Ngan Ayuweg Pi Fak e “Pi Milekag”

1, 2. (a) Mang reb e magawon ni ma mada’nag pi fak boch e girdi’ ni kar chuwgad ko nam rorad ka ranod ra pared nga yugu reb e nam? (b) Mang deer e gad ra weliy e fulweg riy ko re article ney?

I YOG be’ ni ka nog Joshua ngak ni gaar: “Ka nap’an ni ku gub achig, ma gu ma non ko bin baaram e thin ni ma yog e gallabthir rog u tabinaw ngu lan e ulung, ma gallabthir rog e yow l’agruw ni’ ni kar chuwgow ko nam rorow yow ma par u reb e nam ni gathi nam rorow. Machane, tomuren nug un nga skul, ma aram mug tabab ni nggu adag ni ngaug non ni thin ko nam ni gamad ma par riy. In e duw nga tomuren, ma aram e yigoo thin ko nam ni gamad ma par riy e gu ma yog. Ere, nap’an ni yira yan ko muulung ma da gur nang fan e n’en ni yibe yog, maku dag mecham ko yalen ko nam rok e gallabthir rog.” Boor e girdi’ ni ke buch rorad e n’en ni ke buch rok Joshua.

² Chiney e ke pag 240,000,000 e girdi’ ndarur pared ko nam nni gargelegrad riy. Ere, faanra gur bagayad e pi girdi’ ney maku bay e bitir rom, me ere uw rogon nrayog ni ngam ayuwegrad ni ngar nanged rogon ni nge t’uf Jehovah rorad mar ‘folgad ko tin riyul’’? (3 John 4) Ma uw rogon nrayog ni ngki pi’ yugu boch e girdi’ e ayuw?

PIIN GALLABTHIR, MU DAGED E KANAWO’ NIB FEL’ NRAYOG NI NGE FOLWOK PI FAKMED RIY

3, 4. (a) Uw rogon nrayog ni nge dag e piin gallabthir e kanawo’ nib fel’ nrayog ni nge folwok pi fakrad riy? (b) Mang e susun ndabi lemnag e piin gallabthir ni nge rin’ pi fakrad ni fan ngorad?

³ Piin gallabthir, faanra gimed baadag ni nge fel’ e tha’ u thilin Jehovah nge pi fakmed me yag e yafos ndariy n’umngin nap’an ngorad, ma rib ga’ fan ni ngam daged e kanawo’ nib fel’ nrayog ni ngar folwokgad riy. Faanra i guymed pi fakmed ni gimed be ‘m’oneg u wun’med e gagiyeg rok Got,’ ma aram e rayog ni ngar nanged rogon ni ngaur taga’gad ngak Jehovah ni nge pi’ e tin nib t’uf rorad u reb e rran ngu reb. (Matt. 6:33, 34) Ere, dab mu guyed rogon ni nge yoor ban’en romed. Mm’oneged u wan’med e pigpig ni gimed be tay ngak Jehovah ko bin ni ngam guyed rogon ni nge yoor e chugum romed. Mu guyed rogon ni ngaum pared ndariy e malfith romed. Mu nameged e ‘flaab u tharmiy,’ ni aram e be yip’ fan ni ngam guyed rogon ni ngam fel’gad u wan’ Jehovah, ko bin ni ngam guyed rogon ni nge yoor e salpiy romed ara ngam ‘fel’gad u wan’ e girdi’.’​—Mu beeg e Mark 10:21, 22; John 12:43.

⁴ Mu guyed rogon ndabi yoor pa’ nga puluwmed nge pag rogon ndakuriy e tayim romed ni fan ngak pi fakmed. Mogned ngorad ni gimed be felfelan’ ngorad u nap’an ni yad ra dugliy ni ngar m’oneged Jehovah u wan’rad ko bin ni ngar nameged ni nge gilbuguwrad, ara nge yoor e salpiy rorad, ara ra guyed rogon ni ngar rin’ed e pi n’ey ni fan ngomed. Mu siyeged fa binem e lem ni ma tay e girdi’ nu fayleng ni aram e yad ma lemnag nib milfan ngak pi fakrad ni ngar yognaged boch ban’en ni nge fal’eg e par rorad. Dab mu paged talin ni “gathi bitir e ma lemnag e n’en ni nge yog ngak e gallabthir rorad, ya gallabthir e ma lemnag e n’en ni nge yog ngak e bitir rorad.”​—2 Kor. 12:14.

PIIN GALLABTHIR, MU GUYED ROGON NI NGAM PITHIGED BOCH E MAGAWON NI MA SUM NI BAY ROGON KO THIN NI YIMA YOG

5. Mang fan nthingari weliy e piin gallabthir murung’agen Jehovah ngak pi fakrad?

⁵ Ngiyal’ ney e be yib e girdi’ “u urngin mit e thin ko pi nam” nga lan e ulung rok Jehovah ni bod rogon ni kan yiiynag. (Zek. 8:23, NW) Machane, faanra gathi ri manang pi fakmed e thin ko nam romed ma aram e rayog ni nge mo’maw’ ngomed ni ngam filed e tin riyul’ ngorad. Pi fakmed e aram e piin th’abi ga’ fan ni gimed ma fil e Bible ngorad, ma rib ga’ fan ni ngar ‘nanged’ Jehovah, ya aram e n’en nra yognag e yafos ndariy n’umngin nap’an ngorad. (John 17:3) Faanra nge yag ni nang pi fakmed e thin rok Jehovah, ma thingar “um weliyed murung’agen ngorad” ni gubin ngiyal’.​—Mu beeg e Deuteronomy 6:6, 7. 

6. Mang angin nrayog ni nge yib ngak pi fakam ni faan yad ra fil e birom e thin? (Mu guy e sasing ni bay u tabolngin e re article ney.)

⁶ Ba mudugil nnap’an nra un pi fakmed nga skul ma aram e yad ra nang rogon ni ngaur nonad ni thin ko nam ni gimed ma par riy, fa reb e yad ra fil rok yugu boch e girdi’. Machane, rayog ni ngar filed e thin romed ni faanra um nonad ngorad ni gubin ngiyal’. Faanra manang pi fakmed rogon ni ngar nonad ko thin romed, ma aram e rayog ni ngaur weliyed lanin’rad ngomed nib fel’ rogon. Machane, ku bay boch i angin e re n’ey. Faanra manang pi fakmed e thin romed nge thin ko nam ni gimed ma par riy ma rayog ni nge ayuwegrad u rogon ni yad ma lem nge rogon ni ngar nanged fan laniyan’ yugu boch e girdi’. Ku rayog ni nge ayuwegrad ni ngar yoornaged ban’en ni yad be rin’ ni fan ko fare maruwel ni machib. Carolina ni yad ma par e gallabthir rok u reb e nam ni gathi nam rorad e yog ni gaar: “Gu baadag ni gu ma un nga reb e ulung ni yima non riy ni thin nu bang. Gub felfelan’ ngay ni gu be un i pi’ e ayuw ko gin nib t’uf e ayuw riy.”

7. Mang e rayog ni ngam rin’ ni faanra gimed be mada’nag pi fakam e magawon u rogon e re thin ni ngaum nonad riy?

⁷ Yugu aram rogon, machane nap’an nra tabab pi fak e piin ni kar chuwgad ko nam rorad ka ranod ra pared nga yugu reb e nam ni ngar nanged e yalen nge thin ko fare nam ni yad be par riy, ma aram e rayog ni nge tabab boch i yad ni nge dabuy ni nga i non ko bin baaram e thin ni ma yog e gallabthir rok, fa reb e munmun me pagtalin e binem e thin. Ere, gimed e piin gallabthir e faanra aram rogon e magawon ni be mada’nag pi fakmed, ma gur, rayog ni ngam guyed rogon ni ngam filed rogon i yog boch e thin ko fare nam ni gimed be par riy? Ya bin riyul’ riy e, faanra gimed manang fan e n’en ni be yog pi fakmed u nap’an ni yad be non yugu boch e girdi’, ara gimed manang rarogon e re miti n’en ni yad baadag ni ngar chuweged e chalban rorad ngay, nge pi n’en ni yad ma fil u skul, maku rayog romed ni ngam nonad ko sensey rorad, ma aram e rayog ni ngam chuguliyed yad nib fel’ rogon mar manged boch e Kristiano. Riyul’ ni faanra baadag be’ ni nge fil yugu reb e thin mab t’uf ni nge tay e tayim ni fan ngay, me athamgil, me sobut’nag laniyan’. Machane, uw rogon ni faanra ke biling pi fakmed ndabkiyog ni ngar nonad? Gathi gimed ra guy rogon ni ngam filed e sign language ara rogon ni ngaun non u paay ya nge yag nim nonad ngorad? Ere, uw rogon u wun’med, faanra ma non pi fakmed u yugu reb e thin nib thil maku aram e re thin nri yad manang nib fel’ rogon, me ere gathi ba t’uf ni ngkum filed e re thin nem?a

8. Uw rogon nrayog ni ngam ayuweg pi fakam ni faanra gathi ri ga manang e bin baaram e thin ni ir e ri yad manang?

⁸ Riyul’ nsana bay boch e gallabthir ni yad ma par u boch e nam ni gathi nam rorad ndabiyog ni ngar salapgad ko numon ko bin baaram e thin nri manang pi fakrad. Bochan e re n’ey, ma aram e rayog ni nge mo’maw’ ko pi gallabthir ney ni ngar filed e thin ni bay u lan “fare babyor nib thothup” ngak pi fakrad. (2 Tim. 3:15) Faanra ireray e magawon rom, ma ka rayog ni ngam ayuweg pi fakam ni ngar nanged Jehovah me t’uf rorad. Reb e piilal ni ka nog Shan ngak e yog ni gaar: “Nina’ romad e gathi ri manang e bin baaram e thin ni ir e ri gamad manang e gal ni baaram e ppin ni walageg, maku arrogomad ni gathi ri gamad manang e thin ko nam rok. Machane, nap’an nug guyed ni be fol Bible, ma be meybil, ma be athamgil u rogon nrayog rok nga i yarmiy e fol Bible ni tabinaw ni fan ko tabinaw romad u gubin e wik, ma aram mug nanged nrib ga’ fan ni nggu nanged Jehovah.”

9. Uw rogon nrayog ni nge ayuweg e piin gallabthir pi fakrad ni faanra ba t’uf ni ngan fil e Bible ngorad ni yibe fanay l’agruw e thin?

⁹ Bay boch e bitir nsana ba t’uf ni ngan fil murung’agen Jehovah ngorad ni yibe fanay l’agruw e thin. Mang fan? Ya ba thil e thin ni yad ma fanay u skul ko thin ni yad ma fanay u tabinaw. Ere, aram fan ni bay boch e gallabthir ni yad ma fanay e babyor, nge boch ban’en ni kan ngongliy rogon nrayog ni ngaun motoyil ngay, nge boch e video ni kan ngongliy ni thin ko nam ni kar bad pi fakrad riy nge nam ni yad be par riy. Ba tamilang nthingari athamgil e pi gallabthir ney mar ted boor e tayim rorad ni ngar ayuweged pi fakrad ni nge fel’ e tha’ u thilrad Jehovah.

BIN NGAN E ULUNG E SUSUN NI NGAM UNED NGAY?

10. (a) Mini’ e thingari dugliy e re ulung ni nga i un chon e tabinaw rok riy ko muulung? (b) Mang e susun ni nge rin’ u m’on ni nge dugliy ban’en?

¹⁰ Faanra ma par e “pi milekag” u bang nib palog ko gin ni bay e Pi Mich riy ni taareb rogon e thin rorad, ma aram e ba t’uf ni ngar uned nga reb e ulung ni yima non riy ni thin ko fare nam ni yad be par riy. (Ps. 146:9, BT) Machane, faanra bay reb e ulung nib chugur ko gin ni ga ma par riy ni yima non riy ni thin ko nam rom, ma baaray reb e deer nrayog ni nge sum ni be gaar: Bin ngan e ulung e ba fel’ ni nga i un chon e tabinaw rog riy ko muulung? Tomuren ni ke fal’eg e en lolugen e tabinaw i lemnag e re n’ey, ma ke yibilay murung’agen, ma kar nonad e en mabgol rok nge pi fak u taabang, ma aram e thingari dugliy ko bin ngan e ulung e ir e ngaur uned riy ko muulung. (1 Kor. 11:3) Mang boch ban’en nib t’uf ni nge lemnag faen ni ir lolugen e tabinaw? Ma mang boch i kenggin e motochiyel u Bible nra ayuweg ni nge dugliy e n’en nib fel’ ni ngar rin’ed chon e tabinaw rok? Ngad weliyed boch e pi n’ey.

11, 12. (a) Mang e ma rin’ e thin nga rogon urngin ban’en ni ma mit ngak reb e bitir u nap’an e muulung? (b) Mang fan ni bay boch e bitir ndubrad ni ngar filed e bin baaram e thin ni ma yog e gallabthir rorad?

¹¹ Thingari fal’eg e piin gallabthir i lemnag e n’en nib t’uf rok pi fakrad. Riyul’ ni faanra nge tamilang e tin riyul’ u wan’ reb e bitir nib fel’ rogon, ma de gaman e in i awa ni baaram ni ma fil e tirok Got ban’en riy u nap’an e muulung ni yima tay u gubin e wik. Machane, am lemnag e re n’ey: Nap’an nra un e piin bitir ko muulung ni yibe tay u reb e thin nri yad manang nib fel’ rogon, ma aram e rayog ni nge yib angin ngorad e pi n’en ni yibe fil ni kemus ni bochan e kar uned ko muulung, maku reb e sana rayog ni boor ban’en ni be mit ngorad nder nang e gallabthir rorad. Machane, faanra yad be un ko muulung ni yibe tay u reb e thin ni gathi ri yad manang nib fel’ rogon, ma aram e rayog ni nge dabi yib angin ngorad e pi n’en ni yibe fil. (Mu beeg e 1 Korinth 14:9, 11.) Maku reb e, rayog ni nge munmun ma dabki lem fare tir nib puluw nga rogon e thin ko nam ni ke yib riy. Bin riyul’ riy e, bay boch e bitir nrayog ni ngar filed rogon ni ngaur pied e fulweg, ara welthin, ara nga ranod u yaan ban’en ni yad be non ko bin baaram e thin ni ma yog e gallabthir rorad, machane der yib e pi n’en ni yad be weliy u gum’ircha’rad.

¹² Maku reb e, gathi kemus ni yigoo thin e ma rin’ ban’en nga rogon ni ma lem reb e bitir. Aram e n’en ni buch rok Joshua ni faan kad weliyed murung’agen. I yog Esther nreb e ppin ni walagen ni gaar, “Piin bitir e yad ma tay ni thin, nge yalen, nge teliw ko gallabthir rorad e gubin nib peth nga taabang.” Faanra be lemnag fapi bitir ni gathi ri yad manang rarogon e yalen ko gallabthir rorad, ma aram e rayog ni ngar dabuyed ni ngar filed e bin baaram e thin ni ma yog e gallabthir rorad ara ra uned ko teliw rorad. Ere, mang e rayog ni nge rin’ e pi gallabthir ni yad be par pi fakrad u yugu reb e nam?

13, 14. (a) Mang fan ni dugliy ba wu’ e mabgol ni yad ma par pi fakrow u yugu reb e nam ni ngaur uned ko muulung u reb e ulung ni yima non riy ni thin ko re nam nem ni yad ma par riy? (b) Mang e rrin’ew ya nge yag nra parew ni yow ba gel ko tirok Got ban’en?

¹³ Pi gallabthir ni Kristiano e kab ga’ fan u wan’rad e pi n’en nra ayuweg pi fakrad ko tirok Got ban’en ko pi n’en ni yad baadag. (1 Kor. 10:24) I yog Samuel ni chitamangin Joshua nge Esther ni gaar: “Gu parew leengig nggu fal’egew i yaliy rarogon pi fakmow ya nge yag nug nangew e re thin nrayog ni ngar filed e thin rok Got riy nib fel’ rogon me ayuwegrad ni ngar mon’oggad ko tirok Got ban’en, ngemu’ mu kug yibilayew e gonop rok Got ni nge ayuwegmow. Tomur riy me tamilang u wan’mow ni n’en nra ayuwegrad e de puluw ko n’en ni gamow baadag. Machane, nap’an nug nangew ni gathi ri be yib angin ngorad e pi n’en ni yima fil ko bin baaram e ulung ni gamad ma un ngay ni yima non riy ni thin ko nam romow, ma aram mug dugliyew ni nggu warod gu uned nga reb e ulung ni yima non riy ni thin ko nam ni gamad ma par riy. Gamad ma un ko muulung nge machib u taabang ni gubin ngiyal’. Ku gamad ma pining e pi walag u lan e ulung ni ngar uned ngomad ko abich u taabang ara gu rin’ed boch ban’en u taabang ni nggu felfelan’gad ngay. Pi n’ey e ayuweg pi fakmow ni ngar nanged Jehovah nge pi walag u lan e ulung, me tamilang u wan’rad ni Jehovah e gathi kemus ni ir e Got rorad, ya ku ir e Chitamangirad nge Fager rorad. Kab ga’ fan e re n’ey u wan’mow ko bin ni nge mit e thin romow ngorad.”

¹⁴ Ki ulul Samuel ngay ni gaar: “Ku gamow ma un leengig ko muulung ni yima tay ko biromow e thin ni bochan e nge yag nug parew ni gamow ba gel ko tirok Got ban’en. Ri boor pa’ u puluwmow, maku ma aw parowmow. Machane, gamow be pining e magar ngak Jehovah ni ke tow’athnagmow ko athamgil ni kug tew nge pi n’en ni kug pagew fan ya nge yag nug rin’ew e re n’ey. Re dalip i bitir ni fakmow nem e yad gubin ni yad be pigpig ngak Jehovah u polo’ e tayim rorad.”

N’EN NRAYOG NI NGE RIN’ E PIIN FEL’ YANGAREN

15. Mang fan ni lemnag reb e walag nib pin ni ka nog Kristina ngak nrayog ni nge mon’og ko tirok Got ban’en ni faanra yan nga reb e ulung ni yima non riy ni thin ko nam ni ma par riy?

¹⁵ Piin bitir ni ke fel’ yangarrad e rayog ni nge munmun mar nanged ni faan yad ra un nga reb e ulung ni yima non riy ko bin baaram e thin ni ir e ri yad manang nib fel’ rogon, ma aram e rayog ni nge fel’ rogon e pigpig ni yad be tay ngak Jehovah. Faanra aray rogon, ma susun e dabi lemnag e piin gallabthir ni ke dabuy pi fakrad ni ngar pared rorad ara ur rin’ed boch ban’en u taabang. I yog Kristina ni gaar: “Gu manang buchuuw e thin ko gallabthir rog, machane nap’an ni yira yan ko muulung ma yooren ban’en ni yibe weliy e da gur nang fan. Nap’an ni gaman 12 e duw rog, ma aram mug un nga reb e convention ni yibe non riy ko bin baaram e thin ni yima fanay u skul. Fin aram e yay nth’abi som’on ni tamilang u wan’ug nib riyul’ e pi n’en ni gu be rung’ag ni yibe weliy! Ku bay ban’en nib fel’ ni buch u nap’an nug tabab ni ngaug meybil ko bin baaram e thin ni gu ma fanay u skul. Gguy nrayog ni nggu weliy ngak Jehovah e pi n’en ni bay u gum’irchaeg!” (Acts 2:11, 41) Nap’an ni gaman 18 e duw rok Kristina, ma aram me weliy laniyan’ ngak e gallabthir rok, ma aram me dugliy ni nge yan i un nga reb e ulung ni yima non riy ni thin ko nam ni yad be par riy. I yog ni gaar: “Nap’an nug fil murung’agen Jehovah ni gu be fanay e bin baaram e thin ni gu ma fanay u skul, ma aram e n’en ni ayuwegeg ni nggu mon’og.” De n’uw nap’an nga tomuren, ma aram me un Kristina ko pioneer ma rib felfelan’ ko pigpig ni be tay.

16. Mang fan nib felfelan’ reb e walag nib pin ni ka nog Nadia ngak nde chuw ko bin baaram e ulung ni i un ngay ni yima non riy ko bin baaram e thin ni ma yog e gallabthir rok?

¹⁶ Piin fel’ yangaren, gimed baadag ni ngam marod nga reb e ulung ni yima non riy ni thin ko nam ni gimed ma par riy, fa? Faanra aray rogon, ma ngam fal’eged i lemnag ko mang fan ni gimed baadag. Faan gimed ra yan ko re ulung nem, ma gur, ra ayuwegmed e re n’ey ni ngam chugurgad ngak Jehovah? (Jas. 4:8) Fa gimed baadag ni ngam marod ko re ulung nem ni bochan e kam dabuyed ni be guy e gallabthir romed urngin ban’en ni gimed be rin’ ara gimed baadag ni nge lich pa’ nga puluwmed? Nadia nreb e walag nib pin ni ma pigpig u Bethel e yog ni gaar: “Nap’an ni fel’ yangarmad e pi walageg, ma aram mug adaged ni nggu warod gu uned ko bin baaram e ulung ni yima non riy ni thin ko nam ni gamad ma par riy.” Machane, manang e gallabthir ko re walag ney ni faan yad ra rin’ e re n’ey, ma rayog ni nge magawon e tha’ u thilrad Jehovah. I ulul ngay ni gaar: “Chiney e gamad ba felfelan’ ni ke athamgil e gallabthir romad ni ngar filew e thin rorow ngomad mar tew gamad ko bin baaram e ulung ni yima non riy ni thin ko nam rorow. Re n’ey e ke yib angin ngomad ma ke bing e kanawo’ ngomad ni nggu ayuweged yugu boch e girdi’ ni ngar nanged Jehovah.”   

ROGON NRAYOG NI NGE PI’ YUGU BOCH E GIRDI’ E AYUW

17. (a) Mini’ e ke tay Jehovah ni nge fil e tin riyul’ ko piin bitir? (b) Uw rogon nrayog ni nge ning e piin gallabthir e ayuw u rogon ni ngar ayuweged pi fakrad ni nge taw e tin riyul’ nga gum’ircha’rad?

¹⁷ Ke tay Jehovah e piin gallabthir ni yad e ngar filed e tin riyul’ ngak pi fakrad, ma gathi titaw nge tutuw ko fapi bitir, ara yugu be’. (Mu beeg e Proverbs 1:8; 31:10, 27, 28.) Yugu aram rogon, ma dabisiy nib t’uf ni ngan ayuweg e pi gallabthir ndar nanged e thin ko nam ni yad ma par riy, ya nge yag nra ayuweged pi fakrad ni nge taw e tin riyul’ nga gum’ircha’rad. Ere, nap’an nra ning e pi gallabthir ney e ayuw, ma aram e gathi be yip’ fan ni yad be guy rogon ni ngar pied e maruwel rorad ngak yugu be’ ni nge mang ir e chuguliy pi fakrad; ya rayog ni ku aram reb e kanawo’ ni yad be chuguliy pi fakrad riy ma ‘yad be llowan’nagrad nrogon, ma yad be fonownagrad nrogon girdien Kristus.’ (Efe. 6:4) Bod nrayog ni nge yog e piin gallabthir ngak e piin piilal u lan e ulung ni ngar weliyed ngorad boch e kanawo’ nrayog ni ngar ted e fol Bible ni tabinaw riy mar ayuweged yad u rogon ni ngar pirieged boch e walag u lan e ulung nib fel’ ni nga i chag pi fakrad ngorad.

18, 19. (a) Uw rogon nrayog ni nge ayuweg yugu boch e Kristiano e piin bitir? (b) Mang e thingari ulul e piin gallabthir ni ngar rin’ed?

¹⁸ Bod nrayog ni nge ba ngiyal’ me pining e piin gallabthir girdien yugu boch e tabinaw ni ngar uned ngorad ko fol Bible ni tabinaw. Maku reb e, boor e fel’ yangaren ni yad ma fil boch ban’en rok yugu boch e Kristiano u nap’an ni yad be machib ara yad be rin’ boch ban’en u taabang. (Prov. 27:17) Shan ni faan kan weliy murung’agen e yog ni gaar: “Dab gu pagtalin e pi walag nra feked gag ngar ayuweged gag. Nap’an ni yad ra ayuwegeg ko welthin rog u nap’an e muulung, mab ga’ ni boor ban’en ni gu ma fil rorad. Kug baadag e pi n’en ni gamad ma rin’ u taabang ni nggu felfelan’gad ngay.”

¹⁹ Riyul’ ni piin ni ma mel’eg e piin gallabthir ni ngar ayuweged pi fakrad e susun ni gubin ngiyal’ ni ngaur pied e athamgil nga laniyan’ fapi bitir ni ngar ted fan e gallabthir rorad, ma ngkur weliyed boch ban’en nib fel’ ko fapi bitir ni murung’agen e gallabthir rorad, ma dab ra guyed rogon ni ngar feked e maruwel nib milfan ko piin gallabthir. Maku reb e, piin ni yad be pi’ e ayuw e susun e ngar siyeged boch e ngongol nrayog ni nge magawonnag laniyan’ boch e girdi’ u lan e ulung ara wuru’ e ulung. (1 Pet. 2:12) Susun e dabi digey e piin gallabthir pi fakrad ni nge mang yugu boch e walag e milfan ngorad ni ngar ayuweged yad ko tirok Got ban’en. Thingar ra fal’eged i yaliy rogon e ayuw ni be pi’ yugu boch e walag mar ululgad i skulnag pi fakrad.

20. Uw rogon nrayog ni nge ayuweg e piin gallabthir pi fakrad ni ngar manged boch e tapigpig rok Jehovah ni yad ba yul’yul’?

²⁰ Piin gallabthir, mmeybilgad ngak Jehovah ngam ninged e ayuw ngak, mi gimed athamgil ni ngam rin’ed e tin nrayog romed. (Mu beeg e 2 Kronicles 15:7.) Mm’oneged u wan’med e tha’ u thilin pi fakmed nge Jehovah ko pi n’en ni gimed baadag. Mu athamgilgad u rogon nrayog romed ya nge yag ni taw e Thin rok Got nga gum’irchaen pi fakmed. Dab mu talgad i athapeg ni nge ba ngiyal’ me mang pi fakmed boch e tapigpig rok Jehovah ni yad ba yul’yul’. Nap’an nra fol pi fakmed ko Thin rok Got mar folwokgad ko ngongol nib fel’ ni gimed be dag, ma aram e rayog ni ngam lemgad ni bod rogon apostal John ni faani weliy murung’agen e piin ni ke ayuwegrad ko tirok Got ban’en ni gaar: “Dariy ban’en nrib gel e felfelan’ nra pi’ ngog ko bin ni nggu rung’ag murung’agen pi fakag ni yad be fol ko tin riyul’.”​—3 John 4.