Thin rok Jehovah e Ba Fas

Tin Ba Ga’ Fan ko Babyor rok John nge Jude

BA DAKE ni yoloy u Efesus ko duw ni 98 C.E., fa dalip yang i babyor rok apostal John e bay u fithik’ e yu ken ni tomur e babyor ko Bible. Gali yang ni som’on e babyor rok e be pi’ e athamgil nga laniyan’ e Kristiano ni ngaur pired ko tin riyul’ mar togopuluwgad ko piin ni kar digeyed e tin riyul’ ma yad be togopuluw ngay. Ma gin dalip e gathi kemus ni be yog John riy ni ngan par ko tin riyul’ ya ku be pi’ e athamgil nga laniyan’ e Kristiano ni ngaur ayuweged yad.

I yoloy Jude ni walagen Jesus reb e babyor u nap’an ni immoy u Palistine, ni sana nap’an e duw ni 65 C.E. Re babyor nem e be ginang e piin ni Kristiano u murung’agen e piin ni kireb ni kar maathukgad ko ulung. Miki fonownag rogon ni ngan togopuluw ko ngongol ni kireb. Yira fal’eg i tiyan’uy ko thin ko fa dalip i yang i babyor rok John nge girok Jude ma ra ayuwegdad ngad pired nib gel e michan’ rodad ndemtrug rogon e magawon nra yib ngodad.​—Heb. 4:12.

UM PAR U FITHIK’ E TIN RIYUL’ NGE T’UFEG NGE MICHAN’

(1 John 1:1–5:21)

Gin som’on e babyor rok John e fan ngak urngin e Kristiano. I pi’ e fonow nib fel’ ni fan e nge ayuweg e Kristiano nge yog nra togopuluwgad ngak e piin ni ka ra digeyed e tin riyul’ ma yad be togopuluw ngay. Ma ngaur pired ni yad ba mudugil ko tin riyul’ nge tin nib mat’aw. Ma be yog feni ba ga’ fan ni nguun par u fithik’ e tin riyul’ nge t’ufeg nge michan’.

I yoloy John ni gaar, “faanra ud pired u fithik’ e tamilang-ni bod ir [Got] ni ba’ u fithik’ e tamilang ma aram e kad taab girdi’gad ni ke taareban’dad.” Bochan ni Got e ma yib e t’ufeg rok ma aram me gaar fare apostal “nge bagadad me t’uf rok bagadad,” ko ngiyal’ ni “t’ufeg rok Got” e ra k’aringdad “ngad folgad ko tin ni ke yog” ma gad gel ko fayleng u daken e “michan’ rodad” ngak Jehovah Got nge Thin rok, ngak Fak.​—1 John 1:7; 4:7; 5:3, 4.

Fulweg u Boch e Deer ko Bible:

2:2; 4:10, NW​—Uw rogon me mang Jesus “ba maligach ni nge taleg e damumuw”? Ngan taleg e damumuw e be yip’ fan ni ngan “fal’eg laniyan’ be’.” I pi’ Jesus e yafas rok ni maligach ni fan ni nge taleg e damumuw ni aram e ra rin’ ni aram rogon, ma ke rin’ e tin nib yal’uw. U daken e re maligach nem me yog ni runguy me n’ag Got fan e denen rok e piin ni ke michan’rad ngak Jesus.​—John 3:16; Rom. 6:23.

2:7, 8​—Mang motochiyel e be weliy John ni ke “kakrom” ma kub “beech”? Be weliy John murung’agen fare motochiyel ni rogon e t’ufeg ko Kristiano. (John 13:34) I yog ni ke “kakrom” ni bochan e ke pi’ Jesus ni ke pag e 60 e duw mfini yoloy John e gin nsom’on e babyor nthagthagnag ngak. Ere, piin nib michan’rad e ki immoy rorad “aram ko som’on” ko yafas rorad ni yad e Kristiano. Ma re motochiyel nem e kub “beech” ni bochan e ke yan ke pag nga rogon ‘nib t’uf be’ ni gimew rom ni bod gur’ ya kub t’uf riy fare t’ufeg ko Kristiano.​—Lev. 19:18; John 15:12, 13.

3:2​—Mang e n’en “ndawori tamilang” ngak e Kristiano ni kan dugliyrad, ma mini’ e bay ra guyed “nrogon”? N’en ndawori tamilangan’rad riy e n’en ni bay ra boded u nap’an ni kan fasegrad ko yam’ ka ranod nga tharmiy ni kar boded dow e kan. (Fil. 3:20, 21) Machane, n’en ni yad manang e nap’an “nra yib i m’ug [Got] ma [yad] ra bod ir, ya bay [ra] guyed ir nrogon,” nib “Kan.”​—2 Kor. 3:17, 18.

5:5-8​—Uw rogon ni ke micheg e ran nge racha’ nge fare gelngin Got nib thothup nriyul’ ni “Jesus e ir Fak Got”? Ran e ri be micheg ni bochan e nap’an nni taufenag Jesus u fithik’ e ran me Jehovah e ir rok e yog ni ir Fak ni kari felan’ ngak. (Matt. 3:17) Ma rachaen Jesus ara yafas rok e kan pi’ “ni ir e pi’ nge biyuliy urngin e girdi’,” miki dag ni Kristus e Fak Got. (1 Tim. 2:5, 6) Ma fare gelngin Got nib thothup e ki micheg ni Jesus e ir Fak Got ko ngiyal’ ni yib nga daken u nap’an e taufe rok nge pi’ gelngin “me yan nga gubin yang, ni be rin’ e tin nib fel’ ma be golnag urngin e piin ni yad ba’ u tan gelngin e moonyan’.”​—John 1:29-34; Acts 10:38.

Tin Gad Ra Fil Riy:

2:9-11; 3:15. Faanra pag reb e Kristiano ban’en ara be’ nge warnag e t’ufeg rok ngak pi walagen, ma ra bod be’ ni be yan u fithik’ e lumor nder nang e gin ni be yan ngay.

NGAN “YUL’YUL’ KO TIN NIB RIYUL’”

(2 John 1-13)

I tabab John ko gin l’agruw yang e babyor rok ni gaar: “Yib rok e en nib ilal-Nge yan ngak fare pin nge pi fak.” I yog e ‘felfelan’ rok ni ke pirieg boch i pi fak [fare pin] ni yad ba yul’yul’ ko tin nib riyul’.’​—2 John 1, 4.

Tomren ni ke pi’ e athamgil nga lanin’uy ni ngan maruweliy e t’ufeg, me yoloy John ni gaar: “Fan e re bugithin ney ni gu be yog ni nge t’uf be’ rok be’ e aram e thingar da pired ni gadad be fol ko tin ni ke yog Got ngodad ni ngad rin’ed.” Miki ginangey John u murung’agen ‘be’ ni be bannag e girdi’ ni aram e Toogor rok Kristus.’​—2 John 5-7.

Fulweg u Boch e Deer ko Bible:

1, 13​—I mini’ “fare pin”? Rayog ni be yog John be’ nib pin ni yima yog Kyria ngak, ni bbugithin ni Greek ni fan e “ppin.” Ara be fanay e re bugithin nem ni fan nga ba ulung ni nge non ngay ma nge dabi nang e piin ni yad be gafgownagrad. Faanra be fanay e re bugithin nem ni be yip’ fan ba ulung me ere pi fak fare pin e aram e gothon e re ulung nem ma “pi fak e en ni [walagen] nib pin” e rayog ni be yip’ fan gothon yugu reb e ulung.

7​—Mang “wub” rok Jesus e be yog John u roy, ma uw rogon ni piin ni be bannag e girdi’ e ‘darir weliyed’ murung’agen? Fare “wub” rok e gathi wub rok ni bay yib ndabiyog ni ngan guy. Re n’em e wub rok ni bay downgin ni yira guy min dugliy ni ir Kristus. (1 John 4:2) Piin ma bannag e girdi’ e dar weliyed e wub rok ni bay yib ni bay downgin. Sana yad be yog nde riyul’ ni immoy Jesus ara ka rogned nde riyul’ ni kan dugliy ko fare gelngin Got nib thothup.

Tin Gad Ra Fil Riy:

2, 4. Nap’an da nanged e n’en nib “riyul’” ma ga’ngin e machib ko Kristiano ni ke mang bang ko Bible e gad ra fol riy ma rib ga’ fan nga rogon ma gad thap ngak Got.​—3 John 3, 4.

8-11. Faanra dubdad ni nge mul u pa’dad fare n’en ni “Chitamangiy nge Somol Jesus Kristus ni Fak e en ni Chitamangiy e nguur ayuwegew gadad, ma yow be runguydad, ma yow be pi’ e gapas nga lanin’dad, nguud pired riy u fithik’ e yul’yul’ nge t’ufeg” ma ku arrogon e t’ufeg ko ulung ko piin walagdad, ma thingar da “ayuwgad” ni fan ngodad ko tirok Got ma gad digey e piin “nder par nib yul’yul’ ko tin ni yib i fil Kristus ngodad.”​—2 John 3.

NGAN UN ‘KO MARUWEL NI FAN KO TIN RIYUL’’

(3 John 1-14)

Gin dalip yang e babyor rok John e yan ngak Gaius ni fager rok. I gaar: “Dariy ban’en nrib gel e felfelan’ nra pi’ ngog ko bin ni nggu rung’ag murung’agen pi fakag ni yad be fol ko tin riyul’.”​—3 John 4.

Yog John ngak Gaius nrib fel’ e maruwel rok ni gaar: “Gadad e piin ni girdien Kristus e thingar da ayuweged e pi girdi’ nem, ni aram e kad uned ko maruwel ni yad be ngongliy ni fan ko tin riyul’.”​—3 John 5-8.

Fulweg u Boch e Deer ko Bible:

11​—Mang fan ni ma un boch e girdi’ ko ngongol ni kireb? Dar gelgad ko tirok Got ban’en, boch i yad e de mich Got u wan’rad. Bochan ndabiyog ni ngar guyed Got nga owcherad ma yad be ngongol ni gowa der guyrad Got.​—Ezek. 9:9.

14​—Mini’ e yibe yog ni “pi tafager”? Fare thin ni “pi tafager” u roy e gathi goo piin nib fel’ thildad e ba muun ngay. I fanay John ere bugithin ney ni ba muun ngay urngin pi walagdad ni Kristiano.

Tin Gad Ra Fil Riy:

4. Piin ni ke ilal ko tirok Got u lan e ulung e ri yad ma felfelan’ ni yad ma guy e piin ni fel’ yangaren u lan e ulung “ni yad be fol ko tin riyul’.” Ere rib gel e felfelan’ ni ma tay e gallabthir u nap’an ni yad ra ayuweg pi fakrad ngar adaged e tirok Got!

5-8. U fithik’ e piin ni yad ma maruwel nib gel ni fan ngak pi walagrad ni bochan e t’ufeg rorad ngorad nge ngak Jehovah e piin nta lekag e ulung, nge pi missionary nge piin nu Bethel ara branch office, nge piin ni pioneer. Michan’ rorad e ba ga’ fan ni ngan folwok riy ma ba t’uf rorad ni ngad pied e ayuw ngorad u fithik’ e t’ufeg.

9-12. Thingar da folwokgad ko n’en ni rin’ Demetrius ni be’ nib yul’yul’ ma gathi n’en ni rin’ Diotrefes ni be’ nib ta thibthibnigey.

“UM PIRED NI GIMED BA T’UF ROK GOT”

(Jude 1-25)

Weliy Jude rogon e piin ni yad be yib ra maathukgad ko ulung ni yad “ma gun’gun’, ma yad be yin’ e kireb nga daken boch e girdi’; ma tin nib kireb ni be ar’arnag dowrad e yad ma fol riy.” “Yad ma weliy murung’agrad ni yad e sororad; ma yad be pi’ boch e girdi’ nga lang ko thin ni fan e nge yog ngorad e tin ni yad be finey.”​—Jude 4, 16.

Uw rogon me yog ni togopluw e Kristiano ko tin nib kireb? I yoloy Jude ni gaar, “Pi tafager rog, ri dab mpaged talin e tin ni yog e pi apostal rok e Somol rodad i Jesus Kristus.” Miki gaar: “Um pired ni gimed ba t’uf rok Got.”​—Jude 17-21.

Fulweg u Boch e Deer ko Bible:

3, 4​—Mang fan ni i tay Jude ir ngak e pi Kristiano ni ngar ‘athamgilgad nguur pired ko fare mich ni ke pi’ Got’? Ya bochan ‘e girdi’ nib kireb e kar bad ra maathukgad nga fithik’ e girdi’ ko ulung. Pi girdi’ ney e ‘kar pingeged murung’agen e runguy rok Got nga bang, ya nge yib e toway rorad ko ngongol nib kireb ni yad be rin’.’

20, 21​—Uw rogon ni nga ‘ud pired ni gad ba t’uf rok Got’? Dalip e kanawo’ nrayog ni ngada rin’ed e re n’ey riy: (1) Ngauda gelniged gadad ko michan’ rodad “ni th’abi thothup” u daken e fol Bible nib elmerin ma ngad pasiggad ko machib; (2) ngaun meybil u fithik’ i ‘gelngin Got nib thothup,’ nge (3) ngan maruweliy nge yog e michan’ ko n’en ni ke ayuweg ni nge yog ngodad e yafos ni manemus​—ni aram fare maligach rok Jesus Kristus.​—John 3:16, 36.

Tin Gad Ra Fil Riy:

5-7. Gur ra yog ni thay e piin ni kireb ko gechig rok Jehovah? Rogon ko fa dalip i n’en ni ke ginangey Jude riy e dabiyog.

8-10. Ngada folgad ko n’en ni rin’ Mikael ni fare pilungen e engel ngad daged e tayfan nga mat’awun Got.

12. Piin ni kar digeyed e tin riyul’ ni yad ma dake yad be t’ufegdad e rib gel e riya’ riy ko michan’ rodad ni bod ba malang nder m’ug u fithik’ e ran nga ba barkow fa piin ni yad be nong. Tamachib nde riyul’ e ra m’ug ni gowa rib gol, machane ri yad bod e manileng ndariy e ran ni be yib riy ni aram e ri dariy e tirok Got rorad. Pi cha’ nem e dariy wom’engirad ni bod ba ke gek’iy nib yam’. Yad be yan i yan ko magothgoth ni bod ba ke gek’iy ni kan pug nga lang. Gad ba llowan’ ni faan gad ra palog ko piin kar digeyed e tin riyul’ ma yad be togopuluw ngay.

22, 23. Tin riyul’ e Kristiano e yad ba fanenikay e tin nib kireb. Reb e maruwel ni ngan ayuweg “e piin ni yad be toruruw” ngar chuwgad ko magothgoth ni manemus, e piin ni kar ilalgad ko tirok Got​—ni ri ba ga’ ni piin ni piilal ko ulung—​e yad ma pi’ e ayuw ngorad ko tirok Got ban’en.

[Pictures on page 12]

Ran, nge gelngin Got, nge racha’ e ke micheg ni “Jesus e ir Fak Got”