Ga Be Yog Fare “Thin Nib Machalbog” Nib Fel’ Rogon?

“Bay gu pingeg e thin rok e girdi’ nga reb e thin nib machalbog nge yog rorad ni yad gubin ni ngar pininged fithingan Jehovah.”​—ZEF. 3:9, NW.

1. Mange re tow’ath nrib fel’ ni ke pi’ Jehovah ngodad?

FARE tow’ath ko thin e de sum rok e girdi’, ya sum rok e En ni Sunmiyrad, ni Jehovah Got. (Ex. 4:11, 12) I pi’ ko bin som’on e girdi’, ni Adam, gelngin ni gathi kemus ni nge non ya ngki sunmiy yu bugithin nib beech ma aram me yoornag bug e thin rok. (Gen. 2:19, 20, 23) Ere ba mudugil nib tow’ath nrib fel’ ere n’ey! Ke bungnag rogon e girdi’ ni ngar nonad e Chitamangirad nu tharmiy mar pininged e sorok nga fithingan.

2. Mang fan ndakir yog e girdi’ taareb e thin?

² Nap’an e tin 17 e chibog nsom’on ni sum e girdi’, ma gubin e girdi’ ntaareb e thin ni yad ma yog, ma “taareb rogon e yu bugithin ni yad ma yog.” (Gen. 11:1) Me yib fapi rran rok Nimrod nder ma fol. I muulung e girdi’ ndarur folgad nga bangi ban’en ni taaboch mi nog nu Babel fithingan, mar dugliyed u wun’rad ni ngar pired ko taarengi n’em, nib thil ko n’en ni yog Jehovah. Mar tababgad i ubung ba wulyang nib ga’ ya nge dab ra ted fan Jehovah me ‘gilbuguwrad.’ Ma aram me athukuy Jehovah e bin som’on e thin rok e pi cha’ ndarur folgad nem me k’aringrad ni nge yoor e thin rorad. Ere ra wergad nga ga’ngin yang e fayleng.​—Mu beeg e Genesis 11:4-8.

3. Mange buch u nap’an ni athukuy Jehovah e thin rok fa piin nu Babel ndarur folgad?

³ Ere chiney e ke bokum biyu’ e thin​—be yog boch e girdi’ ni ke pag 6,800—​e thin ni yibe yog u fayleng. Ra reb e pi thin ney ma rogon ni yima yog. Ere be yib i m’ug nnap’an ni athukuy Got e thin rok e pi cha’ ni baaram ndarur folgad, me thang u lanin’rad e bin baaram e thin ni u rogned ko som’on. Gathi kemus ni pi’ nga lanin’rad yu bugithin nib beech ya ki thilyeg rarogon ni yad ma yog ma aram me sunmiy boch rarogon i yarmiy yu bugithin. Ere dab ni gin ngay ni gin ni bay e re wulyang nem riy e nog ni yu “Babel” ara maathuk! (Gen. 11:9) Rib fel’ ya kemus ni yigoo Bible e be yog fan nib fel’ rogon e n’en ke rin’ ma ke yoor e thin ni gad be yog e chiney.

Reb e Thin nib Beech mab Machalbog

4. Mange yog Jehovah ko som’on nra buch ko ngiyal’ ney?

⁴ Aram fene fel’ rogon e re thin nu Bible nem u murung’agen Got ko n’en ni rin’ u Babel, ma ka bay ban’en ni kab fel’ mab ga’ fan ni ke m’ug ko ngiyal’ ney. U daken e profet rok ni Zefaniah e yog Jehovah u m’on riy ni gaar: “Bay gu pingeg e thin rok e girdi’ nga reb e thin nib machalbog nge yog rorad ni yad gubin ni ngar pininged fithingan Jehovah ni bochan e ngar pigpiggad ngak u taabang.” (Zef. 3:9, NW) Mang fare “thin nib machalbog,” ma uw rogon nrayog ni nga dogned nib fel’ rogon?

5. Mang fare thin nib machalbog, ma mang angin?

⁵ Fare thin nib machalbog e aram e tin riyul’ u murung’agen Jehovah Got nge tin nib m’agan’ ngay ni bod ni bay ko thin rok, ni fare Bible. Re “thin” nem e ba muun ngay ni ngan nang e bin nib puluw e tamilangan’ ko tin riyul’ u murung’agen Gil’ilungun Got nge rogon ra thothupnag fithingan Jehovah, me tamilangnag feni tolang, mebnag e tow’ath ni manemus ngak e piin ni yad ba yul’yul’. Mang angin e re thin nib beech ney? Ka nog ngodad ni girdi’ e yad ra ‘pining fithingan Jehovah’ ma yad ra ‘pigpig ngak u taabang.’ Ba thil ko pi n’en ni buch u Babel, re n’ey ni ke thil e thin ke yan ko bin nib machalbog e keb angin yibe yog e sorok nga fithingan Jehovah nge taareban’ ni ke tay e girdi’ rok.

Ngan Fil fare Thin nib Machalbog

6, 7. (a) Mange ba muun ko ngan fil reb e thin nib beech, ma uw rogon ni yira fanay ngan fil fare thin nib machalbog? (b) Mange ngad guyed e chiney?

⁶ Ra baadag be’ ni nge fil yugu reb e thin nib fel’ rogon, ma gathi kemus ni nge mit ngak yu bugithin nib beech. Ra ngan fil reb e thin nib beech mab muun ngay ni ngan fil reb i rogon e lem nib beech, nge rogon i yog yu bugithin. Rogon i weliy ban’en nge thin ni ma felfelan’nag e girdi’ u reb e thin e rayog nib thil nga yugu reb e thin. Rogon i yog yu bugithin nib beech e ba t’uf ni nge thil rogon i fanay e yungi n’en u dowdad ni gad ma fanay ko numon, ni bod rogon bolowthey. Kub riyul’ ere ney u nap’an ni gad ra tabab i fil fare thin nib machalbog ko tin riyul’ u Bible. Ka boor ban’en nib t’uf ko kemus ni ngan nang buchuuw e thin ni be fil e Bible. Ra ngan salap ko re thin nib beech ney mab muun ngay ni ngad thilyeged rogon ni gad ma lem.​—Mu beeg e Roma 12:2; Efesus 4:23.

⁷ Mange ra ayuwegdad ni nguuda nanged fan fare thin nib machalbog maku gad nang rogon i yog nib fel’ rogon? Taareb rogon ko ngan fil yugu reb e thin, ya bay bochi kanawoen nib ga’ nrayog ni ayuwegdad nge yog ni ngada salapgad i yog fare thin ko tin riyul’ nu Bible. Ngada guyed boch e kanawo’ nib ga’ ni ma fanay e girdi’ ngar filed yugu reb e thin ma gad guy ko uw rogon nra ayuwegdad e pi kanawo’ nem ngad filed fare thin ni be fanathinnag ban’en.

Nga Nog fare Thin nib Machalbog nib Fel’ Rogon

8, 9. Mange thingar da rin’ed nfaanra gad ba adag ni ngad filed fare thin nib machalbog, ma mang nrib ga’ fan e re n’ey?

⁸ Ngam motoyil nib fel’ rogon. Ra som’on ma fare thin nib beech e ra thil lingan u tel e en dawori fil. (Isa. 33:19) Machane nap’an nra fil be’ rogon ni nge tiyan’ ko n’en ni be rung’ag, ma ra tabab ni nge nang bbug e thin nge bbug nge rogon nge rarogon ni be m’ug bayay ngo bayay ko welthin. Ku aram rogon ni be yog ngodad: “Nthingar da chichiiyed pa’dad ko fapi thin nib riyul’ ni kad rung’aged, nge siy da man’gad riy nga orel.” (Heb. 2:1) I sul Jesus u daken nga i tay chilen ngak pi gachalpen ni gaar: “Faanra bay telmed, me ere mu tel med!” (Matt. 11:15; 13:43; Mark 4:23; Luke 14:35) Arrogon, ba t’uf ni “ngad motoyilgad ma gad guy rogon ngada nanged fan” e n’en ni kada rung’aged ya nge yog nda mon’oggad u rogon i nang fan rodad fare thin nib machalbog.​—Matt. 15:10; Mark 7:14.

⁹ Ba t’uf e tiyan’ u nap’an ni yibe motoyil, machane yira rin’ ma rib ga’ fan. (Luke 8:18) Gad ma motoyil ko n’en ni yima weliy u nap’an e pi muulung ko Kristiano, fa yugu ma yanyan e lem rodad? Rib ga’ fan ni ngad athamgilgad ngaud tedan’dad ko n’en ni yibe weliy. Ya ra danga’, ma rayog ni nge kireb rogon e motoyil rodad.​—Heb. 5:11.

10, 11. (a) Mange thingar da rin’ed ni kub chag ko ngan motoyil nib fel’ rogon? (b) Mange n’en ni kub muun ko ngan non ni fare thin nib machalbog?

¹⁰ Ngam folwok rok e piin ni yad ba salap ko fare thin. Piin ni yad be fil reb e thin nib beech e yima pi’ e athamgil nga lanin’rad ni nguur motoyilgad nib fel’ rogon ma yad be folwok ko piin ni yad ma yog fare thin u rogon ni yad ma yog bbug e thin nge bbug nge rogon ni yad ma non. Re n’ey e ra ayuweg e piin ni be fil fare thin ni nge dabi kireb rogon lingan fare bugithin u l’ugunrad me munmun mi i magawonnag rogon e numon rorad ku be’. Reb e kanawo’ ni taareb rogon ngay, e susuna ngad filed ban’en rok e piin ni ke yog e ‘salap ngorad u rogon i fil’ ngak be’ fare thin nib beech. (2 Tim. 4:2) Mu ning e ayuw. Mu adag ni ngan yal’uwegem ko ngiyal’ ni kam oloboch.​—Mu beeg e Hebrews 12:5, 6, 11.

¹¹ Nga nog fare thin nib machalbog e gathi kemus nib muun ngay ni nge mich u wan’uy e tin riyul’ mu un fil ngak boch e girdi’ ya ku arrogon ni nge puluw rogon e ngongol rodad ko pi motochiyel rok Got nge pi kenggin e motochiyel rok. Faan gad ra fal’eg i yaliy ma gad folwok ko ngongol nib fel’ rok boch e girdi’ ma ra ayuwegdad ni ngad rin’ed e re n’ey. Re n’ey e ba muun ngay ni ngan folwok ko michan’ rorad nge farad pasig. Kub muun ngay ni ngan folwok ko n’en ni i rin’ Jesus u n’umngin nap’an e yafas rok. (1 Kor. 11:1; Heb. 12:2; 13:7) Faan gad ra ulul i rin’ e re n’ey, ma angin nra yib e taareban’ u thilin e girdi’ rok Got, me yog ni rogned fare thin nib machalbog ntaareb lingan.​—1 Kor. 4:16, 17.

12. Mang fan ni nge mit ban’en e ba muun ko ngan fil reb e thin nib beech?

¹² Nge mit ngom. Piin ni yad be fil yugu reb e thin e boor ban’en nib beech nib t’uf ni nge mit ngorad. Re n’ey e ba muun ngay yu bugithin nib beech nga rogon ni yima non. Ma piin Kristiano, e ra mit ban’en ngorad ma rra ayuwegrad ngar salapgad ko fare thin nib machalbog. Riyul’ nra fel’ rogodad riy nfaanra mit ngodad fithingan fa yu ke babyor ko Bible nrogon ni ba’. Boch e girdi’ e kar nameged ni nge mit ngorad yu yang ko thin nu Bible ara gin bay riy u Bible. Ma boch e girdi’ e ke pirieg nib ga’ angin ni nge mit ngorad e tang nu Kingdom Hall, fa fithingan fapi ganong nu Israel nge fa 12 i apostal, nge pi fel’ngin ni faan wom’engin e kan ni thothup. Kakrom, e boor piyu Israel ni mit ngorad fapi tang ara psalm nib fel’ rogon. Ma chiney e bay reb e pagel ni ke mit ngak 80 e thin nu Bible nrib fel’ rogon u nap’an ni ke gaman nel’ e duw rok. Gur rayog nda fanayed e biney e salap nib ga’ fan nib fel’ rogon?

13. Mang nrib ga’ fan ni ngaun sul u daken ban’en?

¹³ Nguun sul u daken ban’en e ra ayuweg e lem, ma puguran ni yima sul u daken e bayang ko skul ko Kristiano nib ga’ fan. I yog apostal Peter ni gaar: “Gubin ngiyal’ ni bay ug puguran ngomed e pi n’ey, ni yugu aram rogon ni kam nanged ma kam pired ni gimed mmudugil u fithik’ e tin ni ir e ba riyul’ ni kam nanged.” (2 Pet. 1:12) Mang fan nib t’uf ni ngaun puguran ban’en ngodad? Ya bochan ni ma gelnag i nang fan ban’en rodad, me ga’nag e lem rodad, miki gelnag nge yog nda pired ni gad be fol ku Jehovah. (Ps. 119:129) Ra un sul u daken e pi motochiyel rok Got nge pi kenggin e motochiyel rok ma ra ayuwegdad ni ngad fal’eged i yaliyed gadad ni ‘gathi kemus ni ngad motoyilgad nga ban’en ma gad pagtalin.’ (Jas. 1:22-25) Faanra dab ud puged u ran ngodad e tin riyul’, ma boch ban’en e ra k’aring lanin’dad nge dab ku dogned fare thin nib machalbog nib fel’ rogon.

14. Mange ra ayuwegdad u nap’an ni gad be fil fare thin nib machalbog?

¹⁴ Ngam beeg nib ga’ lamam. (Rev. 1:3) Boch e girdi’ e yad ma gay rogon ni ngar filed reb e thin nib beech ni goo yad rorad ma dariy lamrad. Re n’ey e dabi yib angin nib fel’. Nap’an ni yibe fil fare thin nib machalbog, ma yu ngiyal’ mab t’uf ni ngad beeged nib ‘achig lamdad’ ni nge ayuwegdad ngad tedan’dad. (Mu beeg e Psalm 1:1, 2.)a Yira rin’ ni aram rogon ma ra par u lanin’dad e n’en ni gad be beeg. Fare thin ni Hebrew ni ngan ‘beeg nib achig lamay’ e rib chugur fan ko ngan fal’eg i lemnag. Ba t’uf ni ngad fal’eged i lemnag e n’en ni gad be beeg nfaanra ngad nanged fan, ni bod rogon nib t’uf ni nge bilig dowdad e ggan ni gad be kay nge yib angin ngodad. Gad ma tay e tayim ni ngad fal’eged i lemnag e n’en ni gad be fil, fa? Tomren ni kad beeged e Bible, ma thingar da lemnaged nib fel’ rogon murung’agen e n’en kad beeged.

15. Uw rogon ni ngad filed “rogon i puthuy yu bugithin” ko fare thin nib machalbog?

¹⁵ Ngam fal’eg i lemnag rogon i puthuy yu bugithin. Yu ngiyal’ mab fel’ ni ngan nang rogon i puthuy yu bugithin nge kanawoen i fanay reb e thin nib beech ni fin gad be fil. Re n’ey e ra bungnag rogon ngad nanged rogon yaramen fare thin, me yog ni nga dogned nib fel’ rogon. Ri bod rogon nra reb e thin ma bay rogon yaramen yu bugithin riy, e ku arrogon fare thin nib machalbog nthin nriyul’ rok Got ni bay “fapi thin nib riyul’” riy. (2 Tim. 1:13) Ba t’uf ni ngad folwokgad ko re “thin nib riyul’” nem.

16. Mange n’en nib mom ni ma buch nib t’uf ni nge dabda rin’ed, ma uw rogon ni gad ra rin’ ere n’ey?

¹⁶ Nguum mon’og i yan. Be’ e rayog ni nge nang reb e thin nge yog ni un ko sabethin me tal ndabki fil i yan nge mon’og. Ku bay ban’en ni aram rogon nra buch rok e piin ni yad be yog fare thin nib machalbog. (Mu beeg e Hebrews 5:11-14.) Mange n’en nra ayuwegdad nge dabi buch ere n’ey rodad nib mom ni ma buch? Mu athamgil nge yoor bugethin ni ngam nang, ni bod ko som’on. “Ngad paged nga tomur urngin e tin ni kaad weliyed ni murung’agen Kristus ngad tiyan’dad ko tin ni ka ba’ riy ni ngan fil ngad mu’niged, me siy kud sulod bayay ko tin ni kaad filed, ni aram e murung’agen ni ngan pi’ keruuy ko tin ndariy fan e ngongol nge mang Got e mich u wun’uy; nge murung’agen e taufe nge paay ni yima tay nga daken be’ ngan yibilay; nge piin ni kar m’ad ni bay ni fasegrad ko yam’ nge gechig ndariy n’umngin nap’an.”​—Heb. 6:1, 2.

17. Mang nib ga’ fan ni nge mecham ni nguun fil ban’en nib mudugil nap’an? Mu weliy rogon.

¹⁷ Ngam dugliy ngal’an ni ngam fil fare thin. Nguun fil ban’en nib ngoch nap’an mab mudugil ngal’an e ba fel’ ko nge n’uw nap’an ma de mudugil ngal’an. Mu fil ban’en ko ngiyal’ nib pasigan’um ma der yan yan e lem rom. Ngan fil reb e thin nib beech e bod ni ngan fal’eg bochi pa’ e wo’ u lan ba loway. Ra i yoor yay ni yibe yan riy, ma ra mom e yan riy. Faan yira pag fare pa’ i wo’ ndakun yan riy, ma dabi n’uw nap’an miki mak garger. Ere rib ga’ fan ni ngan athamgil ndab ni tal! (Dan. 6:16, 20) Mu tiyan’um u fithik’ e meybil ‘ma dab mu pagem’ ko ngiyal’ ni nga nog fare thin nib machalbog ko tin riyul’ u Bible.​—Efe. 6:18.

18. Mang fan ni nga u dogned fare thin nib machalbog u gubin ngiyal’ ni ke mab e wo’ ngodad?

¹⁸ Ngan non! Ngan non! Ngan non! Boch e girdi’ ni be fil reb e thin nib beech e bayi n’en ma gathi ri yad be yog fare thin ya yad be tamra’ ara yad be magar ni yad ra oloboch. Re n’em e ra sowathnagrad ni ngar mon’oggad. Nap’an ni yira fil reb e thin, mab t’uf ni nguun sul u daken ngan fil bayay ngu bayay. Faen be fil fare thin nib beech e ri i yog ni boor yay ma aram e ra pagan’ nga i yog fare thin. Arrogodad nib t’uf ni nga u dogned e thin nib machalbog ni urngin ngiyal’ ni ke mab e kanawo’ ngodad ni nga dogned. ‘Ya ra mich u wan’dad me mat’awnagdad Got ngak; ma gadad ra yog u fithik’ e yoor, ma aram e kad thapgad.’ (Rom. 10:10) Gathi kemus ni nga dogned ‘u fithik’ e yoor’ u nap’an ni kan taufenagdad ya ku arrogon ni ngku da rin’ed u nap’an gad be weliy murung’agen Jehovah u gubin ngiyal’ ni ke mab e wo’ ngodad, nib muun ngay e ngiyal’ ni gad be machib. (Matt. 28:19, 20; Heb. 13:15) Pi muulung rodad ko Kristiano e ma bungnag rogodad ni nga dogned fare thin nib machalbog.​—Mu beeg e Hebrews 10:23-25.

Nga Nog fare Thin nib Machalbog u Taabang Ngan Pining e Sorok Ngak Jehovah

19, 20. (a) Mange n’en ni yira ngat ngay ni be rin’ e Pi Mich rok Jehovah e ngiyal’ ney? (b) Mange kam dugliy ni ngam rin’?

¹⁹ Rib felfelan’ ni nga nib nga Jerusalem ko Madnom ni kadbul, ko pul ni Sivan 6 ko duw ni 33 C.E.! Kadbul ko rorran nem, u m’on ko mereb e kolok ma piin ni kar muulunggad ko bin lang e singgil e u daken e maang’ang “mi yad tabab ko numon nlungun boch e nam.” (Acts 2:4) Chiney, e fare tow’ath ni ngan non ni thin nu bang ndan nang e dabkiyog ni nge rin’ e pi tapigpig rok Got. (1 Kor. 13:8) Machane, Pi Mich rok Jehovah e yad be wereg fare thin nib fel’ ko Gil’ilungun nib pag 430 mit e thin.

²⁰ Ri gad ba felfelan’ ndemtrug ko mang thin e gad ma yog ma gad be yog fare thin nib machalbog ko thin riyul’ u Bible u taabang! Ma reb, e re n’ey e ba thil ko n’en ni buch u Babel. Girdi’ rok Jehovah e yad be pining e sorok nga fithingan ni bod ba ulung i girdi’ ntaareb e thin rorad. (1 Kor. 1:10) Ere manga yugu ud pired ni gad be pigpig “u taabang” ni gadad pi walagdad ni pumoon nge ppin u ga’ngin yang e fayleng u nap’an ni gad be fil e taare thin nem nge fel’ rogon, ni ngan ta’fan e Chitamangidad nu tharmiy, ni Jehovah.​—Mu beeg e Psalm 150:1-6.

[Footnote]

Uw Rogon ni Ga Ra Fulweg?

• Mang fare thin nib machalbog?

• Mange ba muun ko nga nog fare thin nib machalbog?

• Mange ra ayuwegdad ni nga dogned fare thin nib machalbog nib fel’ rogon?

[Box on page 27]

Mu Athamgil ni Ngam Salap i Yog fare Thin nib Machalbog ni

◆ ngam motoyil nib fel’ rogon.

Luke 8:18; Heb. 2:1

◆ ngam folwok rok e piin ni yad ba salap ko fare thin.

1 Kor. 11:1; Heb. 13:7

◆ nge mit ngom muum sul u daken.

Jas. 1:22-25; 2 Pet. 1:12

◆ ngam beeg nib ga’ lamam.

Ps. 1:1, 2; Rev. 1:3

◆ ngam fal’eg i lemnag rogon i “puthuy yu bugithin.”

2 Tim. 1:13

◆ nguum mon’og i yan.

Heb. 5:11-14; 6:1, 2

◆ ngam dugliy ngal’an ni ngam fil fare thin.

Dan. 6:16, 20; Eph. 6:18

◆ ngam non ko fare thin.

Rom. 10:10; Heb. 10:23-25

[Pictures on page 28]

Girdi’ rok Jehovah e yad be yog u taabang fare thin nib machalbog