Ngan Gay “E Tirok Got Ban’en nib Toar”

“Kan ni thothup e ma gay e tirok Got ban’en nib toar.”​—1 KORINTH 2:10, NW.

1. Mang boch e tin riyul’ u Bible nra k’aring be’ ni be fil e Bible nge felfelan’?

OREN i gadad u lan e ulung ni Kristiano e ka rayog ni ngada lemnaged e felfelan’ nda ted ko som’on nda filed e tin riyul’. Kada pirieged fan nib ga’ fan fithingan Jehovah, nge fan ni ke pag be yib e gafgow, nge fan ni nge yan boch e girdi’ nga tharmiy, nge n’en ni bay ko gabul nge langlath ni fan ngak urngin e girdi’ nib yul’yul’. Sana kuuda sapgad nga Bible ko som’on, machane pi n’ey e ni mithag rodad, ni bod ni kan rin’ ngak boor e girdi’. Ud moyed ni bod be’ u daken e day ni be sap nga ar. Ra dabi fanay ban’en nra ayuweg nge guy e n’en ni bay u ar, ma buchuuw e ra guy ko pi n’en nib fel’ yaan ni bay nga ar. Machane ra bay e therek ni fen e day ara bowoch nib therek t’ay, ma ra felfelan’ nra guy ko som’on e lugoch nib fel’ reen, nge nig, nge pi n’en nib fos ni bay u maday, nge ku boch ban’en u maday. Ere ku arrogon nap’an ni ayuwegdad be’ ngada nanged fan e Bible, ma aram e som’on ni kada guyed e “tirok Got ban’en nib toar.”​—1 Korinth 2:8-10, NW.

2. Mang fan ni felfelan’ ko Thin rok Got ni yibe fil e dabi mus?

² Susun nge fel’ u wan’dad e chuuw i n’en ni kada guyed u Bible, fa? Fare thin ni “tirok Got ban’en nib toar” e ba muun ngay ni ngan nang fan e gonop rok Got ni be dag e kan ni thothup ngak e Kristiano ma de tamilang u wan’ boch e girdi’. (1 Korinth 2:7) Rib pag oren e pi n’en ni ngan gay murung’agen ni ke pi’ e gonop rok Got ni fan ko felfelan’ rodad! Dabiyog ni ngada nanged urngin ban’en u rogon e gonop rok Got. Fare felfelan’ nda pirieged ko som’on nda filed e tin som’on ni be fil e Bible e ra par rodad ndariy n’umngin nap’an ni faan gad ra ulul nguud gayed e “tirok Got ban’en nib toar.”

3. Mang fan nib t’uf ni ngada nanged nib fel’ rogon fan e michan’ rodad?

³ Mang fan nib t’uf rodad ni ngada nanged fan e “tin nib toar”? Gathi kemus ni ngan nang fan e n’en ni ke mich u wan’dad ya ngkun nang fan ko mang fan ni ke mich u wan’dad​—kenggin ni fan e michan’ rodad—​e ra gelnag e michan’ nge pagan’ rodad. Bible e be yog ngodad ni ngada fanayed ‘gelngidad i yog ban’en’ ni nge ‘micheg [ngodad] e tin nib fel’ nge tin ni yi baadag nge tin nib m’agan’ Got ngay ndariy thibngin.’ (Roma 12:1, 2) Gad ra nang fan ni ke yog Jehovah ngodad ni ngada pired u reb e kanawo’ ma ra gel i adag rodad ni ngad folgad rok. Arfan ni tamilangan’ ko “tin nib toar” e ra pi’ gelngidad ni ngada togopuluwgad ko ngongol ni kireb ma rayog ni nge k’aringdad nge “pasigan’dad ni ngad rin’ed e tin nib fel’.”​—Titus 2:14.

4. Mang e n’en nib muun ko fol Bible?

⁴ Ra ngan nang fan e tin nib toar ma thingar da filed murung’agen. Machane, ngan fil ban’en e gathi kemus ni ngan beeg. Ya muun ngay ni ngan fal’eg i gaweg murung’agen ngan guy nib puluw ko n’en ni ke m’ay i nang fan rodad. (2 Timothy 1:13) Muun ngay ni ngan nang fan e n’en ni ka nog. Fol Bible e thingar un tiyan’uy nga rogon ni ngada fanayed e n’en ni kad filed nge yog ni ngada dugliyed ban’en u fithik’ e gonop nge rogon ni nga i ayuweg boch e girdi’. Maku, bochan ni “urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan,” ma pi n’en gad be fil e thingari un ngay “urngin bug e thin ni be yog Got.” (2 Timothy 3:16, 17; Matthew 4:4) Fol Bible e ba maruwel nib gel! Machane ki yira felfelan’ ngay, min nang fan e “tirok Got ban’en nib toar” nde mo’maw’.

Jehovah e Ma Ayuweg e Piin nib Sumunguy Ngar Nanged Fan Ban’en

5. Mini’ e rayog ni nge nang fan e “tirok Got ban’en nib toar”?

⁵ Ku ra dam salap ko skul ma dam mecham ko skul, ma dab mu lemnag ni “tirok Got ban’en nib toar” e dab mu nang fan. Nap’an e machib ni i tay Jesus u fayleng, me dag Jehovah e tamilangan’ rok ko n’en nib M’agan’ ngay ngak e piin ndar skulgad nge yug girdi’ ni yad ba sumunguy nrayog ni nge skulnagrad e pi tapigpig rok Got ma de dag ngak e piin nib llowan’ mab skul. Yira taareb rogonnagrad ko piin nib skul ma yad bod e bitir. (Matthew 11:25; Acts 4:13) Ma rogon e “n’en ni ke fal’eg Got rogon ni fan ngak e piin nib t’uf Got rorad,” e yoloy apostal Paul ngak pi walagen ni gaar: “Gadad e ke dag Got ngodad u daken e kan ni thothup rok, ya kan ni thothup e ma gay urngin ban’en, ni mus ko tirok Got ban’en nib toar.”​—1 Korinth 2:9, 10, NW.

6. Mang e be yip’ fan e 1 Korinth 2:10?

⁶ Uw rogon ma kan ni thothup e ma gay “urngin ban’en, ni mus ko tirok Got ban’en nib toar”? Danir dag ngak e Kristiano ban’en ni be’ nge be’, ya ma fanay Jehovah e kan ni thothup rok ni nga i pow’iy e ulung rok ni ma pi’ e tamilangan’ ko Bible ngak e girdi’ rok Got nke taareban’rad. (Acts 20:28; Efesus 4:3-6) Ga’ngin yang e fayleng, ni gubin e ulung riy ni yad ma felfelan’ ko yaram ko fol Bible nib taareb rogon. Ke yoor e duw, ni ka ra filed urngin e pi n’en ni be fil e Bible. Kan ni thothup e ma maruwel u daken e ulung ni nge ayuweg e girdi’ ni nge yog ngorad ere pangin nib t’uf ni ngan nang fan riy e “tirok Got ban’en nib toar.”​—Acts 5:32.

N’en nib Muun ko “Tirok Got Ban’en nib Toar”

7. Mang fan ni boor e girdi’ nde nang fan e “tirok Got ban’en nib toar”?

⁷ Ri dab uda lemnaged ni tin nib “toar” e bogi n’en nib mo’maw’. Tamilangan’ ko “tirok Got ban’en nib toar” e de tamilang u wan’ yooren e girdi’, ni gathi bochan ni gonop rok Got e kaygi mo’maw’ ni ngan nang, ya bochan ni be bannag Satan e girdi’ ya ngar dabuyed fare ayuw ni ma pi’ Jehovah u daken e ulung Rok.​—2 Korinth 4:3, 4.

8. Mang e pi n’en nib toar ni i yog Paul murung’agen ko guruy ni dalip ko babyor rok ni yan ngak yu Efesus?

⁸ Guruy ni dalip ko babyor rok Paul ni yan ngak yu Efesus e dag riy ni ‘tirok Got ban’en nib toar’ e boor e tin riyul’ ni bay riy ni yooren e girdi’ rok Jehovah e kar nanged fan nib fel’ rogon, ni bod rogon ko mini’ e cha’ ni ir faen owchen ni kan micheg nge fare n’en ni kan mel’eg boch e girdi’ ni athap rorad e nga ranod nga tharmiy nge fare Gagiyeg rok fare Messiah. Yoloy Paul ni gaar: “Kakrom e da nog e re bugithin nib mith ney ngak e girdi’, machane chiney e ke dag Got ngak e pi apostal nge pi profet rok nib thothup u daken fare kan ni thothup. Re bugithin nem nib mith e baaray: piin ni gathi yad piyu Israel kar chaggad ngak piyu Israel ke fel’ rogorad ko tin ni be pi’ Got kar manged yu yang u taab dowef, ma be fel’ rogorad ko tin ni yog Got nra pi’ u daken Kristus Jesus.” Yog Paul ni kan ta’ ni nge “tamilangnag urngin e girdi’ u rogon ni be muruwliy Got e tin ni ke m’ay i lemnag rok ni i tay nib mith.”​—Efesus 3:5-9.

9. Mang fan nib fel’ ni ngan nang e “tirok Got ban’en nib toar”?

⁹ I weliy Paul e tin nib m’agan’ Got ngay ni ngan nang ni ki mada’ nga tharmiy “mu daken e galesiya e nge nang e pi engel nu tharmiy feni gonop Got u urngin ban’en.” (Efesus 3:10) Ma yib fel’ngin ngak e pi engel ni yad ma yaliy mar nanged fan e gonop rok Got u rogon e n’en ma rin’ ko ulung ko Kristiano. Rib fel’ rogodad ni gad manang fan e pi n’en ni ki mada’ ko pi engel ma yad ba adag ni ngar nanged fan! (1 Peter 1:10-12) Bin migid ni yog Paul e thingar da athamgilgad ni ‘gadad nge urngin e girdi’ rok Got e nge yib gelngin e tafinay rodad nge yog ni da nanged fan feni ga’ radan nge feni n’uw nge feni tolang nge feni toar’ e michan’ ko Kristiano. (Efesus 3:11, 18) Ngada guyed e chiney boch rogon e pi n’en nib toar nra ga’nag e tamilangan’ rodad.

Boch e Tin Toar Ban’en

10, 11. Rogon ko Bible e mingiyal’ e mang Jesus e en som’on i ‘owchen’ fare “pin” rok Got nu tharmiy?

¹⁰ Gad manang ni Jesus e ir e en som’on ko faen ‘owchen’ fare “pin” rok Got nu tharmiy ni faen nni weliy ko Genesis 3:15. Ra nge ga’ i nang fan rodad, ma rayog ni ngad fithed ni nge lungudad: ‘Wuin e mang Jesus faen owchen ni kan micheg? Gur, u nap’an ni immoy dawori ngal’ nib girdi’, fa nap’an nni gargeleg nib girdi’, fa nap’an e taufe rok, fa gur nap’an nni faseg ko yam’?’

¹¹ Ke micheg Got ni gin nu tharmiy ko ulung rok ni ka nog ko yiiy ni “ppin” rok, e ra yib be’ rok ni owchen nra pirdiiy lolugen fare porchoyog. Machane bokum biyu’ e duw ni yan, ma re pin ku Got nem e de yibnag be’ ni owchen nrayog ni gothey Satan nge maruwel rok. Arfan ni yiiy rok Isaiah e yog riy ni be’ nib ppin ‘ndabi diyen’ ma ke “kireban’.” (Isaiah 54:1, 5, 6) Munmun, min gargeleg Jesus u Bethlehem. Machane fin tomren nni taufenag, fin aram e ngiyal’ ni mangnag fare kan ni thothup fak Got, fini yog Jehovah ngan nang ni gaar: “Ereray Fakag.” (Matthew 3:17; John 3:3) Som’on ko an ‘owchen’ fare pin e keb i dag ir. Taaboch riy, ma piin nge chag ngak Jesus e kun dugliyrad min fakayrad u daken e kan ni thothup. Fare “pin” rok Jehovah ni ke n’uw nap’an ni i lem ni bod be’ nib ‘ppin nde diyen,’ e rayog ni par ni be “tolulnag e felfelan’.”​—Isaiah 54:1; Galatia 3:29.

12, 13. Mang thin nu Bible e be dag ni urngin e Kristiano u fayleng ni kan dugliyrad e yad “fare tapigpig nib yul’yul’ mab gonop”?

¹² Bin l’agruw i rogon e tin toar ni kan dag ngodad e rogon e n’en nib m’agan’ Got ngay ni nge mel’eg fare 144,000 u fithik’ e girdi’. (Revelation 14:1, 4) Ke fel’ u wan’dad fare n’en ni yibe fil ni urngin e piin ni kan dugliyrad ni be par u fayleng ndemtrug ngal’an ma yad “fare tapigpig nib yul’yul’ ma ba gonop” ni faani yog Jesus nra i pi’ e “ggan” ko girdi’ rok ko ngiyal’ ni ngan pi’ riy. (Matthew 24:45) Mang e thin nu Bible ni be micheg nre tamilangan’ ney e ba puluw? Gur rayog ni i weliy Jesus murung’agen reb e Kristiano ndemtrug ni ke pi’ gelngin pi walagen ko tirok Got ban’en?

¹³ I yog Got ko fare nam nu Israel ni gaar: “Gimed e mich rog kug dugliymed ni ngam manged ba nam ni tapigpig rog.” (Isaiah 43:10) Machane nap’an e Nisan 11 ko duw ni 33 C.E., me yog Jesus ngak e pi tayugang’ nu Israel ni ke n’ag Got e nam rorad ndab kur manged e tapigpig Rok. I gaar: “Gagiyeg rok Got e bay ni chuweg romed ngan pi’ ngak girdien reb e nam ni yad e bay yib wom’engirad nib fel’.” Me gaar Jesus ko fapi girdi’ ni ke muulung: ‘Chiney e bay nn’ag e tabinaw romed.’ (Matthew 21:43; 23:38) Sib rok Jehovah ni yu Israel e dar yul’yul’gad maku dar gonopgad. (Isaiah 29:13, 14) Taaboch riy ni karofen nem, me fith Jesus ni gaar: “Ere mini’ e en ni ir fare tapigpig nib yul’yul’ ma ba gonop?” nn’en ri be fith, e ‘Mang nam e ba gonop nra yan nga lon yu Israel ni ngar manged tapigpig nib yul’yul’ rok Got?’ I pi’ apostal Peter e fulweg riy u nap’an ni yog ko fare ulung ko piin Kristiano ni kan dugliyrad ni gaar: “Gimed fare ‘nam ni gimed girdien Got, ni mel’egmed Got.’” (1 Peter 1:4; 2:9) Re nam nem ku Got, e ‘fare Israel rok Got,’ ni ke mang e bin beech e tapigpig rok Jehovah. (Galatia 6:16) Ri bod rogon urngin i gothon yu Israel kakrom nra manged taab “tapigpig,” ere ku arrogon urngin e Kristiano ni kan dugliyrad ndemtrug e ngiyal ma kar manged taab “tapigpig nib yul’yul’ ma ba gonop.” Ri gad ba tow’ath ni ma yog e “ggan” ngodad u daken e tapigpig rok Got!

Fol Bible ni Gadad Rodad e Rayog nni Felfelan’ Ngay

14. Mang fan ni kab ga’ e felfelan’ ko fol Bible ko bin ni kemus ni ngan beeg?

¹⁴ Nap’an e som’on nra mab e wo’ ngodad ngada nanged fan e thin nu Bible, ma gathi gadad ma felfelan’ nga rogon ni ma gelnag e michan’ rodad? Arfan ni fol Bible e kab fel’ ko kemus ni ngaun beeg ma rayog ni ngan felfelan’ ngay. Arfan, ni nap’an ni ga ra beeg e pi babyor ni ke fal’eg e Kristiano ma ngam fithem ko: ‘Uw rogon fan e re n’ey ni kan weliy ni faanra nggu taarebnag ko n’en ni gu nang fan kakrom u murung’agen e re n’ey? Ma ku mang thin u Bible ara ban’en ni yira weliy ni manga ku rayog ni gu lemnag nrayog ni nge ayuweg e n’en ni kan weliy ko re article ney?’ Faanra ka ba’ boch ban’en ni ngkun gay murung’agen, ma ga yoloy nga but’ e deer ni ga baadag ni ngan pi’ e fulweg riy, ma ga ta’ ni aram e n’en ni ngam rin’ ko yay ni migid e fol Bible.

15. Mang e pi n’en ni kan ta’ ni ngan fil ni yira felfelan’ ngay ma ra yib angin nib n’uw nap’an?

¹⁵ Mang e pi n’en ni kan ta’ ni ngan fil nra pi’ e felfelan’ ngom ko tin nib beech e tamilangan’? Rayog ni ngad ga’naged e tamilangan’ rodad nfaanra da fal’eged i fil murung’agen e pi m’ag ni ke fal’eg Got nib fel’ rogon ni nge fel’ ko girdi’. Rayog ni ngam gelnag e michan’ rom ni ngam fil e pi yiiy ni fan ngak Jesus Kristus ara mu fal’eg i lemnag reb nge reb e pi yiiy ko pi profet u daken e babyor ko Bible. Maku reb ni ma gelnag e michan’ e ngaun sul ngaun guy chepin e Pi Mich Rok Jehovah ko ngiyal’ ney, ni ga ra guy ko fare ke babyor ni Jehovah’s Witnesses​—Proclaimers of God’s Kingdom (Pi Mich Rok Jehovah​—Pi Tamachib ko Gil’ilungun Got), nfaanra bay e re babyor ney ko thin rom.a Mu kuum guy e “Deer ko Piin Yad Ma Beeg” ni bay ko Wulyang Ntagil’ E Damit ya ba mudugil nrayog ni nge ayuwegem ni ngam nang fan nib fel’ rogon boch e thin u Bible. Ma ga fal’eg i lemnag fan fare thin nu Bible ni kan fanay ni ngan nang fan fare n’en ni yibe weliy. Re n’ey e ra ayuwegem ni nge ‘gel gelngin lanin’um’ i nang fan ban’en. (Hebrews 5:14) Nap’an ni ga be fil e Bible mu um yoloy nga but’ ni demtrug ko nga lan e Bible rom fa bang e babyor e tin nib ga’ fan nra yib angin ngom nge piin ni ga be ayuwegrad.

Ngan Ayuweg e Piin Fel’ Yangaren Ngar Adaged e Fol Bible

16. Uw rogon ni ga ra ayuweg e piin bitir ngar adaged e fol Bible?

¹⁶ Gallabthir e boor ban’en nrayog ni ngar rin’ed ngar puged laniyan’ pi fakrad ko tirok Got ban’en. Dab mu lemnag ni tin nib toar e kaygi mo’maw’ ni nge nang e bitir fan. Faan ga ra yog ban’en ngak e piin bitir ni nge gay murung’agen nge fal’eg rogon ni fan ko fol Bible ko tabinaw, ma rayog nim fithrad ko mang e kar filed ni murung’agen. Fol Bible ko tabinaw e rayog ni un ngay ni ngaun yan u yaan ban’en nrogon nra ayuweg e piin bitir ngar filed rogon ni ngar ayuweg e michan’ rorad mar micheged ni n’en ni kan fil ngorad e riyul’. Maku reb, e rayog nim fanay fare babyor ni “See the Good Land”b (“Mu Guy fare Nam nib Fel’”) ngam fil ngorad murung’agen e yungi nam ni bay u Bible mu kum tamilangnag e n’en ni yibe fil ko beeg Bible ni yibe tay u gubin e wik.

17. Mang fan nib t’uf ni ngad thabthabelgad u nap’an e fol Bible ni gadad rodad?

¹⁷ Fol Bible ni gur rom e rayog ni ngan mit riy ma ra gelnag e michan’, machane ngan kol ayuw nge dabi magawon ko ngan fal’eg rogoy ni fan ko pi muulung. Pi muulung e reb e kanawo’ ni ma fonow Jehovah riy u daken “fare tapigpig nib yul’yul’ ma ba gonop.” Machane, ku yira gay murung’agen boch ban’en ma ra ayuwegem nge yog nim pi’ boch e fulweg nib ga’ fan u nap’an e muulung​—ni bod u nap’an e Fol Babyor ko Ulung ara tin nib ga’ fan ko pow Bible ni yu wik ko Theocratic Ministry School.

18. Mang fan nib ga’ fan ni ngan athamgil ngan fil e “tirok Got ban’en nib toar”?

¹⁸ Ra gel i fil e thin rok Got rom ni gur rom ma ra ayuwegem ngam chugur ngak Jehovah. Ra ngan dag fel’ngin, ma be gaar e Bible: “Gonop e ma ayuwegey ni bod rogon e salpiy ni ma ayuwegey; machane fel’ngin e llowan’ e aram e gonop ni ir e ra tay nib fos e en ni bay e gonop rok.” (Eklesiastes 7:12, NW) Arfan, nib ga fan ni ngam athamgil ngam toarnag e tamilangan’ rom ko tirok Got ban’en. Bible e be micheg ngak e piin darur talgad i gay ban’en ni gaar: “Ri ga ra pirieg fare tamilangan’ rok Got.”​—Proverbs 2:4, 5, NW.

[Footnotes]

Rayog ni Ngam Weliy?

• Mang e “tirok Got ban’en nib toar”?

• Mang fan dabda talgad i fil e tin nib toar fan ban’en?

• Mang fan ni felfelan’ i nang fan e “tirok Got ban’en nib toar” e ba puf kanawoen ngak urngin e Kristiano?

• Uw rogon nrayog ni yib fel’ngin ngom nib gel e “tirok Got ban’en nib toar”?