Dabi Pag Jehovah E Piin Yad Ba Yul’yul’ Ngak

“Der ma pag [Jehovah] e piin ni yad ba yul’yul’ ngak, ni aram girdien; ma yoror rorad ni gubin ngiyal’.”​—PS. 37:28.

1, 2. (a) Mange buch ko bin ragag e chibog B.C.E. ni skengnag e yul’yul’ ko pi tapigpig rok Got? (b) Mang dalip ban’en ni yororiy Jehovah e girdi’ rok riy?

KE TAW ko bin ragag e chibog B.C.E. ni aray e ngiyal’ ni nge dugliy e pi tapigpig rok Jehovah ban’en. Ni pag e pi ganong nu Lel’uch u Israel ni ngar pired rorad ma de m’ay e cham u thilin e pi binaw. Jeroboam ni bin nib beech e pilung e gur ni nge par ni kab gel gelngin ma aram me sunmiy reb e teliw nib beech ko re Binaw rok nem. Baadag ni gubin e piin ni yad bay u tan pa’ ma yigoo ir e ngaur yul’yul’gad ngak. Mang e ra rin’ e pi tapigpig rok Jehovah ni yad ba yul’yul’? Gur, ka yad ra par ni yad ba yul’yul’ ngak fare Got ni yad be pigpig ngak? Bokum biyu’ i yad e par nib yul’yul’ mi i ayuwegrad Jehovah.​—1 Ki. 12:1-33; 2 Kron. 11:13, 14.

² Ngiyal’ ney e ki yibe skengnag e yul’yul’ ko pi tapigpig rok Jehovah. I ginangey e Bible ni gaar: “Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.” Ere, gur rayog ni ngad ‘pired nib mudugil e michan’ [rodad] ngak Kristus’? (1 Pet. 5:8, 9) Ngad guyed boch ban’en ni buch u nap’an ni mang Jeroboam e Pilung ko duw ni 997 B.C.E. nge n’en ni gad ra fil ko pi n’ey. Ngiyal’ nem e un gafgownag e pi tapigpig rok Jehovah ni yad ba yul’yul’. Ma nap’an ni yad be rin’ boch e maruwel ni kan pi’ ngorad nib mo’maw’, ma boor e piin ni kar digeyed e bin riyul’ e liyor ni ur magawonnaged yad. Machane dariy ba ngiyal’ ni digey Jehovah e pi tapigpig rok ni yad ba yul’yul’ ngak, maku arrogon e ngiyal’ ney.​—Ps. 37:28.

Nap’an ni Yibe Gafgownagrad

3. Mang fan nde gafgow e girdi’ u tan e gagiyeg rok David ni Pilung?

³ Som’on e ngad guyed e n’en ni buch me mang Jeroboam e pilung. Proverbs 29:2 (NW) e be gaar: “Nap’an nra gagiyeg be’ nib kireb me kireban’ e girdi’.” Da i kireban’ e girdi’ u nap’an ni i gagiyeg David ni Pilung u Israel kakrom. De flont David, machane i par nib yul’yul’ ngak Got ma be pagan’ ngak. Gagiyeg ni i tay David e de k’aring e gafgow ngak e girdi’. Ere micheg Jehovah ban’en ngak David ni gaar: “Gubin ngiyal’ ni bay um par ni be yib e girdi’ ni owchem, ma bay gu tay e gagiyeg rom ngi i par ndariy n’umngin nap’an. Rogom ni gab pilung ni ga be gagiyeg e dabi m’ay.”​—2 Sam. 7:16.

4. Pi tow’ath ni i yib ngak Solomon u nap’an ni i gagiyeg e i tor ko mang?

⁴ Gagiyeg rok Solomon ni fak David e tabab ko som’on nib fel’ mab gapas ma be dag rogon e gagiyeg nra tay Jesus Kristus u lan fare Biyu’ i Duw. (Ps. 72:1, 17) Dariy reb fa 12 i ganong ni ur togopuluwgad. Machane, pi tow’ath ni i yib ngak Solomon nge piin ni ur pired u tan pa’ e be tor nga ban’en. I gaar Jehovah ngak Solomon: “Faanra um fol ko pi motochiyel rog nge tin ku gog ngom ni ngaum rin’, ma gu ra rin’ ngom e tin ni kug micheg ngak David ni chitamam; ma bay gu par u fithik’ e girdi’ rog nu Israel, ma dab gu pagrad.”​—1 Ki. 6:11-13, NW.

5, 6. Mang wenegan ni yib ni bochan e de par Solomon nib yul’yul’ ku Got?

⁵ Nap’an ni pilibthir Solomon ma daki par nib yul’yul’ ngak Jehovah ma aram me tabab i un ko liyor ni googsur. (1 Ki. 11:4-6) Munmun, ma daki fol Solomon ko pi motochiyel rok Jehovah ma aram me tabab i gafgownag e girdi’. Ba gel e gafgow ni tay ko girdi’ ya tomren ni yim’ ma ka be gun’gun’nag e girdi’ murung’agen ngak Rehoboam ni fak ni ir e yan nga lon, ma yad be wenig ngak ni nge ayuwegrad. (1 Ki. 12:4) Mang e rin’ Jehovah u nap’an ndaki par Solomon nib yul’yul’ ngak?

⁶ Be yog e Bible ngodad ni gaar: “I yib Jehovah i m’ug ngak Solomon, ni bochan e dakir fol rok . . . fare Got nu Israel, ni faen ni m’ug ngak nl’agruw yay.” I gaar Jehovah ngak Solomon: “Bochan ni kam th’ab fare m’ag nug fal’eg u thildow, ma gu be micheg ngom ni bay gu chuweg e gagiyeg ko pilung u paam nggu pi’ ngak reb e tapigpig.”​—1 Ki. 11:9-11, NW.

7. Yugu aram rogon ni ke pag Jehovah Solomon, ma uw rogon ni ke ayuweg e piin ni yad ba yul’yul’ Ngak?

⁷ Ma aram me l’og Jehovah Ahijah ni profet rok ni nge dugliy be’ nra chuweg e girdi’ ko gafgow u tan pa’ Solomon. Cha’nem e aram Jeroboam, ni be’ nib moon nrayog rok e re n’em ma i maruwel u tan pa’ Solomon u nap’an ni kab pilung. Yugu aram rogon ni par Jehovah nib yul’yul’ ko fare m’ag ko Gil’ilungun ni ngongliy u thilrow David, machane me m’agan’ ngay ni ngan kieg fa 12 i ganong. Ragag ko pi ganong nem e yira pi’ ngak Jeroboam, ma l’agruw riy e ra magey ko tabinaw rok David, ni Rehoboam ni Pilung e ir e ra gagiyegnag. (1 Ki. 11:29-37; 12:16, 17, 21) I yog Jehovah ngak Jeroboam ni gaar: “Faan ga ra par ni ga be fol rog, ma ga be fol ko pi motochiyel rog, ma ga fel’ u wun’ug ni bochan e ga be rin’ e tin ni ku gog ni bod ni i rin’ e tapigpig rog i David, ma gubin ngiyal’ ni bay ug par rom. Bay gu tiyem ni gur e pilung nu Israel mu gu tay ni piin ni owchem e bay ur bad nga luwam nguur gagiyeggad, ni bod ni kug rin’ ngak David.” (1 Ki. 11:38) I ngongol Jehovah ni fan ngak e girdi’ rok me bing e kanawo’ ngorad ngar chuwgad ko gafgow.

8. Mang boch e skeng ni ma gafgow e girdi’ rok Got riy e ngiyal’ ney?

⁸ Ngiyal’ ney e ke gel e gafgow. Eklesiastes 8:9 (NW) e be gaar: “Ma suwey e girdi’ boch e girdi’ me sum e gafgow riy.” Angin e chogow ni be tay e pi siyobay nge gagiyeg nib kireb ni be tay e piin ni yad be gagiyeg e magawon ko salpiy. Pi tayugang’ ko am, nge siyobay, nge teliw e ba ga’ nib kireb e ngongol rorad. Ere, bod Lot ni be’ nib mat’aw, piin ni yad ba yul’yul’ ngak Got e ngiyal’ ney e kari ‘kireban’rad ko ngongol ni darngal ni be ngongliy e girdi’ ndariy fan e motochiyel u wun’rad.’ (2 Pet. 2:7) Tin kub muun ngay, e yugu aram rogon ni gad ma gay rogon ni ngad folgad ko pi motochiyel rok Got, ma ba ga’ ni ma gafgownagdad e piin ni yad be gagiyeg nib tolangan’rad.​—2 Tim. 3:1-5, 12.

9. (a) Mange ke rin’ Jehovah ni nge chuweg e girdi’ rok ko gafgow? (b) Mang fan nrayog ni nge mudugil u wan’dad ni gubin ngiyal’ nra par Jesus nib yul’yul’ ku Got?

⁹ Ere, rayog ni nge mudugil u wan’dad e re thin ni baaray nib riyul’ ni: Dabi pag Jehovah e piin ni yad ba yul’yul’ ngak! Aygum lemnag e pi n’en ni ke ngongliy ni nge yon’ lon e piin ni yad be gagiyegnag e re fayleng ney. Gil’ilungun e Messiah rok Got ni bay u lan pa’ Kristus Jesus e ke m’ay i ngongliy rogon. Ke chugur ni nge gaman raay e duw ni be gagiyeg Jesus Kristus u tharmiy. Dabki n’uw nap’an ma ra chuweg e gafgow ko piin ni bay madgun fithingan Got rorad. (Mu beeg e Revelation 11:15-18.) Ke dag Jesus rogon fene ba yul’yul’ ku Got ke ni mada’ ko ngiyal’ ni yim’ riy. Dabi kirebnag laniyan’ e piin ni yad bay u tan pa’, ni bod e n’en ni rin’ Solomon.​—Heb. 7:26; 1 Pet. 2:6.

10. (a) Uw rogon ma gad dag nib ga’ fan Gil’ilungun Got u wun’dad? (b) Nap’an ni keb e skeng ngodad, ma mange rayog ni nge mudugil u wan’dad?

¹⁰ Gil’ilungun Got e riyul’ nib am nra chuweg gubin e gafgow. Yul’yul’ rodad e kemus ni fan ngak Jehovah Got nge yaram rok. Gad ra siyeg e pi ngongol nib kireb ko re fayleng ney ma gad nameg e tin nib fel’ ban’en u fithik’ e pasig nib pagan’dad ko fare Gil’ilungun. (Titus 2:12-14) Gad be athamgil ni ngad pired ndariy thibngin e re fayleng ney rodad. (2 Pet. 3:14) Demtrug e re miti skeng nra yib ngodad e ngiyal’ ney, ma rayog ni nge mudugilan’dad nra ayuwegdad Jehovah dabi buch ban’en rodad ko tirok ban’en. (Mu beeg e Psalm 97:10.) Tin kub muun ngay e, Psalm 116:15 e be micheg ngodad ni gaar: “Ra yim’ reb i girdien Somol, ma ri ma lemnag Somol faanem.” Rib ga’ fan u wan’ Jehovah e pi tapigpig rok ma dabi pagrad ni ngar m’ad ni yad ba ulung.

Nap’an ni Yad Bay u Fithik’ e Piin ni Kar Digeyed e Tin Nriyul’

11. Uw rogon ma daki yul’yul’ Jeroboam?

¹¹ Rayog ni nge pogofan e girdi’ ko gagiyeg ni tay Jeroboam ni Pilung. Machane, ngongol rok e skengnag e yul’yul’ rorad ngak Got. I gay boch e kanawo’ ni nge gel gelngin riy ni bochan e de fel’ u wan’ e tayfan nge liw ni kan pi’ ngak. I lemnag me gaar: “Faan ra yan e tirog e girdi’ nga Jerusalem ngar pied e gamanman ni maligach ngak Somol u lan e tempel u rom, ma yad ra chel ngar yul’yul’gad ngak Rehoboam ni ir e pilung nu Judah, mi yad thang e pogofan rog.” Ere sunmiy Jeroboam reb e teliw nib beech ngak ni nguun liyor riy nga l’agruw i garbaw ni gol. “Me tay reb fa gal liyos ni gol nga Bethel me tay reb nga lan yu Dan. Aram rogon ni denen e girdi’, ya uranod nga Bethel nge nga Dan ko meybil. Mi ki ngongliy Jeroboam yungi ban’en ni tagil’ e meybil u daken e burey i yan, me mel’eg e girdi’ u lan boch e tabinaw ni ngar manged prist, ni gathi yad girdien e ganong rok Levi.” Ki sunmiy Jeroboam reb e rran ni ngan “madnomnag fare madnom ni ir e turguy ni fan ngak e girdi’ nu Israel,” ma aram mi i “pi’ e maligach u daken fare altar.”​—1 Ki. 12:26-33.

12. Mange rin’ e piin nib yul’yul’ ngak Got ko ganong u lel’uch u nap’an ni ngongliy Jeroboam e garbaw ni ngaun liyor ngay u Israel?

¹² Mange ra rin’ e piin ni yad ba yul’yul’ ngak Got ko bin nu lel’uch e ganong? Piyu Levite ni yad ma par ko pi binaw ni kan pi’ ngorad u lan e re ganong nu lel’uch nem e ra rin’ed ban’en nib gur, ni bod e pi chitamangirad nib yul’yul’. (Ex. 32:26-28; Num. 35:6-8; Deut. 33:8, 9) Ra paged e chugum nge tin ni bay rorad u rom mar feked e tabinaw rorad ko yimuch nga Judah, ni aram e gin nrayog ni ngar ululgad ko pigpig ngak Jehovah riy ndariy ban’en nra magawonnagrad. (2 Kron. 11:13, 14) Boch e girdi’ nu Israel nra lemnaged ni ngar pired u Judah buchuuw mar sulod nga taferad e ra dugliyed ni ngar pired u rom ndab kur sulod. (2 Kron. 10:17) I bing Jehovah kanawoen e bin riyul’ e liyor nge ta’ ya nge yog ni digey e tin ni bay fini yib e mfen ko ganong nu lel’uch e liyor ko garbaw mar sulod nga Judah.​—2 Kron. 15:9-15.

13. Uw rogon ma gelngin e piin ni ke digey e bin nriyul’ e liyor e be skengnag e girdi’ rok Got e ngiyal’ ney?

¹³ Piin ni kar digeyed e tin nriyul’ nge gelngirad e be magawonnag e girdi’ rok Got e ngiyal’ ney. Boch e piin ni yad ma gagiyeg e kar gayed rogon ni ngar sunmiyed yurba’ e teliw ngorad, mar towasariyed e piin ni yad bay u tan pa’rad ni ngar uned ngay. Pi tayugang’ ko Kristiano ni googsur nge ku boch e piin ni tolngan’ e kar gayed rogon ni ngar feked e liw ko fapi prist rok Got. Machane, kemus nu fithik’ e tin nriyul’ e Kristiano e rayog ni ngad pirieged riy e piin ni kan dugliyrad, ni aram e piin ni kar manged e “pi prist rok e en ni pilung.”​—1 Pet. 2:9; Rev. 14:1-5.

14. Susun ni nge uw rogon u wan’dad e lem ko piin ni ke digey e bin riyul’ e liyor?

¹⁴ Piin ni yad ba yul’yul’ ngak Got e ngiyal’ ney e darur awgad ko ban rok e piin ni ke digey e bin nriyul’ e liyor ni bod rogon piyu Levi ko bin ragag e chibog B.C.E ni yad ba yul’yul’. Piin ni kan dugliyrad nge piin Kristiano ni yad ba muun ngorad e yad ba gur ni ngar siyeged e lem ko piin ni ke digey e tin nriyul’ kar chelgad kar togopuluwgad ngay. (Mu beeg e Roma 16:17.) Yugu aram rogon ni gad ma fol ko pi am u boch ban’en maku gad ma par u mithilin u murung’agen e pi magawon ko fayleng, ma thingar da pired ni gad ba yul’yul’ ni fan ko Gil’ilungun Got. (John 18:36; Rom. 13:1-8) Gad ma siyeg e pi n’en ni ma rin’ e piin ni yad be yog ni yad be pigpig ngak Got machane ku yad be darifannag u daken e ngongol rorad.​—Titus 1:16.

15. Mang fan ni ngad folgad ko “fare tapigpig nib yul’yul’ ma ba gonop”?

¹⁵ Mu lemnag fare n’em ni ke ayuweg Jehovah e piin ni yad ba yul’yul’ ni ngar chuwgad ko re fayleng ni kireb ney, kan fekrad nga lan fare paradis nib spiritual ni ke ngongliy ara fare ulung rok. (2 Kor. 12:1-4) Gad be pining e magar u lanin’dad ma gad be par nib chugur ngak “fare tapigpig nib yul’yul’ ma ba gonop . . . ni masta rok e ke tay ni nge mil fan e tin ni ka bay e tapigpig ngak, ni nge pi’ garad ko ngiyal’ ni yima pi’ riy.” Ke tay Kristus e re tapigpig ney ni nge “mil fan urngin ban’en rok ngak.” (Matt. 24:45-47) Ere, yugu aram rogon ndarur da nanged fan ban’en ni ke rin’ fare tapigpig nib yul’yul’, ma gathi ngad siyeged ndab da folgad riy ara da sulod ko fayleng rok Satan. Ya, yul’yul’ e ra k’aringdad ni ngad ngongolgad u fithik’ e sobut’an’ ma gad sonnag Jehovah ni nge tamilangnag gubin ban’en.

Nap’an ni Gad Be Rin’ e Maruwel ni Ke Pi’ Got Ngodad

16. Mang maruwel e kan pi’ ngak reb e profet nu Judah?

¹⁶ Ke dabuy Jehovah e n’en ni ke rin’ Jeroboam. Ere l’og reb e profet nu Judah nge milekag nga lel’uch nga Bethel ni nge yan i guy Jeroboam u nap’an ni bay ko altar rok. I yan fare profet ni nge yog bbugithin ngak Jeroboam nra kirebnag laniyan’. Rib mo’maw’ e re maruwel nem.​—1 Ki. 13:1-3.

17. Uw rogon ni ke ayuweg Jehovah e ta mol’og rok?

¹⁷ I damumuw Jeroboam u nap’an ni rung’ag e n’en ni ke yog Jehovah. I yip’ pa’ ngak facha’ ni ke l’og Got, me tolul ngak e pi pumoon ni yad bay ko gin’em ni gaar: “Mu koled e re moon nem!” Machane ka dawori mithmith be’, me “m’ay gelngin pa’ fare pilung ma dakiyog ni nge buguy pa’. Mi yigi puth fare altar nib tomgin me map e awat riy nga but’.” Ma aram me wenig Jeroboam ngak fare profet ni nge meybil ngak Jehovah ni nge golnag pa’. Me meybil fare profet ngak Jehovah me gol pa’ fare pilung. Ere ke ayuweg Jehovah e ta mol’og rok ndabi buch ban’en rok.​—1 Ki. 13:4-6.

18. Uw rogon ni ma yororiydad Jehovah ko pigpig ni gad be tay ngak?

¹⁸ Nap’an ni gad ma un ko fare maruwel ni ngan machibnag murung’agen fare Gil’ilungun min piningeg boch e girdi’ ngar manged pi gachalpen Jesus, ma bay yungiyal’ ni gad ma mada’nag e togopuluw. (Matt. 24:14; 28:19, 20) Ma thingar dab da paged e marus ni nge malmalnagdad ko machib. Bay fare tow’ath rodad ni “nguud pigpiggad ngak [Jehovah] ndariy e tamdag rodad” ni bod fare profet u nap’an Jeroboam nda nog fithingan.a (Luke 1:74, 75) Yugu aram rogon ndabiyog ni ngad lemnaged nra yib e ayuw ngodad u daken e maang’ang, machane Jehovah e ka be yororiy ma ka be ayuwegdad ni gadad e Pi Mich rok u daken e kan ni thothup rok nge pi engel rok. (Mu beeg e John 14:15-17; Revelation 14:6.) Dabi digey Jehovah e piin ni yad ra ulul i weliy e thin rok ndab ra rusgad.​—Fil. 1:14, 28.

Ra Yororiy Jehovah e Piin Yad Ba Yul’yul’ Ngak

19, 20. (a) Mang fan nrayog ni nga pagan’dad ndabi pagdad Jehovah? (b) Mang boch e deer ni yira weliy ko bin migid e article?

¹⁹ Jehovah e ir e Got rodad nib yul’yul’. (Rev. 15:4; 16:5) Ya ba yul’yul’ “urngin e ngongol rok.” (Ps. 145:17) Ma Bible e be micheg ngodad ni gaar: “Ma yoror rok e piin ni yad ba yul’yul’ ngak.” (Prov. 2:8, NW) Rayog ni nge pagan’ e piin yad ba yul’yul’ nra pow’iyrad ma ra ayuwegrad Jehovah u nap’an ni keb e skeng ngorad ara nap’an ni kar mada’naged e skeng u puluwon e piin ni kar digeyed e bin riyul’ e liyor.

²⁰ N’en nib t’uf ni ngad sapgad ngay e chiney e baaray: Mang e ra ayuwegeg nggu par ni gub yul’yul’ ngak Jehovah ni mus ko ngiyal’ ni kug mada’nag e skeng ara nap’an ni kan waliyeg nga ban’en? Ara, uw rogon ni nggu gelnag e yul’yul’ rog ngak Got?

[Footnote]

Uw Rogon ni Ga Ra Fulweg?

• Uw rogon ni ke dag Jehovah ndar ma pag e piin yad ba yul’yul’ ngak u nap’an ni keb e gafgow ngorad?

• Susun e nge uw rogon u wan’dad e piin ni ke digey e bin riyul’ e liyor nge pi machib rorad?

• Uw rogon ni ma yoror Jehovah rok e piin ni yad ba yul’yul’ ngak u nap’an ni yad be un ko machib ko Kristiano?

[Map/​Picture on page 9]

(For fully formatted text, see publication)

GANONG U LEL’UCH (Jeroboam)

Dan

SHECHEM

Bethel

GANONG U YIMUCH (Rehoboam)

JERUSALEM

[Picture]

De pag Jehovah e piin yad ba yul’yul’ ngak u nap’an ni tababnag Jeroboam e liyor ko garbaw ni gol

[Picture on page 7]

Pi tow’ath ni i felfelan’nag Solomon nge piin ni i gagiyegnagrad e be tor nga daken ban’en