Ngan Gay e Bin Ba Fel’ e Fulweg

Uw rogon ni nggu ayuweg e yafas rog ko m’ar?

Mang e nggu rin’ ni nge felfelan’ e tabinaw rog?

Uw rogon ni nggu mon’og nguug par ko maruwel rog?

KA AM fith reb ko pi deer nem fa? Kam pirieg reb e fulweg nib puluw ma ba’ angin? Ra reb e duw ma gonap’an 2,000 ken e babyor nib thil thil ni yima fal’eg ni ma pi’ e fonow ni murung’agen e pi n’ey nge ku boch ban’en nib ga’ fan. Goo yu Britain, ma piin ni ma beeg e yad ma pi’ 80 milyon pound (gonap’an $150 milyon ko Meriken) u lan reb e duw ni fan ko yu ke babyor ni bay e fonow riy u rogon ni ngan athamgil u fithik’ e pi magawon ko yafas. U Meriken, e babyor ni ma ayuweg e girdi’ e ke taw ko 600 milyon e dolla puluwon u reb e duw. Gathi goo gur e ga ma gay e fonow ni fan nga rogon ni ngan athamgiliy e yafas u gubin e rran.

Rogon fare fonow ni kan pirieg ko pi babyor ney e rib tolang puluwon, reb e tayol e gaar: “Boor e babyor nib beech ni be sul u daken boch e thin ni ke m’ay i yoloy kafram.” Riyul’, ni boor e fonow ko pi babyor ney ni kan pirieg ni be sul u daken e gonop ni bay u baken e babyor ni th’abi kakrom u fayleng. Re ke babyor ney e ba mudugil ni ir e th’abi yoor ken ni kan wereg u fayleng. Kan pilyeg e thin riy nib polo’ ara boch e thin riy ni 2,400 mit e thin. Oren u gubin e ke pag 4.6 bilyon ken ni kan fal’eg u fayleng. Re ke babyor ney e aram e Bible.

Ke yog e Bible ni gaar: “Ya urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got.” (2 Timothy 3:16) Riyul’, ni Bible e gathi girdi’ e yoloy ni lem rorad. Tin ni ba ga’ fan riy e ngan dag e pi n’en nib m’agan’ Got ngay ni fan ko girdi’. Fare Bible e ku boor e thin ni bay riy ni ma ayuwegey u rogon ni ngan athamgil u fithik’ e pi magawon ni ma yib ngak urngin e girdi’, maku be micheg ni piin nra fol ko fonow riy e ra yib angin ngorad. (Isaiah 48:17, 18) Nap’an ni yira fol ko fonow ni bay riy, ma ra yib angin ni yugu demtrug rogon e thin ku be’, nge yalen, nge rogon ni kan skulnag. Ffel’ ni ngam fal’eg i lemnag e bin migid e article ko mang e be yog e Bible u murung’agen fare kenggin ni bod rogon ni ngan ayuwegey ko m’ar nge tabinaw, nge rogon ni ngan mon’og ko maruwel?