Mmaruweliy e Pi Fel’ngin nra Ayuwegem Ngam Yognag Boch Pi Gachalpen Jesus
“Mmarod ngak girdien e pi nam u gubin yang ngam pingeged yad ngar manged pi gachalpeg.”—MATTHEW 28:19.
1. Mang boch e salap nge ngongol nib t’uf rok boch e tapigpig rok Got kakrom?
PI TAPIGPIG rok Jehovah e yu ngiyal’ ma thingar ra maruweliyed e salap nge ngongol nra ayuwegrad ngar rin’ed e n’en nib m’agan’ ngay. Bod ni motochiyel ku Got ngak Abraham nge Sarah ni ngar digeyew e fel’ rogon rorow u Ur e munmun me m’ug riy nib t’uf rorow boch e fel’ngin nra ayuwegrow ngar unew ko par u lan e tento. (Hebrews 11:8, 9, 15) Ba t’uf ni nge dabi rus Joshua, me pagan’ ngak Jehovah, me fil e pi Motochiyel rok u nap’an ni be pow’iy piyu Israel nga lan fare Nam ni Kan Micheg. (Joshua 1:7-9) Ma demtrug e miti salap ni bay rok Bezalel nge Oholiab ma dabisiy ni ki yoor boch u daken e kan ni thothup rok Got ya nge yog nra lekagew mi yow be ayuweg fare maruwel ko dimow tabernacle nge ku boch e maruwel ni yibe rin’.—Exodus 31:1-11.
2. Mang boch e deer ni gadra weliy nib l’ag rogon ko ngan yognag boch pi gachalpen Jesus?
2 Boch e chibog nga tomren, me motochiyelnag Jesus Kristus e re n’ey ngak pi gachalpen ni gaar: “Mmarod ngak girdien e pi nam u gubin yang ngam pingeged yad ngar manged pi gachalpeg, . . . mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Dariy ba ngiyal’ ni kan pi’ ba maruwel ni er feni ga’ ngak e girdi’ ni ngar rin’ed. Mang boch e fel’ngin nib t’uf ni nge yog ngak e piin ni yad be un ko fare maruwel ni ngan yognag boch pi gachalpen Jesus? Uw rogon ni ngad maruweliyed e pi fel’ngin ney?
Mu Dag ni Rib T’uf Got Rom
3. Mang kanawo’ e ke mab ngodad ko fare motochiyel ni ngan yognag boch pi gachalpen Jesus?
3 Thingari t’uf Jehovah rodad ni faanra ngad nonad ko girdi’ ma gad athamgil ngad ayuweged yad ni ngar pigpiggad ko bin nriyul’ e Got. Rayog ni nge dag piyu Israel e t’ufeg rorad ngak Got ni faan yad ra fol ko pi motochiyel rok u polo’ i gum’ircharad, mar ognaged e maligach nib m’agan’ ngay, mar pininged e sorok ngak u daken e tang. (Deuteronomy 10:12, 13; 30:19, 20; Psalm 21:13; 96:1, 2; 138:5) Gad e piin ni ka gad be un i yognag boch pi gachalpen Jesus, e ka gad be fol ko motochiyel rok Got, machane ku gad be dag nib t’uf Jehovah rodad u nap’an ni gad be weliy murung’agen nge n’en nib m’agan’ ngay ngak e girdi’. Ba t’uf ni ngad nonad u fithik’ e michan’, ma gad mel’eg e thin nib fel’ ni nga dogned nra dag rarogon lanin’dad u murung’agen e athap ni ke pi’ Got ngodad.—1 Thessalonika 1:5; 1 Peter 3:15.
4. Mang fan ni baadag Jesus ni ma machibnag murung’agen Jehovah ngak e girdi’?
4 Baadag Jesus ni nge weliy ko girdi’ e n’en nib m’agan’ Got ngay, nge murung’agen fare Gil’ilungun, nge bin nriyul’ e liyor ni bochan e rib t’uf Jehovah rok. (Luke 8:1; John 4:23, 24, 31) Riyul’ riy, e gaar Jesus: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu maruweliy.” (John 4:34) Bay rogon ku Jesus fapi thin ko fare psalmist ni gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug. Somol, ku gog fare bugithin nib fel’ ni murung’agem ni ga ma mat’awnag e girdi’ ngom, ni kug weliy u lan e muulung rok urngin e tirom e girdi’. Ga manang ndab gu tal i weliy.”—Psalm 40:8, 9; Hebrews 10:7-10.
5, 6. Mang e bin nth’abi ga’ e fel’ngin nib t’uf ni nge yog ngak e piin ni yad be un i yognag boch pi gachalpen Jesus?
5 Bochan e t’ufeg rorad ku Got, ma piin ni kafin ra tababgad i fil e Bible e yu ngiyal’ ma yad ma weliy murung’agen Jehovah nge Gil’ilungun nrib fel’ rogon me k’aring boch e girdi’ ni ngar beeged e Bible. (John 1:41) T’ufeg ngak Got e aram e bin nth’abi ga’ e fel’ngin ni ma k’aringdad ni ngad uned ko fare maruwel ni ngan yognag boch pi gachalpen Jesus. Ere ngad ted e re t’ufeg nem nib gel ni aram e ngaud beeged e Thin rok ni gubin e rran ma gad be fal’eg i lemnag.—1 Timothy 4:6, 15; Revelation 2:4.
6 Dariy e maruwar riy ni t’ufeg ngak Jehovah e ir e ayuweg Jesus Kristus nge mang reb e sensey nib pasig. Machane gathi kemus fan nib ga’ angin e machib ni i tay u murung’agen fare Gil’ilungun. Ere, ku mang reb e fel’ngin ni ayuweg Jesus nge yib angin fare maruwel ni i tay ni be yognag boch pi gachalpen?
Mu Dag ni Ga Be Lemnag e Girdi’ u Fithik’ e T’ufeg
7, 8. Uw rogon e girdi’ u wan’ Jesus?
7 Ma lemnag Jesus e girdi’ ma ma dag ni yad ba ga’ fan u wan’. Mus ko ngiyal’ ni immoy u tharmiy nrib “salap i maruweliy” e maruwel rok Got, ma ri baadag e tin nib l’ag rogon ko girdi’. (Proverbs 8:30, 31) Nap’an ni immoy Jesus u fayleng, ma ma runguy e girdi’, ma ma ayuweg e piin ni yad ma yib ngak. (Matthew 11:28-30) I dag Jesus e t’ufeg nge runguy ni ma dag Jehovah, ma re n’ey e k’aring e girdi’ ni ngar adaged e liyor ko bin nriyul’ e Got. Gubin mit e girdi’ nra motoyilgad ngak Jesus ni bochan e i dag ni be lemnagrad nge rarogorad u fithik’ e t’ufeg.—Luke 7:36-50; 18:15-17; 19:1-10.
8 Nap’an ni fith be’ nib moon ngak Jesus e n’en nib t’uf ni nge rin’ me yog e yafas ni manemus ngak, “me changar Jesus ngak ni ke runguy.” (Mark 10:17-21) Gad ra beeg murung’agen boch e girdi’ ni i skulnagrad Jesus u Bethany ni gaar: “Jesus e rib t’uf Martha rok, nge Maria ni walagen Martha, nge Lazarus.” (John 11:1, 5) Rib gel rogon nima lemnag Jesus e girdi’ mi i siyeg e toffan ni fan e nge skulnagrad. (Mark 6:30-34) T’ufeg rok Jesus nrib gel e ir e k’aring nge machibnag e girdi’ nrib fel’ rogon me ayuweg boor i yad ngar uned ko bin nriyul’ e liyor.
9. Mang e ngongol rok Paul ni ir be’ ni i un i yognag boch pi gachalpen Jesus?
9 Ku arrogon apostal Paul ni ki i lemnag rarogon e girdi’ ni i machibnag. Bod ni yog ngak e piin ni kar manged Kristiano u Thessalonika ni gaar: “Bochan e gimed ba t’uf romad ma gamad fal’eg rogomad ni gathi ke mus ni Thin Nib Fel’ ni yib rok Got e nggu bad gu pied ngomed, machane ngkug pied gamad nga pa’med nggu ayuweged gimed. Ya ri gimed ba t’uf romad.” Angin e athamgil ni tay Paul, e boch e girdi’ nu Thessalonika e ra ‘pied keru’rad ko liyos ngar pigpiggad ko bin nriyul’ e Got ni ir e be par nib fos.’ (1 Thessalonika 1:9; 2:8) Faanra riyul’ ni gad ma lemnag rarogon e girdi’, ni bod rogon Jesus nge Paul, maku ra yib e felfelan’ ngodad u nap’an ni gad ra guy ni ke taw fare thin nib fel’ nga gum’irchaen e piin nra “yog e yafas ndariy n’umngin nap’an ngorad.”—Acts 13:48.
Mu Dag e Lem ni Pagfay
10, 11. Mang fan nib t’uf e pagfay u nap’an ni gad be gay rogon i yognag boch pi gachalpen Jesus?
10 Pi tamachib ni bay angin e machib rorad e yad ma pagfarad. De ga’ fan u wan’rad ni nge yoor e chugum rorad. Ya riyul’ riy, e yog Jesus ngak pi gachalpen ni gaar: “Rib mo’maw’ rok e piin ni pire’ ban’en rorad ni ngar uned ko gagiyeg rok Got!” Ke gin pi gachalpen Jesus ko re thin ney, machane miki ulul ngay nge gaar: “Pi fakag, rib mo’maw’ ni ngan un ko gagiyeg rok Got! Kab mo’maw’ rok be’ ni pire’ ban’en rok ni nge un ko gagiyeg rok Got ko bin ni nge yan ba kamel u mugufan ba rosom.” (Mark 10:23-25) I yog Jesus ngak pi gachalpen ni faanra ngar tedan’rad i pingeg e girdi’ ngar manged pi gachalpen ma thingar ra pired nib mom e yafas rorad. (Matthew 6:22-24, 33) Mang ni faanra da paged fadad ma ra ayuwegdad ni ngad yognaged boch pi gachalpen Jesus?
11 Ba t’uf e athamgil nib gel ni faanra ngan fil gubin e tin ni ke motochiyelnag Jesus. Be’ ni be yognag boch pi gachalpen Jesus e ba ga’ ni ma athamgil ni nge fil e Bible ngak be’ ni baadag e machib u gubin e wik. Boch e pi tamachib ko Gil’ilungun e kar thilyeged e maruwel rorad ni polo’ e tayim kar uned nga boch e maruwel ni be fek buchuuw e tayim, ni fan e nge yog nra pirieged boor e girdi’ ni baadag e machib. Bokum biyu’ e Kristiano ni kar filed yugu reb e thin ni fan e nge yog nra machibniged e girdi’ nu bang ni be par ko gin ni yad ma par riy. Ma boch i yad e kar digeyed e tabinaw rorad ka ranod nga yugu bang ara nga yugu reb e nam ni fan e ngar yoornaged e maruwel rorad ko re mokun woldug ney. (Matthew 9:37, 38) Gubin e pi n’ey nib t’uf ni ngan pagfay riy. Machane ku boor ban’en nib muun ko ngan mang boch e tamachib nib salap.
Mu Gum’an’nigem Machane Dab Mu Adbey e Tayim
12, 13. Mang fan nib ga’ fan e gum’an’ u nap’an ni yibe yognag boch pi gachalpen Jesus?
12 Gum’an’ e aram reb e fel’ngin nra ayuwegdad ni ngad yognaged boch pi gachalpen Jesus. Thin ni gad be wereg e be dag nib t’uf e ngongol nib gur, machane ngan yognag boch pi gachalpen Jesus e kub t’uf e tayim nge gum’an’ riy. (1 Korinth 7:29) I gum’an’ Jesus u puluwon James ni walagen. Yugu aram rogon nrib naab James ko maruwel rok Jesus ni machib, ma bay ban’en ni i taleg nde mang reb i gachalpen Jesus. (John 7:5) Machane, thilin ngal’an e yam’ ni tay Kristus nge Pentekost 33 C.E., me yib i mang James reb i gachalpen Jesus, ya be yog e Bible nra mada’gad e chitiningin, nge pi walagen, nge pi apostal ni ngar meybilgad u taabang. (Acts 1:13, 14) I mon’og James nib fel’ rogon ni ir reb i gachalpen Jesus, me munmun me rin’ bogi maruwel nib ga’ u lan e ulung ko Kristiano.—Acts 15:13; 1 Korinth 5:7.
13 Pi Kristiano e yad bod e pi ta milay’ ni yad be maruweliy e tin nib mo’maw’ ni nge ilal ban’en—ngan nang fan e Thin rok Got, nge t’ufeg ngak Jehovah, nge lem ni bod e lem rok Kristus. Ba t’uf e gum’an’ ko re n’ey. I yoloy James ni gaar: “Pi walageg . . . , mpired ni gimed ba gum’an’ nge mada’ ko ngiyal’ ni bayi sul Somol riy. Mu guyed feni gum’an’ e en ni ma woldug nga rogon ni ma sonnag e woldug rok ni nge yib limngun ara wom’engin nri ba ga’ fan ngak. Ma sonnag e ngiyal’ ni som’on ko n’uw nge ngiyal’ ni tomren e n’uw u fithik’ e gum’an’. Ere ku er rogomed nthingar mpired ni gimed ba gum’an’! Mpired nib mudugilan’med ko n’en ni ke l’agan’med ngay, ya chirofen ni nge sul Somol riy e ke chugur.” (James 5:7, 8) Be tay James ir ngak e piin ntaareb e michan’ rorad ni ngar ‘gum’an’gad nge mada’ ko ngiyal’ ni bayi sul Somol riy.’ Faanra der nang pi gachalpen Jesus fan ban’en, ma ma weliy ngorad u fithik’ e gum’an’ ngu daken e fanathin. (Matthew 13:10-23; Luke 19:11; 21:7; Acts 1:6-8) Chiney ni bay Somol, e kub t’uf ni ngad gum’an’gad u nap’an ni gad be yognag boch pi gachalpen Jesus. Piin ni kar manged pi gachalpen Jesus ko ngiyal’ rodad ney e ba t’uf ni ngan fonownagrad u fithik’ e gum’an’.—John 14:9.
14. Yugu aram rogon ni gad ba gum’an’, ma uw rogon ni ngad fanayed e tayim rodad nib fel’ rogon i ayuweg e girdi’ ngar manged boch i gachalpen Jesus?
14 Yugu aram rogon ni gad ba gum’an’, ma boor e girdi’ ndarur mon’oggad u nap’an ni gad ra tabab i fil e Bible ngorad. (Matthew 13:18-23) Ere, nap’an ni kad athamgilgad ni ngad ayuweged yad, ma gad ra tal ko yan ngorad ngad gayed e piin ni yad baadag e thin nriyul’ ko Bible. (Eklesiastes 3:1, 6) Riyul’, ni mus ko girdi’ ni yad baadag e thin nriyul’ ko Bible mab t’uf ni ngar thilyeged rogon ni yad ma sap nga ban’en, nge ngongol rorad, nge n’en nib ga’ fan ko yafas rorad. Ere gad ba gum’an’, ntaareb rogon ngak Jesus ni i gum’an’ u puluwon pi gachalpen nib t’uf e tayim rorad ni ngar thilyeged pangirad.—Mark 9:33-37; 10:35-45.
Mmaruweliy e Salap u Rogon i Fil Ban’en ku Be’
15, 16. Mang nib ga’ fan ni ngad weliyed ban’en u rogon nib mom ni ngan nang fan ma ngkud fal’eged rogodad u nap’an ni gad be yognag boch pi gachalpen Jesus?
15 T’ufeg ngak Got, nge ngan lemnag rarogon e girdi’, nge pagfay, nge gum’an’ e ba ga’ fan ko ngan yognag boch pi gachalpen Jesus. Kub t’uf ni ngan maruweliy rogon e salap i fil ban’en ko girdi’, ya ra ayuwegdad ngad weliyed ban’en u rogon nib tamilang mab mom. Bod ni, boor e thin ko fare Sensey Nth’abi Ga’, ni Jesus Kristus, ni ba ga’ angin nbochan e ba mom. Sana ke yib ngan’um boch e thin rok Jesus ni bod ni gaar: “Ngam ulunguyed e flaab romed u tharmiy.” “Dab mpied ban’en nib thothup ngak e pilis.” “Gonop rok Got e ke m’ug nib riyul’ ko tin kan guy ni ke yib riy.” “Ere mpied ngak . . . e pilung nu Roma e tirok ban’en, me gimed pi’ ngak Got e tirok ban’en.” (Matthew 6:20; 7:6; 11:19; 22:21) Riyul’, ni gathi kemus nthin nib ngoch e i yog Jesus. Ya ma fil ban’en u rogon nib tamilang ma ma weliy fan ban’en nib fel’ rogon nfaanra ba t’uf. Uw rogon nrayog nim folwok u rogon ni ma fil Jesus ban’en?
16 Ngan fal’eg rogoy nib fel’ rogon e aram rogon me yog nni weliy ban’en nib mom mab tamilang. Reb e tamachib nde fal’eg rogon e boor ban’en ni ma yog. Ra weliy fan fare n’en ni yibe weliy murung’agen nge pag rogon nge dabki tamilang fan. Reb e tamachib ni ke fal’eg rogon e ba thil, ya ra lemnag e en ni be fil ban’en ngak, me fal’eg i lemnag e n’en ni nge weliy, me weliy nib mom mab tamilang. (Proverbs 15:28; 1 Korinth 2:1, 2) Ra tay u laniyan’ e chuuw ni ke mit ngak e en ni be fil e Bible nge n’en nib t’uf ni ngan tamilangnag u nap’an fare fol Bible. Sana manang fare tamachib boor ban’en ni kub fel’ ni yira nang ko fare n’en ni yibe weliy murung’agen, machane ra nge tamilang ban’en ma be yip’ fan ni ngan chuweg e tin nde t’uf ni ngan nang riy.
17. Uw rogon ni ngad ayuweged e girdi’ ngar lemnaged fan e thin nu Bible?
17 Ki ayuweg Jesus e girdi’ ni ngar lemgad, ma gathi kemus ni i weliy e tin nriyul’ ngorad. Immoy ba ngiyal’ ni fith ni gaar: “Simon, uw rogon ni ga be finey? Mini’ e ma pi’ e tax ko chugum fa tax ko pi pilung nu roy u fayleng? Girdien e nam fa girdi’ ni yib u bayang ko fare nam?” (Matthew 17:25) Sana ri gad baadag i weliy murung’agen e Bible ni bay yu ngiyal’ ni ngad t’ared lanin’dad ni fan e nge yog ni weliy faen ni gad be fil e Bible ngak e n’en ni be lemnag ara weliy ban’en ko n’en ni yibe fil u nap’an e fol Bible. Ma bod rogon ni yima fonownagdad riy nsusun e dab da fithed e deer nge pag rogon. Ya gad ra lemnag rarogon e girdi’, ma gad fanay e fanathin nib fel’, nge deer nra pug e tafinay, ma rayog ni ayuwegrad ngar nanged fan e pi thin nu Bible ni bay u lan e pi babyor rodad.
18. Mang e ba muun ko fare ‘salap u rogon i fil ban’en ku be’?
18 Be weliy e Bible murung’agen e ‘salap u rogon i fil ban’en ku be’.’ (2 Timothy 4:2; Titus 1:9) Mit ney e salap e boor ban’en ni kub muun ngay, gathi kemus ni ngan ayuweg be’ nge mit ngak e tin nriyul’. Susun e ngad gayed rogon ngad ayuweged be’ ni be fil e Bible nge nang fan e n’en nib thil u thilin e tin riyul’ nge tin nde riyul’, tin nib fel’ nge tin nib kireb, nge gonop nge aliliy. Faan gad ra rin’ ni aray rogon maku gad athamgil ni ngad ayuweged facha’ ni nge t’uf Jehovah rok, ma aram e rayog ni guy fan ni nge fol Rok.
Mu Pasig i Yognag Boch Pi Gachalpen Jesus
19. Uw rogon nib l’ag urngin e Kristiano ko fare maruwel ni ngan ayuweg e girdi’ ngar manged pi gachalpen Jesus?
19 Fare ulung ko Kristiano e ba ulung ni ma yognag pi gachalpen Jesus. Nap’an nra mang be’ nib beech reb i gachalpen Jesus, ma fare Mich Rok Jehovah ni pirieg facha’ me ayuweg ni nge fil e n’en ni be fil e Bible e gathi kemus ni yigoo ir e ra felfelan’. Nap’an nra yarmiy ba ulung i girdi’ ni ngan gayiy reb e bitir ni ke yan nga bang, ma sana kemus ni taabe’ e ra pirieg fare tir. Machane nap’an nra sul fare tir ngak e gallabthir rok, ma gubin e piin nra uned i gay fare tir e yad ra felfelan’. (Luke 15:6, 7) Ere taareb rogon ko ngan ayuweg be’ nge mang reb i gachalpen Jesus. Gubin e Kristiano ni yad be un i gayiy e piin ni ngar manged pi gachalpen Jesus. Ma nap’an nra tabab be’ nib beech i un ko muulung u Kingdom Hall, ma gubin e Kristiano ni bay e yad ra maruweliy ni nge felfelan’ ko bin nriyul’ e liyor. (1 Korinth 14:24, 25) Ere, gubin e Kristiano nrayog ni ngar felfelan’gad ngay ni be yog bokum miriay e pi gachalpen Jesus nib beech u gubin e duw.
20. Mang e susun ni ngam rin’ ni faanra ga baadag ni ngam fil ngak boch e girdi’ murung’agen e thin riyul’ ko Bible?
20 Boor e Kristiano ni yad baadag ni ngar filed ngak be’ murung’agen Jehovah nge bin nriyul’ e liyor. Machane, yugu aram rogon ni yad be athamgil, ma sana dawori yog ni ngar rin’ed. Faanra arrogon, mag ulul i gelnag e t’ufeg rom ngak Jehovah, mag lemnag rarogon e girdi’, mag pagfam, mag dag e gum’an’, mag gay rogon ngam mon’ognag rogon ni ga be fil ban’en ko girdi’. Bin nth’abi ga’ fan riy, e ngam yibilay ni ga baadag ni ngam weliy e tin nriyul’. (Eklesiastes 11:1) Nge fel’ lanin’um ko fare tamilangan’ ni ke yog ngom ni gubin ban’en ni gara rin’ ko pigpig rom ngak Jehovah ma bay rogon ko fare maruwel ni ngan yognag boch pi gachalpen Jesus nibe pining e sorok ngak Got.
Rayog ni Ngam Weliy?
• Mang fan ni ngan yognag boch pi gachalpen Jesus e be skengnag e t’ufeg rodad ngak Got?
• Mang boch e fel’ngin nib t’uf rok e piin ni yad be yognag boch pi gachalpen Jesus?
• Mang e ba muun ko ‘salap u rogon i fil ban’en ku be’’?