Mpired Ni Gimed Ba Yul’yul’ U Polo’ I Gum’irchamed

“Gu ra yan ko kanawo’ rom ni aram e tin nriyul’. Mu ayuweg gum’irchaeg ni nge yib madgun fithingam ngog.”​—PS. 86:11.

1, 2. Mange ra ayuwegdad ngad pired ni gad ba yul’yul’ ngak Jehovah u nap’an nrab e skeng ara ni waliydad ko kireb, nrogon ni bay ko Psalm 86:2, 11? (b) Mingiyal’ e ngan maruweliy e yul’yul’ ni yib u gum’irchaey?

MANG fan ni boch e Kristiano ni kar pired nib yul’yul’ u fithik’ e gafgow u lan bokum e duw nyugu aram rogon ni un kalbusnagrad ma yibe gafgownagrad e munmun mar awgad ko wup ko chogowen e chugum? Fulweg riy e bay rogon nga gum’irchadad ni be yip’ fan ban’en​—ni aram e bin nriyul’ i rarogodad. Fa bin ni 86 e Psalm e ke puthuy e yul’yul’ nga ba gum’ircha’ nib polo’. I meybil David ni fare psalmist ni gaar: “Mu ayuwegeg, ya gub yul’yul’. Got rog, mu ayuweg e tapigpig rom ni be pagan’ ngom.” Miki meybil ni gaar: “O Jehovah, ngam fil ngog murung’agen e birom e kanawo’. Gu ra yan ko kanawo’ rom ni aram e tin nriyul’. Mu ayuweg gum’irchaeg ni nge yib madgun fithingam ngog.”​—Ps. 86:2, 11, NW.

² Faanra dar pagan’dad ngak Jehovah u polo’ i gum’irchadad ma boch ban’en nge tha’ ni bay u thildad e ra mom ni nge warnag e yul’yul’ rodad ko bin riyul’ e Got. Lem ko chogow e taarebrogon ko donmach ni yima k’eyag ni kan mithag u kanawo’ ni gad ma yan riy. Yugu aram rogon ni kad pired ni gad ba yul’yul’ ngak Jehovah u boch e skeng nib gel ni yib ngodad, machane ku rayog ni ngad awgad ko wup ara ban rok Satan. Ere rib ga’ fan ni ngar da maruweliyed ni ngari fel’ e tha’ ni bay u thildad Jehovah e chiney, u m’on ni nge yib boch e skeng ngodad ara ni waliydad nga boch ban’en! Ya be gaar e Bible: “U fithik’ urngin ban’en ni ngan matanagiy, mu matanagiy gum’irchaem.” (Prov. 4:23, NW) N’en ni buch rok reb e profet nu Judah u nap’an ni l’og Jehovah nge yan i guy Jeroboam ni Pilung nu Israel e rayog ni ngad filed ban’en riy ni bay rogon ko yul’yul’.

“Nggu Pi’ Ngom ba Tow’ath”

3. Mange rin’ Jeroboam u nap’an ni yog e profet lungun Got ngak nib gel?

³ Mu lemnag e n’en ni buch. Reb e girdi’ rok Got e kafini mu’ i yog bbugithin nib gel ngak Jeroboam ni Pilung ni ke ngongliy yaan e garbaw ni nga i liyor e girdi’ ngay ko fabin nu lel’uch e ganong ko fa ragag i ganong nu Israel. Miri damumuw fare pilung. Ere yog ngak boch e pumoon ni ngar koled fare profet. Machane be ayuweg Jehovah e tapigpig rok. Ka chingiyal’ n’em, ma fare raba’ i n’en ni pa’ fare pilung ni yip’ ngak fare profet e m’ay gelngin ni ndakiyog ni nge buguy, ma fare altar ni yima fanay ko liyor ni googsur e ruw raba’. Ka chingiyal’ nem me thil e ngongol rok Jeroboam. Me wenig ngak fare profet rok Got ni gaar: “Wenig ngom mu yibiliyeg ngak Jehovah ni Got rom ni nge golnag paag!” Ma aram me meybil fare profet ngak Got me gol pa’ fare pilung.​—1 Ki. 13:1-6, NW.

4. (a) Mang fan ni n’en ni ognag fare pilung ngak fare profet e ba skeng u rogon feni yul’yul’ fare profet? (b) Mange fulweg rok fare profet?

⁴ Ma aram me yog Jeroboam ngak fare tapigpig ko bin riyul’ e Got ni gaar: “Mu un ngog nga darow nga tabinaw rog mag kay ban’en. Bay gu pi’ puluwon ngom e tin kam rin’.” (1 Ki. 13:7) Ere mang e nge rin’ fare profet? Gur nge un ngak fare pilung ni yugu aram rogon ni ka fini yigi mu’ i ginang? (Ps. 119:113) Fa gur nge siyeg e n’en ni ke pining fare pilung ngay, ni yugu aram rogon ni ke m’ug ni gowa ke kalngan’? Jeroboam e be’ nib fel’ rogon ma boor ban’en nrayog ni pi’ ngak e pi tafager rok. Faan gomanga be dogolnag fare profet rok Got e fel’ rogon, ma dabisiy ni n’en ni yog fare pilung e ra mang ba wup ngak. Machane, motochiyelnag Jehovah ngak fare profet ni gaar: “Thingar dab mu kay fa mu unum ban’en, maku dab mu sul nga tabinaw ko re pa’ i kanawo’ ni mub riy.” Ma aram me fulweg fare profet ni gaar: “Faanra mu pi’ baley ko naun rom ngog, maku dab gu un ngom ara gu wa’ ganam fa gu unum ban’en u tafenam.” Ma aram me chuw fare profet u Bethel ni yan u ba pa’ e kanawo’. (1 Ki. 13:8-10) Mange be fil murung’agen fare profet ngodad ko yul’yul’ u polo’ i gum’irchaey?​—Rom. 15:4.

“Ke Gaman e Tin ni Nge Yog Ngodad”

5. Uw rogon ma chogow e ma skengnag e yul’yul’ rodad?

⁵ Rayog ni ngan lemnag ni chogow e der ma skengnag e yul’yul’, machane riyul’ riy e ma rin’. Be pagan’dad ko n’en ni ke micheg Jehovah nra pi’ e tin nib t’uf rodad, fa? (Matt. 6:33; Heb. 13:5) Gur rayog ni ngad pired ndariy boch ban’en rodad nra ‘momnag’ e par rodad ya dabiyog puluwon rodad? (Mu beeg e Filippi 4:11-13.) Gur yibe waliydad ni ngad paged e maruwel rodad ni ma pi’ Got ni fan e ngad yognaged e tin ni gad baadag e chiney? Ba m’on u wan’dad e pigpig ni gad be tay ngak Jehovah, fa? Fulweg rodad e ra yan u rogon feni polo’ e pigpig ni gad be tay. I yoloy apostal Paul ni gaar: “Liyor ni yima tay ngak Got e ri ra fel’ rogon be’ riy nfaanra ke fel’ u wan’ e tin ni ba’ rok. Mange n’en ni kad feked i yib ko biney e tamilang? Dariy! Ere mang e rayog ni ngad feked nge un ngodad ko ngiyal’ ni ngad chuwgad ko biney e tamilang? Dariy! Ere faanra bay e ggan rodad nge mad ni nga don’ed, ma susun e ke gaman e tin ni nge yog ngodad.”​—1 Tim. 6:6-8.

6. Mang boch e “tow’ath” nrayog ni ngan ognag ngodad, ma mange rayog ni nge ayuwegdad ngad turguyed ko ngad feked fa?

⁶ Rayog ni ke ognag e en nib tolang ko maruwel rodad reb e liw nib tolang ma kub fel’ puluwon ngodad. Fa rayog nda lemnaged nra yoor e salpiy rodad nfaanra darod nga reb e nam ngad gayed e maruwel. Ma som’on e ra m’ug nib tow’ath nib ga’ ni ke pi’ Jehovah. Machane u m’on ni ngad dugliyed ban’en u murung’agen e re n’ey, ma susun e ngad fal’eged i lemnag e n’en ni be k’aringdad ni ngad rin’ed e re n’ey. N’en nthingar da lemnaged e, “Mange ra rin’ e n’en kug dugliy ko tha’ u thilmow Jehovah?”

7. Mang nib ga’ fan ni ngad chuweged ar’aren e chugum u lanin’dad?

⁷ M’ag rok Satan e ma mon’ognag e lem ni nge yoor e chugum. (Mu beeg e 1 John 2:15, 16.) N’en ni be nameg Moonyan’ e nge kirebnag rarogon fithik’ i lanin’dad. Ere, faanra kad awgad ko biney e ngongol mab t’uf ni ngad chuweged u lanin’dad. (Rev. 3:15-17) De mo’maw’ ngak Jesus ni nge siyeg fapi am ni ognag Satan ngak. (Matt. 4:8-10) Ya ginangey ni gaar: “Mu ayuwgad mi gimed guy rogomed rok urngin mit e chogow; ya bin riyul’ e yafos ku be’ e gathi ni ngongliy ko pi n’en ni ir e mmil suwon ngak faanem, ndemtrug rogon feni yoor ban’en rok.” (Luke 12:15) Yul’yul’ e ir e ra ayuwegdad ni ngad taga’gad ngak Jehovah ma gathi gadad.

I ‘Bannag’ ba Profet nib Pilibthir

8. Uw rogon nni skengnag e yul’yul’ rok fare profet ku Got?

⁸ Faan gomanga ulul fare profet nu Judah ko milekag rok ni be sul nga tafen ma dariy ban’en nra buch rok. Machane, me mada’nag reb e skeng. Be gaar e Bible: “Immoy ba profet nib pilibthir ni be par u Bethel. Me yib bogi pagel ni fak ngak mi yad weliy ngak” urngin e n’en ni ke buch e rorran nem. Ma aram me yog fare pilibthir ngorad ni ngan fal’eg rogon e dongkey rok nge yog ni yan nge mada’nag fare profet rok Got. De n’uw nap’an nga tomren, me pirieg fare profet ni bay u tan ba ke gek’iy nib ga’ me gaar ngak: “Moy nga tabinaw ngad abichgow.” Ma nap’an ni siyeg fare tapigpig rok Got ni nge un ngak, me gaar fare pilibthir: “Maku gag reb e profet ni bod gur, ma ke yog Jehovah ngog u daken ba engel ni nggu piningem ngam un nga tabinaw rog nggu nang salpem.” Machane i gaar e Bible: “Be ban.”​—1 Ki. 13:11-18, NW.

9. Mange be yog e Bible u murung’agen e girdi’ ni ma ban, ma mini’ e rayog ni ngar kirebniged e tha’ u thilrad?

⁹ Dariy be’ ni manang ko mang e ke k’aring fare profet nib pilibthir, machane i ban. Sana immoy ba ngiyal’ nib yul’yul’ ngak Jehovah. Machane, re ngiyal’ i n’ey ma daki yul’yul’. Be yog e Bible nrib kireb e biney e ngongol. (Mu beeg e Proverbs 3:32.) Girdi’ ni yad ma ban e gathi kemus nra kireb e tha’ u thilrad Jehovah ya ku arrogon boch e girdi’.

“Ma Aram Me Un” Ngak fare Pilibthir

10. Mange rin’ fare profet rok Got u nap’an ni pining fare profet nib pilibthir, ma mange buch nga tomren?

¹⁰ Susun rayog ni nge nang fare profet nu Judah e ban rok fare profet nib pilibthir. Rayog ni nge fith ir ni gaar, ‘Mang fan ni n’en ni baadag Jehovah ni nggu rin’ e l’og e engel rok nge yan i yog ngak be’ ni nge yog ngog?’ Maku rayog ni nge meybil ku Jehovah ni nge dag ngak e bin nib mat’aw e kanawo’, machane der yog e Bible ni rin’ ni aram rogon. Ya n’en ni rin’ e un ngak fare “profet [nib pilibthir] nga tafen ngar abichgow.” De fel’ e n’en ni rin’ u wan’ Jehovah. Ma nap’an ni be sul i yan nga Judah, me og ba layon ngak nge li’ ngem’. Rib kireb e n’en ni ke buch rok!​—1 Ki. 13:19-25, NW.a

11. Mange rin’ Ahijah nib fel’ ni ngan folwok riy?

¹¹ Machane, Ahijah ni profet nni l’og ni nge yan i dugliy Jeroboam ni nge mang pilung e ba thil ya par nib yul’yul’ nge mada’ ko ngiyal’ ni ke pilibthir. Ma nap’an ni ke pilibthir ma ke maaew, me l’og Jeroboam leengin ni nge yan i guy nge fith ngak rarogon ba pagel ni fakrow nib m’ar. Ma de rus Ahijah ni yog u m’on riy nra yim’ e re pagel nem. (1 Ki. 14:1-18) Reb ko pi tow’ath nni pi’ ngak Ahijah e ayuw ni pi’ ko Thin rok Got ni ke thagthagnag. Uw rogon? Tin ni i yoloy e taaboch riy me fanay Ezra ni prist.​—2 Kron. 9:29.

12-14. (a) Mange rayog ni ngad filed ko n’en ni buch ko fare profet ni kab pagel? (b) Mu weliy fan nib t’uf ni ngan fal’eg i lemnag u fithik’ e meybil e pi fonow u lan e Bible ni ma pi’ e piin piilal.

¹² Der yog e Bible fan nde meybil fare profet ngak Jehovah u m’on ni nge un ngak fare profet nib pilibthir ko abich. Gur n’en ni yog fare profet nib pilibthir ngak e aram e n’en ni baadag ni nge rung’ag? Mang e n’en ni gad ra fil riy? Thingari riyul’ u wan’dad feni mat’aw e tin ni baadag Jehovah ni ngad rin’ed. Ma demtrug e n’en ni gad ra mada’nag ma thingar da pired ni gad ba mudugil nguud folgad ko tin ni baadag ni ngad rin’ed.

¹³ Boch e girdi’ e ma motoyil ko tin ni baadag ni nge motoyil ngay ko fonow ni yima pi’ ngorad. Bod ni kan ognag reb e maruwel ngak reb e publisher nra buchuuwnag e tayim ni be fanay ni fan ko tabinaw rok nge tirok Got ban’en. Ma aram ma sana me yan i guy reb e piilal nge ning e ayuw ngak. Me yog fare piilal ndariy mat’awun ni nge yog ngak fare walag rogon ni nge ayuweg e tabinaw rok. Ma rayog ni dag fare piilal ko fare walag e magawon ko tirok Got nfaanra nge fek e re maruwel nem ni ka nog ngak. Gur kemus nra lemnag fare walag e n’en ni ke yog fare piilal ngak ko som’on, fa ra fal’eg i lemnag e tin ni kafini weliy ko tomur? Ba gagiyel nib t’uf ni nge lemnag fare walag e n’en nra ayuweg ko tirok Got ban’en.

¹⁴ Kum lemnag reb i rogon. Sana reb e walag nib ppin e fith ngak reb e piilal ko ba puluw ni ngar dargow figirngin nde taareb e michan’ rorow fa. Ma aram me yog fare piilal ngak ni ir rok e ra turguy ko ngar dargow figirngin fa danga’. Ma aram ma ranow u daken boch e fonow u lan e Bible nib m’ag nga rarogon. (1 Kor. 7:10-16) Gur ra fal’eg i lemnag fare walag e n’en ni ke yog fare piilal ngak? Fa gur, ke mu’ i dugliy u wan’ ni nge digey e pumoon rok? Ba puluw ni nge fal’eg i lemnag e pi fonow u lan e Bible u fithik’ e meybil u nap’an ni nge turguy e n’en ni nge rin’.

Mu Nang e Gin ni Ngam Mus Riy

15. Mange kad filed ko oloboch ni rin’ fare profet rok Got?

¹⁵ Ku mange rayog ni ngad filed ko oloboch ni rin’ fare profet nu Judah? Proverbs 3:5 e be gaar: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang.” Fare profet nu Judah e de taga’ ngak Jehovah ni bod ni i rin’ kafram, ya pagan’ ko tin ni be lemnag. Oloboch rok e ir e k’aring e yam’ ngak me kirebnag fithingan nib fel’ u mit Got. N’en ni buch rok e be dag feni ga’ fan ni ngad pired ni gad ba yul’yul’ ma gad nang e gin ni ngad musgad riy ko pigpig rodad ngak Jehovah!

16, 17. Mange ra ayuwegdad ngad pired ni gad ba yul’yul’ ngak Jehovah?

¹⁶ Lanin’dad nib kireb e ba ga’ nrayog ni nge soregdad nga bayang nib kireb. “Gum’ircha’ e kab gel e sasaliyeb riy nga yugu boch e ban’en mab gelfen.” (Jer. 17:9, NW) Ra ngad pired ni gad ba yul’yul’ ngak Jehovah, ma thingar da athamgilgad nib gel ngad n’iged pangidad ni kakrom ni fanowan’ nge ra be’ ma goo ir e be taga’ ngak. Ma gad yin’ nga dakendad e bin beech i pangidad, ni “ke gagiyel u daken e bin riyul’ e wok nib yal’uw ma mmat’aw.”​—Mu beeg e Efesus 4:22-24.

¹⁷ Proverbs 11:2 (NW) e be gaar: “Kab gonop e en ni manang e gin ni nga i mus riy.” Gad ra sobut’an’ ngad paged gadad ngak Jehovah ma ra ayuwegdad ngad pilo’gad ko pi oloboch nib gel e kireb riy. Bod ni faanra mulan’dad ma ra kireb rogon ni gad ra dugliy ban’en. (Prov. 24:10) Rayog ni nge chalbadad nga boch rarogon e pigpig ni gad be tay ma gad lemnag ni ke gaman e tin ni kad rin’ed ko fapi duw ni ke yan, ma sana aray e ngiyal’ ni nge rin’ boch e girdi’ e re maruwel ney. Fa rayog ni ngad lemnaged ni nge “taareb” rogodad ngak e tin ni ka bay e girdi’. Machane, faan gad ra ‘athamgil nga darod ko fare mab nib wen’in’ ma ‘gad be maruweliy e maruwel rodad ni fan ngak Somol’ ni gubin ngiyal’, ma aram e rayog ni nge ayuweg gum’irchadad.​—Luke 13:24; 1 Kor. 15:58.

18. Uw rogon nfaanra dad nanged e n’en ngad dugliyed ni ngad rin’ed nga ban’en?

¹⁸ Yu ngiyal’ e ba t’uf ni ngad dugliyed boch ban’en nib mo’maw’, machane gathi rib tamilang ngodad e bin nib mat’aw e kanawo’ ni ngad folgad riy. Ere, gur ngad rin’ed e n’en ni gad be lemnag ni ir e ba fel’ ko fare magawon? Ra kad pirieged gadad u bang ni aram rogon ma gad ba gonop ni faan gad ra ning e ayuw ngak Jehovah. Be gaar e James 1:5: “Faanra dariy e gonop rok bigimed, ma nge wenignag ngak Got, ye ir e ra pi’ ngak.” Chitamangidad nu tharmiy e ra pi’ gelngin ngodad nge yog nda turguyed ban’en nib fel’ rogon.​—Mu beeg e Luke 11:9, 13.

Mu Dugliy ni Ngam Par ni Gab Yul’yul’

19, 20. Mange susun e nge mudugilan’dad ngay ni ngad rin’ed?

¹⁹ Fapi duw nib gel e wagey riy u tomren ni digey Solomon e bin riyul’ e liyor e ri skengnag rogon e yul’yul’ ko pi tapigpig rok Got. Rriyul’ ni boor e piin nra mulgad. Machane boch e par nib yul’yul’ ngak Jehovah.

²⁰ Gubin e rran ni gad ma mada’nag boch ban’en nthingar da mel’eged ara ngad dugliyed ban’en riy ni be skengnag rogon feni gad ba yul’yul’. Machane rayog ni ngad micheged ni gad ba yul’yul’. Ere ngad pired ni gad ba yul’yul’ ngak Jehovah ma gad gelnag e michan’ rodad, ma ngari mudugil lanin’dad nra ulul i tow’athnag e piin ni yad ba yul’yul’ ngak.​—2 Sam. 22:26.

[Footnote]

Uw Rogon ni Ga Ra Fulweg?

• Mang fan ni ngar da chuweged ar’aren e chugum u lanin’dad?

• Mange ra ayuwegdad ni ngad pired ni gad ba yul’yul’ ngak Jehovah?

• Uw rogon ma sobut’an’, e ra ayuwegdad ngad pired ni gad ba yul’yul’ ku Got?

[Pictures on page 13]

Ba mo’maw’ ngom ni ngam siyeg e tin ni yibe waliyem ngay, fa?

[Pictures on page 14]

Ga ra mu fal’eg i lemnag e fonow nu Bible u fithik’ e meybil, fa?