’ nge felfelan’ rok boor e tamachib ni fan ko Gil’ilungun. Arfan ni boch e girdi’ e yad be yog fithingan e re babyor ney ni Gol ni Tolang Puluwon!”

19-21. Mu weliy boch ban’en ni ke buch rok boch e girdi’ ni bochan fare babyor ni Bible Teach.

¹⁹ “Rayog nsana Got e ke l’ogem ka mub,” arrogon ni yog reb e ppin ngak reb e pioneer u Guyana u nap’an ni yib nga tafen. Fa en ni yow ma par fare pin e ke yan ke digeyrad fa gali bitir ni fakrow. I pithig fare pioneer fare babyor ni Bible Teach ko guruy ni 1 me beeg nib ga’ laman e paragraph 11, ni bay u tan fare kenggin ni “Uw Rogon u Wan’ Got e Ngongol nde Mat’aw ni Gad Ma Mada’nag?” I gaar fare pioneer, “I bit ngak fapi thin ni gu weliy ngak. Tin nriyul’ riy e sak’iy nga lang nge yan nga wuru’ e naun rok nge yor.” I m’agan’ fare pin ngay ni ngar filew reb e walag ni ppin e Bible u taabang ma be ul’ul ni be mon’og i yan.

²⁰ José, ni ir be’ ni ma par u Spain, e yim’ e ppin rok u nap’an reb e accident u karrow. I fanay e falay nib kireb ya be lemnag ni ireray e n’en ni ra fal’eg laniyan’, miki yan i guy e togta ko man’ey ni ngan ayuweg. Machane, de yog ni nge pi’ fare togta e fulweg ko fapi deer ni be magawonnag José: “Mang fan ni ke pag Got e ppin rog ni nge yim’?” Reb e rran me mada’nag José Francesc, ni ku ir be’ ni ma maruwel ko fa gin ni ma maruwel riy. I yog Francesc ngak ni ngar filew e guruy ni 11 ko fare babyor ni Bible Teach, ni kenggin e “Mang Fan ni Ma Pag Got e Kireb?” Kari gin nga rogon ni kan weliy e pi thin nu Bible nib m’ag ngay u lan fare babyor nge fare fanathin u murung’agen fare sensey nge fare bitir nskul. Me tabab i fil e Bible, me un nga reb e circuit assembly, ma chiney e ma un ko muulung u Kingdom Hall ko binaw rok.

²¹ Roman, ni be’ nib moon ni 40 e duw rok ni ma fol chuway’ u Poland, e ma tay fan e Thin Rok Got. Machane bochan ni ke mit ko maruwel rok, ma de gel e mon’og ko fol Bible ni tay. Machane, i un nga reb e district convention min pi’ reb fare babyor ngak ni Bible Teach. Tomuren me ri mon’og. I yog ni gaar, “U lan e re ke babyor ney e bod ni kan tay gubin e machib nu Bible nga taabang ke sum yaan ban’en riy.” Chiney e ma fil Roman e Bible u gubin e rran ma be mon’og nib fel’ rogon.

Mu Ul’ul i Pining e Magar

22, 23. Uw rogon nrayog ni ngad ul’ulgad i dag nib fel’ u wan’dad fare athap ni kan tay ni fan ngodad?

²² Rogon ni kan weliy ko fare District Convention ni kenggin e “Ke Chugur ni Ngan Chuwegey ko Gafgow!”, ma tin nriyul’ e Kristiano e ri yad be yim’ ni bochan ni “ngan chuwegey ko gafgow” ni ke micheg Got ma ke dag nrayog u daken rachaen Jesus Kristus ni ke map nga but’. Dakuriy yugu reb e kanawo’ ni ngad pininged e magar riy ko re athap ney nrib manigil ya ngad ul’ulgad i “beechnag lanin’dad ko ngongol ndariy fan, nge yog nda pigpiggad ngak fare Got ni be par nib fos.”​—Hebrews 9:12, 14.

²³ Arrogon, riyul’ ni ireray e maang’ang ni bochan ni nel’ milyon e pi tamachib ni fan ko Gil’ilungun e kar k’adedan’rad u nap’an ni kan towasariyrad ni ngar pared ni yigoo yad e yad be lemnaged yad. Ku ireray reb e mich riy ni rib fel’ u wan’ e pi tapigpig rok Jehovah e pigpig ni yad be tay ku Jehovah, ya yad manang ni “pigpig ni yad be tay ngak Somol e gathi ra yan i aw nib m’ay fan.” Manga yugu dab da talgad i pining e magar!​—1 Korinth 15:58; Psalm 110:3.

Uw Rogon ni Ga Ra Fulweg?

• Mang e n’en ni be fil fare psalmist ngodad u murung’agen e magar ni gad ma pining ku Got nge pi n’en ni ma pi’ ni fan ko pigpig rodad?

• Uw rogon ni ke lebug fare thin u Haggai 2:7 ko ngiyal’ ney?

• Uw rogon ni ke fal’eg Jehovah rogon e pi tapigpig rok ni ngar pigpiggad ngak nib fel’ rogon?

• Mang e rayog ni ngam rin’ ngam dag ni ga be pining e magar ko gol ni be dag Jehovah ngodad?

[Chart on page 23-26]

2006 SERVICE YEAR REPORT OF JEHOVAH’S WITNESSES WORLDWIDE

(See bound volume)

[Pictures on page 21]

Ma fal’eg Jehovah rogodad ni ngad rin’ed e tin nib m’agan’ ngay