Mu Folwok ko Faen ni Ma Yognag Pi Gachalpen Nib Ga’
“Mu tedan’med nga rogon e motoyil ni gimed be tay.”—LUKE 8:18.
1, 2. Mang fan ni ngam tiyan’um nga rogon ni ma ngongol Jesus ngak e girdi’ u nap’an ni be machib?
JESUS KRISTUS e be rin’ e maruwel rok ni ir fare Sensey Nth’abi Ga’ nge Faen ni Ma Yognag Boch Pi Gachalpen u nap’an ni gaar ngak pi gachalpen: “Mu tedan’med nga rogon e motoyil ni gimed be tay.” (Luke 8:16-18) Bay rogon e re motochiyel nem ko machib ni ga be tay ni gur reb e Kristiano. Faanra mu tiyan’um ko tin ni bay rogon ngak Got nge tin nib m’agan’ ngay mag fol riy ma ga ra mang ba tamachib ko Gil’ilungun nib ga’ angin. Riyul’ ndabiyog ni ngam rung’ag laman Jesus e ngiyal’ ney, machane rayog nim beeg murung’agen e n’en ni i yog nge n’en ni i rin’, nrogon ni kan dag u lan e Bible. Mang e be dag u murung’agen rogon ni i ngongol Jesus ngak e girdi’ u nap’an e machib ni i tay?
2 Jesus e ir reb e tamachib nrib fel’ ko fare thin nib fel’ ma ku ir reb e sensey nrib fel’ ko tin nriyul’ u lan e Bible. (Luke 8:1; John 8:28) Maruwel ko pi gachalpen Jesus e ba muun ngay e machib nge ngan fil ban’en ko girdi’, machane boch e Kristiano ni yad e tamachib nib salap e yad ma guy nib mo’maw’ ni ngar filed ban’en ko girdi’ nib fel’ rogon. Machib e ba muun ngay ni ngan weliy murung’agen ban’en, machane ngan fil murung’agen Jehovah ngak e girdi’ nge n’en nib m’agan’ ngay e be dag nib t’uf nra be’ ni ma yognag boch pi gachalpen Jesus ma nge fal’eg e tha’ u thilrad. (Matthew 28:19, 20) Rayog ni ngan rin’ e re n’ey nfaanra ni folwok rok Jesus Kristus, ni ir fare Sensey Nth’abi Ga’ nge Faen ni ma Yognag Boch Pi Gachalpen.—John 13:13.
3. Ga ra folwok rok Jesus, ma mang e ra rin’ ko athamgil ni ga be tay ni ngam yognag boch pi gachalpen?
3 Faanra mu folwok u rogon ni ma fil Jesus ban’en, ma aram e ga be fol ko fonow rok apostal Paul ni gaar: “Um gonopiyed rogon pangimed ngak e piin ndawori mich Jesus Kristus u wan’rad, ma gubin ngiyal’ nra bung rogomed ni ngam weliyed e thin rok Got ngorad mi gimed weliy. Ma gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.” (Kolose 4:5, 6) Ba t’uf e athamgil ni ngan folwok rok Jesus ko fare maruwel ni ngan yognag boch pi gachalpen, machane ra ayuweg nge fel’ rogon ni ga ma fil ban’en ko girdi’ ni bochan e ra ayuwegem ni ngam ‘pi’ e fulweg nib mat’aw ko tin ni ke fith be’ nge be’ ngom’ nrogon nib puluw ko n’en nib t’uf rok be’ nge be’.
I Pi’ Jesus e Athamgil Ngak Boch e Girdi’ ni Ngar Nonad
4. Mang nrayog ni nga nog nib fel’ rogon ni ma motoyil Jesus?
4 Nap’an ni kab achig nge ni mada’ ko ngiyal’ ni ke ilal, ma ke mecham ku Jesus ni nga i motoyil ko girdi’ ma be pi’ e athamgil ngorad ni ngar weliyed e tin ni yad be lemnag. Bod ni nap’an ni 12 e duw rok, me pirieg e gallabthir rok ni bay u fithik’ e pi tamachib u lan e tempel, ni “be motoyil ngorad ma be fithrad.” (Luke 2:46) De yan Jesus nga tempel ni nge tamra’nag e pi tamachib ko tamilangan’ rok. I yan ngaram ni nge motoyil, ni yugu aram rogon ni i fith boch e deer. Bochan ni ir be’ ni ma motoyil nib fel’ rogon ma sana aram reb e fel’ngin ni ayuweg nge fel’ u mit Got nge girdi’.—Luke 2:52.
5, 6. Uw rogon ma kad nanged ni i motoyil Jesus ko n’en ni i yog e piin ni i skulnagrad?
5 Tomren ni kan taufenag min dugliy ni nge mang Messiah, ma ka baadag Jesus ni nge motoyil ngak e girdi’. De par ni kemus ni n’en ni be fil ko girdi’ e aram e n’en ni be lemnag me pagtalin murung’agen e piin ni kar bad ni ngar motoyilgad ngak. Ba ga’ ni ma tal nge fith e n’en ni yad be lemnag, ma aram me motoyil ko n’en ni nga rogned. (Matthew 16:13-15) Bod ni tomren ni yim’ Lazarus ni walagen Martha, me gaar Jesus ngak Martha: “En nra i par nib fos ni gub mich u wan’ e dabki yim’ biid.” Ma aram me fith ngak ni gaar: “Ke mich u wun’um e re bugithin ney fa dawor?” Mab mudugil ni motoyil Jesus u nap’an ni fulweg Martha ni gaar: “Somol, er rogon! Ke mich u wun’ug ni gur fare Messiah, ni Fak Got gur.” (John 11:26, 27) Kari fel’ lanin’uy u nap’an ni rung’ag Martha ni ke weliy e michan’ rok ni aram rogon!
6 Nap’an ni digey boor pi gachalpen Jesus Jesus, ma ke fel’ u wan’ ni nge motoyil ko n’en ni be lemnag e pi apostal rok. Ere fithrad ni gaar: “Ma gimed - gimed baadag ni ngkum paged gag ngam marod?” Me fulweg Simon Peter ni gaar: “Somol, i mini’ e gamad ra yan ngak? Yi gur e bay fapi thin rom ni ir e ma pi’ e yafos ndariy n’umngin nap’an ngak e girdi’. Ma chiney e ke mich u wun’mad ma kug nanged ni gur Faanem ni Gab Thothup ni mub rok Got.” (John 6:66-69) Dabisiy ni ke fal’eg e pi thin nem laniyan’ Jesus! Michan’ ni aray rogon rok be’ ni be fol Bible e rib mudugil nra fal’eg lanin’um.
I Motoyil Jesus u Fithik’ e Tayfan
7. Mang fan ni boor piyu Samaria ni mich Jesus u wan’rad?
7 Ku reb i fan ni Jesus reb e sensey nib fel’ e bochan ni ma lemnag e girdi’ ma ma motoyil ngorad u fithik’ e tayfan. Bod ni immoy ba ngiyal’ ni machibnag Jesus be’ nib ppin nu Samaria u tooben e luwed rok Jakob u Sychar. Nap’an ni yow be non, ma gathi yigoo Jesus e ir e i non; ya ki motoyil ko n’en ni nge yog fare pin. Nap’an ni be motoyil Jesus ngak fare pin, me nang nib ga’ fan e pigpig u wan’ ma aram me yog ngak ni be sap Got ngak e piin ni yad ra pigpig Ngak u daken e ayuw ko kan ni thothup u fithik’ e yul’yul’. I dag Jesus ni be tayfan e re ppin ney, ma tomur riy me yan i weliy fare pin murung’agen ngak boch e girdi’ u lan binaw, ma “boor e girdi’ nu Samaria u lan e re binaw nem ni mich Jesus u wun’rad, ya ke yog fare pin.”—John 4:5-29, 39-42.
8. Uw rogon nra ayuwegem fare n’em ni girdi’ e yad baadag ni ngar weliyed e n’en ni yad be lemnag u rogon ni ngam nonow be’ u nap’an e machib?
8 Ba ga’ ni baadag e girdi’ ni ngar weliyed e n’en ni yad be lemnag. Bod ni, piin ni yad ma par u Athens kakrom e ur adaged ni ngar weliyed e n’en ni yad be lemnag mu ku rrung’aged ban’en nib beech. Ireray e n’en ni rin’ me pi’ Paul fare welthin nib ga’ angin ko fare Areopagus ara tafen e puf oloboch nth’abi ga’ ko re binaw nem. (Acts 17:18-34) Nap’an ni gimew be non be’ ni kam mada’nag u nap’an e machib, ma rayog nim gaar ngak, “Ku gub ni ngguyem ni bochan e gu baadag ni nggu nang e n’en ni ga be lemnag u murung’agen e [ma gog ban’en].” Mmotoyil ko n’en nra yog facha’, mag weliy buchuuw ban’en riy, ara mu fith reb e deer u murung’agen fare n’em. Mag dag ngak e n’en ni be weliy e Bible u murung’agen fare n’em.
Manang Jesus e N’en ni Nge Yog
9. Mang e rin’ Jesus u m’on ni nge weliy fan “fapi thin nu babyor nib thothup” ngak Kleopas nge en ni be un ngak?
9 Dariy ba ngiyal’ ni ke par Jesus ndakuriy e n’en ni nge yog. Gathi kemus ni ma motoyil nib fel’ rogon, ya ku manang e n’en ni be lemnag e girdi’, maku manang e n’en ni nge yog. (Matthew 9:4; 12:22-30; Luke 9:46, 47) Ra ngan susunnag, ma: De n’uw nap’an nga tomren ni kan faseg Jesus ko yam’, ma l’agruw i gachalpen e yow be yan u Jerusalem nga Emmaus. Fare Gospel e gaar: “Nap’an ni yow be weliy murung’agen, me chugur Jesus i yib ngorow nguu ranod i yan, mi yow guy, machane de pow rorow. Me gaar ngorow: ‘Mang e gimew be weliy murung’agen ni faani gimew be yib?’ Mi yow dugil ni ke m’ug u owcherow ni ke kireban’row. Ma bagayow ni Kleopas fithingan, e fith Jesus ni gaar, ‘Mog, kemus ni goo gur e ka ga bay u Jerusalem ndawor mu nang e n’en ni kan rin’ u rom ko fa in i rran ni baaray ni ke yan?’ Me fith ni gaar: ‘Bogi mang?’” I motoyil fare Sensey Nth’abi Ga’ ngorow ngaur weliyew ni Jesus ni ir fare Nazarene e i skulnag e girdi’, ma be ngongliy e maang’ang, ma kan li’ kem’. Chiney e bay boch e girdi’ ni be yog ni kan faseg ko yam’. I pag Jesus Kleopas nge en ni be un ngak ngar weliyew e n’en ni yow be lemnag. Ma aram me weliy e tin nib t’uf ni ngar nangew u lan, “fapi thin nu babyor nib thothup.”—Luke 24:13-27, 32.
10. Uw rogon ni ngam nang e n’en ni be lemnag be’ ni kam mada’nag u nap’an e machib u murung’agen e teliw?
10 Sana dariy ban’en ni ga manang ko n’en ni ma lemnag be’ ni kam mada’nag u nap’an e machib u murung’agen e teliw. Ra ngam nang, ma sana rayog ni mu mog ngak ni ga baadag ni ga ma motoyil ko n’en ni ma yog e girdi’ u murung’agen e meybil. Ngemu’ ma rayog nim fith nim gaar, “Ga be lemnag ni bay be’ ni ma motoyil ko meybil?” Fulweg ko fare deer e ra dag e n’en ni be lemnag facha’ nge rarogon e teliw rok. Faanra rib m’ing nga barba’ e teliw, ma rayog ni mu nang e n’en ni be lemnag ni faanra mu fith ngak ni lungum, “Ga be lemnag ma ma motoyil Got nga gubin meybil, fa bay ba mit e meybil nde m’agan’ ngay?” Deer ni aray rogon e rayog ni ayuweg ni nge fel’ e numon romew facha’. Faanra ba puluw ni ngam weliy reb e thin nu Bible, ma rayog ni mu rin’ u fithik’ e kol ayuw, ndab mu togopuluw ko n’en nib mich u wan’ facha’. Faanra baadag ni be motoyil ngom, ma sana ra adag ni ngkum sul bayay. Machane uw rogon ni faanra ke fith reb e deer ndam nang e fulweg riy? Rayog ni ngam fal’eg i gay e fulweg riy mag sul ngam weliy ngak ‘e fulweg ko n’en nra fith ngom ni ngam weliy murung’agen e n’en ni ke l’agan’um ngay.’—1 Peter 3:15.
I Machibnag Jesus e Piin ni Bay Rogon ni Ngan Machibnagrad
11. Mang e ra ayuwegem ngam pirieg e piin ni bay rogon ni ngan machibnagrad?
11 Jesus nib flont e bay e tamilangan’ rok ni ir e ke ayuweg ni nge pow rok e piin ni bay rogon ni ngan machibnagrad. Gadad e ba mo’maw’ rodad ni ngad pirieged e piin ni ke “mel’egrad Got ni nge yog e yafos ndariy n’umngin nap’an ngorad.” (Acts 13:48) Ku arrogon e pi apostal ni gaar Jesus ngorad: “Faan gimed ra yib nga reb e binaw ni pire’ e girdi’ riy fa reb e binaw nib lich e girdi’ riy, mi gimed yan nga lan ngam guyed be’ ni ba adag ni ngam pired rok.” (Matthew 10:11) Bod e pi apostal rok Jesus, thingar mu gay e girdi’ ni yad baadag ni ngar motoyilgad min fil e thin riyul’ ko Bible ngorad. Rayog ni ngam pirieg e pi girdi’ nem ni faanra mu motoyil ngak gubin e girdi’, mag tiyan’um nga rarogorad ni yad gubin.
12. Uw rogon ni ngam ulul i ayuweg be’ ni baadag e machib?
12 Tomren ni kam chuw rok be’ ni ke dag ni baadag fare thin u murung’agen fare Gil’ilungun, mab fel’ ni ngkum lemnag murung’agen e tin nib t’uf rok ko tirok Got ban’en. Faanra mu yoloy nga but’ e n’en ni kam fil u tomren ni kam weliy murung’agen fare thin nib fel’ ngak be’, ma rayog ni ayuwegem nge yog nim ayuweg facha’ ko tirok Got ban’en. Nap’an ni kam sul ngak, mab t’uf ni ngam motoyil nib fel’ rogon ni faanra ngkum nang boch ban’en u murung’agen e tin nib mich u wan’ facha’, nge rogon e ngongol rok, nge rarogon.
13. Mang e rayog ni ayuwegem ngam nang rogon e lem rok be’ u murung’agen e Bible?
13 Uw rogon ni ngam pi’ e athamgil nga laniyan’ e girdi’ nga rogned ngom rogon e lem rorad u murung’agen e Thin Rok Got? Yu yang, e ba ga’ angin ni ngan fith ni nge lunguy, “Kam pirieg nib mo’maw’ ni ngan nang fan e Bible, fa?” Fulweg ko re deer nem e ba ga’ ni ma dag ko be tay facha’ fan e tirok Got ban’en fa danga’. Ma reb e kanawo’ e ngan beeg reb e thin nu Bible ngak min fith ni lunguy, “Uw rogon e re n’em u wan’um?” Rayog ni nge fel’ rogon e machib rom nfaanra mu fanay e deer nib fel’ ni bod ni i rin’ Jesus. Machane, ba t’uf e kol ayuw.
I Fanay Jesus e Deer nib Fel’ Rogon
14. Uw rogon ni ngam dag nib ga’ fan u wan’um e n’en ni be lemnag boch e girdi’ ndab mu fith e deer ngorad nge pag rogon?
14 Mu dag nib ga’ fan u wan’um e n’en ni be lemnag boch e girdi’ ndab mu k’aring e tamra’ ngorad. Mu folwok ko n’en ni i rin’ Jesus. Gathi ir be’ ni yug ma fith fith e deer ndariy yaramen, ya ma fith e deer ni ma pug e tafinay. Ku ma motoyil u fithik’ e gol ma ma fal’eg laniyan’ e piin nriyul’ ni yad baadag ni ngar motoyilgad ngak. (Matthew 11:28) Gubin mit e girdi’ nda ur magawongad ni ngar weliyed lanin’rad ngak. (Mark 1:40; 5:35, 36; 10:13, 17, 46, 47) Faanra nge fel’ laniyan’ e girdi’ nga rogned ngom e n’en ni yad be lemnag u murung’agen e Bible, nge n’en ni be fil, ma thingar mu siyeg i fith e deer ngorad nge pag rogon.
15, 16. Uw rogon me yog nim weliyed e girdi’ murung’agen e tin nib l’ag rogon ko teliw?
15 Tin kub muun ko deer nib fel’, e ku rayog ni ngam nonow nib fel’ rogon ni aram e nga mog ban’en nra adag ni nge motoyil ngay mag motoyil ko n’en ni nge yog. Bod ni, gaar Jesus ngak Nikodemus: “Nggog e tin riyul’ ngom ndariy be’ nrayog ni nge guy e gin nsuwon Got ni faanra dab ni gargelnag bayay.” (John 3:3) Bochan e rib fel’ e pi thin nem ma aram e dakiyog ni tal Nikodemus nde motoyil ku Jesus. (John 3:4-20) Ere ku rayog ni ngam k’aring e girdi’ ni ngar adaged ni ngar motoyilgad ni aray rogon.
16 Ngiyal’ ney, e ba ga’ ni yima weliy murung’agen e pi teliw nib beech u boch e nam ni bod yu Africa, nge Ngek u Europe, nge Latin America. Rayog ni ngam tababnag e numon ku be’ ko yungi n’ey ni nge lungum: “Kug guy ni bay e magawon riy ni bochan e boor yurba’ e teliw. Machane gu be athapeg ni ngguy e girdi’ u gubin e nam ni kar bad nga taabang ko bin nriyul’ e liyor. Ba fel’ u wan’um e re n’em, fa?” Ga ra weliy ban’en ni yira gin ngay u murung’agen e athap rom, ma rayog ni ngam ayuweg e girdi’ ngar weliyed e n’en ni yad be lemnag. Ma deer e ba mom ni ngan fulweg nfaanra l’agruw e fulweg riy. (Matthew 17:25) Tomren ni ke fulweg faen ni ga be machibnag e deer rom, ma rayog ni ngkum pi’ e fulweg riy u daken taareb ara l’agruw e thin ko Bible. (Isaiah 11:9; Zefaniah 3:9) Ga ra motoyil nib fel’ rogon ngam nang e n’en ni be yog facha’, ma aram e rayog ni ngam nang e n’en ni ngam weliyew ko yay ni migid ni ga ra sul ngak.
I Motoyil Jesus Ngak e Pi Bitir
17. Mang e be dag nib ga’ fan e piin bitir u wan’ Jesus?
17 Gathi kemus ni piin piilal e yad ba ga’ fan u wan’ Jesus ya ku arrogon e piin bitir. Manang rogon e fafel ni yad ma tay nge n’en ni yad ma yog. Yu ngiyal’ e ma pining e piin bitir ni ngar bad ngak. (Luke 7:31, 32; 18:15-17) Boor e bitir ni ur moyed u fithik’ fa yu ulung i girdi’ ni ur motoyilgad ngak Jesus. Nap’an ni i tolul e pi pagel ni yad be pining e sorok ngak fare Messiah, me tiyan’ Jesus ko re n’ey miki dag ni ke yog e Bible e re n’ey u m’on riy. (Matthew 14:21; 15:38; 21:15, 16) Ngiyal’ ney, e boor e piin bitir ni kar manged boch pi gachalpen Jesus. Ere uw rogon ni ngam ayuwegrad?
18, 19. Uw rogon ni ngam ayuweg fakam ko tirok Got ban’en?
18 Ra ngam ayuweg e bitir rom ko tirok Got ban’en, ma thingar mmotoyil ngak. Ba t’uf ni ngam nang fan e n’en ni be lemnag nsana de puluw ko lem rok Jehovah. Demtrug e n’en nra yog e bitir rom, ma gab gonop nfaanra mog e thin nra pi’ e athamgil nga laniyan’. Ma aram e rayog ni ngam fanay e thin nu Bible nib puluw nge yog ni mu ayuweg e bitir rom nge nang fan rogon ni be sap Jehovah ko fare n’em.
19 Ba ga’ fan e deer ya nge yog ni mu nang e n’en ni be lemnag fare tir. Bitir e ku taareb rogorad ko piilal nbubrad ni ngan fith ban’en ngorad nge pag rogon. Mang ndab mu weliy ban’en u murung’agem, ko bin ni ngam pag fakam nge pi’ e fulweg u boor e deer nib mo’maw’? Rayog ni mog ni ku aram rogon e lem rom kafram u murung’agen fare n’em, mag weliy ngak fan ni be yan u rogon fare magawon. Ma aram e rayog ni ngam fith ni nge lungum, “Aram rogon e lem rom, fa?” N’en nra yog e bitir rom e rayog ni pow’iymew i yan ko numon nra pi’ e athamgil nga lanin’mew u daken e thin ko Bible.
Mu Ulul i Folwok ko Faen ni Ma Yognag Pi Gachalpen nib Ga’
20, 21. Mang fan nsusuna nga i fel’ rogon e motoyil ni ngam tay ko maruwel rom ni ga be yognag boch pi gachalpen Jesus?
20 Demtrug ko ga be weliy ban’en ngak fakam ara yugu be’, mab ga’ fan e motoyil. Riyul’ riy e ireray reb e pow ko t’ufeg. Ga ra motoyil, ma aram e ga be ngongol u fithik’ e sobut’an’, ma faen ni be non e aram e yibe dag e tayfan nge t’ufeg ngak. Riyul’ nra ngam motoyil ma be dag ni kub t’uf ni ngam tiyan’um ko n’en ni be yog be’.
21 Nap’an ni ga be un ko machib ko Kristiano, ma ngam ulul i motoyil nib fel’ rogon ko en ni ga be machibnag. Faanra mu fal’eg e motoyil ko n’en ni nga rogned, ma rayog ni mu nang e gin’en nu Bible ni yad ra adag ni ngar motoyilgad ngay. Ma aram mag athamgil ni ngam ayuwegrad u daken e pi kanawoen e machib rok Jesus. Ga ra rin’ ni aram rogon, ma ra yib angin ngom ni felfelan’ nge fel’ laniyan’ ni bochan e ga be folwok rok Faen ni Ma Yognag Pi Gachalpen nib Ga’.
Uw Rogon ni Ga Ra Fulweg?
• Uw rogon ni i pi’ Jesus e athamgil nga laniyan’ e girdi’ ni ngar weliyed lanin’rad?
• Mang fan ni i motoyil Jesus ngak e piin ni i machibnagrad?
• Uw rogon ni ngam fanay e deer u nap’an ni ga be un ko machib?
• Mange rayog nim rin’ nge yog nim ayuweg e piin bitir ko tirok Got ban’en?