Rayog ni Ngan Nang Fan e Thin nu Bible?

“Gubin e madnom ni gamad ma beeg chon e tabinaw rog e Bible. Machane, gathi ri gu baadag. Ba mich u wan’ug ni Bible e Thin rok Got, machane rib mo’maw’ ni nggu nang fan e thin riy.”​—Steven, Britain.

“Nap’an ni ke gaman 17 e duw rog, mug gay rogon ni nggu beeg e Bible. Mug pirieg nib mo’maw’, ma aram mug tal.”​—Valvanera, Spain.

“Immoy ba ngiyal’ ni ug beeg e Bible ni bochan e gu lemnag nthingar gu rin’, ya gub Katolik. Dalip e duw ni gu beeg mfin gu mu’nag! Machane yooren e thin riy e da gu nang fan.”​—Jo-Anne, Australia.

BIBLE e reb e babyor nib chugur ni nge gubin e girdi’ u fayleng ma yad manang murung’agen, ya boor e girdi’ ni ma chuw’iy ma boor e girdi’ ni bay rorad, ma boor mit e thin ni kan pilyeg ngay, maku rayog ni ngan rung’ag ko radio fa ngan guy u T.V. Machane, yooren e girdi’ ni bay e Bible rorad e ba mo’maw’ ni ngar nanged fan e thin riy. Me gur?

Baadag Got ni Ngad Nanged Fan e Thin rok, Fa?

Ke yog e Bible ni: “Urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed.” (2 Timothy 3:16) Riyul’ ni thin rok Jehovah Got e bay u Bible. Ere, ga be lemnag, ma baadag ni ngad nanged fan e Thin rok? Fa ba mo’maw’ ni ngan nang fan ya kemus ni yigoo pi tayugang’ ko teliw nge piin ni yad ma fil murung’agen e Bible e rayog ni ngar nanged fan?

Mu guy e pi thin nu Bible ni baaray:

“Tin ni ke yog Somol ni nguum rin’ed ni ir e kug pi’ ngomed e daba’ e gathi ban’en nrib mo’maw’ fa gomanga ban’en ndabiyog ni ngam lethgad ngay.”​—Deuteronomy 30:11.

“Ra i tamilanganuy ko machib rom ma be pi’ e tamilang nga lanin’uy, ma be pi’ e gonop ngak e piin ndawor ni sukulnagrad.”​—Psalm 119:130.

“Ma ku er rogon e re ngiyal’ nem ni suguy [“gelngin Got nib thothup,” NW] Jesus ko felfelan’ me gaar, “Chitamag ni gur e Somol u tharmiy ngu but’! Kari mmagar ya kam dag ngak e piin ndar skulgad e n’en ni kam mithag rok e piin ni yad ba llowan’ nge piin ni yad ba skul.”​—Luke 10:21.

En ni thin rok e Bible e baadag ni ngam nang fan! Machane, bin riyul’ riy e ri boor e girdi’ nib mo’maw’ ni ngar nanged fan e thin nu Bible. Ere, mang e ra ayuwegrad? Tin migid e thin e be tamilangnag dalip ban’en nrayog ni nge ayuwegem ngam nang fan e thin nu Bible.