Uw Rogon Ni Ngad Daged E Tayfan Ngak Jehovah?

“N’en ni ma rin’ [Jehovah] e bay rogon ni ngan tayfan mab manigil.”​—PS. 111:3.

1, 2. Mang boch e deer ni yira weliy ko re article ney?

BE DAG e Bible ni Jehovah e bay rogon ni ngan tayfan ni be gaar: “Rogon fanam pilung nge fanam flaab e ke mang madam.” (Ps. 104:1) Thin rok apostal Paul e be dag ni girdi’ e ku rayog ni ngaur ngongolgad nrayog ni ngan tayfan. Ma rogon yaan e piin ni ppin ni Kristiano e gaar: “Ma ku er rogon e piin ni ppin ni gub adag ni ngar gonopiyed rogon e mad rorad nge yan i par nib fel’ rogon, mi yad yin’ e mad nrogon yalen e munmad ko ppin; ma gathi ngar ngongliyed piyan lolugrad ni nge thum’ nga wuru’, ara tiyed e nunuw ni gol ara nunuw nni ngongliy ko churuwo’ nu l’ugun e yar ara mad nib tolang puluwon.” (1 Tim. 2:9) Machane, ra ngan tay fan feni “gilbuguwan” Jehovah maku boor ban’en nib t’uf gathi ke mus ni yaay nrayog i tay fan.​—Ps. 111:3, NW.

² Dariy be’ nga bayang nib ga’ fan ni ngan pining e sorok ngak min tayfan, ya kemus ni yigoo Jehovah. Ere, gadad e pi tapigpig rok ni kad ognaged gadad ngak e gubin ngiyal’ ma susun ni ngad nonad ma gad ngongol u reb e kanawo’ ni yira tayfan Got riy. Mang fan nrayog ni nge dag e girdi’ e tayfan? Uw rogon ni ke m’ug rogon feni sorok nge feni gamog Jehovah? Uw rogon nra rin’ ban’en e tayfan rok Got ngodad? Mang e rayog nda filed rok Jesus u rogon ni dag ere fel’ngin ney? Nge uw rogon ni ngad daged e tayfan rok Got?

Fan ni Rayog ni Ngad Ngongolgad u Fithik’ e Tayfan

3, 4. (a) Susun ni nge uw rogon u wan’dad e tayfan ni yibe tay ngodad? (b) Rogon e thin ko profet e mini’ e be yip’ fan fapi thin ko Psalm 8:5-9? (Mu guy e footnote.) (c) Mini’ e tay Jehovah fan kakrom?

³ Girdi’ e rayog ni ngar ngongolgad u fithik’ e tayfan ni bochan e ni ngongliyrad u yaan Got. I tay Jehovah fan e bin nsom’on e pumoon ni bochan e tay ni ir e nge ayuweg e fayleng. (Gen. 1:26, 27) Mus ko ngiyal’ ndaki flont e girdi’, miki tay Jehovah nib milfan e fayleng ngorad. Ere, ka ma ‘teeliyawnag’ Got e girdi’ ko tayfan. (Mu beeg e Psalm 8:5-9.)a Tayfan ni kan pi’ ngodad e ku be dag nib t’uf ni ngkud daged e tayfan​—ni aram e ngad pininged e sorok nga fithingan Jehovah nib tolang.

⁴ Ba gel e tayfan ni be tay Jehovah ngak e piin ni yad be pigpig ngak. I tay Jehovah fan Abel u nap’an ni m’agan’ ko maligach ni pi’ ngak, me siyeg e maligach rok Kain ni walagen. (Gen. 4:4, 5) Nog ngak Moses ni nge ‘pi’ boch e tayfan’ ni yibe tay ngak ngak Joshua, ni aram e en ni fek e maruwel rok Moses nge pow’iy piyu Israel. (Num. 27:20) Be weliy e Bible murung’agen Solomon ni fak David ni gaar: “Me tay Somol fare nam ni ga’ngin ni kar ngatgad ngak Solomon, me gilnag buguwan Solomon ndariy reb e pilung ni ke gagiyeg u Israel nra taareb rogon ngak.” (1 Kron. 29:25) Ku ra tay Jehovah fan e piin ni kan dugliyrad ni kar fosgad ko yam’ ma kar pired ni yad ba yul’yul’ yad be weliy murung’agen ‘feni sorok ko tin ni ke rin’ nge gagiyeg ni be tay.’ (Ps. 145:11-13) Bochan ni kar pininged e sorok ngak Jehovah, ma fapi “yugu boch e saf” rok Jesus e ku bay e maruwel rorad ni ku yibe ta’ farad riy.​—John 10:16.

Ke Gagiyel Feni Sorok nge Feni Gamog Jehovah

5. Uw feni gel ni ngan tayfan Jehovah?

⁵ I yin’ fare psalmist reb e tang ni be taareb rogonnag feni tolang Got ngak e girdi’ ni gaar: “A Somol, ni gur e Somol romad, rogon feni sorom e ka ni guy u gubin yang u fayleng! Rogon feni gilbuguwan e ke yan ke pag e yu thal i tharmiy nga lang.” (Ps. 8:1) U m’on nni sunmiy e “fayleng nge urngin ban’en ni bay u lan e lang” ma Jehovah e En ni bay nri bay fan ni ngan tayfan u ga’ngin e palpalth’ib.​—Gen. 1:1; 1 Kor. 15:24-28; Rev. 21:1-5.

6. Mang fan ni yog fare psalmist ni madan Jehovah e tayfan?

⁶ Ri fel’ laniyan’ fare psalmist ni bay madgun Got rok u nap’an ni guy lan e lang, ni be galgal ni bod e ‘malang nib tolang puluwon’! Kari gin fare psalmist nga rogon ni ke ‘filath Got lan e lang ni gowa ba tent,’ ere weliy rarogon Jehovah ni ke mang tayfan madan ni bochan e salap Rok i sunmiy ban’en. (Mu beeg e Psalm 104:1, 2.) Rogon feni sorok nge feni gamog e en Tasunmiy ndabiyog i guy e be m’ug ko tin ni ke ngongliy.

7, 8. Mang mich u feni gel gelngin Jehovah e gad be guy ko pi n’en ni bay u lan e lang?

⁷ Am lemnag fare Milky Way galaxy. Fayleng ni gad ma par riy e rayog ni ngan taarebrogonnag nga taab yan’ ni bay u dape’ l’ay u fithik’ e pi t’uf nge yal’. Arrogon, re palpalth’ib ney ni ga’ngin e ba pag 100 e bilyon e t’uf ni bay riy! Faanra rayog nim theeg taareb e t’uf u lan taareb e second ndab mu tal, ma ra pag 3,000 e duw mfini yog nim taw ko 100 e bilyon.

⁸ Faanra 100 e bilyon e t’uf u Milky way galaxy, ma uw rogon e gin ni ka bay ko palpalth’ib? Pi lallowan’ ni yad ma fil murung’agen lan e lang e kar susunnaged ni bay riy sogonap’an 50 i yan ko 125 e bilyon e galaxy. Uw urngin e t’uf u ga’ngin e palpalth’ib? Dabiyog ni ngad theeged, yab pag urngin. Machane, Jehovah e “be theeg urngin e pi t’uf; ma yad gubin ni manang fithingrad nreb nge reb.” (Ps. 147:4, NW) Gathi kam adag ni ngam pining e sorok nga fithingan Jehovah, u nap’an ni kam nang ni tayfan nge gamog e ke mang madan?

9, 10. Uw rogon ni ma m’ug e gonop ko En ni Sunmiydad ko flowa ni yima ngongliy?

⁹ Chiney e ngad lemnaged murung’agen ban’en ni goo yimanang ni bod e flowa. Gathi kemus ni Jehovah e “ir e Sunmiy lan e lang nge fayleng,” ya ku “ir e En ni be pi’ e flowa ko piin ni kar m’ad ko bilig.” (Ps. 146:6, 7, NW) Fel’ngin Got ni ‘tayfan nge gamog’ e be m’ug ko maruwel rok, nib muun ngay e woldug ni ke pi’ ni yima ngongliy e flowa riy. (Mu beeg e Psalm 111:1-5.)b I fil Jesus ngak pi gachalpen ni ngar meybilgad ni nge lungurad: “Mpi’ ngomad e daba’ e flowa romad ni fan ko daba’.” (Matt. 6:11, NW) Flowa e ba ggan ni ma kay e girdi’ kakrom, nib muun piyu Israel ngay. Yugu aram rogon ni flowa e yima lemnag nib ggan nib mom, ma pi n’en ni bay u fithik’ ni kan athukuy nga taabang kan ngongliy e flowa riy nrib fel’ lamen e de mom.

¹⁰ Nap’an ni yibe yoloy e Bible, ma ma fanay piyu Israel e merikengko nge ran ni ngan ngongliy e flowa riy. Yima tay e is ara yugu boch ban’en ni nge thownag e flowa ko flowa ni yima ngongliy e ngiyal’ nem. Pi n’ey ni yima athukuy nga taabang e ra reb ma bay rogon nga reb. Machane rogon ni ma maruwel e pi n’ey u taabang e dawor nnang fan nib fel’ rogon. Maku, rogon ni yima bilig e flowa u fithik’ i dowdad e ku ban’en ni yira ngat ngay. Arfan ni tangnag fare psalmist ni gaar: “Somol, ri pire’ ban’en ni kam sunumeg! Ri gab gonop nga rogon ni mu sunumeg ni gubin”! (Ps. 104:24) Me gur, ku arrogon ni ke yib nga lanin’um ni ngam pining e sorok ngak Jehovah, fa?

Mang e Ke Rin’ e Tay Fan nge Gamogen Got Ngom?

11, 12. Gad ra fal’eg i lemnag e tin ke ngongliy Jehovah nrib fel’ ma mange ra rin’ ngodad?

¹¹ Gathi ngarda manged e girdi’ ni ma fil murung’agen lan e lang nge pi n’en ni bay riy ma gad ngat nga lan e lang ni nep’ ara chemist fin gad adag e flowa. Machane, faanra ngan felfelan’ nga feni gamog e En Tasunmiy, mab t’uf ni ngad ted e tayim ni ngad fal’eged i lemnag e pi n’en ni sunmiy. Mang e rayog ni nge rin’ ere n’ey ngodad? Taareb rogon angin ko ngad fal’eged i lemnag e maruwel rok Got u yugu reb e kanawo’.

¹² I tangnag David murung’agen e pi ngongol nib fel’ ni dag Jehovah ngak e girdi’ Rok ni gaar: “Girdi’ e bay ur weliyed murung’agen e flaab rom nge rogon feni sorom, ma bay ug lemnag e pi n’en nrib fel’ ni kam ngongliy.” (Ps. 145:5) Gad ma dag ni gad be lemnag e pi n’ey u daken e fol Bible ma gad tay e tayim ni ngad fal’eged i lemnag e n’en ni kad beeged. Mang angin ere n’ey? Angin nra yib era gel rogon ni gad be tayfan ma gad be lemnag feni gamog Jehovah. Ere, rib mudugil, nra k’aringdad ere n’ey ni ngad uned ngak David ngad pininged e sorok ngak Jehovah ni ngad gaargad: “Bay ug weliy rogon feni sorom ngan nang.” (Ps. 145:6) Gad ra fal’eg i lemnag e pi maruwel rok Got nrib fel’ ma ra gelnag e tha’ u thildad Jehovah me k’aringdad ni ngad weliyed murung’agen ngak boch e girdi’ u fithik’ e pasig nge lem nib mudugil. Ga be machibnag fare thin nib fel’ u fithik’ e pasig ma ga be ayuweg e girdi’ ni nge fel’ u wan’rad feni sorok, nge feni gamog Jehovah Got, fa?

I Dag Jesus Feni Sorok Jehovah nib Fel’ Rogon

13. (a) Rogon ni bay ko Daniel 7:13, 14, mang e ke pi’ Jehovah ngak Fak? (b) Uw rogon e ngongol rok Jesus ni Pilung ngak e girdi’?

¹³ Jesus Kristus ni Fak Got e machibnag fare thin nib fel’ u fithik’ e pasig me pining e sorok ngak e Chitamangin. Ke pi’ Jehovah mat’awun Fak ni kari maagirag rok ko gagiyeg ni nge tay min tayfan ni aram e pi’ ‘gil’ilungun ni nge gagiyegnag.’ (Mu beeg e Daniel 7:13, 14.) Machane, de tolangan’ Jesus. Ir reb e Pilung nrib ta runguyey ma manang e tin ndabiyog rok e piin ni be gagiyegnagrad ma ma ngongol ngorad u fithik’ e tayfan. Mu lemnag reb i rogon ni ma ngongol Jesus ni ir e kan Dugliy ni Nge Mang Pilung ngak e piin ni ma mada’nag, nib ga’ ni piin dariy be’ ni baadag dakenrad ma dariy be’ ni ma t’ufegrad.

14. Uw rogon u wan’ piyu Israel e piin nib daraw?

¹⁴ Girdi’ ni bay e daraw rorad kakrom e baga’ ni yad ma yim’ nib sagaal e yam’ ni yad ma tay. Re miti m’ar nem e ma garer u dow e en ni keb ngak ni buchuuw ma buchuuw. Yima sap ngay nrib mo’maw’ ni ngan golnag e girdi’ nib daraw, ya taarebrogon ko ngan faseg be’ ko yam’. (Num. 12:12; 2 Ki. 5:7, 14) Piin nib daraw e yima sap ngorad ni yad ba alit ma yima fanenikayrad ma yima chuwegrad u fithik’ e girdi’. Ra ka ranod ko gin ni bay e girdi’ riy ma yad ma tolul ni lungurad: “Taay, taay!” (Lev. 13:43-46) Be’ nib daraw e taareb rogon ngak be’ ni kem’. Rogon ni bay ko chep rok piyu Jew, e piin nib daraw e sogonap’an nel’ e fit palogin nrayog ni ngar chugurgad riy ngak be’. Ma nap’an ni yira guy be’ nib daraw, ni yugu aram rogon ni kab palog, me pag reb e tayugang’ ko teliw e malang ngak ni bochan e dabi chugur i yan ko gin ni bay riy.

15. Uw rogon e ngongol rok Jesus ngak be’ nib moon nib daraw?

¹⁵ Machane, mu tay fanam i yan ko n’en ni rin’ Jesus u nap’an ni yib be’ nib daraw ngak me wenig ngak ni nge golnag. (Mu beeg e Mark 1:40-42.) De tuluf Jesus faanem nib daraw, ya dag e ngongol ngak u fithik’ e runguy nge tayfan. N’en ni ke guy Jesus e be’ ni ke gafgow nib t’uf e ayuw rok. Runguy rok Jesus e k’aring ni nge rin’ ban’en. Ere, k’iyag pa’ nge math ngak fare moon nib daraw me golnag e m’ar rok.

16. Mange kam fil u rogon ni ma ngongol Jesus ngak boch e girdi’?

¹⁶ Gad e piin ni gadad be lek Jesus e uw rogon nrayog ni ngad folwokgad rok Jesus u rogon ni i dag e tayfan rok e Chitamangin? Reb e kanawo’ e ngad nanged ni gubin e girdi’​—ndemtrug tolangirad, ara rarogon fithik’ i dowrad, ara yangarrad—​ma bay rogon ni ngan tayfarad. (1 Pet. 2:17) Pi figirngiy, nge gallabthir, nge piin piilal ni Kristiano e ba t’uf ni ngar ted fan e piin ni yad be ayuweg mu kur ayuweged yad nge yog ni nguur tedfarad. Be yog e Bible nthingari rin’ e piin Kristiano ere n’ey ni gaar: “Nge bigimed me t’uf bigimed rok nrogon e walag ni girdien Kristus, ma nge pasigan’med ngay ni nge bigimed mi i ta’ fan bigimed.”​—Rom. 12:10.

Ngad Daged e Tay Fan ko Liyor Rodad

17. Mange rayog nda filed ko pi thin nu Bible u murung’agen rogon ni ngan dag e tayfan u nap’an ni yibe pigpig ngak Jehovah?

¹⁷ Thingar da daged e tayfan ko pigpig rodad ngak Jehovah. Eklesiastes 5:1 (NW) e be gaar: “Mu ayuw u nap’an ni ga ra yan nga naun rok Got.” Mus ngak Moses nge Joshua mi nog ngorow ni ngar chuwegew e sus rorow u nap’an ni yow ra yan nga bayang nib thothup. (Ex. 3:5; Josh. 5:15) Thingar rin’ew ere n’ey ya ngar dagew e tayfan. Pi prist nu Israel e kan motochiyelnag ngorad ni ngar chuwgad ko tan e mad nib n’un’uw ‘ni nge upunguy dowrad.’ (Ex. 28:42, 43) Re n’ey e ra ayuwegrad ndabi m’ug bang u dowrad nib kireb ni nge m’ug u nap’an ni yad be pigpig u altar. Gubin chon e tabinaw rok reb e prist ma thingar ra pired ni yad be dag e tayfan nib m’agan’ Jehovah ngay.

18. Uw rogon ni ma m’ug e tayfan ko pigpig ni gad ma tay ngak Jehovah?

¹⁸ Pigpig ni gad ma tay e ba muun e tayfan ngay. Ra ngan tayfadad ma thingar da ngongolgad u fithik’ e tayfan. Tayfan ni ngad daged e gathi yugu ban’en ni gad be dake gad be rin’ ara bochan e ngaun guydad riy. Susun ni nge gel nga rogon e tin nrayog ni nge guy e girdi’ nge ni taw ko gin nrayog ni nge guy Got riy ni aram e fithik’ i lanin’dad. (1 Sam. 16:7; Prov. 21:2) Tayfan e thingari mang bang u dowdad miki yib angin ko ngongol rodad, nge rogon e tha’ u thildad boch e girdi’, ni ki mada’ nga rogon ni gad ma guy ma gad ma lemnag rarogodad. Arrogon, tayfan e gubin ngiyal’ nthingari m’ug ko tin ni gad ma yog nge tin ni gad ma rin’. Ma nap’an nra yib ko ngongol rodad, nge rogon e munmad ni gad ma tay ma gad ma fol ko thin rok apostal Paul ni gaar: “Dabumad ni nge pirieg be’ ban’en nib kireb ko maruwel romad, ere gamad be guy rogon ndab gu ninged e kanawo’ rok be’. Machane urngin ban’en ni gamad be rin’ e gamad be dag riy ni gamad bogi tapigpig rok Got.” (2 Kor. 6:3, 4) Gad ma ‘girngiy e fel’ ko machib ni murung’agen Got ni ir e ma thapegdad ngak.’​—Titus 2:10.

Mu Ulul i Dag e Tayfan

19, 20. (a) Mange bin nib fel’ e kanawo’ ni ngad tedfan boch e girdi’ riy? (b) Mange thingar da dugliyed u wan’dad u rogon e tayfan?

¹⁹ Rayog ni ngad guyed e tayfan ko pi Kristiano ni kan dugliyrad ni yad e piin ni “pa’ Kristus.” (2 Kor. 5:20) Fapi “yugu boch e saf” ni yad ma fol rorad, e yibe tay farad u tan Gil’ilungun fare Messiah. Be’ ni ke yan ni pa’ ara owchen boch e girdi’ e der rus ni nge non maku ma non u fithik’ e tayfan ni pa’ e am rok. Ere, susuna ngad nonad u fithik’ e tayfan ndab da rusgad ni gadad pa’ e am rok Got, ni aram fare Gil’ilungun. (Efe. 6:19, 20) Gathi gad be dag e tayfan u nap’an ni gad ra “fek e thin nib fel’,” i yan ngak e girdi’?​—Isa. 52:7.

²⁰ Susuna ngad dugliyed ni ngad n’ufed Got ni aram e ngad ngongolgad u rogon nib puluw nga rogon feni sorok. (1 Pet. 2:12) Gubin ngiyal’ ni nguud daged e tayfan ngak, nge liyor ni gad be tay ngak, nge piin ni gad nga mich. Ma manga yigi fel’ u wan’ Jehovah ni madan e tay fan nge gamog e liyor ni gad be tay ngak ni gad be tayfan.

[Footnotes]

Uw Rogon ni Ga Ra Fulweg?

• Yira adag feni gel gelngin Jehovah ma mang e ra rin’ ngodad?

• Mange gad ra fil u murung’agen e tayfan u rogon e n’en ni rin’ Jesus ngak be’ nib daraw?

• Uw rogon ni ngad ted fan Jehovah?

[Picture on page 16]

Uw rogon ni tay Jehovah fan Abel?

[Picture on page 18]

Maruwel rok Got nrib fel’ e ba gagiyel u rogon ni yima ngongliy e flowa

[Picture on page 19]

Mang e kam fil u murung’agen e tayfan u rogon ni i ngongol Jesus ngak be’ nib daraw?

[Picture on page 20]

Pigpig u fithik’ e tayfan e ba muun ngay ni ngan pining e sorok ngak Jehovah