Ngad Mon’oggad ko Machib—Ngan Machibnag Be’ nib Thil e Thin Rok

Fan nib Ga’ Fan: Baadag Jehovah ni nge nang e girdi’ ni gubin e tin riyul’ ndemtrug ko be’ ko kun “nam.” (Acts 10:34, 35) Aram fan ni yog Jesus ni yira machibnag fare thin nib fel’ u “gubin yang u fayleng”, ya nge “urngin e girdi’” me nang. (Matt. 24:14) I yiiynag Zekariah ni profet ni girdi’ ni yad ma non u “urngin mit e thin” e yad ra motoyil. (Zek. 8:23, NW) Rogon e yiiy rok apostal John e yog ni piin ni yad ra magey ni yad ba fos u tomuren fare gafgow nib ga’ e ba muun ngay e girdi’ u “gubin e nam, nge ganong, nge gubin mit e girdi’, ngu gubin e thin.” (Rev. 7:9, 13, 14) Ere, bochan e re n’ey, ma thingar da athamgilgad ni ngad machibnaged e girdi’ nib thil e thin rorad.

Rogon ni Ngan Rin’:

Ngam fal’eg rogom. U m’on ni ngam man ko machib mag tay fare ke babyor ni kenggin e Good News for People of All Nations (Fare Thin nib Fel’ ni Fan Ngak Gubin e Girdi’ u Ga’ngin Yang u Fayleng) nga lan e kabang rom. Mag fal’eg i beeg fare thin ni bay u m’on ko re ke babyor nem ni kenggin e “How to Help Those Who Speak Another Language.” U m’on ni ngam man ko machib mag lemnag ko girdi’ ko kun nam e ga ra mada’nagrad ya nge yag ni ngam downloadnag e video ara pi babyor rodad ko thin rorad ni bay ko fare web site ni jw.org ko ipad ara cell phone rom. Mu lemnag rogon ni ngam fanay fare JW Language app ya nge yag nim fil boch e thin ni ir e nga mog u nap’an ni kam mada’gow be’. Faanra taabang i ban’en e ma machib e pi ulung riy nib thilthil e thin rorad, ma nap’an ni yira yan ko machib u mit e tabinaw ma kemus ni yigoo babyor nib puluw e thin riy ko thin ni yima yog ko birom e ulung e ir e ngam fek. Machane, faanra yibe machib u fithik’ e girdi’ ni yoor nib thilthil e thin rorad, mab fel’ ni ngan fek e babyor nib puluw ko pi thin nem.
Nap’an ni ga ra mada’nag be’ nib thil e thin rok, mab fel’ ni ngam athamgil u rogon nrayog rom ni ngam weliy ngak e thin rok Got nge ‘pi n’en nib sorok ni ke ngongliy’ ko thin rok. (Acts 2:11) Mog ngak nrayog ni nge yan ko jw.org ni ngki guy yugu boch ban’en riy ni bay ko thin rok. Ma faanra ga be guy ni baadag e machib mag yoloy bang fare babyor ni kenggin e Please Follow Up (S-43) ngam pi’ ko fare secretary ko ulung rom. Mu ulul ni ngam sul ngak facha’ nge mada’ ko ngiyal’ ni ke yan reb e walag ni taareb e thin rorow i guy.

Mu Gay Rogon ni Ngam Rin’ e Re N’ey u Lan e Re Pul Ney:

Yay ni migid ni gimed ra tay chon e tabinaw rom e Fol Bible ni Tabinaw, me reb i girdien fare tabinaw e nge yan u yaan be’ ni be machibnag be’ nib thil e thin rok.