Urngin Mit e Liyor Ma Ba M’agan’ Got Ngay?
Ba ga’ ni ma yog e girdi’ ni:
▪ “Urngin e teliw e ma pow’iydad ku Got.”
▪ “Demtrug e n’en ni ke michan’um ngay ma ba fel’ faanra gab yul’yul’.”
Mang e ke yog Jesus?
▪ “Marod ko bin nib wen’in e garog, ya ba ga’ langan e garog ko nifiy, ma kanawo’ ni yan ngay e mmom, ma boor e girdi’ ni be yan u daken. Ma garog ko yafos e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.” (Matthew 7:13, 14) De mich u wan’ Jesus ni urngin e teliw e ma pow’iydad ku Got.
▪ “Ma boor e girdi e ra gaar ngog, Somol, Somol! U daken fithingam e ug weliyed e thin rok Got riy ngak e girdi, ma fithingam e ug tulufed boor e moonyan ngay, ma fithingam e ug ngongliyed boor e maangang ngay! Ma aram e bay lungug ngorad, Ri da gu nangmed. Mu chuwgad rog, gimed e piin ni gimed ma rin’ e kireb!” (Matthew 7:22, 23) Gathi urngin e girdi’ ni ma yog ni yad ma fol rok Jesus e ba m’agan’ ngay.
BOOR e girdi’ ni yad ba yul’yul’ ko teliw nge yalen rorad. Machane uw rogon ni faanra de puluw e teliw rorad ko thin nu Bible? Be dag Jesus ni ba’ e magawon ni faanra ngan fol ko yalen ko girdi’ u nap’an ni yog ngak e pi tayugang’ ko teliw ni gaar: “Kam n’iged fan e thin rok Got kam folgad ko tin ni gimed e msunumiyed.” Mi ki yog ni gaar: “Pi girdi’ ney e yad be ta’ fag ko thin ni yad be yog, machane rib mal’af lanin’rad rog. Mm’ay fan e siro’ nge pigpig ni yad be tay ngog, ya pi motochiyel ni girdi’ e sunumiy e yad be machibnag.”—Matthew 15:1-9; Isaiah 29:13.
Gathi kemus ni nge michan’dad ya kub ga’ fan e ngongol. Be gaar e Bible: “Yad be yog ni yad manang Got, machane be m’ug u pangirad ndar nanged Got.” (Titus 1:16) Be yog e Bible u murung’agen e girdi’ ko ngiyal’ ney ni gaar: “Ma bayi t’uf e fafel rorad me tomur Got u wan’rad; ma bay ur dake yad be liyor ngak Got, machane bay ra pied keru’rad nga gelngin. Mu tiyem u urel rok e pi girdi’ nem.”—2 Timothy 3:4, 5.
Gathi kemus ni ngan yul’yul’ ya ku bay boch ban’en ni ba t’uf ni ngan rin’. Mang fan? Ya rayog ni nge yul’yul’ be’ ko tin ni googsur. Ere ba ga’ fan ni nge yog e tamilangan’ nib puluw u murung’agen Got. (Roma 10:2, 3) Nga chag e ngongol ko tamilangan’ nib puluw ko Bible ma ra felfelan’nag Got. (Matthew 7:21) Ere bin riyul’ e teliw e ba ga’ fan ni nge puluw e machib nge ngongol nge lem riy ko thin nu Bible. Ma ngongol nib puluw e be yip’ fan ni ngan rin’ e tin nib m’agan’ Got ngay gubin ngiyal’.—1 John 2:17.
Faanra gab adag ni nga mu nang boch murung’agen Got mog ngak reb e Pi Mich rok Jehovah ni nga fil e Bible ngom ni dariy puluwon.
[Blurb on page 9]
Bin riyul’ e teliw e ba muun ngay e machib,
ngongol, nge lem nib mat’aw