Ra Ngan Yul’yul’ Ma Ke Gaman, Fa?

Yooren e teliw e bay boch e girdi’ riy ni yad ma ayuweg e girdi’ u fithik’ e yul’yul’. Ere, faanra ba yul’yul’ be’ ko teliw rok ma be guy rogon ni nge rin’ e tin nib fel’, ma bay rogon ko baan ngan e teliw e ba’ riy, fa?

Mu lemnag e n’en ni buch rok Saul ni be’ nu Israel ni ir e yib i mang apostal Paul u nap’an e bin som’on e chibog. Rib yul’yul’ ko teliw rok piyu Jew, ere i guy rogon ni nge taleg e liyor ni ma tay e pi gachalpen Kristus ya i lemnag nde puluw e liyor ni ur ted. (Acts 8:1-3; 9:1, 2) Machane bochan e runguy rok Got ma ke tamilang u wan’ Saul nrayog ni nge lemnag be’ ni be pigpig ngak Got u fithik’ e yul’yul’, machane faanra de nang e tin riyul’ ma ra yan i aw ni pigpig ni be tay e de fel’ u wan’ Got. (Roma 10:2) Nap’an ni ke nang Saul e tin nib m’agan’ Got ngay, ma aram me thilyeg e ngongol rok nge chag ngak pi gachalpen Kristus ni aram e piin ni i gafgownagrad, nguur liyorgad ngak Got u taabang.​—1 Timothy 1:12-16.