Ngan Machibnag Girdien Yugu Boch e Nam
1. Mang kanawo’ e ke mab ngodad ko ngiyal’ ni gad be un ko machib u lan e binaw rodad?
1 I yog Jesus ni yira wereg fare thin nib fel’ u fayleng i yan “ni nge urngin e girdi’ me nang.” Ba tamilang nrib ga’ fan e pi thin nem u wan’ e piin ni ma un ko re maruwel nem. (Matt. 24:14; 28:19, 20) Nap’an ni nga darod ko machib, ma gad ra pirieg e girdi’ u boch e nam nib thil e thin rorad. Ku bay rogorad ni ngar rung’aged fare thin nib fel’ u murung’agen Gil’ilungun Got mar uned ko tin riyul’ u m’on ni nge yib fare rran rok Jehovah. (Mal. 3:18) Uw rogon ni ngad tababnaged e machib ko girdi’ u yugu boch e nam ni yad ma par u lan e binaw rodad?
2. Uw rogon ni ngad folwokgad rok Jehovah ngad machibnaged e girdi’ nib thil e thin rorad?
2 Ngad Daged ni Taareb Lanin’dad Jehovah ko Piin Ba Thil e Thin Rodad: Faan gad ra dag e t’ufeg rok Jehovah ngak gubin e girdi’ u lan e binaw rodad ma rib t’uf ni gad baadag ni ngad ayuweged yu girdi’ nge yog e thin riyul’ ngorad u murung’agen fare bin riyul’ e Got, ni Jehovah, ndemtrug nib thil e thin rorad. (Ps. 83:18; Acts 10:34, 35) Yugu aram rogon ni gad ma tiyan’dad ngay ngad machibnaged e girdi’ ni ma non ni taab rogon e ulung ni gad ma chag ngay, machane thingar da tedan’dad ko tin nib t’uf rok e piin nib thil e thin rorad ma ngad gayed rogon ni ngad wereged fare thin nib fel’ u murung’agen Gil’ilungun Got ngorad. Faan gad ra pag ndab da machibnaged e girdi’ nib thil e thin rorad ma gathi gadad taab lanin’dad Jehovah ya m’agan’ Jehovah ngay ni ngan machibnag e girdi’ nu gubin e nam. Ere, uw rogon ni ngad ayuweged e girdi’ nder ma yog e thin rodad?
3. Mang talin e maruwel ni kan ngongliy ni fan ngodad, ma uw rogon ni ngad fal’eged rogon ngad fanayed?
3 Ngan Fanay Fare Babyor ni Good News for People of All Nations: Kan ngongliy e re booklet ney ko ngiyal’ ni ngad mada’naged e girdi’ nib thil e thin rorad. Nga mu fek e re booklet ney nge yog ngom u gubin ngiyal’, ma ga yaliy ni ngam nang e tin ni bay riy, ma ga fal’eg rogom ngam fanay. Nga mu layinnag e thin ko pi nam ni bay ko binaw rom ngam papey i pirieg. Faanra bay yugu boch e babyor ko pi thin ko pi nam nem, ma ra ayuwegem ngam fek boch ni ngam wereg ngak e girdi’ u tomren ni kam fanay e re booklet ney.
4. Uw rogon ni ngan fanay fare babyor ni Nations ko machib rodad?
4 Faan ga ra mada’nag be’ u mit e tabinaw ni ma non e thin ko yu nam ma dab mu nang ko bin ngan, nga mu dag e booklet ngak. Ma ga cheleg ko page ni bay yaan e binaw riy, nga mu pointnag nga dowam nge nam ni ga ma par riy, ma ga dag ni ga baadag ni ngam nang ko u uw ni ke yib riy ma mang thin ni ma non. Tomren ni ke tamilang u wan’um e thin rok, mu sap nga table of contents, ma ga gay e page ko thin rok. Nga mu dag e sentence ni ba ga’ e thin riy, ma ga dag i weliy ni ga baadag ni nge beeg fare thin. Tomren ni ke beeg, nga mu pi’ e tract ko thin rok ngak ara ngam pointnag ngak e sentence ni kan highlightnag nib gray ni be weliy nib m’agan’um ngay ngam sul i pi’ e babyor ko thin rok ngak. Bin migid ngam pointnag ko thin ni “my name” ni kan fal’eg nib bold, ma ga yog fithingam nib tamilang. Ngam pointnag nga “your name” ko bold type, ma ngam son nge pi’ facha’ e fulweg. Ngam yarmiy ni ngam sul ngak.
5. Uw rogon ni ngan ayuweg e girdi’ nu bang ni baadag e machib?
5 Ngan Yarmiy ni Ngan Sul: Ngan athamgil ni ngan sul ngak e piin ni baadag e thin ko Gil’ilungun Got ni yugu demtrug e thin rorad. Nap’an ni kad turguyed ni baadag be’ ni nge nang murung’agen Got nge Thin Rok ni bay ko Bible, ma ngad fal’eged fare babyor ni Please Follow Up (S-43) form ngad pied ko secretary ko ulung ya nge pi’ ko branch ofis nge yog ni yib be’ ni ma non ko thin rok. Ma fare branch ofis e ra pi’ e re ke babyor nem ko ulung ko thin nib puluw. Nap’an ni kan pi’ ma dabni sagaal ni ngan sul ngak facha’. Fare secretary e ra pi’ ba copy ko re babyor ney ngak fare service overseer ni aram e rayog ni ngan nang ko uw fene yoor e girdi’ ko reb e thin ni baadag e machib. Ngan fanay e re ke babyor ney ni goo be dag be’ nri baadag e machib.
6. Faanra gad ra mada’nag be’ nu bang ma mang e mil fan ngodad?
6 Ra yan boch e tayim u thilin e ngiyal’ ni kan pi’ fare babyor ni S-43 form nge mada’ ko ngiyal’ ni nge yib be’ ni manang e thin rok facha’. Ere fare publisher ni ke pi’ fare S-43 form e rayog ni nge sul ngak facha’ me guy rogon nge pug e tafinay rok nge mada’ ko ngiyal’ ni yib be’ ni manang e thin rok. Sana rayog ni ngan fil e Bible ngak facha’. Machane nap’an e ngiyal’ nem ma uw rogon nrayog ni nge yog ngak fare publisher e babyor ko thin ku facha’?
7. Uw rogon ni nge yog e pi babyor ko girdi’ nu bang ni gad ma mada’?
7 Babyor ko Thin nu Bang: Susun dabi par ko ulung boor e babyor ko thin nu bang. Machane faanra turguy fare service overseer ni bay boor e girdi’ nu bang ni baadag e machib ma rayog ni nge chumongnag boch e babyor ko re thin nem ni fan ni nge wereg e pi publisher. Faanra dariy e babyor ko re thin nem ko ulung a rayog ni ngan chumongnag. Ra yan boch e tayim fini yib e babyor ko thin nu bang. Ere yibe yarmiy ni ngan printnag e babyor ku www.watchtower.org. Bay boor e babyor ko boor mit e thin ni rayog ni nge fanay e publisher ara be’ ni baadag e machib. Dabi siy ni re n’ey e ra ayuweg i machibnag e girdi’ nu bang ni baadag e machib.
8. Uw rogon ni ma ayuweg e ulung e girdi’ nu bang ni baadag e machib?
8 Ayuw ni Ma Pi’ e Ulung: Boch e binaw ma boor e girdi’ nu bang riy ma dariy e ulung ni ma tay e muulung ko re thin nem. Ere ngan pining e girdi’ nu bang ni baadag e machib ni ngar uned ko pi muulung rodad. Ngan pining e magar ngorad ma ngan dag e t’ufeg ngorad ma sana yad ra adag ni ngar uned ko muulung u gubin ngiyal’. Som’on ma sana bay e magawon ko thin nge yalen; machane dariy e magawon ko bin riyul’ e t’ufeg ko Kristiano u lan e ulung ko Pi Mich Rok Jehovah u ga’ngin yang e fayleng. (Zef. 3:9; John 13:35) Rayog ni ngam non ko thin nu bang fa? Faanra er rogon ma ga baadag ni ngam sul ngak e girdi’ ko re thin nem ma nga mog ko secretary ko ulung ma ra yog e re n’em ko branch ofis. Re ney e ra ayuweg e branch ofis u nap’an ni yad be gayiy e publisher ni nge sul ngak be’.
9. Wuin ni ngan turguy ni ngan fal’eg e skul ko thin nu bang ni fan ko pi publisher, ma uw rogon ni ngan rin’?
9 Ngan Skulnag e Thin nu Bang: Nap’an ni ga be ayuweg e piin ni ma non ko thin nu bang, ma fel’ ni ngam piningrad ngar uned ko ulung ko thin rorad ni faanra rayog. Ma faanra dabiyog ma boch e publisher e ra athamgil ni ngar filed e thin nu bang ni rayog ni ngar ayuweged e girdi’ nu bang ni baadag e machib. Faanra dariy e ulung ko thin nu bang, ma boor e girdi’ nu bang u lan e binaw ma rayog ni nge turguy fare branch ofis ni ngan fl’eg e skul ko thin nu bang. Faanra er rogon, ma fare branch ofis e yog ko pi ulung ni ngan announcenag ni ngan fal’eg e skul ko thin nu bang. Piin ni ra un ko re skul nem e susun ni kar turguyed ni yad ra un ko re ulung nem ko thin nu bang.
10. Wuin nrayog ni ngan fal’eg e group ko thin nu bang, ma uw rogon ni ngan turguy ni ngan rin’?
10 Ngan Fal’eg Ba Group: Bay aningeg i n’en nib t’uf ni ngan fal’eg e group ara ulung ko thin nu bang. (1) Susun ni boor boch e girdi’ nu bang ni baadag e machib ma rayog ni nge yoor. (2) Susun ni bay boch e publisher ni manang e re thin nem fa yad be fil. (3) Susun ni bay reb e piilal ara ministerial servant ni rayog ni nge ayuweg e re group nem ma rayog ni nge conductnag reb e muulung u gubin e wik ko re thin nem. (4) Susun ni bay ba ulung ko piilal ni baadag ni ngar manged sponser ko re group nem. Nap’an ni ke yog e pi n’ey nib t’uf ma piin piilal e ra yol ko branch ofis u murung’agen e re group ney ma yad ra ning ni ngar manged sponser ko reb e group nu bang. (Mu guy fare babyor ni Organized, pp. 106-107.) Fare piilal ara ministerial servant ni be yog e thin e ir fare “group overseer” ara “group servant” mab mil fan ngak ni nge ayuweg fare group.
11. Mang fan nib tow’ath ni ngan ayuweg e girdi’ nu bang u lan e binaw rodad?
11 Ngan ayuweg e girdi’ nu bang u lan e binaw rodad e aram bang ko maruwel rodad ko machib ni ke tay Jesus Kristus. Ngad rin’ed e re n’ey u fithik’ e pasig ma ngad guyed ko uw rogon ni be rurug Jehovah e pi nam me yibnag ngak e piin ni baadag. (Hag. 2:7) Rib fel’ ni ngad ayuweged e re maruwel ney! Ra flaabnag Jehovah e athamgil ni gad ma tay ni ngad ayuweg e girdi’ nu bang u lan e binaw ma dabda paged talin ni demtrug e magawon nra yib ni ngan ayuweg e girdi’ nu bang ma rayog ni nge pi’ gelngin nge ga’!—1 Kor. 3:6-9.