Urngin Raba’ e Teliw nib Fel’, Fa?

GAD be par u ba fayleng ni kari yoor raba’ e teliw riy. Dawori n’uw nap’an ni kan gay murung’agen e teliw ma kan nang ni bay 19 raba’ e teliw ni boor e girdi’ ngay, ma 10,000 raba’ e buchuuw e girdi’ ngay. Ere, boor raba’ e teliw nrayog ni nge mel’eg e girdi’ ni ngar uned ngay. Machane, ga be lemnag ma bay rogon ko bin ngan e teliw e ngam mel’eg?

Boch e girdi’ e yad ma yog ni pi yurba’ i teliw e bod yu pa’ i kanawo’ ni boor ni yan nga taa ban’en. Ere yad ma lemnag ni demtrug e re pa’ i kanawo’ nrayog ni ngar mel’eged, ya gubin ni be sor nga taa ban’en. Yad ma yog ni gubin raba’ e teliw nib fel’ ni bochan e kemus ni taareb e Got ni bay.

Urngin Raba’ e Teliw ni Yad Ma Liyor ko Bin Riyul’ e Got, Fa?

Mang e yog Jesus Kristus ni ir e bin th’abi salap e tamachib u murung’agen e re n’ey? I gaar ngak pi gachalpen: “Marod ko bin nib wen’in e garog.” Mang fan? “Ya ba ga’ langan e garog ko nifiy, ma kanawo’ ni yan ngay e mmom, ma boor e girdi’ ni be yan u daken. Ma garog ko yafos e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.”​—Matthew 7:13, 14.

Gur, be yog Jesus ko re thin ney ni boch e teliw e be sor i yan ko “nifiy” ara magothgoth? Fa be yog ni kemus ni yigoo piin nde mich Got u wan’rad e yad be yan u daken fare pa’ i kanawo’ nib mom, ma piin nib mich Got u wan’rad e yad be yan u daken e bin nib mo’maw’ e kanawo’ ni yugu aram rogon nib thilthil e teliw rorad?

Tomren ni yog Jesus ni kemus ni l’agruw pa’ e kanawo’ ni bay, me gaar: “Mu ayuwgad ko profet nde riyul’; ya bay ra bad ngomed ni yad bod e saf u wuru’ i dowrad, machane u fithik’ i lanin’rad e ri yad bod e wolf ni ma k’ad.” (Matthew 7:15) Tomur riy me yog ni gaar: “Gathi gubin e girdi’ ni ma piningeg ni ma lungurad Somol, Somol, e yad ra yan nga suwon Got u tharmiy, ya kemus ni piin ni yad ma rin’ e n’en ni baadag e Chitamag nu tharmiy ni ngar rin’ed e yad ra yan ngay.” (Matthew 7:21) Faanra yima yog e profet ngak be’ ara ma yog be’ ni Jesus e “Somol” rok, ma yira yog ni ir be’ nib m’ing ko teliw, ma gathi be’ nde mich Got u wan’. Ere, rib tamilang ni be yog Jesus ni gathi gubin raba’ e teliw nib fel’, ma gathi gubin e tamachib ko pi yurba’ i teliw e rayog ni ngan pagan’uy ngorad.

Rayog ni Ngan Nang ko Baan Ngan e Teliw e Ba Riyul’, Fa?

Gathi gubin raba’ e teliw e yad ma liyor ko bin riyul’ e Got. Ere uw rogon ni ngam pirieg e baan riyul’ e teliw? Susun e kam man nga reb e nam nib ga’ ma da kum nang e gin ngam man ngay. Ma aram ma ga lemnag ni ngam ning e ayuw ngak be’. Ere gaar be’ ngom, ‘mu sor ko ngek’ ma be’ e gaar ngom, ‘mu sor ko ngal.’ Miki gaar be’ ngom e ‘gur e ngam dugliy e gin ga be lemnag nib puluw ni ngam sor ngay.’ Ma aram me yib be’ ni bay e map rok me dag ngom e gin nib puluw ni ngam sor ngay. Miki pi’ fare map ngom ni ngam yaliy me ayuwegem u nap’an ni ga be milekag. Ere gathi ke pagan’um ya kam nang e gin nib puluw ni ngam sor ngay?

Ere ku er rogon ni bay ban’en nib t’uf ni nge pow’iydad ya nge yog nda mel’eged e baan riyul’ e teliw. Machane gur, bay ban’en nrayog ni nge pow’iydad? Arrogon, ba mudugil ni ba’. Re n’em e aram e Bible ni be gaar: “Urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got.”​—2 Timothy 3:16.

Dabisiy ni bay ba ken e Bible rom nrayog ni nge ayuwegem. Piin ni kar fal’eged e re ke babyor ney ni aram e Pi Mich Rok Jehovah, e ku yad be pi’ e athamgil nga lanin’um ni ngam yaliy e pi babyor ko Bible nni yoloy som’on ni thin ni Greek. Pi babyor nem e yoloy boch e Jew ni boor e yiiy ni bay ko pi babyor ko Bible nni yoloy som’on ni thin ni Hebrew nra guyed ni ke lebug. Pi thin ney e ra ayuwegem nge yog ni tamilang u wan’um ko baan ngan e teliw e ba riyul’, ma baan ngan e de riyul’. Aram fan ni kan uneg e thin ko pi babyor ko Bible nni yoloy som’on ni thin ni Greek ko pi thin ney.

Nap’an ni ga be beeg e tin migid e thin, mag taarebrogonnag e n’en ni be yog e Bible ko n’en ni ga manang. Dab mu pagtalin e n’en ni yog Jesus u rogon ni ngad nanged e baan riyul’ e teliw nge baan nde riyul’. I gaar: “Ba ke gek’iy nib fel’ rogon e ra k’uf ma ba fel’ wom’engin, ma ba ken nde fel’ rogon e ra k’uf ma ba kireb wom’engin. Ba ke gek’iy nib fel’ rogon e dabiyog ni nge yib wom’engin nib kireb, ma ba ken nde fel’ rogon e dabiyog ni nge yib wom’engin nib fel’.” (Matthew 7:17, 18) Am lemnag dalip wom’engin e ken nib “fel’” e gek’iy ni be yog e Bible.

[Picture on page 3]

[Blurb on page 3]

Bible e bod bangi map nrayog ni nge ayuweg be’ nge pirieg e baan nriyul’ e teliw