Mini’ e Rayog ni Nge Nang e Tin ni Bay Yib?

“Mu nanged ni ke mus ni gag e Got . . . , Gog ko tabolngin e tin ni bay ko tungun; kab kakrom mu gog e tin ni bay yib.”​—Isaiah 46:9, 10.

NGIYAL’ ney ni be thilthil i yan boch ban’en, ma piin ni yad ma fil murung’agen e am, salpiy, nge girdi’ e yad be fal’eg i guy chepin e girdi’ nge pi n’en ni yibe rin’ e ngiyal’ ney nge yog ni ngar weliyed e tin bay yib nga m’on. Boch e girdi’ nri yad baadag ni ngar nanged ko mang e bayi buch rorad ma be mo’maw’ ni ngar nanged, e yad be yan ko sothuw. Girdi’ ni ma rin’ ni aram rogon e ba ga’ ni der ma yib angin. Gur ri dabiyog ni ngan nang ko mang e ra buch ko re fayleng ney nge tabinaw rodad nge gadad ni be’ nge be’? Riyul’ ni bay be’ nrayog ni nge guy e tin bay yib, fa?

Thin rok Jehovah ngak Isaiah ni profet i er nga lang e be dag gelngin ni ma weliy ban’en ndawori taw. U daken Isaiah me yiiynag Got nra chuw piyu Israel kakrom u Babylon ngar sulod ko binaw rorad ngar sulweged yu Jerusalem nge fare tempel nga rogon. Uw feni riyul’ e re yiiy ney? Sogonap’an 200 e duw u m’on riy me yog Isaiah fithingan be’ ni ra gothey yu Babylon ni Cyrus. Ma ki weliy Isaiah e n’en ni bayi rin’ Cyrus​—ni aram bayi thilyeg kanawoen e ran ko fare Lul’ ni Eufrates, ni ir be ayuweg fare mach. Miki yog ni ra pirieg Cyrus l’agruw e mab ni ba ga’ ni dan ning, arfan nib mom ni gel Cyrus ko re mahl nem.​—Isaiah 44:24–45:7.

Yira taareb rogonnag e girdi’ ngak Got, ma dariy gelngin e girdi’ ni nge nang e tin bay yib. Yoloy Solomon ni Pilung ni gaar: “Ya da mu nang e n’en ni bay yib u thilin e chiney nge gabul.” (Proverbs 27:1) Kab riyul’ e re thin nem. Dariy be’ ni manang e n’en ni bay yib ni ki mada’ ko yafas rok. Mang fan nib thil Got ko girdi’? Ri manang Got urngin ban’en ni i sunmiy, nib muun ngay rarogon nge tin baadag e girdi’. Ra baadag Got ni nge guy, ma rayog ni guy ko mang e ra rin’ e girdi’ ni be nge be’ ara nam ni polo’. Maku, bay gelngin ni nge gagiyegnag e n’en nra buch. Nap’an nra yiiynag ban’en u daken e profet rok, maku ir e Cha’ nra gagiyegnag e tin ni ke lemnag nge tin ni ke “yiiynag u l’ugun e tapigpig rok nge yib i m’ug nib riyul’.” (Isaiah 44:26) Kemus ni Jehovah Got e bay rogon ni nge yog e thin ni aram rogon.

Immoy Isaiah ni ke pag 700 e duw u m’on ni dawori yib Jesus ni fare Messiah. Machane, i yiiynag murung’agen e wub rok. Yugu aram rogon ma ka nap’an e bin 18 e chibog, ma girdi’ ni ma thibthibnag e Bible e u rogned ni de riyul’ fare babyor rok Isaiah. Ka rogned ni thin rok Isaiah e gathi yiiy ya ni yoloy u tomren ni ke buch e pi n’em. Riyul’ ni aram rogon fa? Nap’an e duw ni 1947 min pirieg e babyor rok Isaiah, nge boch e babyor ni kan bachiy ni ke kakrom u lan reb e yiy nib chuchugur ko fare Dead Sea. Me mudugil laniyan’ e pi girdi’ nib llowan’ ney nre babyor n’ey e ni yoloy ni ke pag raay e duw u m’on ni gargeleg fare Messiah ara Kristus ni kan yiiynag. Arrogon, fare Bible e be yog e tin bay yib!

Isaiah nge boch e girdi’ ni kar yoloyed e Bible e dabiyog ni nga rogned e tin bay yib ni kemus ni tamilangan’ rorad e ngar fanayed. Ya “fare kan ni thothup rok Got e yib i ying ngak e girdi’ ngar weliyed e thin ni ke yib rok Got ngorad.” (2 Peter 1:21) Tin migid e thin e gad ra weliy riy boch ban’en ni murung’agen e yafas rok Jesus ni kan yiiynag u daken Isaiah. Ma gad lemnag e pi n’en ni yog Jesus nge pi apostal rok nra buch ko ngiyal’ ney i yan ko gabul nge langlath.