Thin rok Jehovah e Dar Ma Aw nib M’ay Fan
“Dariy bbugithin ko urngin e thin nib fel’ ni ke yog Jehovah ni Got romed ni ke aw nib m’ay fan. Ya urngin ni ke riyul’ ni fan ngomed.”—JOSHUA 23:14, New World Translation.
1. Mini’ Joshua, ma mang e ke rin’ u tungun e yafas rok?
IR BE’ nib ga’ ko salthaw nib pasig ma dar ma rus, mab gel e michan’ rok mab yul’yul’. U ranow Moses u taabang me mel’eg Jehovah ni nge pow’iy fare nam nu Israel u daken bangi ted i yan nga lan ba binaw nib yong’ol e but’ riy. Tungun e yafas rok, ma re moon ney ni Joshua ni yima tayfan e pi’ ba welthin nib fingich ngak fapi pumoon nu Israel. Dariy e maruwar riy, ni ke gel e michan’ rok e piin nra rung’aged fare welthin. Ku rayog ni nge gelnigem.
2, 3. Nap’an ni be non Joshua ngak e piin ke pumoon u Israel, ma uw rarogon yu Israel, ma mang e yog Joshua?
2 Mu lemnag e n’en ni ke buch nrogon ni bay ko Bible ni gaar: “Tomuren ni ke yan boor e rran u nap’an ni ke pi’ Jehovah e toffan ngak piyu Israel ko urngin e toogor nib liyegrad, nap’an ni ke pilibthir Joshua ma ke yoor e duw rok, me pining Joshua urngin piyu Israel, nge piin ke pumoon, nge piin ba ga’ nge pi tapuf oloboch, nge piin ba tolang, me gaar ngorad: ‘I gag e kug pilibthir, ma ke yoor e duw rog.’”—Joshua 23:1, 2, NW.
3 Joshua e ke chugur ni nge taw ko 110 e duw rok, ni i par u ba ngiyal’ ni bay ban’en ni i buch ko girdi’ rok Got ni kan gin ngay. Ir e guy nga owchen gelngin Got ni be maruwel, ma ke guy boor ban’en ni ke lebug ni micheg Jehovah. Bochan e re n’ey ma kari pagan’ me gaar: “Ri gimed manang u polo’ i gum’irchamed ngu polo’ i yafas romed ni dariy bbugithin ko urngin e thin nib fel’ ni ke yog Jehovah ni Got romed ni ke aw nib m’ay fan. Ya urngin ni ke riyul’ ni fan ngomed. Dariy bbug ni ke aw nib m’ay fan.”—Joshua 23:14, NW.
4. Mang e ke micheg Jehovah ngak piyu Israel?
4 Mang thin rok Jehovah e ke riyul’ u nap’an Joshua? Ngada weliyed dalip ban’en ni micheg Jehovah ngak piyu Israel. Bin som’on, e ra chuwegrad ko sib. Bin l’agruw, e ra yororiyrad. Ma bin dalip, e ra ayuwegrad. Taareb rogon e pi n’en ni ke micheg Jehovah ko girdi’ rok e ngiyal’ ney, ma kad guyed nke riyul’. U m’on ni ngada weliyed e n’en nke rin’ Jehovah e ngiyal’ n’ey, ma ngad lemnaged e n’en ni i rin’ u nap’an Joshua.
Ma Chuweg Jehovah e Girdi’ rok ko Gafgow
5, 6. Uw rogon ni chuweg Jehovah piyu Israel ko gafgow u Egypt, ma mang e ke dag e re n’ey?
5 Nap’an ni i gel’gel’ piyu Israel ko gafgow ko sib ni ur ted u Egypt, me guyrad Jehovah. (Exodus 2:23-25) U fithik’ fake gek’iy ni be daramram, me yog Jehovah ku Moses ni gaar: “Ku gub ni nggu chuwegrad u tan pa’ piyu Egypt, mu gu fekrad nga wuru’ e nam nu Egypt nga reb e nam nib yong’ol e but’ riy ma ba ga’. Boor ban’en riy ma ba yong’ol e but’ riy.” (Exodus 3:8) Ka rra felfelan’gad ni kar guyed e n’en nke rin’ Jehovah! Nap’an nde m’agan’ Farao ngay ni nge pag piyu Israel ngar chuwgad u Egypt, me yog Moses ngak nra piliyeg Got e ran nge ngal’ ni racha’ u lan fare lul’ nu Nile. De aw nib m’ay fan e thin rok Jehovah. Ran nu lan e lul’ nu Nile e ngal’ ni racha’. I yim’ e nig u lan fare lul’ ma dakiyog ni ngan unum e ran riy. (Exodus 7:14-21) I par Farao ni ke gelnag laniyan’, mi ki pi’ Jehovah mereb e gafgow, ni be dag e n’en ni bayi rin’. (Exodus guruy ni 8-12) Tomren fa bin ragag e gafgow ni aram e ngiyal’ ni yim’ e tin ni nganni’ i fakay u Egypt, ma aram me yog Farao ni nge chuw piyu Israel—ma aram mi yad chuw!—Exodus 12:29-32.
6 Re gafgow nem ni chuweg Jehovah piyu Israel riy e bing e kanawo’ ngak ni nge pofrad ngar manged nam rok ni ke mel’eg. Ke gagiyelnag Jehovah ni ir Faen ni Ma Lebguy e tin ke micheg, nge en nder ma aw e thin rok nib m’ay fan. I dag nib tolang Jehovah ko got ko pi nam. Ra gel e michan’ rodad u nap’an ni gad ra beeg murung’agen e re ayuw nem ni pi’ Jehovah. Mu lemnag rogon nfaanra ud moyed u rom! I guy Joshua ndariy e maruwar riy ni Jehovah e ir e “En Nth’abi Tolang u ga’ngin e fayleng.”—Psalm 83:18, NW.
Ma Yororiy Jehovah e Girdi’ rok
7. Uw rogon ni yororiy Jehovah piyu Israel rok fapi salthaw ku Farao?
7 Ma uw rogon e bin migid e n’en ke micheg Jehovah—nra yororiy e girdi’ rok? Re n’ey e bay ko n’en ke micheg nra chuwegrad u Egypt me pagrad nga ranod nga lan fare Nam ni Kan Micheg. Dab mu pagtalin faram ni Farao nib damumuw e gay rogon ni nge yognag piyu Israel u daken e pi salthaw rok nge pi karrow ni ma giringiy e os. Rib gel e pagan’ ni ke tay e re moon nem nrib tolangan’, nib ga’ ni ngiyal’ ni baaram ni gowa ke par yu Israel ndakuriy e gin nrayog nranod ngay u thilin fapi burey nge fagi day! Machane me yib Got i yororiy e girdi’ rok, ni yib i tay bangi manileng nga thilrad. Ba’ rok yu Egypt e ke lumor; ma ba’ rok yu Israel e ba tamilang. Nap’an ni be taleg fagi manileng ndabi kan piyu Egypt boch nga m’on, me tining Moses e sog rok nga lang me ruw raba’ fagi Day ni Row, me bing e kanawo’ ngak piyu Israel me ning e kanawo’ ngak piyu Egypt. I gothey Jehovah fapi salthaw rok Farao nge pi talin e cham rorad nib maangach, me yororiy e girdi’ Rok ko cham ni aram rogon.—Exodus 14:19-28.
8. Uw rogon ni kan yororiy piyu Israel u (a) daken e ted ngu (b) nap’an ni ka ranod nga lan fare Nam ni Kan Micheg?
8 Tomren ni kar th’abed fare Day ni Row nga barba’, ma ranod u daken bangi ted nib “ga’ ni ba ga’ ni yima rus riy ya bay e porchoyog riy ni bay e yub u l’ugun, ma ku bay e skorpion riy. U rom u daken e ted e ba melik’ e but’ riy ma dariy bang riy ni bay e ran riy.” (Deuteronomy 8:15) Ki yororiy Jehovah e girdi’ rok u rom. Ma uw rogon u nap’an ni ka ranod nga lan fare Nam ni Kan Micheg? I togopuluw e pi salthaw nu Kanaan ngorad. Machane, me gaar Jehovah ngak Joshua: “Mfal’eg rogom e chiney, ni gur nge urngin e girdi’ nu Israel, ngam th’abed e lul’ ni Jordan ngam marod nga lan fare gi nam ni ir e nggu pi’ ngomed. Ma dariy be’ nrayog rok ni nge gel ngom u n’umngin nap’an e yafos rom. Bay gu un ngom ni bod rogon ni ug un ngak Moses. Ma ri dab gu pagem.” (Joshua 1:2, 5) Pi thin rok Jehovah nem e de aw nib m’ay fan. U lan nel’ e duw me gel Joshua nga 31 e pilung me gagiyegnag ba ga’ yang ko fare Nam ni Kan Micheg. (Joshua 12:7-24) Gomanga de ayuwegrad Jehovah ma dabiyog ni ngar rin’ed e re n’em.
Ma Ayuweg Jehovah e Girdi’ rok
9, 10. Uw rogon ni ayuweg Jehovah e girdi’ rok u daken e ted?
9 Mu lemnag e bin dalip e n’en ni ke micheg Jehovah ngak e girdi’ rok—nra ayuwegrad. De n’uw nap’an nga tomren ni kan chuwegrad u Egypt, me micheg Got ngak piyu Israel ni gaar: “Chiney e ngug gagiyegnag e ggan nge mul u lan e lang nga but’ ni bod e n’uw ni fan ngomed ni gimed gubin; ma gubin e rran ni nge yan e girdi’ ngar kunuyed nap’an e tin ni ngar kayed riy u reb e rran.” Ere rin’ Got e n’en ni yog nra rin’, ni aram e ‘pi’ e flowa u tharmiy.’ “Faani guy piyu Israel ma dar nanged ko be mang, mu ur fithed yad ni be lungurad, ‘Be mang e pi n’ey?’” Aram e manna, ni fare flowa ni ke micheg Jehovah ngorad.—Exodus 16:4, 13-15.
10 I ayuweg Jehovah piyu Israel u daken e ted u lan 40 e duw, ni be pi’ e ggan nge ran ngorad. Mus ko sus rorad ni ayuweg ni nge dabi kireb ma dabi thow tungun ayrad. (Deuteronomy 8:3, 4) Gubin e pi n’ey ni guy Joshua. I guy ni chuweg Jehovah e girdi’ rok ko gafgow, me yororiyrad, me ayuwegrad ni bod rogon ni micheg ngorad.
Rogon ni Yibe Chuwegey ko Gafgow e Ngiyal’ Ney
11. Mang e buch u Brooklyn, New York, ko duw ni 1914, ma mang e ke taw nga nap’an ko ngiyal’ nem?
11 Uw rogon e ngiyal’ rodad ney? Nap’an e rorran ni Biernes ni kakadbul, ko October 2, 1914, me yib Charles Taze Russell ni ir e be ayuweg e pi Bible Student e ngiyal’ nem nga lan e gin ni yima abich riy u Bethel u New York. Me gaar: “Ba fel’ e kadbul.” Ma aram mu m’on ni nge par nga but’ me gaar: “Ke m’ay ngal’an e piin ni gathi yad piyu Jew; ke m’ay e rran ko pi pilung rorad.” Ku bayay, ke taw nga nap’an ni nge rin’ Jehovah ni ir e Th’abi Tolang ko palpalth’ib ban’en ni fan ko girdi’ rok. Ma aram e n’en ni ke rin’!
12. Mang e ni chuweg e girdi’ rok Got riy ko duw ni 1919, ma mang angin?
12 Lal e duw nga tomren, me chuweg Jehovah e girdi’ rok ko fare “Babylon nib Gilbuguwan,” ni aram e pi yurba’ e teliw ni googsur u fayleng. (Revelation 18:2) Buchuuw i gadad e yog ni guy e re n’em. Machane, ri gad be guy angin. I sulweg Jehovah e bin nriyul’ e liyor nga rogon me taarebnag e piin ni yad baadag ni ngar pigpiggad ngak. Ka nog e re n’ey u m’on riy u daken Isaiah ni profet ni gaar: “Tin ni bay yib e rran nga m’on e re burey ni bay e tempel riy e bayi par ni ir e ba th’abi tolang. Pire’ e nam ni bay ra bad ngay.”—Isaiah 2:2.
13. Mang mon’og e kam guy ni be tay e girdi’ rok Jehovah?
13 Fapi thin rok Isaiah e de aw nde riyul’. Nap’an e 1919 ma piin ni ke magey ko piin ni kan dugliyrad e ra tababnaged e machib u ga’ngin e fayleng ma re n’ey e tolangnag e birok Got e liyor u ga’ngin e fayleng. Nap’an e pi duw ko 1930, meb i gagiyel ni fapi “yugu boch e saf” e kan piningrad ni ngar uned ko fa bin nriyul’ e liyor. (John 10:16) Som’on e yib bokum biyu’, ngemu’ meb bokum miriay e biyu’, ma chiney e ke yoor e milyon e piin ni yad be un ko bin nriyul’ e liyor! Nap’an nni pilyeg e changar rok apostal John nge guy, ma kan dag ni yad e “girdi’ ni ke muulung ni pire’ ni pire’ ndariy be’ nrayog ni nge theegrad! Nra bad u gubin e nam, nge ganong, nge gubin mit e girdi’, ngu gubin e thin.” (Revelation 7:9) Mang e kam guy u nap’an e yafas rom? Uw urngin e pi Mich rok Jehovah u fayleng u nap’an nim fil e tin nriyul’? Ngiyal’ ney, e piin ni yad be pigpig ngak Jehovah e ke pag 6,700,000. Bochan ni ke chuweg Jehovah e girdi’ rok ko fare Babylon nib Gilbuguwan, ma ke bing e kanawo’ ko mon’og ni gad be guy e chiney u ga’ngin e fayleng.
14. Mang e n’en ni bayi chuweg Jehovah e girdi’ rok riy?
14 Ku reb e n’en ni bayi chuweg Jehovah e girdi’ rok riy e ke chugur—ni aram ban’en ni bay rogon ngak gubin e girdi’ u ga’ngin e re fayleng ney. Ra dag Jehovah gelngin, ni aram e ra chuweg urngin e piin ni yad be togopuluw ngak, miki chuweg e girdi’ rok u fithik’ e gafgow me fekrad i yan nga lan ba fayleng nib beech mab mat’aw. Rib manigil ni ngan guy ni ke chuw gubin e kireb min guy tabolngin ban’en nra buch nra thilyeg e yafas ko girdi’ ni gubin!—Revelation 21:1-4.
Rogon ni Ma Yororiyey Jehovah e Ngiyal’ Ney
15. Mang fan nib t’uf ni nge yororiy Jehovah e girdi’ rok e ngiyal’ ney?
15 Rogon ni kad guyed faram, e piyu Israel u nap’an Joshua e ba t’uf ni nge yororiyrad Jehovah. Ere, gur ba thil e girdi’ rok Jehovah e ngiyal’ ney? Danga’! I ginang Jesus pi gachalpen ni gaar: “Bayi kolmed e girdi’ ngar pied gimed ngan gechignagmed, ma bay nthang e fan romed. Ma urngin e girdi’ ni bay ra fanenikayed gimed ni bochag.” (Matthew 24:9) Ka nap’an e pi duw ni ke yan, ma Pi Mich Rok Jehovah u boor e nam e ke yog nra k’adedan’rad ko togopuluw nge gafgow nib gel ni yibe tay ngorad. Machane, ba gagiyel ni bay Jehovah ni be yororiy e girdi’ rok. (Roma 8:31) Thin rok e be micheg ngodad ndariy—‘ba talin e cham nni ngongliy’—nra taleg fare machib ko Gil’ilungun ni gad be un ngay.—Isaiah 54:17.
16. Mang e mich riy ni kam guy ni be ayuweg Jehovah e girdi’ rok?
16 Yugu aram rogon ni yibe fanenikay e girdi’ rok Jehovah, machane ka yad be ulul ni ngar yoorgad. Pi Mich Rok Jehovah e kar yoorgad u lan 236 e nam—ma aram e mich riy ni be yororiydad Jehovah rok e piin ni yad be gayiy rogon ni ngar kirebniged gadad ara ra th’abed gulungdad. Ga manang boch e tayugang’ ko am ara teliw ni kar gayed rogon ni ngar gafgowniged e girdi’ rok Got? Mang e ke buch rorad? Yad bay uw e chiney? Boch i yad e kan gotheyrad, ni bod rogon Farao u nap’an Moses nge Joshua. Ma uw rogon e pi tapigpig rok Got ko ngiyal’ rodad ney ni kar m’ad ni yad ba yul’yul’? Yad bay u laniyan’ Jehovah. Dariy bang nib fel’ ni yad ra par riy ni bod u rom. Ba tamilang, ni ke riyul’ e thin rok Jehovah u rogon ni be yororiydad.
Be Ayuweg Jehovah e Girdi’ rok e Ngiyal’ Ney
17. Mang e ke micheg Jehovah u murung’agen e ggan ko tirok ban’en?
17 I ayuweg Jehovah e girdi’ rok u daken e ted kakrom, maku arrogon e ngiyal’ ney. Yibe duruw’iydad ko ggan ni machib u daken “fare tapigpig nib yul’yul’ mab gonop.” (Matthew 24:45) Ke yog e tamilangan’ ko tirok Got ngodad ni ke par nib mith u lan bokum e chibog. I gaar fare engel ngak Daniel: “Ngam uchumiy fare ke babyor ma ga yip’ e hang ngay nge par nge yan i mada’ nga tomren e fayleng. Ma boor e girdi’ ni bay ur guyed rogon ni ngar nanged fan e tin ni be yib i m’ug. Ma bay i ga’ e llowan’ i yan.”—Daniel 12:4.
18. Mang fan nrayog ni nga nog ni ke garer e bin nriyul’ e tamilangan’ e ngiyal’ ney?
18 Gad be par ko ngiyal’ ko tomur, ma ke yoor e tamilangan’ ko tin nriyul’. Kan ni thothup e ke yognag e bin nriyul’ e tamilangan’ u murung’agen e bin nriyul’ e Got nge tin nib m’agan’ ngay ni fan ngak e piin nib t’uf e tin nriyul’ rorad u ga’ngin e fayleng. Ke garer e Bible u fayleng e ngiyal’ ney, maku arrogon e pi babyor ni be ayuweg e girdi’ ngar nanged e tin riyul’ u lan e Bible. Am lemnag e thin ni bay ko fare babyor ni, What Does the Bible Really Teach? (Mang e Ri Be Fil e Bible?)a Pi guruy riy e bay boch e deer riy ni kenggin e: “Mang e Tin Nriyul’ u Murung’agen Got?,” nge “Ba’ Uw e Pi Yam’?,” nge “Mang Gil’ilungun Got?,” nge “Mang Fan ni Ma Pag Got e Girdi’ ni Ngar Gafgowgad?” Ke yan bokum biyu’ e duw ni ma fith e girdi’ e pi deer ney. Ma chiney e bay e fulweg riy. Yugu aram rogon ni ke yan bokum e chibog nde nang e girdi’ e tin nriyul’ ko Bible ma be fil e Kristiano ni Googsur boch e machib nde puluw, ma Thin Rok Got e ke gel be ayuweg e piin ni yad baadag ni ngar pigpiggad ngak Jehovah.
19. Mang e tin ni ke micheg Got ni kam guy ni ke lebug, ma mang e rayog ni nga mog riy?
19 Ba mudugil nrogon e n’en ni kad guyed nga owchedad, ma rayog ni ngad gaargad: “Dariy bbugithin ko urngin e thin nib fel’ ni ke yog Jehovah ni Got romed ni ke aw nib m’ay fan. Ya urngin ni ke riyul’ ni fan ngomed. Dariy bbug ni ke aw nib m’ay fan.” (Joshua 23:14, NW) Jehovah e ma chuweg e pi tapigpig rok ko gafgow, ma ma yororiyrad, maku ma ayuwegrad. Rayog ni nga mog ban’en ni ke micheg nde lebug ko ngiyal’ ni ke dugliy ni nge lebug riy, fa? Dabiyog. Gad ba gonop ya ri be pagan’dad ko Thin rok Got.
20. Mang fan nrayog ni ngad sapgad ko gabul nge langlath u fithik’ e pagan’?
20 Ma uw rogon e gabul nge langlath? Ke yog Jehovah ngodad ni yooren i gadad e rayog ni nge athapeg e par u paradis u fayleng. Ma buchuuw i gad e bay e athap rorad ni ngar gagiyeggad Kristus u tharmiy. Demtrug e athap rodad, ma bay fan ni ngad pired ni gad ba yul’yul’ ni bod Joshua. Bayi taw ko ngiyal’ nra riyul’ e athap rodad. Ma aram e gad ra sap nga gubin e tin ke micheg Jehovah, ma aram e ku gad ra gaar: “Urngin ni ke riyul’.”
[Footnote]
a Ke ngongliy e Pi Mich Rok Jehovah.
Rayog ni Ngam Weliy?
• Mang e tin ke micheg Jehovah ni guy Joshua ni ke lebug?
• Mang e tin ke micheg Got ni kam guy ni ke lebug?
• Mang e rayog ni nge pagan’dad ngay u murung’agen e thin rok Got?