Yibe Gay e Fonow nib Fel’

FAANRA ga be gay e thin nra pow’iyem ma boor e rayog ni ngam pirieg. U lan e pi nam nib thilthil ni bod e Britain, Latin America, Sapan, nge Meriken, ri boor e girdi’ riy ni yad ma chuw’iy e babyor ni nge pow’iyrad ko tin ngar rin’ed. Ma ku boor e girdi’ ni ma yaliy e kachido ma yad ma un ko skul ni murung’agen e pi n’en nra pow’iy e girdi’. Yad ma yog ni rayog ni ngam pithig e magawon rom ma dariy fan ni nge ayuwegem be’ ni ma fil murung’agen laniyan’ e girdi’, nge be’ ni ma fonownag e piin ni mabgol, ara tayugang’ ko teliw.

Pi fonow ney e ke ayuweg e girdi’ fa? Yu ngiyal’ e ke ayuweg e girdi’ machane boor yay e der yib angin. Ere ba fel’ ni ngan tiyan’uy ko thin ni be yog e Bible ni gaar: “Be’ nib balyang e yugu demtrug ban’en ma ra mich u wan’; ma girdi’ nib tamilangan’ e ri ma fal’eg i yaliy ban’en.”​—Proverbs 14:15.

Pi babyor ney e ba thil ko tin ni baaray e babyor ni ma fil boch ban’en u murung’agen rogon e fek sasing, sumarnag e salpiy, ngan fil reb e thin nib beech. Pi babyor ney e de tolang puluwon ma ba’ angin. Machane pi babyor ni be weliy murung’agen e fol chuway’, mabgol, ngan ayuweg e bitir nge rogon ni ngan ayuweg laniyan’ e girdi’ ni ke m’ar e ba ga’ ni yibe puluwnag nga rogon ni ma lemnag e girdi’ ban’en. Ere ba fel’ ni ngan fith ko: Mini’ e ke pi’ e pi fonow nem? Ma uw e keb riy?

Pi babyor ni ma fal’eg e girdi’ e yad ma guy rogon ni ngar yoloyed boch ban’en ngay ni nge adag e girdi’ ni ngar chuw’iyed, ma gathi riyul’ ni yad baadag ni ngar ayuweged e girdi’. U lan taareb e nam, ma gubin e duw e boor ko meruk e bilyon e dolla ni ma yib ngorad ni bochan urngin e pi babyor nem ni yad ma pi’ ni chuway’!

Riyul’ ni Ra Ayuwegem e Pi Babyor Ney?

Faanra ngam beeg e pi babyor ney, ma ga be athapeg ni ngam pirieg boch e fonow nib fel’ riy. Machane yu ngiyal’, pi fonow ni yima beeg u lan e pi babyor nem e dariy e mich riy ni ra ayuwegey. Pi babyor ney e ma yog ngom ni gaar: ‘Mu dugliy e lem rom ko tin nib fel’ ma ra yib angin ngom. Demtrug e n’en ni ga baadag, salpiy, ara nge fel’ fithik’ i dowam, nge fel’ rogon e mabgol rom, rayog e pi n’ey ngom ni faanra ba mudugil lanin’um.’ Gur, ra ayuwegem e re fonow ney ni ngam pithig e magawon rom? Ra ayuwegem e re fonow ney ni ngam k’adan’um u fithik’ e magawon?

Ni bod ni pi babyor u murung’agen e tha’ u thilin e girdi’ nge thilin e mabgol e aram e pi babyor ni boor e girdi’ ni yad baadag. Machane riyul’ ni be ayuweg e pi babyor ney e girdi’? Danga’, gathi gubin ngiyal’. Be’ ni yoloy fare babyor ni be weliy murung’agen e t’ufeg ni boor e girdi’ u Latin America ni kar beeged e ke “fil ngak e girdi’ u rogon ni nge fel’ e tha’ u thilrad nge rogon ni ngar tayed farad.” Ma cha’ nem e be yog ni faanra dabiyog ni nge pithig l’agruw ni’ e magawon rorow ma kab fel’ ndab kur nonow ngorow. Re n’ey e be yip’ fan ni dariy fan ni ngan pithig e magawon ni faanra ba mo’maw’.

Riyul’ ni pi babyor ney e bay boch e thin riy nib fel’ machane ku bay boch riy nib kireb. Ma ba mo’maw’ ni ngan mel’eg e tin nib fel’ riy. Ere mini’ e rayog ni nge pagan’um ko fonow rok? U m’on ni ngam fol u reb e fonow mag fithem: ‘Ke sum e re fonow nem ni bochan e kan fal’eg i gay boch ban’en fa kemus ni aray e n’en ni be lemnag be’? Gathi ke sum ere fonow ney ni bochan e baadag e en ni yoloy e re n’ey ni nge yoor e salpiy rok ara nge gilbuguwan?’

Reb e babyor ni ke n’uw nap’an ni kan guy nra fel’ rogon e girdi’ riy e fare Bible. Bay e fonow riy ni bay rogon ko pi n’en ni be weliy fapi babyor. Bible e ke k’aring bokum milyon e girdi’ ngar folgad u reb e fonow ni gaar: “Gum’irchamed nge lanin’med e thingari pig ni polo’ nge beech . . . mon’ed nga dakenmed e bin nib beech i gimed.” (Efe. 4:23, 24) Bible e be tamilangnag ko mang fan ni ma yib e magawon ngodad ma ku be fil ngodad rogon ni ngad pithiged e pi magawon rodad. N’en nib ga’ fan, Bible e be tamilangnag ngodad ko uw feni ga’ fan ni ngad rin’ed e tin nib mat’aw. Bin ni migid e thin e ra weliy e re n’ey.